هالحين ليه ما يعلمونا أصول المغازل من الطفولة ؟؟


SalaM

 دايما لين قبل فتره قريبه وانا ماعرف انام الا اذا جلست اتخيل ان بيت الجيران يحترق وان ابوهم مثل العاده فاخت للمغرب وماعندهم اخوان .. واكون انا توي راجع للبيت والقى الأم تصارخ بالحوش تقول انقذووووونا بنتي لحالها بالبيت .. واقوم انا أعلق ثوبي على نخلتهم وارفع سروال السنه لين رقبتي واتلطم و ادخل البيت واشيلها وهي تقول شكرا ياهيروو ربنا يخليك يافندم ويخليك للولاد و امهم (( جيرانا مصاريا مالكم شغل )) واطلع بها بالحوش واسدحها على البلاط واسويلها تنفس صناعي ماركة عادل امام ويسرا .. لكن ينتهي الحلم وهي تلفعني بالزنوبه وتشوتني هي وامها لين باب الشارع وهي تقول ليتني محترقه ولا تنقذني يا قليل الأدب .. بس اشوا ابشركم دايم انام اذا وصلت جزء التنفس الصناعي قبل ما ترجفني مع الباب

ولا هذاك اليوم في بنده لقطت لي عربيه واظف من هالخضروات .. الا على طاري الخضروات ابقولكم نصيحه للي يتقضون .. اذا جاكم في ورقة المقاضي بقدونس خس جرجير كزبره كراث حشيش .. وتوهقت ولاعرفت تفرق بينها فانصحك تظف كل ماهو لونه اخضر بالعربيه خبركم حكمتنا يالسعوديين الزود ولا النقص .. المهم واجي سلمكم الله يوم خلصت وامر من عند قسم مستحظرات التجميل والصابون والذي منو والي ماظنتي سعودي يعرفها هههههههههه والقى عندها ذاك الغزال الي يقول وين الصياد بس قلت مابدهاش هذي فرصتك لتحقيق حلمك .. وامشي شوي شوي من وراها بالعربيه علشان أدقزها بعدين اقولها عفوا يا آنسه واجلس امسك رجلها واسويلها علاج طبيعي واشيلها واركبها سيارتي وان بغت تعشينا وسهرنا سوا لزوم التهيئه النفسيه مايخالف .. لكن الظاهر اني زودت الجرعه شوي ودخلتها في جدار السوبر ماركت ودخل في جبهتها مسمار .. وآخر ما اذكره ان فيه ناس يسحبوني ويركبوني جمس وبعدها مدري وش صار




عاد بعد هالموقف بديت اتشره على اهلي و على مدارسنا وكل ابو الناس .. وراه مايعلمونا اساليب المغازل زي الناس ؟ بدال ما ادخل جبهة البنت بالجدار ؟ مهب المفروض يخصصون حصص من التمهيدي لين الثانوي تعلم الآداب العامه للغـزل و التعامل مع الجنس اللطيف وتفهمه ؟ ولا لين متى بيتركون الشوارع تعلمنا كيف نتعامل مع البنات ؟ ترا والله مهيب حاله يا عيال (( وجه واحد يجمع القطه بالاستراحه )) ولا وش رايكم ؟

أنقذونا من هالرقم المرعب

———————————–

-: مايستفاد من الموضوع

كل ما هو أخضر سعره ريالين و الخضار سموها خضار لان لونها اخضر –
لا تنقذ بنت جيرانكم اذا احترق بيتهم –
اذا صدمت احد حط رجلك ولا يوقفكم الا بيتكم –

الأعمى يدري ان أسباب الطلاق في المملكة ترجع لعدم تفاهم الزوجين وعدم تفهمهم لمسؤولياتهم وواجباتهم  كأزواج وتهيئة الشباب للزواج أهم من مشاكل البلد كلها لكن للأسف كل جهة ترمي هالمسؤوليه على الثانيه .. وشيل من هالطلاق و الضياع 

زمان كلمة مطلق او مطلقة مفجعه .. لكن هالايام مثلها مثل خبر وفاة عراقي .. تمشي الخبر وانت مغمض .. مثل ما المسؤولين عن الطلاق وأسبابه مغمضين

مواصل


تعليقات 4

  1. السلام عليكم كاتب الموضوع.. كيف الحال. صراحه موضوعك لما قرأته حسيت انو انت مالك في البطيخ زي ما يقولون. أما بالنسبه لأمنيتك بأنهم يدرسونك مغازل، فما اعتقد انه راح يفيد فيك لأنه زي ما انت عارف انجذاب الرجل للمرأه فطري، واذا المقصد بالإتصال خير ربي يسره، فأعتقد فيه خلل فطري موجود، ولا ارى من وجهه نظري داعي للطرح القظيه حتى في نسج الخيال.امنياتي لك بالتوفيق..

  2. السلام عليكم ورحمة الله وبركاته بصراحة موضوعك ضحكني بس في الاخير انتبهت لنفسي وقلت ويش يبي مواصل ذا تبغى حصص لفنون الغزل انتوا يالشباب من غير حصص وانتم في الغزل محد زيكم عاد اذا كان فيه حصص ويش بتسون اظنكم تجيبون مية بالميه يا اخ مواصل موضوعك به شي من عدم المصداقية انت ربطت كثرة الطلاق بسبب انه مافيه حصص غزل يعني اذا فيه حصص للغزل يختفي الطلاق . الطلاق له اكثر من سبب واجزم لك ان اغلب الاسباب هي اخلاقيات الرجال يعني الواحد فيكم يفلها على قولتكم وفي الاخير يتزوج وتجي بنت الناس وتشوف بلاوي زوجها طبعا البعض مايقطع العلاقات ومستحيل هي تكمل معاه على هالاخلاق التعابه ياشباب اشغلوا انفسكم في شيء يرضي ربكم وشكرا لك يامواصل

  3. يعطيك العافية مواصل مدارسنا و ائمة المساجد المفروض يقيدون عملية تثقيف الشباب في الاحسان وحسن المعاملة للعائلة والزوجة لكن للاسف الاغلب يركز وجوب امر الاهل بالستر والقاء الاوامر والنواهي و فرض الشخصية لو بالقوة ,والمرأه عاطفيه بدورها وتبي كلمتين غزل وتطيع زوجها ولكن لا يفقه ذلك الا من رحم ربي و في الخارج هناك الكثير من المؤلفات في تثقيف الازواج والزوجات كيفية التعامل مع بعضهم حتى تقل نسبة الانفصال عن بعض وترجمت بعض الكتب وموجودة في مكاتبنا وسمعت ان بعض المشايخ لهم اشرطة في نفس المجال واعتقد ان احدهم سليمان الجبيلان ورسولنا هو قدوتنا اما بالنسبة للاسلوب خفيف دم وظل ويعطيك العافية

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هالحين ليه ما يعلمونا أصول المغازل من الطفولة ؟؟

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول