أميرة الغيد – شعر

إحساس رجــلٍ حيّر الوقت  تحييـر
ولقـى مـراده بعـد طـول الليالـي

لقـى مـراده عنـد بنـت المناعيـر
بنـتٍ أصيـلـة ماتهـاب العوالــي

بنـتٍ ثقيـلة أصلها الطيـب والخيـر
بنت الكرام الأسْـد شهـم  الخصالـي

إلى أقبلت لمّـي لهـا شعـري يديـر
حـرفٍ مثـل صقـرٍ بروس الجبـالي

سطّر لها حرفي من المـدح  تسطيـر
مـا طالهـا قبلـه كبـار المعـالـي!

هي وصفهـا مالـه قيـاس ومعاييـر
هي زينها إيفـوق وصـف الخيالـي!

سبحان من صوّر بها الحسْن تصويـر
لين أصبحت بالزين مضرب  مثالـي!

من زينها يبصر به أعمـى النواظيـر
ويشهد على حسنـه ملـوك الجمالـي

هي ريح مسك مقطّر بزيـن  تقطيـر
وعيونهـا تسحـر قلـوب  الرجالـي

سهلة طبوع وما بهـا حـب  تعسيـر
أميــرةٍ للغيــد أصـل  الـدلالـي

لا من حكت أصبح بالأنفـاس تعطيـر
أبيـع لجلـه كـل حالـي  ومـالـي

هي وجهها مثل القمـر شـعّ  تنويـر
وخدودهـا مـن زود نـوره  يلالـي

هي قولها ما فيــه كـذبٍ وتقصيـر
ومـا فيه نـم وحكـي قيـلٍ  وقالـي

يا غالية لك في حشـا القلـب  تقديـر
يفداك قلبـي يـا بعـد عمـر حالـي

شانـك بقلبـي اعتـلا دون تبـريـر
قـدرك ثبـت مالـه فيـومٍ زوالــي

سخّرت لجلك حبـي اليـوم  تسخيـر
وأرخصت لجلك كل من كـان غالـي

إذا غلطت أحمل لك أجمـل  معاذيـر
محــال أزعلّـك في وقـتٍ  محالـي

وإلى بغيتـي المـدح جيتـك بتعبيـر
مثـل الشهـد جـذّاب حلـوٍ وحالـي

واللـي يذمّـك يـا بعد قلبي  إيصيـر
مثـل الـذي يـذم عمّـي وخـالـي!