رسائل المجموعة

¶¶..كـــرتـــون الـكــراتـيـــن..¶¶

اضافة موضوع جديد .. الحين فكرة هالموضوع براسي… واكثر شي يخلي الافكار تضيع هو المقدمة … عشان كذا أي واحد يتوهق في المقدمة زيي او ماعنده لياقة في كتابة مواضيع ساخرة زي الناس … عليه انه يبربر على نفسه في الوورد شوي… ويكتب اسمه او كيف الحال ويكبر الخط ويصغره لين تضبط معه مقدمه

وانصحكم بالابتعاد عن السولتير لانها مضيعه للوقت وكنت مدمن سابق الى ان من الله علي وتبت منه واحترفت البلياردو في الياهو قيمز… وتعرفت على كاترين من تي اكس يعني من تكساس وتعرفت على جوليا من دي ان يعني من الدنمارك وتعرفت على لورا خندرد من روسيا …

ومثل ماتلاحظون اني ما العب في الياهو قيمز الا مع بنات … ملينا من اللعب مع التماسيح في مقاهي الرياض خلونا نوسع الصدر في النت شوي … مالكم شغل بهالحكي اللي أقوله مجرد بحث عن مخرج من المقدمة البثره اللي عييت اطلع منهااااا

كرتون الكراتين لقيته طايح عند باب بيتنا فتحته ولقيت فيه كراتين صغيرة … وكرتون الكراتين هو كرتون كبير في داخلة اكثر من كرتون خلونا نشوف وش في كل واحد منها … ( قاعد اشرح لبنقلاديشيه )

شباااااب تمسكوا بطلع من المقدمة

الكرتون الأول

كرتون عيا يطلع

الكرتون الاول : أليخاندرو .. وهو شاب عريض الركبتين افدغ الوجه… طويل القامة وريحته قمامة… طموح زمانه ويحب جمع الطابعات الخربانه.. نتركه يتكلم عن نفسه

انا اخوكم أليخاندرو قدر الله علي وصار لي حادث

مداخله من الكاتب : بترك لك المجال تطر في موضوع بنزله في رمضان خل عنك الطراره وتكلم عن نفسك

بصراحه كثير من الشباب مثلي ومثل طبعي مدري وش المفروض نسمي طبعنا اهم شي راضي عن نفسي ولا انكر انه ودي اتخلص من طبعي اللي حطمني وخلاني متقوقع في محيطي الخاص

مداخلة من الكاتب : متقوقع أي مبوبز بحسره وندم … كمل يا أليخاندرو وقل لنا وش هو طبعك ذا

طبعي اني مع البنات زلابه وأخر بكلش ومافي بطني من حكي طلعته وممكن اني اضحي بأخوي او صديقي لعيون بنت ماعرف عنها الا ان صورتها الرمزية في المسنجر صورة برتني سبيرز وهي مفوشحه على دباب

مداخلة من الكاتب : مفوشحه على الدباب أي راكبة الدباب .. كمل يا أليخاندرو وش احساسك لما تشوفها اون لاين

قبل لا اقول لكم احساسي ان شفتك كاتب مداخلة مره ثانية تراني بقفل الكرتون في وجهك .. اذا شفتها داخله بماسنجري وأول ما تقول لي اهلين احس ان الدنيا سحبت سيفون وقاعده تشفطني

مداخلة من الكاتب : اشوا انك عارف قدرك يالمحمض .. هذي اخر مداخلة لي واعذرني يا خندوري

آآآآه جيت على الجرح .. هي دايم تكتب لي يا خندوري وانا كنت اتمنى تقول لي اسمها عشان اعيش قصة حبي معها وكل ما طلبت منها اسمها كانت تقول لي سمني أي شي لين اوثق فيك واعلمك باسمي الصدقي شف أي شي عندك بغرفتك وسمني عليه .. قعدت ادور لها اسم وقلت لها بأسميك شيفون ستارة لاني دايم اتعلق فيه واشم ريحة الغبار اللي عليه

مداخلة من الكاتب : مسميها شيفون ستارة وتبيها تحبك مالت عليك .. كمل وش صار اسمها ؟

منتب كفو من يسولف عليك اردى منك من يفتح لك غطا الكرتون … طططططططق

مداخلة من الكاتب : اليخاندرو افتح الكرتون يارجال اطلع وكمل … اليخاندروووو اليخاندرووو اليخاندروو..

الكرتون الثاني

كرتون حفايظ

الكرتون الثاني : غونزاليس .. شاب عصبي وغير ودود .. وجهه كنه طعس في النفود .. رغم ضعفه وصغر حجمه .. الا انه في الشارع الفاضي يسوي زحمه … نتركه يتكلم عن نفسه

وشتبي ؟

مداخلة من الكاتب: قلنا عصبي بس تكلم زين لا تجي الطفاية في جبهتك ..

بصراحة انا توهقت مره في واحد من ذا اللي يرضعون في مواترهم

مداخلة من الكاتب : يرضعون في مواترهم أي يتحدث مع عشيقته عبر الهاتف في سيارته …. كمل ياغونزاليس

المهم ومالكم بالطويلة .. كان يمشي بشويش واشوفه شكله شامي لابس فنيلة كت .. ومن زود الرومانسية اللي فيه سيارته يطلع منها قلوب .. شكله يسولف عليها سواليف خاثرة .. حتى بالماريه من بين القلوب اللي كني اشوفها تطلع من سيارته… اشوف وحده تعزف على ربابة كلها اوتار… حقت القليمزيين

مداخلة من الكاتب : القليمزيين أي الانجليز او الاجانب بشكل عام .. كمل ياصعفق قصصصدي غونزاليس

وانا مسرع واكبس النور وانواع البواري وانا ماعندي شغل بس طبعي حار حتى وانا اسوق السيارة … بعد معاناة وخر عني يوم جيت جمبه بالسيارة … وافتح الشباك واتفل عليه واهاوشه .. يوم جلست اناظر شكله زين لينه من اللي يلعبون حديد .. انواع العضلااااات… فتح شباكه وقال لي وش عندك يالضاطووور

مداخلة من الكاتب : الضاطور هو البرصي وفي الخليج بريعصي وفي بلاد ماوراء الشميسي ضب صغير … كمل ياغونزاليس

بعد ماقال لي ياضاطور … حسيت انها خربت ولازم ادافع عن نفسي اسمي ابنجلد خلها بكرامه ..

قلت له انا ضاطور … من زينك ماتشوف زندك ذا اللي كنه ظهر بزر .. مابقى الا تلبس كوعك حفاظه
قال لي اني ابنزل عليك الحين وادس هالحفاظه في فمك ..
يوم شفت الدعوه بتقلب جد وابنجلد .. قلت بيني وبين نفسي بلا كرامه بلا هم … اخوي تراني العب عليك واسف اني ازعجتك ارضع مع خويتك منيب مسوي لك شي حتى والله اني بهدي وابصير امشي وراك وابطفي النور بعد .. كم عندنا من ابو حفاظه

مداخلة من الكاتب : اها كمل <- الله من زين المداخلة بعد

وابد مشيت وراه لين لف عن وجهي وعقبها تأدبت .. بس هو من يأدبه .. وش ذنبنا اذا هو يحب ويكلم حبيبته في السيارة ويخثر معها ويعطل العالم .. صحيح انا فاضي وماعندي شي بس يمكن يجي غيري ويكون فعلا مستعجل وش اللي يفكه من امثال ابو حفاظه

الكرتون الثالث

كرتون متشقق

الكرتون الثالث : روبيرتيتو .. وهو شاب من فئة اليخاندرو الضالة .. لكن أحلى ما فيه انه اللي في قلبه على لسانه ويفضفض للبعيد قبل القريب وذبحه خياله الواسع حتى في اختباراته الجامعية يألف مناهج جديدة في أجوبته من زود الخيال … نتركه يتكلم عن نفسه

انا ما اتكلم عن نفسي لان نفسي ملكها وكتبت خاطره وانا بمحاضرة اليوم الصبح في عيونها بس

في عيونها
تواصيف السهر كلها
في عيونها
لا صار الليل بؤبؤتها
في عيونها
والسحاب بياضها
في عيونها
والقمر غمص بين جفونها
في عيونها
في عيونها في عيونه

مداخلة من الكاتب : اقول لا تكتب خواطر الا بمحاضرة العصر كود يروح غمص عيونك .. لكن ماقلت لنا ياروبيرتيتو لهدرجة تحبها وتحبك ؟

من قال انها تحبني ؟ .. انا احبها اوكي بس هي ماتدري اني احبها ولا تقول لي ليش ماتصارحها انا ماعرف وشلون اوصل لها وودي تعرف باللي احس فيه ياناس احس انها جرررررح ومووووت وفيها من الزين اللي لو توزعه على بنات الرياض كفاهم والباقي تذبه على بنات الخرج

مداخلة من الكاتب : كل هذا احساس يعني مهوب شي اكيد .. وش ذا الحكي ياروبيرتيتو خليتنا نخق معك على الفاضي

تدري عاد ومن دلعها اتخيل لو امزح معها وارمي على وجهها منديل احس انه بينجرح خدها ومهوب مثلنا يخرخر منها دم .. لا هذي احس انه ينقط من خدها دهن عود معتق .. ريحته تشق جبهتك من كثر ما تنشقه

مداخلة من الكاتب : تكفى تخيل اني ارمي على وجهها فوطه كود تعبي لي توله … كمل ياروبيرتيتو

حاولت اكثر من مره اتجاوز كل الحواجز اللي بيني وبينها لكن ماقدرت اخاف اطمر واحد من هالحواجز واتعكرف فيه وادبج على جبهتي ثم يضحكون علي الحساد فقلت خلني اعيش قصة حبي بيني وبين نفسي واشكلها زي ما ابي بدون أي ظروف او قيود

مداخلة من الكاتب : قيود جمع قائد ويسمى كابتن ويحمل شارة الكابتنية على زنده وليس لها أي علاقة بالحكم السعودي ظافر ابو زندة

وتصدق اني احس انهااا….

مداخلة من الكاتب : حس بعييييد عنا … ابشركم اليخاندرو طلع من كرتونه خلنا نلحق عليه قبل لا يدخل ثم وشلون نطلعه انت خلك هنا لين نرجع لك انت متشقق ماتعووووق

الكرتون الرابع

كرتون قطعناه

مداخلة من الكاتب : وش فيك يا اليخاندرو وراك زعلت .. يالله عاد علمنا حبيبتك وش اسمها

ماحب شي اسمه مداخلة منيب سامح لك الا لشي ضروري وعلى سنع ولا منيب متكلم وابدخل في كرتوني مره ثانية … على العموم حبيبتي اسمها هند … تبي شي ثاني ولا ادخل في كرتوني ؟

مداخلة من الكاتب : وش فيك زعلت وسع صدرك .. وقل لي هند هذي هي نفسها اللي في كتاب القراءة والهجاء

تصدق عاد اول ماتعرف عليها وبعد معاناه قالت لي ان اسمها هند على طول رحت وفتحت كتاب القراءة والهجاء حق اخوي الصغير وقعدت ادور اسمها ولقيتها تاكل تفاح

الى يومك وهند تأكل التفاح ماشبعت من يوم حنا في اولى ابتدائي وهي تعرم من ذا التفاح والمشكلة كم كتاب قراءة يطبعونه لأولى ابتدائي وكل كتاب القاها تاكل فيه تفاح … و تلومون سوق الخضار والفاكهة اذا صار التفاح غالي

مداخلة من الكاتب : اقول الاخ فاتح مبسط في عتيقة .. اخلص علينا ترى ملينا من وجهك اللي نبيه وعرفناه اسم حبيبتك هند واااااااككككك يالزلابه فيه احد يتعرف على وحده بهالاسم .. وش رايك تتعرف على اخوها احمد عشان كتاب القراءة والهجاء يصير في ماسنجرك

انا غلطان اللي جيت بكراتينك واعترفت لك بكل اللي تبيه خذ كرتونك وانا مالي قعده عندك

مداخلة من الكاتب : تعال خذ الكرتون هديه مني وعبه تفاح وعطه هند خلها تعرم فيه

الكرتون الخامس

كرتون دجاج

اليخاندرو وروبيرتيتو هما فخذين لدجاجة وحده مافيه فرق بينهم وطبعهم واحد وان اختلف السيناريو فالمضمون واحد عايشين حياة اشبه بالخيال وينصدمون اذا ماحصل لهم اللي يسعون له مدري متى يكبرون ويرتقون بمستوى تفكيرهم ولا احد يسألني وش السالفة او وش قاعد اقول ويسوي لي فيها ان الموضوع فيه اهداف لاني قاعد ادور خاتمة للموضوع مثل ماضيعت بالمقدمة لكن بعطيكم حركة حلوة أي واحد يتوهق في نهاية المواضيع ولا الردود ماله الا يقول ….. وشكراً

الكرتون السادس

كرتون ممنوعات

يقول الفنان فوزي محسون :

ياعيني حظنا تعبان دا مهما نسوي ما يبان .. ولو تحلف كتير ايمان ماراح اصدق الحلفان
يقول فوزي زوج ميسون :
الحقران يقطع المصران ههههههههههههاااااي ياكيكه
وشكرا 🙂

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى