بسم الله الرحمن الرحيم
السلام عليكم ورحمة الله وبركاته..
وصباحكم توست مع زبدة.. وكوب قهوة بالفجل.. بجانب وردة الأقحوان.. 
الأقحوان تراه ذاللي يقولونه الرومنسيين وكذا!! 
صباحكم حلو يارب مع جوّ غائم جزئياً.. وخققآن..
وما ظنتي أنها غيوم.. شكلها غبرة والله العالم..
<كيف التصبيحة؟
المهم وشسمه.. أني أبي أقنع نفسي أنها غيوم.. من كم يوم.. وأن الغبرة اللي جايه الرياض مالي أي صلة لا من قريب ولا من بعيد بها!!
وأن ما جاءكم هو بشرى بالمطر إن شاء الله من ربّ غفور رحيم..
بعد ذالمقدمة اللي تقوطر رومنسية وكذا أبي ألمّح لكم تراني وصلت الحمدلله إلى السعودية..
واللي بـ يبارك أو يهني أو يعزّي أو حتى لو واحد فاضي ووده يسلم وكذا.. لا يربط بين الغبرة وبيني.. وسلامتكم!!
.
المهم.. أن الموضوع هذا كان المفروض قبل ثلاث إربعاءات.. ولكن شاءت الظروف أن تتأجل كتابته إلى الآن لعدة ظروف..
الأربعاء الأول..
وهو يوم وصولي إلى مدينة الرياض من كوالالمبور الشقيقة.. وتعرفون أبطي أكتب موضوع وأنا على سفر.. لأنه ما يمديني أتابعه وأنواع الحماس فالطيارة على شوفتكم وكذا..
ولما وصلت كنت تعبان وما قادير أكتوب آآآي حااااجاااه وآآآي موزوع واللهي!!
لكن أكثر شي شدّ إنتباهي صراحة.. أن هالأربعاء كانوا يوزّعون كمامات عند باب المطار للي توّهم واصلين من السفرّ عشان الغبار.. فـ لما جاني الموظف وعطاني وحده وجلس يشرح لي ويقول نحن نتميز في المملكة العربية السعودية بالرياح الغبارية العليلة.. ونحن الوحيدون اللي….!!
وأقطع كلامه وأقول: ياهييييييه.. أنا منيب خواجه.. لا يغرّك الجنز والتيشيرت.. والشعر الأشقر.. والعيون الزرق.. والشعر المسبسب.. شف جوازي سعودي والله.. وأنا ضبّ ما أحتاج كمامات ولا غيرها.. ولا تهكّ علي أنتو وجوّكم المغبرّ..
فـ بلّم.. وأنصدم.. مدري هو من يوم فاجأته أني سعودي وعيوني خضر.. ولا من موقفه من الأمم المتحدة!!
.
الأربعاء الثاني..
إستمرّت الغبرة من الأربعاء الماضي ومشكلتي الحساسية عندي بريال.. وأقل نقطتين غبار أنواع العطاس والحوسة..
فـ ما يصير كيبورد كله عطاس وسعابيل وما غير تشوف سعبولتن تنط من حرف النون لحرف الباء مع الكتابة!!
الأربعاء الثالث.. أنكسرت النظارة.. والحمدلله..
وأقول الحمدلله لأنها عانت معي معاناة كبيرة جداً.. فقد رافقتني في البرّ والبحر والجوّ.. وفي كل مكان لمدة سنة ونيف..
وتمخّشت أيما تمخيش.. وتشخبطت أيما تشخبط.. وأنلعن جدّها أيما تلعّن!!
لكني قاومت وقلت سأكتب بدون نظارة.. وللأسف الشديد لم أستطع إكمال كلمتين على بعض.. وصدّع راسي..
وفي صباح اليوم الذي بعده رحتُ لأشتري نظارة.. فـ قصدتُ نظارات مغربي ورأيت نظاراته الجميلة.. لكن أسعاره كانت زهيدةَ ورخيصة.. ولم تعجبني!! <وش عنده؟
أجل أحد يشتري نظارة بـ 1350 ريال وعدسات بـ 500 ريال؟! ليش الأخ بدر بن طلال على غفله؟
<وخر بس!
ويقول لي: حـ عمل لك تخفيض يا أوستاز.. يعني أني بيقنعني وكذا!!
وطلعتُ إلى الشارعِ منكبّا على وجهي والهمّ يأسرني.. وقلتُ في نفسي.. سـ أعيشُ بلا نظارات.. أعيش أعيش أعيش..!!
لكني أمسيتُ تلكَ الليلة وأنا أشوف الواحد إثنين.. وأشوف أختي نورة حبتين ههههههه!!
دخلتُ إلى ملحقي الموقّر.. وأخذتُ النظارة.. وحللت المشكلة التي عانيتُ منها.. وقلتُ في نفسي: وشهوله الخساير يا ذيبان!!
<يسمع بالترييش بنفسه خخخخ
وضبطتُ نظارتي أيّما تضبيط.. والحمدلله سلكت الأمور معي لمدة ساعتين كتبتُ فيها جزءاً لا يستهانُ به من هذا الموضوع!!
وفعلاً: الإختراع.. وليدُ الحاجة!!
يفضل إستخدام اللزاق الشفاف.. كي يعطي "لوك" رائع وكذا.. ولحدّ يدقق فالكسور اللي تحت الورقة خخخخ
.
في الصباح التالي.. ما سوّيت شي لأنه جمعه وكلش مسكرّ! لكن في العصر.. جلستُ أسوقُ في شوارعِ الرياضِ الجميلة والمليئة بالورود والأفاعي والحيوانات الأليفة.. والنخيل المورد.. والزهورالغنّاء.. والشلالات…<< لاتزوّدها ويبان أنها تسذبه! ههههه
حتى وجدتُ ذلك المحلّ الذي تستبشر به الأسارير..
فـ وقفت سيارتي جانباً ودخلتُ برجلي اليمنى وقلتُ بسم الله..
لم يستوقفني كُبر المحلّ.. ولا أنه على شارعين.. ولا حتى لوحته الجذابه..
بل إستوقفني لوحةٌ صغيرةٌ كتب عليها "إشتر نظارة والثانية مجاناً"!!
وأجزمُ أن معظمكم تنشرح أساريرهُ إذا رأى تلك اللوحة.. فـ يحسّ بأنه سـ يكسب هديه وكذا!!
فقصدت البائع.. وعّرض علي نظاراته الصينية التي يدّعي أنها أصلية وأنها من إيطاليا وفغنسا!!
لم أدفع ربع المبلغ الأول.. لكن إلى هذه اللحظة أحسّ بأني ملعوبٌ عليّ والعياذ بالله..
بس إكرام النفس هواها.. وعلى قولة القايل حق الموضة والستايل:
نظارتن أشتريها بـ رخيص وتجلس سنة وأغيرها.. أحسن من نظارتن أشتريها بـ غالي وتجلس سنتين ولا أغيرها!!
نروح للموضوع.. بنظارة جديدة!!
][مدخل][
.
ماجور ياللي.. من فراقك تعلمّت..
إن الزمن يومين, طيّب.. وخيّب..
.
فاجئتني بمفارقك.. ما تولمّت..
كذا بدون أسباب.. عني تغيّب؟؟
.
ما متّ من فرقاك.. لكن تألمت..
وشيّبت بي يا صاحبي.. قبل أشيّب..
.
][البداية مع حديقة التوابل][
.
المدخل الرئيسي للحديقة
لوحة خاصة في أبوعرب
صحن التوابل عند المدخل.. والله أنه يفتح النفس وودّك تقرمشه وكذا
القائد حقنا.. وهو الوحيد اللي يحتسي عربي لبى قلبه..
يحليله إذا قال: لقد إنني أتكلمو اللكه الأربيه بتلاكه
صورة لأحد النبتات اللي مدري وشسمها.. لكن ريحتها طيبه جداً..
كل نبته قدامها لوحة ومكتوب فيها اسمها ونوعها وبعض التفاصيل والشروحات عنها..
هذي النبتة الحياوية.. سبحان من خلقها..
أول ما يلمسها أصبعك تتسكر على طول.. حماية لنفسها..
وما تشوف إلا أبو عرب مدّهرين.. ما غير ينغزونها تنغيز وتسكرت نص نبتات الحديقة
بعض أنواع البهارات البطلة.. اللي ريحتها تبقى في اليدّ لما تلمسها.. شلون لو طبختها مع الأكل..
ومنعاً للإحراج.. لحدّ يسألني وش اسمها.. لأني مالي وما للمطبخ أي علاقة
لا من قريب ولا من بعيد!!
جولة في أرجاء الحديقة
همّن عاد رحنا وتقهوينا.. حليب بالقرفه بالزنجبيل بالنعناع بالمدري وشو!!
الزبدة أنها نكهة مدري وش تبي وتلقى فالكوب هذاك الشي الأسود الطويل يجي على شكل أسطوانه مجوّفه.. ويحطّونه مع الرز الظاهر.. وشكله إسمه قرفه <<أجل قرفه مع الرزّ هاه؟!
لكن اللي يبي المغص يطلب ويبشر به ههههه..
بعد كذا ثلاث محاولات تصوير فوتوغرافي وهيك..
إنعكاس..
أحجار لامعة..
وردة وحدانية..
][جولة في حديقة الفواكه][
.
جولة داخل الحديقة..
هنا برفقة القائد المغوار
ركن الأكل والبلع
ركن العصيرات.. وصورة لـ عصير الجحّ الرائع..
ثلاجة الأكل..
طبق إهداء لكم
بعض المناظر المحيطة..
المحلات خارج الحديقة..
أناناس يا بتاع الأناناس
والنخل باسقات
ما يميّز الحديقة:
مساحتها كبيرة جداً.. والأخضر على مدّ البصر..
ما يعيبها:
ما فيها فاكهة.. يشترونها من برّا ويقطعونها ويعطونا إياها ناكلها!!
][فاصل][
.
لولا السحا من عاذلي.. مـا تلعثمت..
طاولته اللي فـي يديّ.. من قريّب..
.
أضحك وأسولف.. وإن لحقني سهر نمت..
لكن قسم بالله ماني بطيّـب..!!
.
أكافح أهل الشمت, بالسّمت ..والصّمـت..
ومن شوفتك صدفه.. قعدت أتهيّب..
.
][الصعود إلى أعلى الجبل][
.
إسم الجبل على الجدار..
سيارتنا اللي طلعنا فيها الجبل..
صورة من الطريق الجميل.. اللي يذكرني بطريق الثمامه البديع..
روعة الجو والغيوم وسعة الصدر.. تذكرني بجوّ الرياض..
صورة من فوق الجبل للمدينة..
جلستنا هنا يوم وقفنا نتصوّر وكذا.. ومحّد يجي يقولك وش تسوي هنا؟ ورنا إثباتك؟
بعض الذكريات من هنا وهونيك..
مناظر من عند الجلسات
ذكريات منوعة
والله مهوب أنا اللي كاتبها 
العنكبوت الذي ودّعنا من فوق الجبل
][المعبد الهندي][
.
بعد ذلك توجهنا للمعبد الهندي.. ويقع فوق الجبل..
صورة للمبنى..
بعض التماثيل..
مدري وش يحسّ به الأخ؟
المدخل الرئيسي..
بالقرب من المعبد..
يقالكم صورة فوتوغرافية وكذا هع..
][مطعم السمك][
.
المطعم من الخارج..
لوحة تابعه له..
طريقة عرض السمتش <<لبى قلوبهم الشرقاويه وأهل الخليج
مطبخ التنظيف والتقطيع والطبخ مكشوف.. يعني أني مطعم كودو..
عقارب تفتح النفس <<الأخ صيني خخخخ
ممر بين أحواض الأسماك..
طبق فتح الشهية..
أطباق منوّعة.. إهداء لإلكون
.
.
][مخرج][
.
أخاف أشوفك, وأكسر الصمت ..والسّمت..
وأدعيك توّ الناس.. وأنا مغيّـب..
.
جيشك علي ما فاز.. وأنا أستسلمّت..
وذلّ المحبّه.. ذلّ ما هو يعيّب..
.
تدري من المخطي.. ولـو مـا تكلّمـت..!!
ياللي لـ ظنّي.. ظنتّي ما تخيّـب..!!
.
.
للشاعر: محمد بن فطيس
][ختاماً][
.
أتمنى أن يحوز التقرير على رضاكم كل أبوكم.. وينال ذائقتكم..
وأعذروني إن كان هناك أي تقصير أو أخطاء..
وآسف ع التأخير.. لكن ما حبيت الموضوع يطلع لكم إلا بأفضل صورة أقدر أقدمها لكم..
شكراً أبونواف.. وكافة فريق العمل.. وجميع الأعضاء والزوار على المتابعة..
.
سبحانك اللهم وبحمدك.. أشهد ألا إله إلا أنت.. أستغفرك وأتوب إليك..
اللهم إغفر للمسلمين والمسلمات.. الأحياء منهم والأموات.. وأغفر لجداتي وخالتي أم سلطان..
اللهم إشف أم مصعب شفاءاً لا يغادر سقماً.. وإجعل ما أصابها تكفيراً لها يوم القيامة..
اللهم آمين.. اللهم آمين.. اللهم آمين..
مدونة بدر الشوق:
http://www.b-alshoq.com/
إستمع للقرآن:
www.tvquran.com/
.
.
كتبه الفقير إلى عفو ربّه:
محبكم: باء نقطة شين..
بدر الشوق..
.
.
تابعوا جديد شبكة أبونواف على فيس بوك وتويتر
