لماذا تسذا ؟


بسم الله الرحمن الرحيم
السلام عليكم ورحمة الله وبركاته
/

في يوم من الأيام كنت جالس عند بقالة عبدالجليل بعز القايلة وعادتنا أنا و علي أبورجل مسلوخة إننا نجتمع بعد الغد
كل يوم عند هالبقالة ، وبينما أنا جالس إذ بي ألمح سدرة تمشي من بعيد وأجي أنادي عبدالجليل قلت : شف سبحان الله
شجرة تمشي / ، قال : ( هذا مافيه شجرة هذا ألي أبو رزل مسلوكة بس مايلبس شماق ، بأدين أنت هرامي ليه
مايزيب فلوس ، كل يوم شيل بيبسي وكلام بكرا يزيب فلوس / ) .
قلت : سبحان الله ! شجرة وتمشي على الأرض ، اسلم ياعبدالجيل ترى كل هذي آيات ترسل لك ياعبدالجليل / .
قال : أنا فيه مسلم بس أنا معلوم ، أنت نصاب كلام كدا عشان مايزيب فلوس / .

دخل عبدالجليل البقالة و وصل علي أبورجل مسلوخة إلا فعلاً طلع هو بس لأنه نحيّف وحاطن الشماغ على الكتف
وشوشته طايرة صايرن تقل سدرة من بعيد / .




سلم وجلس وقعدنا تسولف ، قال : عسى ماشر يالجنط أشوفك ضايقن صدرك و وجهك أسود ماهوب على العادة ،
قلت : مافيه شي / ، قال: إلا فيه بس قل لي ، قلت ، خلها في القلب تجرح مابقى / ، قال : أقول لا يكثر بس يالجنط وقل
لي وش صايرن لك ؟ ، قلت : يارجال أنا لي علاقة حب مع وحدة / بس المشكلة بيننا عقبات ولا يمكن نوصل لبعض / ،
قال : أفااا السالفة فيها حب ، بس علمني وش السالفة ومن متى بدت هالعلاقة ومن هي هالبنت يمكن أٌقدر أساعدك ؟

قلت : العلاقة بدت قبل شوي ، قال : طيب من هي ؟ ، قلت : بنت أبوزيد المنجلط ، قال : طيب وشلون صارت علاقتكم
وهل فيه كلام بينكم ؟ ، قلت : لا والله بس قبل شوي مرت سيارتهم من هنا وبدت العلاقة / ، قال : طيب أشرت لك ؟
عطتك الرقم ؟ ، قلت : لا ، أصلاً سيارتهم مضللة ولا أدري إذا فيه أحد ورا وإلا ل /، قال : طيب وشلون تقول إن فيه
علاقة حب ؟ / ، قلت : مدري والله بس حدسي يقول لي إن لو فيه بنت ورا يمكن تطيح بحبي /.

قال : تبين أعفط وجهك هالحين أنت وحدسك ؟ / ، قلت : ليه ؟ / ، قال : وشو حدسك يقول لك ؟ بعدين أنت ماصدق صدقك
يصدق حدسك ؟ / ، قلت : ما أدري بس أنا حبيت بنت أبوزيد وخلاص هي لي وأنا لها هذا حكم القدر يا أبورجل / ، قال : صاحي
أنت ؟ ، قلت : علمتك عاد وإذا كنت أنا أقدر أصبر وأتحمل جروح البعاد فأنا ما أضمن لكم وش تسوي البنت بنفسه / ، قال : أجل
مافيه إلا إننا نجمع بينكم بالحلال ، قلت : هذا الي لازم يصير .
قام أبورجل ودخل على عبدالجليل وأخذ منه بطاقة سوا واثنين بيبسي وأقنعه إنه يجيب له الفلوس بكرا/ ، بعدين طلع ودق على
أمه وبعد السلام ، قال : يمه الجنط قرر يعرس ويكمل نص دينه ونبي نسألتس عن البنت وش أخلاقها وهل هي ربة بيت صالحة
وهل تصلح تصير زوجة المستقبل للجنط ؟ / ، قال : والله والخيبة ، هالحين خل الجنط يكمل نص دينه الأول بعدين يدور نصه
الثاني ، وبعدين من هي الخبلة الي تبي تقبل بهالداشر ؟ / ، قال : يمه احترمي نفستس أصدقائي ماهم دشير / ، قالت : ما أدشر
منهم إلا أنت ،أصلاً ما دشرهم غيرك / ، قال : يمه خليتس واسطة خير ويابخت من جمع بين راسين بالحلال /، قالت : طيب
من هي تعيسة الحظ الي هو يبي ؟، قال : بنت أبوزيد المنجلط ، قالت : الله يرحم حالك ياوليدي أنت وخويك / ، قال : أفا يمه
عسى أخلاق البنت مافيها شي ؟، قالت : أصلاً أبوزيد ماعنده بنات وكل ضناه عيال ومرته أبلشتنا بهالأعشاب عشان تبي تجيب
بنت لما عجَّزت وهي ماجابت بنت، قال : أهاااا يالله أجل مع السلامة << خلص الشحن

يوم قفل التفت علي وقال : أجل حدسك يقول ، أنت ووجهك الي تقل ظهر سلحفاة ؟ / ، قلت : والله إني داري إن البنت داشرة /،
قال : أصلاً أبوزيد ماعنده بنات ، قلت : أفاااا وش تقول أنت ؟ /، قال : جاك العلم ، قلت : ياحسافة كل هالحب الي كنت أحبه ،
وأنا قاعد أحلم إني أجي على حصان أبيض و آخذها ونطير / << لاعبتن فيه أفلام ديزني /

قال علي : طيب و السواة هالحين ؟ ، قلت : ما أدري بس ترى إذا ما أعرست أبنحرف / ، قال : وأنت هالحين وشو يالشين ؟ /
قلت : اخلص علي ، ماله داعي بكرا يطلعني صلاح الغيدان ببرنامج ( 99) وأنا مكفوش بالبطحا مع شلة بنقالية ومكتوب
بالشاشة : ( القبض على الدكتور جنط السفينة يمارس البغاء ) / ، قال : ابشر يالجنط والله إنك عزيز وغالي وياما وقفت معي
وأنا هالحين لازم أوقف معك ، بس أنت عطني أسبوعين وأبشر بالي يرضيك .

مرت أسبوعين وكنها سنة وأنا أنتظر ، و أول ماشفت علي نقزت بحلقه وقلت : وين مرتي ؟ << شنطة ذي ماهيب آدمية
قال : والله يالجنط إني لي أسبوعين أدور لك بنت الحلال الي تقر عينك ، قلت : هاااه وبشر عساك لقيت ؟ ، قال : لقيت لك
وحدة تقدر تقول زوجة وبنفس الوقت مشروع اقتصادي ملعون والدين /، قلت : منهي بسرعة ؟ ، قال : حصة الصالح مرة
هزاع المنفهدز الله يرحمه ، قلت : تستهبل أنت ووجهك الي تقل معدة وحيد قرن ؟ / ، قال : لا يالدلخ ، بلاك ما تدري كم ورثت
من هزاع ،ورثت سبعة مليون وهي عقيم يعني ما وارثها غيرك يالدلخ و أكيد إنها تبي تعيشك بنعمة ونفتك من حياة الشقا الي
عايشينها/ ، قلت : طيب ذي عجوز عمرها سبعين سنة و أنا أبي شابة أعيش معها الحب والرومانصية / ، وش تبي تفيدني
الفلوس ؟ ، قال :أنت إذا تزوجتها نقدر نزرفها على كيفنا ، وأنت قلها تسلفك عشان تفتح مشروع وهي أكيد بتساعدك وأنت بهالفلوس تزوج على شابة و ابسط عمرك معها ، قلت : عز الله إن جبتها يا أبورجل منها فلوس ومنها أتزوج و أنبسط /.

وعلى طول نقزت لبيتنا ويوم دخلت لقيت أبوي يتقهوى هو وأمي بالحوش ، قلت : يبه ! ، قال : وحطبة ! ، قلت : يبه أنا أبعرس / ،
وأول ماقلتها ما دريت إلا يوم بخها أبوي وأمي ضحك و الي قهرني صدق إن أمي تمد يدها لأبوي وتقول دقه / ، وأنا أنواع علامات
التعجب ، قلت وش بكم وش الي يضحك ؟ / ، قال : افرض إني وافقت ، قل لي من هو الخبل الي بيزوجك ؟ ، قلت : أنا اخترت
البنت ولا باقي إلا إنك تروح وتخطبها لي ، قال : ومن هي هالخبلة ؟ ، قلت : حصة الصالح مرة هزاع المنفهدز الله يرحمه ،
مادريت إلا يوم انسدح أبوي بالأرض وقعد يرفس ويقول : جبت لي ( الزغط والسوكر ) وكتمت نفسي ، ربنا ينتقم منك ياعاق /،
جبت لي ( الزغط والسوكر ) وكتمت نفسي ، ربنا ينتقم منك ياعاق / ، جبت لي ( الزغط والسوكر ) وكتمت نفسي ، ربنا ينتقم منك
ياعاق /<< الله يهديه أبوي مايعرف يمثل /

قلت : أقول لا يكثر بس خربت علينا القصة أنت وخطمتك الي ما أدري وش تبي / ، و أصلاً أنا غاسلن يدي منك من يوم دريت إنك
تتابع مسلسلات محمد حمزة /، بعدين قمت و رحت لبيت علي أبورجل مسلوخة .

قعدت مع علي وشرحت له الوضع كله ، قال : طيب منين ندبر لك ولي أمر ؟ ، قلت : والله ما أدري يا أبورجل بس شكله مافيه
إلا أنت مع إنك ما تواجه بس وش نسوي الجود من الماجود / ، قال : قدام يالجنط يالله خل نروح لبيتها << فديته أبورجل يبرد التسبد /

رحنا وطقينا عليها الباب وفتحت لنا وقعدت تلكمنا من ورا الباب / ، بعدين قال لها أبورجل : والله يا حصة حنا جايين نخطبك
للجنط ،هاه وش قلتي ؟ ، قالت : والله يا أبورجل أستحي لا أرد عليكم /، قال علي : لا حياء في الدين هذي سنة الله ورسوله ، قال : اللهم صلِّ على محمد ، أجل تراي موافقه ، بس كم مهرك يالجنط ؟ ، قلت : والله مامعي فلوس ياخالة / ، قالت : خالة بعينك
يالتسلب / يالله اندزلعوا دزلعكم الله ، قال علي : تعوذي من إبليس ياحصة ذي زلة لسان تخبرين الجنط مرتبك ، قالت : عسى لسانه للقطع / .
جيت أنا نغزت علي وقلت : الي هذا أوله ينعاف تاليه ، خل نهج بس /، قال : اصبر شوي كلها كم يوم وأنت مكوش على الثروة ،
همن تروح أنت ومرتك الثانية تقضون شهر العسل بالثقبة / << عليك طموح بعد/

قال علي : هاه وش قلتي ؟ ، قالت : كم مهركم ؟ ، قال : والله يا حصة إن الجنط يشرى شرا وأنا لو لي خوات كان زوجته ببلاش /
قلت : اقطع واخس بس وعطني زبدة الهرج /، قال : ما معنا مهر هالحين بس إن شاء الله ندبره بعد العرس ، قالت : ايه قل تسذا ،
أجل تراي موافقة بس بشرط نكتب المهر مؤخر ، وترى مهري 100 ألف ، قال : ابشري بالي تبينه ، وترى موعدنا باتسر إن شاء الله
المغرب كلمي حدا أقاربتس يجي وأنا أبجيب المأذون ، قالت : إن شاء الله .
وحنا راجعين قال لي علي : عاد يالجنط ترى هالعرس قطة بيننا ، أنا الي جبت الفكرة و أنت الي بتنفذ ، ماهو بكرا إذا كوشت على
الثروة تسحب علي ترى المكسب النص بالنص بيني وبينك / ، قلت : وش دعوة يا أبورجل ، هذي مايبي لها كلام .
وفي اليوم الثاني بعد المغرب اجتمعنا في بيتها وجاب علي المأذون وكتب عقد الزواج ، وبعد صلاة العشاء دخلت على زوجتي /.

الفصل الثاني :

أبورجل : أنت صاحي يالجنط ؟ هالحين مالك أسبوع متزوج وهالحين تقول أبطلق ؟ /، قلت : والله ما أرجع لها لو على قطع رقبتي
/، قال : أقول اعقل بس لاتخرب مشروعن / ، قلت : أصلاً مشروعك خربان خربان ، العجوز طلعت استغلالية و بخيلة وتحاسبني على الريال، كل يوم تفطر زبادي بخبز وتسجلهن على حسابي بالبقالة / ، قال : طيب يارجال اصبر شوي كلها كم يوم
وتموت إن شاء الله /، قلت : أنا كنت أقول كذا ، بس اليوم الصبح جتني وقالت أبيك تدفع لي إيجار عن سكنتك معي بالبيت / و أبيك تعطيني مصروف ألف وخمسمية ريال كل شهر / قلت لها أقول انقلعي عن وجهي /وقمت أخذت فراشي ورحت للملحق و
أول ما انسدحت بفراشي إلا يوم دخلت علي بالعجرة ولا أمداني أتحرك إلا يوم اشطفت راسي بالعجرة /، والله يا أبورجل إني نجوت بأعجوبة /، قال : أفاا إثر الأمور واصلتن هالمواصيل ، قلت : يارجال عمرك شايفن أنثى ماتمشي إلا ومعها عجرة ؟! /، قال : لا أبد أهم ماعلينا سلامتك يالجنط .

سكتنا شوي بعدين قلت : أنا هالحين صرت مشرد يا علي / ، أبوي وطاردني وهالعجوز مافيه أمل أرجع له / ، خلاص يا أبورجل
أنا صرت بدون مأوى ماراح يستقبلني إلا دار الأيتام ، قال : وش دعوة يالجنط ، عين فراشن لك وعين غطا ، و أنا أصلاً ماحطيت هالملحق إلا للي مثلك وشرواك ، قلت : شرواك الطيب بس أنا ماودي أثقل عليك ، امش وصلني لدار الأيتام /، قال : انثبر بس ،
نسيت إنك قاعدن بهالملحق ثلاث سنين يوم قصتك ( لن أعيش في فروة أبي ) /، وهالحين جاين تقول أثقل عليك !
مرت ثلاث أسابيع كأنها يوم من الوناسة بهالملحق ومافيه إلا قوة بلايستيشن وفلة حجاج ونسينا الموضوع ، وفجأة جاني اتصال من
أبوجلمبو ، وبعد السلام والسواليف ، قال : يالجنط ترى الدوريات لها أسبوعين تدور بالحارة تدورك ، انتبه تطلع /، قلت : أفا ، وش يبون ؟ /، قال : يدورونك عشان مرتك رافعتن عليك قضية ومن قرادة حظك مدير شرطة حارتنا ولد أخت مرتك ومتحلفن فيك تحلف/ .

سكرت التلفون وقلت لعلي : وش السواة ؟ ، قال : ما أدري بس مالنا إلا نكلم محامي ، قلت : وأنت تعرف محامي ؟ ، قال : ايه ترى
ورقة بلوت بعد ماطلع من السجن صار محامي ، قلت : سبحان الله من حرامي لمحامي / ، قال : ايه يارجال مافيه أسطوانة غاز ول استبنة سيارة إلا سرقه لدرجة إن فيه واحد من جيرانهم حاطن لوحة فوق غازاتهم كاتبن فيها : ( إلى الأخ ورقة بلوت المحترم : إذا كنت
جاي تسرق الغازات أرجو منك أن تتصل علي رقمي ###0504897 وراح أعطيك قيمة الغازات بس لاتخلينا نتعب بشرا غازات جديدة ) ويقولون بيوم من الأيام كان ورقة بلوت طابن بحوشهم الساعة وحدة بالليل بيسرق الغازات بس يوم شاف اللوحة دق على الرجال وج
الرجال طلع له بسروال نص وفنيلة علاقي و يوم جا بيعطيه الفلوس طلعت قيمة الغازات 450 ريال وهو مامعه إلا خمسمية جا ورقة بلوت أخذ الخمسمية وراح صرفها ورجع له وعطاه الباقي /، وشف سبحان الله هالحين فاتحن له مكتب محاماة بمحطة على خط القصيم /، قلت : يالله توكلنا على له .

دخلنا على ورقة بمكتبه وسلمنا عليه وصب لنا قهوة بكاسات المراعي / ، بعدين شرحنا له الموضوع كله ، قال : شف أنت هالحين
متوهقن بين خيارين ، يا إما إنك تنفق عليها و إلا إنك تطلقها وتدفع المية ألف و أنت خسران بكل الحالتين ، قلت : طيب وش الحل ؟ ، قال : فيه حل بس ترى لو ننكفش بنروح فيه / ، قلت : مايخالف ، قال : أنت أول شي تصلح الأمور معها وترجع لها ، بعدين
تقول لها بنسافر للقصيم ، بعدين لامسكتوا الخط أنا بخلي صديقي الباكستاني يوقف تريلته على يمين الخط و كأنه يصلح الكفر ، وأنت تجي مسرع وتصدم التريلة وتخلي الصدمة من جهة الراكب وهي إن شاء الله بتموت / ، وبكذا أنت تكوش على الثروة كلها ، بس ترى
أتعابي مليون 950 ألف لي وخمسين ألف للبكستاني / ، قلت : أقول طس بس ، قال : بكيفك أنت الخسران ، قلت : أكيد فيه حل ثاني / ، قال: لاتتعب نفسك يا إما تنفق يا إما تطلق ، بس مايخالف بكرا أن بروح للمحكمة وإن شاء الله بسألهم وش صار على قضيتك .

طلعنا من عنده وأنا ضايقن صدري ، قلت لعي : شفت وش يقول هالمجرم ؟ / ، قال : يارجال أنا غاسلن يدي منه وعارف إنه
نصاب ، أجل معلق لوحة وكاتبن فيها ( يوجد لدينا زرافة للبيع ) ويوم دخلت بالحوش بشوف الزرافة لقيته جايبن بعير وصابغه بني بأصفر / ويقول زرافة .

/

من بكرا دق علي ورقة بلوت وقال : ترى أمس كانت مناقشة قضيتك والقاضي حكم عليك غيابياً ، قلت : بشر وش الحكم ؟ /، قال :
حكم عليك بالسجن خمس سنوات /، ودفع مية ألف لحصة الصالح / ، والمنع من الكتابة في قروب أبونواف إلى الأبد/ ، قلت : تستهبل أنت ؟ / ، قال : لا والله صدق ، قلت : أعوذ بالله وش هالحكم الظالم / بس أنا أوريهم والله ما أسلم نفسي / ، قال :
بكيفك بس انتبه ترى الدوريات يدورونك و قالبين الأرض عليك /.
مر شهر على صدور الحكم وأنا من ذاك اليوم ماطلعت من ملحق علي ، و فالين أمها بلايستيشن و وناسة على كيفك ، وفي فجر يوم
من الأيام قاعدين نلعب بلايستيشن أنا وعلي ، ما درينا إلا نسمع هالصوت برى البيت :
الرقيب سعيِّد : عمليات … عمليات /.

الضابط ( ولد أخت حصة ) : حوّل حوّل .

الرقيب : قمنا بمحاصرة البيت كله و الجنط الآن في الملحق يلعب بلايستيشن هو وعلي أبورجل مسلوخة والآن الدقيقة 35 من الشوط
الثاني و الجنط متقدم اثنين واحد / << مسوي دقيق هو وكرشته /
الضابط : توكلوا على الله وداهموا البيت وإذا حاول المطلوب الهرب اطلقوا عليه النار / .

الرقيب : عُلم عُلم .

مادرينا إلأ يوم انكسر باب الشارع حق البيت ودخل عشرين عسكري مدججين بالأسلحة / وأقوم أنا وأنقز وأقفل باب الملحق ،
وبدون تحذير ولا شي على طول بدوا يكسرون باب الملحق ، قلت لعلي : وش السواااااة هالحييييين ؟ / ، قال : مانقدر نقاومهم ، مافيه إلا إنك تسلم نفسك / .

وبهالحظة بدينا نشوف الفاس يدخل علينا والباب قرب ينكسر ، قلت : لايمكن أسلم نفسي ياعلي /، والله ماهمني السجن بس لايمكن
إني أتوقف عن الكتابة بالقروب/ ، قال : طيب وش رايك تنهي القصة على كذا قبل يمسكونك ؟ / ، قلت : قسم بالله إنك جبته / .
نووووقطة /


خلاص انتهت
دمتم بأحلى ابتسامة
أحسن واحد بالعالم
د. جنط السفينة /


تعليقات 68

  1. ربي يوسع صدرررك مثل ماوسعت صدرنا يالجنط 8) ضحححك من فجر الله خخ 😀 اما النهايه مؤثره جداً 😮

  2. هههههههههههه قصة رووووعه ضيعت الطفش ربي يسعدك دنيا وآخره ويفكك من حصه 😀

  3. ههههههههههههههههههههههههههههه صراحه انا طبيت على مواضيعك هنا وفي منتدي ( ما ابي اسوي دعايه بعدين يزعل ابو نواف ):D صراااااحه انت مجررررررررم لا ماشاء الله عليك عندك اسلوب بالقصه او الموضوع رااااااااااائع بس اتمنى منك تكثر مواضيعك لاني دورت وكلها قريتها ولله الحمد لكن نبي زود وانا اخوك :$ الف شكر يا جنط

  4. رووووووووووووووووعه تسلم يمينك د.جنط السفينه لاعدمنااااااااااااااااك

  5. 🙂 يسعدك ربي على هالقصه مع أني ما احب أقراء قصص :~ لكن جد الله يوسع صدرك كآنك وسعت صدري 😀 آلف شكر دختوور 8)

  6. ههههههههههههههههههههههههههههههههههه والله انك مبدع ههههههههههههههههههههههههههه طيب كان لعب لعبه ثانيه عليها عيشها بحب وسلب مااوراهااا بس شكله بثر بس والله خويه فزززعه يااهيك الخوه ياابلا مبدع مره ثانيه ولاتحرمنا من هيك مغامرات8)

  7. والله انك مصرقع فنان .. جعلت فراغك بالخرابيط لتضحك الناس هي قصة عربجية بحته مزجت معها روح التضحية بين الصديقين آمل منك ان تكتب لنا قصة آخرى جميلة ومؤثرة لتشهد لك يداك بما كتبته يوم القيامة .. تقبل تعقيبي بصدر رحب هداك الله

  8. ههههههههههه بصراحة قصة خيال ورووووووووعة لكن بصراحة لو إنتهت احسن من كذا كان ااحسن >>كان متحمس ومندمج للأخير بالقصة ….:( على بالي تنتهي بحب ومن هالخرابيط :D>>>متأثر بالمسلسلات

  9. خخخخخخخخخـ تسلم علـى القصه الرائعه 😀 د.جنط السفيه8) احسن واحد بالعالم من جد:D

  10. لا لا لا لا ابي ابي ابي مالي شغل خلك تنسجن ابي اشوف العجيز وهي تعذبك اهئ – ماهيب شريره ابد هع يسلمو ع القصه مرا خرافيه اهنيك ايها الجنط 😀

  11. كتابتك كميديه ينقصها الحبكه والتسلسل ركيك والاغراق في العاميه كان واضح والنهايه المبتوره لسبب ركيك …… ههههههههه لا من جد راااااائع الله يوسع صدرك بالعافيه من جد لك مستقبل الله يحفظك

  12. ههههههههههههههههه والله اني فطست ضحك .. نأمل ان تكمل القصــه .. وخويك علي عزالله انه شنــب 8) ..

  13. ههههههههههههههههههههههه آويلي على النهآآيييه آجل نووووووقطه ههههه بس من جد القصصه مآره فلته العوآفي

  14. الف حمدلله على السلامه اخوي جنط والله اني كتبت لك التعليق وانا بعدني ماقريت القصه لاني فرحت بشوفتك الغاليه ودامه قلمك اكيد ابداع ولا شلون فقدناك؟؟؟؟؟

  15. فعلاً والله إنت دكتور إعتبرني معجب جديد من المعجبين بقصصك .. أسعدك الله دنيا وآخره

  16. هععع الله يسعدك ياارب تكفوون طلبتكم يالربع احد فيكم يعرف سعوود العتيبي اللي سافر الريااض من مده

  17. هههههههههههههههههه ابدااع صراحه .. والحمد الله ع السلامه سمعنا انك مسوي عمليه ؟ :$

  18. يـــــاراجل….والله شققت بطونا من الضحك:$ من جد انا لو مخرج انكان اخرجته دراما لرمضان الجاي وانت البطوله بس انت عارف طبيعت عملنا

  19. الحمد لله على سلامتك واخر الشر اخوي والله يلبسك لاباس العافيه الدائم اسعدتن القصه مثل ما اسعدن ظهور رسالتك وانك بخير وعافيه تحياتي

  20. الحمد على سلامتك يالغالي والله تشققت من الفرحة يوم شفت رسالتك كانك احد عيالي والقصة خطيررررررررررررررررررررره والنهايه تحفة الله يعطيك العافيه

  21. هههههههههههههههههههههههه هبااااااااااااال قسسسسسموون .. طب ابي كمااله:(:( >>فلتها 😀

  22. صراحه روعه القصه ..يعطيك العافيه بس ياليت تعطينا خبر ..إذاطلعت من مركز الشرطه وكم دفعت لحصه ؟؟؟؟؟؟؟ :$

  23. الله يوسع صدرك بالعافيه أحلى مافي القصه مكتب المحامي ورقة بلوت ،طلع مو سهل اثره

  24. :$:$:$:$:$ اهلاوسهلا د.جنوطي فينك حبيبي والله لك وحشة وقلبي فيك احرجني لقيتة شايل عفشة وجاك يقول الحقني الحمدلله على السلامة سمعت انك كنت مسوي عملية عموما حمدلله على السلامة ويعطيك العافية على المشاركه

  25. أرفع عقالي وأحطك على راسي يا د. جنط وانا بعد بحطك عقال ههههههههه الله يسعدك يارب

  26. هههههههههههههه حمد لله على السلامة ياذيبان طالت غيبتك يلبى قلبك وقدام قدام ادهر يلبى قلبك

  27. فطرت قلبي من الضحك ^_^ وأجرمت في بنهايتك هذي كان ودي تشوف حل وتشرد من المحاصرة تنط من الطاقة تسوي اي شيء غير النووووقطة 😀 والله إبداع في إبداع تستحق القتل خخخخخخخخ

  28. وربي روعه: أضحك الله سنك وياليت تشارك في ورش العمل الخاصة بكتابة حلقات طاش ماطاش .

  29. قسم اني احووووبك:$ يا احسن واحد بالعالم تشققت خشتي من الضحك عطني فلووووس العميلة:( في انتظار جديدك

  30. الله يخليك لنا يالجنط وننتظر جديدك صراحه عندك اسلوب كوميدي لايعلى عليه.

  31. إبدااااع وربي قسم بطني تشقشقت من الضحك :d ياريت نلاقي جزء ثاني اخير والله يخليكـ لاتحرمنا من قصصكـ

  32. عوافي يادكتور الله يسعدك ياشيخ (( منت صاحي )) من جد دكتور و جنط 😀 اجل ملتملي على علي أبورجل مسلوخة ورقة بلوت وتبغى تفلح والله مالكم الا حصة :$ كله كووووووووووووم وهادي كوووووووووووووووووووم (( الرقيب : قمنا بمحاصرة البيت كله و الجنط الآن في الملحق يلعب بلايستيشن هو وعلي أبورجل مسلوخة والآن الدقيقة 35 من الشوط الثاني و الجنط متقدم اثنين واحد << مسوي دقيق هو وكرشته )) اسعد الله ايامك وكل عااااااااااااااااااااام وانت والجميع بالف خييييييييييييير وعيد مبارك ع الجميع فائق الحب و التقدير

  33. إني نجوت بأعجوبة هههههههههههههه ههههههههههههه تسلم ايدينك على القصه القاتله صراحه

  34. ههههههههههههههههههههههههه هههههههههههههههههههه ههههههههههههههه هههههههههه هههههه ههه ه الله يوسع صدرك مثل ما وسعت صدورنـــــــــا

  35. يسلمو ا على القصه الرهيبه وانت دايم مبدع اما عبد الجليل وابو رجل مسلوكه وكملتها بالمحامي واسطواناتناغير مسروقه هههههههههههههههههههههههههاي يابطني يعني شاك باسطوانات ورقة بلوت يوووووووووو نسيت معلمتني باي سجن موجود عشان ازورك وبرعاية الله

  36. الحمدلله على سلامتك ابو جنط يعلم الله اني افكر ارسل لابو بلوت , ابسأل عن صحتكـ طولت الغيبه انت ويآه الحمدلله انكم بخيييييير واخيرآ نووووووووووووقطه 😀 ههههههههههههههههههههه سلم انآملكـ وفكركـ

  37. خخخخخخخخخخخخخخخخ د. كيف صرت دكتور يالمدود ؟ خخخخخخخخخخخخخخخخخخ لبى قلبك يازين طلتك ـــــــــــــ أهلا بالقميع مروركم عسل والله وعسل سدر بعد 😀 الله يسلم قلوبكم ويديم التواصل أخوكم في الله د. جنط السفينة حفظه الله << يرفع لنفسه

  38. هههههههههههههههههههههههه الله يوسع صدرك مثل ماوسعت صدورنا يالجنننننننننط. وتكفى مطلوبه لاتحرمنا من جديدك وقصصك الممتعه . بشرط في شبكة ابو نواف لاني مادري وين تكتب غير هل شبكه ونحن بانتضار جديدك :$

  39. ههههههههههههههههههـ..الله يرجكــ ياجنط والله انك منتب صاحي مافيه الا قوة ضحك والله . بس ورقة بلوووت وينه وينه ..ننتظر تعليقه ..ابستفسر عن الزرافه اللي بيبعهاا..ادور لي وحده هاليومينـ .. :R

  40. هههههههههههههه مآشآء آلله عليك آلله لايضرك بصرآحـه تأليفك للقصه شئ خيآلي .. وإبدآع .. بالتوفيق لك وعوآفي على القصـه .. تقبل ودي

  41. هههههههه …… خيااااااال ولا احلى أقوول تنفع كااتب . . . الحمد لله على سلااامتك أنا مابقول ياجنط السفينه ولكن بقوول ياقبطاان السفينه لاتصدق عمررك عاااد خخخخخ

  42. هههههههههههههههههههههههههههااااااااااااي وووووووووووربي خطييييييييييييييييييره القصه بانتضاار شطحاتك الجديده:$:D

  43. الله يسعدك وويوسع صدرك زي ماوسعت صدورنا بس تعرف انه يبغالها جزء ثاااني لازم لازم:D:D وكمان نبغى شخصيه زاحفه ازحف:D من ابورجل اذا ممكن تحياتي…..

  44. انت يادختور جنط خدسي يقول عندك فراغ مو عاطفي لا شي يشبه هذاا النوع تخيل لو تكتب روايه كذاا على القيمه وكلها غراميات واكشنات وتطبعهاا اتوقع يكون لهاا سوق خاصه عند البنيات يحبون الروايات الرومنسيه مو ابو رجل ومدري وشو اتوقع لو مزاجي عال عال اكيد بتعجبني روايتك لا تتحطم تراهاا حلوة بس امزح معك بااااااااااااااااي امورة القمورة

  45. قصتك رهيييييييييييييييييييييييييييييييبة فيقممممممة الفلة والرهابة والحلاواة والتونة خخخخخخخخخخخخخ بس تكفى كمل القصة ترا ما احب اتعلللق ….:(

  46. انا والله ماقريت غير اول القصة يالجنط (السفينة) بس حسيت انهاااااااا معبرة وذات ابعاد سياسية ومن خلال ماقرئتة في بداية هذة الموضوع اعتقد انك تريد ان تصل بنا الا ماوصل الية شعوب العالم من تخلف وفقر من خلال هذا الطرح الساخر ,, وهذاااا تراني ماقريت غير اول ثلاث كلمات من القصة الحلوة وشوف لو اني قاريهاااااااااا كلها غير تشوف العجب ؟؟ هههههههههههههه اخوك برطم البعير

  47. شــــــــي القصة ولو إنك علقتنا في النهاية….بس حلوة……. عواااافــي8)

  48. عندي لك حل يحبه قلبكـ .. تسوي سوات المصري اللي علق لوحاات اعتذار بالشارع خخ ويفضل انك تزود عليه اعتذار بمكروفونات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

لماذا تسذا ؟

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول