رسائل المجموعة

أحلامها الوردية ..راحت هدر .. والدمع مشراق من صباح الخميس !

تسيفكم

اولاً .. ياشسمك ذاك .. ربي يهب لك مُصيبة قل آمين


اولاً .. اشكر
ابو نواف على صبره على كائن برمـــائي اسمه مدمن شاهي .. مدري وش لاقي فيني يومه يحبني .. بس بصراحه يابو نواف تصدق من تالي صرت استحي منك حيا مايعلمه إلا الله .. حتى اذا شفت رقمك بجوالي تطقني الغلقه وخطر ابتسي .. حتى انه بآخر اتصال تراي كنت بصناعية الخرج قاعد اخرط جنوط موتري   ، طحت لي بحفرة كبر قريح والبركة في البلدية وخرب علي جنطين .. وبصراحه ذاك اليوم عطيتك نصبه مشت عليك زي الحلاوه   .. يوم اقولك اني تراي آلحين بالشغل   . وتراي بصراحه هلاس نمره واستماره وقاعد بالصناعية وكل ماقام العامل يشتغل قعدت أشّر له بيدي عشان يخلي شغله ومايطلع الصوت وانكفش .. واعتذر منك للمرة المليون طعشر أني مقصّر في كتابة كم موضوع في الفترة الأخيرة لأني مشغول وخلها على ربك بس .. وان شالله اني راح ابرد تسبدك الايام الجاية واقعد مسنتر كل يوم بالقروب لين تقول لي ( اذلف ياخي رح لاهلك تراك اشغلتنا )


بعدين ابارك للربع اللي يملكون لهم كم سهم في سهم البرابر والشياه .. ونصيحة اخو : اكرشوها قبل تكرشكم .


عاشراً .. الموضوع باين من عنوانه .. عنوان يقوطر ملح و دلع !


وبيني وبينكم .. بهالوقت مايمشي إلا مثل هالعناوين .. يعني العناوين اللي على شاكلة
( نساء تحت وطأة الزمن ) والا عناوين بيّاعين الجح ( خمسة أمور تقلب موازين حياتك ) .. مااااتنفع   .. وماراح يمشي سوقها .. مع ان بعض المنتديات دبلوا تسبودنا بحركة ( الحق على آخر فضيحة ) . نعنبوا داركم وانتم ماعندكم إلا فضايح !   .. والا عنوان ( لاتفوتكم .. فلانة مصوّرتن عمرها وهي بغرفتها ولابسه مقوصر ) .. طيب وبعدين .. لابسه مقوصر

والا لابسه من دون ملابس .. يعني وش بتستفيدون .. وانا بعد وش بنستفيد

 .. الشي اللي يفقع التسبد ان فيه مخفـــــــّات يروحون يسجّلون عشان يشوفون وش السالفة وبالنهاية يطلع الموضوع ( فلانة تقول انها شايفتن فلانه لابسه مقوصر بعرس فلانه ) .. بصراحه شرّ البلية مايُضحك .. ونصيحة للي يحطّون مثل هالمواضيع انهم يستحون على وجيههم شوي ويخلون عنهم الهياط الزايد لأن الهياط الزايد يجيب البواسير في عُمر متقدم .


قبل فترة أسولف مع الوالدة عن
بنت جيراننا .. بنت عاقلة وماتطلع من بيتهم إلا في السنة حسنه .. حتى ان اختي تذكر عنها انها ماقد طلعت تحتسي في الإذاعة الصباحية من الحيا .. مقطّعها الحيا يادافع البلا   .. والمدرسات يمدحونها ماشالله ويثنون على عقلها ورزانتها .. حتى انها معروفة بالكرم واذا جا الفطور الصباحي حق الفصول ماتقصّر وتجيب لها حافظتين جريش .. وش ذا المزاج ياذا المدرسات .. احد ياكل جريش على الصبح .. اخاف انهم بس يودونه لبيوتهم .


الوكــاد .. هالبنيّه تقدمت لها اكثر من عايلة .. وماكتب الله لها المقسوم ..
محكّ كلامنا وسوالفنا عن آخر عايلة مرّت عليهم .. طبعاً هالعايلة
اللامُحترمه اتصلت عليهم عقب مغربية يوم الاحد .. وقالت المتصلة لام البنيّه : يذكرون ان عندكم بنت ؟


قالت الام وقلبها يفزفز فرح : ايه عندي بنيّه وش حليلها .. ومن زود الحماس قالت لها كل شي بس بالمُختصر المفيد .. وبدال العشرين ورقه عطتها ورقة ونص .. قالت لها : بنتي تدرس في كذا وشكلها كذا وكذا .. !
ماتنلامـ .. تبي الكفول لبنيّتها .. خاصّه ان بنات عمّها
( فاطمة وهيا ) اعرسوا من سنه ، ووحده منهم جابت ولد !


قالت المتصله ( وهي رافعتن خشتها مترين ) باتسر ان شالله نبي نمرّ عليكم ..


ام فلانة قالت :
ابشــري .. وتروح تصلي ركعتين .. وتطلب ربها التوفيق والسخره .. قلبها مع السخره وهي مابعد اعرست . بس ماتنلام .. تبي الكفول تبي الكفول !


البنيّه .. طقّت ام الشخص والمكياج ..

( سوعال شاطح : هل لازم الحرمه تحط مكياج ؟ وهل تقدر الحرمه تستغني عنها لو مرّه بحياتها ؟ )


( جواب شاطح : أهــا بس .. المكياج يامدمن مُفيد للبشرة ويخليها تلامع ، وزمن الديرمه ولّى وانتهى واحنا آلحين بزمن الماركات يابتاع شارع المرقب بالبطحاء )

هاه .. وش مرقبه ؟


ويوم صلّوا المغرب والبنيّه طاقتها الهواجيس وتحولتز وتدعّي ربها انه يكتب لها الزين ..
سابع ناس يجون لها ومالله كتب لها شي !   .. آخرتهم ذيك التسلبه اللي يوم جتها نطلت عليها كلمتن مالها داعي .. يوم قامت الضعيّفه تجيب العصير قالت اللي مسيّرتن عليهم لامها وهي رافعتن صوتها ورى ماتشرون ذاك السير حق تخفيف الوزن .. ألا ياجعل عقلها يخفّ . آمين

جا ولدهم ووقف موتره هو وراسه من زود الميانه .. يقال له راعي محل .. نطل موتره عند الباب وامه واخته وخالته نزلوا وكل وحدتن تسحّب عباتها وتزيّن   .. يقالهم رايحين عرس .. عما .. يروحون ثلاث حريم عشان يشوفون بنيّه .. والله لوّهم بيروحون يشهدون بالمحكمة على أرض بحي العقيق وبياخذون صك ارث ابوهم !


رحّبت أم البنيّه بهم .. الام ثم الخاله ثم اخته .. مدري وش موقع اخته من الإعراب !   .. بس اتوقع ان محلها
مرفوعه بخُبث وضميرها عائد على التميلح والترزرز على حساب بنات خلق الله ..

دخلت البنيّه .. وشقلت تنورتها من ورى خايفتن من العيون السود اللي تلاطم بزوايا المجلس   ، سلمت وجلست وفهقت عمرها شوي يوم ان امها غمزت لها ( يعني تعدلي وخلّك ظفره وصبّي لهم وخلّ وجهك طلق ولاتفشليني ) ..


البنت قامت بالواجب وزود .. حتى يوم انها قفّت مانست تقولهم : عن اذنكم بروح اقحن لي شويّة مويه تراي شرقت !


عيون الثلاث تلاطم .. دققوا فيها من فوق لتحت وجمركوا على مندوبها وطلعوا عذاريبها وبلاويها اللي لو مرروها على جهاز تفتيش جمرك مطار جدّه مادروا عنها الجماعة .


أم الولد
اللي مفارقن الزين شرق واللي دايم يعيّرونه عيال حارتهم البعج وذلك لأن وجهه جايّن عرض – الله يحسن خلقنا ماخلقنا – .. أم الولد بآخر جلستهم قالت لام البنيّه : احتروا منّا علم !


يعني ترى المواري زينـــــه .. والضعيّفه ماتدري أن هالكلمة صارت من تالي مثل شربة الموية .. وان اللي تقولها .. تقولها بس سكاته لام البنيّه  

 عشان ماتحسّف انها حاطتن لهم فطاير شاريتها من مخابز المملكة .
يوم .. يومين .. اسبوع .. عشر ايام .. والتلفون كل مارنّ قامت الام تركض له بكراعينها ونفسها يتسابق ، وعسى من اتصل
( هاذيك اللي جت تشوف بنيّتها ) .. بس ماااش .. الربع ماهم لمّها ابد ابد !


البنت .. مازالت تنتظر الزوج العاقل اللي يستاهل .. والام مابرحت ترفع يديّاتها لربها عشان مايخيبها وييسّر لبنتها الرجل الصالح .. وخواتنا في الله ( الثلاث ) كل يوم يشربون فنجال عند خلق الله وماخذين الدعوه سيبه .. ومادروا أن فيه أنفُس كل يوم تأنّ قهر من حركاتهم السقيمه العقيمه !

أنا أتكلم ياجماعة عن حادثه واقعية مؤلمة تفقع التسبد وتكسر العظم الخامس من العامود الفقري .. أتكلم عن ( همج ) واعذروني على الكلمة ماخذين الأمر بالهون ومايعلمون أن الله – عزّ وجلّ – مُطلع على تصرفاتهم اللاعقلانية وراح يحاسبهم عليها .


خطمة :
يابنت .. قدّامتس أمل عظيم .. لاتحوم تسبدتس أبد أبد .. والرجا في ربي .
لطمة :
على خشّة هل الكحل اللي يترزرزون بالبيوت .. ترى بكره راح يصير لكم ماصار .. والديْن مايضيع .
تحت الهامش :
باتســر ام محمد – قصيرتنا الجديدة – عازمتن الوالده على قهوه .. العالم الله انها تبي تشكي حالها بعد !
فمان الله ,,


كلامنا يقوطر عسل

مقالات ذات صلة

‫27 تعليقات

  1. وابشرك في وحدة جاية تخطب لولدها تقول لاهل البنت انا ماادري ايش اللي معجلة على الزواج تسديد اقساط البيت ماخلصت ولماجات البنت رغم حلاوتها نطت وقالت بصوت عالي شعرها قصير هو يبغى شعر طويل ….اللهم لك الحمد ياااارب يعطيك الف عااااااافية لاحرمناك

  2. للأسف أخوي الكريم هذا حال أغلب البنات ، تجي الأم مع خمتها و ينقالها زيارة تعارف و تقز البنت من فوق لتحت و مع ان البنت قد تكون أجمل من الأم و الخمة و أرفع نسبا و مكانة اجتماعية إلا ان هالخمة بتدور عذر . واحد مرة راحت أمه و ثنتين من خواته يخطبون، يوم ركبوا السيارة طالعين من بيت البنت سألهم هاه بشروا؟ قالت الأم ما جازت لي ! ليه يمه ؟ مكثرة مكياج و حاطه روج أحمر المفروض تخففه ، خلك منها ! الأخت ما عجبتني سمرة شوي و لبسها قديمة موضته ! الأخت الثانية: لا بالعكس هي بيضاء و لبسها كلاسيكي مب قديم. و بالأخير يضيع هالولد بين راي أمه و خواته و يستمرون أهله بعملية البحث للي تجوز لهم من منظارهم الشخصي. لو إن الولد هو اللي يختار كان ما صار نص هذا الوضع المزري. الرجل ما يلتفت للأمور اللي يلتفتون له أهله الحريم و يتغاضى عنها و يقدر أشياء ثانية هم ما التفتوا لها. ما أنكر ان بعض الأولاد يجننون أهاليهم في طلباتهم لكن أغلب اللي يصير إن الأهل هم يختارون و أكيد خياراتهم تحتاج وقت و جمركة بنات و اهمال لمشاعر البنات و لو هي بنتها كان ما رضت أحد يسوي في بنتها نفس الشي، كأنها دمية معروضة للفرجة للي يبي يشتري.

  3. والله يا اخ مدمن موضوعك في الصميم وحالهم يرثى له حسبنا الله ونعم الوكيل عليهم هل معقول في ناس فاضيه لهالدرجه الله يستر على اهالينا منهم يارب ومشكووووور على الموضوع الهام

  4. مدمنوووو وش علومك… من جد اشتقنا لك يا حبيبي السالفة وما فيها …. قسمة ونصيب… والخيرة فيما اختار الله … انا يوم خطبت اشترطت على اهلي وعلى اهلها ان الراي الاول والاخير لي انا ولها هي محد يزعل اذا ما ارتحنا لبعض والحمد لله تمت الامور بكل بساطه… اشكرك على الرسالة العسل يا عسل …

  5. بصراحة يا اخ مدمن شاهي اقترح عليك انك تتقدم للبنت مدام اخلاقها عالية و اهلها طيبين و وتستحي لها الدرجة تصلح لك صدقني تحياتي

  6. هذا حال نوره ولطيفه وموضي وهديل وابتسام الى متى هالعادة القبيحه ,, مدري متى بيفهمون ويتفهمون مشاعر خلق الله في واحد قريب لي اهله كانوا كذا يدخلون على بيوت خلق الله ويبحلقون هالعيون ثم يطلعون ويسفهون زي السلام عليكم والله مسخره بس هنا يفيد زواج الاقارب .. يعرفون البنيه وتعرفهم ما يحتاج دربيل يا مال الزناج !! الله يعين

  7. الســلام عليكــم .. صدقت أخوي حادثه مؤلمه .. تصيـر كثيــــر هالزمن للأسف في ناس مو مهتمه ابداً ابداً .. ((سلمت يدآك خيو ع الموضوع الجميــل والطريف )) لاعدمناك

  8. فعلا اخي الكريم : مدمن شاهي كلام واقعي 100 % وباسلوب جميل ورائع تكلمت عما يدور في خاطري ويحرق قلبي منذ زمن اتكلم من واقع عايشته انا بنفسي ليس لي وانما لاحدى اخواتي التي اعيش معها ماساتها يوما بيوم ومع كل دقة هاتف ومع كل حضور سواء للاهل او للخاطب نفسه فعلا الرجال في هذا الوقت اخذوا مسالة الرؤية الشرعية بامتهان وتساهل وكانها مجال للمفاضلة بين الفتيات واختيار الاقرب للمواصفات الخيالية ونسوا الهدف الاساسي منها وهو الطمانينة التي تنبعث في القلب من رؤية الطرف الاخر في قلبي الكثير والكثير على من يتصف بهذه الصفة وعلى من لايراعي مشاعر فتياتنا ولكني اكتفي بما كتبه شخصك الكريم كفيت ووفيت اخي مدمن كل الشكر والتقدير لك على ماخطه قلمك الرائع سجلني من اشد المتابعين لما تكتب سواء في المجموعة او في المنتدى الخاص احترامـــــــــي

  9. هذا اذا قالوا مقال 🙂 وقسم بالله انك اطلق كاتب يامدمن ، وعسى ربي يطوّل بعمرك كتبت المشكلة باسلوب فريد وشخّصت الحال بطريقة مميزة . قل آمين ؟ جعلك تعرس على ازين بنت بديرتكم 🙂

  10. احسب بس انا اللي يصير لي كذا!!!!! بردت خاطري الله يبرد عليك دنيا وآخرة

  11. بيض الله وجهك على هل الفكره وجمال الاسلوب في الكتابه المواضيع ويعطيك العافيه

  12. السلام عليكم الله يعطيك العافية مدمنـووه الظاهر مكثر شاهي ما شاء الله عليك الله يوفقك ويحسن خاتمتك ننتظر جديدك

  13. صباح الخير مدمن تصنيف وطرح روحه وماشالله عليك ماخليت شي إلا وتطرقت لك وبأسلوب رهييييب . المشكلة عويصة مثل مايقولون اخواننا المصريين لكن ربك يعين ان شالله والله يصلح الحال لاتقطع والا ترى باقطع خشمك ههههههه

  14. وانت تكتب المقال وش تحسّ به ؟ 🙂 ههههههههههههههه ، لا بس اعجبتني نقطه وبسألك عنها على الايميل قل آمين ، ان ربي يوفقك وين مارحت ويرزقك باحسن من سويّر يامبدع ,,

  15. عقب متى شفناك يامدمن ، وأخيراً طليت علينا وتواضعت وكتبت موضوع . تسلم

  16. قالت اللي مسيّرتن عليهم لامها وهي رافعتن صوتها ورى ماتشرون ذاك السير حق تخفيف الوزن —- ههههههههههههههههههههههههههههههههههههههههههههههههههههههههههههههههههههه حرام عليك وش هالمقطع المهبول هههههههه

  17. شكرا عالموضوع من جد رائع ومشكور عاأحساسك بالفتيات .. بس حابه اسألك اخ مدمن..ليه انت ماتتزوجها؟؟

  18. السلام عليكم كيف حالك مدمن ؟ اشتقنا لك والله واشتقنا لمواضيعك الساخرة اللي لها نكهه على مستوى العالم العربي ماشالله . الجرح غائر والسبب معروف والحال يعلمها الله والله يجبر مصاب كل بنت ، ومثل ماقلت الدعاء الدعاء والله يسهّل امرهم . سؤال لو تكرمت : اذا احتجتك تكتب عن قضايا معينة وتصوغها بطريقتك الرائعه هل فيه إمكانية ، بانتظار ردّك الله يعافيك

  19. بجد مووووووضوع ينرفز ويقهر انا صار لي نفس الشي بصراحهحسفة الفطاير والحلى والعصير اللي زطوه ياجعلهم يشرقون فيه يااارب وتدري اني دايم ادعي عليهم واقول الله يبلاهم ببناتهم وياجعل ولدهم مايتوفق لانهم ذلوني وقهروني وانا مااستاهل

  20. تسلم أخوي مدمن. الأمر حقيقي ويصير بينا. والأروع أسلوبك اللي خفف قسوة الأمر. يسلموو

  21. بارك الله فيك اخي مدمن شاهي بالفعل لقد طرحت موضوع مهم جدا ياريت من كل امهات واخوات الولد انهم يفكرو بمشاعر الاخرين مثل ماهم لهم مشاعر غيرهم لهم مشاعر مانقول غير لا حول ولا قوة الا بالله العلي العظيم

  22. جيت في وقتك ، الله يجعلك ذخر لبنيّاتنا يامدمن ، يااااااااااااااأحسن واحد 🙂

  23. أولا .. الشكر موصول لحبيب المللايين … مستر مدمن شاهي .. ثانيا ً كلامك واقعي وصحيح ،، أنا أنني كنت أفكر أعمل نفس الطريقة هذي . لكن عزمت النية .. أن أيكون الخطبة والشوفة /مرة وحدة ولبنت وحدة فقط .. كيف // بنقول لي كيف:: تأمر أمر يأحبيب ألبي .. ماهو أنا عندي كذا أخت / كذا يعني 5 خوات/سيستر / المهم .. وأتفقت معهن أن تكون /شوفتهن للبنت أما عن طريقين 1- عن مناسبة أجتماعية كبيرة /أعياد/أعراس..منا كثرهن اليومين… والخألخ.. 2-عن طريق معرفة /مسبقة/ من طريق أحد خواتي / يعني متبحلقه فيها من قبل / بس مانغير نكلم الأم / ونتقدم بشكل رسمي .. وبيني بينك أنا كرهته الحركة اللي تسويها بعض العوائل .. من النطنطة ع بيوت خلق الله .. كأن الدعوه (حـمـّي) .. فهمتو وش معنها بالعربي@_^.. أنا صارت لأحدى (بنات) خواتي حركة موش ولا بـد.. المهم / جاء واحد يبغى يخطب البنت الكبيره / فقالت أم (البغل) الصغيره أحلى من الكبيره ..أنتضر لما تروح أو تنزح الكبيره // وبعدين نخطبـ وهو فعلا الصغير أطلق من الكبيره.. بس مو يعلن بالطريق هذي سبب رفضه للخطبه بعد مابغلني أنه ناوي يخطبها/ يوم سألته خبرني الحركة هذي / طايب يوم أنك داري أنك وأنت أمك المصونة/ أنه فيه الكبيره مابعد أعرستـ / ليع تكلمني طيبـ / ولا والأدهى والأمر / أنهم يهرجون من ورا ع بنات خواتي / بس المصفي قدام / وربك كريم. شكلي كثرت القرقر عليكم .. بس والله الموضوع شويت سمارت أند أنترستنيق(أي يغث)@(@ .. وسلامتكم يالربع .. ووترى عشاكم الليله عندي ع ضيافة الزعيم مدمن شاي ,,قولو تم.. كلكم من أولكم لأخركم .. وسلامتكم .. وصح بدنكم وباي وسلامتكم .. وش بعد @_@ ..باي وسلامتكم

  24. موضوعـــك رووووعة.. يعجبني اسلوبك اللي يفتح النفس … إلـــى الأمامـ,,,

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى