مـجرد دمعه


بسـم الله الرحمـن الرحيـم

ها أنا اكمـل مشواري بمشاهداتـي ..
واليـوم سـوف اكتفـي بـ(ـدمعه) واحده فقط .. سوف اسرد لكـم مشاهده تحدث في الوقت الحالي ..
هذه المشاهدهـ .. شبهتها بالدمعه حين تخرج من العين ..
تخبرنا عن سبب خروجها حتى ينتهي بها المطاف ..
واليوم سوف إخبركم عن ماتحتويه هذه الدمعه من بدايـتها الى نهايـتها ..


اعلان





لكـن قبـل البدايـه .. اسمحوا لـي قليلآ بكتابة رسالـه ..
رسـاله فـيها شكـر وتقديـر لمـن وضع الثناء على موضوعي السابق (مشاهد واقعيه ) ..
ولمـن وضع بعض النقاط على الحروف ..
وبالنسـبه للألوان .. تراها مجرد ( سوالف ) لكن الي حبيت أوصله
إننا نكون روح وحدهـ فقط .. ولا اقصد الإهانه لأحد ولا اني اغتاب احد ..
وإنما الاعمال بالنيات ..
فجزيـل الشكـر لـكم .. فهذا يعني الكثـير بالنسـبةِ لـي ..
والله يجمعنا جميعآ تحت رحمتـه يارب ..

بداية الدمعه ..
تشابه القصص

قصتيـن وجدت وجه الشـبه بينهم ..
فالإولى حدثت في الماضي .. اما الثانيـه ففي هذا الوقـت الحالي ..

القصه الاولى
إبراهيم عليـه السلام .. مع الأصنام ..

أما ماسوف اذكـرهـ .. سوف اذكرهـ بااختصار شديد ..
إن إبراهيم عليـه السلام لما كسـر الأصنام .. اقبلوا عليه قومه يتساءلون عن سبب تكسيره للأصنام ..
فرد عليـهم بقول الله تعالى {قَالَ بَلْ فَعَلَهُ كَبِيرُهُمْ هَذَا فَاسْأَلُوهُمْ إِن كَانُوا يَنطِقُونَ}
فعادوا إلى أنفسهم فيما بينهم بالملامةِ لأنهم تركوها من غيرٍ حافظ لها ولا حارس عندها، ثم عادوا فقالوا لإبراهيمَ عليه السلام ما أخبر اللهُ تعالى :{ثُمَّ نُكِسُوا عَلَى رُؤُوسِهِمْ لَقَدْ عَلِمْتَ مَا هَؤُلاء يَنطِقُونَ} أي لقد علمت يا إبراهيم أن هذه الأصنام التي نعبدها لا تنطق فكيف تطلبُ منا أن نسأله
فا أقروا هم من أنفسهم إن هذه الأصنام لاتنطق .. فوجد إبراهيم عليه السلام الحجه عليهم .. وقال لهم بقول الله تعالى :{قَالَ أَفَتَعْبُدُونَ مِن دُونِاللهِ مَا لا يَنفَعُكُمْ شَيْئًا وَلا يَضُرُّكُمْ (66) أُفٍّ لَّكُمْ وَلِمَا تَعْبُدُونَ مِن دُونِ اللهِ أَفَلا تَعْقِلُونَ (67)}

لكن رجعوا وعبدوا الأصنام بعد الحجه القويه إن الأصنام لا تفيد ولا تضر وكان عذرهم إن أبائهم الأولين كانوا يعبدون الأصنام ..
وهذا عذر أقبح من ذنب ..

أما القصه الثانيه ..
واقعه بمجتمعنا الآن .. وكان أخرها ( خيبتي ياخيبتي ) ..

سؤال فقط يحتاج للاجابه الآن .. إلى متى ونحن نعيد الكرهـ ؟
هل تعتقدون إن هذي أول لعبه وأول نصب واحتيال حدث بمثل هذه المسابقات ؟
وهل تعتقدون أننا انتهينا على كذا ؟
لا والله من زمن ونحن نقع تحت هذه الأكاذيب لكن هذه كانت قويـه وواضحه ..
لكن نفعل مايفعله قوم إبراهيم عليه الصلاة والسلام نعيد الكرهـ بعد الادله الواضحه ..
ويكون عذرنا ؟؟ كالتالي ..
(( والله ياخي المسابقه هذه فيه فلان الفلاني ومعهم الأمير الفلاني صعبه يصير فيها لعب ))
ول
(( أنا يكفيني الى أشجعه مايهمني وش يصير خلف الكواليس))
صح عليك .. هم أصلا يبون كذا .. هم ما أحسنوا الاختيار علشان شخص معين ..
بل مايجنيه هالشخص من مشاهدين ومعجبين .. سراب يوحي بالراحه والاطمئنان ..
وهو بالأصح لجني المادهـ الى أنت يالشخص تتعب وتطلع ( روحك ) علشان تجيبها ..
وهذولا بالساهـل .. (( صوت لشاعرك المفضل ))
صوت وصوت .. وبالأخير ؟
هاهوا شاعـر المليون << مثل مالقب ..
يرجع للسعوديـه ويستبدل مناداته للناقـه بالخيـبه ..
وأنا لا أتكلم عن الشخص عينـه بالعكـس .. يكـفي رجع لديارهـ وأهله سالم .. وهذا أهم من انه يحمل البيرق ..
وأقول انه يستحق البيـرق .. لكن هذي كلها لعبه يالبيرق ..

لكن أنا أتكلم عن الصورهـ العامه .. الى تايهين فيه الناس ..
شاعر المليون .. ستار أكاديمي .. سوبر ستار .. والـخ من مضيعة المال ..
لمتى ونحن نتبع هالتفاهات

والغريـبه إنكم زعلانيـن .. ليـه الدنمارك يتعدون على خير البريـه ..!!
ليه مايتعدون وهم شايفين بعينهم الغزو الفكـري علينا .؟!
شايفين الي لهينا فيه .. السبب الي يخلينا بهالضعف ..
إتباع شهواتنا .. وإرضاء النفس الطماعه

أنا فقط ودي اعرف اجابـه لسؤال واحد ..
يالى ترسل وتأيد مثل هالبرامج .. والى تخسر بـ3 أو 7 ريال أو مقدار مالي معين ..
حرام لو تغير وجهتك .. وترسل هالمال لنصرة النبي ؟؟
أو تعطيهن فقير أو فقيـره تشوفه تطلب المعونه منك وأنت اتصدد وتروح ترسلها للي مايخاف الله ؟؟
ولا اذا ماودك إتعب نفسك ارسل رساله فارغه للرقم هذا ( 5060 ) قيمة الرسالـه 10 ريال فقط ..
هذي لعلاج مرضى الفشل الكلوي تحيي أمالهم ..
فك أزمة شخص يفك الله عنك أزمـه بالمستقبل ..
وترا هذا مالك وأنت حـر فيـه .. لكن تذكر قول الرسول صلى الله عليه وسلم..
(( لاتزول قدما عبد يوم القيامة حتى يُسأل عن أربع: عنعُمُره فيما أفناه, وعن شبابِه فيما أبلاه, وعن ماله من أين اكتسبه وفيم أنفقه, وعن علمه ماذا عمل به))

فماهي إجابتك ؟

وأخشى أن تكون إجابتك مثل إجابة ( سفـيه ) ما أقول الا الله يهديه ويرجعه لأمه سالم ..
بعد ماطلعت نتيجة شاعر المليون الكل قعد يسب ويشتم .. وكان فيه واحد كان يخـص مقدمة البرنامج
ووصل فيه التعدي إنه بدا ينتهك عرض البنت ..
فقلت له .. ياخي أنا مادري عن البنت ولا ازكي عنه ..
لكن ماتخاف بكره تسأل على الى قلته .. فقالي الاجابه الى أنا خايف تكون إجابتنا بكره ..
خلهم يسألونن << لحظوا عمم الاجابه .. وهو فقط ربي الى راح يسأله ..
أتمنى إنها ماكانت مقصوده كلمته ..
والله يعينه لو كان خوفه من ربي زال .. وهذا واقع للأسف عند البعض ..


نهاية الدمعه ..
وأعلم إني أطلت عليـكم ..
أبيكم تستفيدون من الحكايه هذي كله ..

النقطه الأولى ..
إن الواحد ينبـه عقله ..
وما ينخدع بالمستقبل بمثل هالامور ..
وهذي لراحة عقله ..

النقطه الثانيه ..
مابيكم تصيرون مثل ( مخبات ) مشقوق الى يدخل فيه يطيح على طول منه ..
أبيكم تصيرون مثل مخبات الـ(ـصرم) .. الريال تجيه حاله نفسيه بالمخبات ..
وما يطلع إلا فيه فايدهـ ترضي الله ثم ترضي قناعته هو نفسه يالانسان ..
وترا العيب مو الى يمسك فلوسه ..
العيب بالى يبلش بدراهمه ويوحي للناس انه راعي تبذير ..

والنقطه الثالثه ..
التعصب القبلي الى صار بوقت البرنامج وبعد البرنامج أتمنى الكل ينساهـ ..
لقول الرسول صلى الله وعليه وسلم ..
(( لا فرق بيت عربي أو أعجمي إلا بالتقوى ))
فمن سلبيات هالبرنامج .. إنه أحيى موال قديم كان يتداول عند الناس من أيام الجاهليه ..
ومازال فيـه لكن بدئت التعصبات تقل .. لكن بمثل هالبرامج تعيدها من جديد ..
فكم مرهـ ومرهـ سمعنا شاعر ينادي قبيلته الفلانيـه ..
وأنا ما اعترض انك ماتفتخر .. إفتخر .. لكن لا يصل الأمر إلى الغرور والتكبر .. والتمييز بين الاخرين ..
فقد قال الله تعالى:
{سَأَصْرِفُ عَنْ آيَاتِيَ الَّذِينَ يَتَكَبَّرُونَ فِي الْأَرْضِ بِغَيْرِ الْحَقّ}

وهذي قصه تصور التعصب الى حاصل هالايام ..
سمعت عن بنت تعارض التعصب الى حاصل بقبيلتـه ..
إن ابوها كان يشتري بطاقات المسبقة الدفع ويوزعها على اولاده وبناته ..
وكان يجبرهم على التصويت لقبيلتهم .. وكانت البنت تعارض ابوها ..
وكانت توعيـه وتقـوله ان النوعيه من هالبرامج تسرقنا بدل ماتنفعنا ..
لكن الاب الله يهديـه .. اذن من طين واذن من عجين .. ( وأنا اقول اذن من هبال واذن من نقص العقل )
يعني يالاب يالعاقل يالى نثرت دراهمك على هالبرامج الى لا فادتك وضرتك خساير ..
بس حبكة براسك ولد قبيلتكم .. لو مجمعهن وطالعن بالعيال تعشيهم بمطعم ومفرحهم ومرضي ام عيالك موب احسنلك ؟
شف الحين ولد قبيلك .. مكبرن المخده وانت ( منلطع ) تحت الشمس ادور فلوس الحليب للولد ..
وانا ماقول لاتفزع ولاتضرب بالشهامه .. لكن ياخي دراهمك ذولي عطهن احد اقاربك ..
الي تشوفه ويشوفك .. منها تضمن إنك أفدته ومنها تقرب المحبه بينكم ..
مو واحد لا تعرف ولا يعرفك بـس شفت اسم عائلته .. قمت يادافع البلا مطيرن اباليسك ومصفط هالبطاقات ..
لو العبهن بلوت كفن .. الله يصلحك بس .. ويهدي هالنوعيات الى رشده ..
حتى لو ماعليك قاصـر .. ومغنيك الله .. ترا هالشـي مايرضي الله ..

النقطه الرابعه ..
انتبهوا .. ماتلفظه ألسنتكم من قول ..
وتذكر ان لسانك راح ياقف بين امرين .. يايشهد معك او ضدك ..


وهذي احصائيه طلعتها (( الاتصالات )).. فقط علشان تعرفون إن الدراهم رايحتن ( دردبيس )

>> الاتصالات أكدت زيادة التصويت للفراعنة 40% <<
وهذي بجريدة الرياض الصفحه الاخيـره ليوم الثلاثاء الماضي ..

40% .. بس ابي 2% بشري جيب براسي هههههههههههه
ادعولي بس إني اشريه وبعطيكم دوره
إلا الحريم مابي تعلقه بأثله وتجي تقولي مادريت P:

إلى اللقاء في لقاء أفضل ..


تعليقات 3

  1. فديتك وفديت يمينك ورأسك وبعد والله إنك تستاهل حبة رأس على هالموضوع وياليت ثلاثةأرباع السعوديه كلها أنت عاد ماني بصاير طماع خليت ربع بس أسال الله العظيم رب العرش الكريم أن يوفقك ويسهل أمورك وتشتري الجيب اللي براسك ومتنازل لك عن الدوره تحيآتي /

  2. مشكووووور اخوي وربي كلامك على الوتر الحساس,,لكن وينها العقول الواعيهـ ومعروفه هالبرامج اللي مثل ذي وشاكلتها الهدف مادي بحت ,,,

  3. الناس بحاجه الى مواضيع توعويه مثل هالموضع …لان اللي يصوت الى هذه البرامج وشاكلتها هم ناس جهال مضحوك عليهم بالدعايات ..والمستفيد الوحيد هي المحطه اللي تبث هذه البرامج والاتصالات .. الله يهدي الجميع ويحافظ على قريشاته ….في هالزمن القرش نادر ….

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

مـجرد دمعه

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول