رسائل المجموعة

التقرير المصور لرحلتي إلى ماليزيا Malaysia

ماليزيا

السلام عليكم
هذا تقرير رحلتي الى ماليزيا لصيف 2006 وان شاء الله يعجبكم

في البداية واجهت مشكلة في حجوزات الطيران وانصح اي واحد يبي يسافر يحجز قبل الصيف .. عموماً حصلت حجز على الخطوط السيرلانكيه .. شفت قيمة التذاكر وقارنتها بالخطوط السعودية ولقيت الفرق تقريباً 2000 ريال والله فرق مهوب سهل بس الرحله راح تتوقف في كولمبو عاصمة سريلانكا لمدة ساعة ثمن نركب طيارة ثانيه الى كولا لمبور والخطوط السعودية دايركت الى ماليزيا بدون توقف .. فدرست الموضوع وقررت السفر ..

في البداية توقعت الطيارة بتكون كلها شغالات هع هع هع لكن تفاجأت ان نصف الركاب عوائل سعودية فريحني هالشي والشي الثاني ان مستوى الخدمة ونوع الطيارات كان جيد والحمد لله ، وسمعت ان طيران الامارات يتعامل معهم او مستثمر عندهم او شي من هالقبيل ..

بعد حجوزات الطيران استشرت بعض الاصدقاء وجمعت معلومات عن طريق النت عن ماليزيا وسويت لي برنامج وحجزت الفنادق والطيران الداخلي عن طريق مكتب سياحي في الرياض ..

بدأنا الرحلة من الرياض ووصلنا بعد 4 ساعات الى كولمبو وصلينا الفجر وانطلقنا لكوالا لمبور بعد انتظار اقل من ساعة ووصلنا ولله الحمد بعد تقريباً 3 ساعات ونصف وتوجهنا فوراً الى سلنجور واللي تبعد عن المطار نصف ساعه وبالتحديد الى فندق براميدا وكانت الخطة هي الراحة لمدة ليلتين من السفر ثم التوجه للجزر

تتميز سلنجور بوجود الاسواق ومدينة العاب مائية ( صن واي لوقن )

ماليزيا

ماليزيا

بعدها اقلعنا بالطيران الداخلي الماليزي الى جزيرة لنكاوي وكان المقرر الاقامة فيها لمدة 3 ليالي والاقامة في فندق هولدي فيلا
صراحه لنكاوي من اجمل الجزر الماليزية وتتميز بالطبيعة الجميله وبالبساطة يعني كل شي اخضر وبيوتهم اكواخ وحياتهم بسيطة وما فيه مباني كبيره وهذا اللي اعجبني فيها غير شواطئها الحلوة والنظيفة ..
اليوم الاول طلعنا في رحلة نهرية بقارب خاص وانطلق بنا في مكان ما اقدر اوصفه الصراحه يعني طبيعه خلابه وجو منعش وبين جبال خضراء

ماليزيا

ووقفنا عند كهف مليان خفافيش هع هع هع ثمن مشينا ووقفنا عند مزرعة للاسماك وريحنا وشربنا عصير وشفنا انواع كثيره للاسماك والحيوانات البحريه وقعدوا يشرحون لنا بالانقليزي هع هع هع وانا اقول يس يس وانا مدري وين الغنم سارحه هع هع هع واكتشفت في هالرحله اننا يالسعوديين الوحيدين اللي ما نعرف انقليزي يعني كل الجنسيات من اجانب وهنود وخليجيين وعرب يتكلمون انقليزي وحنا تقل طرمان نقول كلمة ونتعتع شوي على ما نركب جملة وهذا يرجع للتعليم عندنا !!
المهم بعدها انطلقنا بالقارب وشفنا من بعيد شواطئ تايلند ورجعنا وانتهت الرحله بعد تقريباً 3 ساعات وتوجهنا بعدها الى حديقة الطيور وقعدنا نشوف اشكال وانواع الطيور

ماليزيا
هع هع ولا اطلق دربيل يصف جنبه

بعدها توجهنا الى الشلالات ودخلنا في وسط الغابة الين وصلنا لها وقعدنا نطافش ونشرب من هالمويه الحلوة والباردة

ماليزيا

وبعدها رجعنا للفندق بعد يوم ممتع وريحنا وتغدينا وطلعنا لشاطئ الفندق الجميل
في اليوم الثاني رحنا شوي نتمشى ونتسوق وبعدها توجهنا للآبار السبعة وهي من افضل الشلالات اللي شفتها في ماليزيا وفيها ناس واجد اللي يسبح واللي يصور —–> مهوب انا هع هع هع

ماليزيا

قعدنا نتأمل في هالطبيعة الزينه وتشطرنا شوي عن الناس وتوضينا وصلينا ويالله من فضلك … وجنب الشلالات محلات صغيره شلخوا لنا جوز الهند وشربناه لاول مره وطعمة ما اعجبني مره لاني متعود على الجح هع هع هع وبعدها رجعنا للفندق وتغدينا وريحنا وطلعنا لشاطئ الفندق نكمل باقي النهار فيه والناس اللي يلعب واللي يتمشى واللي يركب دباب واللي يطافش وكان الغروب جميل

ماليزيا

من بكره طلعنا لرحلة بحرية للجزر الثلاث بس اني نسيت اسمائهن ما عدا جزيرة المرأة الحامل لان شكل الجزيره كنه حرمه حامل وكان معنا اجانب وعرب على السفينة وقعد يشرح لنا السواق عن كل جزيرة نجيها وانا طبعاً فاهم كل شي هع هع هع بعدها توجهنا لجزيره شاطئها حلو مره وفيها قروده

ماليزيا

جلسنا فيها ساعه واللي سبح واللي يتمشى واللي يركب دباب بحري وبعدها مشينا لجزيرة غريبة شوي في وسطها بحيره كبيره بين الجبال مويتها راكده تستاجر قارب صغير مره ياخذ شخصين وتاخذ دوره لمدة نصف ساعه في هالبحيره وصراحه كانت ممتعه مره ومناظرها خلابه وبعدها رجعنا للقارب وانطلقنا لمكان بين الجزر مليان نسور ووقفنا القارب وقعد ينطل السواق قطع سمك في البحر ثمن نزلت هالنسور تلقط السمك من الماء وحنا نتفرج ونصور

ماليزيا

وبعدها رجعنا بعد رحلة ممتعه
في اليوم الرابع كان السفر بالطائرة لجزيرة بيننق وفي اقل من ساعة وصلنا والحمد لله
بيننق جزيرة مثل لنكاوي لكنها متطورة ومليانه مباني وسكانها اكثر وغالبيتهم من الصينيين
توجهنا الى مقر اقامتنا فندق هوليدي ان بيتش وصراحه من افضل الفنادق اللي سكنتها .. فندق جميل وموقعه مميز وشاطى الفندق ممتاز جداً وبجانب الفندق سوق ليلي على شكل بسطات كله بضائع صينيه رخيصه بس لازم تكاسر والا بيلعبون عليك …
مدة الاقامة في جزيرة بيننق 5 ليالي
في اليوم الاول توجهنا لحديقة الفراشات وشفنا اشكال وانواع الفراشات سبحان الله العظيم ..

ماليزيا

بعدها رحنا لحديقة الفواكه في مكان مرتفع ودفعنا المقسوم وركبونا في باصات صغيره وطلعوا بنا فوق الجبل وقعدوا يشرحون لنا عن الفواكه وانواعها وتصدقون شفت عندهم جح اصفر هع هع هع وتحسفت اني ما اخذت بذره وازرعه عندنا في سدير مع اني اتوقع انه بيطلع قرع هع هع بعدها قدموا لنا انواع واشكال الفواكه وعصيرات طازجة ..

ماليزيا

بعدها رحنا لحديقة القرود وقعدنا نضحك على هالقرود ونصورها هع هع اعجبتني ذا القرده تفلي ولدها هع هع هع

ماليزيا

ثمن طلعنا منها لحديقة الزهور وتمشينا فيها وشفنا اشكال وانواع الزهور .. بعدها رجعنا للفندق وتغدينا واستمتعنا باقي النهار في شاطئ الفندق وخليتهم يدلكون رجلي هع هع قعد ربع ساعه في اصابع الرجلين هع هع وناسه وركبنا دباب بحري وخيل وصراحه كان هالشاطئ متعه لحاله

ماليزيا

في اليوم الثاني رحنا للقطار اللي يطلع هضبة بيننق وهو قطار يطلع لمكان مرتفع جداً والطريق كله بين الاشجار والمناظر روعه لا وكانت تمطر في نفس الوقت

ماليزيا

طلعنا فوق الجبل وصرنا نشوف بيننق كلها وكان المنظر خيالي والجو غيم وامطار ولله الحمد وبعدها نزلنا وطبعاً كل هذا كان في 3 ساعات .. وبعدها رحنا لمعبد بوذا النائم يا عله ما يقوم هع هع هع

ماليزيا

قالوا فصخوا نعالكم تكرمون وفصخناها ودخلنا واذا فيه تمثال كبير منسدح وفيه اصنام تحت يجون يسجدون لها وفيه ورا زي الدروج في وسطها علب وعلى كل درج صورة واحد وسألنا السواق قال هذولا اللي يموتون يحرقونهم ويحطون رمادهم في هالعلب قلت اللهم لك الحمد على نعمة الاسلام ..

ماليزيا

بعدها رحنا لمعبد الافاعي وصاير ذا المعبد مكان سياحي كلن يجي ويصورونه مع الافاعي بفلوس طبعاً ، وخربتها ومسكت داب عريضة وصورت معها .. وقعدنا نتفرج على اشكال وانواع الافاعي ورجعنا للفندق

ماليزيا

في اليوم الثالث نسقنا مع منظم رحلات بحريه واستأجرنا قارب خاص مع السواق وطلعنا رحلة بحريه وكان الجو غيم ومن ابدع ما يكون

ماليزيا

وبدينا بصيد السمك وابشركم صدت سمكتين بس صغار شوي هع هع هع بعدها انتقلنا لجزيره وكان في استقبالنا عمال الشركة اللي اخذت منهم القارب وقدموا لنا الماء والفواكه وتمشينا شوي في الجزيرة الين جهزوا لنا الغداء وهو عباره عن مأكولات بحريه مشويه اشكال وانواع وبعدها رجعنا للفندق ..

والعصر كان على شاطى الفندق وفي الليل رحنا للسوق الليلي اللي جنب الفندق وهو على شكل بسطات وغالب اللي يبيعون هم صينيين وبضاعتهم صينيه والسوق مزدحم بالناس من جميع الجنسيات ولازم الواحد يكاسر لانه يقولك بـ 100 وفي النهايه تشتري بـ 20 ريال وتلقاه لاعب عليك بعد بس لو تلقى هالسلعة عندنا في السعودية بتشتريها بـ 70 ريال
وفي نفس الشارع لقينا بعض المطاعم العربية وحطيت حرتي في الرز لان الاكل في ماليزيا بشكل عام مهوب زين … وضحكت على مصري راعي مطعم مشغل اغاني عربيه وحاط السماعه برا ومطلع ثنتين من البنات اللي يشتغلون في المطعم عند الباب يصفقون مع الاغنيه عشان يجذب الزباين هع هع مسوي ملكع الله يرجه
في اليوم الرابع رحنا لمبنى كومتار وهو من اطول المباني في بيننق وطلعنا للدور الاخير وقعدنا نتفرج على بيننق كلها

ماليزيا

بعدها توجهنا لاحد المجمعات التجارية وتسوقنا وتمشينا وبعدها رجعنا للفندق وكالعاده باقي النهار في شاطئ الفندق
في اليوم الخامس رحنا لحديقة الحيوان وتمشينا فيها وبعدها رحنا لحديقة الاسماك وفيها احواض واسماك من كل شكل ونوع وبعدها توجهنا لاحد الحدائق الجميله وتمشينا فيها وبعدها خذنا لفه في احد الاحياء الراقيه في بيننق وشفنا بيوت التجار والسياسيين ورجعنا

انطلقنا بالسيارة من جزيرة بيننق الى مرتفعات كاميرون هاي لاند قاطعين جسر بيننق وهو مثل جسر السعوديه والبحرين وكان الطريق لمدة 3 ساعات تقريباً بس المناظر على الطريق تخليك تحس انها نصف ساعه كل شي اخضر وبدينا نرتفع في الطريق بين الجبال والطريق صار ملتوي وكل شوي نرتفع الين وصلنا لكاميرون هاي لاند والجو بارد والطبيعة خلابه وتستاهل هالمشوار ..
توجهنا لمقر الاقامة فندق اكتوريال الواقع على قمة جبل وحطونا في الدور قبل الاخير ولما وقفت في شرفة الغرفة شفت منظر خلاب مزارع وخضرة واعتقد الصور ما تقدر توصف روعة المكان

ماليزيا

الاقامة في كاميرون راح تكون ليلتين .. بعد الوصول ريحنا شوي وبعدها طلعنا نتمشى وتوجهنا للشلالات وبعض الحدائق

ماليزيا

وفي الليل كل شي ينتهي لانها بلده صغيره ..
من بكره الصبح توجهنا الى مزارع الفراوله وشفنا كيف يزرعونها وبعدها رحنا لمزارع الصبار وشفنا انواع كثيره واشكال غريبه وبعدها رحنا لمزرعه لتربية النحل وشرينا منهم عسل وبعدها رحنا لمزرعة للزهور

ماليزيا

بعدها توجهنا لمزارع الشاي وصراحه المناظر فيها ترد الروح ونزلت زخات من المطر وطبعاً الشمسيه معنا

ماليزيا

فوق حاطين استراحه تطل على المزارع والمنظر اكثر من رائع ويقدمون شاهي من نفس المزرعه وفيه محل يبيعون فيه منتوجاتهم من الشاي واباريق وشغلات حلوه وشرينا بعض انواع الشاهي

ماليزيا

بعدها رجعنا للفندق وتقهوينا الشاهي في شرفة الغرفه وقبل المغرب داهمنا الغيم

ماليزيا

جهزنا الشنط للسفر من بكره الى كولا لمبور المحطة الاخيرة
من الصبح انطلقنا بالسياره الى كوالالمبور والطريق كله مناظر جميلة ..
وصلنا الى كوالا لمبور وتوجهنا الى مقر الاقامة فندق داينستي ولمدة 6 ليالي فندق 4 نجوم حليو ورخيص الليلة 190 ريال وهذي اطلاله ليلية للفندق

ماليزيا

توجهنا في اليوم الاول لحديقة الطيور وهي من اكبر الحدائق في ماليزيا ومغطاه وفيها اشكال وانواع الطيور

ماليزيا

بعدها رحنا لحديقه كبيرة نسيت اسمها فيها بحيره وجلسنا نتمتع بالمناظر الحلوه .. بعدها رجعنا للفندق وريحنا وفي الليل رحنا لشارع بوكيت بنتانج (شارع العرب) وهو شارع مليان عرب ويتميز بالمطاعم العربية والمقاهي والاسواق .. تمشينا وتسوقنا وتعشينا في مطعم عربي ورجعنا ..
اليوم الثاني توجهنا لعمارتين التوأم توين تور وطلعنا فوق وجلسنا نتفرج على كوالا لمبور من الاعلى وبعدها رحنا لايقوريا وهو مكان فيه احواض كبيرة للاسماك والقرش والحيوانات البحريه

ماليزيا

بعدها رحنا لمنارة الاتصالات وتتميز بالارتفاع العالي وطلعنا فوق وتفرجنا على كولالمبور من فوق وبعدها رحنا لاحد المراكز التجاريه الضخمه ورجعنا للفندق ..
في اليوم الثالث توجهنا لجنتنق وهي منتجع يبعد عن كوالالمبور حوالي الساعه في مكان مرتفع يتكون من مدينة العاب ترفيهيه كبيره وفنادق واسواق .. وقبل ما نوصل ركبنا في التلفريك اللي يوصلنا للاعلى والمنظر جميل والجو بارد ..

ماليزيا

بعدها رجعنا لكوالا لمبور مروراً بالشلالات

ماليزيا

وبعدها رحنا لمعبد هندي غريب شوي .. عنده تمثال كبير باللون الذهبي والمعبد صاير فوق في وسط الجبل ولازم ترقى الدرج وهو اكثر من 200 درجه الين توصل المعبد اللي صاير على شكل كهف كبير في وسط الجبل ..

ماليزيا

ولما دخلنا المعبد ابهرني المكان وتكوينه حلو كأن الجبل مشقوق وصراحه حسافه عليهم .. جوا تماثيل واصنام اشكال وانواع والغريب انهم يحطون اكل عند الصنم مدري يبونه ياكل هع هع هع والا يبون الاكل يتبارك !! اشوف رز وفواكه يالله لك الحمد بس على نعمة الاسلام ..

ماليزيا

في اليوم الرابع توجهنا الى منتجع افموزا واللي يبعد عن كوالا لمبور حوالي الساعه وقصينا التذاكر ودخلنا وركبونا في سياره وخذوا بنا لفه عبارة عن سفاري نمشي بين الحيوانات المفترسه والاليفه كأننا في افريقيا ..

ماليزيا

وبعدها تغدينا والغداء ضمن التذكره ومن حسن حظنا صاروا طابخين اكل عربي .. رز ودجاج ولحم وبعد الغداء بدت العروض بعرض الكابوي وهو عبارة عن بيوت على شكل بيوت الكابوي وهنود حمر وطلق نار وفكاهة وصراحه العرض كان حلو ..

ماليزيا

ماليزيا

بعد ما انتهى عرض الكابوي رحنا لعرض الحيوانات من قرود ودببه وبقر ومعزى وبعدها جاء عرض الطيور من ببغاء ونسور وحمام وانواع كثيره من الطيور

ماليزيا

بعدها انتقلنا لعرض الفيله وصراحه كان قمة المتعه .. فيله ترقص وتلعب كورة وتحيي الناس وتسوي مساج

ماليزيا

بعد ما انتهى العرض قعدنا نصور مع الفيله وبعدين توجهنا للمسبح ومسوينه على شكل شاطئ ويشغلون امواج صناعيه وقعدت اطافش شوي وبعدها رجعنا لكوالالمبور
في اليوم الخامس رحنا للمتحف الوطني وتفرجنا على بعض الاثار ومجسمات لعادات وتقاليد الماليزيين وبعض الادوات القديمة … والطيور والحيوانات والحشرات اللي عايشه في ماليزيا على شكل مجسمات وبعضها محنط ..

ماليزيا

بعدها رحنا لمنطقه اسمها تشاينا تاون كلها بسطات صينيين .. يعني هم اللي ماسكين التجارة في ماليزيا ويبيعون الاشياء المقلده والاشياء الرخيصه من ملابس وشنط وتحف ولازم تكاسرهم لاني شريت لي بدله شتويه وقالي بـ 99 وقلت له نو نو هع هع هع قلت له بـ 20 وقفلت معه قلت خلاص ثنكيو ومشيت ولحقني ويقول بـ 70 وانا اقول نو نو ثمن 50 ونونو ثمن 40 و30 وقلت له 20 وعيا يقول اخر شي بثلاثين وشريتها لاني داري اني بلقاها في السعوديه بـ 50 ريال اقل شي وعلى فكره الرنقت قيمته مثل الريال

بعدها رحت اصور العمارتين التوأم ( توين تور ) تصوير ليلي ومن عدة جهات

ماليزيا

رجعنا الفندق وجهزنا الشنط للسفر ومن بكره رحنا للمطار ورجعنا لارض الوطن سالمين ولله الحمد
ان شاء الله يكون التقرير ممتع

اخوكم فهد المنيع
مع السلامة

مقالات ذات صلة

‫38 تعليقات

  1. هع هع هع أبوي مو راضي يطلع لي جواز يقول توك صغير وأنا عمري 22هع هع هع ياحظك المره الجايه عطنا خبر نبي نسافر معك

  2. ماشالله عليك يا فهد .. ابداع .. الحمدلله على سلامتك .. بس عندي استفسار ياولد الصور مكتوب عليها 2006 ..؟ هل الصور قديمة ام حديثة .. تحياتي لك

  3. ما شاء الله صور خيال .. خاصتا صورت السكه الحديده .. أتوقع أنك من بعدها بتحترف هوايه التصوير .. ماليزيا من الدول المفضله لدي .. الرصاصي – الولايات المتحده

  4. بصراحه أخوي تقريرك روعه .. والله يكتب لنـا سفـره لعندهم يا رب .. بصـراحـه .. شء خيااااااااااالي .. عساك على القوة .. وإن شـاء الله تكون استانست .. انت واللي معك .. بالتوفيــــــــــــــــــــــــــــــــــــق

  5. بصراحه صور روعه وتجنن الله يوعدني واروح ادعيلي يطلع جواز سفر لبنتي واقدر اسافر

  6. أتحمد لك لأني عارف انك ما بتقصر معانا أنا ومطلق بتاخذنا معك المره الجايه .. والكاميرا علي ولا يهمك <<-- تلاقونه استانس يقول أهم شي (: ؛ بالتوفيق حبيبي فهد

  7. مطلق انت والشهري جهزوا خلاقينكم من الحين وترا القطه 50 الف —> بيلعب عليهم هع هع سعد المطيري ماقريت اول التقرير ؟ حياك يالرصاصي وابشرك لي سنين محترف تصوير … مشكور واحد من الناس مشكور اخوي ام نهال ان شاء الله تسافرين

  8. مبروووك السفرة و إن شاء الله تكون استمتعت ….. انا ودي اسألك انت مخطط انك بتروح للجزيرة الفلانية و بعدين تحجز و تروح للجزيرة الفلانية يعني انا اقصد ان هاذا من تخطيطك ؟؟؟؟؟ و حسب كلامك ان هناك ما تحتاج لغة لأنك تقول انك ما تعرف لغة انجليزية ؟؟؟؟؟ هل تحتاج الرحلة زي اللي انت سويتها لمبلغ كبير و ياليت تذكر المبلغ . اذا مافيه احراج طبعا اضيف ايميلك عندي و استفسر منك مباشرة اذا ما عندك مانع و بعدين احذفك اذا طبعا ماودك ان ايميلك يصير عندي و الأسئلة و اجدة لكن بضيفك و يصير خير اذا كلمتك ….. اوكي ؟!!!

  9. اااااااااااااااااااالله قسم بالله شي مو طبيعي الصور تعور القلب وبعدين انت وربي كووووووووشخه على هالتصوير الخطير وربي من جد وناسه الملاهي حقتهم احلا من سباركيز ياربييييييييييييييه متى اتزوج عشان اروح لها 🙁 الله يسامحك كان قلت لي عشان اتخبى بشنطتك ;(

  10. اسم الله عليك عيني عليك بارده ياليتني معك انا هالعطله مارحت ولا جيت بس حسستني اني معك صدق انك تدخل الواحد جو غصبن عنه وكل الصور حفظتهن وابي اخليهن خلفيه للجهاز… ما اقول الا الله يحفظك … واذا فيه روحه ثانيه علمنا.. خخخخخخخخ

  11. مرحبا اخوي ……..فهد تسلم الايادي على التقرير الاكثر من رائع صراحه شي حلو اللي ما يعرف ماليزيا راح يستفيد من هالتقرير في رحلته بس احلى شي المسيكين هاللي قام يطلبك تشتري منه وانت تقول ( نو نو ) خخخخخخخخخ والمصري راعي المطعم ورا ما حط منصة عند باب المطعم وشغلهم اغنية ( هلي لا تحرموني منه ) ها اللي ازعجونا فيها وخلا وحدة ترقص وثنتين يصفقون مو كان افضل خخخخخخخخخخخخخخخخخ و في الختام لا يسعني الا ان اشكر الاخ فهد المنيع على هذا التقرير الرائع <<<<قلبت مذيعه في القناة الاولى

  12. أولا: أهنيك بصراحة على الرحلة هاذي لأنك شبرت ماليزيا شبر,شبر(صفات نادرة في السعوديين) ثانيا:أنا رحت لماليزيا الصيف الي فات بس كان على نهاية الصيف فما قدرت ألف وأشوف البلد. ثالثا:جزيرة لنكاوي الفندق الي أنت سكنت فيه أنا سكنت فيه 🙂 سؤال: رحت للتلفريك الي في لنكاوي؟

  13. ماشاءالله عليك ماخليت شي ماصورته هناك بس راحت عليك ماصورت السوق الصيني

  14. شكرا على اطلاعنا على رحلتك وفعلا ماليزيا من اروع الاماكن خاصة لنكاوي ثم كميرون لكن انا شفت في قناة المجد مكان رائع فيها مارحنا له هي جزيره مايحرني اسمها الحين عموما ليتك حطيت صور للفندق الي سكنت في لنكاوي عشان اذا رحنا مره ثانيه احب اجرب الفنادق وان شاء الله رح انزل لكم صور رحلتي

  15. بصراحة التصوير كان جدا رائع واكثر من روعة المناظر .. وطول عمري ودي أسافر ماليزيا بس عبالي ماليزيا مو حلوة بس عقب الصور اللي شفتهم صار لازم اروح …. وتسلم ايدك وكاميرتك

  16. السلام عليكم ورحمة الله وبركاته اخي الكريم /فهد بصراحة انا من محبي شرق آسيا وبالذات اندونيسيا لاني رحت لها 3 مرات واحس انها شوية لان اماكنها الروعه كثير ,,, وكنت دائما اسمع عن ماليزيا لاكن ماكنت اتوقعها مثل اندونيسيا بطبيعتها الطبيعية بس والله ابحرت معاك على التقرير اللي اقدر اقول انه اكثر من رائع وعشت معاك على شرحك اللي ابدعت في وصفه وتسلم اخوي على هالتقرير وسلمت يداك على التصوير اللي يوضح مهارتك العالية بالتصوير.

  17. صراحة تقرير رائع جدا وتصوير اروع تشكر عليه لكن هناك ملاحظة وارجو تقبلها بصدر رحب الا وهي عدم جواز دخول معابد البوذيين وهذي فتوى فيها (فضيلةالشيخ لقد تحادثت مع زميل لي حول شابين من شباب المسلمين، دخلوا معبداً من معابد بوذا، وطلب منهم حارس المعبد أو مسئوله بتقديم مال للصنم، وكنت ذكرت هذه القصة مجرد تذكرة حول ما يفعلونه شبابنا، فقال زميلي لوكنت مكانه لقدمت مال ولا أن يقتلوني،فأثار استغرابي، فقلت له أتشرك بالله؟! فقال بكون مضطر وأن دم المسلم ليس رخيصاً،أقتل عشان ربع ريال؟ فقلت له قصة من قدم ذبابة قرباناً، فثار وقال تكفرني ؟ وقال زميل آخر لقد دخلت على معبد لبوذا وكان الدخول للمعبد مقابل مبلغ مادي، فما قولك حفظكم الله في هذا وكيف الرد عليه؟ ——————————————————————————– الجواب الحمد لله والصلاة والسلام على رسول الله وبعد: معابد الكفار لا تكاد تخلو من مظاهر الشرك من الأقوال والأفعال والأشكال كالصور والأصنام، فلا يجوز دخولها لمجرد الفرجة والمشاهدة؛ لأن ذلك كله من الزور الذي قال الله فيه: (وَالَّذِينَ لا يَشْهَدُونَ الزُّورَ وَإِذَا مَرُّوا بِاللَّغْوِ مَرُّوا كِرَاماً) (الفرقان:72)، وقال سبحانه وتعالى: (فَاجْتَنِبُوا الرِّجْسَ مِنَ الْأَوْثَانِ وَاجْتَنِبُوا قَوْلَ الزُّورِ حُنَفَاءَ لِلَّهِ غَيْرَ مُشْرِكِينَ بِهِ) (الحج: من الآية31)، وكيف تطيب نفس المسلم أن يدخل هذه الأماكن التي يعصى الله فيها ويشرك فيها بالله ويتنقص، ولا يغضب لله، أو يغضب ولا يقدر على التغيير والإنكار، ومعلوم أن الذي يدخل هذه الأماكن للتفرج لن يكون له اهتمام بالدعوة والإنكار، بل يكون بارد الحس، ضعيف البراء من المشركين وشركهم، فلا تكون له أسوة في إبراهيم والذين معه، كما قال سبحانه: (قَدْ كَانَتْ لَكُمْ أُسْوَةٌ حَسَنَةٌ فِي إِبْرَاهِيمَ وَالَّذِينَ مَعَهُ إِذْ قَالُوا لِقَوْمِهِمْ إِنَّا بُر ءَآؤاْ مِنْكُمْ وَمِمَّا تَعْبُدُونَ مِنْ دُونِ اللَّهِ كَفَرْنَا بِكُمْ وَبَدَا بَيْنَنَا وَبَيْنَكُمُ الْعَدَاوَةُ وَالْبَغْضَاءُ أَبَداً حَتَّى تُؤْمِنُوا بِاللَّهِ وَحْدَهُ) (الممتحنة: من الآية4). )

  18. مشكور أخوي فهد المنيع على المشاركه الرائعه بصراحه صور حلوه وتعليق ممتاز وعشنا معاك الرحله الجميله من اولها لاخرها

  19. ماشاء الله عليك لفيت ماليزيا ماخليت شي وكويس انك رحت كوالمبور وبعدها مادري وشو وبعدها مادري وشو وياكثر بعدها بالموضوع (: ألف شكر

  20. بصراحة فعلا مناظر روعة وحلوه ومحليها تصويرك فعلا لقطات وزوايا حلوه ذكرتنا بالماضي 🙂 بس ماصورت السمك والمشويات والترنق الي شريته لا كله كووم والحية الي صورت معها كوم ورا ما حطيتها…..!! وفي النهاية ابدعت في الموضوع باسلوبك وباللقطات المتناسقة…. بانتظار جديدك

  21. بس وش بلاك على معابدهم تزورها ؟ هل سألت عن زيارتها تجوز شرعا ولا لا؟؟ انتبة وانا اخوك..وموفق خير

  22. ماشاء الله عليك تقرير ولا بالاحلاااام وتصوير ولا بالاحلام وماشاء الله عليكم درتوا كل ماليزيا انا توني راجع من ماليزيا ويمكن رحت نص الاماكن الي انت رحتها وعلى فكره تشاينا تاون لعبوا عليك هع هع فنيله بـ99 خذتها بـ 30 انا ساعه رولاكس بـ 500 خذتها بـ20 هع هع وعلى فكره الرنجت اقوى من الريال يعني 1000 رنجت 880 ريال معلومات صحيحه وشكرا على التقرير الرهيييييييب

  23. مشكور أخ فهد على الموضوع ويعطيك العافية حبيت أستفسر عن نوع الكاميرا اخ فهد الي كنت تستخدمها ورقم الموديل إذا ما عندك مانع وشكراً

  24. ماااشاء الله عليك .. أخوي .. سفرة حلوهـ مرهـ .. وتقرير حلو .. الحمد لله على سلامتكم .. وعقبالنا إن شاء الله .. :d .. بس حبيت أستفسر .. هل يحوز دخول معابد النصارى ( الكفار ) .؟. سبق وسألت شخص وقال أنه لايجوز .. شاكر

  25. وانت رحت ماليزيا عشان تقول هع هع هع ؟؟؟؟؟؟؟؟؟؟ بالتوفيق اخوي هع هع

  26. لوسمحت اخوي ممكن تقوولي وش اسم مكتب السياحه الي رحتله بالرياض وتعطيني عنوانه

  27. اول شي الحمدلله على السلامه يافهد ولو اني عارف زحفت هناك بس المره هذي مخليك لوحدك المره الجاية باكون فوق راسك

  28. حياكم الله جميعاً طبعاً مشوار برد عليكم كلكم لكن اسعدتني تعليقاتكم وبالنسبة للاستفسارات انا استقبلها على البريد فقط وارد عليها ان شاء الله لان الماسنجر امتلى ويبي لي سنتين عشان اجاوب واتكلم مع كل واحد هع هع هع بالنسبه للاخوان اللي ذكروا المعابد انا ما سألت عن جواز زيارتها لكن والله يا اخوان اللي يزورها يحمد ربه على نعمة الاسلام والمقصد التفكر في عظمة ديننا وخلوه من الشركيات والخرابيط اللي مالها سنه —> قلب على طول هع هع بعدين مادفعنا فلوس ولاشي يعقبون هع هع للجميع شكراً واخص بالذكر الاخ العزيز مازن … اشتقنا لك وللايام الخوالي ..

  29. يعطيك الف عافية اخوي بصراحه شي يجنن انا مخطط اروح ماليزيا بس لما شفت الصور شجعتني اكثر بس سؤالي انه الشخص يتعاقد مع شركة سياحه من هنا احسن ؟؟ لانه في شركات يقولك مثلا 10 ايام في مابيزيا شامله التذاكر والفندق ووجبة الافطار بسعر كذا او انت ايش رايك الطريقة الافضل انا اعشق الطبيعة جدا واذا المووضع ما يكلف كثير ارسل بناتي عند امي واطلع انا وزوجتي نعمل شهر عسل جديد بين الثعابين والقرود وعلى قولتك هع هع هع تحياتي ويعطيك الف عافيه

  30. السلام عليكم والله مبينه رحلتك رووووووووووووعه وصورك كمان بجننو الله يهنيك وموضوع اصلا كلو بجنن الله يوعدني اروح عمليزيتا لانو نفسي كتير اروحها بس الله كريم صح؟؟؟؟؟؟؟؟ انا اول مره اعلق على موضوع وانا كمان ما عمري ارسلتاي موضوع للمنتدى رغم انو الي سنتين مشتركه بس عمري ما ارسلت موضوع يالاني كنت ملهيه بتوجيهي بس هلا خلصت وبطلب من حضرتك تعلمني كيف ارسل مواضيع لللمنتدى اوك ييعطيك العافيه

  31. ما شاء الله..شكلها رحلة رووووعة ..وبصراحة تحمست ازور هذي البلدان ،،سبحان الله ..خضار وطبيعة زاهية..يعطيك العافية أخي فهد ،،والله يبارك فيك ..

  32. ذكرتني بشهر العسل وايامي اللي قضيتها هناك وفي نفس الاماكن اللي انت مصورها.. يعطيك العافية

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى