نحوتين في سفره دوليه


يقول الشاعر الفذ في احد قصائده الارتجاليه

يانجد صيفك يقطع القلب حرّه *** شتان مـا بينـك ومـا بيـن بيـروت
أقفى ربيعك بالفرح والمسرّه *** وصيفك وصل بالعج والحـر والمـوت
جوٍ سموم القيـظ دايـم تكـرّه *** وإليـا ركـد مـا كنـي إلا بتابـوت
وإليا لحقني فيك بعض المعرّه *** إسمحلي أرحل عن فيافيـك بسكـوت
شهرين ابيها منك فالعام مرّه *** ألبس بها البنطال والبـس بهـا الكـوت
آخذ على لبنان والشام فرّه *** وآكـل مـن الرمـان والخـوخ والتـوت
الخ القصيده …




.. ومناسبه هذه القصيده ان شاعرنا الفذ ماقالها الا وهو " مونس " الحر وبعد ماطقته الشمس وحمسته ..

والله اني احمد ربي اني منب " تمره " كان الحين انفضخت عبستي من زود الحر Swaffff.gif
تدرون من زود الحر اني جالس اكتب لكم وانا ارشح عرق ومتغطي بكنبل " بطانيه " نفرين wacko.gif
مره دخلت على منجره وجالسين العمال يشتغلون وحر كتمه مابعدها كتمه اللي فيه ربو افلقني اذا لقى هواء يشفطه
وانا اجلس اتحقرص واتصبب عرق عاد حنا يالسعوديين علينا ملابس في الصيف مال امينها داعي ANSmile23.gif

يعني تخيل معي حر ولابس لي
1- سروال مقوصر 2- سروال طويل ربدزه ابو غزاله علشان تتك صح على البطن . onlinelong.gif
3- فنيله نص كم دروش كلها قطن wacko.gif 4- ثوب وشماغ وطاقيه وعقال
من وين تجيك ضربه شمس على هاللبس shutup.gif الا جلطه بالدماااااااغ على طووول ..

لذا قررت اني اغير ملابسي واترك عادتنا وتقاليدنا على جنب لين يخلص الصيف وانا ناوي افصل لي
شرشف خفيف واستر فيه عورتي او البس حرام واروح للدوام Swaffff.gif وربي وناسه ياناس يعني
نقطه العرق تنزل من ابطك لين تسيح على بلاط الرخام مايردها شي ANSmile24.gif ….

اجتمعنا حنا الشله المكونه من ابو سليمان النحوت " النضول " و ابو عثمان غفر لله له
وابوناصر قدس الله سره وابوسعد حظي قعد وتشارونا في مسألة الحر والصيف وكان خامسنا الطفش sad.gif

قررنا نطلع لسوريا بس الحجوزات مليانه وماعندنا احد ينفعنا .. في المطار
قلنا مالنا الا نشحن السياره للقريات وندور واسطه على طيارة عرعر او القريات مباشره
ونطير عند واحد يدعي انه من الجماعه قلنا خلنا نستفيد منه وبعد جهد جهيد وابشركم لقينا واسطه وقصينا التكت
وقفنا ننتظر موعد الرحله الا خوينا ابو ناصر جاي ومعه كيس رز المهيدب .. والعيون شاخصه عليه blink.gif
وش عندك يابوناصر مع كيس الرز .. قال باخذه معي كل شي عاد ولا الرز ..
قلت له يابوناصر بسوريا مايتحاج رز عندهم المشاوي والمقبلات ازين لك من هالرز ..
قال : ولو كل شي ولا الرزيزه ولو هرجة الناس كان افطرت رز .. Swaffff.gif

معليش يابوناصر لازم اذكر القصه كامله تقولي احراج .. عادي انت احرجتنا بالمطارات الدوليه وكيس الزر اللي تسحبه معك shutup.gif

بعد ما اعلنو عن بوابة الطيارة اللي راح " تقلنا " الى مطار القريات نط ابو سعد حظي قعد مقروص قال جوازي
نسيته ياجماعه الخير وش الحل sweat.gif قلنا نكلم السوبر فايزر حق المطار وان شاء الله بيفزع معنا Swaffff.gif
طبعا لاتشرهون على بال ان هالمطار مطارنا وحنا ماندري .. قالنا السوبر فايزر اها بس تقلعوا الرحله تمشي في موعده
يعني تمشي في موعده ما نحتري احد .. وش قالوا لكم النقل الجماعي حنا شغل " لمصقه " mad.gif

" مدري ليه ماخذين فكره سيئة عن النقل الجماعي والكريديس بيطلع هو وزوجته شهر عسل عليه " blink.gif

قال ابوسليمان النحوت : ياشين اقطع راسي نصين اذا طارت الطياره بدونا .. رح يابو سعد جب جوازك وتعال وحنا
نحتريك .. ماعليك منهم .. نقز ابوسعد يجيب جوازه من البيت .. والشله جالسين والمطار يعلن عن تأخر الرحله
بسبب عطل فني .. وانا والشله متمددين ضحك قال ايه قال عطل فني .. ياشيخ والله ماتزين الا اذا تفل ابو سليمان ANSmile10.gif

رجع ابو سعد .. ومعه الجواز قال ابو سليمان يالله مشينا .. مير نروح عند السوبر فايزر ونقوله يابو الشباب خلاص
خل الطيار يشغل الطياره Swaffff.gif نبي نركب .. اعلنوا المطار ان الطياره تمام وان الفنيين ضبطوا الخلل الفني ..
وجلسنا نحتريهم يمدون الخرطوم عاد تباطيناهم مادرينا الا جانا ابو ناصر طاير قالنا يالله يالله ياعيال هذاهم " يقروون بذنه " ANSmile12.gif
يعني انهم مدوا الخرطوم حق الممر .
وصلنا القريات بحمدلله وسلامته .. ANSmile30.gif

وطلعنا علشان نستلم السيارة من البسامي .. واكتشفنا ان ابو عثمان غفرالله له ما ارسل السيارة للقريات blink.gif
لانه من الاساس ماكان معه سيارة unsure.gif ورجعنا للرياض مع راعي تاكسي اصفر
كابرس تسعاوي يجرح ويداوي 8888.gif ياروحي يالتسعاوي 8888.gif

واتفقت الشله بالاجتماع على البنود التاليه بعد توفر دعم للميزانيه اللي اطفحت علينا كالتالي :

البند الاول
شراء مكيف صحراوي واحد حصان

البند الثاني
تركيب طبق فضائي " ساتلايت " مع ثلاث روس عرب سات ونايل سات والاوربيات عوضا عن جلسات الزبداني Swaffff.gif

البند الثالث
استقطاب ايدي عامله عدد واحد هندي لمدة فصل الصيف يشترط فيه خبره في تضبط روس المعسل وتنظيف دورة المياه .

البند الرابع
شراء شراشف جديده غرض نومة الظهريه في الاستراحه

البند الخامس
تسديد جميع مستحقات الاستراحه والمديونيات المتأخره الى زاكي راعي البقاله ..

البند السادس
محاولة البحث عن مناطق تنزه للشباب وحجز مكان في شارع النهظة غرض التسدح على الثيل
خاصه بعد اندثاره على طريق الدائري بعد عملية التحديثات الاخيره ..

البند السابع
انشاء جمعية من رأس مال القطعه مناهظة لجمعية مكافحه الفقر وتختص الجمعيه المزمع انشائها باذن الله
في مكافحة الحر في نجد وماجاورها من المناطق السعوديه ومكافحه غلاء الاسعار قال ايه قال سياحه داخليه

————————————–

مع تمنيتنا لكم حراً سعيدا

ANSmile04.gif

——————–



اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

نحوتين في سفره دوليه

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول