يالله صباح خير ،، من نبي نشكي اليوم


 بسم الله الرحمن الرحيم

يالله صباح خير ،، من نبي نشكي اليوم


اعلان





قالها ابو سليمان : وهو يفتح عينيه من النوم بعد نوم ليله حالمة باحدث العبارات الساخنه
واللاذعه من اجل اثارة الخصومه لدى الشرطة او امام القاضي لانه بصريح العبارة
انسان فاضي ،، وشكاااي ..

قبل ما اخوض غمار الحديث عن ابو سليمان احب اعطيكم نبذه مختصره عن سيرته الذاتيه وحياته اليومية

﴿السيرة الذاتية لـ ابو سليمان الشكاي ﴾

هو ابو سليمان الشكاي – والشكاي ليس لقب العائلة وانما صفه اتصف بها – كان موظف في احد الدوائر الحكومية ( دواوير )
ولكنه احيل للتقاعد بعد بلوغه السن القانوينه وصار فاضي وياشين الفضاوه مع الشيبان .. اي شي يشوفه يهوش عليه في البيت في
الشارع المهم انه يهوش على سنع او من دون سنع هايش هايش الله لايعوق بشر… فأصبح ملاذ اهل الحارة واصحاب الشكاوي في
توكيل ابو سليمان علشان يتابع لهم قضية او معاملة في اي دائرة حكومية ابتداء من المحاكم والشرط والحقوق المدنية وانتهاءاً بأمام
مسجد الحاره لو مالقي شغل راح يشكي الامام وما اكتفي بشكوي امام مسجد الحاره راح يشكي امام مسجد الحاره اللي بجنباً على بعد 35 كيلو يهابه اصحاب المحلات التجارية والمخابز والبقالات لانه مره قد شكى مخبز نصف الي علشان وزن الخبز اقل من الوزن
المقرر له من قبل الامانة انا مدري وشلون جاب هالانظمة وقعد يقرا فيها لين طلع خطاء على حقين المخبز مما ادى الى اقفاله وقطع ارزاقهم وحرمان الناس من هالخبز
انتهت السيرته الذاتيه غفر الله له ولكم

﴿ يــــومـــيـــاتـــه ﴾

الناس تقوم لصلاة الفجر وتعين خير وتروق ابو سليمان يقوم الفجر واول شي يسويه
يجيب الطاسه اللي علي يمين السرير ويدخل يديه ويقعد يحرك بالكور الصغيره اللي حاطها (( على باله ترتيب جدول الفرق ))
داخل الطاسه وكاتب داخلها مجموعة اوراق في كل ورقة اسم شخص وياويل اللي يطلع اسمه
عز الله اللي ابتلش في عمره لانه ابوسليمان ناوي يشكيه ،، عاد وش يفكك من ابو سليمان اذا شكاك .. مواقفه كثيره ،، هوشاته اكثر ،، شكاويه في كل مكان وفي كل ديره .. حتى اذكر مره هوشه من هوشاته في الحارة كنا نلعب كوره والكلام وقت الصيفيه يعني اجازة ..
الا وهو يوقف عندنا ويقعد يهوش علينا ،، يالسرابيت يالسمرمد ماوراكم دراسه وراه ماتدرسون ابرك لكم من هاللعب .. فرد عليه احد
الشباب وقاله : يابو سليمان ماعندنا دراسه حنا في اجازة فرد ابو سليمان صاحب البديهه السريعه واللي ماتعوق معه وقال : ولــو ماوراكم اهل يضفونكم ..
الا غصب مانلعب
نعنبوا ذا الخشه فضت واستقعدت لخلق الله على الطالعة والنازلة .. ومن زود الفضاوة عندها
لو تفتح كيس زباله ( وانتم بكرامه ) نبت لك يقولك وش عندك هنا .

في المسجد
كل يوم هو وامام الجامع والمذن في مطاقة من الممكن تصل الى مدة اليد .. مره يقوله انت تطول في القراءة ومره يقوله انت تقصر في
القراءة ماتخلينا نخشع
خشع عليك جدار قل امين ومره يهوش ليش تتاخر بالاقامة والامام احتار مع ابو سليمان
هذي هي حياتنا في الحاره مع ابو سليمان واسأل الله العلي العظيم انه مايطيح اي واحد منكم بيدين ابو سليمان ..

تخيل انه يشكيك ويسحب فيك عند المحاكم ويمرمطك وعادي لو تجي عنده وتوكله على واحد
تشكيه نفس الحكاية يروح ويسحبه للمحاكم ويشكيه بس انت عطه طرف الخيط واترك الباقي عليه

في احد جلساته مع جماعة المسجد كان الحديث عن الاوضاع الراهنه وحركات بوش اللي مالها داعي وخويه رامسفلد <<== لعيون ابو مناور
عاد يقول والله لو صدام يوكلني عليهم اني لا انشب لهم واطلع مريره لين يطلع من العراق هو وسملقه
والله ثقه عند ابوسليمان ،، نعنبوا داره ما اكثرمن هرجه ،،

وعلى طاري الهرج ،، مرتن كان ابو سليمان مسافر لامريكا مع واحد من الربع عاد الخط 16 ساعه والله يعين اللي معه
واستلمه دندره من الرياض الين امريكا وخوينا اللي معه مل من حتسيه وماعطاه فرصه حتى يقول شي او يعبر عن رايه
مير يقوله ياابو سليمان فيه شي ماتعرفه انت كل شي تهذري فيه قاله : انت عطني طرف حلمك اللي حلمته البارح
واكلم لك الباقي قايللكم ياجماعة والله ماينعطى وجه يبلشك

وفي احد الايام كانوا الشباب مجتمعين ومسوين مناسبة خفيفة وكان من ضمن المدعويين برفسور في علم الاعصاب
يعني مابعد هالشهادة والعلم والدراسه شي مير يدور الحديث عن الاعصاب واخذ البرفسور يتكلم في مجاله
وتخصصه اللي افنا حياته في تعلمه ،، مير يطلع عليه ابو سليمان باحدى متخرماته وخطماته المعتاده ويقعد يحاج البرفسور
في مجال تخصصه ويطلع البرفسور على خطاء والظاهر ان البروفسور رجع لبيته وقطع شهاداته وحس انه ماتعلم شي عقب حديثه
مع ابوسليمان لان الاخير طلعه غلطان وانه ماعنده سالفه والله اني رحمة هالبرفسور من كل قلبي

هذا ابو سليمان ،، فاضي وقاضي وجلس يتبيثر على خلق الله
حاولنا معه بكل السبل والطرق مانفع معه ،، حطينا له محل وطلع اردى واردى تصدقون من الزود العصبيه اللي فيه
مره واحد جاي يشري منه قطعه عاد الزبون قاعد يكاسره بالسعر ،، قام ابو سليمان وخذ القطعه منه وصكها بالارض
وطلع الزبون وقفل المحل وقال هونا مافيه بيع

وش نسوي فيه وش نعمل مع هالعلة
قلنا ياولد ليه مانجرب مركز الامير سلمان الاجتماعي وفعلا جمعا قطه من اهل الحاره وامام المسجد
دفع الدبل علشان يفتك منه ياخي توذي منه بعذره والله عاد سجلناه في مركز الامير سلمان الاجتماعي
مع نخبه من الشيبان المتقاعدين ومافيه الا سعه صدر وصكة بالوت وادهار رياضه وحركات هالشيبان انواع الوناسه

وبكذا اذا عندكم واحد عله وغثيث مثل ابو سليمان لازم تشغلونه وعندكم مثل هالمراكز
ممكن تسجلونه فيها لو اضطريتوا وصدقوني هو المستفيد الاول


وهذا هو مركز الامير سلمان الاجتماعي

قهر ابو لطمة


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

يالله صباح خير ،، من نبي نشكي اليوم

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول