رسائل المجموعة

صور ، لي ثلاث سنين ما جاني خبر


.
.
وفـ كل مناسبه يافيمتو .
هنوك المهنيين
تشاركنا في كل افراحنا
على ذكرانا مجتمعين ..
طعمه ولقاء وحلاوته
دايما تزيد حلاوته ..
طعمك ولونك يافيمتو
بالبهجه مرتبطيين ..


.
.
هااي .. السلام عليكم ورحمة الله وبركاته
شخباركم عساكم بخيراات ؟؟ صبايا وبنااات ؟؟ حلوين وشينااات ؟؟
كل عام وكل ابوكم بخير .. والشهر عليكم مبارك .. وعساكم من صوامه وقوامه يااااارب ..
هاه صايمين ؟؟ اللي موب صايم لا يدخل ويكسبّني ذنبه ؟؟
الموضوع فقط للصايمين والصايمات ..
اول شي باركوا لي خلصت تدريبي يوم الاثنين اول يوم رمضان , وخلصت ذالبصمة اللي ابصمها يوم واسحب عشر هع هع

بهذلتني جننتني , ليت معي واسطه وما ابصم مثل خويي فالدوام الاطخم مهند << وقسما هو قال لي اكتب الاطخم ..
بس سبحان الله .. ربي خلق وفرق بينه وبين مهند تركيا .. يعني وش جاب لـ جاب .. مهندنا احسن <= انتمتحديني بعشا اذا قلت الاطخم
مهند شخبار خويك دحيم؟؟ عساكـ مبسوط معه بس خخخخخ
<<< طبعا هذا كله خارج النص ..
نجي للموضوع الرئيسي .. انا ماحب ولا اعرف اكتب مقدمات .. لذلك جالس اهذري عليكم وابثركم بمهندنا .. يلا نطس نشوف بدير شو محضر لنا من هيكي فقرات <=اوخس يالوبنايني


][ مدخل ][

لي ثلاث سنين ما جاني خبر
وا عنا قلب المولع وا عناهـ

كنّ يوم الناس للعاشق شهر
لا رساله ولا كتاب ولا وصاهـ

اتصبر يا معين اللي صبر
واتحرى غايةَ القلبِ ومناهـ

الهوى يا اهل الهوى كله خطر
خلو المفتون يشبع من هواهـ

التمنـّي والتوجّد والسهر
ضرّني والقلب جاهـ اللي كفاهـ


][صدمني وبكى .. سبقني واشتكى][

قبل اسبوعين كنت رايح لاحد المستشفيات عندي مراجعه , الموهم فالطريق كنت ماشي ومالي وما للشيطان طاري << بدينا حركات شياب خخخ
وقفت عند اشارة طريق الملك عبدالله تقاطع الملك فهد , متجه غرب
الموهم كان واحد راعي كامري بزر توهـ لابس حفاظته جنبي على يميني , وانا ماسك اليسار , ومسموح لي اروح سيدهـ (سيدهـ = قدام)

ولعت الاشارة ومشينا , انا اللي ع اليسار وهو اللي ع اليمين ,

فجاه بدون اي مقدمات لف علي الدلخخخخ ويصقع سيارتي , انا اشرت له بيدي وقلت رح مسامحك( ابي الحق علىموعدي البايخ )

توني مشيت ويمشي ذالمفهي , ويلف علي فوسط الشارع , ويوقف بالعرض وينزل ..

انا قلت هذا اكيد مهبول وفـ راسه حرش , عاد انا مرسّم بالشماغ ومابي اخرب عقالي<< قل قااااا
الموهم جاني يقول :
وش فيكـ انت شاري الشارع تمسك يسار وتروح سيدهـ , لايكون شارع ابوك , لا وبعد كل هذا تروح تنحاش , ترى انت هارب ..
التفت عليه وقلت :
طيب دق على كفيلي يسفرني خخخخ , تستهبل انت وخشتك , انت ماسك يمين وتخش فوجهي وتقول ليشاري الشارع؟؟
الموهم رفع صوته وقال كلامن ماينقال ابد ..
زبدت له وقلت :
ان تسان عندك شي دق ع المرور ويجي ونتفاهم , وان تسان ماوراك الا الهياط فـ وخر عن وجهي وراي موعد ومنيبفاضي لك ..
وحركت سيارتي وحطيتها ع الخدمه , وهو يصارخ علي يقول لاتحركها تراك هارب (خخخخخ شر البليّه مايضحك)
الموهم ماكملنا دقايق وجت سيارة المرور , وتوه بيتكلم وينط ذالمريوح فـ خشة العسكري , هذا لف علي وهذا صدمني وهذا وهذا ..!
عجبني العسكري يوم قال :
قل لا اله الا الله .. واصبر نسمع من الطرفين بهدوء ,
شرحنا له الحادث , وقال الخطا على راعي الكامري 100%
عاد عصّب وقال:
ليش وش ذا الظلم اول مره اسمع بذالقوانين , يصدمني وتقول الغلط علي ..!؟
يوم استدعى ضابط ويوم وصل قعد يهايط عليه راعي الكامري , وزبّد له الضابط واكله شحم خخخخ
جيت عند ذالولد قلت :
انا قايل لك من اول ان الغلط عليك ورح مسامحك ماتسمع الحكي , وسوا نفسه ماسمع شي وطنش ..!
شوي الضابط نادى ذالولد
الضابط : وين بطاقتك ؟
الولد : فالبيت والله
الضابط : طيب رخصتك؟
الولد : مسروقه
الضابط : والتامين ؟
الولد : ماطلعت
الضابط : طيب الاستمارة ؟
الولد : ضايعه من شهر
الضابط : طيب ليش مظلل سيارتك كلها .. ممنوعه التظليله كذا ..؟!
الولد : ( ساكت ما رد شي )

يوم جا الضابط وسوا بعض التحريات عن هالولد , جا الولد لسيارة الضابط يقول :
ياخي انا صدمت هنا عند ذالاشارة خمس مرات , وكلها نفس الطريقه امسك يمين واروح يسار , والخطا عليهم ..!
انا الصراحه ماقدرت امسك نفسي , وجلست اضحك فوجه الضابط , حتى اللي جالس مع الضابط جلس يضحك عليهههههههههههه
ياخي اذا تبي تنصب .. انصب زي الناس ههههههههههه
اما ذالسطعه نايمه من جد , لو بيمشيها على اختي نوره مامشت هع هع

الموهم راح وسجل محضر مدري وشو عن الحادث , وقال لي تتنازل؟
قلت لا والله , هالورع قليل ادب ويبي له من يربيه , وخله يصلح سيارتي(مع ان سيارتي ما جاها الا مخش بسيط بس )
واستقعدت له والله , مع اني داري انهم بيودونه للحجز المن يجي واحد يكفله ,,
ما كملت دقايق الا وتنزل ذيك العجيز من الكامري , (انا ماشفتها لان السيارة كانت مظلله) ,
طبعا معروف هي وش جايه بتقول , جت تتعذر عن ولدها وتطلب السماح وزي كذا , ومع صعوبة الموقف , صعبه اني برفض طلب هالعجيز الكبيرهـ , قلت لها خلاص مسامحه بس بشرط , يجيني ويتاسف عن الحركة قليلة الادب اللي سواها , ويعتذر مني ..
الموهم جا الولد واعتذر وحسّيت انه خنقته العبرهـ هع هع

هذي هي صورته جنب سيارة المرور , بعد ما سجلت التنازل وراح يكمل باقي الاجراءات ..

الموهم طيحّت اللي فـ راسي ..
بس للاسف .. راح الموعد علي ..!

مايستفاد :
1/ اذا شكيت انه 1% الغلط عليك , وسامحك اللي صدمته لاتفكر توقف ..
2/ قبل تسوي اي حادث (كانك تدري انت وخشمك) , تاكد ان معك تامينك ورخصتك وبطاقتك واستمارتك … ولاتظللابد ..
3/ حاول ترسّم دايما بالشماغ والعقال .. عشان اذا صدمت مع بزر تصير لك هيبه قدامه ..
4/ رح قبل موعدكـ بوقت كافي .. تحسبا لاي ظروف مخيسهـ ..
5/ اللهم اني صائم .. يارب تب علينا بس ..


][ هندي حارة جيراننا ][
خلصنا من الفلبينيين جينا للهنود
تذكرون سالفة ذالهندي ؟؟

طيب اللي ما يذكرها يرعص على اسمي ويشوف موضوعي اللي راح .. فيه سالفتهـ

الموهم .. طلعت يوم الربوع العصر , بشتري رز مصري (ذاك اللي يسوون به جريش مدري سليق)
عاد مرّيت من الحارة اللي قبالنا , سمعت ان عندهم سوبر ماركت مخفض ,
وانا رايح كان هونيك حفريات وقلق , عاد وقزّيت لي ذاك الهندي اللي يمشي وشايل معه كرتون وكيس , ويطري علي سالفة كومار خوينا في الموضوع اللي راح هع

قلت لازم اسوي شي , مافيه امل اخليه كذا يروح مني هههههههه
رحت جنبه ومدّيت يدي وسلمت ,, وما رفع يده ..
قربت زياده وسلمت مره ثانيه , ولا رد علي ,, مستغرب ومعذور اصلا على ذاللي شايله

جيت ووقفت قدام وجهه بالعرض بسيارتي , ومديت يدي مره ثالثه هههههههههه
الرجال ارتاع يبي الفكه بس , نزل الكرتون والكيس لا اراديا ورد السلام (من الروعه بس )
عاد صورته ولا ضبطت الصوره , صارت موشوشه شووي ,,

ما يستفاد :
1/ اي واحد يمرّ جنبك ويسلم عليكـ .. رد السلام ولو انك شايل تريلا فوق راسك .. نزلها وسلم ورجعها هع هع
2/ لا عمرك تتحرش فـ باكستاني .. ترى وقسما تندبج , خل حيلك ع الضعوف بس هع (ماصارت لي ابد)
3/ اذا شفت سيارة بيضا .. اعرف ان راعيها اقشر وما ينتحارش , وتلقى معه كاميرا دايم ههههه
4/ كيس الرز المصري كان بـ 12 وصل 30 ريال ,, وغيره وغيره وغيره …. الخ .. (حسبي الله على المتسببين في رفعالاسعار) ..


][ ولا تسرفوا ][

ابو صالح : صالح ياولدي .. رح اشتر ذبيحة وكيسين رز …. وخذ هذي ثلاث مية ريال ..
صالح : وين يايبه .. وش تسوي الثلاث مية ريال .. ما تجيب لك ولا دجاجتين ذاليومين .. كل شي مرتفع سعرهـ .. وكيس الرز وصل 350 ريال ..!
ابو صالح : طيب زدها من عندك واشتر الذبيحة والرز والخضار والفاكهه من كل نوع .. ولاتنسى الببسي .. عشان اليوم فيه عزيمه سحور ومانبي نتفشل ..
صالح : ليش مين اللي بيجي يبه ؟؟
ابو صالح : بيجي ابو خالد وابوعبدالله ..
صالح : بس يبه ؟؟
ابو صالح : ايه بس .. ولازم ابيّض الوجه .. عشان بكرا مايقولون ابوصالح بخيل ولا مايقوم بالواجب ..!

ظاهره انتشرت في الخليج العربي للاسف .. وبين ابناء المسلمين ..
الاسراف باسم الكرم والبذخ ..!

يقول الله سبحانه وتعالى: {ان المبذرين كانوا اخوان الشياطين وكان الشيطان لربه كفورا}

تعليقاتكم


][رمضانيات ][

رسائل رمضانية
شهر رمضان
هدايا رمضانية سخية
وقفات رمضانية
وقفات واحكام لشهر رمضان
فتاوى رمضانية – 1
فتاوى رمضانية – 2
فتاوى رمضانية – 3
فتاوى رمضانية نسائية


][ صور و تـعليق ][
























][ مخرج ][

هلّ دمعي فوق خدّي وانتثر
قلبي المجروح وين القى دواهـ

الحبيب ان غاب زوله او حضر
ما يحب القلب محبوبٍ سواااهـ

من بحر جدهـ الى شرق الخبر
في الحضر والبدو ما نلقى حلاهـ

شوفة المحبوب والروض الخضر
تنعش القلب المشكى وتغذاهـ

ارتجي ارميه بلامات القدر
ولا اختلف دامي على قيد الحياهـ

في جميع الناس ملكت النظر
ما نسى حبي وقلبي ما نساهـ



في الختام .. اعتذر عن اطالتي , واتمنى اني قدمت ما يليق بذائقتكم .. ويرتقي لمنتهى رضاكم …
واتقدم مرهـ اخرى بالتهنئه لابونواف ولموسعن صدرهـ وجميع اعضاء وزوار ومتابعي القروب بالشهر الكريم
طلب صغير اتمنى ان لا تبخلوا علي فيه .. دعواتكم لـ جدتي بالشفاء العاجل ,, وعودتها للسعودية بالسلامه يارب .. اللهم امين ..

سبحانك اللهم وبحمدك , اشهد الا اله الا انت , استغفرك واتوب اليك

اللَّهُمَّ انْتَ رَبِّي ، لا الَه الا انْتَ خَلَقْتَني وانَا عَبْدُكَ ، وانَا على عهْدِكَ ووعْدِكَ ما اسْتَطَعْتُ ، اعُوذُ بِكَ مِنْ شَرِّ ما صنَعْتُ ، ابوءُ لَكَ بِنِعْمتِكَ علَيَ ، وابُوءُ بذَنْبي فَاغْفِرْ لي ، فَانَّهُ لا يغْفِرُ الذُّنُوبِ الا انْتَ

كتبه / باء نقطه شين
بدر.الشوق

.
.
منتدى فهاوه
:للتواصل
b.s11@hotmail.com

 

مقالات ذات صلة

‫28 تعليقات

  1. الحقيقه يا شين الحوادث تضيق الصدر وتنكد … تسلم بدر الا وشلون سويت رسم الحادث كذا :$ ؟؟ لا صدق والله شلون

  2. بصراحه عجبني تصرفك يوم ادبت البزرواللي عجبني اكثر لما سامحته علشان الحرمه الكبيره كفو عليك وعلى تربيتكودعواتي لجدتك باالسلامه والشفاء العاجل وشكرا^ toffee ksa ^

  3. أول شي يعطيك العافية يا بدر الشوق و ما قصرت و موضوع بصراحة استمتعت فيه و أشكرك على جزء رمضانيات و الله يجعلها في موازين حسناتك بالنسبة لك يا سواليف القايلة هذا عن طريق برنامج Google SketchUp برنامج سهل و رائع تحياتي

  4. الله يعطيك العافية ويرجع جدتك بالسلامة وتكحل عينك بشوفها طيبةعوااااااافي قل آمين

  5. السلآم عليكم .. موزوع توووووحفه // والأحلى احداث الحادث والصوره اللي راسمها للشوارع والزحمات هههههه//تسلم يدينك بدر الشوق.. والله يشفي جدتك ويرجعها سالمه يآااااارب ..لاهنت بدر

  6. هلا والله بالجميع .. مروركم شرف لي يالدبين 🙂 اممم اخوي سوالف القايله بالنسبه للبرنامج فـ هو مثل ماتفضل اخوي السلامي Google SketchUp .. برنامج يستخدم في التصميم المعماري والتخطيط بشكل بدائي .. بس ينفع لمواضيع المنتديات والقروبات احيانا هع .. واذا تبي اضبط لك رسمه قل لي وابشر هع هع 😀 تحياتي لجميع الاعضاء والزوار ..وان شاء الله عجبكم الموضوع .. دمتم

  7. والله ياأخ بدر انك اظحكتني كثيرآ ووسعت صدري وشلت من صدري ثقالت دم السدحان هالقروي ومسلسلة الي كل سنة ابيخ من الي بعدها 🙂 جزية خيرآ وشهرك مبارك

  8. انت انسان رائع :Dو ايميلاتك تجنن ولاتحرمنا بليز من طلتك الحلوه واحلى شي فيك الدعاء كخاتمه للموضوع..وماتشوف شر جدتك وترجع لكم بالسلامه والله يعطيها الصحه والعافيه وطولت العمر وجداتنا كلهم اجمعين ..واصل خفت دمك الله لايحرمك ولايحرمنا منها وشكرا

  9. :> هذي المواضيع اللي تفتح النفس طرح رااقي اخوي يعجبني تفكيرك والله يشفي الوالدة(جدتك) ويرحعها سالمة غانمة وجعله تكفير لذنوبكم وذنوبها

  10. صدمني وبكى .. سبقني واشتكى موضوع روووعه استمتعت بالموضوع يعطيك ربي الف عافية بانتظار جديدك

  11. بالنسبة للحادث اذا كان هو ماسك اقصى اليمين فالخطأ عليه لكن اذا كنت انت ماسك اقصى اليسار وهو بالمسار الثاني من اليسار اعتقد انه عليك الخطأ.

  12. ياخي بانسبه للأعضاء اللي فوق اللي ردودهم مثل وجيههم ، الحين انت وياه ورى ماتشمر عن يدينك يمال الكسر وتورينا مواضيعكم اللي ماهيب ماصله؟والثاني شكله عسكري جاي يخطط الحادث ويعلمك الخطأ من عليه، اقلها ادعً لجدته ياخي ! واترك التعليق على الموضوع.. ماقول الا الله يرحم الحال….. النسبه لاخوي بدر يعطيك الف عافيه وانا من اشد المعجبين بمواضيعك وايميلاتك وكم عضو اخرين من اعضاء القروب واصل إبداعاتك بعدين لايهمونك ذا السبك الي فوق انا اتوقع واحد منهم من اللي انت صدمته وحاقد عليك انك شهرت فيه ههههههههه تخيل بالله؟ على العموم تسلم يابدر وواصل إبداعاتك والله يرجع جدتك بالسلامه معافاه من كل مكروه وسوء يالله ياكريم

  13. بصراحه موضوع توحفه واشكرك عالطرح الممتع!وابيك تقرا تعليقي لاهنت!الصز انه صار لي نفس موقفك بس اني كنت متجه شرق على طريق الملك عبدلله تقاطع الملك فهد قبل سنه!بس المصيبه ان اللي صدمن موب بزر لا لا استشاري لا وبعد باكبر المستشفيات عندنابالرياض!!!!للأسف انه سوى زي سالفه اللي قشعك يعابط ويهايط ونا اقوله زي ماقلت لرفيدزك بس ماش الرجال تعلق بشراييني الاابي حقي وابنتظر الدورياه قلت انا مايخالف واخرته ركبه الغلط ميه بالميه!!!صدز ناس ماتستحي ووجيهن ودره الموهم مانيب قايل مايستفاد من سالفتي ابخليه لك وباسلوبك الزين بس ابي منك لاهنت انك تعقب على سالفتي بما ناه السالفتين متشابهتين!!؟؟؟؟واعتذرر عن الاطاله وشكرن!!بانتظارردك

  14. يسلمو غ الموضوع بس اعجبتن بقولتك :دق على كفيلي يسفرني ههههههههههههههههههههههههههههههههههههههههههههههههههههه والله انك منسم هههههههههههههههههههههههههههههههههههههههه

  15. اضحكتنا يابدر الشوق وانا اعرفك دمك خفيف وقلبك وفي واحساسك حي بس مالقي قلبا وفي هههههههههههههههههههههههههههههههههههههههه

  16. موضوع رائع وأنا أخوك… ولكن وراك على عبده والقات خل الرجال يخزن برحاته أحسن من إنه يطيح بالحبوب والحشيش الله يكفينا الشر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى