رسائل المجموعة

بطاقات الائتمان – الكريديت كارد اضرارها وكيفيه التعامل معها

السلام عليكم قروب ابونواف
بتكلم لكم عن موضوع يهم الكل خصوصا في هالازمه الماليه !! <= مصدق انكم هوامير
الغالبيه متوهق بقروض واقساط وبلاوي ما يعلمها الا الله
وهالاسهم كلت الاخضر واليابس واللي ما نبت للحين
اليوم بتكلم عن البطاقه اللي تاكل راتبك ومبلغها تافه وقسطها عالي <= وخسيسه وقليله ادب
بطاقه ائتمان أو كريدت كارد او فيزا او ماستر كارد او اميركان اكسبريس .. كللها اسماء لنفس البطاقه
هذا الايميل موجه لكل شخص يفكر ياخذ هالبطاقه أو عنده هالبطاقه
بحكم عملي السابق في احدى هذه الشركات .. فأنا ابغى ابري ذمتي وابين لكل شخص وش هي هالبطاقه اللي يتعامل معاه
وكل شخص يصل له هالايميل بيكون عرف اش هو يتعامل معاه وهو وذمته!!

اولا : طريقه عمل البطاقه :-

يعطيك البنك بطاقه يكون فيها مبلغ من البنك .. مثلا 10 الف او اكثر .. ويسمح لك تستخدمه براحتك وتشتري فيه
اخر الشهر البنك يرسل لك الفاتوره او الكشف .. فيه كل المبالغ اللي انت استخدمتها.. ويطلب منك تسدد 5% بس!!
طيب وش مستفيد البنك ؟ يسلفك علشان سواد عيوونك ؟؟
لا يقول لك بياخذ عليك فوائد 2 – 2.5 % على المبلغ اللي انت استهلكته
طبعا علشان تكون في الصوره الفوائد ربا صريح !! والكل يعرف حكم آكل الرب

ثانيا :ضرر البطاقه:-

البطاقه ما احد يختلف عن حكمها دينيا !! علشان كذا ببين اضراارها الماديه
انت لما تدفع .2.5% بالشهر .. معناته انك تدفع30% سنويا !!
طبعا بالفوائد المركبه تكون تدفع اكثر لأنهم يسمحون لك تستخدم اللي انت سددته
طيب متى بخلص مسددهم وانتهي ؟؟
الجواب ما راح تخلص.. لأنك تسدد 5% وياخذون منها2.5% فوائد لهم !!
انت تسدد 500وهم ياخذون 250 فوائد لهم !!
وال250 اللي سددتها تستخدمها مره ثانيه
يعني اخر السنه تكون دفعت 3 الاف هديه لهم علشان يسلفونك 10الاف
وتكون ايضا اتخلصت من قسط شهري يشاركك براتبك
طبعا ضربت المثال على مبلغ بسيط 10 الاف .. مع ان فيه بطاقات كثير تتعدى هالمبلغ

على فكره ترا في رسوم ثانيه ما تكلمت عنها اللي هي اذا اتعديت الحد او اذا ما سددت شهر او اذا سحبت منها كاش

ثالثا : انت متوهق بالبطاقه الحين.. كيف تتخلص منها :-

اول خطوه تجيب مقص !! وتقطع البطاقه!!لأنك كذا تكون وقفت الاستهلاك
ثانيا تجمع كل الكاش اللي حولك وتقتر على نفسك هذا الشهر ولو تقدر اتسلف من اقاربك وسدد اكبر مبلغ تقدر عليه
هذا تصرف تسويه هالاسبوع .. قبل تنزل عليك فوائد
يعني لو عليها
10 الاف وقدرت تجمع 5 او 6الاف .. راح تكون قدرت تتخلص من جزء كبير من المشكله
واول ما ينزل راتبك الشهر اللي بعده .. تحاول تدفع كل اللي ما تحتاجه ضرووري فيها ..
ولو قدرت تسدد كل المبلغ الباقي يكون بركه ..او تسدد 2500 هالشهر ..
وتكمل 2500 مع الفوائد الشهر اللي بعده
التزم بالخطه وتكون تخلصت منها في 3 شهور !!
وبكذا تكون تخلصت من البطاقه نهائي
طيب لو بطاقتك عليها 20 او 30 الف ؟؟ ولا تقدر تدفعها كللها ؟
الحل انك تاخذ قرض عادي من البنك مدته سنتين بس ..ولو عندك قرض من اول حاول تجدده وتسدد البطاقه
مع اني ما انصح بتجديد القروض .. بس البطاقه ضررها اكبر بكثيييير
على فكره
القرض على سنتين فوائده 4% سنويا تقريبا مقارنه بالبطاقه اللي تاخذ 30% سنوي
وطبعا اذا خلصت البطاقه روح البنك والغيها وخذ ورقه مخالصه

وبكذا تكون ريحت بالك ووفرت فلوسك ..ال3 الاف اللي تدفعها فوائد روح مشي بها عيالك ..
وديهم للطايف خللهم ياكلون برشومي ويرجعون
ولا اشتري فيها شي لنفسك .. اتدلع ب3 الاف سنوي
اشتر هديه لأم العيال

رابعا : البطاقه ما استغني عنها.. تفك لي زنقات اخر الشهر :-

طيب يالغالي .. انت لما تخلص البطاقه وترتب امورك .. حط لك 5 الاف في حساب منفصل
سميه توهيقه اخر الشهر”
واذا مررررره انزنقت اخر الشهر لو اسحب منه شوي ..واذا نزل الراتب علطول روح سدده كأنه بطاقه ورجعه 5الاف
او سدد 5% منه عالاقل
طبعا الاقساط بتكون اقل لأنك اذا سددت 5%راح تحسب لك كللها دفعه ما راح ياخذوا منها 2.5%

ختاما: اذ انت تحتاج البطاقه للسفر او للشراء من الانترنت :-

طلع لك بطاقه فيزا وخلي حدها مثلا 3الاف
واذا بغيت تسافر سدد فيها قبل السفر المبلغ اللي تبي تصرفه
وروح هناك واستخدم على كيفك
وكل هذا بدووون فوائد ولا هلله
ولو استخدمت شي من فلوسهم سددها اول ما تصدر الفاتوره او الكشف.. ولا ياخذون عليك فوائد ولا هلله !!

في الختام
ارجوا منكم صادق الدعاء
واتمنى منكم التفكير بالموضوع بمنتهى الجديه
من وصلت له هالرسال فقد وصله البلاغ
اللهم هل بلغت
اللهم فاشهد
جزا الله خير من نشره

تحياتي
محبكم

مقالات ذات صلة

‫35 تعليقات

  1. انا معاي بطاقة الاهلي مسبقة الدفع و مرتاح عالاخر لا ديون ولا شي واستفيد بها في النت كثير

  2. ياليتك ياخوي بينت ان في مصرف الراجحي لديهم بطاقات ائتمانية حلال 100% وانا شخصيا استخدمها واللمت حقها 5500 ريال وعملها انك تستخدم المبلغ اللي تبي منها ولما ينزل راتب الشهر الجاي يقتصون المبلغ اللي استخدمته كااااامل ولا ياخذون فوائد ولا ريال بالاضافة الى انها مجانية مدى الحياة (بدون رسوم سنوية) انا شخصيا استخدمها ومرتااااااح تماما

  3. سلمت أناملك عزيزي وكل الشكر لك انا عندي بطاقة فيزا ولكن انا بأمريكا وهالبطاقه اي شي تشتريه راح يجيك Online statement وتقدر تسدد اون لاين واذا تعدى الشهر اح تكون الفائده 18.72% أدري راح تقول ان الفائده كبيره ولكن اخوي هذي متاحه للجميع ولا يندرج تحتها اي شروط تعجيزيه والحد الائتماني حقها 300$دولا فقط طبعا هم اعطوني 800$ دولار مدري ليش!!؟

  4. الله يبيض وحهك على هذه النصيحة لاني متوهق فيك واني عارف كيف اخلص منها:$

  5. وووووووه يا ربي لا تفتح علي جروح بس عندي ماستر كاد وفيزا والله انهم كاسرات ظهري كسسسسسسر لي اربع سنين وعجزت افتك منهم بس والله انك شجعتني اني افتك منها باي طريقه تسلم على هالموضوع الروعه

  6. اخي الكريم اشكرك على الطرح ، لكناتصور انو مو دقيق ، اولا البطاقة الائتمانية صارلها سنين بامريكا واوربا ولسا عدنا عم يحاولو يقتعو الناس انو يستخدموها ، ثانيا يعني ما لاحظت بكلامك انك تناسيت شي كثير مهم هو العقلانية !!!! يعني اذا البنك صار اهبل وعطاك 100000 دولار رصيد على البطاقة ، فا بكل ذكاء لازم انا لروح اصرف ال 100000 كلها لانو البنك وفرلي هذا البلغ !! ارجو من كل القراء انو يلاحضو انو البطاقة فيها حد معين يعتمد على تارخك الائتماني واذا ما كان عندك فا راح يبدي بدخلك الشهري مطروح منو المصاريف الاساسية ، فذلك البنك راح يبدي بحد قليل المفروض انو تصرف ضمن حدودو وبعقلانية عشان ما يجي اخر الشهر وانت صارف ضعف راتبك !!! والانسان الطبيعي المفروض ما يكون عليه اي مبلغ خاضع للفائدة . تحياتي

  7. أنا الحمدلله ما تضررت منها لاني طفرررررااااااااااااااااااااااااان واسمع بالكريديت كارد ولا قد شفتها .. عالعمووم شكرا على موضوعك اللي نورنا وجزاك الله الف خير

  8. Al_jre7 Ana fee America zayek bs leesh tgool in al APY 18.72, hatha marrah mertfe3? wa ant teg9ed an alfa2edah 18% Sanawy mosh shahry sa7? :Thany 7ajah Le Kateb Almow9oo3, ant gelt an alfayedah 30%, hatha marrah ktheer wala ged sheft credit card m3 hathy alnesbah? wa ana fee america, marrah 3reebah, momken twa9e7 akthar? wa hal he ma7soobah Sanawy wela shahry, wa lo sanawy keef ya7sboonha shahry ? 30%/12 ? wela keef? Thanks, Turki

  9. اعجبتني الفكره الي قلت عليها ….حقت زنقة اخر الشهر وحلولك بالنسبة للمتوهق بالبطاقة جيدة جدا واعتقد انها فعالة … عموما البطاقات هذه انا ماني مقتنعه فيها ابدا .. واحسن شي ان الواحد يرتب اموره المالية بشكل ممتاز و يستثمر فلوسه بالشي الي ينفعه ويدر عليه الربح الحلال …..

  10. طبعا انحذف جزء من ردي مع اني ما خبرت اني جرحت بأحد وكان المحذوف اسأله عاديه وياريت هذا ما ينحذف بعد..! سؤالي الأول هل البطاقه اللي معاي ربويه او لا وشروطها كالتالي: تسديد كل مبلغ كامل بدون فوائد لو بغيت تقصد راح تدخل الفوائد

  11. وينك من زمـــــــــان يا أختى راحت الناس بداهيه من ورا تأخيرك عنهم . عموماً الله يجزاك خير .. و محتاجين منك نصائح و توعيه أكثر , ترا فيه ناس كثييير ضايعه من كثر التعويم و التغطيه و محتاجين اللى مثلك ولد عم بالدم مو بالذم ولا تقول ممكن فلان يسوى لى ولا بيعمل لى أنا رايح أقول لك حاااااجه وااااحده و انتى تحكمى أسبوعك هذا مين اللى كان فيه أكثر : مشاكلك ولا أفراحك ؟

  12. جزاك الله الف خير والحمد لله انك خبرتنا عنها الصراحة ماتوقعت انها للدرجة هذي:D

  13. انا سبق وتوهقت على خفيف مع الفيزا لكن الحمد لله سددت المبلغ تقريبا 4 الاف واستفدت منه بطريقه ثانية وهو اني اشتريت سلعه بالفيزا وحولتها اقساط وبالتالي استفدت من البلغ الي دفعت.. ومن بعدها صرت اسدد على طول بدون اي تأخير.. واقتراح وضع مبلغ خمسة الاف لوقت الحاجه شي حلو.. وسؤالي لصاحب الموضوع في النقطه الاخيره ختاما هل انت متأكد من زيادة مبلغ فوق الحد الائتماني بأنهم لا ياخذون فؤائد؟

  14. وسام : اول بطاقه جربتها بطاقه الاهلي مسبقه الدفع .. وتعبت من مشاكلها .. وكنسلتها .. ما اتذكر وش كانت المشكله بس خدمه العملاء سيئه جدا !! ميزتها ما تدخلك فوائد ربويه ابدااا عبدالعزيز: الله يعافي قلبك .. ويسعدني كلامك متعب : اهلا .. انا ما ذكرت جميع البطاقات .. خصوصا الاسلاميه .. لأني ارى ان بعضها تحايل على الربا !! وانا لست مغتي حتى افتي لك !! لاكن رأيي الشخصي بطاقه الراجحي ممتازه جدا ..بس لازم تحول راتبك عليهم .. وهذي ممكن تسببك لك مشكله الشهر اللي بعده !! ايضا ممتازه .. ولا فيها فوائد .. وهي من افضل البطاقات الاسلاميه al_jre7 : الفائده اللي انت ذكرت اعتقد انها السنويه .. طييب دامك في امريكا .. اي بطاقه صراف عاديه تقدر تستخدمها كـ فيزا !! واللمت عندك 300 $ يعني 1100 ريال !!! ما تستاهل وجع راس !! بالتوفيق ابو علاوي : ووجهك يالغالي .. ربي يوفقك وتخلص منها .. اتبع النصايح اللي فوق وباذن الله تدعي لي .. اولا قص البطاقه .. ثم سدد اكبر مبلغ تقدري عليه .. ثم سدد الشهر اللي بعده دفعه كبيره الين تخلصها وتلغيها .. وحده من الناس: ربي يعينك عليهم .. انوي سداادهم باذن الله ربي يوفقك .. لو جلستي 100 سنه ما راح تخلص .. اتمنى انك تتبعى الطريقه اللي فوق ابدأي ببطاقه وسدديها .. ثم ارجعي للثانيه وافتكي منها .. طلبعا قصيهم ثنيناتهم من اليوم يسلم قلبك ..ويسهلهم عليك .. rynaoom : اهلا فيك .. كلامي من واقع خبره وتجارب الناس اللي مرت علي .. مو من فراغ !! ويعني لما تكون تستخدم باميركا .. لازم نستخدمها بالطريقه الخطأ ؟؟ في طريقه ممكن اشرحها في موضوع اخر للاستخدام الامثل لها .. لو استخدمتها .. مفروض ما تتعدى ربع راتبك ابدا !! الا لما يكون بحسابك الجاري المبلغ اللي تبي تسدده !! وطبعا من ينزل الكشف تسددها كامله مباشره !!

  15. تركي : ربي يرزقك من حلاله .. ويبعدك عن الكريدت وبلاويها !! Turki : انا وضحت بالموضوع ان النسبه شهريا 2-2.5 شهريا .. سنويا تكون 30% فديتك ياغلاتي : شكرا على مروورك .. وزي ما قلتي البعد عنها اكبر غنيمه !! وربي يرزقنا وياك بالرزق الحلال .. al_jre7 : اهلا اقين .. بحسب طريقه استخدامك .. اذا انت ضامن انك تسددها كامله وفعلا تسددها كل شهر .. فاعتقد ان وضعك سليم .. لاكن لو قسطت .. راح تدخل الربا الصريح من اوسع ابوابه !! انتبه ايضا من انك تعدي الحد الائتماني .. لأنه يدخلك بالغرامات والفوائد .. واحد من الناس: انا واحد مو وحده @@ يعني اخووك !! ما فهمت عليك .. بس ابشر بعزك .. ولو عندك اسئله او اقتراحات هاتها .. وربي يوفقنا في اجابتها .. شقــــــــــاوي : وياك يالغالي .. الحمد لله انك دريت عنها .. وربي يقدرني على خدمتكم شوفك شفا : المشكله مو بس في التاخير .. المشكله الاكبر في عدم تسديد المبلغ كاملا بعد صدور الكشف !! لأنه حتى لواشتريت سلعه وحولتها اقساط .. فانت داخل بالربا الصريح !! اللي انا ذكرت التالي : على فكره ترا في رسوم ثانيه ما تكلمت عنها اللي هي اذا اتعديت الحد او اذا ما سددت شهر او اذا سحبت منها كاش اذا اتعديت الحد او اذا ما سددت شهر او اذا سحبت منها كاش كللها تحسب عليك فوائد !! بس انا ما ذكرتها بالحسبه .. لأنها ما تحصل مع كل الاشخاص شكرا لكم جميعا عالمرور .. واتمنى الموضوع يفيدكم

  16. فيه تصحيح على الموضوع البنك مايأخذ النسبه الا بعد مرور 45 يوم ودام انك تسدد خلال هذه الفتره مافيه ولا نسبة واحدة زائده على المبلغ الي اشتريت فيه. ملاحظه مهمه الفيزا او الماستركارد فيها حالتين يا سحب كاش او مشتريات. في حالة السحب كاش توخذ عليك نسبه مقدارها 3,5 % في السحبة الواحدة وفي حالة المشتريات ولا شيئ ما دام انك تسدد في مدة 45 يوم. انا الحمدالله صار لي تقريبا سنة استخدم الفيزا واسددها اول باول ولم ياخذ البنك اي فائدة مع ان مشترياتي تجاوزت 30000 ريال كمجموع خلال السنة. انا من وجهة نظري ان الشخص يترك مشترياته من يوم 11 من الشهر وبهذا يستطيع ان يسدد قسطين لمشترياته براتب شهرين متتاليين في خلال فترة 45 يوم ومن غير اي نسبة فائده. طبعا تبرئة لذمة انا لا اجيز او احرم الفيزا بس الشخص اذا استخدم الفيزا يحرص تماما ان لا يسحب فيها كاش او يؤجل سددها الى مابعد 45 يوم.

  17. بارك الله فيك على التوضيح الجميل مهما كانت هذه الكروت لها حل غير عادي في المشكلة المالية فإنها حرام حرام لأنه بها نسبة ربوبية و مهما كانت هذه النسبة بسيطة أو كبيرة فإن الربا محرم من الله تعالى . يعني من المفترض انه الواحد ما يشترك فيها .

  18. أخوي أنا والله بصراحة أول مرة أرد على موضوع من شبكة أبو نواف وعادة أنا أشوف الإيميل بسرعة واحذفه على طول أما إنت قريت إيميلك كامل وبصراحة أهنيك على هذا الموضوع أنا موظف بنك وعارف وش قاعد يصير من ورا هذه البطاقة بس بصراحة فكرة إنك توفر مبلغ كل شهر واذا حتجت اخذ منه وارجع اسدده هذه والله فكرة ممتازة جدا وبصراحة من جد أشكرك على النصيحة القوية هذه والله يوفقك تحياتي

  19. شكراً شكراً شكراً نصائح قيمة وحلول راح يستفيد منها ناس كثير ولك الاجر جزاك الله خير الله يوفقك

  20. بيض الله وجهك وكتب الله أجرك ورفع الله قدرك الحقيقة كفيت ووفيت أسأل الله ان يجعلها بموازين حسناتك ..,.. تحياتي .,.

  21. أنا عندي بطاقتين وحدة ماستركارد الخير (الشر) من سامبا وهي كما ذكرت تماماً تقص الظهر قص بالتسديد ولا يبين فيه لكن أنا ناوي أسددها بنفس الطريقة اللي ذكرة على أقساط ولو نتحمل ديون شوي البطاقة الثانية بطاقة بنك البلاد وهي اسلامية ولله الحمد مرتاح معاها تماماً وإن شاء الله بخليها. سؤالي ياغالي بالنسبة لإلغاء البطاقة بعد التسديد هل يكون بأي فرع وإلا لازم المركز الرئيسي وهل لازم اخذ ورقة مخالصة … ياليت تفيدني وجزاك الله خير عز الله أنه موضوع مفيد

  22. أخي الكريم مشكور على الموضوع القيم .. فيه ملاحظة بسيطة إنت ذكرت إن أول خطوة للتخلص من البطاقة إنك تجيب المقص وتقصها .. وأحب أفيدك ولا يهون الحاضرين 😀 إنه كما سمعت من خبير في بطاقات الإئتمان وأظن إسمه فضل البوعينين في إذاعة الرياض قبل أيام قليلة إن إتلاف البطاقة لايكفي .. حيث يجب إلغائها رسميا من البنك المصدر لها لأن البنك بيستمر في أخذ الفوائد .

  23. والله أنها تجيب العلة للواحد .. أنا كانت عندي فيزا وماستر كارد تبع ساب .. وصار لهم سنتين يسحبون مني وماني بعارف كيف أتخلص منها .. والحمد لله السنة عزمت على نفسي وبدل السفر والخرابيط .. سدتت المبلغ كامل وألغيت البطايق مرررة وحدة .. ولا بعد غيرت حتى البنك وعملت معهم اخلاء طرف على شان لا أفكر في هالاشياء مرة ثانية … شكرا على ا لموضوع .. وللمعلومية إن ثاني أغنى رجل في العالم ( بريطاني هو مو ذاكر اسمه ) كانت من أول نصائحه هو الابتعاد عن البطاقات الإئتمانية لأنها مهلكة للفلوس .. 🙂 تحياااااااااااني

  24. اخى الكريم جزاك الله الف خير على التوضيح الجيد لبعض افراد المجتمع الغافلين عن حقيقت استغلال البنوك لحاجت الناس ورجوا من الله لكم التوفيق وبعد الجميع عن الحرام الذى اخذ البعض في تحليله للناس واسغلال حاجتهم للمادة وجهلهم بأمور ديننا الحنيف الذى وضح لنا جميع أمور حياتنا اليوميه حتى ابسطها . وانا مع التعليق 10 ضد الجوء لبطاقات الائتمان او القروض . ودمتم على الطرح المفيد .

  25. السلام عليكم انا عندي بطاقة من البنك ينزل راتبي فيها واقدر اسحبه من ATM وكنت ابغا كريدت كارد او اي كرت يخليني اشتري من الانترنت سالت البنك قال لي الكرت اللي عندك DEPT CARD ولازم تقدم على كريدت كارد، صحيح الكريدت كارد لها خدمات جدا اضافية بس انا ما ابغا استخدمها غير للدفع عبر الانترنت بعدين رح ياخدو 70درهم شهريا ! ليش هل في كرت احط فيه فلوس وبعدين ادفع بالانترنت … طبعا غير CASHU ابغا فلوس في PAYPAL في انتظار ردك لاني ما اعرف كثير في الكريدت كارد تحياتي

  26. على فكرة اعرف كثير عندهم مشاكل بسبب الكريدت كارد اللي اتقدمها البنوك والعروض المغرية! منهم اخوي اللي عنده ديون من 4 بنوك مع ان راتبه بسيط جدا واعرف شخص ثاني راتبه فوق 20الف درهم اماراتي بس مديون للبنوك . مع انه ساكن بروحه ومصروفه عادي وسيارته عادية ! الله اعلم

  27. انا عندي بطاقة فيزا ذهبية من سامبا حد المتشريات 22500 والكاش 16000 كاش ماسحبت اما المشتريات اشتريت سلعة وقسطها ومنتضم فيها الا ان تمت مشتريات عن طريق البطاقة بدون ما ادري والبطاقة موجوده معايا وبلغت من 7 شهور للحين ماصار معاي شي !! ياليت تخدمني فيها وتقلي كيف اتصرف وفين ممكن ابلغ عنهم واخذ حقي لانهم كاسرين ظهري اثمان 🙁

  28. والله كلام جميل وحلول جد رائعة لو طبقها الواحد الله يكتب لك أجر ماقدمت.

  29. والله اني قطعتها ألحين (الخير من سامبا) وبكرى أنشالله رايح لمهم للبنك ألغيها

  30. انا معي 5 بطاقات ائتمانية
    الاولي 20 الف
    والثانية 14 الف
    والثالثة 8 الاف
    والرابعة 8 الاف
    والخامسة 5 الاف
    ووصلت لمرحلة سحب كل الكاش الموجود بالبطاقات نتيجة ظرف طارئ
    حاولت اغفلهم علي مدي سنتين رغم انه راتبي جيد فشلت والحين الحمد لله خذيت قرض واتخلصت منهم جميعا

  31. لقد توصلت ببطاقة ماستر كارد و قمت بتفعيلها لكن لم استعملها اطلاقا … هل هناك أضرار ؟؟

  32. الله يجزاك خير ويبارك لك في رزقك من زمان ابي شرح واضح اخذت انا مره فيزا والله كانها اخطبوط متشبك فيني الحمد لله لين سددتها وتخلصت منها اول مره اعرف انه ربا والله كانت خساره ولا فيها خير الله يسامحني

  33. عندي سؤال…انا كنت مفكره اخد بطاقة قيمتها 8000 ووقعت عالاوراق بس لسا ما استلمتها وبعدين غيرت رأيي …بيخصمو شي مني وبتنحسب علي ولا لاء علما باني لم استلم البطاقة بعد ومافعلتها بس مارح استخدمها ف كيف اكنسلها؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى