مبروك في بيتنا عاطل



/

.
فهد: صباح الخير ياوجه الخير.. يا أحلى أم في هالدنيا..
أم فهد: أي صباح وأنا أمك.. الساعة 10, مابقى شي ع الظهر!!..
فهد: ههههه الله أكبر ياللي واقف شغل العالم لما أصحى من النوم؟
أم فهد: لا ياولدي, بس إلى متى وأنت جالس في البيت؟؟ واللي يجينا من الضمان الاجتماعي معد يكفينا؟ مانلحق أجار البيت ولا مصاريف خواتك ولا حتى الأكل والشرب!!
فهد: طيب ومكافأة أختي الجامعية وينها؟
أم فهد: أي مكافأة بس, الله يرحم الحال تروح مابين كتب وتصوير ومايبقى لها شي مسكينه, نبيك تصير رجال وسند نعتمد عليك..
فهد: يايمه قولي لي أي شي أسويه وماسويته..!!
أم فهد: رح دوّر أي وظيفة في هالوزارات والشركات وكل مكان..
فهد: ماخليت مكان مارحت له, حتى المطاعم يقولون هات واسطة..
أم فهد: لاحول ولا قوة إلا بالله, ربّك الرزاق رح وأطلب رزقك..
فهد: ان شاء الله ياميمتي.. ألحين بروح وأمري لله,,
أم فهد: طيب لاتنسى تجيب معك كيس رز وأنت راجع..
فهد: طيب مامعتس 500ريال؟
أم فهد: لو معي 10ريال شريت بها شي ياكلونه خواتك الصبح.. معد بقى شي ياولدي
فهد: خلاص ماعليتس أنا بتصرف..
أم فهد: الله يعين..
فهد: آمين يايمه.. ألحين بلبس الثوب وتوابعه.. لأنهم بيغثوني ويقولون وين الشماغ والعقال والطاقية والكبك والسبحة.. لازم الواحد يلبس الزي السعودي عشان يصدقون أنه سعودي صدق إذا جاء يقدم ع الوظيفة, ومابي يكون لهم عذر!! دعواتس بس يايمه..
أم فهد: الله يوفقك ياولدي ويفتحها بوجهك..

.
.
.
في وزارة سعوديكو:
فهد: السلام عليكم.. يا.. يا.. يادكتور ناصر..
د.ناصر: وعليكم السلام تفضل حياك..
فهد: كيف الحال ان شاء الله بخير؟
د.ناصر: الحمدلله طيب.. شخبارك أنت؟
فهد: الله يسلمك, ماشي الحال..
د.ناصر: آمر أخوي وش بغيت؟
فهد: بغيت أستفسر الله يعافيك عن الوظايف.. أبي أتوظف عندكم..
د.ناصر: ومن قال لك أن عندنا وظايف شاغره؟
فهد: عندي الشهادات اللي تبغون.. خريج بكالوريوس من جامعة الإمام ومعدلي عالي ومعي شهادات دورات في الحاسب والانجليزي وسيرة ذاتيه مليانه إنجازات..
د.ناصر: والله كان ودي أساعدك.. بس مثل ماقلت لك ماأقدر أسوي شي..
فهد: طيب هذي خامس وزارة أروح لها.. وأنا سعودي.. ومؤهل لأي وظيفة يشتغل فيها أجنبي.. وأنا أحق منه فيها..
د.ناصر: معليش ودي أكمل النقاش معك بس عندي اجتماع مهم ألحين, لكن عندي سؤال واحد فقط..
فهد: آسف عطلتك عن شغلك طال عمرك.. بس وشو سؤالك؟؟
د.ناصر: تعرف أحد قوي؟؟
فهد: شلون يعني قوي؟؟ أعرف سوبر مان وجاكي شان..
د.ناصر: هههه لا ياخي.. قرّب أذنك شوي.. تعرف مسؤول هنا فالوزارة.. أو (طويل عمر) من برّا الوزارة؟
فهد: والله لو أعرف ماجلست سنه ونص من باب مدير لباب ثاني.. أترجاهم بأي وظيفة لو صبّاب شاهي..
د.ناصر: آسف أجل.. مقدر أسوي لك شي.. يالله بعد إذنك عندي شغل.. وسكرّ الباب معك لو سمحت..
فهد: إن شاء الله يادكتور ناصر.. شكراً لوقتك.. السلام عليكم..
د.ناصر: وعليكم….!!

.
.
.
في شركة أجانبكو!!
فهد: السلام عليكم
أشرف: وعليكم السلام, تؤمر بأيه حضرتك؟
فهد: أبي أقابل المدير؟
أشرف: نؤول لُه مين؟
فهد: قل له مواطن يدور وظيفة..
أشرف: آه هوّه في الحئيئه المودير موش هنا.. حيرقع بعد ساعتين..
فهد: بس هذي ثالث مره أجي هنا وتقولون لي المدير طالع.. وأنتظر لنهاية الدوام وماشوفه!!
أشرف: آمممم بص يبني.. نصيحه ليك.. ماترقعشي هنا تاني خالص.. موش حتحصل اللي أنتا عاوزوه..
فهد: ليش يعني؟؟ معي شهادة أحسن من شهادتك, وأنا لي الأفضلية أني أتوظف مكانك لأني سعودي..
أشرف: هنا الموشكلة حضرتك.. أنك سعودي..
فهد: يعني أيش؟؟ مافهمت!!
أشرف: ولا عومرك حتفهم.. مومكن تورّيني عرض أكتافك؟
فهد: حسبي الله ونعم الوكيل.. لاحول ولا قوة الا بالله,,

.
.
.
عند بسطة خضار:
فهد: صبّحه بالخير..
مشبب: صبّحه بالنور والسرور.. ياهلا ياهلا..
فهد: هلا فيك والله..
مشبب: هاه طماط ولا خيار, خذ لك جح مع بقدونس وأعطيك نعناع هديه.. ولا أقول خذ جرجير ونعطيك تمر برحي..
فهد: لا يالغالي فاهمني غلط.. أنا ماجيت أشتري..
مشبب: أجل وش عندك؟؟
فهد: أنا أبي وظيفة الله يسلمك.. هنا عندك في البسطة.. وبشتغل اللي تبي..
مشبب: هههه شايف مكتوب على جبهتي غازي القصيبي؟؟ ولا مكتوب على الطاولة وزارة العمل!!
فهد: لا موب قصدي كذا ياخي.. بس كل مارحت وظيفة قالوا هات واسطة ولا مافيه وظيفة شاغرة..
مشبب: طيب تعال ياولدي.. بوظفك فالبسطة شهر تحت التجربة.. وبعدين نشوف..
فهد: طيب موافق.. بس كم بتعطيني راتب؟
مشبب: بعطيك اللي يرضيك وزود..
فهد: طيب أنا جاهز.. لو تبي من ألحين أبدأ بديت..
مشبب: لا ياولدي.. من بكرا بعد صلاة الفجر ان شاء الله تكون عند سوق الخضار اللي في حي سلطانة.. ودبرّ لك ددسن..
فهد: أبششششششر من بعد الصلاة وانا هناك.. وعندي الددسن حق الوالد موقف من سنه.. بجي أشخّص به بكره.. ان شاء الله..

.
.
.
في البيت:
فهد: يممممه يمااااااااااااااااه..
أم فهد: خير خير وش فيه روعتني؟؟
فهد: أبشركم لقيت وظيفه الحمدلله.. وببدأ بكرا الدوام..
دانه: الحمدلله ياخوي الله يبشرك بالخيييير.. كولولولولولييييش..
أم فهد: ماشاء الله تبارك الله.. بشر وين فأي شركة أو أي وزارة؟؟
فهد: لا لا يايمه.. موب شركه ولا وزارة..
أم فهد: هاه اجل وين؟؟
فهد: بسطة خضار..
روان: وشووووووو!! أخوي أنا الأستاذ فهد يشتغل في بسطة خضاااااار!!
أم فهد: ايه بسطة خضار.. أهم شي لقيت وظيفة وبس..
نوره: بس أنت معك شهادة بكالوريوس في تخصص مطلوب هالوقت..
فهد: التخصص مطلوب لكن ناقصني الواااو.. والحمدلله يختي أهم شي أمسك هالوظيفة مع هالرجال الأجودي.. وان شاء الله بعدين أدور اللي أحسن منها..
أم فهد: ايه وهو صادز ولدي.. امسك الوظيفه والشغل مهوب عيب.. وأحسن من الجلسة فالبيت.. والحاله يعلم بها الله..
فهد: ايه الحمدلله, يالله بعد أذنكم بروح أشوف الددسن وأنظفه وأشيك عليه.. بداوم عليه بكرا إن شاء الله..
أم فهد: الله يوفقك يافهد ويفتحها بوجهك.. بس وين الرز كأنك نسيته..؟
فهد: الصراحه ماكان معي فلوس تكفي.. بس جبت خبز.. وان شاء الله الأيام الجايه أقدر أشتري لكم اللي تبغونه..

.
.
.
مرّت الأيام.. وفهد يشتغل مع مشبب من الفجر الى بعد العشاء.. ويرجع البيت تعبان ودايخ..
لما كمّل أول شهر.. ومشبب أعجبه شغل فهد.. وأمانته وإخلاصه وتفانيه فالعمل..
مشبب: الله يعطيك العافيه يافهد.. ألحين كملنا شهر والصراحة بيّضت الوجه.. وأبي تكمل معي في الشغل..
فهد: الحمدلله رب العالمين.. هذا من فضل ربّي..
مشبب: ايه الحمدلله.. المبيعات زادت والزباين كثروا علينا..
فهد: طيب وش قررت يعني؟؟
مشبب: ايه تذكرت.. بعطيك راتب 750 ريال.. هاه وش قلت؟
فهد: فالأسبوع؟
مشبب: لا وش أسبوعه..
فهد: أجل كل أسبوعين؟
مشبب: لا ويييين.. كل شهر ياثور..
فهد: ههههه لا أكيد تمزح.. قل لي أنك تمزح.. تكفى قلها ههههه..
مشبب: لا وانا صادز منيب أمزح.. بعطيك 750 ريال كل شهر..
فهد: هاااه.. شلون؟؟ ياخي شويّه وش تسوي 750 ريال؟؟ وخاصه أنه زاد الدخل عندك 35% تقريباً..
مشبب: والله هذا اللي عندي ياولد الناس.. ان بغيت حياك وان مابغيت بسلامتك..
فهد: لا ماتسوي شي 750 ريال.. وراي مسؤولية ومصاريف أهلي.. ولهم 6 شهور ماذاقوا أكل زي الناس.. والاجار متأخر 3شهور.. وحالتنا حالة..
مشبب: خلاص بسلامتك.. انت اللي اخترت..
فهد: طيب عطني الـ 750 حقت الشهر اللي راح..
مشبب: ماعندي لك شي.. دام أنك ماراح تكمل معي..
فهد: ليش تسرقني طيب؟؟ ماشفت مني الا كل خير..
مشبب: تبغى تشتكي.. لا يردّك إلا أبواب المحاكم.. هندزلع منـّاك بس..
فهد: حسبي الله ونعم الوكيل فيك.. حسبي الله ونعم الوكيل..

.
.
.
في الاستراحة:
فهد: ياخي مدري وش أسوي ألحين.. لا راتب ولا وظيفة والمصاريف بدت تزود علي.. ومابقى باب ما طقيته..
عبود: طيب ليش ماتجرّب أعمال خاصه..
فهد: وين رأس المال؟؟ أو وين الدعم حتى؟ كلن يبي واسطه أو أمسك سرا كم سنه.. ولايطلع لك شي..
خالد: أنا عندي لك الحل.. بس أنه غريب شوي..
فهد: وشو هاته بس.. لو أشتغل سكيورتي ماعندي مشكله..
خالد: لا لا الوظيفة أبسط من كذا.. وتعيش ملك..
عبود: ماعليك منه يافهد.. ماعنده سالفه.. لاتسمع منه.. خويلد أعقل.. لاتخرب الرجال..
فهد: لا خله يقول وش عنده..
خالد: شفت العزّ اللي أنا فيه.. تتوقع أنه من وظيفتي السابقه يعني؟؟ لا هذا كله بعد ماأشتغلت بزنس لحالي.. وقدمت إستقالتي من وظيفتي اللي ماتوكّل عيش..
فهد: شلون وش سويت يعني؟؟
خالد: سهله لاتخاف.. كل اللي أسوّيه أني أطب آخر الليل على البيوت الفاضية, وآخذ ما خف وزنه وغلا ثمنه..
فهد: بس شلون يعني؟؟ حرااام مايجوز السرقه..
خالد: بكيفك منت مجبور تشارك معي.. بس أني حبيت أخدمك وأنت ماودك!!
فهد: شلون تبغاني آكل مال حرام.. وأهلي ياكلون حرام بعد..
خالد: خلاص خلاص.. أنسى الموضوع.. رح دوّر لك واسطة في حدا هالوزارات.. وقابلني لو توظفت ياشيخ هههههه..
فهد: أستغفر الله العظيم بس..

.
.
.
في البيت:
أم فهد طاحت مغمى عليها وماتتحرك وما تردّ على بناتها.. ويدخل فهد مرتاع..
فهد: وش فيكم وش فيكم؟؟
دانه: مدري والله أمي طاحت فجأه علينا..
فهد: طيب يادانه ألبسي عبايتس.. بشيل أمي للسيارة وبسرعه تعالي..
روان: فهد الله يخليك بجي معكم..
فهد: أجلسوا مافيه داعي تجون.. شوي وراجعين ان شاء الله..
نوره: لا مابي بنجي.. نبغى أمي.. الله يخليك فهد..
فهد: يالله طيب ألبسوا وأطلعوا بسرعه..

.
.
.
في المستشفى:
فهد: بشّر يادكتور.. شخبارها ألحين؟
الدكتور: والله مدري وش أقول لك يافهد.. لكن أنت إنسان مؤمن بقضاء الله وقدره..
فهد: وشو يادكتور.. روعتني.. أمي وش فيها؟؟
الدكتور: أمك تعبانه مرّه.. ولازم نسوي لها عملية بأسرع وقت ممكن..
فهد: شلون؟؟ وش فيها؟؟ هي ما قد أشتكت لنا من أي شي فيها!!
الدكتور: إيه هذي المشكلة.. أنها ما أشتكت وزاد المرض عليها..
فهد: طيب وتكاليف العملية كم بتكون تقريباً..
الدكتور: والله مدري وش أقول لك.. لكن أقل شي تكلف أربعين ألف ريال..

.
.
.
فهد يطلع من المستشفى.. ويتصل على خالد..
فهد: هلا خالد.. أنا بشتغل معك.. ونبدأ من بكرا.. والنص بالنص.. أوكي؟
خالد: أوكي موافق..
جلست الأم يومين في المستشفى تحت العناية المركزة..
لما جمع فهد جزء من المبلغ من السرقات.. وتسلف من بعض الأقارب والأصدقاء.. ودفعها للمستشفى كدفعة أولية لإجراء العملية..
وقامت أم فهد بالسلامة.. ومرّت الأيام.. ورجعت للبيت.. وتطمنت قلوب بناتها وولدها عليها.. وزاد قلق فهد من باقي المبلغ.. وقرر يكمل السرقات.. لما سدد كامل المبلغ..
فهد شاف الفلوس تجي بسرعه بهالطريقة.. وقررّ مايطقّ أي باب.. ولا يدوّر أي وظيفة.. ولا يذلّ نفسه عند أي مخلوق عشان يطلبه واسطه..
وكبر وزادت خبرته بهالشغله.. وكوّن عصابته الخاصه بعد ما أنفصل هو وخالد بسبب أمور مادية طبعاً..
توسّع مجال عمل عصابة فهد لما وصلوا لسرقة السيارات وسرقة المحلات, وتوسّعوا أكثر في مجال التهريب وتجارة المخدرات..
أم فهد وبناتها صاروا ياكلون كل يوم لحم.. ودجاج.. ورزّ.. وحتى سباغيتي اللي ماعمرهم ذاقوها.. وكل ما لذّ وطاب من الطعام.. مثل ما كل الأوادم ياكلون..
وسكنوا في بيت مُلك.. زي ما ثلاث أرباع العوائل السعودية تحلم بهالحلم.. وتفتك من كابوس الآيجار..
بعد ثلاث سنوات من عمل فهد في هالمجال, ومكاسبه الخيالية, تورط في صفقه مراقبه من المباحث.. وكان الرأس المدبرّ لهالمكيدة هو صديق السوء المنتقم خالد.. وهو اللي بلّغ عنهم..
ألحين أم فهد وبناتها بلا معيل.. ولا مدبرّ لأمورهم سوى الله..
والضمان الاجتماعي مره يجي ومرّات يفوّت.. تقول كأنه الخطوط السعودية على كثر ماتفوّت مواعيدها ورحلاتها..
وعايشين على رحمة رب العالمين وعطف أهل الخير..
وفهد في السجن يقضي عقوبة طويلة الأمد..
ويتحسّف على الساعه اللي عرف فيها خالد وطريقه..
وخالد تم القبض عليه وطلع بعد 24 ساعة بـ وااااااااااو..

.
.
.
.
.
.
مايستفاد:
– الأرزاق بيد الله.. قال تعالى (وكأين من دابة لا تحمل رزقها الله يرزقها واياكم وهو السميع العليم).
– اجتناب المعاصي وتركها لوجهه سبحانه وتعالى, قال الله عز وجل: (ومن يتق الله يجعل له مخرجا ويرزقه من حيث لا يحتسب)
– الرزق مايجي بدون سعي وبحث عن عمل.. والأهم من هذا كله إخلاص النية..
– الواسطة في ديرتنا موجودة وبكثرة, وأنا شخصياً من الناس اللي عانوا منها في عدة مواقف..
– من ترك شيئاً لله عوضه الله خيراً منه..
– فيه ناس كثيرة مثل عائلة أم فهد محتاجه وأغلبهم يتعففون السؤال, اللي يحب الخير يبحث ويسأل عنهم ويتصدق عليهم بما تجود به نفسه من طعام وشراب وملابس وأموال أو حتى أثاث.. واللي يبغى عناوينهم وأرقامهم ممكن أني أساعدكم فيها.. أو عن طريق المبرّات الخيرية..
– الصدقه تفتح باب الرزق, وتطفئ غضب الربّ..
– الصعود على السلم إلى القمة درجه ورا درجه, والقبول بالوظيفة أم راتب قليل, ما هو إلا بداية فقط.. للوصول ان شاء الله لتحقيق الطموحات..
– قاعدة طبقتها في حياتي والحمدلله مرتاح معها, وهي حديث النبي – صلى الله عليه وسلم -: ((عجبا لأمر المؤمن إن أمره كله خير، وليس ذاك لأحد إلا للمؤمن؛ إن أصابته سرّاء شكر؛ فكان خيراً له، وإن أصابته ضرّاء صبر؛ فكان خيراً له)).
– في انتظار استنتاجاتكم/ تعليقاتكم/ ملاحظاتكم ومايستفادكوم!!؟

.
.
.
سبحانك اللهم وبحمدك, أشهد ألا إله إلا أنت, أستغفرك وأتوب إليك..
سبحان الله وبحمده, عدد خلقه, ورضى نفسه, وزنة عرشة, ومداد كلماته..




.
.
مدونتي:
اضغط هنا

إخترت لكم:
اضغط هنا

.
.
.
بدر الشوق
أبو سعد


تابع جديد رسائل المجموعة على تويتر

/
twitter.com/AbuNawafNet


تعليقات 10

  1. هذا غير الي انحرفوا لأمور اكبر من السرقه ، مثل ترويج المخدرات وأمور لا تحمد عقباها أخوي بدر الشوق أسجل اعجابي الشديد فيك … ونا من المتابعين لرسائلك اول بأول تحياتي لك

  2. وش اقول وش اخلي , قصصصصه مبكية قصه مبكـية ومعبره طيب الرجآل وش ذنبه , اجل يخلي امـه تموت وربي لو اني مكآإنه بدق على خآلد بس مآكمل في السرقآإت دمتم بود

  3. اشكر اخوي ابو سعد قصدة وموضوع جميل إلا متى الشباب تتخرج ولا تلقاء وظائف واذا بتجيب واسطه اعرف ان في هناك متضرر منها لا و مو اي واسطه احم او امسكلي وقطعلك ياخي مااااااااااااافي حل في الوظائف حتي الدعم للمشاريع الصغيرة تحتاج واسطه ومشكلتنا مع الجانب اللي ما سكين مناصب علي غير سنع والله في اجانب انهم لا يفقهون شـــــــــــــيB يخبط وتمشي حتى في الجامعات ما في تطور امس زي اليوم لا تخصصات جديدة ولا علم حديث لا حياة لم تنادي

  4. أخي الكريم شكراً لك وهذي المواضيع اللي تستاهل الواحد يقراه.. وفقك الله في مايحبه ويرضاه,, أخوك محمد,,

  5. سالفة العمل عند راعي الخضره ، المفروض ان الشاب يكون عرف السوق وطرق الكسب المشروع فالخضرة من التجارة الربحية التي تعتبر ميسرة لمن لايملك رأس مال فاعتقد ان مبلغ مبسط ( الف او الفين ) كافية لبدء تجارته ولا اعتقد انه غير قادر على توفيرها لو يتسلفها من خالد :$

  6. بعض العاطلين راحوا للفئة الضالة اللي تحاربها حكومتنا اللي مايشتغل فيها الا واحد عنده واسطة ومايدخلها واحد عاطل !

  7. وربي قصه محزنه كلها بسبب فيتامين وااااو والمشكله خالد دخل السجن ما اخذ فيه 24 ساعه عشاان الوااو وفهد مده سجنه طويله وهم كلهم نفس بعض انا اثنين من اخواني متخرجين من الجامعات والحين نايمين ف البيت مع ان تخصصاتهم مطلوبه بس الوااسطه تقتل الكفاءه والبطاله بداايه الضياع

  8. بصراحة من أجمل القصص التي قرأتها الله يعين اللي مثل فهد الى الأمام يا أبو سعد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

مبروك في بيتنا عاطل

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول