ماهي أسوا وظيفة في السعودية ؟؟


هل فكرت ماهي أسوا وظيفة في السعودية ؟؟

سوف اجيبك بإختصار شديد
وظيفة معقب دوائر حكومية
لماذا ؟؟؟
لانك ما تعقب ويكون عندك مكتب الا تدفع ضمان مالي عشرة الاف ريال
وسجل تجاري ورخصة بلدية وغرفة تجارية وزكاة ودخل وتامينات اجتماعية ولازم تكون مستأجر مكتب بمساحة لاتقل 25 م مثلك مثل شركات المقالاوت الي راس ماله ملايين في الشروط
بس انت يضاف لك
فيش بصمات وبطاقة تعقيب للجوازات واخرى لمكتب العمل واخرى للمرور واخرى للاستقدام واي دائرة تراجعها لازم يطلعون لك بطاقة ومدتها سنه والطلبات المطلوبه منك تعجيزية وتجددها كل سنة (يعني انا بشتغل اعقب على معاملات الناس ولا على نفسي )
وغير ذلك ماذا بعد هذا هل تتوقعون المللايين من وراء هذي الشغلة
لالالا تسمع الزبائين
يقولون عنك
– المواطنيين والمقيمين يقولون عنك نصاب
– مماطل
– لاتجيبهم اذا اتصلو بك يستفسرون عن معاملاتهم
– لاتحب أن تعمل
– مبالغ في الاسعار
– لابد ان تتحمل الغرامات التي كنت سبب في تأخير المعاملىة قبل الوقت المحدد
– مواعيدك كذابة
هل تعلمون لماذا؟؟
 لان دوام الدوائر الحكومية يبدا 8 صباحا
ودوام المعقب 3 قبيل صلاة الفجر
-لان النظام دايما عطلان
والمعقب ليس لديه لانظام أو سستم عطلان (حتى مايمرض من صقعة الشمس ولا البرد)
-لان الموظف يتاخر في الصباح وكل عشر دقايق بريك
والمعقب يدور على شماغه وجزمته وعقالة الي كل يوم يشتري شماغ تضيع في الزحمة
-لان الموظف راتبه مظمون نهاية الشهر
والمعقب يرزقة الله من المعاملة الي شايلها ومايدري وش اخرتها مع الموظفين
– لان الموظف جالس على كرسي دوار
والمعقب مستواه التعليمي افضل من الموظف بس الواسطة
ومع هذا كله
نقول ماعلينا المهم لقمة العيش .
بس تدرون أن تصوير الزحمة ممنوع يطلع لك العسكري الي كانهم ماوظفوة الا لشغلة هذي ومايهمة مشاكل الزحام والاختناقات.
وتعرفون على ما نكتب للجرايد ونطلبهم يحظرون يرفضون ويتحجون .
وتعرفون أن مايشتغل معقب الا واحد شاف الفقر بعينه وما يبي يمد يده للناس.
وتعرفون أن النظام كل يوم يقفل على المعقبين ويحملهم خسائر .


اعلان





وعشان أنا معقب وما اكون نصبت عليكم
شاهد هذا المقطع من المعاناة اليومية



تابع جديد رسائل المجموعة على تويتر

/
twitter.com/AbuNawafNet


تعليقات 107

  1. من جد معاناة وأزمة .. وربي أنفجعت من أشكالهم وهم يتناقزون .. الله يكون بعونهم ..

  2. حياك الله يامعقبنا تصدق ذكرتني يوم اكتتاب الاتصالات وبنك البلاد الا تعال ابي اقول لك عندي طال عمرك فيزة هندي خابر احد يشتريها هههههه دامك خبره بالتعقيب ومكتب العمل وعلى العموم مشكور والله يهونها عليك انشاء الله وتصير مدير مكتب العمل اللي بالديره اللي انت فيها

  3. هههههههه حاله أنا يا جماعه والدي معقب و منذ أن كنت في الابتدائية و أنا أعرف الجوازات و مكتب العمل وكنت أعمل مع والدي في الصيفيات التعقيب= الكذب النفاق عدم البركه في المال الرشاوي مخادعة الزبائن التعب هل تصدقون بأني كنت أخرج من البيت لصلاة الفجر و معي كيس التعقيب ( كيس من الجلد و قد يكون من الجلد و القماش يكتب عليه اسم مكتب التعقيب رقم المكتب ) و فيه بعض الجوازات و أتوجه للمسجد لصلاة الفجر، ثم أصلي و أركب الليموزين إلى مكتب العمل. و عندما أصل ألقى ذلك الشايب عند تلك الماصة المكسرة و معه القائمة…قائمة السرى؟؟!! ما سر هذه القائمة و هذا الشايب؟ هذا الشايب ينام كل ليلة تقريبــًا عند مكتب العمل و هو أمين القائمة..هذه القائمة يسجل فيها المعقبين أسماءهم بالترتيب..و ذلك حتى إذا فتحت صالة مكتب العمل فإن الجلوس يكون حسب ما كتب في تلك القائمه.. المهم كنت آتي ذلك الشايب يوميًا بعد الفجر و أسجل اسم مكتب الوالد ثم انتظر إلى الساعة 7:30 لتفتح الصاله ، ثم نجلس على الكراسي ثم ننتظر إلى 8:30 حتى يفتح الموظف الشباك. والله كانت معاناه بصراحة … عندما رأيت المقطع جاءني إحساس أن هذا المكان هو مكتب العمل و تحديدًا مكتب العمل بجده…وتذكر تلك الأيام الخوالي التي ( فكنا ) الله منها أنا ألحين متخرج من الجامعه و الوالد ترك التعقيب و الحمد لله

  4. لاحول ولا قوة الا بالله الله يعينك ياخوي الا الزحمه ذي كلها عشان وش انا مافهمت شي من المقطع كل الي اشوفه زحمة ناس بس على وش متزاحمين اذكر الزحمه الي كذا كانت ايام الإكتتابات!B

  5. يوه والله مساكين شكلهم شقينين لاكن هاذولا هم إلي يبون الرزقق (إسع ياعبد …..) تحس أنه في توزيع رز

  6. وينهم ذولي ورى مآ يخطبوني..؟:$ ههههههه اشكآلهم تنرحم قسم بالله:(. .ليتني معهم هع:) الله يكون بعونكم..ويعآفيك^_^

  7. وفي بعض المعقبين هم الي مخربين سمعتك تلقاه يعرف واحد بكل دائرة حكوميه ((لزوم الشغل)) ما ادري من فين يتعرف عليهم واذا جاء تلقى الناس واقفين سرا وهو يجي ويسلم على الموضوف ويشرب شاهي واخبارك علومك ويغلق قبلنا وحنا جايين قبله انا شايفها بنفسي

  8. أنا أول مرره في حياتي أشوف ناس كثير بهذا الشكل في دائرة حكومية ورغم أني متفاجي ومستغرب من كثرتهم الا ودي أعرف أيش اللي خلا الرجال يهربون ؟ بجد بجد الله يعينهم . ووظيفة معقب أنا لا اريدها حتى العمال اللي علي بسويلهم خروج نهائي هههههههه.

  9. مكاتب العمل اذا دخلته تحس انك في دوله ثانيه نظام مختلف وبشر مختلفه و80% من موظفوه حراميه ومرتشين والله على ما اقول شهيد والمسؤلين الكبار راح يتحملون نتائج تقصيرهم يوم القيامه ان شاء الله وكل مشاكل البطاله واتعثر لمشاريع الصغيرة بسبب تنظيمات مكاتب العمل اللى يدعون انها من اجل البطاله ومساعدة الشباب على الاعتماد على الذات مكتب العمل قصة مأسأة في السعوديه وعار يحتاج للستر والله من وراء القصد وعلى ما اقول شهيد

  10. والله ما ادري بس الي يقهرني يوم شعبنا يشوف الدول الثانيه يقوم يحقر ويتريق عليه ونقول احنا واحنا بالله عليكم هذا المقطع وش يدل ؟ حنا في عام 2010 وغير هذا كله عندنا قرآن منزل من قبل 1431 سنه علمنا النظام والادب مهما كانت الظروف وانه الصبر افضل الحلول في مثل هذه المواقف ما ندري نلوم الشعب ولا نلوم الموظفين ولا نلوم الحجر ؟ وبعد هذا كله راح تجيك تعليقات تقول احنا الافضل وحنا الاحسن ؟ يضحكوا على مين مدري دعهم في غمرتهم حتى حين

  11. نعم ياخي الكريم اذا اردت ان تكون معقب وتأكل لقمة عيشك بالحلال لابد ان تواجه هذي المصاعب اما اذا كنت من النوع ال…… فللأسف سوف تتسهل امورك اسألأ الله ان يرزق الرزق الحلال

  12. بسم الله الرحمن الرحيم … يوزعون فلوس ببلاش هنا ….؟ ولا وش السالفه بالضبط ..؟

  13. كركركركركركر صراحة المقطع ظريف جدا محزن جدا لانها معاناة للمعقبين اللي بيسترزقوا من هذي المهنه المليئه بالمتاعب والمواقف الغريبه والطريفه مثل هذي الهجمه المرتده السريعه ويمكن ان نسميها ايضا الدخول للاقوى ولا مكان للضعفاء في حلبة مكتب العمل WWF

  14. صدقت والله صدقت….. اصبح كل شي في حياتنا معقد جدا جدا من شي اسمه بيروقراطيه. والله يا بوحلا انك جبتها على الجرح وأبشرك كلامك وكلامي ما يتعدى هذا المستطيل الصغير اللي اعلق فيه على موضوعك. بارك الله فيك يا بوحلا.

  15. اش هذا ليه كذا ويقولون عندنا تكدس اداري خلاص طيب لاتلبس شماغ اذا رحت لشغلك

  16. مع احترامي لكل معقب .. 10 من المعقبين 7 نصابين .. كرهت نفسي منهم .. والله مافي احسن من ان الواحد يتابع عمله بنفسه .. ودي لك ..

  17. :(:(:(:(:(:( اعوذ بالله ليه كذا سؤال : انت كيف تصور وانت منت معهم ؟؟ سؤال: ذحين ذولا كلهم معقبين ؟؟؟ مخرج: الله يعين كل المعقبين

  18. بالله عليك يعني صار السيكورتي (حارس الامن) اللي منطق بالشمس احسن من وظيفتك يابن الحلال خل عنك الشلخ ما ندري عنك بس نخبر المعقبين ياخذ راتب اربع حراس امن واكثر في اليوم ما نحسدكم بس اتقو الله اكثر من اجنبي اخبره مسلمين تجديد اقاماتهم لمعقبين والعجيب انه ياخذ الدراهم من هنا ويماطل فيه شهور لين يعاف الكم الف اللي عطاها المعقب بس تدري بنقول اصابع يدك مب سوا والله يعينك ويصبرك

  19. لاحول ولاقوة الا بالله ياساتر تقل مجاعه B الله يعينا وياك وبوس على مايقولون يدك وش وأفا ان عندك وظيفة غيرك متبطح بالبيت وياكل خبز ناشف هذا ان لقى وملابسه مصفره بس بقولك شي باطن تسبدي منذو مبطي لو انك اجنبي كان وظفوك بأرقى وظيفة على مكتب بلحالك وراتبك عالي 8) ………………………………. قال ايش ارفع راسك انت سعودي …..؟؟؟!!!! :~ ياريت احد يفهمني على ايش ارفع راسي 🙁 على الفقر الراتب اللي ماوصل الـ 3000 ريال << 3000 ريال وش بتسوي لي لاتزوجت ادفع اجار ولا اصرف على العيال ولا اصرف على الحرمه ؟؟؟؟!!!! ولا فواتير ولا سياره ولا مقاضي بيت ولا ؟؟؟!!!!:( ويقولون ليش تسيرون راعين مخدرات وحشيش <<<اذا عرف السبب بطل العجب 🙁

  20. أنا الصراحة مافهمت طبيعة عملكم :/ وأول مرة أسمع بهالوظيفة .. أتمنى أحد يفهمني ! من جد شكلها وظيفة متعبة ، كان الله في عونكم.

  21. انا شخص فتحت مؤسسة تجارية وقال معقب ابي مبلغ 10000 واسلمك كل مستلزمات فتح لمؤسسة وانت بالبيت …. قلت معصي مجنون عشرة الاف بفتح فيها محل جديد بس تبون الجد والله لو قالكم معقب عطوني 150000 عطوة بدون تردد لأن المسئلة جدا جدا صعبة ومشقة وصدقني فرق البلغ ال كتبتة الأخير راح تدفعة بعد كم سنة في علاج نفسي بوحدة من العيادات العالميه لأن العيادات الداخليه مراح توصل لعلاج لمجموعه الأضطرابات والأكتئبات الي راح تصوصلها …. ارفعو اسعاركم واناول من يدفع 😀

  22. والله هذا ولاشي غير ايام البرد والساعه ثلاثه وانت عند مكتب العمل اه يالقهر الاجانب في الشركات تحت التكييف وحنا نعقب لهم وياليت مستفيدين شيء والله انواع الامراض من وراء هالشغله

  23. وش تبينا نسوي صوتنا ما اضن انه يوصل للمسؤولين حتى في مكتب العمل انواع المشاكل والقلق النفسي علشان تفتح اي محل :(:(

  24. الله يوفقك يالغالي ويرزقك الخير ان شاء الله وصدقني بعد تعبك هذا ان شاء الله ربي يعوضك خير يالغالي موفق اخوي وعليك بالصبر …. يقولون الصبر مفتاح 14 :$:$:$

  25. نعن ابو الحاجة يا ولد …كل واحد يبي يلحق رزقه … / / ما أقووول غير …. الله يخااااااااااااارجنا ..و يعين الجميع

  26. الصراحه ماكنت اتوقع ان المعقبين ينحاسون ويتبهذلون بهذي الطريقه كانت عندي فكرهـ عن التعقيب انه يتعب الواحد ويكرفه بس مو بهشكل الصراحه الله يعينكم ويوفقكم في مهماتكم ويسهل دربكم وجميع المسلمين مشكور اخوي

  27. معقوله هذي الصوره لازالت .. كنت أعيش هذه المآسي شبه يوميا والحمد لله ربي رحمني وخارجني منها .. بس بصراحه فيه معقبين محترمين جدا وفيه شريحه من المعقبين سلاتيح هم سبب هذي المشاكل واللي يسببون الزحام والمدافعه وقلة الحياء وأسأل الله اذا أنت معقب أن يريحك من هذي المهنه المتعبه المربحه بس فلوسها غير مباركه والله أعلم .

  28. مـاعمري سمعت عن هالوظيفة ؟؟ و اش تكون بالضبط !! و برضوا لسه مااكتمل عندي المعنى الكـامل .. لكن أتوقع إنها مأســاة حقيقة دام فيها كل هالركض و الزحمة !! الله يوفقكم جميع .. بس صراحة مت ضحك على الشماااغ و العقال هههههههه

  29. المواطنيين والمقيمين يقولون عنك نصاب ياما سمعتها منهم والمشكله تشرح لهم وش صاير ويكذبك وبالأخير تنطل المعامله بوجهه وتقول لابارك الله فيها من شغله جابت لنا كلام شين لان النظام دايما عطلان نشرح للناس نظامهم عطلان ويقول لا انا اعرف واحد هناك يقول النظام زين طيب ياح ي و ان خل خويك يسوي لك المعامله ولاتكذبني ماقول الا الله يعين بس

  30. الكتاب باين من عنوانه ( اقولها وبكل فخر ابوي عنده مؤسسه) بت<_ بالاعنقليزي <_ <_ والترجمه (بس) للآٍسف ياليته مو فخر داام اني انا الي ارااجع بمكتب العمل طبعا ماتصير مثل ربع الي صارت بالمقطع بس الي اعرفه ان (ديوان الخدمه_ديوان المظالم_ وزاره التربيه_مكتب العمل) يوظفون نااس فيهم عيب اعااقي وهذا من شهاامه ديرتنا الغاليه وانا ضد المعااق انه مايتوظف بالعكس يزيدني فرح بس ودك انه ماتصير الزحمه هذي المفروووض من الفرع الي بالمقطع انه يكون واحد شغال بمكتب العمل من الفجر الى الساعه 7 الصباح انه يوزع ارقام ومو شخص واحد بس كل يوم على شخص بحيث ان الشخص الي يجيء دوره مايداوم بعد الساعه 7 اليوم الثاني يرحع وضعه بالدوام الطبيعي ( وتتغير الشفتات علشان سالفه الواسطه والمعرفه) وصدقووني ماراح نحصل مثل هالامور بديرتنا الي كلنا نغير عليهااا (هذا رأيي انا ويمثلني انا وآحلى تحيه للشخص القاري المتفق معي وآحلى حب وآخلاص للشخص المعارض للردي)

  31. السلام عليكم ورحمة الله سبب المعاناة هو : – عدم وجود نظام اجرائي واضح ( يعني خطوات 1 1 = 2) فلو وجد مثل هذا النظام بالتأكيد ستختفي المعاناة بل قد تحتفي وظيفة التعقيب ! لكن هناك مستفيدون من هذا ولعل الرشاوى احد ثمار غياب الإجراءات ، تلك الثمار المرة المليئة بالإثم ! – من يشك في غياب الإجراءات .. اذكره بالآتي : لو رغبت اليوم مثلا في تجديد جواز سفرك ،، فإنك ستسأل : ماذا يريدون ؟ صوره و صورتين ربما ثلاث صور ! صورة بطاقة ؟ والا ما عاد يطلبونها ؟! وما الحاجة لها والأصل معي والكمبيوتر عندهم ؟! وهل البوفيه اللي يطلبون منك تصور عنده موجود ؟! أم ان صاحبه تقاعد ؟ الملف الأخضر العلاق هل لا يزال موجود أم لا؟!! كل هذه التساؤلات جاءت من غياب الإجراءات الواضحة وتسري على كل قطاعات الدولة الخدمية : رخصة قيادة – جواز سفر – استمارة سيارة – رخصة بلدية الخ وربك يعين ..

  32. والله مشكله يعني اكثر من خمس دقايق والعالم تدفق وتددافع ’ ينكسر احد يطيح وآحد تصير هوآش مصيبه ’ والحل موب صعب اذا في احتياج كثير مثل مآشفنا كثر فروع الخدمات المدنيه والأشياء هذي لستهيلها على المواطن ويكون برضو فيها اتاحة لفرص العمل لسعودين ’ وش المشكله لا صارة افرع كثيرهـ وين مآتروح تلقى ’, الله يكون بعونكم وعون كل مسلم ’, وكل مواطن سعودي ’,

  33. من جد اخوي الله يديك العافيه ويعينك ويرزقك من اوسع ابوابه بالحلال ويعوضك عن هالوظيفه الهم:(

  34. هذا كلام هذا نظام الوضع سيئ كلهم من بدري موجودين وفي ناس ما لحقت على شي حسبي الله ونعم الوكيل المفروض مدير الجوازات يقدم استقالته

  35. ههههههههههههههههههههههههههههههه :~ والله انه راح فيها الموظف بس انا ماعرفت الشغله وشي

  36. :$ تراك صادق بكل كلمة قلتها بس ابي اوضح كم شي مكتب العمل (( الله يكرم القراء )) ماسكين عصا من حديد ضد المؤسسات ((الصغيرة)) ومكاتب الخدمات طيب ليش ؟ الجواب انه المؤسسات الصغيرة تجار تاشيرات والمكاتب سماسرة تاشيرات ومندوبين رشاوي طيب ماسالو نفسهم ليش هالتعنت وليش هالسلوكسات ظهرت لو كان النظام مرن وفي صف كافة الاكراف ماكان في تجاوزات يعني هم همهم بس يطبقو السعودة طيب فين الموظف المؤهل الجاد انا في شركة وعندنا استعداد نوظف 15 سعودي فورا لكن من منهم مؤهل فعلا لهالوظيفة لنا تجارب معاهم وللاسف مخيبة الموظف السعودي يعتقد نفسه فوق النظام ويتحدى الشركة انها تفصه ولا بيشتكيهم لمكتب العمل (( اكرمكم الله )) لكن لو هو بيطلع في يوم ليلة من يحوشه عن قراره الجواب لا احد تبونا نوظف سعوديين اضمنو حقوقنا كمؤسسات صغيرة والمكاتب مو كلهم نصابين الا الموظفين حق مكتب العمل ( اكرمكم الله )شايفين نفسهم ولا حد يقدر يكلمهم الا بعد ماتعدي من الحاشية كانهم اصحاب سمو ( طال عمرهم ) ويكلمك الواحد منهم كانك تشحت منه مو تقدم له معاملة والغريب والاغرب والمضحك انهم يصدرو قرارات تناقض نفسها بنفسها ومن الغباء والحماقة انهم ماهم راضيين يعدلو غبائهم مثال على ذلك تغيير المهنة قبل نقل الكفالة واحد منهته نجار على مؤسسة مقاولات ابغا انقله على شركة مجالها غير المقاولات المطلوب انه يعدل مهنته قبل نقل الكفالة طيب موافقين مع انها ماتجي طلبت منه يعدل مهنته الى عامل شحن وتفريغ مكتب العمل في محافظة في الوسطى قالو المهنة ماتطابق نشاط كفيله السابق ( مقاولات ) طيب انا كيف انقله لو كفيله ماغير مهنته ، وكفيله المسكي كيف يغير مهنته اذا نشاطه غير مطابق لنشاط المهنة الجديدة شفتو كيف التناقض طبعا لو رحت لمعقب بيقول لك ماقدر اسوي لك شي لانه المعقدين في مكتب العمل ( اكرمكم الله ) ماراح يقبلو الطلب الله يستر على الجوازات انهم سلسين ومرنيين وقراراتهم موضوعية نسيت اقول لكم ان مكتب العممل بدل مايتطور لقدام يرجع عشر سنين لوراء والدليل في جدة رجعو استخدام اكياس تقديم المعاملات وحطها وتعال بعدين ياهوووو الجوازات بطلت ذي الحركة من عشر سنين وهم توهم يوصلو لها والسبب قلة الموظفين طيب بالله من اولى بالتوظيف ؟ القطاع الخاص ولا مكتب العمل ( اكرمكم الله ) ؟ خلوني اسكت لانه ماراح يتغير شي لو يغيرو مليون وزير عمل

  37. ههههههههههه انا حسيت انهم يوزعون فلوس كل هاذا علشان وضيفه ولا بعد خايسه

  38. الله يرحم الحال لاتنظيم ولا انتظام ولا اهتمام ولا مبالاة حتى التقنيه الحديثه الظاهر ماراح تنفع في هالوضع المزري انتشر الفساد الاداري والمالي بشكل لايطاق والمسئولين لاعاد فيهم لاذمه ولاضمير 🙁

  39. علم النظام… فلسفة الذوق … نظرية الأخلاق… إختراع يقال له الإحترام ,,, كل ذي لو توفرت كان شغلتكم سارت أسهل وأكثر سلاسة … لكن بعد ما شفت المقطع ذا إطعني يا شيخ لو يتعدل الحال بتقوم الساعه واللي نشوفه راح نبقى نشوفه ,,, اقول الله يخارجنا بس ويعينك يا رب ويلطف بحالك .

  40. السلام عليكم ورحمة الله وبركاته الفوضى لا تحدث الا اذا كان النظام فاشل وانا برايي المتواضع اقول ان المواطنين لا يمكن ان يتجاوزو الحد المسموح به اذا كان هناك من يسمع ويتجاوب ويتفاعل معهم يعني هذا الهجوم الذي رايناه ليس بسبب المواطن بل بسبب الموظفين تقبلو مروري ولا حول ولا قوه الا بالله العلي العظيم

  41. لا حول ولا قوة إلآ بالله .. قلبي حيل ألمني على ذا الرجال الي طاحت اورقه وداسوها دوس ولا قدر يشيلها ., وبالاخير وش سوى ! ابتسم ,, ان الله مع الصابرين .. هذي الدنيا صراع وقتال وجهاد نفسي .. الله يوسع لكم في رزقكم ويفتح عليكم ابواب الخير .. انه لمؤلم ان تجد ابناء بلدك يعانون و يتعبون ليزيدوا فرص عيشهم ! زادت البطاله في البلد وزادت العنوسه معها !! كل مابوسعي ان اقوله حسبي الله على كل ظالم وجبار في هذا الدنيا حسبي الله عليه ونعم الوكيل .. تقبلوا مروري .. ودمتم بود

  42. بسراحة شي مؤسف للمراجعين المفرووض يحطون ارقام با الترتيب قبل مايفتحون الباب طبعا مع الموعد با الساعة والدقيقه ويريحون المواطنين من الزحام

  43. نأسف لهذا ,, ونأسف لوضع معظم دوائرنا الحكوميه اللي وضعها بهذا الشكل !! لا , وندعي اننا متقدمين ومتحضرين !! الحضاره رايحه اليابان وحنا رايحين زمبابوي والدليل ان مثل هالاوضاع موجودة في دوائر حكوميه والسبب لا عقاب ولا عتاب للمقصر مجرد (لا تقطعون رزقه) عفيه عليك اخوي على توثيق (حضارتنا) حتى لا يدعي المدعون

  44. لا يغركم اكثرهم نصابين يدورون تأشيرات وبيعونها على الاجانب ب 15 ال ويتركونهم مفلوتين بالبلد وينشرون فسادهم عندنا وكله من ورى مكتب العمل ( موظفين و معقبين ) لو مالهم فايده والله ما حطو نفسهم بها المكان ذكروني بايام الاكتتاب شعب يفشل انا ما اقول كلهم ولكن اقول اكثرهم وبالذات المعقب الي له فايده من كل تاشيرة ( فايده وليس اتعاب )

  45. المقطع ذكرني السباق السريع والقوي والخطير على كراسي الحجز في مستشفى الأسنان العسكري في تبوك !!

  46. ياليت الامير سلمان يزور الدوائر الحكوميه في الرياض كما فعل امير الجوف …. وقد يتغير امور كثيرة وبالنسبة للوزير يقولون ان عنده ثلاث روايات يكتبها واذا خلص بيشوف وش القصه وراح تكون الروايات بأسعار مخفضة للعاطلين 😀

  47. انا جامعي ومقدم على الشركات وفيه واحد واعدني يوظفني معقب والله انا استانست بشيء اسمه وظيفة لكن (معقب) صعبه مرررره في هذي الظروف سكرتي ارحم بذات لو بسوق او بنك مكان مكيف بس لايكون بس في مكتب العمل الا على فكره مكتب العمل مافيه سكرتي يوم هالزحمه

  48. والله لو أن الموظفين ماسكين شغلهم صح بس شغلهم ولو بدون أمانة لكان الوضع منظم و بدون زحمة.

  49. السلام عليكم بصراحه موضوع سيئ الغايه بس مهو الحل!!!!!!!!!!! يجب يكون فيه التعامل الكتروني يعني الان نحنو في عام 2010 ليه مايكون كل شي واضح وصريح ويكون التقديم عن طريق النت في الموق الرسمي وترفق جميع الاوراق المطلوبه عن طريق ملف وتكون المعاملع نظاميه ويطلب مراجعة المواطن برقم المعامله واحظار الاصول لكي يتم انهاء اجرئتها( بس راح يكون مشكلة البطاتله المعقبين) يكون فيه نظام الي لك مكاتب التعقيب بفتح نظام ربط بينهم وبين مكتب العمل بسعر سنوي ويكون مخولين بئجرلات الدوله وتحمل الختم الرمسي والتعديل كامل المسئوليه الصاحب المكتب او يكون انهئها عن طريق الاحاسب الالي ويكون فيه ربط بين المكاتب الخدميه ومكتب العمل ويذهب فقط التسليم الاصول والاستلم الفوري وفي حالة الارفض لا يستدعي مراجعة مكتب العمل وزيادة الزحمة زحمة…. وشكرا متفاءل والله بوفقكم

  50. B ياناس والله وانا معهم تعالو س مكتب العمل شووووفB B B حسبي الله ونعم الوكيل والله من ساعه 5 الين ساعه 8 وانا جالس عشان رقم وززززاحمه هذي عشان رقم:(:(:(:(

  51. ويينك يا القصيبي ! تعال شف التطور والحضارة اللي تتكلم عنها , هذا تخللف ورجعيية !!

  52. :$ …… ههههههه مصيبه آفلخ قبل لتروح ملح .. وين النظـآم وين وين وين .. البركه بشبـآب .. لو تشوفن الشعب الاوربي كيف النظـآم تقولن هذ1 السستم ولا بلاش .. تخيلو يآجمآعه البقآله طـآبوور هههه فمآ بآلك دوآر حكوميه .. الله يكون بآلعون حنى والوآصطه

  53. يا الله ماصدق ليه هذي الفوضى B يعني هذول معقبين ؟؟!! طيب بالترتيب وبالدور لو احد اجنبي يشوفكم تدخلون للدوائر الحكوميه بهالشكل شقول علينا؟ هذي مشكله ماينسكت عنها لازم يصير في تنظيم وانضباط من قبل المراجع والموظف.. لاحول ولاقوة الا بالله,كنت اتوقع اننا تخطينا هالمرحلة بس الظاهر ماكو فايده

  54. B B B B مهما تتطور العالم حنا نرجع لورا !!!!!! السعوديه ديرتي واحبها لاكن بلد غير متحضره الاشخاص فيهم انانيه عدم مبالاه انت تستلم راتب اخر شهر مب على استراحاتك وبريكاتك يامال الي منب قايله مالك يصير حرام كيف ترتاح ؟؟؟ الله يعين بس ليت الشخص فينا يشتغل بذمه وضمير وااااسفاااه الاجانب عندهم النظام شي مقدس والامانه بالعمل والبلا ان هاذا شي من تعاليم واساسيات دينا لاكن مين الي يسمع وينفذ B 🙁

  55. ههههههههههههههههههههههههههههههههههههههههههه:D:D ماااااااااااااااااافهمت شي بس ذبحني الضحك من المقطع جد اشكالهم تضحك بس من جد معاناه

  56. بسم الله الرحمن الرحيم . فالبداية لابد من الرجوع لسبب التدافع الحاصل في المقطع مع أن كل مراجع سيحين دورة وتنتهي معاملته والمسؤل عن أي أصابه هم موظفي المكتب وخاصة رجال الأمن اين هم عن تنظيم المراجعين أين أرقام السراء . لابد النظر في شكاوى المراجعين في مكاتب العمل أجمع المنتشرة في المملكة وذلك بوضع أستبيانات عن الشكاوي والأقتراحات .والأخذ بجدية بتلك الأستبيانات ومعالجة القصور الحاصل وأهم شئ (((سد نقص الموظفين الحاصل في بعض مكاتب العمل ))) . ((( التدافع والزحمة الذي في المقطع يحصل دائماً في قسم الرخص وتجديد الإقامات سواء في مكتب الرياض أو جدة ))) .

  57. اكيد صاله كروت العمل هذي لابو نظامهم لابوهم كلهم الموظف جالس على الكرسي ولاهمه المعقبين يحترقووون وغير كذا بعض الموظفين طبعا الي يشتغل لنفسه يحط بجيبه 50 ريال على كل كرت عمره ما راح يطور مكتب الهمل عفواً مكتب العمل ما نقول غير الله يعين بس

  58. وين الجهات المسئوله عن هذا التنظيم وين رجال الامن وين الترتيب بالارقام كل هذا مالها جواب جوابها حطينه بكيس اسود ورامينه حسبي الله عليكم

  59. تنبيه لأحد الردود: ما صحة قول: اسع يا عبدي اسع معك؟ الفتوى الحمد لله والصلاة السلام على رسول الله وآله وصحبه …. أما بعد : فهذا القول : ( اسع يا عبدي أسع معك ) فلا نعلمه حديثاً قدسياً ثابتاً، فإن أريد أن الله تعالى يعين أهل السعي والاجتهاد في طاعته فهذا المعنى صحيح ، كما قال الله : ( والذين جاهدوا فينا لنهدينهم سبلنا ) [ العنكبوت : 69 ] ، وكما في الحديث الصحيح والله في عون العبد ما دام العبد في عون أخيه المصدر: http://www.islamweb.net/ramadan/index.php?page=ShowFatwa&lang=A&Id=15347&Option=FatwaId

  60. يآلبيييييييييييييييييه والله حمآآآس <B يالله ان شاء الله تتعدل الامور والله يرزقك وظيفه آحسن من هاذي الي كلها ركض وطق وطقيق 😀 سبحآن الله وبحمده سبحان الله العظييم

  61. يارجل ربك كريم وهاذي لقمة العيش ياخوك والشرهه على الانظمه الفاشله اللي في البلد – بالتوفيق:~

  62. يــــــــــــــااااااحــــرام الـــــــحيــــــــن هذي وظـــــيـفة ولا رمي الجمــــــرات اشوف يــــقنز من فوق الكـــــراسي يخــــــاف على دوره بقــــــــــــــــــوة ههههههههه شــــــــــــــر البــــــــــــلية مــــــــايضحك

  63. انا اعرف واحد كان يشتغل معقب بس والله الي سمعته منه انها شغله ما يحتاج وبين وبينكم والله الرجال كان مبسوط في دوامه

  64. الله المستعان والله العظيم من ينظر للموضوع بمنظور عادل انه لايرضيه ما يحدث والله انه تدمع العين دائماً نحن يالسعوديين عند شوفت في كل شي شايف انفسنا مدري على ارفع راسك انت سعودي ارفع راسي على فساد اداري متفشي او على رشاوي او بطاله ارفع راسي مدري على شي واحد ماني لاقي لاوظائف لامبدعين لا مخترعين حتى في ابسط الامور حتى في الكوره ماعندنا سالفه والله ان استحي اني اكون سعودي من السعوديه باب رزق لغير اهلها

  65. بسم الله الرحمن الرحيم اللي يشوف المقطع يقول منحاشين من نار أو إنفجار والعياذ بالله ويقولون ليش الناس يعلقون على السعوديين لإنهم إلا من رحم ربي شعب متخلف ولا يعرف النظام على أن الإسلام علمنا الترتيب والنظام لاحول ولاقوة الا بالله العلي العظيم

  66. كل على هم سرا وانا على همي سريت والله تعليق 8 خطييييير انسدحت عليها من الضحك

  67. يارجال هذي حلاتها :D:D:D:D:D:D الله يرجك الشعب السعودي بسس هههههههههههههههه

  68. لا حول ولا قوة الا بالله عسا الله يعينك ويقويك اخوي مشكور على تصويرك المقطع وكل ماقالو الوظايف قالو موجوده بس الشعب مايبي اخرتها خواتنا وبناتنا شغالات واخوانا وعيالنا سباكين وسواقين وطرارين

  69. ياويل قلبي والله مقطع يخوف هع يالله قد ايش كسب لقمه العيش صعب هاذي الأيام الله لايحدكم لمد يدكم للناس 🙂 قولو امين وانا معكم طبعاً هع

  70. وعشان أنا معقب وما اكون نصبت عليكم شاهد هذا المقطع من المعاناة اليومية – – يوووميه كذا انا شفت المقطع دقيقه وتاثر – – الله يخارجك ويخارجنا

  71. ليش مايكون فيه جراءه من المسؤلين ويطلع لنا واحد ويقول مشاكل الزاحم والنظام المتعطل ليش هم (ماتعلا اصواتهم ) الي فوق كراسيهم وفي المجتع سكون اخوي المعقب اعانك الله وياليت المسؤلين يضعون النقاط على الحروف

  72. والله تكتن العبرة وبي الصيحة الله يكون بعونكم و ييسر امركم ويفرج كربكم اااااااااااااااااااااااااااههههههههههههه يا عمري الي يضحك وهو يلقط الي بالارض أسال الله العظيم ان يوفقه بالدنيا والاخرة….اللهم امين

  73. الله يكون في عون جميع المعقبين والله شغلة متعبة وتهد الحيل مألوم ابوي اذا دخل معصب من شغلة بسبب هالسؤلين اللي ماعندهم اي مسؤلية ماغير كل شوي منزلين لنا نظام لا يقدم ولا يغني من شيئ ..ربي فضحهم هم وانظمتهم الفاسدة واللة لو يوضفون لنا اجانب مسؤلين كان تغير الحال ولا شفنا هالشي يحصل في دوائر الحكومية بدل من كل واحد مرتز مكتبة قهوة وشاي وكرشة لحد ركبتة . ربي اعن عبدك على رزق الحلال …

  74. الله يعينهم والله اني مريت بنفس الموقف عند التقديم لكن الله يعين

  75. معلومه مره مفيده والله هذا الي حاصل حالك حال المعقب الجمركي الي يطارد وراهم كان المعامله لك واخر شي يكرشونه كرشت الكلب المشكله انك تكد عليهم وتاكلهم وفوق كذا يعاملونك كانك هندي اهااااااااااااااااااااا الله يرحم زمان اول

  76. شوف يابويا هادولا المعقبين زيهم زي سماسرت اللعيبه طالعين واكلين نازلين واكلين وتلاقيهم بطرانين ومن كثر الشغل عندهم ماعندهم وقت يتروشون حتى تلاقي الواحد منهم ريحتو طالعه ماتقدر تصلي جنبو الا وانت كاتم نفسك.

  77. مكشور خيو ع المقطع بس الصراحة الى يشوفهم يقول انهم في افريقيا ميتين من الجوع وربي راح تفكيري انهم في افريقيا صدق الله يخارجنا … بس عندي سؤال ممكن .. ابي اعرف ذولا وش عندهم متزحمين ومترافسين ع شنو لا يكون بس فية فلوس داخل ؟

  78. انتم وش تبون يعني ابي افهم حنا اغلب قطاعاتنا بالشكل هذا ماتستوعب أي ضغط بسيط وأي معامله عندك ماتخلص بسرعه حتى لو ماقدامك أحد بس عن الشكه راجعنا بعد شهر وقفة على هالمنظر يعني 🙂 وبالنسبه لمكتب العمل يبيله إعادة هيكله كااااااامل وغير كذا ماراح يفيد شي من دون مانذكر الأسباب لأن معضم الرجال يعرفونها وبالنسبه لوزير مكتب العمل والعمال وش تبون فيه أنتم هااا !؟ سبحان الله يعني تدورون السلبيات بس أقطفو من عناقيده الأدببيه خلو عندكم ذائقه تستمتع بمفردات الفكر اللغوي لعنبو بليسكم أدب هذا تلذذو بنكهة الأدب في القلم الماسي لهذا المعطاء القصيبي 8)

  79. ابصراحه مادري شسالفه انا من الكويت ومو فاهمه يعني شنو يعقب مادري تعقيب:) بس اذا السالفه معاملات حكوميه فهنا عجب العجاب لازم يتوفر العديد من هاذيه المراكز وبنهايه سوف يتوزعون المراجعين ويخف الازدحام وشكرا

  80. ايو الله صادف ونا معقب في الجوزات وكتب العمل وأذاتبي تدعي على عدوك ادع عليه يراجع مكتب الفلس اخخخخخخخخخخبس شفتو الكويتي مايدري وش التعقيب وحنا ملعنين في ذا التعقيب والراتب بايخ ولابعد مديرك مصري

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

ماهي أسوا وظيفة في السعودية ؟؟

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول