رسائل المجموعة

رحلة إلى مدينة بينانج في ماليزيا – الجزء الثاني

بسم الله الرحمن الرحيم
السلام عليكم ورحمة الله وبركاته
وصباحكم قهوة بنكهة الفجل.. ومساءكم شاهي بنكهة الكراث..
<<ماسكه على خياس ذالشهر ههههه
أخباركم إن شاء الله تزقحون؟؟
وشخبار الأهل والإخوان والأخوات؟ عساهم بخير؟؟ <يسولف مع عجز واجد!!
على طاري العجز.. كل عام وأنتم بخير يا شيّاب وعجز قروب أبونواف.. <مدري وش المناسبة بس مشوّها!!
وشسمه.. ياشينها اذا ما عندك إلا أنترنت بطيء وتبغى تردّ ع الموضوع السابق.. وتبغى تكتب تقرير جديد.. وتبغى تحكّ راسك شوي.. ومالك إلا المقهى اللي جنبكم.. ومن يوم تطلع له تمطر وكذا.. وترجع لشقتك.. همّن يوم خف المطر الساعة 9 الليل.. وتركض للمقهى نفسه اللي قهوتهم تجيب الحموضه وكذا.. وتطلب كوب قهوة مخيسة عشان تشغل النت عندهم.. وبسم الله على بركة الله نبدأ بالموضوع..

][مدخل][
.
عقبال ياماخذ فؤادي مية عام ..
.. ضيعتني منك وأنا ما أهتديتك
.
لا ما نسيتك كيف أبنساك ما دام ..
.. ذكرى الفراق تهزّني لو نسيتك
.
حبك قدر وأنا على دين الاسلام ..
.. مكتوب في وجه الجبين ورضيتك
.
لك في الضمير الود والحشمه اتوام ..
.. ولي في ضميرك مثل ما انا بغيتك
.
ولك منزل في نايف القلب وخيام ..
.. وذود الغلا ترعاه ولا شكيتك
.
يفطر عليك القلب وان فارقك صام ..
.. والله لو إنك شوك سدره كليتك
.
القلب طير لا دعِي للهوى حام ..
.. والا أنت وكره من كثر ماهويتك
.
كن العيون من النظر عقبك أيتام ..
.. وكني ماريت الا انت من يوم ريتك

][حجز الفنادق][
.
في الجزء اللي راح من تقرير مدينة بينانج.. تمنّيت أنه يحوز على رضاكم وينال ذائقتكم.. ويكون كل شي فيه واضح..
لذلك.. أدرجت من ضمن فقرات هالجزء طريقة حجز فندق عن طريق موقع بوكينق..
الموقع عالمي.. ومضمون بإذن الله وجربته 5 مرات والتعامل معه سهل وآمن إن شاء الله.. ويدعم اللغة العربية..
فيه مواقع غيره تشبه له.. لكني أفضل هذا عنهم..
والموقع ما يحتاج له دعاية.. لأنه موقع خدمي وزوّاره بالهبل..
لكن لفائدتكم بسوي شرح وأتمنى يكون واضح بإذن الله..
الدخول على الرابط
www.booking.com
لوقو الموقع


.
الصفحة الرئيسية
.

.
في المربع الأصفر اللي فوق ع اليمين نعبّي البيانات المطلوبة.. ويفضل تكتب باللغة الانجليزية..
مكان البحث.. وتاريخ الوصول للفندق والخروج منه.. وعدد الغرف والأشخاص والأطفال وأعمارهم..
.

.
بعد ما تعبيها أرعص كلمة بحث..
بتطلع لك عدة نتايج.. أختر منها الصح.. مثلاً في حالة حجزي أخترت / بينانج – الدولة: ماليزيا
.

.
تفتح لك بعد كذا صفحة البحث المتقدم.. وهذي الواجهة الرئيسية له..
.

.
في الشريط العلوي.. ترتيب الفنادق حسب: الشعبية – التوافر – آخر الحجوزات – نجوم – المسافة – السعر – نقاط التقييم..
تختار واحد منها ويرتب لك الفنادق اللي في بينانج حسب الخيار اللي انت اخترته..
مثلاً حسب السعر.. يرتبه لك من الاقل للأغلى او العكس..
مثلاً حسب النجوم.. يرتبها من خمس نجوم الى نص نجمه..
مثلاً حسب نقاط التقييم.. اللي هو تقييم الزباين عن طريق موقع بوكنق..
إن شاء الله تكون واضحة هالنقطة..
نجي بعد كذا للشريط اللي على اليمين:
.

.
بشرح الصورة بشكل مختصر.. لأنها واضحة تقريباً..
عندك عدة خيارات للبحث.. مثلاً عن طريق عدد النجوم.. من خمسة الى نجمة ونص..
نوع الفندق.. سواء شقة فندق منتجع او غيره..
التسهيلات المقدمه.. أنترنت.. مواقف سيارات.. حوض سباحة.. وغيرها..
إلى آخر الخيارات المقدمة..
نلاحظ كل خيار جنبه عدد فنادق..
وكل ما أخترنا خيار.. قلّ عدد الفنادق.. لما نوصل للفنادق اللي فيها المواصفات المطلوبة..
مثلاً أنا أخترت عدة خيارات تجريبية.. وطلعت بهالبحث..
.

.
النتائج اللي طلعت لي بعد ما حددت الخيارات.. فندقين بس..
فندق هارد روك وفندق فلامينجو..
.

.
فيه شرح مختصر لكل فندق وخدماته.. وعدد النجوم.. ودرجة تقييم العملاء له..
والأهم من هذا كله.. فيه أسعار الغرف أو السويتات أو الشقق..
كان في بالي أني أختار غرفة مطلّة على البحر.. لشخصين.. وسعرها يكون أرخص ما يمكن.. وحسب المواصفات اللي أخترتها من الخيارات..
ولما شفت الأسعار لقيت أن الفندق الأول أغلى من الثاني.. لذلك أخترت الثاني.. فندق فلامينجو.. ورعصت عليه..
.

.
هذي صفحة للفندق اللي أخترته.. يوضح خدماتهم وأيش عندهم وما عندهم.. بالإضافة الى اسعارهم وصور للغرف..
أخترت الغرفة أم إطلاله على البحر.. طلع لي مواصفات الغرفة مثل المساحة والمرافق وعدد السرائر.. وبعض الصور..
.

.
جنب كلمة (أحجز الآن) فيه عدد الغرف اللي تبغاها.. أختر مثلاً 1 ويطلع لك سعرها جنبها علاطول..
بعدها أضغط أيقونة أحجز الآن..
.

.
هذي صفحة لتعئبة بياناتك الشخصية..
ولازم يكون الاسم مطابق للجواز..
والإيميل صحيح لأنهم بيرسلون لك بيانات الحجز عليه..
.

.
صفحة معلومات الإتصال..
واضحة ان شاء الله وما يحتاج لها شرح أكثر..
بعد ما تخلص من كل شي.. وتروح للخطوة الأخيرة.. اللي هي تأكيد الحجز..
توصلك رسالة على ايميلك.. فيها معلومات الحجز.. أطبعها ودبسها مع بعض.. وجهز شنطتك..
وتروح وترجع بالسلامه ان شاء الله..
.

.
ملاحظة: بخصوص الفيزا.. لما تستخدمها فـ هم ما يسحبون أي مبلغ لما توصل عندهم.. كل اللي يسوونه حجز المبلغ بحيث أنك لو سحبت عليهم سحبوا مبلغ بسيط حسب شروط كل فندق والثاني..
واذا وصلت عندهم بالسلامه ان شاء الله يخيّرونك بين تدفع كاش او بالفيزا.. ويرجع لك المبلغ ف حسابك لو دفعت كاش..
أما بخصوص اللي مسوّي فيها ذيب وكذا (ما قد سوّيتها يعني!! ) ويدخل رقم الفيزا غلط.. فـ الحجز ينلغي بعد 24 ساعة.. بعد ما يكتشفون أن رقم الفيزا غلط..
وأتمنى أن الشرح يكون واضح بإذن الله.. وأي أحد عنده إستفسار ولا شي.. يروح يجرّب وبيعرف الجواب ان شاء الله..
<واحد ما عنده وقت أبد هههههه

][فاصل][
.
وكنك معي وانا فقدتك من اعوام ..
.. مع الخيال ألقاك كني لقيتك
.
من صعب وصلك ما تهنيتك احلام ..
.. لا جابتك فزيت شوق ومحيتك
.
يعني وصالك صعب وأهدافي أوهام ..
.. يعني زرعتك للقدر ماجنيتك
.
صبرك.. يقولون العرب كل الايام ..
.. يوم عليك.. ويوم لاجاك جيتك
.
ويا قلب ياللي ورثك اجروح وآلام ..
.. بليتني ماهوب أنا اللي بليتك
.
ولعتني من عادني في الهوى خام ..
.. واسرفت بي وانا خطامك عطيتك
.
طعتك وزبدة طاعتك هم وهيام ..
.. ما الله كتب لي وأستخرت وعصيتك
.

][قهوة بينانج الشهيرة][
Coffee Tree
.

.
هو محلٌ أشهر من نارٍ على علم.. كلّ من جاء إلى بينانج لازم يروحُ إليهِ <يلوموني فالفصيح..
الموهمٌ.. أني جربت قهوتهم وهي قهوةٌ خقاقيةٌ رائعةٌ ولذيذةُ المذاق والطعم والرائحة..
<أحد يعلّمني الفرق بين مذاق وطعم؟؟
المهم وشسمه.. هذي صور من أرجاء المحل الكويّس..
.

.
يعني أني ديكور وكذا..
.

.
وشسمه.. إن أغلب من جاء إلى هذا المحل.. هم من إخواننا وأخواتنا (أبوعرب).. والأدلة على ذلك كثيرةٌ جداً..
فـ ثقافة الذكريات (والشخابيط) مثل التي في التقرير الذي راح.. هي متأصلةٌ فينا..
فـ نحنُ نحبّ الشخمطة.. ونحب أن ندوّن ذكرياتنا على جدار أو صخرة.. أو أحياناً على زبالة – وأنتم بكرامة – كما هي حال البعض من عشاق الناديين الكبيرين..!!
المهم وشسمه.. ألتقطت لكم بعضاً من اللقطات.. كما هي موضحة على هذا الجدار البريء.. أترك التعليق عليها لكم..
.

.

.


بجانب هذا المحل.. محلٌ آخر هو محلّ الشاي..
هذه بعض الصور له..
.

.

.

.
وجهة نظر/ لم يعجبني المحل ولا الشاهي.. أولاً لأنهم نصابين وتسذوبين.. وكل شاهي عندهم هو علاج لأحد الأمراض المستعصية.. وكأن المحل صيدلية أو محل عطارة وأعشاب.. وثانياً الطعم لم يرقّ لي أبداً.. يالبى شاهي المزروع بس!!

][الأنشطة البحرية][
.
كم منا من يعشق البحر.. لحدّ الهوس.. لحدّ الجنون..
البحر ملجأ للعشاق.. للحزينين.. للمكبوتين.. وأحياناً كثيرة للفاضين..
البحر حياة أخرى.. وحياة البحر لا تشبه حياة البرّ أبداً.. وأسألوا أهل الشرقية وجدهّ يا أهل الرياض!!
<واحد حاسّ بـ معاناة أهل الخبر فالإجازات هههههههه!!
الزبدة يعني.. أن بحر بينانج مليان أنشطة بحرية.. وبحاول أجيب بعض الصور وتعليقات عليها..
نبدأ بسم الله..
خطوات على البحر – غروب – مدّ وجزرّ !!
.

.
الشورت موب شورت حبيب ألبي إيهاب أبد!!
أولها.. رحلة مع الخيول الماليزية.. والدبابات البريّة التي طفشنا منها في الثمامة المخيسة!!
.

.
دبّاب البحر.. كنت أخاف منه.. بس يوم جرّبته دريت أنه ماعندي ما عند جدتي..
.

.
المهم ذكروني أذكر لكم موقف بعد شوي صار لي وأنا على الدبّاب!!
<< يقالك جالسين معك وانت تكتب انت وخشتك؟ هههههه
.

.
لوحة توضح أسعار بعض الألعاب.. لكن نصيحة.. أسألوا ودوروا الأرخص.. وخاصة بعض المكاتب السياحية اللي في المنطقة أسعار البكج كامل حلوة.. أرخص من سعر اللعبة المفردة..
.
لعبة البراشوت – أطلق لعبة ف بينانج
.

.

.

.
وقفة مع أبو هنود.. أول صورتين فوق.. الهندي بتاع الدباب البحري وهو يأشر.. كان في لقطة مره مضحكة ههههه
واللي تحت ع اليسار.. جمعة هنود عزابية.. حلفوا علي إلا أصوّرهم خخخ
.

.
البانانا بوت.. قارب الموزة <<ترجمة قوقل..
.

.
ونحنو نتمشى وكذا.. جذب أنظارنا أثنين يلعبون بالرمل.. لما قرّبت من عندهم وأشوف كل واحد يدفن زوجته تحت الرمل.. وكانوا يسوون حركات صعبة وكذا خخخخخ.. المفروض كل واحد يروح شهر عسل يسوي سواتهم.. والله أنها فله.. ويسوي نفسه مفهي ويمشي ويسحب عليها <<عرق نذل هههههههه
.

.
منظر الغروب..
.

.
في أحد الشوارع البينانجية.. شدتني هاللوحة..
يعني اللي مشتهي سكسوكه لدرجة الخرمة يجي عند ذالحلاق ويضبطه ههههه
.

.
الصورة الأخيرة.. إهداء لكم..
أول صورة بانورامية أسويها.. يمكن فيها بعض العيوب.. لكن هي مجرد محاولة إن شاء الله تحوز على إعجابكم..
.

رابط الصورة بحجم أكبر..
هنا

][مخرج][
.
لو للقلوب أسواق بايع وسوّام ..
.. لا أبدلك وان جيتني ماشريتك
.
والا انت ياللي جيش عينيك مقدام ..
.. لا اقنعت منك والرجا مارجيتك
.
كني سجين بين..افراج ..واعدام ..
.. وكنك سجن وانا بنفسي بنيتك
.
تنبيك عن حالي محاصيل الالهام ..
.. وتخبرك نظراتي نهار التقيتك
.
عقب الوصال اللي على عين من لام ..
.. قدهو يكفيني عن الوصل صيتك
.
وقدني الى مريت بالشارع العام ..
.. لدّيت من ما في الضمير ودعيتك
.
ادري ان صوتي ماقطع عشرة اقدام ..
.. وادري بي اعود الى من نصيتك
.
ياشينها يامحني راس الابهام ..
.. ماقدر على شوفك وانا عند بيتك
.

رائعة الشاعر: محمد بن فطيس المرّي..

][خاتمة][
.
قبل الختم.. قلت لكم ذكروني بالسالفة حقت دباب البحر <<واحد توّه يذكرها ولا عرف وين يحطها؟ هههههه
المهم طوّل الله أعماركم.. هذاك اليوم كنا راكبين دبابات البحر.. ومبسوطين والهواء يلفخ وجيهنا لفخ..
رحت بعيد عن الشاطئ.. يقال لك بستكشف.. ويلهمني الله أني أروح جهة دباب ما عنده أحد!!
أقرب عنده.. وأشوف واحد سعودي طايح فالبحر هو ويا زوجته.. ومسيكينه بـ عبايتها..
وأشوف كأنه فيه صياح وكذا.. مدري هل أوقف وأساعدهم ولا بتجي الهيئة وكذا خخخخ
المهم قررت أقرب لهم وأسوي سوبر مان.. ويوم وصلت عندهم وأسلم وأبلّم.. وأفهي بـ خشتي.. مدري وش السالفة..
لقيتهم يضحكون ومبسوطين وغشيانين من الضحك.. الزوجة خايفه والزوج يخوّفها ويفكّ يدينه منها.. هههههه
الظاهر كان يدري بسالفة هذوليك اللي يدفنون زوجاتهم على الشاطئ وكذا ههههه
المهم أنه ما ردّ علي ولا شي.. وأستحيت من هالموقف المخيس.. وشغلت الدباب ودعست أفحط في مكانٍ آخر!!
الله يوفقهم ويسعدهم يارب.. قولوا آمين..
.
وبهالسالفة الكويسة نختتم الجزء الثاني من تقارير مدينة بينانج في ماليزيا.. ويتبقى الجزء الثالث والأخير إن شاء الله قريباً..
متمنياً أن يكون هذا الجزء والذي سبقه قد حازا على رضاكم ونالا إعجابكم.. ولكم كل الشكر والتقدير لمتابعتكم..
لم ينتهي الموضوع.. تبقى طلب بسيط لا يضركم شيئاً.. وأتمنى منكم تلبيته..
هناك أناس حولكم وحولي إبتلاهم الله إما بمرض أو فقر أو مصيبة وفجيعة..
فـ لا تنسوهم من الدعاء.. في ظهر الغيب..
اللهم إغفر للمسلمين والمسلمات.. والمؤمنين والمؤمنات.. الأحياء منهم والأموات..
وإشف مرضى المسلمين والمسلمات.. وإجعل ما أصابهم تكفيراً لهم يوم القيامة.. وأرزقهم الصبر والمثوبة..
وإغفر للشهداء في فلسطين وتونس ومصر واليمن وليبيا وكل الدول الإسلامية والعربية .. وأنصرهم ووفقهم للحق يارب العالمين..
اللهم آمين.. اللهم آمين.. اللهم آمين..

.
سبحانك اللهم وبحمدك.. أشهد ألا إله إلا أنت.. أستغفرك وأتوب إليك..
اللهم صلي على محمد.. وعلى آل محمد.. كما صلّيت على إبراهيم.. وعلى آل إبراهيم.. إنك حميد مجيد..
وبارك اللهم على محمد.. وعلى آل محمد.. كما باركت على إبراهيم.. وعلى آل إبراهيم.. إنك حميد مجيد..
.

.
مدونة بدر الشوق
www.b-alshoq.com
.
القرآن الكريم بصوت الشيخ ماهر المعيقلي
www.tvquran.com/maher.htm
.
كتبه – الفقير إلى عفو ربّه:
بدر الشوق
باء نقطة شين
.
والسلام عليكم ورحمة الله وبركاته


تابعوا جديد شبكة أبونواف على فيس بوك وتويتر

   

مقالات ذات صلة

‫13 تعليقات

  1. تقرير رائع ايها الرجل 8) و اقوى شي اهل الرياض مساكين — يرحم والدينك استعجل بالتقرير الثالث و اذا عندك رابع منا و الا منا نزله بعد لا يوقف لا يوقف لا يوقف خخخخخ جميل جميل . رائع رائع . حلو حلو . دولاب دولاب . شكرا شكرا

  2. تصوير رووعه ماشاء الله عليك 🙂 دوووم هـ الابداع 🙂 لكن السالفه حقت البحر شي ثااااني 😀

  3. واااااااااااااااااااااو ماشاء الله صراحة موضوع متكامل ورائع وفكاهي أحييك شخصياً أخ بدر وصراحة المقدمه في الجزء الأول مجنوووووونة لدرجة إني حفظتها بصفحة woord وقلت لأخووي الصغير يقراها وحفظتها بإسم _ مقدمه واحد سكران ههههههههههههه قوية شوي بس مشئ هههههه الله يحفظك وتقبل مروري

  4. بدر اسحب بريك … اما في البحر ولابسه عبايه ؟؟؟ ههههههههههه كيف تجي ؟ :$ هع هع

  5. شكرا على هذه المعلومات خاصة :خطوات الحجز وتوضيحها … وكذلك تركيزكم على معلومات عن المشروبات الساخنة من المنبهات قهوة وشاي ولم تتطرق الى الاكلات., رحلة موفقة

  6. إن شاء الله تكونون أنبسطتو بهالسفره والتصوير اعجبني جدا رااااااااائع والاروع التعليق على الصور وياريت تسافر مكان آخر وتصور لنا وتكتب لا تحرمنا من اسلوبك الرائع واتمنى لك مستقبل في التصوير ولا تحرمنا من إبداعاتك

  7. يسلمووووووووو بدر على هالجزء و الي قبله و اذا مخبي لن جزء راابع ماعندك مانع اسدحه هنااااا:$ ثااااااااااااااني مره لا تسدح خشتك عند اي احد اجل وش اللي حااادك تروح عند المره و زوجها ههههههههههههههههههههه شكلي بتكفخ منك ههههههههههههههه

  8. شكرا علمعلومات من أجل البحث عن فنادق ماليزيا…مبروك عليك الرحلة من مقاهي و فنادق و بحر و ركوب الخيل…دكرت في موضوعك وشسمه.. إن أغلب من جاء إلى هذا المحل.:مادا تعني كلمة شسمة لم أفهمها. بسك أقلك الصور جلوة…بس ما كنت تبتدي الموضصوع بالقهوة باللفجل أصل طعم القهوة كيكون مش ولا بد…ما كنت تبتدي بقهوة بالقرفةو لا القرنفل كانت تكون أحسن…ههههههههه الله يعطيك الصحة على هاته اللرحلة.

  9. :o:o:o:o رووووعه اخوي بدر واحلى شي محلات القهوة والشاي شكلى ابواعدك فيها إن شاء الله بالصيف قل تم

  10. الله يعطيك العافية على المعلومات الي تخص الحجوزات مشكور الصور حلوة وتعليقك احلى يالغالي -تحياتي وتقبل مروري –

  11. السلام عليكم .. شكـــرا على تقريرك .. أكثر شي ونسني فيه الكتابات اللي بمحل القهوة .. رحنا لماليزيا هالسنة .. وشفنا هالكتابات .. أكثر شي ونسنا وفطسنا ضحك عليه اللي مكتوب فيه : شهادة لله << موجود بصورتك الأخيرة .. أخذت له أكثر من صورة .. والله بعض الكلام هباااااااال .. يعطيك العافية ..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى