سيارة أصيلة – معلومات – صور – أسماء المصممين‎

بسم الله الرحمن الرحيم
سلام(ن) عليكم ورحمة من الله وبركاته
صباحكم جبن كيري, يأخذو كل تفكيري
ومساءكم لبن المراعي, يمدد كل كراعي
شخباركم ان شاء الله تزقحون والأمور طيبه وكلش؟؟
.
إستكمالاً للموضوع اللي نزلته المرة اللي راحت بعنوان:
سيارة “أصيلة” – تصميم سعودي في معرض الرياض الدولي للسيارات 2011

جايب لكم اليوم معلومات وتفاصيل أخرى عن السيارة والمشروع بشكل عام..
وأسماء القائمين على هالعمل..
وصور جديدة لم تعرض من قبل للسيارة – من الخارج والداخل

س/ سائل يسأل ويقول: تصميم السيارة موب سعودي لأن الشكل يشبه سيارة بروتون الماليزية, يعني مسروق؟
ج/ لازم تكون تشبه سيارة بروتون الماليزية لأن التدريب كان على سيارتهم, والهدف الحالي موب أننا نصمم شكل جديد وأروع شي فالعالم قد ما هو كيف نتقن التصميم ونعرف أسراره, بعد كذا نقدر نصمم اللي نبي إن شاء الله..
.
س/ طيب وش اللي أعدتوا تصميمه بالضبط؟
ج/ كنا محدودين بقطع معيّنه حسب الإتفاق مع الشركة, ألا وهي:
الصدام الأمامي – الكبّوت – الرفرف – القارنيش
.
س/ طيب ليش تقولون الصناعة سعودية مية فالمية؟
ج/ اللي يقول أن السيارة صناعة سعودية مية فالمية كذاب وستين كذاب, للأسف الشديد الخبر أنتشر من بعض وسائل الإعلام المقروء أن الصناعة سعودية, وهالشيء خطأ من الصحفي نفسه مايتحمله إلا هو.. هذا أول شي..
ثاني شي كيف تكون صناعة سعودية وأصلاً مافيه خط إنتاج عندنا؟
ثالث شي مافيه صناعة تجي فجأة, لازم تكون على مراحل وخطوات لما توصل للقدرة الكاملة على التصنيع..
.
س/ طيب أنتم مدينة الملك الملك عبدالعزيز للعلوم والتقنية جهه حكومية ومدعومين مادياً وعندكم قدرات قوية ليش ماتفتحون مصانع؟
ج/ أنا أقولك.. لأن المدينة هي للعلوم والتقنية, بمعنى أنها جهة بحثية تطويرية فقط, وراح تكون في هالمشروع جهة تجهز المهندسين السعوديين لإتقان تقنية السيارات, وتقدم الإستشارات للجهات اللي تطلب هالشي منها..

س/ طيب سؤال, أنتم كل اللي سوّيتوه أنكم غيرتوا شكل السيارة الخارجي وبعض اللمسات الداخلية وقلتوا هذا إنجازنا, ياخي الغرابي يقدر يسوّي مثل كذا؟
ج/ الغرابي يقدر يسوّي مثل كذا ويوقف, لكن البرنامج الوطني لتقنية السيارات هو عبارة عن خطة كاملة لنقل تقنية السيارات الى المملكة العربية والسعودية,
بمعنى, أن سيارة أصيلة هي المرحلة الأولى للبرنامج, وفيه خطوات بعدها راح تكون إن شاء الله حتى تتم الخطة, وإرجع للهدف من المشروع اللي ذكرته فالموضوع الأول وبتفهم كلامي..

س/ طيب سؤال أخير لو سمحت؟
ج/ لا ماسمحت طوّلت على الأعضاء بقرقرتك وهم يبغون يكملون الموضوع, وخرّ شوي <<يسأل ويجاوب, صديق نفسههههه

صور خارجية لسيارة أصيلة:

بعض الصور الداخلية لسيارة أصيلة:

أسماء القائمين على العمل – مع الصور:
من اليمين لليسار

ٍStyling Group:

م. ياسر بن عائض الحوطي
م. بدر بن سعد النصبان
أ. طه عبدالفتاح نمنقاني

Computer Aided Engineer Group:

م. ماجد بن عبدالله العماري
م. عبدالله بن علي المعييف
م. محمد بن سفر بن كشحان آل مريط
م. فارس بن سلطان الراجحي
م. إيهاب بن علي السحولي

Prototype Group:

م. فيصل بن عبدالله طوهري
م. عسَاف بن عبدالعزيز المطيري
م. ماجد بن سعيد الزهراني

مخرج:
النقد نوعان:
نقد بهدف التشجيع والتطوير,
ونقد بهدف الغيرة والحقد,
والله أعلم~

سبحانك اللهم وبحمدك, أشهد ألا إله إلا أنت, أستغفرك وأتوب إليك
اللهم إغفر لخالتي أم سلطان و فاطمة الخضيري وإرحمهما وأسكنهما فسيح جناتك يارب العالمين..
اللهم آمين

كتبه الفقير إلى عفو ربّه:
باء نقطة شين
بدر.الشوق

شكراً للجميع.. بلا إستثناء : )
مدونة بدر الشوق:
www.b-alshoq.com
موقع القرآن
www.tvquran.com

تابعوا جديد شبكة أبونواف على فيس بوك وتويتر