.. السلام عليكم ورحمة الله وبركاته ..
صباحكم ومساكم كيف ما تتمنوهـ 
في البداية أحب أشكر القروب على نشرهم التقرير ليستفيد منه محبي السفر
و ثاني شيء أحب اعتذر من كل اللي راسلوني وما وصلتني رسايلهم
او حبوا يزوروا المدونة ومافتحت وياهم بسبب مشكلة في الموقع
اليوم أكمل معاكم رحلتي لـ النمسا بالجزء الثاني للي يحب يستفيد منها:)
وكنا توقفنا في { الجزء الأول }
في طريقنا لـ قصر الشنبرون وقبل نوصل مرينا عند نهر فيينا ومياهه مو كثيرة مثل ماتشوفون
وصلنا قصر الشنبرون نزلنا وقال لنا المرشد بيتركنا ومتى ماخلصنا ندق عليه ياخذنا
وقال لنا الحديقة تلاقونها خلف هالقصر واذا تحبوا تدخلوا القصر من جهة اليسار قطع التذاكر
وهذي بعد مادخلنا صورت مدخل القصر
احنا شفنا الزحمة قلنا مو لازم نشوف القصر نكتفي بالحديقة .
القطار ما امدانا نلحق وقته وقلنا خليه بالاخير لانه ياخذك بجولة للحديقة كاملة
والعربة الاخيرة مخصصة لذوي الاحتياجات الخاصة
ونفس الشيء العربات تأخذك بلفة حول الحديقة
يوم وصلنا جهة الحديقة طلع الدخول لها مجاني بس امي وابوي مارضيوا يمشوا معانا
دخلنا قلنا نشوف الحديقة ونصورها لهم ..
ماطولنا بس شوي ورجعنا حتى مانتأخر عليهم .
حديقة الملكة اليزابيث اللي هي حديقة القصر معروفة انها اكبر حدايق فيينا وأجملهم
بناها الإمبراطور بعد مارجع من فرنسا وكان يبغاها تكون مشابهة لحدايق قصر فرساي
هذي مواعيد زيارة الحديقة
هذي اول ماتدخل يقابلك هالمنظر
وهذيا مقابل له
وهذي صورة للقصر من الجنب مع الصورتين اللي قبل
الحاجز الأخضر وفيه وردات حمراء إلي تشوفونه عبارة عن ممرات
هذي من داخل الممرات وعلى انه كان مشمس بس الجو حلو
وهذي الساحة اللي قدام القصر على الطبيعة أحلى بكثير من الصور
واللي فوق الساحة اللي كانوا يلعبون فيها أيام الإمبراطورية حسب ماقالوا لنا
وهذي صورة بانورامية جمعتها لكم من بلكون القصر
اضغطوا على الصورة لمشاهدتها
كل ممر من اللي شفتوه بالصور اللي فوق ببدايته فيه مجسمات طبعا مختلفة 
في واحد من هالممرات فيه حديقة داخليه أعجبتنا 
وفيها كثير سناجب جننوهم السياح وهذا لقيته في حاله فصورته 
هنا لوحات ارشادية للمنطقة اللي احنا فيه
هذي حديقة الحيوانات وتعتبر اكبر واقدم حديقة حيوانات في العالم
ما اسعفنا الوقت ندخلها عشان امي و ابوي ينتظرونا
ولمشاهدة كامل الحديقة تحتاج يوم كامل حسب مايقولون
وتشتهر بوجود دب الباندا فيها 
وهذي نافورة القصر
من نفس المكان صورت القصر
وهذي صور للقصر والحديقة من خلف النافورة
دخلنا في ممر ووصلنا لهالمكان نافورة النجمة مثل مايسمونها
ومثل ماقلت كل ممر فيه حديقة تختلف عن اللي قبلها
اخر شيء رجعنا لامي وابوي وللاسف مكانهم يسد النفس مافيه شي ينشاف 
وقبل ما اطلع من الحديقة صورت هالصورة للقصر وحبيتها 
وبعدها طلعنا من الحديقة واكتشفنا اننا لو رحنا مع الجهة الثانية العربات والقطار كله متوفر
فـ اللي يزور القصر مرة ثانية الافضل انه يروح مع جهة اليسار لان حتى لو ماحبيت تمشي
فيه جلسات وكوفيشوبز للي يحب يجلس .
طلعنا نكمل الرحلة في شوارع فيينا وهنا مقر منظمة الاوبك
وهذي منارة فيينا منها كانوا يراقبوا المدينة
ورحنا لشارع ماريا هفلر وكان بياخذنا لحديقة قصر البلفادير بس لان امي وأبوي ماراح يمشوا
قررنا ماننزل وقلنا كفاية شفنا حديقة وحدة وللمعلومية فيينا فيها أكثر من 80 حديقة
اخر شيء نزلنا في شارع المشاه لكن مو من جهة ساحة ستيفنز ومن الحظ الشارع
اللي نزلنا منه كله حفريات بس مرينا على كم محل اعجبونا وقلنا نرجع نشتري
بس ماصار لنا نصيب
وبطريقنا شفنا هالمهبول واقف مجبس روحه بالشارع وفيه مثله كثير بس هذا اللي صورته 
لقينا مطعم سي فود اخذنا منه وجبات ورجعنا الفندق تغدينا
اقترح علينا المرشد رحلة الى المزارع حول فيينا وقال انه هالمزارع ماراح
تلاقونها تقريبا الا هنا خصوصا مزارع الفراولة تدخل وتتمشى في المزرعة
وتاكل من الفواكه ببلاش واذا حبيت تشتري شيء وانت طالع منها بس قال
انها رحلة ممتعة لكن لان غالبيتها مشي مارحناها
بعد مارجعنا الفندق وتغدينا وبعد العصر نزلت انا واختي الشارع نشوف المحلات قبل
تجي الساعه 7 وتقفل المحلات ولقينا مركز دخلناه وشفنا محل C&A
بالبداية قلت لاختي شكله ماله داعي مو لازم ندخله بس دخلناه وأعجبنا وشرينا منه
شي وشويات وبعض الهدايا وقفلت المحلات وقفل علينا السوبرماركت ولا شرينا منه
رجعنا الفندق وأختي انهبلت علينا تحس فيها صداع وانفلونزا قالت بس فيني انفلونزا خنازير
وتحملت على نفسها بعدين هلوست وقلنا لموظفة الريسبشن فيه مستوصف قريب او صيدلية قالت
ايه 5 دقايق مشي ورحنا على وصفها ومرينا في شوارع هادية مانسمع فيها الا صوتنا
ووصلنا المنطقة اللي وصفتها ولا لقينا الصيدلية الا مقفلة وقالوا لنا روحوا الثانية
رجعنا للفندق بطريقنا وقفنا عند المطعم المصري قال مستحيل يعطوكم دواء بالذات
مضاد حيوي بدون وصفة طبية روحوا للمستشفى 5 دقايق مشي من هنا
رحنا ومشينا لفة وش طولها ولا لقينا شي ومرينا محطة بالاخير واشترينا
موية وعصيرات ورجعنا الفندق وشفت هالسيارة بالطريق صورتها
ياحليلها شكلها كانها لعبة مو سيارة بس لشخصين
وقلنا خلي بكرة لبكرة نفكر وين نروح .. وبكذا انقضى يومنا ونمنا
الصباح قلنا بلاش نطلع نخليها العصر وجلسنا في الفندق واختي لازالت مهلوسة اخر شي لقينا وصفة
بالشنطة مكتوب فيها فولتارين زورناها وكتبنا معاه مضاد حيوي وبالقوة رضيت بالصيدلية تعطينا اياه .
والحمد لله اختي ماكان فيها شيء بس الهلوسة لابد منها .
نزلوا اخواتي السوق لنفس المحل اللي رحناه البارح صراحة المحل حبيته واعجبني
انا كنت جالسة مع امي في الفندق وكنت اسلي حالي اجلس على النت شوي
او اطلع اجلس في البلكون اشوف الرايح والجاي
يوم رجعوا اخواتي قررنا ناخذ رحلة في الدانوب ونتغدى بالمرة هناك ونروح لبرج الدانوب
تشوفونه بعيد لوحده بالصورة اللي خذيتها من بلكون الفندق
وقلنا بعدها نروح ساحة ستيفنز لكن من الحظ الحلو تاخر الوقت مثل ماتشوفوا بالصورة
وماصار قدامنا الا ساعه وتقفل الدنيا كلها
طلبنا تاكسي من الفندق لـ 5 اشخاص وقررنا نروح برج الدانوب
للمعلومية التاكسي: ياخذ عليك 2 يورو لـ الطلب واي شخص زيادة عن 4 اشخاص 1.5 يورو وفي هالمشوار اخذ منا التاكسي 13 يورو
وصلنا منطقة الابراج ( ابراج فينا ) ومنها الى برج الدانوب
وكان الوقت خلاص مغرب للأسف الحدايق والجلسات
حلوة في حدايق البرج بس بالظلام ماينشاف شيء المهم جلسوا امي وابوي بكافي شوب
واحنا دخلنا نحجز وهذا سعر التذكرة للشخص وتقدر تاخذ كتيب فيه معلومات عن البرج مجاني
وهذي الأسعار عامة
واحنا داخلين للمصعد يصورك مصور يغض النظر تبغى او لا ويوم تنزل تشوف صورتك لو بغيتها اشتريها
طبعا احنا رفضنا حتى انه يصور الصورة وابتسم وهز راسه قال اوكي
وقفنا ننتظر المصعد ويبين قدامك مكان المصعد ومتى يوصل
وطبعا بالمصعد موظف بس اللي يخاف لايفكر
يطالع فوق وهو بالمصعد عشان مايشوف الاسلاك واخواتها
واول ماتوصل فوق يخيرك تنزل في اي دور التراس ولا الكوفي شوب ؟
طلعنا لارتفاع 165 متر والافضل انك ماتوقف في ارتفاع الـ 150 لانه زجاجي ماتشوف شي منه
الكام للاسف ماتساعد بالتصوير في هالوقت بس هذي بعض الصور ان شاء الله تعجبكم بس للامانه
المكان احلى بكثير من الصور واكيد بالنهار بيكون احلى وامتع
وهذي صورة بانورامية جمعتها لكم وتبين فيها ابراج فينا على اليسار
هذي منحدرات مخصصة لذوي الاحتياجات الخاصة وهالشيء المميز عندهم في كل مكان مو مثل عندنا
اختي قالت شوفي العالم كلها مكتبة يعني مو بس عندنا اللي يكتبون ويوم اصور بعض الكلام طلع اللي تشوفوه هههه
نزلنا بالدرج الى ارتفاع 150 متر لان فيه المطعم الدوار .. اخترنا هالطاولة
وطلبنا ايسكريم بالعافية على قلبنا نسيت بكم سعره بس اذكره كان رخيص يورو او يورو ونص شيء كذا
وطبعا لابد ما نسأل اذا فيه شيء محرمات حدد لنا كم نوع فيه والبقية حلال
الجلسة كانت حلوة بس ماحبينا نتأخر حاسبنا وطلعنا
ووقفنا ننتظر المصعد يمكن ثلث ساعة وبهالوقت شفت هالمكينة تدخل كوينز فيها
ويطلع لك مطبوع عليه البرج كتذكار
نزلنا وطلبت تاكسي من كاونتر التذاكر ورحنا نجلس مع امي وابوي ننتظره يوصل
ومن سوء حظنا انه كان مايتكلم انجليزي ماغير الماني وشوي قال انتظروا واتصل
بالجوال واعطاني اياه قال كلموا الشركة توني اقول هلو الا يطلع لي واحد عربي يتكلم
وقام يرحب ويهلي وسأل وين بنروح قلت له وين يقترح او اذا مافيه نروح ساحة ستيفنز قال اوكي انا
باقول له الحين واذا احتجتوا اي شيء كلموني انا موظف الشركة واعطانا رقمه
وصلنا للساحة واخذ مننا التاكسي تقريبا 10 يورو
نزلنا ساحة ستيفنز بس ماصورت كثير زحمة و ظلام وهالصور اللي طلعت معي
للمعلومية كل لوحات الشوارع في فينا قبل اسم الشارع يوجد رقم
هالرقم هو رقم الحي وبجنبه اسم الشارع
جلسنا امي وابوي ورحنا نشوف مطعم وصفه لنا الموظف الشركة قال حلال وعربي ومن هالكلام
لقينا هالمطعم اكله لاباس به طلبنا ساندويشات كباب ومقبلات واخذناه قلنا ناكله بالفندق
ومالقينا تاكسي كبير لـ 5 اشخاص بسهولة
رجعنا اتصلنا على الشركة اللي فيها الموظف العربي على أساس يرسل لنا موظف
شوي الا هو بنفسه جا وطبعا احنا تعودنا مجرد مانركب يشغلون العداد ويمشون يوم وصلنا الفندق
الا يقول 15 يورو رغم ان المشوار بسيط جدا ماتعدى 3 دقايق قلنا له ليش كم العداد ؟؟
قال مفيش عداد هيا الاسعار كده والسيارة دي كبيرة والتسعيرة من بعد الساعة 7 تختلف
قلنا له اولا احنا كل مشاويرنا كانت بعد الساعة 7 ومن الفندق للدانوب مشوار وش طوله اقل من هالسعر
بعدين رجعنا من الدانوب مشوار بعد وش طوله اقل من هالسعر قال يعني ايه انا باكذب عليكم قلنا ايه
قال التاكسي بالطلب وانتم 5 السعر بيختلف قلنا نعرف ان الطلب بـ 2 والشخص الزيادة بـ 2 قال وانا ايه
عرفني انكم بتعرفوا كل الخليج اللي يركبوا معايا مابيتكلموش قلنا احنا مالك عندنا الا 10 وحرام فيك بعد
ومنكم تعلمنا اننا نتعامل مع نمساوي افضل من اننا نتعامل مع نصابين مثلكم ومشينا وتركناه
طبعا لو له حق ماكنا بنرضى على نفسنا نأخذه لكن أمثال هالموظف استغلاليين وللأسف انهم مثلنا عرب ومسلمين
تعشينا وجهزنا الشنط لاننا بنسافر الى زيلامسي الفجر بالقطار ولازم الساعه 6 نكون جاهزين
الفجر كلنا صحينا صلينا ونزلنا وكان موظف الشركة في انتظارنا
ورحنا لمحطة القطار مشي معانا الى مادخلنا القطار
واخذنا مقاعدنا وكان زمن الرحلة 5 ساعات بدون تغير القطار
وهالشيء اللي رغبنا فيها رغم انه وقتها شوي بدري
وهذي التذاكر سعرها مشمول ضمن برنامج الرحلة
وهذا جدول رحلات القطار من فيينا الى زيلامسي يتوقف في 16 محطة وزيلامسي الـ 17
بس في كل محطة يوقف دقيقتين او 3 الا في سالزبورغ وقف تقريبا 20 دقيقة
وهذا منيو الوجبات على القطار طبعا تختار وتشتري مو مجاني
وهذا اهم شي كهرباء موجود فوق كل مقعد
و سمينا بالله و دعينا دعاء السفر وابتدأ القطار مشواره الساعة 6.44
بعد ماركبنا القطار بـ 5 دقايق تقريبا تحرك فينا وابتدأ المشوار
هالحفريات فكرتني باتربتنا اللي ماشتقت لها ابد 
وكل شوي كنا نوقف في محطة هذي عند وحدة من المحطات
مجموعة الصور اللي بتجي كلها في الطريق وغالبية الصور لسهول وقرى نمر فيها
بحيرة مرينا عليها بطريقنا
ومن بدينا نقرب من سالزبورغ صارت المنطقة فيها انهار و جبال قممها صخرية
و بعضها مغطية بالثلوج وهالجبال هي امتداد لسلسة جبال الألب
وهنا قبل نوصل لزيلامسي صورت قبل اشيل كاميرتي ونجهز اغراضنا
لان القطار يوقف بس دقيقتين ولازم نكون مجهزين كل شيء عند الباب للنزول
وصلنا حمدلله على سلامتنا الساعة 12
وهذي بحيرة زيلامسي خلف محطة القطار
يمين الفارة على الصورة وحفظ باسم
حجم الملف : 2.3 م.ب
لهنا خلصنا هالجزء أشوفكم ان ربي أحيانا في ليالي زيلامسي
.. تقبلوآ مني أعطر و أعذب تحية ..
noor-elshams
.. من أقوآل الإمآم الشافعي رحمه الله ..
احفظ لسانك أيها المســـلم لا يلدغـــــــــك إنه ثعبــان
كم في المقابر قتيل لسـانـه كانت تهاب لقاءه الأقــران
noor-elshams
مدونـــــــــــــــتي
