بسم الله الرحمن الرحيم
الحمد لله وحده والصلاة والسلام على من لا نبي بعده ,, وبعد :
فهذه هي أول مشاركة لي عندكم —
<<< طيب اخلص علينا وش عندك ؟؟
طيب سم بس اسمعني شوي …. ممكن ؟
<<< ممكن بس لا تفلسف ,,
تآمر أمر .. الحين اقول لك :
انا — صراحه — ما سجلت عندكم إلا لأني أحبكم – هذا أول شيء ..
<<< لا ياشيخ تكفى وبعدين يوم حبيتنا ؟؟؟
يوم إني حبيتكم قلت لازم أشارك معكم يا انتم يا حقين التفحيط والهجولة مع إني
كنت مشارك بمنتديات ثانية متنوعة ….. بس ما كنت متوقع ان التفحيط والهجولة
لها مواقع قوية مثل كذا …!!
<<<إيييييييييييييه ,, هلا بك يوم جيت ,, حياك الله . اقلط معنا تفضل
ويييييييييييييييييييين اقلط صادق انت ,, بايع عمري انا <<< خواف .
<<< طيب هات اللي عندك سولف علينا يله ؟؟ ولا هجول معنا …؟؟
الصراحة اني يضيق صدري اذا شفت المفحطين والمهجولين مع اني احبهم بقوه مدري ليش
؟
يمكن لأني اخاااااااااااااااف عليهم بقووووه ..
والله إني اخاف عليهم …,,
خصوصا اننا سمعنا وشفنا شباب كثير ماتوا بسبب التفحيط ..
لقطات مرعبة ..
ومواقف محزنة ..
وحوادث تقطع القلب ..
أسأل الله أن يغفر لهم و يرحمهم ويسكنهم فسيح جناته … آمين .
أنا ما ودي يموت احد وهو يفحط ودي نموت وحنا نصلي ولا ساجدين ولا صايمين …
ما ودي اشوف واحد يفحط وبكرا يقولون لي انه صدم ومات !!
وعلشان كذا لازم ينتبهون الشباب بقوووة ويفكروووون بزيادة بخطورة هذا الامر …
.. بسبب التفحيط :
— كم شباب ماتوا بسببه ؟؟
— كم أطفال صاروا أيتام بسببه ؟؟
— كم أمهات يبكون الليل والنهار …..؟؟
— كم نفس بريئة راحت ضحية ….؟؟
— كم اللي صاروا معوقين او مشلولين ,….,,
— كم أموال ضاعت ….؟؟
— كم سيارات ضاعت ..
يا شيخ طززززززززز بالسيارات والاموال — ما تهم — الله يقطعها …
أهم شيء :
أنت – سلامتك تساوي كل شيء – ..
ابوك وامك …
اخوانك ..
اهلك ..
اصدقاءك واخواياك وقرابتك..
عيال المسلمين …
دينك — قبل كل شيء — ورضى ربك عليك —
يااااااااااااااااا نااااااااااااااااااس ما يصيييييييييير — والله العظيم —
والله ما يصير —
ليش حنا يا الشباب نعرض انفسنا للخطر …,,,
ونعرض غيرنا للخطر ..,, ؟؟
ليش نقتل انفسنا بانفسنا ؟؟
ليش نعصى والدينا ؟؟
ليش ما نطيعهم ؟؟
طيب قبل كل شيء :
ليش ما نفكر بهذا الشيء — أي شيء التفحيط أو غيره — :
— هل يرضي الله ولا لا ؟؟
— هل هو حرام ؟؟ ولا لا ؟؟
— طيب وبعد كذا :
— هل هو ينفعنا يوم القيامة ولا لا ؟ يزيد في حسناتنا ؟؟ ممكن يدخلنا الجنة ؟
يا شباااااااااااااااااااااااااب والله ما يصييييييييييييييييير !!!
يا اخوي فكر بالمسلمين والمسلمات اللي يدعون عليك ويشتمونك ويلعنونك !!!
فكر بس كم واحد يقول : – حسبي الله عليه – أزعجنا ,, أشغلنا ,, ……
طيب كيف أنا أرضى لنفسي إني أهجول وافحط واقطع الشوارع ,,
وأنا لي اخوان بالعراق بفلسطين بالشيشان بكشمير بافغانستان !!!
— حالتهم حاله وظروفهم صعبة — مساكين ,,
قصف وقنابل وصواريخ وقتل وتشريد….
لا أمن ولا أمان عندهم …
لا أكل ولا غيره
هم يتمنون يصيرون مثلنا او اقل منا !! يتمنون حياتنا !!
ليش ما أفكر فيهم وادعو لهم ليل ونهار ..
طيب ليش ما اتذكر المجاهدين اللي فوق الجبال وتحت الكهوف !!!
بعضهم أصغر منا وبعضهم أكبر … ,,
ليش ما أقارن بيني وبينهم ,, ايه وش بيننا ؟
كيف عايشين ؟
كيف ينامون ؟؟
كيف يصلون ؟
كيف ياكلون ؟؟
يعني تتوقع لو عندهم وقت فاضي …… يمكن يفحطون …!!! ولا يهجولون ..؟؟
طيب : ليش ما افكر باللي عندنا هنا ….. ,,,
<<< من هم ؟؟
اييييييييييه عندنا هنا شباب طيبين ,
احيانا :
بالمسجد يحفظون القرآن ,,
أحيانا :
باستراحة يلعبون كورة ,,
احيانا :
بمخيم دعوي يدوروننا علشان ينصحوننا ويوزعون علينا أشرطه …. ,,
أحيانا :
تلقاهم في مكة ولا المدينة ولا أبها .. ولا الشرقية ,, ولا الرياض ولا القصيم
ولا لا …
طيب ليش ما أصير مثلهم واكون دايم معهم ؟؟
بعضهم كانوا مثلنا وتركونا — ولله الحمد — وصاروا أحسن منا — اللي حفظ
القرآن واللي صار … واللي واللي — ومرتاحين والحمد لله
ليش ما اصير مثلهم ؟
تدرون خلاص خلونا نقرر وندور اللي يرضي الله – سبحانه –
طيب متى نقرر … الآآآآآآآآآآآآآآآآآآآآآآن نقرر
إذا ما قررنا الآن متى نقرر ؟؟؟
إذا متنا ؟؟ وصار ما يمدينا !!! ولا متى ؟؟
يا شباب يا شباب … خذوها مني :
التفحيط والهجولة .. والله ما وراها أي فايده ولا مصلحة ولا أي شيء
زين ..
والسلام عليكم ورحمة الله وبركاته
أخوكم السياسي ,,,
للتواصل :
mohd242@hotmail.com
وشكرا لكم
وشكرا لموقع وقروب أبو نواف ….
وأبشروا بالمواضيع الأخرى : ومنها :
— قصة مهجول مع مطوع في حوار صريح …. !! (جزأين ) .
— ولكن طلاب الجامعة لا بواكي لهم ..!! (عن المكافآت)
— مواقف وذكريات شخصية … ( عدة مواقف شخصية لا تنسى ) .
— وغيرها ….
والسلام عليكم …
