رسائل المجموعة

:: صمم بيتك بنفسك (تجربه حيّه) ::

100 مسا ع الناس الكويسه
قبل كل شي ،  في اعتذار لازم اقوله من سنتين !!
من تاريخ آخر موضوع لي في الشبكة وكان عن ديكور موجود هنا
طبعا الردود كانت اغلبها استفسارات وحضرتي مارديت ولا على استفسار << وفرحان ياباشا؟
الصراحة مارديت لأني ماكنت ادري انه في صفحه وفيها ردود وحركات وكنت اكتفي بالرد على اللي يرسلون على الايميل
فـ آسف اكبر من جبهة جنط السفينه على عدم الرد
؛
نخش في الموضوع وتراني موصيلكم على عصيرات وشاي وقهوه وسناكس ومشروبات روحيه ومشروبات ميته وحركات وكذا علشان محد يمل من الموضوع والصور
فـ حلفت محد يقوم

على طاري الحلفان ،، متى تختفي ظاهرة مضاربة السعوديين عند محاسبين المطاعم؟
والله ماتدفع ، حرام ماتدفع ، علي الطلاق ماتدفع وفي الأخير اللي يحلف كثير يطلع ناسي بطاقة الصراف والا يطلّع 50 من محفظته والحساب 60 وياخذ 10 من خويه اللي متناشب معه
..
بعد سنوات من معاناة البيوت والتنقلات قررت أخيرا آخذ بيت من الشركة وأستعوضت الله خير في بدل السكن ، ألزم ماعلى الواحد راحة باله
وبما ان تصميم البيت يحتوي على مجلس حريم وماعندي حريم ، فـ قررت احوله إلى ديوانية جلوسي ، تلفزيون وجلسه وكمبيوتر وشاي ومباريات ونقاشات حول مشاكل المجتمع << أمحق
واعذرونا على جودة بعض الصور ، شي بالجوال وشي بالكاميرا
..
أول شي ألقيت نظره على شكل الغرفة .. وماادري ليش تذكرت توقيف المرور في الموضوع هذا ! المهم بلاها الذكريات المريره ، نشوف الغرفه

وطبعا أول شي لازم يتغير لونها البائس ، فـ اخترت اللون وبدأت أم المعارك


..

’’ بقول شي قبل لاتصبغون أي شي في بيتكم ، لازم تعرفون اشياء مهمه ،،

* نوع الصبغ المناسب للجدار ، بلاستك أو زيتي
* اختاروا اصباغ نوعيات جيده.. جوتن ، سيغما ، الجزيرة هم الأفضل واتركوا الرخيص
* لاتشتري الصبغ و رولة الصبغ وتجي تراكض لبيتك فرحان 😀 اشتري العلبة اللي بتصب فيها بوياتك وخلطاتك ، ولا تنسى الفرشاه الصغيره للأماكن الضيقه
* وأهم شي تشتري شي تحرك الصبغ بعد ماتخففه بـ”تنر” بالنسبه للزيتيه أو بالماء بالنسبه للبلاستك وإلا بيصير فيك مثل ماصار فيني ومالقيت شي احرك فيه فكان التالي:

وبطبيعة الحال ذابت أوراق الدليل لين اهتديت الى استخدام عصا رولة الصبغ

((اللي تابع الموضوع السابق بيلاحظ انه في واحد جاني واشتغل وطار عقاله مع الحماس ،، هو نفسه ابو ثوب ، ويقاله هالمره كان حريص ونزل غترته وعقاله ، بس جاب العيد وجا يبي يفزع في صبغ بويه بالثوب ))
كأني قليل خاتمه
والحمدلله تمت عملية المزج والتخفيف بنجاح

وبدأت عملية الصبغ

أثناء العمل لاتحرمون أنفسكم متعة احتساء الشاي والقهوة
..
الآن إنتهيت من صبغ الجدران ، وصار وقت تغيير الأرضية ،،
ولازم ننظف كل شي قبل عملية التركيب

وهنا ودي اقول شغله : ان اي واحد فيكم اذا فكر ياخذ بيت وقالولك سيراميك لاتفرح لأن بعض الانواع لو يحطون مكانها تراب وتمشي عليه اصرف  بسبب شكلها البايخ أولا ورداءة نوعها ثانيا
وكبديل ، مافي أحلى من الأراضي الخشبية “الباركيه”
وتم التركيب


..
الآن حان وقت شراء الاثاث والإكسسوارات والذي منه ، وكخيار أمثل (أو مافي غيره) توجهت إلى IKEA الظهران

– قبل تروحون ايكيا واذا في بالكم تشترون أغراض وايد لاتنسون تقدير حجم الأغراض مقارنة بالسيارة اللي رايحين فيها تحسبا لأي وهقه
الحمدلله تم (حشر) كل ماتم شراءه في السيارة


..

بعد مانزلت الأغراض
بدأت تركيب الستاره ولكن للأسف واجهتني مشكله (حمقاء) بعد ماسويت الفتحات في الجدار

والمشكلة هي ان القطع البلاستيك اللي المفروض تدخل فيها المسامير ماهي موجودة (ضيعتها)
اللي هي هذي

ولكن اهتديت الى حل جميل ومناسب .. تابعوا معي:
أول شي نجيب قطعة خشب صغيره من أي مكان

ونحشرها في الفتحات بهذا الشكل بحيث ان الخشب يكون مالي الفتحة

بعدين نكسر الأطراف الزايده

ونركب المسامير عادي

بعد ماسويت هالحركه اكتشفت ان الخشب اصرف من قطعة البلاستك لأن الخشب لا يتبربر بالحراره ولا ينكمش بالبروره
وتم تركيب الستارة


..

الآن وقت تركيب الإضاءات
وهنا لازم ناخذ بالنا من شغله مهمه بخصوص الاضاءات في “إيكيا” لما نشتري أي نوع من الاضاءات لازم نتأكد إننا شرينا اللمبات لأنها تجي بدون لمبات
وبعد لازم نتأكد اننا اخذنا لمبات بنفس قوة الكهرباء في البيت 110v أو 220v وممكن بعد تختار قوة اللمبه 50w والا 60w أو 100w حسب الرغبة
انا اخترت هذا النوع

وركبنا إضاءة السقف

وبعدها ركبت إطارات الصور وفوقها ركبت إضاءة معارض .. بالنسبة للإضاءة وعلشان لايتشوه منظر الجدار بسلك الإضاءة صبغت السلك بنفس لون الجدار

الحين جا دور الخفايف ، تركيب الرف وتعليق الساعة وأي شي يحتاج سلم وتخريم جدران علشان نقفل على موضوع التركيب ونبدأ الترتيب
ركبت الساعة والرف على اليمين ودخلت أول كنبه

ونظفت الأرض من الفوضى

ودخلت الكنبة الثانية وركبت الطاولات وأضفنا شوية اكسوارات وحركات لين وصلنا للشكل النهائي

وانتهت المهمة بحمد الله


..

المضحك المبكي إني ماقعدت في هالبيت أكثر من 4 أشهر وبعدها تركت الشركة والبلد كلها
أتمنى الموضوع عجبكم وهالمره (جد) حاضرين لأي استفسار سواء ع الايميل أو في صفحة القروب
وأسعد بالتواصل معكم وأتشرف بزيارتكم على

في أمان الله ..
جاسر


تابعوا جديد شبكة أبونواف على فيس بوك وتويتر

   

مقالات ذات صلة

‫46 تعليقات

  1. اكشششششششششششخ والله طلعت حلوه ماتوقعت تطلع كذا بس طيحت وجهي وطلع عندك ذوق:Dمطيحه الميانه انا وخشتي

  2. السلام عليكم لالالا بجد فناان هههههه =) صراحه ذوق والغرفة روعة ماشاء الله على المصمم ^^ والله يعطيك العافية .

  3. Woooooooooooow النتيجه ابدااااااع وتناسق جميل ماشاء الله مع ان مساحه الغرفه صغيره بس بين الابداع فيها الإضاءة والإضافات ..مايحتااج ^^

  4. ما شاء الله عليك مببببدع ما كنت اتصوور في شبااب ما شاء الله تبدع كذا ورهيبه بداايه الموضووع ونستننا نشووف ابدااعاتك في بيتك الجديــد =) رمضاان كريم =)

  5. ..ما شاء الله ..أخوي جااسر ..والله ونعم الشباب الي يصلح أعماله بيده ..ياليت تبادر الشباب ..بترتيب غرفهم ..الي في البيت .. ..واحنا البنات بدينا بوضع لمساتناا الأولى في ترتيب الغرفه >>بس مالحقت على اسم البوهيه>>لأني أخذت اي نووع يمشي الحال.. ..استمتعت كثير ..بتصميمك ..:D

  6. – ماشاء الله قمممه في الروقآن .. تابعت جزئك الآول كان حلو .. وذآ احلى .. كم تكلفة الغرفه كآمله ..? يهنيك ربي

  7. ماشاء الله عليك ذوووق وشغلك مرتب .. لو تعلمنا كيف تصبق نبي الطريقه بالتفصل وبالصور الله لايهينك

  8. بسم الله الرحمن الرحيم ما شاء الله عليك بصراحة تنفع تفتحلك محل للديكور عليك تصميم ما شاء الله روعه بس يا خساره قهرتني لما قلت إنك رحلت من البيت اتمنى تكون نقلت جده وإذا بتصلح البيت وتصميمه والديكور كلمني وانا راح اساعدك طيب !!! اكيد؟؟؟ ابي وعد؟؟؟؟ يلا إن شاء الله خير ربنا يوفقك

  9. ماشاء الله مبدع اعجبني التناسق في الألوان :> والله انك صادق لاتفرح اذا قالوا سيراميك نفس الحالة لا و جديده … بس احسن شوي عن سيراميكك 😀 بس والله يفشل لازم شيء فوقه وجهة نظر:> الباركية احس بس ينفع في الصالة – والمجالس, اما بالنسبة لغرف النوم احس ماينفع الا الموكيت يعطي جو دافي للغرفة . غيرت نظرتي للدهان ما على بالي ابدا الا Wallpaper والله عطى جو الدهان مبدع اتحفنا دائما بإبداعك

  10. B ماشاء الله تبارك الرحمن بصراحه شي يفوق الخيال ما ودك تجي تزين بيتنا:$

  11. السلام عليكم بصراحه كلمة ابدعت شوي .. الغرفه كانت ميته من قلب .. استغرب يوم حطيت اللون الازرق لانه غريب شوي ونادر ماتشوف حد يصبغ هالون .. بس بعد ماحطيت الارضيه الباركيه .. لعبت صح اقدر اقول عنك خبير ديكور .. لانك لو جبت واحد من برى بيلعب عليك وبيستغلك صح .. بس ياليت تذكرلي كم كلفلك الصبغ مع الارضيه

  12. أولاً .. ربنا يبارك لك في ذوقك .. بس لا حظت إن الكنبه هي نفسها اللي تصير سرير ، أو أنا غلطان .. والستارة نفسها .. ههههههههههههههه أهم شي ما تكون نقل الباركيه ..

  13. اخي جاسر اولا أهنئك على ذوقك الرائع في الألوان والأثاث تانيا أنا حاولت أصبغ صالت بيتنا بس للأسف ما عرفت برغم ان اللون ايلي اخترعت كان سهل ابيض بس ما اعرف ليش ما ظبط معي

  14. صراحه شغل ولا احلى ذووق رفيع في اختيار الاوان وكل شي انا في البدايه لمن ضبغت الغرفه ماتوقعت اتطلع بالجمال هذاا بس اللي ابي اقوله كم التكلفه لعمل مثل هذي الجلسه في البيت ؟؟ واخيرآ لك جزيل الشكر

  15. ؛ السلام عليكم إبداع وذوق ما شاء الله السؤال هو : كم كانت الكلفة الاجمالية ؟ ولو فصلت في التكاليف راح اكون شاكر لك .. =)

  16. تحيه طيبه أخوي جاسر اهنيك على ابداعك وحسك الذوقي الرائع مجرد تفكيرك بالعمل وتنفيذه بحد ذاته ابداع فما بالك بالاخراج الرائع اهنيك وعساك على القوه وننتظر عمل اخر

  17. مرااا ناااايس ,, والله وطلع فيه أمل في ذوق الشباب هع >> امزح بس عندي سؤال كم كلفك كل هذا ؟؟ لأني ناويه اغير غرفتي ان شاء الله وابغى ميزانيه تقريبه للبويه والباركيه وكذا .. ثااانكس مقدمااا ..

  18. ما شاء الله عليك ابداااااااااع ذوقك ولا احلى تقول مصمم شي خطيرررررر الله يزيدك ويا بخت الي بتاخذك راح تريحها بكره من الاثاث ودوشته والله انك شرف وقدوه للشباب الله يزيدك وان شاء الله بكره يكبر ولدي ويصير زيك مهندس ديكور

  19. التصميم رائع جداً أهنيك على إختيار الألوان والأثاث طبعاً ( إيكيا ) معروفه بالفنيات ما توقعت أبداً هذه النتيجة في أول صورة قلت شكل الشغل مش حالك لكن النهاية كانت صدمة موجعة بالنسبة لي تغير جذري 360 درجة إختلاف بالذوق و الإختيار تعال صمم بيتنا :$

  20. مساء الخير يسلم ذوقك على هالعمل الحلو وعندي استفسار وطلب اذا ممكن أنا عندي استراحه وبمرحلة التلييس الآن وارغب باحد متمكن باعمال الديكور يمسكها لي تقدر تخدمني بهالشغله وانا حاضره باللي يطلبه انا خارج الرياض

  21. وااااااااااو .. ابدااااااع وروقااااااان عالأخر .. ماشاء الله عليك فنان ،، ( اناملك تتلف بحرير ) .. يا بخت الي بتاخدك ههههههههههههههههههههههه .. ما حتعب راسها بالديكور ههههههههههههههههه 😀

  22. الله يعطيك الصحة و العافيةMr centrino على هذا الموضوع ألا و هو التصميم، ما شاء الله عليك يا أخي و على اجتهادك و على جدك و مثابرتك من أجل الوصول الى الهدف ألا و هو تزيين هذا البيت من ديكور و صباغة و ترتيب ، حلو…البيت أصبح جاهز. تبارك الله عليك يا أخي.

  23. سلام عليكم ماشاء الله تبارك الله نبدأ بالتحدث عن الأشياء الجميلة بنظري : – حركة الخشب البديل عن قطعة البلاستيك ، إبداع فكرة جيدة ، وفعلا الحاجة أم الإختراع. – الأرضية الخشبية عجبتني جدا ، وخصوصا أنها سهلة التنظيف ، وجميلة المظهر ، لكن هل ياترى سعرها طيب..؟ (مثلا غرفة 3*4 كم تكلف). – وضع اللمبات بالسقف فكرة حكيمة جدا وصحية للعين ، لأن البعض يضعها على الجدران ، وبالتالي تبنط بعينك أو تشوفها بالتلفزون. – كلو كووم والجيتارا كوم ثاني ، مكانه فوق الرف معطي منظر جميل. بالنسبة للتلفزون أنا اُأيد وضعه بالجدار لسبب بسيط وهو أنه يعطيك مساحة إضافية للغرفة وتقدر تستغني عن الطاولة ، والرسيفر تقدر تشتريله رف جداري صغير تثبته على الجدار أسفل التلفزون. بالنسبة للبوية اللون حلو ، لكن أنا أرى أن الغرف وخصوصا الصغيرة نسبيا الأليق بها الألونا الفاتحة لتعطي وسع وهمي للغرفة ، ولو ضربت أحد الجدران بوية بلون الأرضية والباقي أزرق ، حتطلع أحلى وأحلى أخيرا أحب أقولك أن ذوقك جميل ، والله يعوضك بأفضل منها

  24. ما شاء الله تبارك الله أخوي جاسر والله العظيم مبدع وخبير ديكور , تصدق إني من أول ماشفت الغرفة قلت وش السالفة B بس الحركات واللمسات الحلووة بصراحة خراااااافية وأهنيك على ذوقك في الأخير ودي أعرف كم كانت التكلفة الإجمالية ؟؟؟ وشكرا لك يا مبدع

  25. والله انك رهييييييييييب في اختيار الاثاث والتصميم شرايك تجي تأثث بيتنا ولك اللي تبي وربي فينا فشل مو طبيعي بتأثيث البيت ياليت تسعفنا 🙂 ونبي نعرف التكلفه الاجماليه حق هالغرفه . :)؟؟

  26. يعطيك العافية أنصحك تصور أعمالك في آخر المواضيع قبل وبعد وتفتح محل ديكور أصرف لك

  27. انا متفاجئ ان في ولد مثلا شاب عنده هالذوق بصراحة انا اشك انك ماخذ افكار يالله اعترف بس بجد ابداع ابداع ابداع اتمنى اشوف اكثر واذواق اكثر بس حامسنيشنز هالغرفة حبيتها مرة مرة مرة<—————————————————————————–>jnono_zedjalo_92

  28. ابدااااااااااااااااااااااااااااااااااااع الله يعطيك العافية وين الي يقولون إن الشاب السعودي فاشل ولا يعرف يسوي شي خلهم يشوفون ابداعك وفنك وعقبال مانشوف الشباب السعودي كله يثبت وجوده واكيد الي مثلك كثير بس للاسف ما احد يدري عنهم الله يوفقك يارب لا تحرمنا من ابداعك

  29. مثلا انت عملت ديكوريشن لغرفة وشفناها كان ممكن تورينا باقي الغرف كنت حابة استمتع بشوفتهم لاني متاكدة راح تكون حلوة بس ياخسارة ماصارلك بالبيت غير 4شهور خسارة بجد اتمنى تصور لنا بيتك الجديد نحنو ننتظرك بشووووووق ….<==============———————————========================> JNONO_ZEDJALO_92

  30. ahmed alkhaliifah جودي MARYAM Memoooo نورة ناعمـ العـود شذى ياسمين نُورا زائر murad خطير fd-design سوير قطري عبد الرحمن علي sadaecho 9M ناوية خير محمد العدواني abdullah حمد النفيعي sara أم جاسر عبدالمجيد العطاس هدّو jojo_mk nejjara11 من المغرب هاني AbuTaReQ ابو سارة efeff fffr jjjj amona ام راكان Fan jnono_zedjalo_92 ألف مليون شكر لكم فردا فردا ونكاً نكاً.. احرجتوني والله بطيبكم وكلامكم الحلو الغالبيه يسألون عن التكلفه .. الاسعار اللي بقولها تقريبيه لأني أمتلك ذاكرة (سمكه) وأنسى بسرعه 😀 فـ لاتعتمدون على الاسعار اللي بقولها كثير أولا الصبغ كل ماكان اللون أغمق يزيد السعر والعكس الابيض يبدأ من 70 للسطل الصغير و 120 للكبير اللون اللي اخترته بـ 90 ريال الأرضيه تختلف حسب نوعها ، في أنواع صينيه رخيصه وفي انواع أمريكيه والسعر حسب الجوده اللي في الغرفه كلّف حوالي 2500 الكنب الكبيره 2900 الصغيره 1900 الطاولات تقريبا 500 الاضاءات 400 يعني هذي أهم الاشياء .. الاخت هدّو انا موجود في الشرقيه – الخبر الأخ هاني التلفزيون غيرته اصلا وخذت واحد 46 بوصه وصار شكله ألطف من هذا الصغير ، الف شكر لك jnono_zedjalo_92 خير ياسيد؟ :~ .. واللي عنده أي إستفسار انا حاضر سواء ع الايميل أو على تويتر أو فلكر حياكم الله

  31. أولاً اسمحلي أهنيك على ابداعك وعلى شغلك الذاتي بس سؤالي الأرضية هذي خشب صح؟ طيب كم تكلف لمثل حجم هذه الغرفة وما أفضل محل يصمم مثل هذه الأرضيات( من أين أخذتها)؟ أرجو ارسال الاجابة على ايميلي أخاف أنسى وما أدخل وأشكررررررررك جزيييييلا

  32. طيب كم كلفت العملية كلها تقريبا؟ وبالنسبة للدهان أبغى أعرف كيفية عمله من الصفر للنهاية يعني كيف أشتريه؟ وهل أضع له اضافات وما قصة التنر ؟ وكيف أدهن… باختصار طبعا بسطرين يعني حسب تجربتك ألف تحية على فائدتك العظيمة وياريت الكل يضع لنا تجربته فالخبرات تجارب سايقة

  33. هلا اخوي الاحمد سؤال الأرضيه ، تمت الاجابه عليه أعلاه .. افضل المحلات (السريّع) و (ايكيا) و (ساكو) سؤال التكلفه (تمت الاجابه عليه أعلاه) سؤال الدهان : 1- تروح محل بويات 2- تختار اللون اللي تبيه وتشتريه 3- اذا اخذت دهان زيتي تخففه بالتنر علشان يكون سهل التحريك واذا اخذت دهان بلاستيك تخففه بالمويه علشان يكون سهل التحريك 4- اشتري فرشه 5- كيف تدهن؟ :~ ، حرك يدك على فوق وتحت على الجدار حياك

  34. يآخخي والله ماشاء الله عَمل رآئع جداً يفتح النفس كل ماازهق افتح موضوعك P: واموت على اللي يكون غرفتة حوسة يعيدها من أ ألى ي وياليت زي هالمواضيع كثر يراسلني الله لآيهينة . . 😀 وأخيراً اتمنى لك فرصة سعيدة ومشكور

  35. 8)8)8)8)8)8)8)8)رهيييييييييييييييييييييييييييييييييبه والله كلها ذوق واهم شي دلال القهوه الي في اول صوره :$:$:$ خخخ روقان

  36. خالد: كلك ذوق حبيبي ، أسعدتني برأيك وتعليقك ,S,S تسلم ، أكيد لازم القهوه والمزاج المضبوط وقت الشغل يسعدك

  37. ابدااااع مرره ماشاء الله وحبيت تنسيقك في اختيار الالوان وذوقك الرائع

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى