ماقلت لكم قصتي يوم أروح أشتري الضحية


بسم الله الرحمن الرحيم
السلام عليكم ورحمة الله وبركاته
مساكم الله بالخير أيها القوم والقومات

بمناسبة الاختبارات خلونا نسألكم هالسؤال :
منهو أحسن وأشجع وأقوى وأزين واحد بالعالم ؟
طبعا الجواب سهل وكلكم تبي تقولون بصوت واحد :
جــــــنــــــط الســـــفـــــيـــــــنــــــة


اعلان





الا على طاري الاختبارات أنتم ورى ماتذاكرون هالحين , ذاكروا يامال الي مانيب قايل عشان لانجحتوا نسوي حفلة شواء في فناء المدرسة الخارجي

هلا وعليكم السلام
طيب الحمد لله
لا والله مانيب جاي تعشوا عساه عوافي
لاسلامتك
بمان الله << دق الجوال وكتب المكالمة من الذهانة

وش كنا نقول … أقول خلونا نخش بالموضوع ، اليوم جايب لكم موضوع من الإرشيف وهو عبارة عن قصة قصيرة كتبتها من واقع الخيال المتقوقع في بؤرة بوتقة نخاعي المستطيل المتدودل على غصن نخلة موز أزرق << أقول لايكثر وخش بالموضوع << طيب لاتدف


جنط السفينة ورفعة بنت طلمس آل سرسري

هذا طول الله عماركم بيوم عشرين رمضان الي فات حجينا انا واهلي ولله الحمد انواع التساهيل لازحمه ولا شي تصدقون
عاد اننا رامين الجمرة ست مرات وتصدقون بعد اننا مذرين لقدر الغدا بالحوض الي به ابليس الحمد لله حجينا بكل سهوله همن
رجعنا وبعد خمسة ايام وتحديدا يوم ثمان وعشرين شعبان وحنا صايمينن الست جتن امي

وقالت : يالله ياجنط قم رح اشتر ضحاي
قلت : وش ضحاياه
قالت: ضحايا العيد
قلت : اما عاد وهالشهر الي صمناه لايصير بس ذو القعده ترى تسويه الحكومه
قالت : لا بس مثلك عارف عيد الضحيه يبي يكون بالشتاء ووقت الطلعات قلت نقدم الضحايا هالحين ونكشت بعيد الضحيه
قلت : اي والله انتس صادزه
قالت : بس لاتشتريهن من هايدي ترى كل غنمه عليهن قل صح من اكل الكراتين والاكياس
قلت : اصلا متزاعلين انا واياه
قالت : يالله وش تحتري قم اشترهن بسرعه
قلت : يدتس على الف وثلاث ميه
قالت : اندزلع بس وشوله شايلتك ببطني تسعة اشهر
قلت : لاحول ولا قوة الا بالله كل مابغيتي تسرقينن قلت تسعة اشهر تسعة اشهر ياختي انا مستعد اشيلتس ببطني
اربع سنين بس انت ادفعي الالف وثلاث ميه

مادريت الاحطت سعبول على اصبعه ومسحت به خشمه وقالت لا ييبس خشمي الاك جاي
انا عاد يوم شفت الدعوه تسذا استسلمت ورحت ركبت السيارة ومسكت طريق خريص رايحن للي يبيعون غنم
بشارع سلمان الفارسي وكل الطريق افكر باستغلال الاباء والامهات لنا ماوعيت من نوبه التفكير الاي بطريق اسفلت
صغير مسار واحد بوسط البر واتلفت الا ماحولي احد قلت اكيد هالطريق يودي لقريه وهالقريه بالبر اكيد به غنم
كملت الطريق الا فيه زول شخص يأشر على جال الخط قلت ابوقف له اوصله واكسب اجره وانا صايم يوم قربت الا
الي يأشر اسد واقف على رجلينه المهم وقفت وفتحت دريشة الراكب

قلت : وين يالحبيب
قال : انزل ابيك بموضوع
قلت : وش تبي
قال : انزل ابضاربك
قلت : يارجال اذكر الله انا مابيني وبينك شي
قال : تبي تنزل والا سحبتك على وجهك بالسفلت
قلت : مابقى الاهي بس وخر ابوقف بالتراب

وانا انزل بالتراب وانزله يوم نزلت الاه حاطن يده اليمنى ورى ظهره يوم لمحته الا به قلم ابوريال الي مافيه امل ينكسر
الاه ناوين ينشبه بجبهتي وانا ارجع للسيارة وافتح الدرج واخذ المشرط حق التظليله واجيه ركض والله لايوريكم
ماتشوف الا الدمامين وخذ شيل وحط وكم سلفكس خلفي وكم بقس ويوم تعبنا وانا اتغافله وبالمشرط مع البطن
الا مصارينه بالارض ويقعد يحوس وانا اوجهه للقبله واذتسيه ذتساتن شرعيه وافتح شنطه السيارة واعلق به حبل
وابدى اصلخه الا يوم مروا من عندي اثنين على جيب شاص وانا ااشر لهم ويجون واحلف عليهم الا ينزلون يتغدون
معي قالوا ابشر وانا احمس لهم التسبد

الاسد المهايطي الي ذبحته وتم تغطية وجه الجنط لاسباب امنيه
قلت : الا ياجماعة الخير الرياض كم تبعد من هنا
قالوا : اربع وسبعين كيلو
قلت : افاا اجل وش رايكم نتقدم لنا سته كيلو عشان يجوز لي افطر
قالوا : الراي رايك

ونقوم نتقدم لنا سته كيلو همن نزلنا وانا اكب الغدا وارفع راس الاسد بالشنطه قلت ابهديه لامي
وانا اكبس لهم هاك الكبسه ونتغدى ونعين من الله خير ويوم خلصنا واضبط لهم براد شاهي يحبه قلبك ونتقهوى
قالوا : الا ياللحية الغانمه انت وش جابك هن
قلت : ابد جاين اشتري ضحايا تدلون لنا احدن قريب يبيع لنا ضحيتين
قالوا : اي والله به قبيله السراسره حلالهم طيب حتى الذبيحه يالله تمشي من النعمه
قلت : اوصفوا لي
قالوا : مايحتاج وصف امش عشره كيلو همن انزل يمين وامش صحراء سبعة كيلو تشوف بيوتهم بذاك
قلت : الله يعطيكم العافيه

وانتفارق انا وياهم وامشي على وصفهم الا يوم وصلت القبيله وادخل واتمشى بشوارعهم الا مادريت الايوم احجرون
وينزلونن من السيارة ويكلبشونن
قلت : وش السالفه ياجماعة الخير
قالوا : لاتكلم ترى اي كلمة تسجل ضدك
قلت : حسناً حسناً أريد محامياً << متعود يقرا الترجمه حقت الافلام
قلت : صدز وين رايحين ووش السالفه
قالوا : حنا رايحين لزعيم القبيله طلمس السرسري والآن انت متهم بقضيه من الدرجه الاولى
سكت انا لين وصلنا بيته اقصد عشته ويوم دخلنا عليه الا ام العبيد جايته معصب وخشمه منفرش زود ووجه يخوف
والسيف بيده قلت افاا يالجنط تخاف المهم

طلمس السرسري زعيم قبيلة السراسره

قال : وراك تذبح ولدي
قلت : اي ولد
قال : وائل بن طلمس السرسري
واتقطع من الضحك قدامه
قلت : وائل وطلمس خخخخ ماعليش ياحضرة الزعيم بس ما اتوقع بانتاجك واحد يستاهل اسم وائل وجهك ما يساعد
الا يوم حمدز زياده ورفع السيف

وائل بن طلمس السرسري

قلت : يابن الحلال اصبر وعلمنا وش السالفه
الا يوم هدا شوي همن
قال : السالفه ان لي ولد اسمه وائل كنت اعده ياخذ زعامة القبيله من بعدي وهالحين الولد مختفي له كم يوم وان
شوفت عينك كبرت ولا عندي عيال غيره الا بنت وحده ماتقدر تقود القبيله
قلت : طيب انا وش دخلني
قال : مافيه غيرك الي قاتله
قلت : يابن الحلال اذكر الله ماقتلت احد واصلا وش خلاكم تشكون بي من بين الناس
قال : ماقتلت احد والدم الي على صدام سيارتك الوراني
قلت : اهاا هذا السبب
يابن الحلال السالفه ومافيها انه اليوم وقفني اسد وتهاوشت انا واياه وذبحته وعلقته على شنطة السيارة يوم اصلخه
قال : طيب عندك دليل والا ننتظر تحليل DNA
قلت : راس الاسد معي بالشنطة

ويجي يرسل ناس يجيبون الراس الا طلع كلامي صح ويوم شافوا راس الاسد قاموا كلهم يرقصون حتى الزعيم طلمس
ويشيلونن ويحطونن على كرسي الزعيم ويجي الزعيم يفصخ الريش الي على راسه ويحطه على راسي
قلت : وش بكم انتم
قال : انت انسب واحد يقود القبيله وانا اتنازل عن الزعامه لك وابزوجك بنتي رفعه
قلت : طيب وش الي خلاكم تسوون تسذ
قال : انت اشجع واحد بذا وهالاسد الي ذبحته ماقدروا عليه اكبر شجعان القبيله
المهم وانا اعيي وهو يضغط علي بالاخير قلت له الزعامه يمكن بس بنتك اسمح لي اكيد انه تشبهك
قال : اصلا ماتاخذ الزعامه لين تاخذ بنتي لأنه لابد يكون الزعيم من العايله
قلت : خلاص اخذه بس هي تجلس ببيت وانا ببيت
قال : انت اشفه همن عطنا رايك
قلت : على بركة الله

قعدت شوي انا واياه بس ننتظر القهوة الايوم

دخلت هاك البنت
يوم شفته
وانا اعدل جلستي
وابلع ريقي
واعدل الريش الي على راسي
وابدا اطقق اصابعي

وتسلم وتحط القهوه وانا اقز وفاتحن اثمي
اقز
واقز
واقز
وهي مدنقه
مواصفات تووووووووووووب
بياض وزين وجسم . . . الخ

المهم
قامت واطلعت وانا التفت عليه
قلت : يخرب بيتك صدز ذي بنتك
قال : ايه بس امه فرنسيه
قلت : يالله عشر دقايق ابتروش همن ابدخل على مرتي

قعد يضحك وقال ابشر ياحضرة الزعيم عاد دخلت عليه في بيتنا الجديد الي صار بيت الزعامه ويم دخلت عييت
لا اطلع اول ثلاثت ايام خلون على راحتي همن بدوا يطقون علي وانا مزلب ابوهم ولا ارد << نايم بالعسل
وصار جدولي كله نوم واكل نوم واكل الا يوم الاثنين يصير جدولي اكل ونوم اكل ونوم
المهم مر على هالحاله شهر وخالي طلمس قفلت معه ضاعت امور القبيله وتدهور اقتصاد القبيله الايوم جاء ذاك
اليوم الاسود مادريت وانا مقيل انا ورفعه الايوم انكسر باب الغرفه وافز من السرير الاه خالي معه خيزرانه اطول
منه والشر بعيونه عاد من قرادة حظي اني صرت لابسن هاك الحزة قميص قطن خفيف ولا لبست تحته فنيله
ولاقال شي على طول بدا جلد مع كل جهه لما غديت جنازة ويستلم رفعه بعدي ويجرجره مع جدايله لم بيته
وياخذ مني الريش يوم جاء العصر وانا اروح لمه قلت ابستسمح منه واول مادخلت
قال : عمري اشوفك معتبن عندنا احش رجلك حش يالله اندزلع معك ساعه بس وان شفناك بالقبيله بعده
بنذبحك واجي اهج واركب السيارة قلت مانبي زعامه دام الدعوه تسذا وانكس للرياض يوم جيت للبيت اول مادخلت
واقابل امي بالحوش
قالت : تبي انتسب لك عشا << مافقدتن!! انواع الجفاف العاطفي
قلت : يامال العويفيه يا اميمتي مابي شي ابروح انام

******

خلاص انتهت
دمتم باحلى ابتسامة
أحسن واحد بالعالم
جنط السفينة


تعليقات 26

  1. ها الحين ذابحن الاسد خووي ( مخاوي الاسد) ومتمضرس على تسبده ولا متزوج رفعه في غيبتن مني عن القبيله انا ماخليتك جنط سيكل ابو ثلاث كفرات لونه كستنائي على موف وخل راعين الشاص ينفعونك طابخ لهم الاسد

  2. اولا: سلملي على الوالده وقلها ماينفعبوه الا من تسذا واردا. ثانيا: الاسد اللي أشرلك ما قلت لنا وش لون المناكير اللي حاط بأضافروه فوشي ولا برتكاني.(ارجو الاجابه على السؤال لما يحمل من معاني جمه) ثالثا: فتاحت العلب للي بخشم خالك وش مكتوب عليها ببسي ولا كوكاكولا.(هالسؤال ذا شخصي اذا ما ودك تجاوب تراه مهوب عادي ابزعل وابعلم عليك وبقول لامي تدعي على جنط يعني جاوب) رابعا: اسف الاطاله بهرجي ويسلمو حبيبي (جنط السفينه) على هالسالفه الطيبه واعتبره مجهود متعوب عليه وتشكرات مرتن ثانيه.

  3. هههههههههههههههههههههههه انا شفت ناس خبله بس زيك مافيش زاحف صرفت يوم كامل وانا اضحك الله يوسع صدرك وانت وذبايح الضحيه

  4. ههههههههههههههههههههههههههههه والله قصه حلووووووه وخاصه مشرط حق التضليل والله يخليلك امك تقبل مروري

  5. السلام عليكم ورحمة الله وبركاته سيداتي آآآنساتي وسادتي وفراشي… فلقد قريت موضوعكم… وأصابني منه أرتقاشي … وهو أرتقاش الاعضاء الباطنية الى موضع الصدر في عميلة الزفير والشهيق … حيث تتلاقا الكبدة والبنكرياس على كأس أميرة البلاد كرشة … علما ان النقل حصري على قناة ابو نواف الوثائقية الفضائية… أحبتي … ليعلم الكل !! أن ما كان كان .. والى ما هنالك فان … والموت حق … وبعد : من جد … قشطة هالموضوع زي المهلبية الحمراء اللي تشكشك اذا هفيتها سرقتها اخر الليل من الثلاجة … وسعابيلك … تتقاطر هبائن منثورا … من جد … قسنب (حركات حبيبي مخاوي خوية) ان ركبتي طرقعت وبطني زحف يمين من كلمتك في (والغنم يالله تمشي من النعمه) لووول جالس اتخيل شكلها .. لول … وصراويلها ابو كرسي XXL >> ماهيب مقاساتي أبددددد والذمه على البائع!! يسلموووووو على الموضوع هذا ويا شيخ رجعتني خمسنين (يعني خمس سنين) بس متعيجز اصلحها … لول … وين وصلنا … خمسنين قدام …أول اشارة ارجع عشر سنين ورى … كم تطلع ؟؟؟ يعني سبعه سنين ورى … الزبدة … زمااااااااااااااااااااااااااااااااااااااااااااان ايام الصراويل الخضراء عليها خط احمر … زماااااااان … ايام النقيب واحد والنيفيااا وام حلاوة … لول اقولك … ولك مني هدية برجيستون تكسي به جنطك !!! تحياتي يا حياتي واحد جديد أسمه سموكي سلفر .. لول … لالا امزح .. .سموكي مايند … بكرة الاقي واحد يغني لي خمسطاعشر رجال راحوا في امها من اجل كرتون!! Smoky mind !! Whenever you look back you will not see your back!!!! how come

  6. الو ؟؟ ايوة نسيت … ممكن ايميل الهيد حق الفاميليا اهل رفعه ؟؟؟ ابي ارسلة اذا البوزيشن حق الهيد شاغر او مليان ؟؟ لوول … <<< واحد تفك فكت ضلوعه من الموضوع وحلف الا يرد ويساوي انه حق نت!! والمشكلة ما يشيل في جيبة الا مفتاح الجيب ومفك علب تونه !!! كيب ليش يا فلان اكس طبعا للتمويه قال .. ما تدري وش زمانك مخبي؟؟ هو كان يتكلم .. أنا: وش مخبي يعني ؟؟ علبة تونه او حليب نيدو ؟؟؟ غميما هي ؟؟ واحد من الجمهور : مدري عنه !! sayonara << قود باي بالياباني @@ .. من جد اتكلم ... انت من وين تتكلم ؟؟ ASL PLZ?

  7. اهم شي حفلت الشواء متى هي؟؟؟؟ ومالك داعي تروح وتخللي رفعه تفكر هو جنط السفينه شلون قايل>>>>>>>

  8. دائما التعليق لن يخرج من إحدى شيئان إما سلب أو إيجاب .. وللأسف كنت أتمنى أن أمدح ولكن للأسف لم أجد ما أمدحه موضوعت ممل وسخيف أرجو أن تتقبل نقدي بكل صدر رحب ووالله أني عندما قرأت الموضوع ظننته شيء مهم فوجدته …. للأسف حتى السخرية فن ولا لايجيده أي شخص

  9. الله يررررجك يااا مستررر مهسترر <<<اللقب من عندي لك وطبعااا ماا أعرررفك بس أبي أقط الميااانه على طوووول خخخخخ الله لااا يحررررمناا من قصصك المبدعه يااا جنط السفينه وشكرااااا أخوووك @@كوبج جمب قطابه@@

  10. غربلتني معك ياجنط بس قويه سالفت الأسد والأقوه منها سالفت أمك أنها مافقدتك طيب اذا مافقدتك ليش ما افتقدك الغنم خخخخخخخخخخخخخخخخ أكيد علشان مو هي اللي دافعه الألف والثلاث ميه ههههههههههههه بجد يسلمو شي أبداع أنتظر جديدك وقديمك بعدك مثل هالنوعيه . سلامي أمــير الحــب

  11. رهف هلا بك حياك وش فيك تقل ما انت مصدقة اني احسن واحد بالعالم ؟ << وجه معصب ــــــــ ناوي اعقل هلا وغلا بصقيقي وش عندك تهايط انت ووجهك تبين انشب الشاحن بجبهتك ؟ << وجه يدودل شاحن آيسر بيده تصدق عاد ياناوي من اول احسب الموف نوع من انواع الحلى مادريت انه طبخة اندنوسية الا قبل شهر << وجه فاتحن اثمه هلا حياك ربي يالغالي ـــــــــــ Rb3 Rayl هلا وغلا بك اول شي يبلغ ثاني شي بالنسبة للسؤال الاول مع الاسف الاسد ماكان له اظافر اصلا والا تسان انا من صيد امس تصدق عاد اني اكتشفت بعدين ان هالاسد من آكلات البطاطس ثالث شي بالنسبة للفتاحة تراها فتاحت تونة رابع شي لا والله لافيه ايطاله ولا شي بالعكس مرورك اسعدني ــــــــ sama هلا بك يالغالي ايقالك تمدح هالحين مرورك عسل ياعسل ـــــــــــــ فهد الفهد هلا بك ياقلبي شكلك معك كوريلا 2002 << هم راعين التظليل مرورك قشطة ـــــ Smoky Mind منهو الي قايلن لك انه عصير تفاح الله يغربله ؟ خخخخخخخخخخخخخخخخخخخ قسم بالله انك مولي قمة الفغارة بس المشكلة اني مافهمت شي ذكرتني بيونس شلبي خخخ وبالنسبة للايميل فمعصي يشق تسبدك ترى مازال الحب موجود بس فرقتنا الاقدار حياك ياقشطة بالعسل مرورك ورد ــــــــــ jeera مافيه حفلات لأنك تبي تصقطون كالعادة اما رفعة فالاقدار فرقتنا << صدق مرورك اسعدني

  12. meshoo919 هلا وغلا بك أول شي مايحتاج تتمنى لأني بقبل ردك مهما كان ثاني شي مسألة السلب والايجاب ماهيب دقيقة لأننا نتصفح النت يوميا ونقرا مواضيع كثيرة مرة ولا نعلق الا على عدد قليل سواء تعليق ايجابي او سلبي وباقي المواضيع الي ماتجذب الاهتمام نقفل الصفحة دون ان نتخذ موقف منها ثالث شي كنت اتمنى انك وضحت وشي السلبيات لو على بريدي وصدقني صدري رحب واتقبل رابع شي عندي سؤال ما ادري انت بترجع تقرا الرد والا لا بس اذا قريته اتمنى الاجابة وهو هل اللهجة كانت عائق بالنسبة للموضوع ؟ أخيرا والله العظيم ان مرورك عسل ولا ضاق صدري ابد وأهلا وسهلا بك على كل حال ـــــــــ @@كوبج جمب قطابه@@ هلا وغلا بك وقط الميانة على راحتك جعلك تقط عن القطة بالاستراحة << استغلالي الله لايحرمني من مرورك ـــــــــــ أمير الجب << وش جبه هلا وغلا بالغالين ألغوا العيد هاك السنة عشان كذا مافقدت الغنم << ماتعوق معه تسلم والله على مرورك ياقوووشطة

  13. هذا طول الله عماركم بيوم عشرين رمضان الي فات حجينا انا واهلي ولله الحمد انواع التساهيل لازحمه ولا شي تصدقون عاد اننا رامين الجمرة ست مرات وتصدقون بعد اننا مذرين لقدر الغدا بالحوض الي به ابليس الحمد لله حجينا بكل سهوله همن رجعنا وبعد خمسة ايام وتحديدا يوم ثمان وعشرين شعبان وحنا صايمينن الست جتن امي وقالت : يالله ياجنط قم رح اشتر ضحاي قلت : وش ضحاياه قالت: ضحايا العيد ياأخوي وش قاعد تقول أنت رمضان ضحية حج ثانيا : طلمس السرسري زعيم قبيلة السراسره أرجو أنها لاتفهم غلط لأنها مرادفة لقبيلة عريقة في السعودية

  14. هلا عزيزي جنط اهلي وامسي عليك بكل حبا ً وكل حاجه حلوه .. اهنيك على موضوعك الرائع والذي خلاني اضحك كثير يا عزيزي .. والله اني بالدوام والنفسيه قافله ووحداني بهالدوام لكنك قدرت ان ترسم البسمه في براطمي .. راجين من الله ان يخليني لك قول امين .. وعلى فكره انا ودي ارسل لقروب بو نواف احس عندي موهبه وخاايف انها تندفن معي بقبري فكذا بظلم نفسي يا عزيزي الكاتب الكويس .. رد علي انا بحاجة اليك ][< هذي الجمله كانت تكثر منها الشغاله يوم ترسل لخويها او زوجها بأندونيسيا .. عالعموم يعطيك العافيه يالذيب والله لا يهينك وشق طريقك وحنا معك الى الامام ولا لك ولا عليك من اللي ينتقد قول له اي اي طيب مشكور واسفهه يا رجال هوووووع نياهاهاهاهاهاهاهاهاااااي تقبل مروري وشرطتي والدفاع المدني / شخص محكوم عليه بالاعدام شنقا ً بالرصاص ( هارب من العداله )

  15. جنط….تجنن موضوعك رهييييييييييييييييييب فطسني ضحك ياحلوووك..دمك خفيف مره >>ذكرتني باختي الصغيره تقول ليش مانحج بالصيف بس والله انت منسم ومهستر بقوه بس ماشالله رهيييييييب تسلم..ولاتحرمنا من كتاباتك

  16. الحين هذا جزى اميمتك يابعد تسبدي هي !؟ صدز ناس ماينفع معهم إلا الحافر وجلد الكافر =>> فطست ضحك وجت أمي تشوف واعتلدزت هههههه ماجاز له حتسيك عن أمك تقول أمي يامال الصلاح بلاك ماجربت الحمل والله ان تعجز عن يوم واحد ! أنت وش يدريك ( حتسي أمي ذا ترى مهوب أنا ) المهم بعيد عن ماما الحبيبة الصدز انه جاز لي مويضيعك أول مرة أحس ان فيه أحد يحتسي حتسيي أشوى أثري منيب من كوكب المريخ ! * ملحوظة : ودي اشوى صورة رفعة !! كزه لي الله لايهينك

  17. هههههههههههههههه ياحبي لرفعه وش صار عليها ياقليل الخاتمه تخلى عن زوجتك

  18. هههههه الله يقطع ابليسك والله اني بغيت اموت من هالقصه انت وحمتك رفعه والله فله ننتظر باقي مواضيعك يالجنط .. وسلم على مومتك

  19. جنط الموضوع مره حلوه وعجبني مره فطستني من الضحك دمكك مره خفيف ماشالله تسلم ولاتطوول علينا

  20. اقسم بالله نرفزتني احس ودي اصكك بالشاحن الشره مهوب عليك الشرهه علي يقرالك<<محد حالف عليك تقرين.. جنط انا مرره طفشانه شسوي<<طاقة الميانة وياااك.. ترى ماعندي ماعند جدتي بس حبيت اقول بعد هالهذرة اللي فوق انك احسن واشجع واقوى وازين وااحد بالعالم<<لاتصدق ارفع معنوياتك بس,,

  21. على إني احب الاستهبال وخفة الدم الا اني لاحضت في موضوعك الاستخفاف بشعائر الدين طبعا انت جبتها باسلوب الغباء والدلخه من اجل الضحك والتسلية بس اسمح لي اقول لك انك باسلوبك هذا تستهزئ في دين رب العالمين لاتزعل وتقول لا ان ماهو قصدي انا ادري انه ماهو قصدك ولا قصد اي انسان مسلم لكن هذا خطا منك وانت ما انتبهة نصيحة لك انك لا تستخدم هذا الاسلوب مع دين الله سبحانه وتذكر انك تضحك الناس ولكن لا تعلم ماهو مصيرك عند رب العالمين

  22. ههههه حلوه منك بس لاتعيدها بس على فكره ما شفنا رفعه اغريتنا فيها بالصراحه قصه ولا اروع

  23. بسم الله saad هلا وغلا فيك صدقني اول مرة اسمع ان فيه قبيلة بالاسم ذا حياك الله ــــــــ محكوم عليه بالاعدام شنقا ً بالرصاص هلا ومسهلا فيك اكثر وجعل البسمة دوم على براطمك السوداء الجميلة والي بينتقد حياه الله بعد الصدر اوسع من الدهنا حياك الله ياخلفهم ــــــــ h N d تسلمين على مرورك وشاكر لك كلامك الجميل ــــ رفعة ههههههه هلا بتس وبالنسبة لامتس قولي له يقول الجنط تراكم ذليتونا بهالتسعة اشهر طلعن بطاعونه خخخخخ يالبى قلب الامهات كلهن والله لو نذبح انفسنا عشانهن ماردينا لهن نص حقهن الله يحفظهن لنا ويقر عيوننا بشوفتهن ويرزقنا برهن وبالنسبة للكوكب ترى كلنا من كوكب الشردز المتوسط من دزبله << اتحدى واحد يدله وبالنسبة للصورة اقول لتس معصي تشوفين محارمنا يالي ماتخافين من الله ــــــ هيوني هلا بك ومسهلا رفعة انتحرت من الحب << ماتعوق معه ـــــ sweet هلا ومسهلا يبلغ ان شاء الله وجعل البسمة دوم ان شاء الله ــــــ هند هلا بك وتسلمين على الكلام اللطيف ــــــ يارا خخخخخخخخخخخخخ طفشانة وانا وش دخلني يعني تبيني اشتغل مطفشاني << يعني مزيل الطفش بس ما ادري وش الي نرفزك عسى موب الموضوع ؟ اما ان ماعندك ماعندي جدتي فما يحتاج تقولينها لأننا عارفين من زمان << وجه ميت من الضحك حياك الله

  24. الزاحف هلا ومسهلا بك عدد حبات الرمل وقطرات المطر اقسم بربي انه اسعدني جدا مرورك وتنبيهك الكريم بس كلمة اني استهزئ بالدين قوية شوي لو لاحظت معي أخوي الكريم ان ما استهزأت بالشعيرة نفسها يعني ما استهزأت بالحج مثلا لكن استهزأت بفعلنا حنا يعني الاستهزاء جاء على فعلنا حنا الي حجينا بوقت موب وقت حج والا انا عارف ومؤمن ان الاستهزاء بالدين كفر اكبر مخرج من الملة انا معك اني جيت في موقع شبهه بس ترى من اول وانا حاسب حساب ذا الشي وعلى العموم انا اعترف اني اخطيت في اقحام مثل ذا الكلام الي فيه شبهه مع اني ما ارى انه استهزاء بالدين لامن قريب ولا من بعيد لوكنت ارى انه هالشي كان ماكتبته من الاول بس فعلا اتقاء الشبهات ضروري صدقني اخي لكريم ان مرورك اسعدني جدا وتنبيهك اسعدني اكثر ولا اقول الا كثر الله من امثالك فعلا حنا نحتاج النقد والتنبيه خصوصا بالامور الشرعية بارك الله فيك وياليت كل ماشفت على اخوك شي تنبهه على ذا الشي وترى الصدر كبر الدهنا مايضيق بشي والحق احق أن يتبع جزاك الله خيرا وكتبها في موازين حسناتك

  25. X.O يامال الوجع وش تبي برفعة << وجه معصب خخخخخخ هلا ومسهلا بك يالغالي بس مايصلح نطلع محارمنا حياك الله على مرورك ياعسل بالقشطة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

ماقلت لكم قصتي يوم أروح أشتري الضحية

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول