قصة من نسج الخيال : رحلتي الى الصحراء الكبرى


السلام عليكم ورحمة الله وبركاته ..

صباحكم / مسائكم,, عسل …
كيفكووون ان شاء الله طيبين …

إعتبروها مقدمه >> الأخ تسهولي يعني عجاز …

يقولك هالأيام الجو خيال .. بس استغفر الله يعني قهر ما يجي الا السبت ؟ ولا الجمعه اخر الليل
حنا ودنا انه يوم ربوووع او خميس نقدر نضبط وضعنا شوي لكن يوم سبت والله قهر
بالنسبه للطلاب يخيس وهو يطالع الجو مع الدريشه>> معاني الأخ ..
وأيضا الموظفين يطالعون الجو لكن ما بيدينهم حيله ودهم يرووحوون لكن بدري عليهم..
المهم في رحلة من رحلاتي الإستكشافيه في يوم من الأيام ,,,

قلت خل نروح ل الصحراء الكبرى اللي تحت المغرب والجزائر >> نصاب يشوفها بالخريطه




المهم طلبت من بعض الربع والعزوة اللي دايم وانا معهم ان احد يخاويني .. وطبعاً عقب القردنه
والتفاهم >>ايه هين .. قررنا … وكان معنا واحد سبهه >> سبيكه
يسمع سوالفنا عن الروحه قال فيها بنات ؟؟ طبعا على طول جاه شلوتي وطلع من السالفه
ويوم صملت انا وإثنين اننا نروح خل أعرفكم بهالثنين عبيد ولد خالي ودحيم ولد عمي
ونروح عاد لا تسألون وشلون رحت لأني متوهق وشلون أوصل المعلومه أساساً
وناصل هناك إستأجرنا جيب من المغرب عشان نقطع فيه نفودهم لين ناصل للصحراء الكبرى

ويوم طلعنا من المغرب إسمعوا سوالفنا بالسيارة :

سراب : ظنكم يا عيال نقطع بدبل ولا بدوون ؟
دحيم : وش تحس به ؟؟ أكيد بدبل يا بابا هذي الصحراء الكبرى >> مسوي يعرفها هو
عبيد : الصحراء الكبرى ولا الكبري والله اني من يوم عرفت الجغرافيا وانا اسميها الكبري ..
دحيم : والله من الدجه براسك ..
سراب والله من الدجه بروسكم الثنين .. أنا أتحادكم تجاوبون ليه سموها الكبرى ؟
دحيم وعبيد : شي طبيعي لأنها كبيره ..
سراب والله من الدلاخه اي عشانها كبيره .. لا يا بابا عشانها نفودها كبيره >> مسوي جاب شي ..
دحيم : أقول الله يرحم امك إسكت لا ننزلك هنا بس ..
عبيد : لا خل ندفنه ب النفود ونفحط عليه >> تفكير لك عليه..
سراب : والله إنكم تخوفون ..

المهم دخلنا الصحراء الكبرى شوي الا وغرز الجيب يا ولد يمين يسار نحاول ما نقدر ..
ويصطرني دحيم مخمس ويعطيني شلوتي وينزلني ويجي يحاول يرقص يبي يطلعها..
المشكله بينما وهو يرقص الموتر هو يرقص معه مادري وش السبب ..
بنشرنا الكفرات ما فاد .. دفينا ما قوينا >> رخووم

والله كان الوقت عصر .. وننزل العزبه والفرشات انا وعبيد .. ونشب النار ونقعد نطبخ ..

ودحيم إلى الحين عنده أمل انه بيطلع الموتر ..
عبيد : يا دحيم والله لو طلعتها ان تغرز قدام تراك بصحراء منتب بشعيبٍ ورا مزرعتكم ..
سراب : والله إنه صادز ..
دحيم : هذا انتم يالشعب السعودي تفقدون الأمل بسرعه .. ( وش عنده الفلبيني؟)
المهم ويخلص العشاء على الساعه 8 بتوقيت السعودية لا تسألوني كم بتوقيت المغرب ..
وننادي دحيم تعال تعش .. والله ويجي ونحط عشانا ونجفاه ..

وبينما نأكل :
سراب : ياخوي الموتر وش بلاه طفى ..
دحيم : خابر البنزين على الإي E
عبيد : من جدك
سراب هذا وجهه << >> إنخبل

دحيم : هذا جزاي اللي قاعد من العصر وانا احاول اطلعه كله عشان ما تخيسون هنا ؟
سراب : وين شايفنا الله يرحم امك يوم تقضي البنزين تحسب المحطه ورانا.. ترانا 100كيلو وسط الصحراء..
عبيد : خارج الخدمه .. وقع مغشي عليه من هول الصدمه ..

المهم ونرضخ للأمر الواقع وأقوم بأغسل يدي ثم هونت خفت نغسل يدينا بالماء ويقضى

وأمرخها بالتراب لين راح الدسم .. وأنسدح بأرقد .. ما قدرت وصلت الساعه 10 ما رقدت
ودحيم برضه كان قاعد عند النار يبكي من الجريمه اللي سواها فينا..
وعبيد كان ما زال خارج التغطيه من هول الصدمه .. وأجي عند دحيم .. وأبوس راسه
قلت ما صار الا الخير يا ولد عمي .. قال وشلون يا سراب وانا حكمت على انفسنا بالموت البطيء
قلت لا يا ولد عمي الخطأ مو خطأك خطأي انا اللي ما حسبت مدى الخطر اللي بنتعرضله
في هالصحراء .. رد وقال والله اني داري انها من ثوارتك .. وأشوته ويشوتني ونتهاوش واروح
لفراشي بأرقد وخليته عند النار مغير يشيل من الحطب ويحط بالنار ..
ورقدت بنومه عميقه .. وأصحى على الساعه 7 أتمغط .. وألاقيهم نايمين كلهم …
واللي قاهرني ان عبيد الى الحين مغشي عليه .. من أمس .. وأجي وأشوته شلوتي

ويقوم ..

عبيد : عسانا وصلنا الرياض ؟
سراب : والله شكل حلمك جامد ..
عبيد : من جدكم قضى البنزين ..
سراب : والله ياخي قضى خلاص باقي كم يوم ونقول للدنيا السلام ..
عبيد : الله يرحمنا ان شاء الله .. بس زوجتي وعيالي منيب شايفهم ؟
سراب : لا ما ظنتي يا بعدي ..
عبيد : الله يردنا ان شاء الله …

وأروح بأغسل الغمص انا وعبيد .. ويوم صبيت المويه ما فيها ولا نقطه ..

عبيد : الله يقطع بليسكم ما فيه مويه ؟؟
سراب : والله ان امس فيها النص .. وين راح مدري ..
عبيد : طيب والدسم اللي من امس بيدي وين أغسله ..
سراب : والله مادري انت دسم افركه بالأرض ويروح .. موتك اللي غمص وش يسوي
يفرك وجهه بالأرض؟؟

وأتذكر ان دحيم كان سهران امس .. وأجي وأطمر عليه ..

سراب : قم يا دحيم وين المويه شربتها ؟؟ >> عشان يقوله عويفه >> إيه هين
دحيم : ياخوي اي مويه..
سراب: هذي الغرشه اللي كانت مليانه ..
دحيم : كبيتها على النار امس يوم جيت أنام ..
عبيد للمره الثانيه وقع مغشي عليه من هول المصيبه ..
سراب : لا تكفى لا تقول انك لهادرجه ثور
دحيم : والله أتكلم من جدي ..
سراب : ياخوي وش نسوي لا مويه شرب ولا مويه نغسل وجيهنا ولا فطور زي الناس ..
دحيم : إحمد ربك بس ..
سراب : حامده قبل اشوف خشتك ..
ونقوم نشوت في عبيد نبيه يقوم .. ويصحى ..

عبيد : جاء الوايت ؟؟
سراب : أي وايت ؟؟
عبيد : وايت الماء اللي بيعبي لنا ..
سراب : ياخوي ليه أحلامك تجي على الوتر الحساس ..
عبيد : يعني للحين في الصحراء الكبرى حنا ؟ ..
سراب ودحيم : ايه الله ينشبك ..

المهم ونقعد نطق طق بالبلوت .. صحيح ما تجي ثلاثه لكن رهمناها لين ضبطت
والله ونلعب ونلعب لين جت الساعه 10 الصبح ..

دحيم : والله يا أنا جوعان..
سراب : كله منك ياخوي لو ما قضيت المويه كان ألحين فالينها بذيك الكبسه ..
عبيد : اصلاً انا أكرهك يا دحيم
سراب ودحيم : يا روحي يالدلع انت لا تكفى لا تكرهه
طيب يرحم امكم شوفوا لنا حل ..
سراب : لو إني بالرياض كان الحين اتغدا في شواية الخليج ..
دحيم : والله لو إني بالديره كان أكل ذيك الجريشه مع شوي لبن من يد اميمتي ..
عبيد : والله ياشيخ لو أكل تبن هماني بس أصل الديره ..

قعدنا عاد نضحك .. وبينما كنا نسولف .. إشتد العطش .. وبدأت أجسادنا ترتعش من العطش والجوع
فأشتدت حرارة الشمس .. وبدأنا نخيس من قوة حرارتها .. >> تكفيك اللغة العربية الفصحى
دحيم : ياخوي ورا ما نمشي قدام يمكن نلقى لنا مويه طايحه ولا بعير ميت وناكله ..
سراب : على طاري الأكل فيه شوي بصلوطماط خل نتعبر بها ..
وأفتح العزبه ولا لقيت شي ..

دحيم : وش فيك ..
سراب : ما فيه شي بالعزبه ..
دحيم : من اللي كله ؟؟
عبيد : مهوب انا وطاح مغشي عليه من هول الصدمه ..
صطرناه لين قام وأعترف …

قررنا نمشي لأجل غير معرووف .. ونمشي وكنا نرى الغدير الذي ينبع من الماء
ولكن لا نكاد نصل ثم وقع عبيد من التعب الشديد .. ووقعت خلفه مباشره ..
ثم عكرفت لدحيم لكي لا يكمل المسيرة ويجد الماء ويحيى ونحن نموت …
ووقعنا مغشياً علينا ..

ثم صحيت فجأة وأرى طائرة مروحيه (هيلي كوبتر )
وقعدت أزاعق وانا محلي يا هوه يا طيار يا ابو الشباب ولم يرد علي ولا دق إشارة عشان ادري انه سمعني .. وطحت مره ثانيه ..
فلما فتحت عيناي وجدت نفسي في غرفة بيضاء .. وحسبت أني بالجنه ..
شوي دخل عبيد مع الباب ودريت اني منيب في الجنه .. بل وراهنت اني لست بالجنه دام عبيد موجود .. وصحيح صرت بالمستشفى ولست بالجنه ..
وعلى قولة عبيد إن الهيلي كوبتر كانت طالعه من الرياض تدورنا >> إيه هين ..

مايستفاد من السالفة :
1- خل عنك المغامرات وإقعد بديرتك ..
2- وإن كانها خربانه تبي تغامر لا تأخذ واحد مثل دحيم >> حاقد عليه
3- الحب يعني الحياة >> وش يبي ذا
4- لا تدقق بالسالفه ..


الحقوق محفوظة 2008® ل سراب


تعليقات 12

  1. ههههههههههههههههههههههههههههههههههههههههههه ديرتكـ أبركـ .. بس ذالعبيد عاجبني ههههههههههههههههههههههه بياكل تبن بس رجعووووووهـ :$ تسلم الأيادي عالأسلوب الفناااااااان :$

  2. قصه رائـــعه……يسلمو …بس اللغه مختلطه عاميه مع فصحى بس والله حلووووه سلمت يمناك تقبل مروري:D

  3. خخخخخخخخخخخخخخخخ خخخخخخخخخخخخخخخخخخخخخخخ الله يروووجك على هالخيال.. احلا شي.. يوم تعكرف له عشان ما يحيى .. عاشت النذاله :$

  4. :$ هههههههههههههههههههههههههههههههههههههههههههههههههه لا بس دحيم ذا زودهـا بقـوهـ 😀 هههههههههه وعبيد ودك من يقطعه ويحمسه مع البصل والطماط :$ ههههههههههههههههههههههههههه هـذي ثآني كتآبة لك يا سـروبي وأبدعت طآل عمرك 😀 عقبآل الثآلثه والرآبعه 😀

  5. ههههههههههههههههه الله يرجك لما تطيش .. قسم انك فحل كتابه يالتعبان ودحيم خويك ذا الماصل أبذتسيه جببه لي 🙂 لاتحرمنا جديدك يابطل .. أسلووبك ولا أروع ويابلاادي كم على شااانش 😀

  6. تسلم على هالقصه الحلوه الحبكة -عقدة القصه رائعة بس الخاتمة اعتقد انها مختصره شوي>> تحتاج لفكره اجمل واكثر اقناع يعني كانت شوي اقل مستوى من بقية القصة اتمنى تتقبل نقدي :~ بس بشكل عام القصة طرررر ومضحكه بالقوووو والحمدلله انكم رديتوا سالمين للبلاد:D وزين تعلمت ان الصحرا لها اهلها على قولت المثل: البحر له ناس لفيحه يعرفون التوح من اليرة مب كل من شاف سريحه قال هذا خيط و بايره هههههههه والحب يعني الحياة … انا وياك 100% بانتظار المزيد من القصص الخياليه وتقبل احترامي

  7. ليتك تجنبت طاري الجنة في نظري ودك تسولف الا انك تجيب طاري الدين في السوالف

  8. حللللللللللللوه خيال رائع فعلا بس شوي ونصدق إنها واقع ( والله من زود الهلس ) وقصة تشدك غصب عنك شكرا على هذه الحبكة وعقبال ما تنتج كتب أو افلام في المسقبل القريب

  9. B أفا ما قلتوا لنا نخاويكـم خخخخخ وبصراحة انا عجبتني الخاتمة مرة وابد ما عليك قصور ولا ع الخاتمة قصور 😀 وما عليك وآصل ابداعك 🙂

  10. سروووب وش هالهبال الله يقطع ابليسك خخخخخخخخخخخخخخ لاغاد تاخذ عبيد الدب واذا بغيتوا تروحون متن ثانية علمن ابخاويكم اويلاه……… لاتنسونن خخخخخخخخخخخخخخخخخخ يسلموا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

قصة من نسج الخيال : رحلتي الى الصحراء الكبرى

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول