رسائل المجموعة

][ تغيب الناس وترجع, وأنت غبت ومارجعت, وش فيك؟ ][

ماهقيت إن البراقع يفتنني ../
إلين شفت ظبا أبونواف مبرقعاتِي ../
الله أكبر ياعيونٍ ناظرنّي ../
مسعبلاتٍ مكرشّاتٍ .. مصدّياتِي ../
في هواهن ياسعد كيف إطرحنّي ../
راح عمري في ركبهن وهالسوادي ../

//
//
أحبها عشان إسم سعد فيها بس .. مهوب عشان براقع ولاشي أبد ههههه//
أطلق شي الفديو كليب حقها , جايبين جمال ورجاجيل كومبارسات لابسين براقع ومكحلين عيونهم خخخخ//

عذراً ع الشطحه //~ //
.
.
المهممم/
السلام عليكم ورحمة الله وبركاته /
صباحكم/ مساءكم ورد وفل وياسمين وبدر <<لايكثر//
صباحكم/ مساءكم رضى من الرحمن ../
/
أخباركم إن شاء الله تزقحون على قولة خويي اللوبنايني اللي ماعرفه ؟؟ وعلى قولة خويي القصمنجي ماعليكم خلاف ؟//
ونعم فيهم كلهّم .. /
/
المهم .. أعتذر أني صرت أطوّل ولا أبثركم بمواضيعي ومصالتي لظروف خارجه عن الإرادهـ ../
ولو الودّ ودّي أنزل موضوع كل أبو دايم .. وأغثكم فيه .. بس دعواتكم أخلص ذالمشاغل اللي عندي وأنشب فـ حلودزكم على قولة جدّي ..!//
وعلى طاري جدّي .. أمس نورهـ أختي تقول لأمي أبي مسواك طالبينه المدرسه .. المهم الساعه كانت 12 ولا فيه محل مفتح ..
المهم وأروح أقطع لها من شجرة الترنج اللي ماحملت ولا أستوت من 9 سنين , بس كذا منظر حاطينها هههه, وأنظفه لها وأعطيهياهـ وأقول لها إنتبهي تراهـ حار شوي ههههه//
/
عاد اليوم اللي بعدهـ رجعت من المدرسة تصيح تقول يمّه وراهـ مرّ وحامض ههههه//
عاد لحّد يشب فيني .. شريت لها اليوم اللي بعدهـ من الصيدلية .. هذاك المسواك حق أخواننا المصاريا أبو عشرة أريل ..//
إلا شرايكم بس فـ تيمون بـ حلـّـته الجديدهـ .. خقق .. تسنه بزر مروّع خخخخ//
/
إيه صح .. قبل أنسى .. وحشتوني <لايكثرٍ..!!/
شكر خاص للمصممة المبدعه RşДறaħ? وأختها اللي أطلق منها على الفاصل والتوقيع <يسمع بالمدح هع/
وشكر خاص بعد للآنسة لموشا .. ع الصور/
وكلمة خاصه بيني وبين صديقي يوسف .. كم إشتقت لك ياورع ..!!
////
نروح لفقرات الموضوع أصرف .. وترىا زي العادهـ .. المقدمة لا تمّت للموضوع بأي صله !!
<~ بنطق !!//

/

][ مدخل ][

تغيب الناس وترجع ..
وانت غبت وما رجعت ..
وش فيك !!
عليك البال مشغلني ..
وانا ما جيت في بالك..
/
حبيبي..
المشاعر في غيابك ..
كلها تناديك..!
تعال ارجع علي ..
وبادل الاشواق بوصالك..!

///

/

][ ذئبه بشريه + خروف ][

/

من أول كنا نسمع قصص أن واحد يتعرف على بنت عن طريق النت مثلاً
همّن يرقمها , ويسهر معها طول الليل مكالمات ورضعات على قولتهم ../
همّن يسحّب فيها ويطلب صورها .. بعدين يهددها ياتطلعين معي أو بنشر صورتس ..
همّن تطلع معه ويخلص اللي كان يبي يخلصه .. ويقفل جواله أو يغيرّ رقمه .!!/
/
عاد هالوقت سبحان مغيرّ الأحوال .. إنقلب السحر على الساحر ../
في أحد مناطق المملكه واحد من الشباب عمره حروة الـ 23 , داخل الدردشه (الشات) وتعرف له على وحدتـ(ن) عمرها حروة الـ 25<<مالقى إلا ذي هالمقرود/
المهم أنه تعرف عليها ورقمها وصاروا يسهرون مع بعض وهيك ,
وفي ليلة من الليالي الحمراء .. طلبت منه صور له ..
عاد هو من زود الدباشه يرسل لها صورهـ وهو شبه عاري ..
يعني عليه الظاهر صروال سنه بس بدون فنيله/
المهم أنها قامت ترفـّع به وتقول أنت أطخم وأنت خقق وأنت براد بيت وجسمك أبطل شي فالعالم … ألخ/
بعد فترهـ عاد طلعت الذئبه البشريه على حقيقتها .. وكشرت عن أنيابها ../
طلبت منه يمرّها بسيارته .. ويجيب معه مبلغ من المال .. وإن تسانه رفض بتنشر صورهـ هي !!!/
هو عاد ضاقت فيه الوسيعه .. وتدمرّت نفسيته .. وأتصل على الهيئه يساعدونهـ ../
( سبحان مغير الأحوال )
إنقلبت الآيه .. وصار الذئب اللي بالأمس يهدد ويستغل الظروف , صار خروف كبير/
وصارت الضحيه سابقاً ذئبه بشريه/
/
((تعليقاتكم))
/
/
ملاحظه:
* لما أتكلم عن البنات أو الشباب لا أقصد الكل , بل أقصد فئه معينه فقط , واللي على راسه بطحا يحسحس عليها.!!//
* القصه ما أدري وش نهايتها .. بس دام فيها تدخل الهيئه أتوقع بتنحل بإذن الله ../
* الولد حسب مصادرنا الغير موثوقه على وجه زواج , الله يستر عليه .. وعليها ../

/

][ رزق الهبل على المجانين ][

/

نسمع ذاليومين أنتشرت إشاعه بنت تسلب .. مفادها أن المكاين اللي من نوع سنقر فيها زئبق أحمر, وقالوا أنه يصنّع بواسطته قنابل نوويه .. ويستخدم في تحضير الجن .. ألخ
الزبدهـ .. أن أسعار المكاين كانت بـ 200 ريال أول ماشروها شيابنا وعجزنا, وألحين وصلت 10000 ريال
حراج بن قاسم فالرياض تركوا كل البضايع وصار كلن جايب مكينته يبي يبيع !!
فيه ناس مخفات .. يسمعون من هنا ويشترون من هناك .. ويبلشون!!
وناس أذكياء .. يصرّفون المكاين القديمه .. ويستغلون فرصة العمر !!
وسلمني على وزارة التجارة ..!
وسلمني على الشعب اللي مايتوب من كثر ماينلعب عليه ..!
//
من خلال فرّتي لعالم النت , ياكثر المواضيع اللي نزلت على هالموضوع ..
حاولت أجمع بعض المقتطفات لأجمل الردود اللي قريتها :

فارس
بصراحه انا عندنا أله خياطه قديمه أتوقع من قدمها تكون كلها زئبق

فهد
شكلها بتكون زي الاسهم والله الشعب مو لي من جد انا رحت اكلم الاهل واقول طلعوها لو من تحت الارض

مشعل سالم
يليت عندي ماكينة لابيعها بسعر الهمر

سماسم
المكينة كذبة ابريل
يا جماعة لو قلنا الغسالة ال جي فيها بترول راح تلحقو عليها..
للأسف الفكر بدأ يرجع الى الوراء

ابو راشد
تخيلو لو قالوا ان الزئبق الاحمر يوجد
في مخ سيقان العجايز كان كلاً باع جدته بمليون ههههههههههههههه لاتستغرون ناس ماتفقه

ابوعلي
وانا اقول ليششششششششششششششششش ماعندي في البيت شبكت جوال تروح وتجي
ياجماعة انا عندي مكينة الي بيشتري 500000ريال عمر المكينه 36من ولادتي

المحتاج
دورولي ثلاث مكائن بصفة عاجلة والله أني مديون وابا أسدد ديوني

خالد
صدقوني اللي يقولون اهل العقول في راحه انه لو عنده مكينه كان اول واحد راح يبيعها خلونا من الكذب ناس طفرانه تدور على الهلله

اموله
الكلام صحيح مو اشاعة مافي دخان من غيرنار اكيد ان الزئبق في المكائن لازم يكون فيها عشان تشتغل والشركة مضطره تصنع المكائن بالزئبق والزئبق مهم في صناعة الاسلحة المطوره

مرمر
ياناس والله لو قالولكم تحت بيوتكم كنز غير تصدقوهم وتهدمون بيوتكم عشانه هذه كذبه كذبه كذبه والعقل زينه

ابوفارس
اللهم ارزقناء من مكائن الخياطة والله اني بحاجه حتى اتزوج وستر نفسي

العقل المدبر
تروني اضحك عليكم انا قلت وانتو صدقتو بكيفكم ,الحين ماباقي عندي الا مكينة واحدة مين يشتريهاوبسوي عليها تخفيض 50%أول زبون يجيني ابيع عليه.لاتتاخروا الفرصة ماتجيك بالعمر الا مرةههههههههههههههههه

ابو فيصل :
انا ماهمني زئبق احمر يورانيوم اشاعات اهم شي الدراهم

سامي الحربي
انا كسرت مكينه جدتي ولا حصلت فيها شي كلها حديد باختصاار الزابق لاحمر مش فيها الي يبي زابق يحصلهالمصانع بلترات والجوالين والجكوك ………..قالوووو مكينه

ابو محمد :
والله الخبر مية بالمية صح الحقوا قبل لا تروح عليكم والله احسلكم يا اهل الفقر الحقووووووووووااا,انا اشتري اي مكينة اما او ابو فراشة ,تدر ليه؟في الرياض الأسعار حق المكاين وصلت 300000,,اقطعوا اول تذكرة للرياض وروحو بيعوا

ابو فارس
عندي المكية المطلوبة بس ماراح ابيعها لانها ذكرى والذكرى لا تستبدل بالدراهم

ربيع الشريف :
وتدبرة يابو شرف ,علموني وين ومكان الحراج عشان ابي اسرق خياطة امي وابيعها بس العندنا عليها علامة فراشة كيف تجيب الخمسين الف

سعيد
جدتي عندها مكينه من اللي عليها الكلام وقلت لها هذي السالفه, قالت والله لو يجيبون زوجي (جدي الله يرحمه) ومعه مليونين مابعتها
فاذا منكم واحد من لجنة اصلاح ذات البين يجي يقنعها تكفووووون , ابغا اصير مليونير من مكينة جدتي

محمد
انا عندي مكينتين قديمه,اللي يبيها حادها 200 الف,انا ماانــــــــــــي طــــــمــــــاع,انااا محتاج وقابل على الزواج, وليخذه الله حيـــــــه علـى الزواج.؟

حظي ردي
يوم سمعت بالسالفة على طول دقيت على جدتي قلت معاكي مكينة خياطه قالت وش القصة جارتنا ام علي طلبت مني المكينة واعطيتها

ام تركي
شر البلية مايضحك

بدير
عندنآ فريزر تحط فالقوآلب مويه ورد .. وتطلع لكـ سبآيك ذهب ..
السومه بـ 5000 // من يزود؟؟

بدر أبو نقطتين
وحده داقه على امي تقول هلا والله يوخيتي ام بــدر والله عيالي جابوا لي مكينة خياطة جديدة ولاعرفت لها متعوده على القديمة ام (نمر) اذا عندك وحده بعطيك الجديدة وعطيني القديمة
ولا ابي منك فرق في القيمة انا وياتس خوات مابينا حساب <<<<<<الله من الخباثة

كيوت قيرل
حنا عندنا جوال اذا حطيت فيه الشريحه انقلب لاب توب معه طابعه ليزر وبيبسي وجلسه على البحر تونس
ولا احد يتصل بعد العصر لانو يصير زحمه الاتصالات على نفس الجوال

ودتس أنتس أنا
رـآحت علينآ مآعندنآ مكينه وآنآ آشوف آمي مغير تدقدق ع جدتي هآه وش صآر آسم مكينتس عسىآ مآهيب ام فرـآشه لالا نبي آم آسد سنجر ~

لحن الغروب
جددتي عندها مكينتين طبق الاصل اللي في الصوره , والله جددتي طلعت منيوليريه <<< مو عارفه كيف انطقها المهم تفهمونها
وانا اشوفها ليل ونهار تنظف فيها ويوم نقول لها يا ستو لييه طاقه غرميات وعشق مع هالمكاين, تقول هذي صقيقتي من يوم ظهرت على الدنيا
لكن للاسف الحين اكتشفت ان جدتي مخها تجاري ومحتفظه بالمكاين مو عشان الحب لاااا عشان الكنز <<< امحق حفيده

ابوحاتم/1
امس منظف البيت من القراشيع وفيها مكينة ام فيل والظاهر ان فيها يورانيوم لا ومعها جهاز للطرد المركزي اللي يبيها يعلمني تراي بعطيه ببلاش

نص ربع
ثنين من عيال حارتنا شاقلين لهم مكينة خياطه ومتوجهين للحراج ، وإتصالات هاتفيه تنهمر على جوالي ، ومحلات الخياطه النسائيه صارو يخيطون بأبرة وخيط باعو مكاينهم هههههههههههه

الجلاده
اخت زوجي تقول ان عندها وحده في بيتنا القرنبع الي في الباحه , بيت طايح سقفه , اخاف احد يدرا بها ويروح يسرقها

سكارون دبل
المكينة مالها قيمة , هم يستخرجون الزئبق ويخلطونه مع عصير الربيع منجة وبطاطس ويحطونه بالثلاجة 15 يوم , بعدين يتروشون به ويصيرون اقوياء , صدقوني مجربه انا جربتها والحين انا اقوى واحد ببيتنا

mlk3
امس رحت لمي قلت لها يمه راحت ب 50 ريال قال وخر بس هذي ابيها ذكرا .. قلت يمه اها بس وشو ذكراته .. عاد قلت لها السالفه قالت جل بالنصيفه هههههههههههههههه فيها عرق سديراوي

تم تم تك
لين هنا والكلام كويس لين جاء خوي لي قبل ساعة وقال لي ترى سالفة الزيبق الحمر صدز وتراه صدزموجوده في المكاين امهات اسد وإذا ماانت مصدز كلامي كلم جدتي وهذا رقم جوالها وتراها مهيب بتخالف تكلم الشباب المثقفين وتحب تتناقشهم
المهم كلمت جدته وطلعت السالفه صدز قالت اسمع ياوليدي انا من رواد المملكة اللي حضروا عبدالعزيز واعرف كل حتحوته تصير فيذا شف وانا جدتك هذا سلمك الله يوم كنت في ريعاني شبابي شرا لي ابوسعد زوجي هديه عبارة عن مكينة ابواسد وكانت ذا الهديه بمناسبة عيد الحب في ذاك الوقت وقال لي شوفي ياحياتي ذا المكينه فيها كنز ثمين ولازم تحافظين عليها وقعد ابوسعد سنه بعد ذا الهديه وفنقش ومن يومها ياوليدي وانا محافظه على ذا المكينه لا لشي ولكن لانها تذكار من ابوسعد في عيد الفلنتاين والثاني عشان الكنز اللي يقوله واليوم عرفت وشنهو الكنز الزيبق الحمر اللي يحضر الجنون جعلها تطير فيه اجل ملعون الصلايب يبي يحضر لي جنون ويقول لي كنز ماكنش العشم يابوسعد هذي نهاية الحب ياحقير يابوسعد جنون

فلسفة ألوان
الله يعوض عليكم…. كانت معكم زكيه زكريا…

//
سامحوني يا أصحاب الردود في إقتباسها .. بس ما أقتبستها إلا لأنها أعجبتني /~
في ختام هالمسخرهـ .. ياناس .. يابشر .. إصحوا ..!
أمس ينلعب عليكم ب مساهمة البندقيه
وبعدهـ ينلعب عليكم ببطاقات سو
واليوم بمكاين الزئبق الأحمر
..
(( بكرا بتطلع الشمس .. ويبان اللي مستخبي أمس ))
تراها حكمتي لحّد يزرفها خخخخ !!
تعليقاتكم يالربع .. والربعات /~

/

][ فاصل ][
ليا من غبت عن عيني..
بقلبي دايم طاريك..
معك من وين ما رحت ..
وصلت القلب يبرالك..
تعبت أبحر بغبـّـات البحور..
ولا رسى شاطيك..
علي جال الوصال اللي
يرسيني على حالك

///

/

][ مخـ(4)ـآلفآت في دقيـ(1)ـقــه ][

/

قبل أسبوع تقريباً كان أخوي  بندر خلص لعب مباراة العصر, وكالعاده مهزوم فريقه المهم /
وهو راجع كان فيه نقطة تفتيش مفاجئه .. من الروعه تذكر أنه ناسي الرخصه والإثبات فالبيت,
دق ريوس مسافة مترين تقريباً ووقف عند اول محل جنبه , إلا فيه شرطه سريّه وراهـ .. ووقفوهـ ..
أتصل علي وقال جب رخصتي وإثباتي معك وتعال ألحين ..
وسحبت على أم الماسن واللي فيه وطلعت بسرعه ../
المهم يوم وصلت لهم هناك وأعطي أخوي البطاقات ويعطيها العسكري ..
جلس يناظرها شوي .. بعدين نطلها على كبوّت السيارهـ ..
ومسك كوب الشاهي حقه وجلس يحوس فاللبتون إلمن صار أسود تسنه شاهي صعايدهـ/
بعد دقيقه جا خويه ومعه فطاير لوزين بالجبن .. المهم يتقاسمونها ويجلسون يسولفون ويبربرون ..
جا المسؤول عليهم يقول (خلصوا ذاللي موقفينه) .. /
رد عليه ذالعسكري أبوليبتون (ياخي حرام أشرب شاهي.. يصبر شوي)/
وننطق حول 10 دقايق ننتظر حضرته يشرب شاهيه ويخلص سالفته .. /
بعدين قلت له ياخوي الله يجزاك بالخير بتعطيه مخالفه عطه وخلنا نخلص .. أو خلنا نمشي نشوف أشغالنا/
قال لا .. بعطيه أربع مخالفات … وأحمد ربك بس ماسحبت سيارته ..
قلت ليش وش جرائم الحرب اللي مسويها أخوي؟؟/
قال: أولاً مامعه رخصه/
قلت: هذي مهيب مشكله .. عطه عليها مخالفه يستاهل .. والثانيه وشي؟؟/
قال: الثانيه عكس سير/
قلت: ياخوي هو طق ريوس ووقف عند ذالمحل وين عكس معه؟؟/
قاطعني وقال: الثالثه هروب من نقطة تفتيش .!!/
أنا ألتفت على أخوي وأقول له: مهبول أنت منحاش منهم؟؟
وهو يحلف لي أنه ما أنحاش ولاشي .. بس ريوس ووقف .!!/
قال: والرابعه لابس طقم النصر .!!/
بعدين جلس يضحك هو وخويّه !!
قال خويّه: خله يشجع الهلال ونتركه بدون أي مخالفه !!/
قلت: ياخوي خلاص هو بيعتنق نادي الهلالي بس فكونا واللي يرحم والديكم !!/
ألتفت على راعي السطحه اللي جنبه وقال له بالحرف الواحد هاه تبي نمشيه ولا نوقفه؟
أستحى راعي السطحه يوم شافنا .. وقال اللي تشوفونه سووه !!
أتوقع لو تأخر الضابط المسؤول شوي .. بيقول ذالعسكري: رح جب طقم الهلال وخله يلبسه ويخاوينا للقسم !!/
يعني لهالدرجه صار الشعب مسخره قدام العسكري !!/
المشكله الضابط المسؤول يناظر من بعيد ولا يحرّك ساكن .. يعني هشوّا ونشوّا على كيفكم يالربع!!/
آخر شي مسكت أنا واخوي واحد منهم على جنب .. وحاولنا فيه .. وآخر شي قال خذ بطاقاتك وأطلع من ورا وبسرعه ألحين دامهم لاهين !!/
خذ أخوي سيارته .. وخذت سيارتي انا وراه ومشينا !!/

بغض النظر عن أن هالثور يستهبل ولا لا !! /
بس ليش صار التعامل كذا .. أوقاتنا مو ملك لهم دام أننا ماسوينا شي غلط نستحق عليه إضاعة كل هالوقت .!!
إما تعطيني مخالفه أو أتركني أروح لحال سبيلي !!
كيف (حال سبيلي)؟؟ متعوب عليها؟؟ يطلع معي درر وأنا مسوي فيها معصب خخخ/

متأكد مليون فالميه لو كان الإسم الأخير لعائلتنا بنفس عائلة ضابطهم أو أحد معارفهـ .. ماجلسنا دقيقه وحدهـ ../

( تعليقاتكم )

//

/

][ مواقع من إختياري ][

الإستماع للقرآن الكريم
تلاوة القرآن الكريم – TvQuran The Holy Quran
قراءة القرآن الكريم
QuranFlash.com ~ موقع القرآن الكريم
الإستماع للقرآن الكريم
http://4quran.com/arabic

الروابط مكررهـ للفائدهـ والأجر بإذن الله للجميع /

/

][ مخرج ][
تغلى ..
ما دريت اني بعمري..
يا غلاي افديك ..!
تدلل ..
يا هواي اللي سكنت ..
في القلب بـ لحالك ..!
ابنسى جرحك اللي ما برا ..
من غيبتك وارضيك ..!
مابين عيوني الثنتين ..
وبين القلب منزالك..!

///

/

في آلختآم .. أشكركم على متابعة الموضوع للأخير يا أطلق قروب فالعالم …/
وأتمنىآ آن يحوز على رضآكم وينآل ذآئقتكم كل آبوٍكم ../
اللهم إغفر لي ولكم .. ولوالديّ ووالديكم (F) / /
سبحانك اللهم وبحمدك , أشهد ألا إله إلا أنت , أستغفرك وأتوب إليك
/
اللَّهُمَّ أَنْتَ رَبِّي ، لا إِلَه إِلاَّ أَنْتَ خَلَقْتَني وأَنَا عَبْدُكَ ، وأَنَا على عهْدِكَ ووعْدِكَ ما اسْتَطَعْتُ ، أَعُوذُ بِكَ مِنْ شَرِّ ما صنَعْتُ ، أَبوءُ لَكَ بِنِعْمتِكَ علَيَ ، وأَبُوءُ بذَنْبي فَاغْفِرْ لي ، فَإِنَّهُ لا يغْفِرُ الذُّنُوبِ إِلاَّ أَنْتَ
/

///
عالم من الفضاوهـ
للتواصل:
b.s9@hotmail.com

كتبه وأملاهـ / باء نقطه شين
بدر.الشوق
وفي روآية / أبو س ـعد

سلآم
/

مقالات ذات صلة

‫29 تعليقات

  1. أسعد الله صباحك ومساك أخوي بدر قسم بالله أني باقي ما قريت الموضوع لكن فتني يوم شفت المشاهدات

  2. ههههههههههههه يعطيك العافيه من جد وصباحك ورد وجوووري…. من جد سبحانه الي يغير الاحوال طلعو الحين ذئابه بشريه الله يستر من الجاااي:D وسالفه العسكري مدري اخوك وربي وسعت صدري فيهاااا اما يبي يكوون هلالي:$:$ واشكركـ..

  3. :D:D:Dالسلااااااام عليكم ورحمة الله وبركااااااااااته ياخي يسعدلي صبااااحك يمين بالله روقت على هالصباح يوم قريت رسالتك.. الله لايحرم القروب منك..

  4. اخوي تسلم على موضوعك الجميل بخصوص مكينة الخياطه شعبك الكريم يحب يقلد فقط لانه مكبوت شوي وهاذي اول سالفه تلهيهم من فترة طويله الشي الثاني بالنسبة للعسكري شي يضيق الصدر انا وقفني المرور السري بسبب سرعه 126 مكتوبه كذا المخالفه ولكن المشكله اني قعد ساعه و11 دقيقه حاسبها انزل يقول لا خلك في السياره عسكر مريضين الله لا يشفيهم اذا كانو متسلطين علينا بسبب مزاجه …… لان العسكر هنا فثي السعوديه يتعامل معك مو بالقانون بالمزاج وادع ربك ان يكون مزاجه رايق اذا وقفك!!!

  5. السلام عليكم ورحمة الله وبركاته موضوعك حلو بس يكون أحلى بدون سالفة الماكينه عساك على القوه

  6. متأكد مليون فالميه لو كان الإسم الأخير لعائلتنا بنفس عائلة ضابطهم أو أحد معارفهـ .. ماجلسنا دقيقه وحدهـ .. اخييييييييييرا في احد يقول نفس كلامي ,, بس طبعا مواقفنا احنا الطالبات مو مع الشرطة هع مع الإدارة حقت المدرسه ,, حسبي الله عليهم ,, عشاننا بنات قبايل والله ماتشوف المعاملة كيف معانا تخيل حتى اعذار الغايب تجلس تهيننا وتهزانا عشان تاخذها ,, وهو عذر غيااااااب واحيانا ماتقبله وتنقصنا علي الغياب 🙁 يعلم الله اني ما اتبلى عليها بس هي مرة معانا بنات القبايل معامله لا تطاق طيب يعني وين المشكله اذا احنا بدو وهي حضرية ؟ يعني هي صارت احسن مننا ؟؟ ليش التكبر حقها وشوفت النفس ؟؟ ليكون تحسبنا عبيد عندها حسبي الله ونعم الوكيل فيها << كرهت الثانوية بسببها 🙁 << بدر ,, ماتحس انك صرت حمال اسية ؟ خخخخخخخخخخخ ع العموم كالعااااادة موضوع ولا احلى يعطيك العافيه يارب واكيد ننتظر المزيد اختك فتووش بنت المدينة

  7. حدثت هذة نفس هذة القصة في اليمن يحكى ان في نوع من انواع الفوانيس يوجد فية زئبق او مادة نووية وما هي الا خرافات لكي يبيعون الفوانيس القدام وكانوا من ضعفاء النفس ان يذهبون الى القرى القديمة ويشترون الفوانيس القديم التي تحمل اسم جنكيز خان وكانوا يبيعون للمواطنين باسعار خيالة تصل الى 5000 دولار وبعضها الى 20000 دولار وبعد اسبوعين من هذة الحدث يبين انها كلها اكاذيب (( كذبة ابريل )) والان كما حدثت في السعودية على اسعار المكينة ماهي الا كذبت ابريل ……….. وسلام

  8. :)جزاكم الله خيرا ألفففففففففففففف أدور الخبر أول ما طلع :$اليوم حصلت

  9. تعليق على القصة : ألحين الشرطة وقفكم وتمسخر عليكم وهذا موقف يتكرر كثير مع الناس ويتناقلونه في مجالسهم ثم يتركهم العسكري وهم ضايقة صدورهم ويغوصون في مشاغل الحياة وينسون الموضوع لكن لو هالموقف مسويه واحد من أعضاء الهيئة على مواطن كان تنقلب الدنيا ولا تقعد تحقيقات صحفية وتحقيقات وعلى الفضائيات نقاشات واتهامات بس لأنهم هيئة وهذولا شرطة مع إن كلا القطاعين يتبعون : (( وزارة الداخلية )) وعندهم صلاحية بإيقاف المشتبه فيه ومساءلته لكن وش نقول في بعض الإعلاميين الله يهديهم بس والحمد لله على سلامتك يا بدر الشوق ومهوب قصدي أنت لكن هالموقف مثال لمواقف كثيرة تصير ويمكني تحمست شوي 8) بس لأني أكرهـ الكيل بمكيالين في الإعلام بالذات …

  10. 8)8)بدر الله يرجك بس 8)8) المكاين عندنا في المدرسه ضاربه امس جاني خويي مع خشته يقولي عندكم مكاين للبيع ناضرته وحقرته وقلت يالله المخفه والذئاب قصدي الذئبات حابكينها صح والشبمخفه اله يهديهم احلى شي المخالفه لو مكانك اسحب عليه وامشي واعلى مافي خيله يركبه تحياتي : مقاسم الهم

  11. طــــــــــــــــــــــــــــرح في غاية الروعة والجمال .. اعجبني ما سردت لنا من قصص وعبر تضحكنا << يا شين الدبلوماسية فالكلام هع هع اول شي سالفة البنية والله قوية .. بنات اخر زمن B وسالفة المكينة الحمرا مدري ايش.. والله يقصون عالعالم ويضحكون علينا.. لين متى هالتخلف.. خلاص انا عندي جزمة من محل محمد اصغر وقالوا انه شي الماس داخل .. من يشتري ؟؟؟؟ هع هع وخوينا الثالث في كثير تسذا موجودين.. قال نصر قال>> اقوول روووووووووووووح هع هع << هلالية 8) ثاااااانكس ع الطرح والله انك تسذا ( رافعة الابهام مدري ولا السبابة) خخخخخخخ

  12. ههههههههه اضحك الله سنك … دائما مبدع …….. ننتظر جديدك تقبل مروري

  13. هههههههههههههههههههههههههههه عندنا فرن وثلاجه ومكيف فيه زئبق وترى فيهن قبيلة جن تشتري هههههههههههههههههههههههه

  14. الف شكر لك اح بدر بس بنسبه لموضوع المكينه الحمدالله يعني في منطقتنا مو مسوويه ضجه بس سمعت عنها كثير وثريت كثير وسمعت انه شركة الاتصالات هي الي راح تخسر لو بقت هالمكينه لانه تأثر على الابراج وكذا ويكن تكوون صج كذبة ابريل لااكثر ولااقل والله يسااعدهم والف شكر لك اسلووبك كان رائع تكلمت عن وااقع بأسلووب هزلي يجذب القراءه

  15. اولآ اشكرك عالرساله وبالنسبه للعسكري انا اكثر من مره اشوف ان العسكري اللي واقف بنقطة التفتيش بيسوي نفس الحركات اللي تقول عليها ويقوللي هات اثبات اقولله دقيقة ادور له بالسياره طبعا على طول يقول سفط ورح شوي يمين كنك بتوقف وامحط الموتر وما كن شي صار واذا سوى بلاغ اي واحد من الربع بالمرور بيمسح البلاغ وسلامتكم ودمتم

  16. هههههههههههههههههههههههههههههههههههههههههههههه موضوعك آبطل شئ قسمن 😀 آوومآ آلنوري آحلىآ مآفي آلموضوع استفتحت بـ سآلفتهآ ق4ق4 8) تسلم لنــآ يـآبو سـ ع ــد لآعدمنآ خشتك ~

  17. ههههههههه صراحه سالفه المكاين مسوويه رررجه مدري على وشو يسلموو عالموضوع يعطيك العافيه

  18. عليك قصص وحتوتات خوقاق <<< كيف حتوتات البنت مره كويسه مشكور ويعطيك العافيه يا اكوس شئ في الدونيا:$

  19. بصراحة أثرت فيني لكن العين بالعين والسن بالسن والبادي أظلم وأنصح كل واحد بإحترام خصوصية الغير:D ولا أحد يلعب بالنار ليحرق أصابيعة:$

  20. اولا :الموضوع فللللللللللللللللللللللله وتراني ضعت في البدايه لكن عجبتني (يا الربع والربعات) اما الذئبه البشريه هههههههههههههه بس والله ضاق صدري على سالفة الشرطي في انتظار المزيد

  21. انا والله حاسه اني باختنق من كثر الهم الي فيني ودي باحد يفهمني وبس ابغ اتكلم عشان ارتاح:(:(

  22. وقسممـ الممـوضوع فلآويـ قدنـ 😀 المقدمـه خطيـرـه عآد أبـي مسـوآك اللـه لآيهيـنك :$ أوومـآ ح ـكآيـة الذئــبه البـشريـه يآلطيـف يآرـب 🙁 ابو راشد تخيلو لو قالوا ان الزئبق الاحمر يوجد في مخ سيقان العجايز كان كلاً باع جدته بمليون ههههههههههههههه لاتستغرون ناس ماتفقه ^^ يـآإنـي تــســدح ـت منـ الضـح ـك عليـه اللـه يخ ـلف على العقــولـ بس ربي يعآفي يـميـنك ويـسعدك يآشـيخ 8)

  23. بصراحه روعه اسلوب دخلات على كيفك شي مزركش تسلم اخوي بدور الله لايحرمنا من طلاتك ابد الف شكر

  24. وحده داقه على امي تقول هلا والله يوخيتي ام بــدر والله عيالي جابوا لي مكينة خياطة جديدة ولاعرفت لها متعوده على القديمة ام (نمر) اذا عندك وحده بعطيك الجديدة وعطيني القديمة ولا ابي منك فرق في القيمة انا وياتس خوات مابينا حساب <<<<<<الله من الخباثة هههههههههههههههههههههههههههههههههههههههههههه هههههههههههههههههههههههههههههههههههههههههههه خباثه وبسـB يسلموووو

  25. انا مرة مسكوني التفتيش والمشكلة اني نظامي (رابط حزام, معاي الرخصة والاستمارة والاثبات وكل الحاجيات) والعسكري اخذ الاثبات وقعد نصف ساعة ما ادري ليه

  26. مرررحبتين وسهلتين وثلاث جبال مع خيمـه > لايكثر بص احمم اهلين بدرر .. ورببي موضووعـك ششي شيييات اهنيك عليـه 😀 … شسمـه اووول ششي المكااين لا تستغرب وانا وخيتك عندك نااس يجيبوولك المصصـع اي ششي يسمعووون فيـه طيران مع الخييل ياشقرآ :p .. والثااني المخفـه هذا الي لاعبتن عليه وش تسبرهاا تسبيره يااشيخ كان خليتها اصغرر شوي 😀 .. ااماا العصصكرري كفوو والله هلاااالي سلملي عليه حنووا لو يعررف عايلتناا ايه والله تسان يمررك اولهـم > تسنها تعررفك الحين:p .. قسسم قسسماات مووضوعك ششششششي .. لا تحرمننننا من مووازيعك 8) ..

  27. MaC_LeGeNd إن شاء الله يعجبك أكثر إذا قريته 🙂 شكرآ لمروركـ اجمل انسانه الله يستر منك انتي بس لاتصيرين ذئبه مثلهم هع هع <بتصفق شكرآ لمروركـ M!!ss-FooFoo إن شاء الله دوم مروقه شكرآ لمروركـ ابولطف مهما صار مانعمم عليهم كلهم, بس فئه كبيره منهم بهالشكل المتخلف للأسف شكرآ لمروركـ هديل وجهة نظر 🙂 شكرآ لمروركـ abdullah تسلم يالغالي من ذوقك شكراً لمرورك حبيبي فتووووش مو بس فالكليات, في كل مكان وزارات مدارس جامعات الحال من ردي إلى أردى والله يستر من الجاي ياطنط 🙂 ردك أمتعني جدآ 🙂 شكرآ لمروركـ عميري ويجزاك ربي ألف خير شكرآ لمروركـ السياري بالنسبة لي أتكلم عن أي جهه بشكل عام وتقدر تشوف مواضيعي ما أحصرها على جهه معينه وفيه البعض الله يهديهم يتحاملون على جهه معينه مثل (جهاز الهيئه) لأسباب في أنفسهم فقط 🙂 إستمتعت بمرورك أستاذي 🙂 مقاسم الهم لو سحبت عليهم سحبوني مع أذني للقسم ههههههه شكرآ لمروركـ yazeed وهي بدايتها في الأردن عزيزي 🙂 شكرآ لمروركـ حنكوشة المنكوشة هاتي الجزمه بكرا أبيعها لك بـ 100 ألف هههههههههه أنتي كذا (أصبع الإبهام على فوق) شكرآ لمروركـ فديتك ياغلاتي شكرا لمرورك يبي مكنسه فيها زئبق لو جايني قبل اسبوعين يمكن ينلعب علي واشتريها هههههه شكرآ لمروركـ ساره شكرا من ذوقك استاذتي 🙂 شكرآ لمروركـ حمني بس بعضهم يستلعنون عليك ويسحبونك معهم لمجرد أنهم فاضين بس شكرآ لمروركـ ×][ودتس آنتس آنا][× وآنتي ورآي ورآي ههههههه وشسمه آيه ليتني نورهـ بس <<برآ شكرآ لمروركـ .. آسعدني يآجدتي 🙂 منووله شكرا لمرورك ياطنط يالبا قلب قلبي شكرا لمرورك فتحيه هانم m7md-88 يمكن دروا انك بترد علي وعرفوا اني دلخ هع هع <<استهبل بعد انا دم الحياة وش أثرت فيك؟ وأيش اللي سويته وأخترقت فيه الخصوصيه؟ ندووووش شكرآ لمرورك وان شاء الله دوم مستمتعه:) خالد الله يعافيك وشكرآ لمرورك السراب سلامتك يارب ماتشوفين شر MiSs ketChup تعالي ونعطيك مسواك من شجرتنا ههههه لو عندك جدتك بتبيعينها؟ ههههههه ما استبعدها عنك هع هع طيبتي Nضيعتني الشكر لك الله يعافيك وشكرا لمرورك العذب سكر إن كيدهن عظيم لاتستبعدين شي أبد احمد الشهري عادي منت الأول ولا الأخير آرآآآآآووي ودي أكتب موضوع ثاني على ذالرد بس هههههه والعائله بعدين أقول لك هع هع شكرا لمرورك, أمتعني بقوهـ:) للجميع شكرآ لمروركم:)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى