كلوه نفر سعودي مستعجل


السلام عليكم ورحمة الله

فيه أشياء تقهر بهالديره ديرتنا السعودية والمشكلة والأدهى أن المواطن البسيط والغير بسيط يعتبرها حق من حقوقه المكتسبة
يعني ناخذ مثلا وشي بالفعل يقهر ويرفع الضغط هو انك ماشي بسيارتك وجيت طريق ضيق لا يسمح بمرور سيارتين وجات سيارة من الجهة الثانية وانت من واقع الأدب وتمشية الأمور قلت ابي أوقف بسيارتي احتراما للشخص القادم بسيارته عشان يمر . مر الحبيب بسيارته ولا التفت لك حتى ولا سلم ولا سوى شي وانت زي الابله واقف تنتظر انه يبادر بشي يرد بعض كرمك واحترامك له وعدى طبعا اعتقاده ان الشي هذا حق من حقوقه المكتسبه .

شي ثاني ناخذه مثلا بعض أبواب المحلات والبقالات تبنط عشان ترجع لمحلها بعد الفتح يعني اذا فتحت الباب فيه دفاش يرجعه لمحله وانت دفيت الباب ودخلت المحل وفيه شخص واقف وراك يبي يدخل معك من باب الأدب انك تمسك له الباب عشان ما يرجع عليه سواء مسكت والا ما مسكت الرجال بيمرك بسرعة ولا هو ملتفت ولاهو قايل كلمة شكرا لان هذا حق من حقوقه اللي هو متصورها ان فيه أبله يمسك له الباب عشان يدخل طويل العمر طبعا ينقاس عليها العكس إذا أنت دخلت المحل بعده هو اكيد ما راح يمسك الباب والباب راح يبنط بخشتك لأنه مستعجل أكيد لان الشعب كله مستعجل على قول البنقالي اللي يبيع في حارتنا (كلوه نفر سعودي مستعجل) والأدهى والأمر إذا كان الطرف الثاني حرمه ما راح تدخل إذا مسكت لها الباب لانها تتوقع انك تغازلها؟ أما إنها تمسك لك الباب فهذا من سابع المستحيلات.

عندك موقف السيارة الواحد من شعبنا العزيز مستحيل يوقف إلا قدام المحل الي يبيه لو يقعد ينتظر عشان يوقف ماعليه المهم يوقف قدام المحل والا يسد على السيارات اللي قدام المحل الشي المضحك والمبكي ان الموقف تلقاه قبل المحل بشوي او بعده ومسافة تافهة بس طويل العمر ما يبي يمشي ولا يجيك واحد يشتكي يقول ياخي ذبحتنا الكروش ما نقدر نمشي في هالديره

مثال آخر أنت واقف عند كاشير ومعاك أغراض بسيطة بالكثير عشر قطع يجي واحد من الخلف ومعاه قطعتين طبعا سقط عليك ويوم قرب عند الكاشير التفت عليك وقال معليش يا ابو ورفع أغراضه يعني تراها قليله طيب أنت يا ابن اللذينا ياللي مستعجل حنا مستعجلين وأغراضك حتى لو كانت قليله راح تاخذ من المحاسب وقت سواء بالسكانر والا فتح الدرج والا الصرف وإذا كان واحد بجيح بيحاسب بالشبكة هذا كله عشان ما يوقف بالطابور تدرون ان عندنا مشكله بالطابور أو الدور الواحد ما يوقف في طابور لو يصير الي يصير لأنه يفكر نفسه سخيف اذا وقف في الطابور؟

طيب هذا شي ثاني سيارة خربانه عند إشارة وراعيها مشغل الفلشر وباين من بعيد قبل ما توصلها انها خربانه ليش تجي توقف وراها يوم انك تعرف انها خربانه؟ لا واذا صارت الإشارة خضرا صار يضرب بواري ويزاحم الناس ويلعن .

شعبنا كله جلوف والشمس لها تأثير على الكشره اللي تطلع وما راح يتغير الشي هذا إلا بعد فتره طويلة يا إخوان حنا مسملين والأدب والأخلاق شي طبيعي يكون فينا لكن مدري وش اللي قالب السالفة

كتبه على استعجال تركي


تابعوا جديد شبكة أبونواف على فيس بوك وتويتر




   


تعليقات 25

  1. والله كلامك صحيح كثير ما تصير هذي المواقف ماعليه الا من نفسه الله المستعان

  2. مآقلتِ ألا الحقِ يآكثرِ انآِ أفتحِ الطريقِ لـ بعض النآسِ ويمشيِ وكآنِ الطريق َ مفتوح َ من قبل َ يجي َ ، لآ يسلـمِ ولا يقولِ مشكورِ ولا شيء يآليتِ بس َ الششعبِ السعودي َ يتثقـفِ شوي َ ، النآسِ وصلتِ للقمرِ وحنآ َ مآنعرف بعض َ …؟

  3. هههههههه حبيت الموضوع ، وفعلاً الشمس لها دور في هذا الموضوع والله أعلم 8)

  4. والله انك صاادق مع مسأله فتح الباب ..! والأدهى والأمر إذا كان الطرف الثاني حرمه ما راح تدخل إذا مسكت لها الباب لانها تتوقع انك تغازلها؟ أما إنها تمسك لك الباب فهذا من سابع المستحيلات. ^^^^ هههههههههههههههههههههههه للاسف لقد صدقت =(

  5. هو إنت سويتها لهم ولا لله ؟ كلامك صحيح غالبا بس لو احتسبت تاخذ الأجر من الله ولا تنتظر من أحد جزاء ولا شكورا لو بتنتظرهم بتتعب ولا حصلت شي :~

  6. الله يعطيك ألف عافية على الموضوع.. هذا كله لم يكن موجود منذ 20-30 سنة وما قبل ذلك، لم يحصل إلا الآن لأن المجتمع في مرحلة إنفساخ من الدين الحق، وإقبال على الأديان والإنحلالات الأخرى.. فقط. لو المسلم بس إذا قرا القرآن -وياكثر من يدعي الإسلام هنا- عرف معنى كل كلمة قرأها، لحلت جميع النقاط التي طرحتها.. ستجد آية في القرآن العظيم تدعم حقك في كل نقطة منها. ولست أنت الأبله في هذه المواقف، بل أنت رجل خلوق تفعل ذلك أولاً لكسب الأجر من الله، لا ترجوا من هؤلاء جزاء ولاشكوراً.. بل هم البلهاء الهمج المتخلفين الأغبياء الحمقى إلخ… وتحدث لجميع الناس الخلوقة مثل ما يقع لك، ولكن عليك بالصبر ومحاولة البحث عن عذر لهم، والحماقة والهمجية والغباء والدباشة من أقوى الأعذار لعذرهم. قبل قليل دخلت استراحة مستوصف أسنان، وفيها 3 أشخاص جلوس، منهم طفل في عمر الزهور، سملت عليهم (السلام عليكم) ولا واحد سمعته رد.. سكتت وقلت يالله، وش أنا خسران، اللي علي سويته.. انقهرت شوي وقلت ليش ما أرجع وأقول:(أنا أخبر المسلمين يردون السلام وعندهم رده واجب، بس الظاهر انكم مانتو مسملين) بس جلست لين ركدت وهدت أعصابي، وقلت ما تدري ياولد، يمكن عندهم أعذار ما تدري عنها، منها (الصمم، ألم سن، نوم … وغيرها)

  7. جزيره الكنز كلامك كله من جد وصار معى نفس الموقف الله واعلم ليه ما يردون يمكن مو مسلمين يسلموووو كلك ذوووق:o:o:o

  8. هههههه ما اقول غير يالطيف وكل شخص يعمل بأصله..عفوا ! (ما أقصد التميز!) لأن التصرفات لمحة عن الاخلاق والطباع لكل واحد فينا .. والي ينقص ينقص بنفسه.. صح هو شي يحز بالنفس اننا نشوف سلوكيات غريبه .. بس الأهم اننا مثابرين ومكملين ومتممين للمعاملة الطيبه .. وإن شاء الله الا ويجي يوم و نلاقي نتيجة حلوة .. ويسلموو أخوي الله يعطيك العافية ويقويك .. 🙂

  9. السلام عليكم الله يعطيك العافيه من جد مبدع ماشاءالله عليك ———- عندي ملاحظه عليكم ياشباب ويابنات انكم تكتبون (الي) خطأ والصح أنكم تكتبون (اللي) بس حبيت أعلمكم اللهم إني بلغت اللهم فاشهد

  10. آمكن مافي وقت الوآحد , مثلا يشكر ويتبسم زي مثلا حركة الباب .. أحسه شيء عادي انه مايبدي اي ردة فعل .. بس أنت بذي الحركه آعطيت صورة عن نفسك جيده , ههه وعاد لو كانت بنت ولا حرمه آصلا من الاتكيت ان الرجال يساعد الحرمه بس الحرمه ماتساعد الرجال .. وكمان الاسلام نهى الحرمه يعني فيها من الجرآه شوية انو تساعدك وتمسكلك الباب 😀 آمآ الباقي ..انا معك , ومنجد الشيبآن فيهم لطآفه اكثرمن الشباب هاليومين ..

  11. غلاء الأسعار وارتفاع كلفة المعيشة وانا اخوك لاحس مخ العالم تلقى الواحد نفسه بخشمه حتى لو ولده جاء يلعب معه يصطره على وجهه

  12. هههههه ايه والله صادق<<خير ترى ما اطري وش السالفه مسويتلي قاريه هههههههههههههههه ايه والله كولو ساودي مره كويس مالت عليه ركمه ههههههه يسلم راسك

  13. والله كلامك فيه شيء من الصحة وفي شيء من الغلط الحين انت عممت على الشعب السعودي وهذا شيء غلط اعتقد انه هناك ناس طيبه في هذا البلد والحمد لله الدنيا بخير وممكن هذا شيء يرجع لك اذا كنت مبتسم ومتفائل راح يبادلونك الناس نفس الشعور اما اذا كنت دايم معصب وماتطيق احد وتعلق على الكبيرة والصغيرة فهذا شيء خاطئ صراحة ,وتراجع نفسك يعني كل الناس غلط وانت صح ؟؟ ولا انكر ان بعض الناس (ماينعطون وجه) بس مو الكل والحمد لله واتمنى انك تتقبل وجهة نظري

  14. كلامك سليم واغلبنا مر بمواقف زي كذا. بس انت اعمل بأصلك واطلب الاجر من الله. العالم كلها مشحونه نفسياً وضغوطات الحياة اثرت كثير على تعاملهم واخلاقهم مع اقرب الناس لهم فما بالك بالغريب؟ الشي الثاني ملاحظ الفتره الاخيره في انحلال اخلاقي واضح في المجتمع . بس السؤال الي محيرني ليش السعوديين في الخارج افضل بكثير من هنا؟ يحترمون الانظمة ويقدمون المساعده ومبتسمين على طول؟

  15. :>:D:~8):$ :(:):o:>:(B تدرون وشلون كلن يتطور الى اشعب السعودي حتا الايام ذي مافيه امان كل الى يسرقون سعوديين والله تستحي يعني شف وش كبرك تبي فلوس ابوك او شدحيلك وتوظف مو تدشرلي ما اطول عليكم بس الموضوع صراحه والله خطير وحلووو مره مره

  16. يعني قاعد تثبت لنا ان شعبانا شعب سيء ؟؟ طيب دارين من زمان اننا شعبنا الغالب فيه السوء!! و أبشرك الشعوب العربية كلها زي كذا و أردى!! —————————————— و الي يبي يصير خلوق يصير لله و يطلب الأجر و لا ينتظر من الناس الشكر،، و إذا بدينا نمشي على هذا المبدأ أتوقع راح يصير التغيير المطلوب.

  17. والله كل ما ذكرت اخ تركي صحيح ووالله ان هذا يحزن ويكدر الخاطر الله يفقه بعض الشعب السعودي بالادب الاسلامي الحيف

  18. 🙁 متى نتعلم النظام واحترام الاخرين ونترك الدفاشه .. ونصير مؤدبين .. نقول من فضلك .. لو سمحت .. شكراً … يصير عندنا رقي في التعامل والاهم نطبق شريعتنا اللي تحثنا على كل هالاشياء .. يارب يتحقق الحلم ونعيش في سبات ونبات ونخلف صبيان وبنات>> مالها دخل في الموضوع بس مشوها 😀

  19. السلام عليكم اشكرك اخوى تركي على المقال والمقطع قبل الاخير صاير فيني انا ,, واول ما قريتة تذكرت موقف شبية لة وبس

  20. :$:$:$:$:$:$ والله كل كلمه قلتها صح هذي المواقف دايما تصير معي والله كلها صارتلي ما عدا موقف الاشارة خخخخخخخخخخخخخخ بس ايش نقول, علاج الشي هذا يبغاله سنييين طويلة لأنها قناعة ترسخت عند الشعب انه ما يتعامل بالاخلاق و ما يمشي ورا النظام الا السبايك على حد تعبيرنا بس يا رب يجي اليوم اللي اشوف فيه الشعب السعودي شعب خلوق نظامي متحضر و يارب يكون اليوم هذا قريب

  21. كلامك صح وزد على ذلك الوقوف بالسيارات مكان سيارتين أو ثلاث وأحياناً أربع إذا حسبت حساب السيارات المائلة!!!!!!!!! للأسف شعبنا يفتقد لمفهوم التعاون.. التفكير في الآخرين معدوووووووووووووووووووم أنانية بحتة، وعنجهية مقيتة …….. والتعاون من البر ومن شيم المسلمين آآآآآآآآآآآآآآآآآآخ بس، كيف نسوي للشعب قورمات Format!!?

  22. السبب الأول في هذه المشكلة : البعد عن الدين , والثانية : الأنانية فمن يقف في الطابور يرى من حقه ألا يتجاوزه أحد ولكن عادي يتجاوز الآخرين , وإذا تركته يمر بالسيارة ليس ذلك كرماً منكB ولكن غصبا عن خشتك لذلك لايشكرك , والسبب التربية. لنتغييييير !!!!! تخلقوا بالأخلاق الإسلامية , وعلمو ا أولادكم الإيثار :$ وأن يعرفوا حقوق الآخرين إلى جانب حقوقهم ……وبإنتظار الأفضل .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

كلوه نفر سعودي مستعجل

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول