رسائل المجموعة

تقرير مصور : جولات صباحية بنكهة ضبابية

السلام عليكم .. يالله حيهم ياربي / وكل عام وانتم بخيـر وبصحه وبعافيه /
وعيدكم مبارك وتقبل الله منا ومنكم صالح الأعمال //

ومبروك عليـكم هالأجواء الحلوه الي نعيش فيها هاليومين // ابد اول امس
بدخل ديرتنا لقيتهم حاطين جمرك ويبون جوازي يقولون منحب اطيب من باريس //
مالكم بالقرق الواجد واليوم باخذكم بجوله صباحيه في ربوع السيدراويه // والغاطيه /
والشقراويه / والأشقراويه / << يعني اشيقر ///
بنشوف مع بعض فيها كيف المناظر بنكهه الأجواء الباريسيه // غيوم وسحب وضباب /
ورذاذ / بس تخيلو معي وانتم تناظرون الصور ان فيه رذاذ ينزل عليكم //
بالضبـط هذا جونا صباح الأسبوع الي راح /
//

طبعاً نقطه الإنطلاق بتكون من المجمعه /

/

وهذي لقطه لها بعد طلوع الشمس /

/

وبعدها مسكنا خط شقراء الي يوديك لشقرا واشيقر ومكه الخ //
طبعاً قبل اشيقر فيه نفود ومع المطر الي جاه طالع شي خراآفي /

/

/

اهمشي تخيلو الرذاذ ينزل عليكم / في مثل هالمنظر /
وقسسم حاجه تهوس يالله لك الحمـد /

/

وصلنا أشيقر / طبيعي من تنذكر اشيقر في الآونه الأخير ينذكر القرية التراثيه فيها /
ما شاء الله عليهم اشتغلو فيها شغل موب طبيعي ولا يكفيها موضوع ولا موضوعين
عشان اتكلم عنها واوريكم صورها .. بس بناخذ لفه سريعه لها بس من برى //

/

كلشي فيها حاجه ثانيه تراث على اصوله وتقاليد تعيشها كنك بوقتها /

/

دكاكين وكلشي قديـم موجود فيـها // انصح الي وده يشوف قرية تراثيه بحق وحقيق

يروح لها //

/

تمنيت انه مفتوح / بشوف وش بداخله /

/

/

يا لبيـه بس هنا الكرسي جازلي بين البابين //

/

حتى السكك فيها تهووس //

/

وللمجد بقيه ولسى ما اكتفو ويبون يسونها احسن واحسن ويكبرونها //
ويعيدون تجديد كل تراثهم / بمثل هالطريقه /

/

من فيكم اسمها مي ؟!/ اهدي هالباب لها //

/

وهالمنظر بعد ما نطلع من القريه //

/

وهذا حنا اقبلنا على شقراء الي بصراحة ابهرتني بجمالها //
وخصوصاً الجمال المعماري فيها .. ابدعو في الدورات والمجسمات فيها /

/

/

طبعاً / الشين فيها ان اول ما تدخلها يقابلك السجن المركزي /
الله يكفينا شره بس /

/

/

/

/ غيمه تهبل من الحلى فيها ما شاء الله

/

// هالمجسم اعتقد انه مرره قديم وانا صغير قد شفته

/

// اهمشي الجمس الأحمر

/

/ الشقراويه // البق بن

/

/

/ ولاحظو الإنعكاس / وبعد هنـا

/

// واذا طلعنا منها نشوف هالمنظر الخرآفي

/

وانا راجع بالطريق رقيت لي في مرتفع وصارت الغيوم تمشي بجنبي
او بالأصح صرت داخل فيـها // بوقتها حسيت اني موب بسدير ابد ابد //

/

مستوعبين الحكايه ؟!//

/

فجئه تذكرت ان الغاط جايها مطره حلوه امس باليل وقلت يلا توكل على الله وروح لها /
وقبل الغاط بشوي لقيت هالشعيب السعينون // وتشووفون زبد الشعيب على جنبه /

/

يالله كم اشتقنا لمثل هالمناظر / الله يزيدها //

/

//

/

وهذي عند الغاط على اليسار مع الطريق القديم في شعيب توه بادي يمشي /

/

وهنا الزبد الحقيقي / /

/

وهذا شلال // على قد الأمطار الي جت /

/

/

/

ان شاء الله لو ربي كتب لنا امطار وخيور بتشووفون مثل هالشلال وضعفه الف مره /

/

وهذي وداعيه قبل ما ندخل الغاط القميله //

/

/

/

/

حركه وقسسم //

/

هنـا المنظر شي ثاني تخيلو تشووفون الغاط متغطيه بالضباب //

/

بعدين سحرني هذا المركز بجماله وخصوصاً في هالأجواء //

/

طبعاً مركزالرحمانيه الثقافي تأسس على يد الأمير عبدالرحمن احمد السديري عام 1414 هـ

/

/

/

هنا شكله وتحفه الأشجار والماء والخضره بس بقي الوجهه الحسن //

/

ولقطات متنوعه له .. بصراحة عجزت امسك نفسي على تصوير هالمناظر
خصوصاً في هالأجواء // وبرضوو الرذاذ ينزل علينا /

/

/

/

/

/

/

/

لاحظو الإنعكاس على الباب للمنظر الخرافي //

/

/

//

/

طبعاً يوجد مكاتب لها ثقلها /

/

/

وانا راجع لقيت هذا الجمل القميل .. والراعي معصب عليه / ليش ؟!
عشان هذا الجمل عصى ولي امره / ويسمونه عاصي وصار ما يتحرك وواقف بالخط
وموب راضي يتحرك // اشوى بغى يعدمنا بس فكني الله /

/

هذا سد المجمعه / اليوم الصباح

/

وهذي صورته الموسم الي راح وهو من قوة الأمطار انكسر وصب من فوق /

/

قولو يارب ما يجي بكرى الا وهو صاير مثل كذا //
اخيراً خلص تقريري معكم بهالجولة الصباحيه / والضبابيه والباريسيه /
اتمنى اني وفقت في هالتقرير وترى كل الصور جت على السريع /
يعني وانا ماشي / تداركاً للوقت / يارب يعجبكم كلشي هنـا واعذرونا على القصور //

مقالات ذات صلة

‫25 تعليقات

  1. واااااااااااااااااااي تجنن هالصور تأخذ العقل:D يعطيك ألف عافيه أخوي

  2. آهلاً 😀 وش ذآ الخبـآإآإل ؟! ششششي شششي وربي .. يكفي آنك بديت من [ المجمعـه ] آسسستمتعت بـ الصصصور , عششت معآهم جو بقققققوآإ ! يعطيك العـآإفيـه .. لآعدمنــآإك ~

  3. مرحبـــا … أهنئك على الزيــارة الموفقة لهذه المناطق الجميلة .. والتي لربما ( لوهـلة ) ظننت أنها خارج السعودية !! B أشكـرك على الطرح الرائع .. لكن لدي ملاحظة .. (( مــا تحس أن الديــرة فاضيــة .. ؟ )) :$

  4. صراحه روووووووووووووووووووووعه ويجنن والله شئ خيال بس ياريت المره الجايه تصور المحمعه يارررررريت واخيرا الله يعطيك العافيه ودائما في تقدم وتألق

  5. بعد السلام تبارك الرحمن الذي لا اله الا هو سبحان الله المطر فيه كل الخير من جميع النواحي الله يديم الخير على السعودية و اهلها و يبارك فيهم . جزاك الله كل خير اخوي ابراهيم و مشكو على الصور الجميلة الرائعة اللي تجبر الواحد على التفكر في خلق الله العظيم . مشكوررررررررررررررررررررررررين

  6. شيــــــي اليـــــم ماشاء الله ابداااع مررره تحممست ارووح مثل هيك اماكن 🙁 يسلمـو ماقصرت 🙂

  7. مشكوووور الله يعطيك العافية رجعت لنا الذكريات فعلا ديار الوشم حلوة

  8. مره التصوير ابداع والمكان مرتب ونظيف واحلى شي الجو مره رائع مو كأنك بالسعوديه مشكور

  9. ياا ملاا العافيه ماشاء الله تقرير وافي وكافي ,, نورت الوشم وأشيقر خااصة بوجودك يااولد الرميح ,, الله يوفقك ,,

  10. هذي الصورة تشرح القلب شراح من جد كأني خارج السعودية بس تصويرك جميييييييييل جدا وهذا وانت تقول على السريع يعني لو مدقق عدل وش سويت فينا:D تسلم يدك على هالصور

  11. وش اللي مناضر الله يجزاك بالخير قاعدن تصورلي طعوس و تقول مناضر خلابة ههههههه المناضر الخلابة الله خابرن وينهي فية

  12. :Dصور رائعة احسست معها انى شاركتكم هذة الرحلة وشاهدت هذة المناطق التى لم اشاهدها من قبل شكرا لك

  13. صووور روووعه تعلمنا في الوووشـم ق1 استناااك تجيب طااري القصب بس مااش شكلها ماجازت لك ترى فيها نفود واشيااء تهبل 🙁 والدوااار حقنا تونا حاطينه على شكل قطع ملح كشخه مررره والمطر فيه يجنن عالعموم شقراء ووشيقر رااائعاااات من جد

  14. والله شغل متعوووبن عليه يعطيه الف عافيه الي صورهن و مشكوووووووووووووووور على كل شي

  15. ماشاء الله تبارك الرحمن عسى الله يزيدها ويبارك من جد منااااااااااظر ولا اروووع اهنيك ع الصور اللي اكثر من خيال مع انك تقول بانها عالطاير ومستعجل بس بجد ابدعت الله يعطيك العافية تحياااااااااااااااتي ويسلمووووووووووووو ……

  16. ماشاء الله مناظر خلابة بالذات -الغاط- تقرير جميل الله يعطيك العافية : )

  17. السلام عليكم أسيييكم بالخير8) شلونكم؟/عساكم طيبون وتزقحون؟/:$ والله شي لا أستطيع التعبير عنه يخقق ماشاء الله الله لايضرك يخيي قبلي اطس لذيك الأماكن وتوني احس انها زينهB ابي ارووح:(<<طسي مناك توها تفطن انها قميله يالله ياخييني فمآن الله

  18. اهلين وسهلين بالجميـع .. وهذا كله من ذووقكم ولطفكم طبعاً التصوير كان في الصباح عشان كذا تشوفون الاماكن فاضيه وهي مو فاضيه بس تقدر تاخذ راحتك وتصور بعيد عن وجييه الماره ! والكام هي كانون d450 ومستخدم اكثر من عدسة نسيت وش استخدمت بالضبـط .. ويا مرحبا فيكم مره ثانيه .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى