رسائل المجموعة

اللي اختشوا ماتوا :)

سلخير جميع …

عاد اللي ساعته الآن ( 7 ) الصباح .. فراح أقولّه بالفمّ المليان سوس ( يسعد لي صباحك الوردي )

ثلاثة تنبيهات بسيطه وفطفوطه أحبّ أبيّنها للجميع

بدايةً .. أشكر أخوي الكريم : أبو نواف .. على هالجهود المُتميّزه بالموقع .. وآخرها إضافة ( 9 ) مواضيع جديده في صفحتى الخاصّه .. وهذا شُكر أعتبره بسيط مُقابل جهوده المتواصله والمُشاهده للعيان .. هالكلام ماهو من قبيل المدح والثناء فقط .. بل من ردّ الجميل لأهله

– – –

الأمر الثاني .. أشكر جميع من يُراسلني بخصوص مواضيعي .. والشكر موصول للأخ ( ابو شليويح ) << مدري وش هو ذا .. بس الصراحه سوالفه جايزتن لي بالحيل .. أحسّ أني أعرفه .. .. وبالنسبه للي يراسلني ويطلب منّي أني أتكلّم عن موضوع مُعيّن .. فيبشر بعزّه .. بس ماهو آلحين .. لأني مشغول ويالله أحك طرف أذني اليسرى من الاشغال اللي متراكمه براسي .. واللي في خاطره موضوع مُعيّن للحديث عنه بطريقتي الخاصّه فبريدي بين يديه .. بس يدعس عليه بخشمه ويبشر باللي يسرّه .. عالعموم .. تمّت إضافة ( 9 ) مواضيع بشكتن وحده .. وهي على الروابط التاليه /

ياروحي يالتسبده .. !
عيدي اليوم .. عيدين !
رز أبو كاس … راح فيها !

 [ بـزرانــكـم أشــغــلــونــا ]
ياعيني ياماهر على التصوير اللي مامثله بالدنيا ( مقطع فيديو ) !
الحب غربلني وغيّر احوالي !

وهذي ثلاث حلقات للحريم .. لاشوف تمساح داخل

 ( المطبخ الرمضاني ) .. موضوع خاص بالحريم والبنات بس ! ( الحلقة الأولى )
( المطبخ الرمضاني ) .. موضوع خاص بالحريم والبنات بس ! ( الحلقة الثانية )
 ( المطبخ الرمضاني ) .. موضوع خاص بالحريم والبنات بس ! ( الحلقة الثالثة والأخيره )

 

– – –

التنبيه الأخير .. وكُنت مترد في طرحه .. لكن الشكوى لله .. وهذا شي من حقّي وضروري أخلي الجميع ينتبه لك

وش رايكم في اللي يسرق ؟

طيب .. خلونا من اللي يسرق وراح نعطيكم من الآخر ..

وش حُكم ( السَرِقه ) ؟  

أكيد أنها ( ماتجوز ) طبعاً .. حتى لو كان الحرامي خويي ( دحيّم ) والمسروق ( أبو سالم الاعور ) اللي باقصى الديره !

باختصار ومن دون طويله عليكم يابعد حيي …

بالأمس مديت رجلي .. لأصل إلى أقصى حرف في موقع ( قوقل ) الشهير

قلت : ياولد .. خلني أبحث عن بعض المواضيع اللي كتبتها في الفتره الماضيه .. يمكن نلقى تعليق جانبي .. أو واحد يبي يسلفني .. أو يمكن نلاقي أحد يعرض علي وضيفه عنده … أو نطيح بوحدتن تبيني أعرس عليها

ومن بديت البحث وانا اللي ألاقي طوّام .. كنت صراحه أتمنى وقتها أني ماتجرأت أو فكّرت بالبحث .. لكن ( النفس وماتهوى ) .. أكثر من ( 50 ) حرامي وسروق أبقع لاطش أكثر من موضوع لي .. مع أن مقالاتي دائماً أدوّن في نهايتها وبالخط العريض [ ممنوع لطش الموضوع ياللي مانيب قايل ] .. بس بعض الناس مايفهم ويدّه تحكّه انه يهرقل ويبدى يزوغ ويسرق أبو الملطوش وينسبه لفضيلته !

الغريب أن البعض لقيته ( مُشرف ) في منتدى .. يعني قدوه لغيره أنه يكون ( لَبِنه حسنه ) و ( قدوه صالحه للأعضاء ) .. لكن نفسه تأبى إلا تلطيخ حروفه بالمسروق !

ماكنت أنوي أكتب هالحروف .. لكن البعض يتركني أموج في بحر ( إعلان الفضائح ) .. كي أوقف ( مدّ وجزر ) السرقات المتواليه .. !

كُل أمانيي فقط ممن سأضع صورهم الآن أن يتوبو إلى الله وأن يتركوا تِلك الحركات الصبيانيه الغير لائقة .. وأتمنى أيضاً ممن لديه نيّة بالسرقة أن يتذكّر أنني لستُ مُبيحاً له بنقل أي حرف .. وستقف أمام الله عزّ وجلّ يديه للشهاده عليه بما تجرأت بنقل مالا يحلّ له ! .. وأيضاً لن تَفتُر يدي عن البحث عن غيرهم .. وهذا مكيالٌ لوقف زحف السرقات التي نجدها بين الفينه والأخرى لبعض من يجتهد في الكتابه ثم يجد غيره ينسِبُها إليه .. سواءً لي أو لغيري من الكُتّاب الذين يبذلون الجُهد في كتابة المواضيع .

# ليس العيب بأن تَكتُب منقول .. بل العيب أن تكون نفسُكَ مطواعةً لك بالشرّ !

:: مدمن شاهي ::

مقالات ذات صلة

‫45 تعليقات

  1. السلام عليكم ورحمة الله وبركاته مدمن شاهي ردد المقوله : إن لم تستحي فإصنع ما تشآء هذه ضريبة الإبداع و أنا أختك مأجور إن شآء الله ،،، بنت ’’’ ســـ الليل ـــامرة ‘‘‘ السعوديه

  2. بصراحة حرام يروح التعب لا والمشكلة ماقهرني الا تعليق الحلو القناص من جد عينك عينك عموما اللي تستحي منه بده ولا يهمك احد عاد هذي امانه المفروض يكتبون منقول وتنهي كل المسألة

  3. حعلي مانيب حرامي عندك <<< من زين الدعوه يخي المفروض تنبسط ان مواضعيك تنتشر موب لازم اسمك ينتشر خل روحك رياضيه زيي تنتشر مواضيعي بدوون ذكر المصدر ومن قواة الوجه واحدن من المواقع يقولون ماتقرين الموضوع لين تسجلين هااااو

  4. السلام عليكم صبحك الله بالخير انا عادتن احب اشوف صور القروب ,, وهذا الموضوع شدني وخلاني اقراه لمن الأخير , ودام هي على السرقه راح تتعب ,, والسرقه اللي شفتها بالرساله يدل على تميزك ابداعك يالغالي . روح دربك خضر <--يشجع المنتخب تحياتي لك

  5. السلام عليكم مدمن شاهي موضوع اليوم كثير زعلني ومو مثل كل المواضيع كما تعودنا ان ترسم الابتسامه على وجوهنا لكن زين ماسويت وفضحتهم وكلن باسمه علشان يتأدبون وتسلم الرجل اللي انمدت على قوقل وطلعت هالفضايح لك مني كل الاحترام والتقدير وبالتوفيق , , ,

  6. اهم غلطانين لما نقلوا الموضوع بدون ذكر المصدر وانت غلطت بعد فضحتهم هع

  7. ماعليك منهم وانا اختك هذي ضريبه الابداع ولو ماانت مبدع والناس تدور مواضيعك كان ماشفتهم سارقينها الله مير يشفيهم ترى اكره ماعلي اشوف واحد لاطش موضوع وساكت عنه واحسن شي انك فضحتهم

  8. تعرف الاصلع اللي يبز بشعر ولد عمه ؟ خخخ مدمن .. انا اعتبره شي يضاف لك انك تلقى احد زي كذا لذا .. وسع صدرك فأنت دولي

  9. يا مدمن (أحس انها سبه) وسع صدركـ اخوي بس تبي الصراحة يوم عرضت صور للحرامية قلبي وقف قلت لاتكون صورتي بينهم(أمزح لاتزعل) وأزيدكـ من الشعر بيت يمكن الحرامية يلطشوون موضوعكـ هذا و يكتبون *الحرامي أهه* وباركـ الله فيكـ وأعانكـ على بلواكـ

  10. صباح الخير مدمن شاهي ماعليك من احد ومثل ماقلت اختي بنت السعوديه ان لم تستحي فاصنع ماشئت وهذه ضريبة الابداع والله يوفقك وعلي فكره انا احب اقرا مواضيعك بس اقولك اولا واخيرا لايهمك احد والله يوفقك.

  11. هاهاهاهاهااههههاهاهاهاهاهاه زعلان والا مبسوط معاك حق تزعل اذا بيدل على شي يدل على انك مبدع وكتاباتك ناجحة …..خل غيرك يستفيد مع احترامي لك انا مايعجبنى اي موضوع تنزله يمكن بسبب طريقة كتابتك للموضوع وكلماتك ماكون فاهمتها فما اكلف على نفسي انى اترجم كلامك لاتزعل الحق حق يسلمووووو

  12. مدمن أنا قبل وربي أحب مواضيعك مرره مرره وزاد حبي أكثر فيك أنك وضحت صورتهم أمام الكل .. ماقول إلا عقبال مايكتبون منقول والله يعيينك على الجاي منهم حنا معك قلبا وقالبا << داش حرب ههههههههه الله يوفقك وأنتظر جديدك ولا مهونة لأبونواف والربع .... حديجان 🙂

  13. انا عندي لك فكره حلوه وانت ابخص سجل بأسم مدمن شاهي وحط بين قوسين ابو نواف واذا عندك خبره بالتصميم اكتب الموضوع وحط الخلفيه مدمن شاهي بس هذا القناص فلللللله حرامي درجه اولى الا اقولك سجل معهم بالمنتدى وكل ما نزل موضوع احجره لين يطردونك تصبح على ظهر بمان الله

  14. معقوله حتي انت ماخذت موضيع من احد المنتديات الجنبيه ياخوي الدناء نسخ ولصق وسع صدرك ياخوي

  15. حلوه طريقتكم في فضحهم يامدمن ، وان شالله تكمل ع الباقي ويتأدبون ، ودي بس أعرف وش موقفهم آلحين والناس تعرف فضيحتهم ، جعلي ماآخذ منك شي يامدمن ، والله ياأنت فضيحة ماتسوى ، بس خلهم احسن يتادبون ويعرفون قدرهم ، وترى هاللي حصل لك يامدمن شرف لأنك متميز واللي يتابعونك بالملاييييييييييين ، طولت سوري

  16. أي والله زين سويت >>الله لايطيحني بين يديك:) بس أحلى شي تعليقك على توقيع واحد فيهم >>نسيت اسمه …

  17. من جد يامدمن قهر-واللي يقهر أكثر انها حتى نفس العناوين ماكلفوا على خاطرهم يغيرون فيه شي يعني سرقه بكل ثقه -لا ويردون على التعليقات بعد بكل بجاحه بس حط ببالك لو مواضيعك موهب حلوه كان ماشلحوها-

  18. ههههههههههههههههههه هلااااا مدمنوه ماشفت شي فيه ناس مريضه.. وبجيحه.. والاهم ناس ماعندها شخصيه مستقله يعني مانقول انها ترتقي على ظهور العالم وبس لا هم انفسهم بدون شخصيات يعني مسكين تلقاه وده يطلع على الدنيا كبير على طول.. يارجال والله تتعب من هذي الاشكال رح اكتب اسم اي شخص هنا.. حط اسمي بقوقل ..او يابعدهم.. او غير البشر.. او اي عضو مميز وشوف كم تبي تلاقي ناس سارقين اساميهم وتواقيعهم.. تتعب .. والمشكله مافيه اي احساس تكتب تسب تضرب.. هم اصلاا بدون شخصيات يعني تبي تهز شخصية مين .؟ بس تعجبني لازم نغدغ مشاعرهم بين الفتره والاخرى ونفضحهم (:

  19. يا سبدي سبداه ههههههه حلوووووه مدمن وصحيح اللي اختشوا ماتوا ….. بس تصدق الشهره شي صعب اخوي ماسمعت عن المقوله اللي صاجينا فيها حشريين اللي مطامر وطردي خلف كل مشهور وهي ان المشاهير ليس لهم خصوصيه فهم اصبحوا للعامه حتى حياتهم الخاصه , بالتوفيق اخوي

  20. يا خي يا كثرهم و يا سخافتهم اللي يسوون و با احتراف مكشوف قص و لصق صححححححححححححححح

  21. اخوي مدمن شاهي …اولا ..كثير من الناس يأخذ الموضوع وينسبه لنفسه ..زوهذا ما يسمي بقليل الذوق…. لانه لا يحترم حقوق الاخرين.. والاهم من ذلك …انهم اصحاب واعضاء مهمين في المنتديات واصحاب مشاركات كثيره …. هل كانوا يسرقون كل مشاركاتهم؟ لاكن حقك مايضيع أن شاء الله………… مشكور علي هذا الموضوع…

  22. بصراحه والله أحب الفضايح << فيه عرق شامي لما نشرت صورهم مع المواضيع حسيت اني ما ودك تخلص ... حتى وانت حاط موضوع تفضحهم تصير مواضيعك حلوة .. دوووووووووس عليهم

  23. ماعليك منهم يا مدمن كل الناس تدري من هو مدمن شاهي الاصلي ومثل ماقال ورقة بعضهم إلى التوقيع يسرقه هذا وش ترجي منه ؟ بس تدري ودددي اشوف وجه القناص اللي لطشك وهو يشوف هالموضوع هههههههههههههههههههههههه موفق يابعدي و إلى القدام

  24. مشكوووووووور أخوي الغالي مدمن شاهي والمفروض فضح هؤلاء على الملاء كي يكونوا عبرة لمن يعتبر ومشكووووووووور على التعليقات المقلعة

  25. السلام عليكم ، حتى في فضحك للبشر مقلع حتى الثماله ومنتهي ومقلع ومدري وش بعد ، عالعموم أنت يامدمن معروف للجميع بكتاباتك الساخره اللي تغطي على ألف كاتب في الصحف والمجلات ، كاتب كتباتك حلوه وابو نواف وقروبه متابعين لك ، وان شاءالله تستمر معنا وافضحهم الله يفضحك الظالم ، وترانا بعد ننتظر الحلقة الثانيه من الحياة الزوجيه << عزوبيه وش دخلني ، بس مواضيع مدمن لازم ادخلها ، هههه

  26. اخوي الوريد لو انت تعرف مدمن شاهي ما رديت هالرد انت شايف كل الناس مثلك بس شغلهم ينقلون يعني برأييك منين جت هالمواضيع , من ناس مبدعين ناس تنتج وتتعب على المقالات , الله يهديك بس . صراحة شي يقهر اخوي مدمن , وانصحك في المرات القادمة تكتب مقالاتك على شكل صورة بالفوتوشوب لحفظ حقوقك والله يهدينا وياهم والله يعينك أخوي الغالي

  27. بصراحه لما شفت اللى حصل يا مدمن شاي اولا كان نفسي اعزمك على براد شاي عشان تروق وتنسى اللى حصل بس والله زعلت من قلبي وكانهم سارقين موضوعي انا او بالاصح موضوعاتي لكن انت عملت لهم الواجب وزياده على اللى عملوه وما قصرت واتمنى انهم يعتبرو ويكونو عبره وياريت كل الزوار مثلي يشوفون ويروحون باحترام وهذى على فكره اول تعليق لى بالموقع منذ اشتركت به من تقريبا سنه ونصف وتقبل خالص تحياتي وشكري اخي مدمن ومشكور على مواضيعك الحلوه موما قصوت والله ومنتظرين جديدك

  28. ضحكني تعليقك اخي الله يسلمك بس احسن شي عملتو انك فضحتهم لان صعب تجد جهدك يؤخد بدون كلمة شكر ولا تنويه صغير لصاحب الموضوع على الاقل يكتبو وصلني من البريد… و حتى لو ا اختشو منك يستحو من رب العالمين اللي عارف و شايف كل شي هم يستصغرون هده الامور لكنها عند الله عظيمة ودمت بخير و دامت روحك مرحة اخي مدمن شاهي…

  29. سلام عليكم جميع .. كلّن باسمه أزف له وردتن حمرا .. وعاد اليوم متقطعن وجهي عندكم .. القهوه قضت والهيل تبعثر تحت مجلى المطبخ .. يعني مهناش قهوتن تبرد التسبد .. والجود فالماجود .. ولو الودّ ودّي كان طرحنا الذبيحه هنا .. والعلم السفر ان شالله لاحقين عليه .. بس انتم لاتقطعون وسيّروا علي كل ماشفتم ( مدمن شاهي ) منوّر الشاشه << أنقلع بس انت ووجهك . ماخذن بعمرك مقلب 🙂 ! صراحه من كثرة الرسايل على البريد أجّلت الرد على بعضعها في وقت لاحق .. والبعض منها حوّم تسبدي يوم انه اسعفني بكومة مواضيع لي ثانيه تمت سرقتها .. لكن أملي فالله ثم في هالموضوع أنه يكون درس لِكُل من ذهب لون الحياء من وجهه أنه يعقل وينضبط ويترك عنه السرق .. عالعموم .. حصل خير .. ولاعاد أشوف أي حرامي يسرق لي موضوع << الله من واحدن بعد بينضبط بعد هالموضوع وبيقول في نفسه : أبشر طال عمرك 🙂 إلا بسألكم : آلحين الواحد إذا بغى يقول لواحدن يعزّه شي .. وش يقول ؟ .. لأن لي يومين أبي أقول لخويي راشد أني أعزّه وماقدرت أنطق بحرف وكل ماشفته .. تلعثمت وتطاقت الحروف عند ثمي وبرطمت وسكتّ .. 🙂 محبكم : مدمنوه واليوم عندنا حرّ !

  30. برآفو عليك .. و ربي انت بطل مثل هـ النآس ما ينفع معآهم إلا كـذآ اصلا مادآم انهـ سوآ حـرآم .. مآرآح يفرق معآهـ مثل هالتشهير متآبعين لك انت بلحآلك .. و هم في القآئمهـ السودآء .. تحيآتي ،،

  31. السلام عليكم تحية ود واحترام ابعثها لك اخوي مدمن شاي صراحه مره عجبتني وانت مشهر بهم وفاضحهم وصاف مواضيعهم بمنتدايهم :).. يستاهلون العالم تحسب الانترنت تسليه فقط.. مافيه حلال وحرام.. سؤال يجول في خاطري ( بالله مايعرفون ان قروب ابونواف اشهر من نار على علم.. مايستحون يجي واحد يقلهم قريت الموضوع من قبل في القروب للكاتب مدمن (طبعا اللي مايستحي من اللي فوقه وفوقنا.. مانرتجي منه خير ) وترا الاخ لمن يقول الرجاء عدم النقل الا بذكر المصدر.. حفظ لحقوقه الادبيه.. الادمي ممخمخ على الموضوع.. وكاتبه بجهد الشخصي.. مافيها شي لوكتب منقول من قروب ابونواف للاخ مدمن شاي ترا عيب الحركات ذي.. كبرنا خلاص عليها >>>>>> مندمجه مره بالموضوع ودمها يغلي من بجاحتهم واخيرا تقبلوا احترامي

  32. ههههههههههههههههههههههههههههه ههههههههههههههههههههههههههههه ههههههههههههههههههههههههههههه ههههههههههههههههههههههههههههه ههههههههههههههههههههههههههههه ياويلي بطنيييييييييييييييييييييييييييي الله لا يفضحنااا العن ابو اشكالهم نصابين يسرقووون ويعننهم هم اللي يكتبوون واكثر شي ضحكني القناص وجهه وسيع لاطش الموضوع ويقول مابي احد يسرقني ههههههههههههههههههههههههههههههههههههههههههههههههه وجهه استرتش

  33. انت مبدع بكل ماتعنيه الكلامه .. فضيحة على رأس البتاع يستاهلوها هاللي مايستحوووون .. تشكرات مدمن وكل يوم نزل موضوع

  34. انا الصراحه انسدحت من الضحك وتقطعت مصراني وحصوصا الاعوار……<< حاسه اني بتكفخ للسرق اصول ومداخل وبيبان ورايش بعد.......يعني اللي بلطش يبهر الموضوع شوي ويخذف يتفلسف كانه يعرف اما انه يسرق حتى النك نيم فهذا ناوي يلطش كل مواضيعك احرص على هدومك الى نشرتها على الحبل فربما تجد صروال السنه عند احد الجيران......<< تعجز تجيب مثل هالمثل عموما تعيش وياكل غيرها...........<< حاسه ببياله الشاهي في وجهي

  35. جد والله قوووووة لطش والله من قريت الرسالة وانا اضحك مدري من الكفشة والا الخيبة الى انتابت الشباب .. يا فضيحتهم بين اعضاء المنتدى حقهم . جد شر البلية ما يضحك .ههههههههههههههههه

  36. هلا والله وغلا اخوي مدمن 😀 ياشييييييخ اقصم بالله فقعت ضحك لييييين قالم المسجد الله اكبر 😛 ماشاء الله اهنئيك على روحك المرحه << وقته :@ من جد اللي اختشو ماتوا :D:D <<لاتقول لاطشه الموضوع بعد انا مجرد اذكر نفسي 😉 تشكراااتـ على الطرح الممميز 🙂

  37. حتى المواضيع تنسرق الله يكون بعون الكتاب . مابقى شئ ما ينسرق الله يعينك يامدمن شاهي بكره بطاقة الاحوال والسياره والمنزل بأسم واحد ثاني هههههههههههه

  38. حياك خيي وبياك واحلا تعليق تعليقك بس بغيت اقول لك قصه المثل اللى اختشو ماتو نسمع كثيراً مثلا مصريا دارجا هو اللي اختشوا ماتوا ولكن هل تعرف خيي مدمن شاهي قصة هذا المثل؟. إليك القصة التي وقعت بالقاهرة أوائل القرن العشرين: كانت تنتشر في القاهرة، شأنها شأن كثير من المدن الكبيرة، حمامات عامة بعضها يخصص للرجال والآخر للنساء.. وبعضها للاثنين يعني شِفتين: الصبح للرجال والمساء للنساء. ذات يوم حدث حريق هائل في أحد حمامات النساء اللواتي كان أمامهن واحد من خيارين: إما أن يهرعن للخارج وهن عاريات تماماً وبعضهن بالملابس الداخلية لكي ينجين بأنفسهن وإما يبقين ويواجهن مصيرهن المحقق مقابل الحفاظ على حيائهن وسترهن. وكما هو متوقع انقسمت النساء إلى فريقين، الأول: خرجن كما خلقتني يا رب خوفاً من النار والثاني: بقين خوفاً من العار. اللواتي خرجن نجين من الموت ولم يذكر التاريخ عنهن شيئاً.. أما اللواتي بقين فاحترقن ولم يبق من أجسادهن إلا الرماد، وصارت حكايتهن مثلا بين الناس: اللي اختشوا.. ماتوا!؟. لو وجهنا السؤال الآن إلى القارئات: لو كنتن في هذا المأزق.. ماذا كنتن ستفعلن؟ المؤكد أن معظم القارئات سيجبن: سنبقى في الحمام ولن نخرج عاريات أمام الناس. أليس كذلك؟!!!. الله يستر علينا وعلى من يحب الستر

  39. لو كتب في الآخر منقول من مدمن tea ما بيخسر شيء لكن انصحك ان تغير الحبر الي تكتب فيه وتخليه لون بني ههههههههه

  40. السلام عليكم مدمن مدري اضحك والا ابكي ههههههههههههههه بصراحه قويه الحركة وخوفتني بسوي زيك لاتكون تصاميمي وخواطري اللي ارسلها بالقروب تسرق بعد بس هين اليوم بستقعد على قوقل واشوف والظاهر بنزل موضوع مثلك واكتب اللي اختشوا ماتوا الجزء الثاني ههههههههههههههههه….. المهم … أنا عندي فكرة حلوة وطريقة تحشرهم كلهم وتحرجهم حتى النخاع سجل في نفس المنتديات اللي هم فيها ورد على مواضيعهم قول :(( أستحلفك باللي خلقك أنت اللي كاتب الموضوع ..؟)) وشوف رده اذا مانحاش من الفشيله ماراح يعرف يرد بعدها لأنه مايقدر يحلف كذب ولو افترضنا انه مايخاف الله وحلف كذب حط له رابط موضوعك بقروب ابو نواف وقل شوفو ياجماعه هذا موضوعي الأصلي والرجال هذا سارقه لوووووووووول فضيحه الله يعينك وكل مسلم وهذي تعبر سرقه وحد السارق القطع لكن استهانوا وغرهم بالله الغرور

  41. اخوي مدمن شاهي كلمة وحطها براسك وانا اخوك ماحدن سارق موضوع لك الا والموضوع في قمة الامتياز والتكامل بالعكس المفروض تفتخر ان احد يسرق منك موايع لانه يدل على ثقافتك واسلوبك بطرح المواضيع والكلام ياخلفهم ^_^ واخر كلامي احترامي للحرامي وتقبل تحياتي اخوك مهند ^_^

  42. لا تخاف صدقني إني راح أحارب اللي يلطش مواضيعك .. وقبل فترة قليلة .. واحد مسجل في منتدى أنا مشرف فيه وبحمدلله تم كفشه ( من قبل أحد المشرفين المتابعين لك هنا ) وقام بشرح الموضوع لنا في منتدى المشرفين .. وتم حذف عضويته .. ليكون عبره لغيرة ..

  43. يامدمن وسع خاطرك اساسا باين من تعقيبهم على الردود ان الاسلوب يختلف بس انت اطلق منهم ماعليك << تراها يقال ترفع معنوياتك 🙂 بس بالله ماحسيت انك مشهور 🙂 يلله بحفظ الرحمن ووسع صدرك ترى يبين اللي ملطوش من اللي متعوب عليه (;

  44. حبل الكذب قصيييييييير أقول مدمن أحمد ربك بس أنهم ماكتبوا بقلمي خخخخخخخخخخخخخ

  45. مدمن شاهي امسح دموعك يارجال والله اني حاسة بالقهر اللي بتسبدك كبرمخدتك وانا اختك وترى ذولي واجد والله يعينك والله انه صدق قهرررررررررررررررررر طيب على الاقل اكتبوا من بيت الجيران الا لطش عيني عينك بالله مايستحون ابشرك مدمن والله اني لي عجبتن صورة من عندك اني احطها بالمنتدى ومااغير بها شي تراها يااوادم جهد ناس وتعب حسوا واذكروا المصدر عشان الرجال يتشجع ويبدع زود والا هو بكم والابلياكم مبدع

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى