وداعاً باريس يا قصة عشق لن تنتهي


عودة مع الجزء الثامن والأخير من تقرير رحلتي إلى باريس
خنقتن العبره يوم قلت الاخير

احم نرجع لـ محور حديثنا .. تكملة لـ يومنا الأخير هناك
بعد زيارة قصر فرساي كنا مخططين نروح لـ :
هضبة مونتمارتر / كاتدرائية نوتردام / قوس النصر


اعلان





انطلقنا بـ المترو متجهين لـ محطة Lamarck Caulaincourt على الخط 12
واللي تطلعنا على حي الرسامين وهضبة مونتمارتر  أو زي ماينطقونها بـ الفرنسي مونتماغتغي
وهي أعلى منطقة في باريس .. سميت بهـ الاسم لأن كان فيه قديس اسمه دينيس هو أسقف باريس
و كبير قساوسة فرنسا تم إعدامه بـ قطع رأسه فوق الهضبة
فـ سمي المكان مونتماغتغي و ترجمته بـ العربي ( جبل الشهيد ) !

طبعاً بـ حكم انها مرتفعه .. طلعنا درج كثييييييير حتى نوصل أعلى شي

يعني انوااااع التعب .. فـ اللي معه برزان والا كبار بـ السن لا يجي مع هـ الطريق
فيه سيارات توصل لـ فوق واعتقد فيه قطار بعد

لكن بـ النسبه لي كان التمشي في هـ الشوارع الضيقه متعه بـ حد ذاتها
نساني كلللللل التعب


هنا وصلنا للـ قمه أعلى شي .. انواع الزحمه
تشوفون المحلات والكوفيات والمطاعم الكثيرة

وطبعاً بما انه حي الرسامين فـ تشوف الرسامين كثر التراب
و كلن يمسك و يبدا يرسم خشتك كذا من غير مايشاور حتى

لانه عارف انك بـ تخق مع الرسمه وتشتريها
بس بصراحه محترفيييييييييييين يرسمون رسمات مجنونه في دقيقه
كذا وهو يسولف والا يتلفت تلقاه يحط أدق التفاصيل في الرسمه !
من جد كنا واقفين نسولف ونتشاور في اي كوفي ندخل
مادريت الا واحد ماسك يدي يعني زي قولة لاتتحرك
التفت عليه لقيته باقي بس يحط اللمسات الاخيره على رسمتي

في أعلى الهضبة موجوده كاتدرائية ساكغي كويغ Sacré-Cœur Basilica
المشهورة بـ قبتها البيضاء ( ومعناها بـ العربي كاتدرائية القلب المقدس )



لقيت شايب وعجوز يعزفون حبييييييييييتهم
والله طولت وانا اتفرج عليهم واسمع عزفهم

في الدرج المواجه للـ كنيسة سيآح كثآآآآر من جميع الجنسيات و الالوان
يتفرجون على منظر باريس من فوق

وكـ العاده في اي مكان سياحي لازم تلقون اللي يخترعون اي طريقة للـ ترزق وجذب الانتباه
مثل هـ اللي يعزفون .. شوفوا شعورهم بس

والا هذا اللي يلعب بـ الكوره
بصراحه فنااااااااان مدري وين الانديه عنه

هذا القطار اللي اتوقع انه يوصل من تحت لـ أعلى القمة

لقطة من تحت
شوفوا وش كثر العالم

نظرة على باريس من فوق

تشوفون اللي تحت هناااااااااااااك على شكل قوس
وش تتوقعون تحته ؟!
امممممم
منظر بصراحه حسسني بـ الانتماء للمره المدري كم
<< ملاحظين ياكثر ماحس هالاحساس

نو كومنت

كملنا الطريق و نزلنا تحت
هنا فالينها الشباب اللي تو

نظره على الكنيسه

لايفوتكم الام والابو اللي يلعبون عيالهم خخخ
يركضون من فووووق الين يوصلون تحت
يوم شفتهم حسيت اني صدز ماعشت طفولتي << برآآآ

تشوفون هاللي جالسين تحت .. مدري وش يحسون بوه

يعني المكان الزين واللي يستاهل الجلسه وتقدر تشوف منه كل باريس .. فوق موب هنا !!

شكلهم كذا تقل ماسكين سرا في مستشفى حكومي

وصلنا تحت و اخيرن
عاد هنا صدز الزحمه .. فيه محلات تلقى كل شي عندهم زي ابو ريالين يعني
و طبعاً فيه مطاعم و كوفيات

تمشينا فيها شوي وتقضين
بعدين توجهنا بـ المترو لـ محطة Saint Michel على الخط 4
واللي تطلعك على الحي اللاتيني و كاتدرائية نوتردام

مشينا شوي لقينا ناس متجمعين عند هاللي يرقصون << ورانا ورانا الرقص
بس بصراحه ابو احمر كان رقصه مجنووووون كنه روبوت ابن اللذينا !

وصلنا عند نافورة سان ميشيل المشهورة في الحي اللاتيني


 
 هنا اخذت لقطتي :Fountain of Evil

عند النافورة شفنا مذيعه الظاهر جالسه تتكلم عن السياحه والناس الموجودين

المهم اول شي كانت مبسوطه تضحك و تتكلم عادي
شوي الا وتوقفها اللي تصورها وتخليها تعيد الكلام .. سوتها يمكن ثلاث مرات
يوم مادرينا الا عصبت المذيعه وقامت تهاوش وتصارخ !
بغوا يتطاقون الا شوي الين اشوا فكهم خويهم ذاك اللي شايل اكياس

قلت الله من زين القناة اذا هذا الطاقم خخخخخخ

كملنا طريقنا لـ كاتدرائية نوتردام
وهذي اول اطلالة لها


فيه اكشاك على امتداد نهر السين يبيعون كتب و تحف و صور قديمه
عندهم شغلات حلوه والله و رخيصه

كاتدرائية نوتردام Cathédrale Notre-Dame de Paris
تعتبر أكبر كاتدرائية في باريس وتقع في قلبها وعلى نهر السين
وجاء ذكرها كـ مكان رئيسي للأحداث في رواية أحدب نوتردام للـ كاتب فيكتور هوجو !!



 كنا ناوين ندخل ونشوفها من جوا .. لكن للأسف وصلناها متأخرين بعد ماقفلوها

برضو موجود في الحي اللاتيني جامعة سوربون اللي تعتبر من أعرق الجامعات الأوروبية
فـ قلنا لازم نمر عليها و نشوفها

تمشينا شوي في الحي اللاتيني
بعدين انطلقنا لـ قوس النصر Arc de Triomphe
والموجود طبعاً على رأس الشانزلزيه

هذا النفق اللي يمر تحت ميدان شارل ديغول
و يوصلك لـ قوس النصر

بدأ العمل في قوس النصر في بداية القرن التاسع عشر
حيث أراده نابليون بونابرت رمزاً يخلد انتصارات الجيوش الإمبراطورية
إلا أن إنجازه الفعلي تم عام 1836 زمن لوي فيليب Louis Philippe !!



القوس يبلغ إرتفاعه 49,50 متر وصممه المهندس شالغران
نقش على جدرانه الداخلية 386 اسم من أسماء قادة نابليون العسكريين
وكذلك 96 اسم من أسماء انتصاراته !!



كما أقام الفرنسيون بعد الحرب العالمية الأولى قبرًا للـ جندي المجهول
بـ شعلة دائمة أسفل القوس تخليداً لـ ذكراه !!

 برضو كنا ناوين نطلع فوق بس للأسف كان مسكر
عشان الاستعدادات للـ عيد الوطني اللي هو بكرا
حظنا كان زفت ذاك اليوم يعني كنا ناوين وقت الغروب نكون فوق بس ربي ماكتب

اصلن كنا تعبانين وعشان تطلع قوس النصر يبيلك ترقى 300 درجه تقريباً !

لقطة انسداحية ع الطاير للـ شانز

بـ الاتجاه المقابل فيه منطقة اللاديفانس وتشوفون واضح قوس النصر الحديث

غابت الشمس و رجعنا للـ فندق نريّح شوي و نبدل ملابسنا
بعدين طلعنا نتمشى ع الشانز و نتفرج على خلق الله زي كل يوم
الين ذبحنا الجوع و قلنا بـ نتعشى في مطعم L’Alsace


بـ انتظار العشاء .. وكـ العادة أول الحضور البيبسي

ثاني الحضور العشا حقي .. كانت ممسكه على اضلاع ذاك اليوم
بس من جد كان لذيييذ << والله من الجوع خخخ

بعد العشا جلسنا نفرفر في الشانز عاد اخر ليله في باريس ماودنا ننام بدري
بس المشكله اننا دآآآيخين و تعبآآآآنين فـ ماطولنا بـ التمشي
رجعنا للـ فندق وحنا نغني وداعيه يا آخر ليله تجمعنا وداعيه

صحينا الصبح على صوت الطيارات والعالم اللي برا
كان فيه استعراض عسكري بـ مناسبة العيد الوطني 14 جولاي





ساركوزي كان في وحده من هذي العربات
يوم مر كللللن قام يصارخ و يصور


 يمديكم ع العامود المايل اتحدى أكبر المصورين المحترفين يسويها خخخخ

الشانز كان فلللللللللللللل ماتقدر تمشي

قبل مانودع باريس قلنا لازم نمر على LADUREE
اخذنا حبيب الألب الماكرون و كم شغله كذا نتسلى فيهم بـ القطار

هذا لوبي الفندق وحنا طالعين خلاااااص

نظرة وداع لـ قوس النصر و الشانز

،،
باريس، قصة عشق لاتنتهي ج1
باريس، قصة عشق لاتنتهي ج2
باريس، قصة عشق لاتنتهي ج3
باريس، قصة عشق لاتنتهي ج4
باريس ، قصة عشق لاتنتهي ج5
باريس ، قصة عشق لاتنتهي ج6
باريس ، قصة عشق لاتنتهي ج7

وللـه الحمد قضينا ثمان أجزاء عـشناها في باريـس بـ كل لحظاته
أتمنى من كل قلبي تكونون عشتوها و استمتعوا فيها قد ماستمتعنا حن
باريـس حلم تحقق و مازلت اعـيش ذكرياتها كأنها حلـم مر بسرعه
ودآعها بـ النسبه لي أبـداً أبـداً ما كان عادي .. فعلاً كان غـير
مدري حسيت كأني عايش فيها طول عمري و مو قادر على فراقها

من الأعمـاق .. أقدم جزيل الشكر و الامتنـان لـ كل شخص مر هنا
سواءً تكرم بكتابة رد في القروب أو راسلني أو اكتفى فقط بـ المتابعة
صدقوني ،،

متابعتكم تعني لي الكثير و تشجيعكم بلاشك أكبر حافز لي لـ تقديم المزيد
استمتعت جـداً بـ قراءة حروفكم و أملي ألا تحرموني منها مستقبلاً

في النهاية ،،

أتمنى أكون وفقت في طرح تقرير لـ باريس يليق فيكم .. و قدرت أقدم لكم الفائدة و المتعة في نفس الوقت
وان شاءالله يكون تقريري بـ مثابة مرجع سياحي لـ كل اللي يفكرون بـ السفر لـ باريـس
و الله يحقق حلم كل من تمنى يزورها

أشوفكم على خير ان شاءالله في تقارير قادمة
كونوا بخير و لاتنسوني و والديّ من دعواتكم

www.Rthaath.net/vb

D e s i g n
دعوة للـ مبدعين في شتى المجالات


تعليقات 31

  1. galat a7bek …………….. جد يعني مادري وش اقول تقاااارير تفتح النفس ماشالله حسيت اني في باريس وزرتها مكان مكان عجبني شارع الرساااااامين خبااااااااااال الصراحه ليت من جدعني معهم ……………… وفي الاخير اسعدتنا بتقاريرك كثيررررر thank u too much ya 3asllllll…

  2. بصراحه قريت تقارير رحلاتك جميعها اليوم تقريبا من الساعه 3ص اعجبني طريقت سردك للرحله بتفاصيله بصراحه كأني عشت كل لحظه في باريس بسبب اسلوبك الاكثر من رائع اتمنى لك من كل قلبي التوفيق اخوك / احمد

  3. روووووووووووووووووعه ياحبني لباااريس ..تسلم اخوووي ومشكوووور ..انا متابعتك من اول تقرير ,,حسيت كني رحت باااريس معك يسعدك ربي ..

  4. مشكووور اخوي على هذا التقرير المتكامل وانا متابعتك من اول جزء لك واستفدنا كثييير والله يعافيك

  5. ماشاءالله تبآرك الله .. اهم شي انبسطتوى واتونستوآ .. عقبآلنآ نغوح بـآغيس .. خخخخ 😀 احلى شي عجبني اللي يلعبوآ عيآلهم حتى انا حسيت اني ماعشت طفولتي .. خخخخخ الله يديك العافية ع التقرير الروووعة .. ان شاءالله اذا نوينا السفر نرجعله .. ^^

  6. 🙂 واللة طلعة رهيبة يعني مية مية اللة يوفقك واسلوبك ممتاز عيني عليك باااااردة

  7. انا كنت من المتابعين الصامتين من اول قصة عشق لاتنتهي وكنت افرح لمن اشوف الرساله وصلتني مع رسايل القروب وكثير من الصور حفظتها على الكمبيوتر عندي من روعتها واحسست اني عشت معاكم لحظات رائعه بباريس واليوم كان الوداااااااع وحسيت اني فعلا بودع باريس :(:( أمااااااانه مابكيتوا ههههههههههههه على العموم كل الشكر لك على الرحله الأكثر من رائعه والحمد لله على عودتكم سالمين غانمين

  8. السلام عليكم .. أولا يعطيك ألف عافية على المجهود الرائع وترتيبك للرحله وتقسيمك المنظم .. يعني شغل متعوب عليه .. بس كان ودي اسألك كم سؤال بس قلت اذا خلصت منزل كل الأجزاء لأني متابعك من الجزء الأول .. أول شي .. كم يوم قعدت من يوم طلعت من بيتكم الى ما رجعت السعوديه .؟ وكم التكاليف يعني كم كلفتك الرحله كلها بالضبط .؟ أخيراً .. يعطيك ألف عافيه على هالتقرير الأكثر من رائع

  9. استغرب السواح الخليجيين خاصة يدخلون المطاعم الاوربية و ياكلون و لا يفكرون بحلال او حرام ! لا حول و لا قوة الا بالله العلي العظيم يا اخي حتى البيتزا الخالية من اللحوم – فيجي – و الاكل الفجتر لابد ان نسأل عن محتوياته لان البعض يضيف الخمر للاكل ..و يعدونه من المصادر النباتية ! لا حول و لا قوة الا بالله العلي العظيم

  10. متابع الرحلة من الجزء الاول وماشاء الله عليك زرت اماكن حلوة ومنوعه ياليتك جبت شوية صور من شارع الرسامين وعندي سؤالين خفيفه ايش نوع الكاميرا المستخدمة .. والعدسه وكم تكلفة رحلتكم مع المصاريف والسكن والخرجات ومن الى ننتظرك في تقارير قادمة

  11. مشكور أخوي ووفقك الله ووالديك والمسلمين أجمعين تقرير رائع وممتاز لو أنك ركزت فيه على المواقع الإسلاميه والمساجد وأبتعدت عن البحث عن الكنائس ومواقع المسيحيين أرجو أن تتقبل مروري وملاحظاتي أخوك / أبوتركي56

  12. والله رحلة ولا اروع وشكرا على ذكرك تفاصيل الرحلة بس انت تضكر اسما ناس ما اعرفة B بس كنت ابي ابكي وقت ماقلت الصورة الوداعية خخخخخخخ

  13. عمرري كلوو ما قد تابعت مواضيع الرحلآآآت .. أحس إنهآآ مملة :~ .. لكن موووضوووعك .. شي خوووراافي .. ويخلي الواحد يتشوق ..:) عن جددد كنت أستممممتع .. 😀 بس تصدق .. وإنتا تحكي .. كان نففسي أشووف الكلام إللي تقولوا بالفيديو .. 🙁 .. زي مثلا داك الراجل الفنان في الكورة B وبالله ساافر مديينة تاانية ههههههههه.. عشاني باشتااق لموااضيعك إللي زي دي .. :> بفللسك شككلي بالتوووفيق يخوويا ..

  14. السلام عليم ورحمة الله وبركاته ابصراحه شي روعه ماتتخيل اشقد شوقتني لروحت باريس شي روعه ماعمري تخيلتها تكون بها الجمال من جد مشكرو عرض رائع تحسس الي يشوف الصور من جد انه في هذا المكان انا احابه اشكرك واشكرك واشكرك على هذا العرض 🙂

  15. والله ياشيخ خنقتني العبرة:( تحمست معك وكأني رايح!!! ياشيخ أنا اذا رحت للدمام تخنقني العبرة اذا بغيت أرجع للرياض وشلون عااااد أنت بااااااريس

  16. قالت أحبك .. بصرااحة رحلتك وتقريرك يستحقون الإعجاب والتقدير استمتعنا به وكنا ننتظره من ربوع لربوع .. ان شاء الله ماتكون آخر رحلة لك ..وبعد ماتكون آخر تقارير مبدعة لنا دمت بسلام وغفر الله لك ولوالديك ..

  17. متابعتك من اول جزء.. جد جد باآآآآريس عشق ..:) اسلوب اكثر من رائع..وتعلقياتك تموتني زحكـ:D

  18. عزيزي السلام عليكم و من الأعماق اتوجه لك بالشكر الجزيل على هذا الجهد وهذا التنسيق والصور الجميله والسرد المختصر شعرت انني سافرت إلى باريس وكنت اعيش اللحظه شعرت بإحساس عجيب غريب وانا تابع لك وخاصة الجزء الأخير كل ماهنا جميل بل رائع وراقي جدا جداً وأتمنى أن لاتحرمنا من تقاريريك القادمه وأتمنى أن لاتكون أخر مره تسافر فيها للخارج وموفق بإذن الله اكرر لك الشكر والتقدير غفر الله لك ولوالديك ومتعكم جميعاً بموفور الصحه والعافيه

  19. قالت احبك ابدعة بتقريرك كنت من الاشخاص الصامتين فمع نهايه ابداعك اجبرتني على التعليق كنت من اشد المتابعين لتخطيط رحلتي القادمه استفدت منك الكثير واهنيك على التقرير الكامل والاسلوب الرائع تقبل مروري تــالا

  20. بصراحه احب الاماكن اللي بهادي الطريقه والف شكر للجمع على الصور الرائعه جداجداجدا

  21. شيئ رائع ولا تحرمنا من رحلاتك الحلوة لانني حسيت اني سافرت الي باريس مشكور حبيبي وارجو ان تقبلني صديق

  22. باريس مدينه رائعه…والأروع تصويرك وتعليقاتك ماشاء الله بس بعض الصور ماطلعت عندي خساره:(:(:( أنا من المتابعين لتقاريرك الأخير الجزء السادس والسابع والثامن…بس….لأني ماسجلت إلا متأخر الله يعطيك العافيه

  23. السلام عليكم اخوي اذا ماتقدر على فراق باريس ردلها – هههههههههه بدل ماتعب نفسك بالتصوير لبلدان الخوجات . صوربلدانا العربيه انفع لك ونستفيد احنا؟ وهذا البيت اهداء لك بمناسبة فراق باريس. قال الوداع وقلت بالحيل ماقواه …. وقعه على قلبي سواة الطعوني مير القدر حكم عليه بفرقفاه ….. مالي سوا دمع تهله عيو ني

  24. بصراحه احلى موضوع 😀 ووالله اني حاس بك8) وتراك حمستنا لباريس انا انشاء الله باطلع لالمانيا مرافق مع الوالد لكن مدري وشلون ابتركها :> ويعطيك العافيه

  25. واااااااااااااو شففففففففففـت كل االأجزاء فننننننننننننننننننان التصوير أعجبتني اللقطات حسيت بالإنتماء

  26. السلام عليكم .. صباح الخيرات .. اعجبتني رحلتك بكل مافيها وتعليقك المختصر الرائع .. بس تمنيت لو ماذكرتي مكان (الكنيسه) و (مقبرة الجندي المجهول ) لأنها من المحرمات وكي لانعتاد على سماعها أو رؤيتها..(اتمنى ان تقبلي نقدي بصدر رحب) أعيد إعجابي بتغطيتك شاكرة لك..

  27. السلام عليكم ورحمه الله وبركاته صبــاح الخيــر … بصررراحــه مواضيــعك اكثــر من رائعه … الصووور الكلام الاسلووووب بمجهووود تشكـــر عليه ,,,, الله يعطيك الف الف عــافيه ,,, ولا تحرمــنا من جديدك ,,,, والف شكـــر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

وداعاً باريس يا قصة عشق لن تنتهي

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول