جالسين في المكتب .. كنا ثلاثة موظفين في غرفة وحده .. يا كثر ضحكنا وسوالفنا.. ويا قل شغلنا وإنتاجنا في العمل… مره من المرات اللي جمبي بالمكتب ابو خالد يقول لولد عمه.. الموظف الجديد ابو مشاري … يا أبو مشاري افتح الجريدة صفحة 17 وشف الخبر ينفع لك … وانا بحكم لقافتي .. قلت اشوف وش موجود في هالصفحه واعرف وش اهتمامات ابو مشاري اللي توه متوظف بالواسطه…اخذت نفس الجريدة وفتحت على صفحة 17 .. كان الخبر في الصفحه الفنيه .. عن ام الفيران نانسي عجرم .. كان الخبر تافه وسخيف .. (( مثل سخافة مديرنا اللي فاتح الماسنجر 24 ساعه ومقفلة عننا )) ..
كانت صورة نانسي عجرم اكبر من الخبر تسع مرات احداهن بالتراب .. انا جلست اطالع بالصوره الين حسيت ان شعر نانسي عجرم في الصوره مبلل .. عرفت بعدها اني سعبلت سعبوله لا إرادية .. مسحت خشتي بطرف الجريدة .. ورفعت راسي .. اشوف الساعه في الجدار عشر ونص .. وابو مبارك القهوجي … مابعد جاب لنا الشاهي … وبما ان ابو مشاري موظف جديد … قلت لولد عمه ابو خالد … قم واستح على وجهك .. ولد عمك جديد عندنا ولا تقهويه … رح شف لنا ابو مبارك وينه ….!!!؟؟؟
قام ابو خالد .. وهو يناظرني بنص عين .. ولسان حاله يقول .. كـــل تـــبـــن !! … دخل ابو خالد على القهوجي ابو مبارك … ولقاه منبطح على بطنه في الارض وذاب الشماغ وطالعه صلعته اللي كنها مقفى غضارة .. ورافع رجليه ويخبط سيقانه في بعض اللي يشوف سيقانه ذا اللي كلها شــعــر يقول كنها ظهر قرد ماكل موز خايس .. وفاتح الجريده على صفحة 17 .. .. ويقول … وويلي ويلاآآآه .. أبك أبك أبك .. هذي ماجوده في الدنيا .. ابك ابك ابك .. هذي ضروس ولا رمان في ملعقه .. أبك أبك أبك .. هذي براطم ولا حبحر .. أبك أبك أبك .. هذي عيون ولا زرار بالطو .. أبك أبك أبك .. هذا خشم ولا أنف ( يسمع بالفصحى ).. أبك أبك أبك …. أبك أبك أبك … أبك أبك أبك
وقعد يأبكك .. لين كب ابو خالد على صلعته مويه باااااارده … بعدها .. سكت وهنق ..
وطلعت في صلعته إيرور ( خطأ ) .. لايمكن العثور على الأبككه .. في حالة استمرار المشكله .. اتصل بالمسؤولين او قم بإعادة تشغيل دمجته
ابو خالد خااااااف .. مايدري وش يسوي … يبي يدور كنترول وألت ودليت .. مالقاهن …جلس يدور المساعده help قام وفصخ ثوب ابو مبارك .. وفصخ فنيلته .. وكل مافصخ فنيله تطلع له فنيله جديده .. بعد سبع وعشرين فنيله طلع صدره … قام ابو خالد وضغط ابو مبارك اليسار ( صدره ) ..
وطلع في بطنه .. اهلا بكم في الباحث عن المساعده .. لإعادة تشغيل ابو مبارك .. الرجاء ادخل اصبعك الخنصر في فتحة خشمه اليمين .. واصبعك البنصر في فتحة خشمه اليسار .. واصبعك الابهام في فمه وألعب بلسانه شوي .. ابو خالد حامت تسبده شوي بس غصب عنه ينفذ الامر ولا يتوهق بذا الشايب … بعد ساعه يحفر في خشمه يالله دخل الاصبع… خبركم خشمه كله شعر وطحالب وقرف … شوي ولا يسمع ذا اللي يشاهق يشاهق ثم صررررخ … آآآآآآآآبك آآآآآآآبك ووويلي ويلاآآآآآه
قال ابو خالد .. الله يلعنك يا شايب قريح .. غرفت قلبي بملاس قدر ابو ذبيحه .. وش فيك منبطح على بطنك … لا وفاتح الجريده على صفحة 17 … ومنهبل على نانسي عجرم … ماتخاف ربك هذا كبرك ومنبطح .. قال ابو مبارك .. العذر والسموحه يبو خالد .. خبرك فيني مراهقه متأخره .. قال ابو خالد .. وش اللي مأخرها .. هاه ؟؟( مسوي فاهم ) .. قال ابو مبارك … والله مدري عنها زهمت عليها يومني ابو خمس طعش سنه ماجتني … يوم تعديت ثلاثه وسبعين سنه جتني .. بس والله ياهي فاتتني يومني صغير .. احلى مافي المراهق انه اذا تحددت ميوله .. خلاص .. ماعليه من احد واللي في راسه يبي يسويه .. قال ابو خالد … وانت هالحين بزعمك مراهق ؟ .. ابو مبارك استحى شوي وصارت خدوده برتقاليه .. وقال.. كلك نظر..ماتشوف خشمي كابر.. حتى اسمع صوتي خــشـــن
التفت ابو خالد .. ومد يده على ابو مبارك .. وقال له .. عطني الجريدة واياني واياك اشوفك مسوي هالحركات .. ابعتبرك مراهق ولازم من يربيك ويعلمك الصح من الخطأ … وتراك محروم من الجرايد والمجلات لين تركد وتتساوى اشباهك ويزين صوتك ذا اللي كنه صوت حراثه واقف جمبها صومالي ( ابوك يالتشبيه ) ..
خذ الجريده من ابو مبارك .. يوم جاء بيطلع شاف جمب البيالات والفناجيل .. جريده … راح ابو خالد يشوفها .. لقاها نفس الجريده اللي فيها صورة نانسي عجرم … وبسرررعه .. خذ الجريده ويبي يتأكد ويشوف صفحة 17 .. هي نفس العدد ولالا .. من الربشه والسرعه … وخوفه على مصير المراهق ابو مبارك … ماشاف اليوم ولا التاريخ … على طول فتح صفحة 17 … ولقاها نفس الجريده ونفس الاخبار ونفس كل شي … بس صورة نانسي عجرم .. مهيب فيه .. مقصوصه من الجريدة … عرف انها مع ابو مبارك … وبما أن ابو خالد… كلف نفسه يكون الأب والمربي ..لأبو مبارك … جاه بهدووووء .. وقال له .. حبيبي بو برووووك … وين صورة نانسي عجرم اللي في هذيك الجريدة ؟
ابو مبارك حط اصبعه على برطمه اللي تحت .. ورفع عيونه يطالع السقف … وجلس على هالحال ربع ساعه .. ابو خالد طفش منه .. وصرخ بوجهه وقال … انت مراهق من النوع اللي ماينفع ندلعه .. يبيلك كف يعدل لك مراياتك ( نظاراتك ) .. هاللي كنها فناجيل متزاعله … يالله قل لي بسرعه وش سويت بصورة نانسي عجرم ؟؟…. ابو مبارك .. ماتحرك ولا غير طريقة جلسته … بس انه فتح خشته كلها … واصبعه اللي كان على برطمه … دخله جوا خشته … وطلع منها صورة نانسي اللي مقصوصه من الجريده …
انهبل ابو خالد وقال .. ماتخاف الله في نفسك … انت بزر منتب مراهق … فيه احد ياكل قرطاس … خبل انت تبي تذبح نفسك هذي كلها سموم كلها مواد سامه كيميائيه وكروموسومات وميتوكندريا …( متعقد من الاحياء مشوها لي )… لاوتقول لي خشمك كابر وصوتك خشن … بلاه من ذا القرطاس اللي بخشتك .. … نعنبو بليسك حتى ماتعرف تصير مراهق مثل الناس.. المراهقين اللي مثلك .. يقصون الصوره ويحطونها بمحفظتهم عشان اذا جو يدفعون فلوس يدفعونها بنفسيه حلوه ومرتاحه … ولا يحطونها بجدار غرفتهم بجمب السرير عشان قبل لاينوم يطالع الصوره ويحلم بأحلام رومانسيه .. واذا صحى من النوم يطالع الصوره ويقول .. صبحتس الله بالخير … ولا يحطونها في باب الدالوب من جوا … عشان يشاورها و يخليها تختار له الملابس اللي يبيها واذا جلس يغير ملابسه يخلي نانسي عجرم تشوف كراعينه وعصاقيله … مهوب ياكلونها مثلللللك
قال ابو مبارك … العذر والسموحه يبو خالد … انا يوم اني شفت صورتها حسيت بشي فيني مدري شعور غريب … اول مره احس فيه … على طول قصيت صورتها وأكلتها .. مدري وش اسوي … ومع ذلك الشعور اللي فيني مابعد راح …الظاهر يبي لي عشر جرايد اكلهن مع بعض لين يركد الشعور اللي احس فيه … قال ابو خالد … عندك عيال يبو مبارك ؟؟ … قال ابو مبارك … لا والله لين الحين ما كتب الله لنا عيال .. العيب في ام مبارك .. كل ماجيت اعض اذنها تعيي .. قال ابو خالد … لالا … عض خشمها ويجيك توأم … مادامك تاكل صور البنات في الجرايد .. اكيد ام مبارك .. ماخلت ولا صفحة في مجلة الرجل ..
طلع ابو خالد من عند ابو مبارك … ودخل علينا في المكتب .. وحالته حاله ومعصب .. قلت له .. ابو خالد سلامات وش فيك عسى ابو مبارك ماضيق صدرك تراه هاليومين عليه حركات مهيب طبيعيه ابد … قال لي … وانت وش دراك ؟؟ .. قلت له … هاه .. لا مدري بس كل ما مريت من عنده يقول … سوبر ستار اليوم تعال في حارتنا الشباب بيلعبون كوره .. وبيجون عيال حارة ابو وائل .. تعال كـحّــل …
قام ابو مشاري المملوح من مكتبه .. وقال .. اللي هذا أوله ينعاف تاليه .. مكتبكم ذا إرهاب .. وانا بصراحه خايف على مستقبلي .. لاني لاعب مخضرم في فريق حارة ابو وائل … يا أبو خالد ياسوبر ستار .. شوفوا لنا حل مع ابو مبارك … انا مااقدر استمر وهو موجود ( كـــل تــبــن واسكت تراك متوظف بالواسطه ) .. قال ابو خالد وش رايكم نقدم شكوى جماعيه لمدير قسمنا على ابو مبارك … اتفقنا وكتبنا الشكوى … وطلعنا كلنا نقدمها للمدير
دخلنا على سكرتير المدير .. ولقيناه جالس على المكتب ورافع رجليه على الطاوله .. ويفطر … سلمنا عليه .. والفطور واضح انه في خشته جالس يعلج .. الله يحوم تسبده .. وقلنا له ممكن ندخل على المدير معنا شكوى رسمية .. قال اصبروا .. عنده اجتماع ربع ساعه وينتهي .. تقدرون تروحون لمكاتبكم او اذا الموضوع ضروري انتظروا لين ينتهي اجتماعه …قلنا ننتظر ان شاء الله يخلص اجتماعه بدري وندخل بأسرع وقت … ابو خالد ماتكلم ولا قال أي حرف من يوم دخلنا على السكرتير .. ماغير انا وابو مشاري نسولف ونكلم السكرتير… وابو خالد مطير عيونه في السكرتير .. وماسك عقاله .. ويقول مستحيل .. مااصدق .. لالا مو معقول .. مستحيل … ابي زوجي ابي امي ابي ابوي ابي اقوم واجلد السكرتير
قلنا له تعوذ من بليس … هو عبد مأمور .. المدير قال له عندي اجتماع .. ومايقدر يدخل احد عليه… كلنا عارفين انه نصاب ولا عنده الا الخرطي … ومسوي فيها مهم … بس وش نسوي حنا معنا شكوى ونبي نكون محترمين علشان يحترمون شكوانا .. ونرتاح من ابو مبارك … قال ابو خالد .. لالا … لالالا.. لالالالا… وقام من مكانه وراح للسكرتير … ووقف جمب كرسي السكرتير … وحط يديه الثنتين على طاولة السكرتير.. وقال … ممكن تقول لي … ليش تفطر على مكتبك .. المدير مانع هالشيء والفطور بالكافتيريا تحت … ليه تفطر هنا ؟… قال السكرتير … ومن قال اني افطر والله اني مابعد افطرت … قال ابو خالد .. طيب واللي في خشتك وشو ؟؟؟؟… قال السكرتير .. هذا حلى … قال ابو خالد .. تحلي قبل الفطور… فيه احد يحلي على فكة الريق ؟؟؟؟… قال السكرتير .. ياخي كل نفس وما اشتهت احب احلي قبل الفطور عندك مانع … قال لا ماعندي مانع … بس ماشوف قدامك غير الجريده وين الحلى اللي تاكل منه … قال السكرتير … هاه .. لالا .. خلصته اصلا … قال ابو خالد … يبن ال(*******) ماكل صورة نانسي عجرم صـــح .؟؟؟ … قال السكرتير … أتـــوب
ابو خالد قال … سوبر ستار … اكتب اسم السكرتير … مع ابو مبارك .. الله يلعنهم من موظفين … هذي اشكال تداوم معنى في مبنى واحد … تعــــالــواااا ياشباب .. قلنا لبو خالد .. وين وين … وين تبي تروح ؟ … قال الموضوع متأزم ولازم ندخل على المدير والله لو عنده اجتماع لو عنده تايتنك داخلين داخلين ..( يسمع بالتايتنك ) …
فتحنا الباب على المدير .. لقيناه يوقع في اوراق وواضح انه مشغوووول …رفع راسه وقال .. ولعنتن تلعن بليسكم ياقليلين الحياء .. وش مدخلكم بدون استئذان يالسمرمد…. انا بلعت ريقي وبرطمي من الخوف عشاني من قليلين الحياء والسمرمد … وقلت لبو خالد بصوت خفيييييف … رحنا فيهاااا .. قال ابو خالد … طال عمرك حنا آسفين على هالدخول الغير مستأذن والذي خلانا نفعل تلك العمليه هو لاننا معنا شكوى مستعجله ونبيك تشوفها (( والله ياسيبويه يتلوى في قبره من القهر على هالفصحى )) ..
المدير .. وش تقول انت .. تكلم معي بطبيعتك خلك على الجريشه ( السليقه ) .. قال ابو خالد … طال عمرك دخلنا على ابو مبارك والسكرتير .. ولقينا معهم الجرايد … قال المدير .. ابو مبارك والسكرتير والجرايد … ذكرتني الله يذكرك الشهاده … ابو مشاري رح للسكرتير وقل له جب الجرايد بسرعه ترى لي ساعه انتظرها ماوصلتني .. ورح لبو مبارك .. وقل له يجيب الشاهي .. مصدع وابي لي بيالة تعدل مزاجي
طلع ابو مشاري .. والمدير شكل اعصابه هدت شوي ومابقى الا انا وابو خالد … قال لي ابو خالد بصوت خفييييييييف .. سوبر ستار .. يالله افتح الموضوع مره ثانيه وقل له كل شي انا بروح اجلس على الكنب في اخر مكتب المدير… وانت تكلم معه باسلوبك انا اعصابي ماتتحمل .. لاني ابتنرفز واذبح المدير لو مافصل سكرتيره وابو مبارك … قلت طيب .. ورحت جمب المدير وحطيت يدي على كتفه .. وعيني بعينه .. وابتسمت له ابتسامه معناها وش رايك فيني اعجبتك ولا نفترق ياحياتي ( القصص الرومانسيه لاعبه فيني )
قال المدير.. سوبر ستار وخر يدك عن كتفي وانقلع على الكرسي هناك اشوفك تمون ؟؟ … قلت له أفاااا .. هذا وانا اقول عنك مدير حضاري ومتفهم لمتطلبات موظفيك وإدارتك …(( احلى مافي مديرنا ان كلمه توديه وكلمه تجيبه وكلمه تركبه بتاكسي)) … المهم هالمخفه صدق كلامي وقال والله انك صادق … هات الكرسي هذاك واجلس جمبي خلني اسمع منك .. جبت الكرسي وجلست جمبه .. وبكل خبث رومانسي عطيته الابتسامه اللي تخليه يذوب ولا يركز بكلامي .. قلت للمدير.. مهوب حرام عليك تشغل ماسنجرك وحنا في مكاتبنا نقشر بصل حدنا منتديات ورسايل خاصه … ليه مافيه ديموقراطيه بإدارتنا … ليه ما يكون كل واحد فينا عريف على نفسه .. ( دام يقولونها المدرسين اذا غاب العريف ) .. ويكون المسؤول عن تصرفاته وانتاجه في العمل … المقصر يحسم من مرتبه .. والمجتهد يكافئ لو بالكلمه الطيبه قدام زملائه في العمل .. عشان الكل يسوي مثل المجتهد عشان الكلمه الطيبه او أي مكافئه كانت … وبكذا تكون قدرت تخلي ادارتك ديموقراطيه منصفه .. وبعيد عن الديموقراطيه المفرطه اللي كل شي فيها يكون بمزاج وبدون أي معايير وترتيبات
المدير واضح اعجبه كلامي .. بس مسوي فيها يكابر … قال والله انتم ماتدرون عني .. انا اشتغل واكرف في هالادارة علشان الادارة ولا عمري حطيت اسمي قبل ادراتنا هذي .. وبعدين سالفة الماسنجر … ترى انا ادخل بماسنجر العمل .. وكل الموجودين فيه مدراء شركات ودوائر حكوميه .. واذا حاب تتأكد تعال ياسوبر ستار شف من معي … قلت له .. محشوم ياسعادة المدير.. انا مصدقك .. قال المدير علي الطلااااااااق لو ماتجي تشوف … قلت له اعوذ بالله كل شي ولا الطلاق لاتطريه على لسانك يالثور ( اذا طاحت الميانه اخربها شوي ) .. ترا الطلاق جده جد ومزحه جد .. اعقل وخلك رجال .. وانا ابجي اشوف لاتخاف …
وقمت من الكرسي وقربت من عند شاشة الكمبيوتر … قبل لا اوصل رفعت رأسي ابشوف أبو خالد وينه ما عاد له صوت … لقيته جالس بآخر المكتب ويلعب في الطابعة حقت مكتب المدير .. ياحليله بثر في أي مكان لو مكتب المدير … نزلت راسي وقعدت اقرا الايميلات اللي في ماسنجر المدير … وعلى بالي اعرفهم .. اقول ايييه .. امممم .. هذا عندك ماشاءالله … ايييييييه … اممممم ..أخسسسس هذا مدير الشركه الفلانيه المشهوره هذا ملياردير .. ليش اضفته ؟.. قال المدير .. والله مااضفته هو ارسل لي رسايل خاصه بالمنتدى التجاري اشغلني يبي ايميلي عشان يضيفني بالماسنجر واعطيته ابي افتك منه … تكفى سوبر ستار … صكه بلوك لايدخل ويزعجنا … قلت ابشر .. ولسان حالي يقول .. وش دراك انها نصبه قلت كل تراب واسكت
قلت للمدير.. وش رايك اقفل ماسنجرك .. وشهوله تفتحه دامك مشغول … قال اللي يريحك … ( احس اني مبلط وانا متكي جمب المدير وامون بعد ) .. قفلت ماسنجره وكنسلت صفحة الماسنجر .. طلع بوجهي موقع .. قلت للمدير .. تبي هالموقع ولا اكنسله ؟؟ .. قال .. ايييييييه ابيه ابيه … خله … قلت بسم الله علي شوي شوي لاتاكلني .. وش هالموقع اول مره اشوفه … قال لا عادي هذا موقع الجريده .. السكرتير تأخر ماجاب الجرايد .. فتحت موقعهم ابشوف الاخبار … انا قمت اقرا بالاخبار في موقع الجريده … وانزل بالماوس واقرا واقرا … لين وصلت لصورة نانسي عجرم … قلت أفااااا… وش السالفه ؟؟؟؟؟.. المدير قال وشوووو … قلت فاتح على الصفحه الفنيه … خابرين ثقافتك رياضيه .. راعي كوره وبس .. حتى الاغاني ماتسمع … سامري وهجيني ويخب عليك
رفعت راسي لين ابو خالد جاي من آخر الغرفه معه ورقه … قال سوبر ستار .. شف هالورقه لقيتها في طابعة المدير … اخذت الورقه … وشفتها … صورة نانسي عجرم … قال ابو خالد شفت الصوره …؟؟؟.. قلت له اييييييه … قال اقلب الورقه وشف وش انا كااااتب …. مع السلااااااااامه … وطلع ابو خالد ركككككض برا المكتب …. قلبت الورقه لقيته كاتب
هذي استقالتي .. وابلحق على الوزيــــــــــــــررررر
¶¶ قفله ¶¶
اي واحد قرأ الموضوع … الله يعينه .. اذا شاف صفحة 17 بيتذكرني .. لو انها صفحة سياسيه
أخوكم / سوبر ستار
