لاواهنيك دالهن ياسعود – تمشي وقلبك دايماً سالي


صبحكم الله بالخير …. مساكم الله بالخير
شوفوا الأرخص وخذوا وحده منها

خلوني أشغلكم شوي


اعلان





أدري إن العنوان لايمت للسالفه باي صله <<— ياعيني على اللغة
بس وش أسوي هذي العولمة وما تسوي <<— ياشين اللي يسمع بالثقافه
الزبده يا طويلين العمر ((( طوال الشوارب )))….وطويلين اللسان ((( الجنس الناعم  )))
كنت جالس أنا والحالي وأفكر بعمق حتى لدرجه إني مسكر خشمي وفمي عشان ما أغرق

تعرفون عاد أني أحبني كثير ما أبي أموت

وبعد تفكيرعميق مع بنات أفكاري لدرجه إني بغيت أخطب وحده منهم  

أبقول لكم أخر ما جادت به قريحتي
ندخل في صلب الموضوع <<<< متعوب على هالجملة

ابداً القصة

المهم أبوي قال لي ترى بتروح تشهد معي في المحكمه بكرة الساعة 9 الصبح قلت أيه أصبح أجل بالليل مادريت إلا وذاك الكف اللي هز دميجتي هز شوي وأفقد الذاكرة  
المهم يوم جت الساعه عشر بالليل كنت جالس أنا وسعيدان ورويشد على الرصيف عند البقالة
قلت يالله أنا بروح أنام عندي مشوار مع أبوي بكرة لازم أصحى بدري
المهم رحت يوم دخلت البيت إلا وأشوف أبوي جالس في الملحق يشوف القناة الإيطالية <<< لاتفهمون أبوي غلط
وأجلس معه شوي إلا واشوف هالمزايين تصدقون المزايين اللي عندنا أبل  واللي عندهم أوادم
أعنبوا بليسهم رجالهم أزين من حريمهم
لا وبعد يوصل عمر الواحد 60 سنه ما يصلع
وإنا إذا الواحد دخل العشرين سنة طاح شعره وصلع وأتحداك تلقا واحد عنده ظفر مهوب مكسور وأحسان واحد ريحته دخان وإلا تعميره وهذا غير الشهابة
أنا مدري ليه البنات يرضون يتزوجونا
صحيح إن بناتنا كراعينهم وركبهم سود بس أهم شي الأخلاق

المهم نرجع لمحور موضوعنا <<<<< والله مثقف لإنه أستخدم كلمة محور تدرون أنه بغى يستخدم كلمة راس حربه
سريت لغرفتي أفكر في هالطليان
المهم مادريت إلا وأميمتي تصحيني تقول قم أفطر الساعه 8
أبوك يحتريك <<< ما قالت قم تروش وأنزل أفطر متعودين إحنا قراااااوا

المهم غسلت وجهي ونزلت وأفطرت وطلعت أنا وأبوي عشان أروح أشهد معه
يوم وصلنا للمحكمة إلا وأبوي يشوف أبو رويشد عند باب المحكمة عشان نشهد معه انه شاري أرض في وادي لبن
يوم دخلنا عند القاضي قال بطاقاتكم يوم أخذ البطاقات وناظرها
قال وين متكي ورا النت قلت سم قال بطاقتك منتهيه رح جددها وتعال
ما دريت إلا وذاك الكف اللي يمشي مليون
قال وراك ماعلمتني إن بطاقتك منتهيه
قلت وش يدريني من يوم طلعتها وأنا حاطها في الشنطة أخاف أنها تخرب

على طول جرني أبوي بأذني قال أمش نروح نجدد بطاقتك ونرجع بسرعة
دخلنا الأحوال المدنية وقدمت أوراقي عشان أجدد البطاقة إلا وما دريت إلا وينادون متكي ورا النت .. متكي ورا النت
قلت هاه وش تبي قال تعال مدير الأحوال يبيك ضروري
قلت عسى ما شر وش فيه
أبوي أرتاع قال عسى مانت مسوي شي قلت أنت تعرفني يبه ماقد سويت شي
دخلت أنا وأبوي عند مدير الأحوال قال أنت متكي قلت أية
قال وينك أعنبوا بليسك لنا سنين وأحنا ندورك وينك ضايع فيه ؟؟
قلت في بيتنا قال أبوك يدورك دواره ما خلى خفس إلا ودورك فيه
والتفت على أبوي
قلت هذا أبوي كل يوم أنا مقابل وجهه ولازم أخذ منه كف في الدخلة و الطلعة ما أرتاح إذا ما خذت كف منه

قال أبوي للمدير أنا أبوه وش فيه
قال المدير لا مهوب أنت أبوه الحقيقي قال أبوي وشووووو
قال المدير أبوه الحقيقي السفير الإيطالي السابق زوجته والده في نفس المستشفى ونفس الوقت اللي ولدت زوجتك فيه وتلخبطوا المواليد وأنت ولدك الحقيقي شفه في دار الرعاية رح أستلمه
ومادريت إلا وكف جاني على دميجتي وقال ومخليني أربيك كل هالسنين وأصرف عليك
قلت أحترم نفسك ولا تمد يدك و إلا رفعت عليك قضية
قال المدير أستريحوا شوي
وأروح للحمام وأنتم بكرامة وأجلس أشوف خشتي في المراية وأرفع خشمي بيدي إلا وطار منها خفاشين مضيعه مكانها وأنا أقول ياربيه ليه عيوني زرق وشعري أشقر

ما خذنا نص ساعة إلا والقنصل الإيطالي جاي
ويسلم على المدير ويقوله شكراً لك إنك لقيته <<<< أقروا هالجملة باللغة العربية الفصحى
قال القنصل يالله معي عشان نحجز لك تروح لإيطاليا أبوك يحتريك هناك

سكنوني في فندق عجزت أحفظ أسمه الظاهر إن أسمه (( أنطر تنتنتتل ))
جلست أفكر قلت طيب سراويلي وفناييلي  <<< هذا أكبر همه
وأصدقاني سعيدان ورويشد أبخليهم
و بشوف الاعبين على طبيعة
ياسلام من بعد الكبسة والمرقوق والحنيني أباكل معكرونه طويله ومراصيع عليها طماط وجبنه <<< يسمع في البيتزا
وأشوف الدوري الإيطالي على الطبيعة
وإذا وصلت وش أقول لابوي الجديد يبه وإلا بابا أحظنه وإلا ما أحظنه
وأمي الحقيقيه أحبها على راسها وإلا أحبها على خدها مثل ما يسوون الطليان
وإذا أعرست هناك بيجي لي عيال طليان وإلا لا
أخاف ما يجي لي طليان أخاف يجي لي تيوس وخرفان
طيب وشلون أباكل بيدي وإلا بشوكه مثلهم
طيب وإذا ما عرفت أكل بشوكه من يعلمني وشلون أبتكلم معهم وأفهمهم على أي شي أبيه

والله الحالة وش أسوي تعبت من التفكير
ما دريت إلا وباب الغرفة يطق وروح وأقول يس <<< إيطالي وش عليه
إلا وأفتح الباب وأشوف رويشد وسعيدان لابسين ترنقات وزارة المعارف اللي يوزعونها علينا أول في المدرسة

((( برا الموضوع )))
تدرون أول ماكتبت كلمة ((( ترنقات ))) طلع غلط إيملائي كخخخخخخخخخخخخخخ
((( نرجع لموضوعنا )))

دخل رويشد وسعيدان بشناطهم قلت خير وش عندكم لابسين ومتكشخين وجايبين شناطكم
قالوا بنسافر معك نبي ناكل معكرونة طويلة ولحم أستكات مثلك <<< ستيك لتوضيح
قلت أخاف ما يوافقون عليكم ما معكم جوزات
قلت خلاص روحوا الحين لبيوتكم وأبمركم بكرة أبوووك ياتصريف <<< مايبي يفشلونه
قالوا طيب

وتوني نايم إلا وجاء القنصل قال يالله قم موعد الطيارة بعد ثلاث ساعات هذا لبس اللبسة عشان نمشي
وأدخل الحمام وأتروش وأتعطر بعطر الليمون حق المغاسل يازين ريحتة زيناة أنا أشهد أنه عطر رسمي
وألبس اللي عطاني
يوم طلعت إلا ويزعق ذيك الزعقه ذكرني بأبوي التقليد
قلت وش فيك ؟؟؟ قال ليش لابس روب الحمام
قلت وش يدريني لقيته معلق على الباب ولبسته وبعدين مناسب مع الأسود  <<<< اااابوك يااالذوق
فصخت الروب وقليبي يفرفر يبيه
رحنا للمطار وركبت الطيارة وإحنا في الجو
قال الطيار أربطوا الأحزمة فيه خلل في المحرك

وأنا اللي صار وجهي أزرق والعالم تصايح ما دريت إلا والطيارة يا أما طالعه و إلا نازله
ما أسمع إلا طاااخ طيخ وأنا متمسك في الكرسي
ما دريت إلا وذا اللي يرفسني برجله يقول قم جعلك القامة تأخرنا على المحكمة
وأنا اللي أطمر أبوووس في أبوي وأقول ياحبني لك يا يبه وأقول الحمد الله أنه حلم

أديووووووس


تعليقات 15

  1. الله يخلف عليّ أنا وحلومي … ياحظك بس .. حلومك زينة مهوب مثلي ماقد حلمت الا بسيكل أبوكفر واحد والا بنبيطة ذهب … إن تطورت مرّة ,, حلمت أني نايم على سرير!!

  2. هههههههههه ضحكتني الصراحة وروووعه طرحك وإلى الأمام ,, وننتظر مواضيعك يالطلياني,,

  3. خطيييييييييييييييييييييير تجنن قصتك ياليتك كملت القصه>>ودي اعرف وش بيصير بايطاليا..كملها مالي دخل وعلى فكره..حلوه طويلات اللسان بصراحه امتعتني ووسعة صدري شوووكرااا كثيييييييييير

  4. الله ياخذ بليسك اجل طلعت طلياني وحنا ماندري جعلك للصلاح ترى مهوب زين الحلوم ذي تخربك على اهلك خخخخخخ ماعلي منك كمل السالفه ابعرف وش صار لك بايطاليا

  5. اه من حلم حلمته وكنت فيه طلياني وياليل خبرني عن امر المعاناه ـــــــــــــــــــــــــــــــــــــــــــــــــــــــــــــــــ الله الله يا ذا الحلم خف علينا شويا حتى احنا نحلم مثلك بس نفزز شويا خخخخخخخخخ صراحه حلم ولا اروع ايطاليا وسفير وعيون زرق شغل عدل ثانكس على القصة الحلوة والى الامام مع مزيد من الاحلام بس اتمنى انها ما تنتهي برفسة من الوالد

  6. الله يسامحك اجل حنا كراعينا سود ^_^ عالعموم القصة تجننننننننننننننننننننن يسلمو

  7. الله يقطع بيليسك ما لقيت الا الطليان ترى عندنا بهم وخرفان من اللي قلبك يحبها هههههههههههههههههههههههه

  8. اخوي الكريم بودي انك اشرت الى ان المقال منقول من اكثر من موقع ومن اكثر من كاتب وانتي مُجرد ناقل ( ليس إلا ) ، يعني ماكتبت المقال او حاولت انك تُجاريه اخوي الكريم ، ماعليش على هالرد ، لكن عشان أبيّن انك اخذت حق غيرك ونسبته لنفسك جرى تدوين هذا الرد وانا مستعد ان ابين للجميع ان المقال منقول من مكان اخر وهو ليس لك او من جهدك واتمنى ان ابو نواف الله يخليه انه ينزل هالرد عشان يبين الحق ويظهر ، وشكراً للجميع

  9. اخوي متكي ورى النت صراحه انا من الناس الي مقدر وضعك لان حالتي اردى منك من جد احلامي هواش وكلها انا انضرب واحلام في ناس الله يخارجنا هههههه بس يالطلياني حلم قووي بس قصير شوي ابغى اسمع الجزء الثاني ههههههههههه لاتقطعنا نشوفك قريب

  10. قصة حلوووووووووووووووووووووووووة ارجو الاستمراااااااار ودمت بخير

  11. انا مابي اقوول الا يسلم فووومك على هالجمله 777777777777 (( أنا مدري ليه البنات يرضون يتزوجونا )) واهم شي الاعتراااف والاعتراف بالحق فضيله .. وانا كنت اتمنى يجي يوم من الايام ويعترف شاب سعودي بهالشي والحمدلله تحقق حلمي المهم لاتدعنا اتحفنا من جديدك 🙂

  12. المقال قرأته في أكثر من موقع نرجو احترام عقولنا وكتابة منقول بدلا من السرقة العلنية ، ملييييييينا ياناس من شي اسمه نسخ ولصق

  13. والله حليوه قصتك بس بقولك شي ترا موب كل البنات كراعينهم وركبهم سودا يامال العقل والثقل وبعدين الله واكبر ياللي ركبكم بيضاء تلصف عز الله انها اسود من اسود ركبة سعوديه

  14. سعود حلوه كلمة احترم نفسك لأبوك 000000000000الله يقطع شيطانك والله قلت الولد راح فيها 000 على كلا ماقصرت قصة جميلة وحلم اكثر من رائع وإلى الامام 0000ههههههههههههه

  15. أهلين وسهلين بأصدقاني قروب أبو نواف أحب أشكركم على الردود الحلوه واللي ماردوا أقول لهم شكراً كثيرررر على مروركم الوسيم آآآآوه قصدي مروركم الجميل رساله الأخت شمعة أمل و الأخ مروان خوري مدري مروان دمنهوري إذا تبون تصدقون أنا اللي كاتبها أعملوا بحث في منتدا سامي الجابر وأختاروا أسم متكي ورا النت وتلقون موضوعي هذا بس بعنوان ثاني أسم يادار لاهنتي ولا هان راعيك وأتحداكم تلقون القصه في تاريخ قبل التاريخ اللي كتبها في منتدا سامي الجابر sam9.net أو sam6.net أنا طبعاً منقطع عن المنتدا من زمان وراح تلقونه في الأرشيف وعلى فكره أنا أكتب في مدرسة المشاغبين بنفس الأسم وشكراً على مرور سموكم الكريم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

لاواهنيك دالهن ياسعود – تمشي وقلبك دايماً سالي

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول