منعوني من السفر بسبب ،،، برمودا


بداية الحكاية العجيبة التي كأنها من روايات ألف وليلة أو ليلة أو من تأليف الزعفراني أو كوابيس بعد وجبة غداء
 لكن للأسف أنها حقيقة وكانت معاي شخصيا ..  

انا كنت مسافر دبي في الفترة 10-17 إبريل ,, وانا من سكان الرياض ,, لكن ما قدرت احجز حجز العودة ع الرياض مباشرة ,, اضطريت احجز ع الدمام الرياض وصلت الدمام قبل رحلتي بساعتين او اكثر شوي ,, دخلت العفش لرحلة الدمام وقصيت البوردنج ,, والأمور طبيعية وسليمة
انتظرت موعد الرحلة كان رقمها 1173 الساعة 10 و 15 دقيقة مساء ,, وعند بوابة خرطوم الطيارة بادخل الطيارة ,, SUPER VISOR   الخطوط السعودية وكان أسمه ( س , ر ) وقال لي عفوا اخوي ما تقدر تدخل الطيارة !!! قلت وش الموضوع ,, قالت انت لابس سروال قصير فيه تعري !! قلت يا عزيزي مو قصير هو تـحـت الـركبة بكذا سم ,,
انا بديت ألتفت يمين و يسار أدور الكاميرا لأني كنت متأكد انه مقلب لكن للأسف حقيقة مرهـ
 
قلت له :
انا صليت فيه قبل شوي كيف ما اقدر أركب الطيارة فيها ؟؟!! قال هذا نظام من الداخلية يمنع لبس  الملابس القصيرة  !! وبعد شد وجذب ونقاش كانت نتيجته عدم التوصل لحل منطقي !! قال لمسؤلين العفش ينزلون العفش الخاص فيني من الطيارة ,, وبعد كلامي مع الموظف حسيت ان راسي يغلي وما قدرت افكر ,, لكن رحت لمشرف الخدمات الأرضية وأعطاني حلف بالله اكثر من مره ان هذا النظام ,, 
قلت له ممكن اشوف الائحة قال حنا نشوفها وانتم ما تشوفونها ؟؟ لائحة غريبة من نوعها !! قلت التدخين ممنوع وفي كل مكان لوحة ممنوع التدخين ,, وللاسف موظفين الخطوط أكثر المدخنين في المطار !!
 للاسف ما توصلنا لحل .

بعد وصول العفش لبست البنطون ( الساتر ) ,, وانتظرنا موعد الرحلة الجاية رقم 1175 الساعة 11 ونصف مساءا ,, وانتظرتها ,, وركبت عليها ,, ورجعت الرياض وفي ذهني تساؤؤلات  عديدة ؟


اعلان





= هل هذا الموضوع قد يحدث مع غير الخطوط السعودية ؟؟ حتى ولو كانت خطوط الهندوراس او كولومبيا !!
= هل أصبحت الخطوط السعودية تمشي مع النظام والإلتزام به ولم يتبقى سوى البرمودا !!

– متى يصبح للمواطن قيمة عند الخطوط و المطارات المحلية ؟! .
– لو أني أجنبي هل سيكون نفس التصرف ؟
 
وقفة أخيرة :
احد الأصدقاء قال لي : ان في مطار الدمام اتي إلى بوابة خرطوم الطائرة
في رحلة متجهة إلى الرياض قبل الإقلاع بربع ساعة ولكن وجد الباب مقفل بحجة
أن ملاحين الطائرة ودهم يلحقون ع صلاة الجمعة , ( الرحلة كانت صباح الجمعة )
أي أن الرحلات أصبحت تقلع بالبركة و ع مزاج الملاحين ومدى تناسب الأوقات معهم !!
 
والله ثم والله أن القصة حقيقية
والله على ما أقول شهيد ..


تعليقات 86

  1. انا أشوف إن معاهم حق يمنعون أي شخص لابس لبس مؤذي للآخرين من التواجد في المطار من الأصل. أتخيل لو معي زوجتي وأنت جالس أمامي تستعرض بسيقانك . أكيد بأكون في وضع محرج. وأيضا أوصي موضفي المطار بالإهتمام بمنع التدخين فهو من وجهة نظري أهم. دمتم سالمين

  2. مرهـ ثانيه البس زين الله يهيدك لان مثل هالملابس لها مكان .. والمكان الي انت فيه مايصلح مثل هاللبس ولكل مقام مقال !!

  3. زين ماسووا وبعدين لازم تطلع عصاقيلك على الناس البس مثل المسلمين وخلك عنك تقليد الغرب عمرك شفت امريكي لابس ثوب ولا داق اللطمة تدري ليه مايلبسه لان عنده عزه بزيه ووطنه وثقافته !!! وافهم يافيهم

  4. والله الخطوط السعودية ينطبق عليها المثل شين وقوي عين .. وتبي الصدق عاد والله البرمودا مقرف ويقزز وفيه جرح للذوق العام ياخي .. خصوصاً للي سيقانه شينه .. فيه ناس ماتبي تشوف سيقانك ياللي تلبس البرمودا (ولاأعني كاتب الموضوع فقط) والله لوإنها سيقان نانسي .. تقبل مروري وردي ولاتأخذ على خاطرك ..

  5. اولا انا معك فعلا الخطوط لدينا فيها تقصير شديد جدا وواضح ومعروف اما بالنسبه للي حصل معك انا حاس بموقفك في وقت السفر ومقدر الظروف ولكن للامانه واحقاق الحق انا معهم في عدم السماح لاي شخص مطلع (سيقانه) مهمن كان لان نظرتي لهم انه مكان عام ويجب احترام الجميع المكان فيه كبار السن النساء والاجانب وانا معليش لدي ملاحظه ارجو ان تتقبلها مني بصدر واسع الي هي كيف قدرت تصلي فيه انا ما راح اصير مفتي واقول حرام وحلال والي يقول العورة من السرة لركبه انا سوالي هو راح يكون جوابي واتمنى انك تفكر فيه تمام هل لو كنت معزموم او رايح مناسبه كبيره او رايح تقابل وزير او امير او رايح تقدم على وظيفه او تخطب من ناس راح تون لابس نفس لبسك هذا برمودا؟ انا شخصيا ما اعتقد ان كل الي ان ذكرت انهم اعز شان من الموللا القدير الي هو احق بنا ان نتزين بازي الملبس والطيب وقت مقابلته في الصلاه اتمنى لي ولك وللجميع الهدايه واعيد الخطوط فيها سلبيات كثيرة وانا معك واتمنى انك تاخذ رايي بكل روح رياضيه وفقنا الله جميعا لمل يحب ويرضى….

  6. في البلد هذي ما ينفعفيهم الا انك تفضحهم باعمالهم في كل مكان عشان يتعدلون,بس ما اعتقد ينفع مع هالشركة الحكومية الكحيانة!! تحياتي

  7. والله إنت صادق علشان حدث نفس الموفق مع واحد من أصحابي… بس ما نقول إلا ( إن شاء الله يخف هذا التخلف و مختفي من المجتمع ) معلومة يا جماعة الخير … خوينا هذا دفع فلوس مقابل هذة السفرة .. يعني مو مسافر بالبلاش … يعني من أبسط حقوقو إنو يلبس اللبس اللي يناسبو … إذا ما كان فية أي خطأ بحقوق الناس . و آخر شي حبيت أقولة إنو ربنا عز وجل قبل صلاة أخينا ( إن شاء الله ) و الخطوط السعودية لم تقبل بصعودة للطائرة !!! يعني الخطوط أنظمتها فوق أنظمة و قوانين الله !!!!! و شكراً

  8. أنا ما أشوف فيها شيء يعني لازم ألبس الثوب وأشخص ورقبتي لا تلف لا يمين ولا يسار عشان أركب طياره بصراحه أشوف الثوب ما يصلح الا في المناسبات أما البناطيل فهي عمليه أكثر ومريحه وخصوصا وانا طالع للطياره واللي يقول إنه يخاف على حرمته منه أقول له ليه منت واثق بنفسك ؟؟ والا ظن السوء مرافق لك في كل مكان الله أكبر لما تطلعو باريس والا بنجلاديش وش بتسووون

  9. بالرغم من إني ماني معاك بهاللبس بمكان عام إلا إن الموظف غلطان لأنه لايوجد قانون يمنع هالشي . لكن السؤال لو كان أجنبي وليكن غربي لابس برمودا أو أقصر هل يمنعه موظف الخطوط ؟؟؟

  10. طيب شفيكم على الرجال .. يمكن سيقانه حلوهـ .. غريبين صراحة .. زين انك علمتنا علشان ما نلبسه و نستعرض بسيقاننا و نأكلها خخخخخخ

  11. يا خي والله من جد ما عاد فيه حيا، ولك وجه تزعل؟ يا خي وش ذنب الركاب؟ ليه تكون سبب في تحويم كبود المسافرين؟ يعني انت سعودي وعارف وضع سيقانك، سواد وشعر كنها رجل حاشي، ياخي المعذرة على القسوة شوي بس من جد قهر.

  12. كثر ماضحك على موضوعك كثر ماضحكت على تعليقات الي علقوا,يعني بدل مانصيرلك عون صرنا عليك فرعون, ياخي هم صادقين ليش تلبس برموده؟!! شكل موظفين الخطوط مامنعوك الا خافو أنك تخرع العالم الي بالطيارة تعرف مو ناقصين حالات أغماء عالطيارة ولا سكتات قلبية

  13. اللبس الوطني على العين والراس والشباب السعودي من اشد الشباب في المحافظه على زيه الوطني من وجهة نظري انه عادي يلبس اللبس اللي يريحه لكن بدون مخالفة الشريعة يعني لو نحترم حرية ورغبة غيرنا في طريقة اللبس ((في حدود الاسلام)) وفيه الالاف الامور الاهم من اللبس واللي لازم ينتبهون لها في المطارات ويحطون جهدهم ونقاشاتهم فيها. وبالنسبة للوائح اللي تطبق على المسافر المفروض من حقه يطلع عليها وتكون معلقه في اماكن واضحه عجبي؟؟؟؟؟؟؟

  14. السلام عليكم ,, اخوي لبسك غير لائق انك تسافر فيه . . والواحد المفروض يلبس شيء زين ومريح للسفر والمثل يقول اكل مايعجبك , والبس مايعجب الناس المشكلة اننا نقول مافي نظام ومافي تطبيق للنظام ويوم طبقوا النظام زعلنا !!! على طاري المنع من السفر بسبب اللبس الغير لائق القضايا من النوع هذا بامريكا واجد وخاصة بالخطوط الي يسمونها عائلية او تناسب العائلة . اتمنى تتقبل كلامي بصدر رحب

  15. الحين الرجال متعب رووحه وكاتب لكم الموضوع وانتم حش فيه الله يهديكــمـ هدووء عليه شوي يــاراعي البرمودا البس زي ما انت عايز بس بالمطارات لا …..

  16. والله اللي اعرفه ياجماعه الخير ان عوره الرجل من الصره الى الركبه الا الان هوو ماخالف الدين واللي معاه فتوى من راسه يورينا والرجال معاه حق لو كان اجنبي كان طلعوووه وانت اللي تقول زوجتي تشوف سيقانك ماراح تقدر تقول شي لو كان اجنبي بس سبحان الله على العقول المحبوسه فكروا شوي قبل ماتردوا

  17. وراكم قلبتوا على الرجال ياللي فوقي هههههههههههههههـ جاي بيفضفض لكم و قلبتوا عليه :] .. بعدي أخوي.. في مطاراتنا أو دوائرنا الحكومية أحمل شعار وسع صدرك عالياً قبل كم أسبوع مودي شغالتنا بأسفرها وكان معها عفش زايد وكان المبلغ 1600ريال .. سواقنا كان معي .. المهم أحاول مع الموظف يمين يسار يابن الحلال مسلمة و أرحمها وهو يقول النظام نظام مقدر .. جا سواقنا و لقى له موظف هندي .. قال الموظف دقيقه و راح يكلم المشرف السعودي شوي جا و قال يبي دراهم .. تعال قابلني عند الكافتيريا و عطني 400 ريال نوزعها بيننا مهب كلها لي و أزهل العفش 🙂 و فعلاً..!!

  18. دام اللبس ساتر وش عليكم من الرجال يلبس اللي يلبس ؟؟؟؟ يعني بتتدخلون حتى في لبس الناس؟؟ اللي مايبي يلبسه لايلبسه؟؟؟ ولا جات على البرمودا؟؟ انا والله ثم والله اني ماالبسه بس مااتدخل في ذذوق الناس ؟؟ الناس اذواق وكل واحد يلبس اللي يعجبه ترا مو معصب <<<<<<<<< تحياتي وتقبل مروري

  19. أستغرب أنا من كل هـ الهجوم على كاتب الموضوع ,, ياناس هو حر يلبس اللي يبيه هذا شي ,, شي ثاني التعليقات بصراحه كوم ثاني يعني ما ألوم شركة الطيران اذا تصرفت بهـ الهمجيه وأحنا عندنا ناس تتكلم كذا – لا احد يزعل من كلامي – بس تعليقاتكم وتريقتكم على صاحب الموضوع تنرفز الله يهديكم و جد خطوطنا أسوء خطوط من ناحية أشياء كثيره وللحين السؤال قائم : لو كان أجنبي اللي لابس كذا بـ يكون هذا تصرفهم ؟!

  20. أولا: اعانك الله وغفر ذنبك ، لأن هذا من الابتلاء برأيي ، حين يسلط الله عليك شخص لا يقدر العقوبة بقدر الذنب. ولك أن تتخيل رجل عنده موعد هام أو مناسبة أو مريض … الخ ثم يمنع من السفر لأسباب بسيطة .. وأقول بسيطة لأنهم يتجملون و سوأتهم مكشوفة ! هلا سترتم سوأتكم ثم تكحلتم؟! ثانيا: وضع الطيران عندنا مخزي وأين حقوق الانسان عنه؟ وحتى الشركات الجديدة تنافس القديمة في السوء . ثالثا: إزار المسلم من فوق الكعب حتى منتصف الساق . المشكلة إن المطاوعة انبحت أصواتهم وهم يحذرون من الاسبال ، ويقولك الشاب : ( ياخي شكلي بالبنطلون القصير مو زين ) !!! ولكن لما جاء ( البرمودا) من الغرب أصبح شبابنا يلبسه وصار ( زين ) ! ولكن يا أخي لكل مقام مقال ، فأنا أرفض أن يخرج شاب بهذا اللبس أمام زوجتى و أختي ! هن يفتن بصورة الرجل فما بالك لو انكشف اكثر ! و مع ذلك أوافقك الرأي بأن الأمر لم يكن يستحق المنع من السفر . الله يصلح الاحوال لنرى شركات( زي الناس) في جميع القطاعات ، يكون همها الأول : راحة المستهلك ( ولا أقول المواطن). دمت بخير وعلى خير وإلى خير

  21. الحين الرجال يشتكي وكله قهر ويحق له والله وهذي ردودكم.. الحين لو انه مطوع ولابس ثوب تحت الركبه شوي احد بيقول له شي ؟؟ لا بالعكس بنوقف له احترام وتقدير .. ليه البرمودا عيب وحرام ومقزز ومقرف وهو فيه تطبيق للسنة النبويه … ليه الشاب “يمنع من رحله” او انه يدخل السوق عشان لابس برموادا وتجيك وحده سافره ومتبرجه ولابسه الضيق والمخصر وتدخل ولا احد يقول لها شي.. انا سمعت بأذني شيخ قدير يحرم البنطلون!!! عجباً

  22. الحين ابي اعرف الرجال ماقالكم وشرايكم بلبسي عشان ولا واحد يقول انا اشوف ان معاهم حق سلامات يالحبيب وين معاهم حق لأنه موذي للأخرين ليه مؤذي بعرف انا واحد لابس لبس عاجبه ومافيه اضهار حتى للعوره بعرف انا كيف صار موذي غريبه اذا انت طلعت من الي يطالع الناس لسراويلهم وبعدين تعال تقول تخيل حرمتي معي وش المحرج قولي وابو عبدالله يقول عمرك شفت امريكي لابس ثوب ياخوي مو شرط يلبس مثلنا الرجال مايعيبه لبسه وبعدين كل من لبس برمودا والا جنز صار يقلد الغرب غريب امرك وتفكيرك يابو عبدالله ارتقي شوي عن الأفكار ذي الله يخليك الدول الغربيه الأن عرفت انهم يفكرون افضل منا اذا حنا يالعرب صرنا نطالع بالسراويل خله يلبس الي يلبس ياخي يقربلك ياخي تعرفه اشدخلك فيه اجل كل واحد حر بنفسه امنعه من رحلته عشان سروال والله قمة التخلف قمة التخلف الخطوط السعوديه اصلا غاسلا يدي منها من زمان وشكرا اخوي على موضوعك الجميل

  23. والله يا أخي الكريم أنا أشوف ان معاهم حق موظفين الخطوط لا وبل واجب عليهم منعك وللأسف انك دخلت قبل ما تطلع الطيارة تصلي باللبس ذا .. يعني بالله عليك تقدر تقابل الملك بذا اللبس فما بالك بملك الملوك يا أخي الكريم لكل مقام مقال .. ولا تآخذني

  24. أخي العزيز .. يبدو أنك لم تلاحظ ذلك حين بدأت بمقدمة أسأت فيها لروايات ألف ليلة وليلة، الزعفراني، وحتى للكوابيس التي ذكرت .. إن أردت ياسيدي النقد .. فالنقد ليس بتلك الطريقة التي كتبت ، إن كان فعلاً هناك أمرٌ يستحق النقد .. ومن يقرأ المقال ( إن كان مقالاً ) فإنما يعتبرك حاقداً وليس ناقد .. ذكرت بعد لبسك لـ البرمودا أن لبست البنطلون (الساتر) .. ألا يكفي ياسيدي أنك قلتها بنفسك ؟ أم أنك تقصد أن البرمودا ليس بساتر ؟ إن كان كذلك .. فـ من حق الخطوط أن تمنعك من ركوب الطائرة. وذكرت أن ملاحو الطائرة قد أقفلوا بوابة خرطوم الطائرة بربع ساعة ليتمكنوا من اللحاق بالصلاة .. أهذا سبب قوي لتوجه تلك الإتهامات .. ولإجبارنا على الوقوف بصفك ؟ يجب عليك التمسك بإحترام ذاتك .. ليحترمك الآخرون .. نحن معك في أن للخطوط سلبيات .. أما ماذكرت ، فهي سلبياتك .. وكأني بك تذكر تلك السلبيات وتنتقد نفسك. في الختام .. أتمنى منك انتقاد ذوي السيقان المشعرة وإن أردت .. فـ انتقد بذوق من تريد نقدهم .. ولسبب مقنع. دمت ناقداً فذ ..

  25. والله انا اشوف انه احسن شي سوه لانه ياخي في عوائل في الطائره وانت لو هلك معاك ماترضى تشوف احد لابس كذا واهلك ينظرون ويمكن تكون اول من انتقده . الله يقويهم في عملهم

  26. انت في السعودية .. كل شي يصير واللي اعرفه عن البرمودا انه بنطلون تحت الركبة وعورة الرجل من السرة الى الركبة ، بس السؤال لو جاء مطوع مقصر ثوبه بيدخل الطيارة ولا لا .. ؟ على العموم ما فيه مطار بالسعودية يدقق غير مطار الدمام ، مرة كنت لابس بنطلون وجاء موظف الخطوط يطل علي يشوف هو قصير ولا لا .. خخ وسع صدرك عقبال ما يلبسوننا عبايات عشان ما يطلعن وجيهنا الشينات خخخخ

  27. لاحول ولا قوه الابالله اللي يقووول تقليد للغرب كل النااس تلبس بنطلوون وحنا اللي شاذين بين العاالم ولا اشوف فيها شي وهو لابس برمودا مو شرت يعني حلااال تحت الركبه مااقول الا تخلف

  28. الحين انت مستغرب إنهم منعوك تركب الطائرة ببرمودا؟؟ والله انا مااستغرب عنهم شي! ابتسم واضحك على حالنا اللي نعيشه وياليتهم يطبقون كل القوانين وعلى كل الناس وفي كل الاوقات والله اذا الموظف طفشان، قال يللا خلني افتش على المخالفين واذا رايق، يركب حتى السكارى الله يكفينا شرهم بس نصيحة يا خوي.. مع إني عادي بالنسبة لي إن الرجال يطلع حتى بشورت لأي مكان.. لانه رجال ومو عورة بس تصدق.. أحس إن اللي يلبس بنطلون أكشخ من اللي يلبس برمودا في الأماكن العامة

  29. للأخوان اللى علقوا فوووق ,, المفروض انك تهتم بشؤونك الخاصه وتترك عنك سيقان العالم ,, زي ما تقول والرجال ما لبس شئ يخالف السنه وقالكم انه تحت الركبه ومصلى فيه ,, وبعدين تركتوا العالم اللى تركب الطياره هو وزوجته لابسين ( ثوب , عبائه ) وينزل منها ( بدله , بدون عبائه ) واللى ممكن يكون انت واحد منهم ,, تركتوا قلة الحياء اللى تصير في الطيارات , من المضيفات وتعريهم قدام حضرتكم , وحطيتو حالكم في سيقان شاب وإلا عاجبتكم المضيفات ؟؟ اقووووول صج ما عندكم سالفه

  30. اولا الرجال مالبس شورت ولا ملابس داخليه ثانيا اللي يقول حريمنا وعيالنا وووو

  31. تابع ثانيا وش ذا التفكير امانه ماتستحي ياللي كاتب حريمنا يطالعونك ليش منت عارف اخلاق اهللك؟؟ وبعدين بالذمه كلكم اللي انتقدتو الولد لو جا فلبيني او امريكي او اي جنسيه ثانيه اكيد بيركبونه الطياره لااا وفوقها ابتسامه وترحيبه كانه يقووووله الموظف:ايه بعد ابي برمودا اقصر؟؟؟ ان استخدم القطار يوميا يمنعون اللي لابسين اروووواب من السفر هذا صحيح في حدود المنطق بس في الاخير بعد ماياخذون وعد منه انه مايكررها واشووووف بعيوووني فلبينيين لابسين برمودات بس نص الساق وعادي السؤال هنا:لوطبقو النظام كان طبقوه في جميع انوا عالملاحه سواء بريه او جويه او خنفشاريه تكون اللي تكون لا ويطبقونه حتى ع الاجانب مو بس شبابنا والواحد حررررر في لبسه اهم شي محتشم .والرجال حررررررر يلبس اللي يبي يلبس بسسسسسسسسسسسس..يكون مقبول مايخدش الحيا الله واكبر الحي اللي اشوووفه اشاياء اكبر من الواحد يدقق في البرمودا.واخر شي باعلق عالموظف اللي رجعك وخلاك تبدل انا اشوفها غلط افرض عندك موعد او رحله ثانيه او اي شي ضروووري مايستحمل التاخير عادي عنده يعطلك رحله عسان برمودا؟؟؟ياجماعه ارتقو في التفكيرررررررررر لاتخلون الناس تضحك عليكم لاكن كل اناء بما فيه ينضح….الواحد جاي يفضفض وانتو ماقصرتوا طحتو فيه يعني هارب من القوم وطاح في السريه….نقدكم جارح….ياللي لابس برموده دامك واثق انك ماخدشت الحياء العام فخلك على منت عليه واعلى خيلهم يركبونه اللي جرحووك باللكلام فوووووق..تحياتي لك

  32. ابتسم فانت في السعودية….. البس ماشئت وسافر اينما شئت لكن اذا كنت في السعودية…. لا الوضع غير ظروري تلبس ثوب وفروة وعقال وشماغ العجلان…والا ما تمشي امورك الي يقول مقزز وماني عرف ايش … اذا بتتكلم عن نفسك فانت حر.. لكن نجي للحق البرمودا مو حرام… ولا فيه عيب… البس ما تشاء وافعل ما تشاء في حدود الشريعة الاسلامية… الى كل معارض للكاتب من خلال انتقاد لبسه… كفاكم تضييقا على المسلمين… ولا تحرمو ما احل الله…. فانكم ستحاسبون… والي يقول انه فتنه…. اذا البرمودا فتنه… ايش تسمي ترزز بعض الشباب هداهم الله بالثوب والشماغ والترسيمه والي على اااااخر حد في اسواقنا… الشخص لا ياقاس على لبسه انما يقاس بدينه وتقواه.. بالنسبة للخطوط السعودية…. اقول ابتسم فانت في السعودية للاسف نحن مستظعفون في بلاجنا وباموالنا لم يسبق ان قرأت لا على ظهر التذكره ولا على بطنها بمنع لبس البرمودا… اذن لا يحق لهم منعي فانا دفعت ثمن التذكرة ووافقت على الشروط الموجوده على التذكره فقط…وغيره فلا.. ما اقول الا ….. ابتسم غصب عنك فانت في الخطوط السعودية

  33. ابو عبدالله وابو خالد والله اني احس انكم متحجرين فكريا! كيف تقولون احسن! الشرع ما حرم لا البرمودا ولا الجنز ولا حتي البدله! كيف تقول هذا لبس الغرب! وثاني شي تقول ليه ما يلبسون الثوب! طيب انا راح اسألك ليه ما تلبس باكستاني! الجواب نفسه ينطبق على سؤالك اتمنا تكونون شوي متفتحين

  34. يا اخوان ايش هالردود السخيفة هاذي ؟؟؟ الرجال طالع لابس برمودا .. مش كلسون داخلي !!!!!!!!! برمودا ، يعني يغطي العورة .. يعني اللي لسا مو فاهمها اقله : صديق ، عورة مافي مبين !!!! واللي يقلي اخته وامه اقله اولا افرض شافو سيقان ابو الشباب ، اش صار يعني ؟؟؟ ان كنت خايف يتأذو لاتخاف ، ماحد حيتأذى ، وان كنت خايف انو يثيرهم ، برضو هاذا الشيء غير وارد لنه رجال ، ماهو اليسا !! ثانيا الثوب هاذا لبس مانزل من السماء ولافرضه ربنا عز وجل في القرآن .. اذا اي شيء يحشم ويغطي العورة فهو حلال لبسه ، ولاحد يفتحلي موال التقليد ومدري ايش … انا اتعاطف معالك ياخوي ، الله يعينك على هالتخلف !!

  35. الموضوع ممتاز و الدليل النقاش و الاراء المختلفه بس انا كنت معجب في البرمودا لانه شورت و بنفس الوقت تقدر تصلي فيه بس مره من المرات واحد من الشباب في امريكا دخل محل ملابس يبي يشري برمودا لقاه بقسم النساء يوم سئل قالو له هذا ما يلبسه لا الجنس الثالث انا ما اقصدك يا اخوي اكيد انك رجال بس انبه الاخوان و انبهك و انبه نفسي لهذه النقطة الحساسه الي ما نرضاها علي انفسنا و لانقبل انا نوصف بها او نلبس لبس انصاف الرجال انا ما الومك بل كنت البس قبل البس البرمودا و بعد المعلومة هذي اعدت التفكير امل منكم اعادة التفكير امل انك تقبل النصح و انا ما اقصدك انت باي شكل من الاشكال بل حبيت انبه علي الجميع

  36. انا اقول انك تستاهل اللي سووه فيك واكثر .. لو انا منهم كان مسكتك بسلك او عصا الين يطلع الدم من سيقانك .. عشان تصير آآدمي

  37. فيه شي حرام وفيه شي عيب وهاللبس من العيب لأنه من خوارم المروءة وقدح بالرجولة .. وذاللباس والله عن نفسي أستحي ألبسه بغرفة مقفله ما يشوفن فيها أحد مو عاد قدام خلق الله .. وذا اللي يقول لو شفت فلبيني أو أجنبي هذا لهم عاداتهم وتقاليدهم ولنا عاداتنا وتقاليدنا وإن بغيت شف لباس حريمهم تجيك الوحده لابسه من غير هدوم تبينا نصير مثلهم؟ .. يالله ثبات العقل والدين يالله.

  38. والله أخوي الصراحه مالهم حق من جد.. السفر والطائره مش شي رسمي يعني البس اللي ابي؟؟ والشرع ما حرم لا برمودا ولا بنطلون.. ابي البس ثوب برمودا اي شي. اهم شي انه يستر العوره.. الجانب الآخر .. أنوه هناك شي اسمه ذوق عام.. يعني انت رجال كبير ما يصلح تطلع كراعينك .. واذا كنت سعودي فأنا أتوقع أنك كنت بتسوي دعاية لفازلين >> لا للمشق والتمشيق << الخلاصه لا تخلون الدين شماعه لكم كل شي حرام؟؟ ويبقى هناك ذوق عام كما قلنا.. وسالفه الفتنه الصراحه ضحكت الين انفقعت.. اجل ينفتنن .. بعذهن والله والله من اللي يشوفنه من بلاكم يا الرجال.. عذرا للسوليف الطويله ..

  39. حراااام عليكم ياجماعة الحين بدل ماناقف بصف الرجال نوقف ضده والله يجرحه والي يقول انت وسيقانك …. انا بصراااااحة ابعلق بكل عقلانية في حدود الشريعة الاسلامية … يااا اخوان الي اشوفه ان البرمودة لباس ساتر للعوره وهي من السرة الى الركبة ومافيه مخالفة للشريعة الاسلامية ومافيه دليل يقول ان الثوب هو السنة او الشماغ سنة لا ابدا صحيح انها ثقافاات ولكن برايي الشخصي ان لكل واحد حريته الشخصية في اللباس اذا مافيه مخالفة للدين … اما بالنسبة للخطوط السعودية فاقول مثل ماقال اخوي ملاذ الطير ابتسم غصب فانت في السعودية يعني ماشفت عليهم الا هذي … ((( الاختلاف في الرأي لا يفسد للود قضية ))) تقبلو مروري ودمتم سالمين …

  40. يالي اسمك معاذ قسم بالله حرام من يلسع السلك على ظهرك انت تدري ليه لن ردك قبيح وتعلم الألفاض الزينه قبل تتكلم على غيرك اعوذ بالله منكم وش هالردود السخيفه لهدرجه وصل فيكم انكم تتكلمون على الرجال ويالي اسمك( انا) والله عارفين انك انت الي تكتب اكتب اسمك مكتوب والا بس تعرف تجيب كلام تألف فيه من عندك قال جنس ثالث قال ههههههه اول مرا بحياتي اسمع الي يلبس برمودا جنس ثالث اقول يازينك ساكت بس احمد ** وين العيب بلبسه تراه مو عريان هو عشان تقول عيب وابي توضحلي نقطه كيف لابسه بدون هدوم قسم بالله يالي انتقدو الموضوع ناس متخلفه اسمحولي ناس متخلفه واحد يقول حرمتي لوتشوفك ليه مالك شخصيه انت عندها والي يقول امحط السلك على رجولك هذا دليل على التخلف الي هو عايش فيه اخوي صاحب الموضوع لاتهمك ردودهم السخيفه لأنهم ناس متخلفه ولاتفقه شي الناس تطلع لفوق وهذولي يطالعون بالسروال يعني ماعليك من هالشكال واحترامي الكبير لك

  41. اخى الكريم ……….. انا معك ولك كل الحق بلبس ماتشاء ولطالما كان المنظر العام جيد….ولماذا يحتجون علينا ونحن نرى الاجانب (قالعين) فى الشوارع….؟ يعنى ما هى العبرة بشخص مسافر بكل احترام وعدم سفرة(برمودا) نحن العرب لنا قيم وعادات وتقاليد ويجب ان تطبق…. لكن على جميع البشر بلا استثناء

  42. يا أمة خجلت من جهلها الامم !!!!! بتقلدوا الغرب بكل تصرفاتكم اليومية و هلق اجت عالبرمودا !!! راح تاكلو الزلمة بلا ملح!!!! شرع الله واضح عورة الرجل من الصرة حتى الركبة و الرجل احترم شرع الله … ما باقي الا تقولوله اركب الجمل و ركب الطيارة حرام !!!! عجبي كبروا عقولكن و فكروا بمنطق

  43. اسمح لي اقولك انك غلطان رغم تحفظي على ملابس الشباب الايام هذه لكن انك تخضع وتنصاع لكلام موظفي الخطوط فاسمح لي هذا ضعف منك انا اسافر في رحلات دولية وركبت خطوط غير السعودية الاجانب عاادي عندهم هالملابس وازيدك من الشعر بيت ( الله يكرمك ) شبشب يلبسون من ابو ريالين وفي الخطوط السعودية شفت نفس الشيء المشكلة انك تهاونت معهم وولا لو مسوي شكوى وفاضحهم رسمي كان افضل لك بدل انهم ينزلونك من الطيارة ويخلوك تلبس سروالك ( اسلوب التعامل كانهم يعاملون طفل ) .

  44. اخواني بارك الله فيكم الدين النصيحة وليس الدين الفضيحة ثانيا البرامودا محرم لا لكونه برمودا لكن بسبب التشبه بالكفار

  45. اولا للاخ كاتب الموضوع معليش الخطوط معاها حق ولكل مقام مقال!! وما راح ازيد على الكلام المكتوب… بس ابي اوضح مسأله لبعض الاشخاص… ماشاء الله على الناس اللي مسوين انفسهم متطورين بعدين عن التخلف!! ماشاء الله الشيطان شاطر في ذي الامور تعطون مبررات لافعالكم وتصرفاتكم…وان هذا تخلف وتحجر في التفكير للي يعارضكم!! بالله بدل ما تستحون على وجيهكم على ذا الكلام..قال تطور وحريه في اللبس قال!! اقول للي يتفلسفون من بنات وشباب وربي لو نسئلكم وش معنى الاحسان؟؟ وش معني (الصمد) ماتعرفون تردون بس فالحين في الفلسفه اللي مالها داعي نسأل الله العفو والعافيه ومضه: بالله يالمتطورين والمتفتحين والبعدين عن التحجر عطونا من انجازاتكم وتطوركم عشان نقتنع فيكم…؟؟ انجازات في التمسك في دينكم من صلاة صيام صدق وامانه علم شرعي حفظ قران بر بوالديكم و و و و ….!!!!!

  46. لا إله إلا الله ….. أقول بلا تنطع زايد في الدين …..ماسوا غلط الرجل ….وش فيها لابس برمودا …وخايفين على حريمكم ???!!إذا تفتنها سيقان مشعره !!!وش هالمرة اللي ما تستحي تبحلق في سيقان الرجل ….ستروا حريمكم عدل وخلوا الرجال بسلام ….تبون تزهقون الناس من دينهم؟؟؟؟؟؟؟؟؟!!!!!!!؟؟؟؟؟؟؟ الله يعينك أنت كالمستجير من الرمضاء بالنار…والصحابة كانو يكشفون الى الركب مافيها شئ … راجعوا دينكم بالاول …يعني حرام الاسبال وحرام التقصير يعني يتفصخ احسن وأشوف أحد يعلق بكلمة عليه إذا سواها ….إذا هذي ردودكم أجل شوي علينا غلاء الطماطم!!!…!!!

  47. لابس برمودا وتبيهم يطلعونك الطياره …. ومستغرب بعد ليش ردوك… الاخ عايش بفرنسا …. ياخي حتى المجمعات التجاريه تمنع الدخول بالبرمودا

  48. انا اشوف إنه حركة راااائعة جداً و أتمنى ان تزيد في مجتمعاتنا ثقافة الملابس القصير ة و المقطعة و الممزقة و الــ لو ويست و الكلام الفاضي هذا حتى ان الشخص يصلي و سرواله الداخلي في وجه من خلفه من المصلين ؟؟ الهذه الدرجة الإستخفاف بخالق العباد !! حركة رائعة و لو كنت مكان الموظف لفعلت لك نفس الشيء اخي و لن ادخلك الطائرة

  49. يارجال البس اللي يريحك مادامك دافع لهم فلوس ,, ان شاء الله لو تلبس شورت مالهم دخل فيك ( يمكن هم مقهورين انك ترقم الموظيفات ,, ومنعوك بعدها ) الاسواق مانعينها قلنا معليش يمكن عشانها ببلاش الدخول ,, بس يجي موظف السقاره ما تنطفي من فمه ويسوي فاهم هذي والله ابطت على خشمه ,, وبعدين برمودا ماقال (كلسيون) … ^.^

  50. ياخي الناس تلبس الاحرام في الطيارة وبطونهم وظهورهم وغير السيقان بعد ولا أحد قال تستروا اشتك ولا تخليهم

  51. من حقهم يمنعونك من طلوع الطائرة طالما انك تلبس غير محتشم, البرمودا تلبسه في البيت, مع الشباب, اما تصلي فيه أو تروح فيه مكان عام أو طائرة اسمحلي. وبعدين انت ليه محبكها كذا؟ كان غيرت البرمودا وسافرت

  52. بعد اعطر تحيه اخي الكريمقدرشاعرك لكن يجب ان تفرح لدينك وان يكونالله ورسوله احب اليك مما سواه وتذكر ان المعاصي تعرض عودا عودا فاذا سمحوا للقصير سيسمحون غدا للاقصر فلا تكون معول لهدم دينك وامتك بارك الله فيك وارزقني واياك الصراط المستقيم

  53. كنت بالمطار جاي من ………. ولا ذيك الحرمه اللي لابسه شورت فوق الركبه بشوي وفنيله علاق ولا احد قاله شي بس انت علشانك رجال البس بس الحريم فصخو عادي الله يخلف على الاداره اللي داخل المطار

  54. يا حبيبي وانا نفس الكلام .. داخل الطوارئ .. والي يدخل الطوارئ يعني حالة ضرورية وكان عندي ارتفاع درجة الحرارة .. بس منعني الأمن .. يقول لبسك هذا ممنوووووع .. بالله هذا موقف ..!!!!!!!! …….. وبعدين لو اني اجنبي صدقني راح يمشووني ولا يقولون شي .. نتمنى من الجهات المعنية الانتباه لمثل هذه الأمور ..

  55. حشى ..! شهالناس ..الرجال جاي يشكي حاله لكم انتو يالسعوديين وبدال ماتكونوا له عون صرتو له فرعون ,,ماخليتو كلمه ماقلتوها عنه , وكل هذا عشان شنو ؟ برمودا .., شفيها البرمودا عشان يتعطل سفر هالمسكين عشانها لا شر البلية مايضحك على بعض الردوود ,, اللي يقول خايف على زوجته واللي يقول حرام واللي يفتي على كيفه ..مهزله بصراحه ,أول نسمع انو البرمودا حرام , والله ماتنلام يحق لك تنقهر وتعصب على هالعقول الهمجية بديرتك ,, هذا برمودا وجذي ,, عيل شحال الرياضييين عندكم الي يلبسون شورت رياضي؟ والا حكمهم غير .., وفتواهم غير ماأقول الا الله يهدي هالعقول المتجرة والله يعينكم على بلواكم

  56. الحين انتم شابين على الرجال والرجال ماسوا شي غلط طيب حتى لو كان غلطان ( قلت لو ) المفروض تكون الفاضكم ارقى من كذا وبعدين هي جت على البرمودا اذا خوووفكم من الفتنه طيب والحريم اللي لابسه مخصر وطاقه اللثمه ليه ماتقولون لها دحدري من الطيارة واذا تسترتي ارجعي ؟؟ مع اني كنت اكره البرمودا الا اني حبيته بعد ماقريت ردود البعض اللي تدل على تخلف وصغر عقوولهم

  57. تصرف غــــريب يدل على تــــفاهة عقولهم ..اجل بالله يمنعووونك من السفر عشااان بــرمودا …والله انه عذر اقبح من ذنب … لبس ساتر الحمدلله ومااافيه اي شي … صدق من الفـــضاوهـ قاموا يطلعون مخـــالفات !!!! بعدين اللي يقولون انه يفتنا يالبنات ..من متى صارت السيقااان تفتن ..!!! بعدين الوحده اذا شافت شي يمكن يفتنها لاقدر اللـــه ياليــــت تغض بصرها افضل لها وتنقص شوي من لقافتها في سيـــــقان خلق الله !!!! وبعض الردود الله يهديهمـ ياليت تتبعون قول الرسول ( قل خيرا او اصمت ) .. اخونا ما ارسل الموضوع عشان تقعدون تشمتوون في سيقانه ..وبعدين اصابع يدك مو سوااا … ع العموووم كل يشوووف النــــاس بعين طبعه !!!

  58. طيب انا مطوع و مقصر ثوبي ومطلع جزء من سيقاني هل بيمنعوني بعد من الدخوول للطائرة ؟؟؟؟

  59. مع احترامي لكم جميعاً تبقى الخطوط الجويه العربية السعودية على خطاء لأنه لم تضع لإحة ضوابط للملابس والاخوه الي يقولون اهلنا وحريمنا خلك واثق في نفسك وفي اهلك وبين لهم الثقه وحرص ولا تخون بعدين لن اقول لو ان الذي كان في هذا الموقف اجنبي ولكن قريب او صديق للموظف لن ولم ومستحيل ان يطبق النظام المزعووووووم والبرمودا تقريباً إلى نصف الساق يعني تصح الصلاة فيه ما شاءالله بعيداً عن التشبيه ولكن بعض الاخوه (المدعين انهم ) الملتزمين يلبسون ثياب إلى نصف الساق والقلوب غلف سوداء ارجوووووو قبل الرد الإدراك بمعنى الرد لا الزج بالكلام على غير اساس

  60. انا ابعلق عن الي يقول ان الببرموده حرام طيب عطنى دليل ..ماشفنا اي دليل بس كلام فاضي وسب الرجال على القل رد وعلق بس لا تسب….وهذا من الحترام والي يقول ان البرموده حرام يفتينا….؟؟

  61. الزبدة هذا مهوب لبس مرجلة واللي يقولون هذا برمودا مو كلسيون اهي بدايتها برمودا وآخرها كلسيون وبعدين اللي يقولون وش فيكم انهديتو عالرجال وصرتو له فرعون اكيد بنصير كذا واكثر ماشفت وش كاتب كنهم حاكمين علية بالقصاص (ياي)وبعدين في الخارج جعله يتفصخ( ديرة مهيب ديرتك …. وانت واقف )لكن على هالارض ارض مهد النبي محمد صلى الله علية وسلم انضبط واعرف حدودك واللي قال عندنا حريم يلبسون عبايات مخصرة ومسوين فيها حركات انا اجزم ان هذولي الحريم لهم رجال اكيد يلبسون برمودا وانا ماازكي هالحريم ودك نفس الشي يمنعون من الطيارة وغيرها واللي قال عن لباس الاحرام ياخي من جد انت سفيه تقارن لبس احرام ببرمودا الرجال يحترم المكان اللي رايح له هذا واهو رايح للمطار لابس كذا شكلة فاهم غلط اجل اذا راح للنادي وش يلبس والا اذا انعزم عالهاواي وش ناوي يسوي واللي يقول البرمودا مو حرام انا اقول بغض النظر عن الدين لو بتروح تخطب بنت ناس تلبس برمودا ؟علشان اذا رجعت للبيت تلقا مقاس42 made in itali ملزقة في علباك لكن رح اخطب فلبينية جعلك تجي بدون لبس ماعندهم مشكلة لا ويقولون عنك هذا الاجودي علشان تدرون ان الجانب غير الخليجيين وبالاخص السعوديين ماعندهم مشكلة لا حيا ولا بعضة واللي يقول تخلف بصراحة البذور الصهيونية بدت تنيت ويعتنى بها وخاصة من قبل اللي يقولون تخلف ياعزيزي احنا في وقت الاستهانة فية واخذ الامور الدخيلة علينا ببساطة امر يجر بنا للهاوية التي يتمناها الغرب لمعلوميتكم اللباس او الزي السعودي من ثقافتنا واذا بدينا نتخلى عنة تبدا تزول ثقافتنا وانظر للتاريخ كيف يسيطر الغرب على الدول من احدى مداخلهم هي ثقافة وتراث هذة الدولة اجل بالله عليك قد مر عليك امريكي او اوربي يلبس الزي السعودي ويتخنطل بة في شوارعهم كان يلعنون والدية وانت مستكثر اللي سواه المطار فيك؟؟!!

  62. أخي العزيز هو مبالغ في انو يأجلون رحلتك بسبب البرمودا اللي انت لابسو بس أخي العزيز ما فيها شي لو اتأخرت كل طيارات العالم لأجل صلاة الجمعه وما عجبني صراحة تعليقك على هذه الحركه صراحة انو شي حلو انهم مهتمين بصلاتهم أخوي العزيز , وشكرا لك على كل شيء

  63. اتعجب من موضوعك يااخي الكريم الخطوط السعودية غير مدركه لهذا الشي صدقني لانك سعودي لازم تشوف كلمة ممنووع .. يارجال وسع صدرك انت في دوله كل شي فيها ممنووع تحمل تحمل هذي الدنيا شي يقهر … بس لوك مناديني كان مشيتك بالواسطه خخخخخخخخخخخخخخ تعيش وتاكل غيرهاا ………………….. بس مالهم حق صراحه

  64. ودي اني كنت معك عشان اشوف التخلف عشان برمودا يمنعونك من السفر الصراحه شي غريب المفروض يوفرون الراحه للمسافر مو يبهذلونه مثل ماصار معك ونصيحه مني لاتقعد تفكر بالموضوع لانه مايستاهل انك تفكر فيه وانساه

  65. اقول اللي رادين ويقولون سيقانك وماسيقانك قسم بالله تخلف اصلا البلد طغى عليهال التخلف والدليل شف الردود اللي يقول بتحرجني وانت مطلع سيقانك لزوجتي اقووووووووول انت واياه صدق تخلف يتناثر من كثره اهم شي انه بالشرع مو عوره للرجل خلاص كل واحد يصك حلقه اما بالنسبه للخطوط شتقول ياخوي فاهمين الدين غلط =)

  66. والله العالم وصلوو القمر وحنا مكانك سرر انا اشووووف انظمتنا عقيمة وسقيمة وفي قمة من التخلف,, واللي اشوووفه ان اغلب ردود الاخوان مؤيده للموضوع ,, مع احترامي لهم ولمثل هالنظام اللي يؤيدونه,, هم ونظامهم بيرجعونا ورا وماراح نتقدم للامام ابداً,, وبعدين الرجال لابس لبس تحت الركبة يعني ساتر للعوره … وبعدين وش الفرق بين اللي لابس ثوب ومطلع سيقانه واللي لابس برمودا ومطلع سيقانه ولا الفتنه ماتجي الا من البرمودا لاحول ولاقوة الا بالله حسبي الله ونعم الوكيل

  67. أنا ما اشوف انك غلطت بشي .. يعني الرجال لابس من السره الى الركبه !! ما خالف شرع الله .. اللي يقول يبيلك ضرب .. واللي تقول اناث بشوارب .. واللي انت مستهدف من الصهاينه .. كل هذا علشان برمودا بعدين الأخ راجع من برا .. طبيعي اللي يسافر يحب يغيير .. !! واللي يعتقدون( وانا اخالفهم الرأي) ان البرمودا فيها تشبه بالصهاينه وفقدان هويه ومخالفه عرف .. الخ اقولهم (( ادع الى سبيل ربك بالحكمة والموعظة الحسنة )) عموما .. أنا اشوف انك ما غلطت بشي .. واللي صار لك ظلم .. واستقعاد !! نصيحتي لك .. ارجع ع الاماراتيه مره ثانيه .. اضمن لكرامتك وحقوقك .. والله يهدي الجميع

  68. اولا اعتبر البرممودا لبس ساتر تحت الركبه وقومتوالدنيا واقعدتوها عشان برمودا..ثانيا لا يوجد قانون يمنع لبس الغير محتشم ولا لافتات تمنع ذلك .. اخي الكريم الخطوط السعوديه خطوط ماعندها سالفه

  69. حبيبي يا راعي الموضوع البس اللي تبي .. خذ راحتك سو اللي تبي ما عليك من احد .. دام انه حلال و ما يطلع عن المألوف .. انا اخوياي مطاووووعه و ما نطلع الا برمودات .. والله يا ملحهم برموده و لحيه .. لا حرام ولا شي التعلقيات كلها كانت متوقعه الا تعليق واحد اللي هو من الاخت الكويسه(((( موضي )))) يعني ما ادري من ذا الدرج اللي بيروح يخطب و هو لابس برموده .. ما ادري وش تحسين فيه وقتها و انتي تكتبين ها الحكي .. ان كانك تقولين لبس امريكان و اتحداهم يلبسون ثوب زينا … نفس الكلام ينطبق عليك من ناحيه الجينز .. مثل ما انتي عارفه الجينز لبس الغرب مو من عاداتنا و تقاليدتنا .. يعني المفروض تلبسين الجلابيات اللي عند جدتك و بس.. *****لا تلبسين جينز و انا مستعد ما البس برموده ***** البسي جلابيه كل يوم و انا مستعد البس ثوب كل يوم انا من فتره دخلت المرسى مع اهلي و الجو كان اكثر من حااااااااار .. كنت لابس ( كت ) و عند الباب منعوني من الدخول بحجه الكت و انه جا بيان من الاماره انه ممنوع لبس البرموده او الكت داخل المنتزهات و الاساوق و الاماكن العائليه و الدوائر الحكوميه … دخلت على المدير قلت له وش تبيني البس جاكيت ؟؟؟ و نفس الكلام قاله لي و انا وياه اخذ و عطا و حب خشوم من بعيد بس ما حولك احد .. انا ما ااااادري ليه التطبيق فقط على العيال .. يعني ما شا ءالله لا طلعنا الكراعين صرنا فتنه للبنات … و البنات عادي يلبسون المخصر و الظيق ؟؟ يعني صرنا حنا الفتنه الحالنا ؟؟؟ ملحوظه : الحكومه ارسلت آلاف الآف الطلاب للبعثات امريكا .. بريطانيا .. استراليا نسبه كبيره منهم عقولهم اختلفت .. طريقه تفكيرهم اختلفت .. لبسهم اختلف .. يعني متوقعين ان ذولي اذا جو بيلبسون ثوب اذا رجعو ؟؟؟؟ قبل السفر يجيك حنيييييييس شماغه غلى كتفه . يسحب الزبيريات . ما كد شعره من العيد حده السويدي و فجأه يروح بعثه لفلوريدا … وش تتوقعون منه اذا رجع ؟؟ و الله ما درو عن العادات و التقاليد —————— المهم ما ابي اطلع من الموضوع كثيييييييير .. يا راعي الموضوع عش حياتك و ما عليك من احد و البس اللي تبي و خل شعارك .. ( ابي البس برمودااااااااا ) D:

  70. هل نحن نعيش في القرن 21 !! ام نعيش ما قبل الميلاد !! عندما أقرا بعض الردود أشك في أننا شعب متحضر !! صورة مع التحية لموضي و غيرها من التفاهات صورة مت التحية لمن ذكر كلمة الصهاينة واقحمها بالموضوع :d لماذا دائما نهول الأمور اخي كاتب الموضوع لا أحسدك في الموقف الذي حصل معاك ولكن ما يزيدك حزنا بعض الردود dont b sad واشكر الأخوه الذين ردو بشكل واقعي وحضاري في امان الله

  71. ابشركم ترا الثوب موب ركن من اركان الاسلام ولا هو لبس الاسلام الشرعي وتراكم مانزلتو من الله بخبر يذا الشعب لا انتم ولا ثوبكم وبعدين يومكم تقولون نقابل ربي ببرمودا ,,, ربي مااوجب لبس الثوب حقكم!!

  72. اول شيء لازم تعرفون انه ماسوا شيء حرام الأصل في اللبس الاباحة طالما انه يستر العوره وهذي قاعده فقهيه معروفه ودرسناها في المدارس ولازم نعرف انه خالف العرف والتقاليد نظرا انه اي احد يلبس فير الزي السعودي مشمول لكن … انا اعتقد الحريه الشخصيه هي اك تعمل ماتريد ضمن حدود نفسك بدون ماتجرح دينك او تؤذي الاخرين يعني لبست برمودا انت حر قعدت تغازل لا انت منت حر .. لانك اذيت الاخرين لبست شورت وماغزلت انت غلطان لانك خالفت الدين اما من ناحية الرجوله والزي اعتقد انه الانسان هو يحدد رجولته مو لبسه ممكن الاخ اعلاه لابسبرمودا بس مو ضيق زي حق البنات… ليه لا ؟؟؟!! الرجوله ماتقاس بالزي الرسمي ؟؟ واذا بتقاس بهذا المنطق يعني الي مايلبس شماغ مو رجال ؟ في النهاية اكرر واقول الحريه هي ان تحترم حريات الاخرين

  73. الى متى الاستهزاء بآراء الغير وافكارهم؟؟ لازم نحترم بعض ونبتعد عن اسلوب الاستحقار والسخرية؟؟\ ياناس الرسول صلى الله عليه وسلم كان يختلف مع غيره ..لكن باسلوب حسن ومحبب للنفس وكان يدعو غيره من الامم بأفضل الاساليب دون ان يستحقرهم او يقلل من ديانتهم وثقافتهم فليكن رسول الله قدوتنا في احترام الناس…

  74. والله ياأخوي أنت منعوك بسبب برمودا.. أنا خلوني أسافر بدون محرم .. ومحرمي خلوه على الرحلة الثانية لأنه جاء عقبي بدقايق .. ولا هم إللي دخلوه الطائرة ولا هم إللي طلعوني .. والله ياذيك الرحلة بكيت دم من الخوف.. مانقول إلا حسبي الله عليهم .. لا وفوق هذا مد يده علي .. ودفني بيده الله يشلها عشان يرجعني للطائرة لما رفضت أجلس.. ومحرمي برى يتهاوش معهم .. المشكلة الرحلة ماهيب ساعة وإلا ساعتين .. والرحلة إللي عقبها بينهم فرق..ساعات .. يعني أنا وصلت قبله وش تلقفني إلا الضياع والخوف.. يعني الدين عندهم في عدم التعري مع العلم أن لبسك محتشم … ولم يظهر عورتك .. اما السفر بدون محرم فهمو جائز عندهم .. مانقول إلا الله المستعان .. وإن شاء الله مأجورين على هالبلاوي إللي أبتلينا فيها .. المشكلة كل شي بفلوسنا ويهينونا ..

  75. موضي فل تقولي خيرا اوتصمتي وربي كلامك يدل علا عقليتك المتحجره طلعتي مثل والا ماني قايل تراه برمودا برمودا برمودا يعني تحت الركبه شكلكم ماتعرفونه تحسبونه كلسون برمودا والي لابسه رجال يعني مغطي عورته اقول قسم بالله ابتعب اذا جيت اناقش ناس مثل عقلياتكم احترامي اخوي صاحب الموضوع

  76. اممم كان لفيت فوطه على سيقانك وقلت لهم انك لابس وزره ..خخخخخخخخخ صراحه انت صريح وانا بكون معك صريح ..أعجبني تصرفهم معك

  77. معجبك مطلع عصاقيلك قدااام الرجاااااااال موووووووعيـــــــب ماتستحي على وجهك ليغير الناس تقولك ماتعرف انت إلا بشرط انك تحلق شعر سيقانك وتخليهن زي سيقان نانسي هذيك الساعة يكون ان معك حق انهم مايركبونك .. ^_^

  78. أقول حبيبنا زعيم .. أتمنى لو معاك جواز زي الجواز اللي معاي لونه ( كحلي ) كان قالو لك تفضل ولو أنت حاجز سياحي قالوا ترا فيه أفق شاغر إذا حاب نحولك مجاناً .. عموماً : السؤال اللي جا في بالي قبل لا أقرى ردود الأخوان والأخوات .. وهو : الحين ليه اللي في المطار قبل لا تدخل الطائرة نفسها .. اللي يتأكد من كرت صعود الطائرة .. ما قال لك لحظة تراهم بيمنعونك أو النظام ما يسمح باللبس هذا .. ؟! يعني يتعاونون معاك قبل لا تصعد الطائرة .. يالله معليش : أنا راكب الطائرة ببرمودا أبيض وشيرت كت أبيض بعد يحبه قلبك ونص الساق << طيران الاتحاد خخخخ وتسدح وتبطح وأفلام ( سبع ساعات ) مبسوووط ، مع زوجتي ولا حولك أحد .. كنت أقصد بالجواز الكحلي ) وأنا عارف إن الرحلة داخلية لكن ممكن يفيدك لأنه كان معاك وأنت جاي من دبي 🙂 أتمنى لك التوفيق أخوي والله يستر عليك .. ولا يهمّك اللي يقول لا تلبس حرام حلال ، لأنه ما فيه شي شرعاً .. My Self

  79. ذكرتني بحلقة طاش ما طاش ……….. يوم الممثل الطويان كان عالم مخترع ويقول : للموظف اللي تطنز بشراباته اللي مختلفات بالألوان فقال ساعتها : مشكلتكم تناظرون للشخص من تحت أو لملابسه ( ماني متذكر), والغرب يناظرون للرأس ويناظرون لوش في هالرأس ……. هههههههههههههههههه ….. ياأخي أنا متضايق من لبس الشماغ والثوب بالدوام ………. أتمنا من كل قلبي … يجي يوم يسمحون للموظفين بلبس ماهو محتشم ومراعي للذوق العام ….. يعني بدلات رسمية وبناطيل وأي شئ رسمي … والله إني لابس تحت ثوبي بنطلون وتي شيرت ( أقصد سروال أبيض طويل وفنيلة بيضاء تحت الثوب) فليش مايريحوننا من هذي البهذلة ويسمحون لنا على الأقل باللبس الإسلامي الصحيح وهو مثل لبس الباكستانية فتراه أريح وأفضل .

  80. أولا موظف الخطوط لم يرتكب أي خطأ في طلبه منك اللبس وذلك لكونه يطبق النظام فهو معروف عند كل الناس حتى بمراجعتك للادارات الحكومية يفترض بك لبس ملابس لائقة اما كونك تجهل الانظمة فهذا ذنبك انت وليس الموظف

  81. ياعزيزي المسأله في البدايه كانت برمودا وللأسف وصلت إلى خوارم المروؤه والى معنى كلمةالصمدوالى عقوق الوالدين والى التشبه بالصهيانه<<<آخر مره سمعتها من 10 سنين وللأسف. نرجع لل برمودا عزيزي مدامك صليت فيه ولاخالف الشرع فعلى الجميع ان يسكت بعد الشرع فلاتعجب عزيزي الكاتب او القارئ من بعض العقليات الموجوده جرح مشاعر الغير مايجي في 5 او 10 سم الى القدم ماتكلمنا عن فوق الركبه نتكلم عن حدود المعقول بعدين مشاعر الغير تاتي في تصرفات في افعال في كلام همجي سوقي ماهو في برمودا الا ياحبيبي انت ماسويت اي شي غلط وارجع اقول مدام انك صليت فعلى الجميع السكوت وآسف للإطاله

  82. شفيكم على الرجال تراه ماسوى جريمه !! واظن لبس البرمودا لاهو حرام ولا عيب وأكبر دليل (( الرسول كان يلبس إيزار قصير )) وتبون الصراحه (( سواتهم تقهر وردودكم تذبح )) صح اهل العقول بنعمـــه مع احترامي للــ بعض

  83. انا اقول مو من حقهم يمنعونك بس المفروض انت يكون عندك ذوق وتعرف ان هذي الملابس ماتناسب الاماكن العامة يعني حلاتك كاشخ بثوب وشماغ >>يازين الثوب والشماغ تراها تحلي كثييير

  84. أسمحلي على الصراحه والله أنك عاااااااااااااااار أنت ومن يؤيدك على السعوديه أجل وشفيها البرموده ماعندك عزه ببلدك وديرتك ليه ما تلبس ثوب وإذا على الراحه على الأقل ألبس بنطلون طويل لا زم تطلع عصاقيلك أستح على وجهك وأستح من ربك وهذااااااا من خواااااااااااااااارم المروءه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

منعوني من السفر بسبب ،،، برمودا

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول