من أقوالي غير المأثورة !!


بسم الله الرحمن الرحيم

الإخوة والأخوات الأعزاء أعضاء قروب
حبيبناااااا الغاااااااااالي أبو نواف


اعلان





السلام عليكم ورحمة الله وبركاته وبعد :
والله ان لكم وحشة يالشيون <= بدأ يمون ، و اني مشتاق لكم ،
وأعتذر على هذا الغياب ( قولوا شرهتك على اللي جايب خبرك )
وكل عام وأنتم بخير ، وأتمنى أن تكونوا بأتم صحة وسلامة وعافية ، وتدفوا زين ترى البرد هالسنة ناوي ٍ نية ،

ولا يغركم كرّاني تراه نصّاب ، في عز الصيف يقول طرجة الحرارة طلاطة وطلاطين .. وإن سوى فيها صريح وعنده شفافية قال خمسة وطلاطين ، والأديتر حول مايتبخر من حرارة الشمس ، وفي عز المربعانية يقول طرجة الحرارة عشرين طرجة مئوية وحنوتسنا تطقطق من الجمممدة … المهم شوفوا درجة الحرارة ( الصدزيّة ) ماخذها بمقياس الحرارة حق السيارة وتراي ضابطة على مقياس الحرارة حق مدينة الملك عبدالعزيز للعلوم والتقنية يعني إن شكك أحد فيه بيحجبون القروب كله انتبهوا !! ،


على البركة زيادة الـ 5%
واحمدوا ربكم
يعني الوزراء اللي رواتبهم 50 ألف
بيجيهم زيادة 2500 ريال عداً ونقد
يعني أكثر من راتب نصف الشعب
وش تبون أكثر ؟؟؟
صدق انكم طماعين !!!
ياوجيه الفقر !!
قضت المقدمة اللي مدري وش تبي ،
ويسعدني أشارككم بهذا الموضوع البسيط ,

### من أقوالي غير المأثورة ###

من المعروف أن الأمثال عصارة تجارب ولبّ معاناة عاشها من سبقونا ، وظلت خالدةً رغم موتهم ، ولكني لاحظت في الآونة الأخيرة أن كل من صنّفت معه طلع له كتاب و إلا سوى له موقع وكتب فيه حكمه وأقواله وكأنه راضع مع سقراط وإلا آرسطو حتى لو إن تو عمره 18 وأصعب معاناة عاشها يوم يخرب البلاي ستيشن حقه وأكثر المواقف ألماً في حياته يوم يدخل غرفة أخته ويوطى شبّاصتها !! ، المهم إنها مسكت معي وقلت أبجرب حظي وأعصر دمجتي يمكني حكيم وأنا ما دريت ولطشت عنوان الموضوع من أحد كتب المبدع غازي القصيبي واللي ماشاء الله عليه ما فيه مجال ما ألف فيه ، الشعر والنثر والرواية والاقتصاد والإدارة ولا تستغربون لو يطلع كتاب فتاوى ويسميه فتاوى أبو يارا .. للسائلين الحيارى وهالحين أبترككم تعيشون جو الحكمة في صومعة دمجتي :

** من أقوالي المحوّرة **

إذا الشعب يوما أراد الحياة فلا بد ( أن تستجيب وزارة الصحة ) .


إسأل مجرب و لا تسأل طبيب (لأن اللي في مستشفى حكومي بتفطس قبل تدخل عليه ، و اللي في أهلي بتطفر قبل يعلمك وش فيك ) .


لا تؤجل عمل اليوم إلى الغد ( خله للأسبوع الجاي و الا اللي عقبه أمر الله من سعه ولا تخاف مافيه أحد بـيسألك ( ليش ماخلصت المعاملات و الا ليش عطلتَ المراجعين !! )


متى يبلغ البنيان يوما تمامه إذا كان ( اسمك في الصندوق العقاري ما يطلع إلا عقب 30 سنه )


ولا خير في حسن الجسوم وطولها ( إن كان مافي رصيدك الا الفقر )


قم للمعلم ( وعطه طراقين ترى مافيه تعميم يمنع ضرب الطالب للمعلم !! )


لا تحسبن العلم ينفع وحده ( لازم يصير عندك واسطة و الا منتب شام الوظيفه )


لا تنه عن خُلُقٍ وتأتي مثله ( إلا كانك مسؤول كبير مايخالف )


المستجير بعمرو عند كربته كالمستجير ( من الجوال بموبايلي )


إن الشباب والفراغ والْجِدَة (تخلي طريق التحلية مليان سيارات )


وما نيل المطالب بالتمني ولكن تؤخذ الدنيا ( بالوسايط ولا يهون النسَب)


إذا كنت لا تدري فتراك (دلخ ) وإن كنت تدري وساكت ( فتراك زلابه )


العزوبية تاج على ( رؤوس العزاب لا يراه الا المتزوجين ) .


اللي عنده مال ومحيره ( يدخل سوق الأسهم ) ويطيّره .


إذا زلّ العالِم ( الله يعينه على الشرشحه في الساحات )


انطر يا حمار لين يجي ( موعد إقلاع رحلة الخطوط السعودية !! )


إذا صار صاحبك عسل (فالحسه كله قبل يلحسه غيرك )


اللي ما تطوله بيدك ( قل للي جنبك يعطيك اياه )


إن غلا اللحم ( فلا تستغرب لأن حماية المستهلك نايمين نومة أهل الكهف )


أعز مكان في الدنا ( مرتبة بي إم )


الكتاب يقرأ من عنوانه ( ثم ينطل )


إذا رأيت نيوب الليث بارزة ( فحط رجلك )


إذا أردت أن تطاع فـ ( خلك مدير )


( الواسطة ) كنز لا يفنى .

$$ من أقوالي المصوّرة $$

ليس شرطاً أن يكون الأول أفضل من الأخير ، والدليل أن اللبن اللي يباع في البقالات ، الزين ورى والشين قدام !! .

بعد الزفاف انطل بطاقة الصراف ( لأن رصيدك يبي يصير أصفار و بتثـقـل البوك وبس ) .

ليس كل من وضع قلماً في مخباة الساعة مثقفاً يمكنه حاطه عشان يمسك الأوراق .

إذ شاهدتَ شخصاً يقود بانوراما فمهوب على كل حال إنه تاجر يمكن عرسه الليلة و مستاجرها .

عندما ترى رجلاً مسلهماً بعيونه فلا يدل ذلك على انه ( صاقع هاجوس ) يمكنه شاعر شعبي يبي ياخذ له صورة .

ليس كل من اشترى مجلة سيقرأها يمكن يشتريها أحد عشان يناظر الصور .

لو جرب الغرب ( قهوة المر ) كان عافو الكوبتشينو وخصوصاً
إذا جاء معها قدوعٍ زين ياسكّري يابرحي يانبوت سيف ( صارت سبحونة ذي مهيب مثل ) .

مهوب كل من لبس شراب وكنادرزكرتي يمكن في رجليه ( شطوب ) وداهنهن بفازلين .

هذا والله أعلم ,,
وصلى الله وسلم على محمد وعلى آله وصحبه أجمعين .


 سبحان الله وبحمده سبحان الله العظيم
عدد خلقه ورضا نفسه وزنة عرشه ومداد كلماته .


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

من أقوالي غير المأثورة !!

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول