رسائل المجموعة

صور، توصيني على الكتمان .. وتبغى حبنا مايبان .. وتنساني

السلام علاكم ياجماعة الربع .. شخباركم عساكم بخير ان شاء الله؟؟
انا بخير الحمدلله ازقح ..
ادري وحشتكم واني مبطي عنكم << وجه واحد يقول بالله مافقدتوا بثارتي؟؟
والله لو الود ودّي ادخل كل يوم وانزل عشرين موضوع .. بس الظروف تخلي المدري وشو خروف ..
الموهم ماعلينا .. والله يا لكم وحشه يالخايسين .. <= وجه واحد يمون حبتين ..
مجهز لكم موضوع دسم شوي .. احاول اعوض فيه غيابي اللي راح ..
بس احب انوه لـ نقطه قبل نبدا ..
احب اوجه شكر خاص لاخوي وعزيزي واستاذي / ابونواف , اللي كان اول المعزّين لي
ولكل من عزّاني في وفاة جدتي .. الله يغفر لها ويرحمها ..
الموهم .. نروح للموزوع

اعضاء ومتابعي شبكة ابو نواف .. توصوني على الكتمان .. وتبغون حبنا ما يبان .. موش حنساكم

][ مدخل ][
اشوفك كل يوم واروح ..
واقول نظره ترد الروح..
اعيش فيها عشان بكره..
عشان ليلي اللي كله جروح..

][ كلام كبير يا سواق التاكسي ][

قبل اسبوع تقريبا كنت طالع بالشبح << ددسننا الموقر نسميه الشبح
الموهم ماشي ومالي من الشيطان طاري < كذا يقولونها الشياب الظاهر
عاد يوم وقفت عند الاشارة ويطفى علي وعيا يشتغل < شكله زعلانن علي من سنه ماركبته
وقفت ودحدرته على جنب ووقفت ليموزين ,
اول ماوقف ناظرت بوهته ماهيب غريبتن علي .. سلمت عليه وقلت ودي عند ثاني اشاره هنا .. قال عشره
قلت مافيه الا خمسه .. قال سبعه .. سكرت الباب ونزل وفتح لي الباب يقول خلاص يودي بخمسه ..
اول ما مشينا ويلقي علي شعر بالباكستاني .. قلت وش ذا وش يعني؟؟
قال عن الموت وما موت .. قلت الله المستعان بس ..
شوي طب فالعالم وانهم يركضون ورا الفلوس وان هذي دنيا وزائله .. قلت الله يعين يارجال ..
بعدين طب فـ الرئيس مشرّف بتاعهم .. وخذ لك سب وشتم ومدري ايش .. (وانا اناظر شارع بيتنا يارب يوصل قبل يطب فالعميق)
عاد اول ما طب فـ ربعنا واقول له وقف هنا بس عند العثيم .. هذا بيتنا بكمل مشي ههههههه ..
وانزل واكمل مشي واقول في نفسي لابوك لابو منيب قايل ..

ما يستفاد :
1- انتبه من بعضهم يحاول يستدرجك بالسوالف والحكي .. ويسحب منك كلام ويوديك فـ مليون داهية .
2- بعضهم يبين لك انه معارض .. بس هو يبغى يستفزك بالحكي ويوديك ورا الشمس .. :/
3- اذا طوّلت عليكم مره ثانيه لعد تنتظروني .. غيبوا شمسي هههههه

][ ميكـ اب سيارات ][
قد شفنا كثير يضبطون سياراتهم بس للاحسن ..
فيه اللي يركب جنوط واللي يحط فتحه وفتحتين وعشر ..
بس احد يطقم سيارته نفس الوان غرفته .. اول مرهـ اشوفها ..

ولا الثاني متاثر بـ بريزون بريكـ* .. خخخ

* ملاحظة / بريزن بريك هو مسلسل كله سجون وما سجون وخرابيط بس ابن اللذينا بطل..

][ قصة قريتين ][

مرتن من المرات في احد الاختبارات .. كان فيه سؤال يقول :
اذكر كتابين من تاليف المعماري حسن فتحي ؟
عاد انا كتبت :
قصة قرية – 1
قصة قرية – 2
طبعا الجواب الصحيح هو :
قصة قريتين ..
العمارة المحلية ,
الدكتور صحح لي الاجوبه , ويوم حط خطا ع الجواب , رحت راجعته وقلت طيب وش المشكله في الحل ؟؟ :/
قال اسم الكتاب قصة قريتين ..!
قلت طيب انا فصلت اكثر وكتبت كل قرية لحال .. المفروض تزود درجتي ..!
هو يوم قلت له كذا فطس ضحك , بعدين قال خلاص بمشيها لك ذالمرهـ خخخخ

مايستفاد :
1/ فـ الاختبار لا تترك ولا جواب فاضي ..
2/ راجع الدكتور .. يمكن نص درجه تفيدك وتنجحك .
3/ ذاكر زي الناس مره ثانيه , ولا تقعد تخربط فالاختبارات.

][ فاصل ][
توصيني على الكتمان..
وتبغى حبنا مايبان وتنساني..
تقول لي ودنا صافي وتحسب حبنا خافي..
ترا راعي الهوى مفضوح..

][ دوار السفارات ][

مرتن من المرارير رايحـ(ن) انا وابو عبدالعزيز بنطلع فيزا من احد السفارات ..
الموهم كنا متاخرين وباقي نص ساعه وينتهي دوام السفارهـ ,
وكان لازم نروح نسحب من الصرّاف ونرجع ..
عاد سحبنا المبلغ المطلوب وحنا فالطريق (وخبركم حي السفارات كله دوارات وغثا)
كان فيه واحد معه كابرس سبعاوي .. وطاق الريوس ويرجع فوسط الدور بسرعهـ ..
وكان الدوار زحمه شوي لحظتها , واضرب له بوري والرجال ما عنده فاحد .. مظلل وداعس على وراا ..
عاد وقفت انا بس مقدر امشي ريوس عشان مايصدمني .. بس علقت ع البوري ..
وصدمني المخيس من قدام .. بعدين يفتح قزازته ويطل ويصارخ يقول : انت ما تشوف ؟؟؟؟؟
همـّـن عاد يدعس ولا كانه شي صار ..!
كنا بنلحقه انا ورفيدزي ابو العز , بس كنا مستعجلين ع السفارة ,
شفت متخلفين كثير .. بس مثل هالمتخلف ما شفت ..!

مايستفاد :
1/ لعد تروح للسفارات الا معكـ سيارة قرنبع ..
2/ خذ معك فلوس دايما احتياط.
3/ لا تطلع فيزا الا وانت محسن النيهـ < وجه يغمز ليوسف صقيقي

][ صور وتـعـليق ][

هذي الصورة فـ حي السفارات – الرياض
ذكرتني بذاك اللي جالس يدور فالفيصلية ولابس ثوب بيت ليش؟؟
عشان يقولون له الناس هذا ساكن فالفيصلية هههههههههه



يوووه من يذكرها حبشه ..
الا ياليت الزمن يرجع … ولا ليت الليالي تدور
لالعب فالحوش حبشه … وابلع من حلاو غندور

سمعتوا باللي يقول لك فتح مطعم وقعد يكشّ ذبّان
هذا هو

يسمع بالذوق فالالوان .. يعني ياليت وقفت على كذا , حاط علم السعودية ولوحة فيها اسمه بعد

هذي الصور فالعيد اللي راح , مدري ليش حنا يا عيال الرياض اغلبنا ما يحلى له اللعب الا وهو حافي ..

لا بعد ما نحب نشبب الا فالزبايل وانتم بكرامه او فـ علب الببسي هههههههههههه نحس بمتعه شديدة
انتو ياللي برا الرياض عندكم مثلنا ؟!

يمه ..!
بسم الله الرحمن الرحيم ..
ورا عيونهم كذا تلمع ؟!
عسى ما احلم فيهم بس ..

الاستخدام الامثل لصناديقنا اللي مدري وش تبي ..
يعنبوهم موب صناديق ذي ورق ..

بس يعجبني ذاللي حاط اللبن .. يعني ترانا فـ رمضان ههههههه

هذي فـ كليتنا الحبيبة .. يقال لك العالم يشتغلون وشف وش يسوون .. انواع اللعب .. للاسف هالشي موب عند الطلاب وبس .. منتشر حتى مع الموظفين <= وجه يغمز لكل ابو الموظفين اللي يقرون الموضوع ..

يعنبوك وش تحب فـ غرفة التكييف؟ هههههههههههه
ضاقت الاماكن يعني؟!
مدري ليش احس انه طاقه الحر وصار يحب هالغرفة ..!

احس لسان حالهم يقول : نزل يدّك الله ياخذك ريحة ابطكـ .. ههههههه

][ ديرة الواسطات ][

قبل كم يوم رايح للحلاق .. يقال لك بكشخ وبضبط سكسوكتي اللي كنها ذاك السهم اللي يقول هنا الشمال ..
الموهم دخلت للحلاق .. اشوف عنده زحمه وحوسه , وقلت كذا بتاخر ما جا دوري ..
توني جالس وماكملت خمس دقايق ,
ويناديني الحلاق : تعال شوي ..
يوم رحت له ويقول لي : اجلس هنا ..
انا استغربت : شلون .. هذولا كلهم قبلي .,؟!
قال : لا انتا زبون عندنا .. انتا فيه واسطه ..
×
مره رايح لمركز تصوير ورق .. كان نفس الشي زحمه ..
الموهم جا ابو هنود من وراي وناداني وقال هات الورق .. قلت ليش؟
قال انتا فيه واسطة
×
مرهـ رايح للمخبز .. شريت منه خبز , وراح له اخوي ومايدري اني شريت خبز وشرا منه , بعدي علاطول يعني ..
وصلنا للبيت ولقيت الخبز اللي جبته طعمه كله عجين وما استوى .. والثاني زين ومستوي ..
رجعت له ومعي كل الخبز , ومعي اخوي , وقلت له : ليش هذا كذا غير عن هذا ..
قال : اخوك زبون وعطيته من العجين الزين .. وانت اول مره اشوفك << طبعا باكستاني بس هذا معنى كلامه .. بس يعني يقصد اخوكـ معه واسطة .. حتى في الخبز ..!

ظاهرة سلبية انتشرت في الفترة الاخيرة بزيادة .. احيانا تكون مفيدة لنا , واحيانا اكثر تكون عكسيه علينا ..!
اول كنا نقول الواسطات بس فالوزارات والوظايف وذالاشياء الكبيرة .. بس الحين حتى في تفاصيل حياتنا .. ومن مين؟؟ من الاجانب ..!

نقاش مفتوح للجميع بالابحار في هذه الفقرهـ << يلوموني وانا مسوي رسمي ..!

][ مـخـرج ][
صحيح النظره ماتكفي..
من الالام ماتشفي..
ولكن عذرنا الحاضر..
نراعي الوقت والخاطر..
ومادام النظر مسموح ..
اشوفك كل يوم واروح..
عسى النظره ترد الروح..
نخاف من ايش والدنيا
تحاسبنا على الثانية..
بتاخذ مننا الااشواق
وتعطينا حياة ثانية ..

في الختام .. اشكركم كل ابو الشكر اللي فالعالم على اكمالكم للموزوع ..
واتمنىا ان يحوز على رضاكم وينال ذائقتكم كل ابوٍكم ..

سبحانك اللهم وبحمدك , اشهد الا اله الا انت , استغفرك واتوب اليك

اللَّهُمَّ انْتَ رَبِّي ، لا الَه الا انْتَ خَلَقْتَني وانَا عَبْدُكَ ، وانَا على عهْدِكَ ووعْدِكَ ما اسْتَطَعْتُ ، اعُوذُ بِكَ مِنْ شَرِّ ما صنَعْتُ ، ابوءُ لَكَ بِنِعْمتِكَ علَيَ ، وابُوءُ بذَنْبي فَاغْفِرْ لي ، فَانَّهُ لا يغْفِرُ الذُّنُوبِ الا انْتَ

كتبه / باء نقطه شين
بدر.الشوق
وفي رواية / ابو س ـعد
 

للفهاوة طعم اخر معنا

للتواصل :
b.s11@hotmail.com

 

مقالات ذات صلة

‫24 تعليقات

  1. مشكور اخوي علي هالموضوع الرائع بس ليش التفرقه العنصريه.. يعني الصراحه لولا الاجنبي كان ما اكلت خبز يومها…. ولولا الاجنبي كان مشيت مشي لبيتكم ما لقيت تكسي.. بالعكس انت لازم تشكر الاجانب لانهم يخدموكم وقيس هالشي علي جميع الوظائف.. ولا تنسي السعودي يخاف علي برستيجوا يعني ما يشتغل اي مكان ولا اي وظيفه… السمووووووووووووووحه

  2. ماضوع يا مشعل متعوب عليه من جد فكرت ازرفه بس قلت مالها داعي الرجال تعبان عليه وأنا آخذه بارد مبرد

  3. ماشالله عليك…أنواع الضحك.. اشوه انك ماتقدر تنزل عشرين موضوع في اليوم… اما سواق التاكس؟؟! يعني ماقدرت تقوله: انا نفر يشتغل في البوليس..كل يوم يودي ناس سجن .,,والحين سجن متروس نفر… عشان يبطل يتكلم موووووليه… وهذاك اللي دعمك .,.والله ماخليه,., انشالله الحقه لين يروح علي الحجز !! :$ تحياتي

  4. بدر الشوق عظم الله اجرك , واحسن الله عزاكم الله يرحمها بواسع رحمته ….الله يرحمها ويتغمدها في جنات النعيم موضوعك روعه كالعادة , وغني عن التعريف الى الامـاااام يامبدع تحياتي لكَ

  5. اول شي عظم الله اجرك بـ جدتك خيو واحسن الله عزاك ثآنيآ وربي مدري شـ اقول موضوعك ختير مره مره عجبتني اول قصه تبع الليموزين 8) من جد ما يصير نبالغ بالكلام معهم هـ الي يستدرجون الحكي 😀 وكمان قصه القريتين ههههههههههههههههه مره حركه شكلي بسويها B سي يآ ,

  6. :Dمشكور اخوي بدر الشوق الصور مرررررره تضحك تســـــــــــــــلم تقبل مروري بنت ابوها وعشر اخطبوها

  7. السلام عليكم عظم الله أجرك يابدر وأحسن الله عزاكم ورحم الله ميتكم .

  8. تسلم اخوي ابوســـــــــــعد >>الله يخليلك سعد وموضوعك خوقاق ولا عاد تعودها وتبطي >>اذا انت تمون حبتين انا عشره صـــــــــــــــ لااااام

  9. ما تقصر موضوع ابداع واما على طاري الطراطيع حتى حنا بالشرقيـــه نفس الحاله في قواطي البيبسي وبالدرامات هههههههههه يعني الحال من بعضـــه نحس يطلع صوت قوي هع تحياتي لك

  10. اول شي عظم الله اجرك البقى براسك ابداااع اتعب وانا اقوول ابداع الله يعطيك الف عافيه

  11. هلا بك اخوي بدر تو مانور الايميل برسايلك يالغالي =) عظم الله اجرك والله يسكن جدتك فسيح جناته ايميل اكثر من ممتع بصراحه انا من المتابعين لرسايلك ولا عاد تطول الغيبه =)

  12. الا ياليت الزمن يرجع … ولا ليت الليالي تدور لالعب فالحوش حبشه … وابلع من حلاو غندور:D ههههههههههههههههههههههه ياضحكت ضحك على هالتعليق .. شاكرلك اخوي على هالايميل الحلو ..

  13. في الاول عظم الله اجرك في جدتك ثانيا الف شكر على ابداعك ولاتحرمنا من ابداعاتك

  14. بدر الشوق عظم الله اجرك , واحسن الله عزاكم الله يرحمها بواسع رحمته ….الله يرحمها ويتغمدها في جنات النعيم موضوعك أروع من الرااااائع مت من الضحك شاكر لك على الإيميل الراااااائع

  15. أهلين بدر الشوق أول شي أحسن الله عزائك ورحم الله ميتكم ــــــــــــــــــــــــــــــــــــــــــــــ أما حق التكسي هذا يبدا معك بالخفيف عشان تعيش جو معاه بعدين يشد شوي:$:D . أنا كنت أعرف أن الواسطات توظف وترقي وكذا …. لكن حلاقه وخبز ما توقعت !! . . عموماً شاكر لك عالموضوع الرائع وأنتظر جديدك على أحر من الجمر

  16. الله يغفر لموتى المسلمين ويثبتهم ,, ياحليلهم الصغار .. نشوف فيهم الطفولة صح ما شاء الله تبارك الله .. ** كان ودي تغطي ملامح راعي المطعم الله يكون في عونه **

  17. يسلموا حبيب ألبي على التقرير الموزوع على قولتك للأمام سر ألف شكر

  18. الله يعطيك العافيه وصدقني ترا الجميع مستمتع باطروحاتك الجميله

  19. الله يعطيك ألف عافيه واناشاء الله ماطووول الغييييبه بس والله الموظفين وغرفة التكيف حدهــا عجيبه,,,

  20. :~8):$:$:$:$:$:$هلا والله اخوي بس اصور روعة والله وازين شي حب غرفت اتكيف يمكن عرقان

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى