رسائل المجموعة

قحشة صور مقلعة + متخرمات جنطية

بسم الله الرحمن الرحيم
السلام عليكم ورحمة الله وبركاته
مسيكم بالخير ياجماعة الخير

الموضوع الأول
( متخرمات جنطية )


(1)

أنا هالحين أمر بحالة شديدة من الطفش ولا أبي أحد يحاتسين لأن هذا الشي قد يجعلن أضطر اضطراراً إلى
حمل قطعة من الحديد بطول 96 سانتي متر وبقطر 8 سانتي متر ، همن أنزل بها بسرعة 55 ميل في
الساعة ، على رأس أخونا العزيز (ورقة بلوت) الامر الذي يجعل أهله يضطرون اضطراراً الى حفر
حفرة بالارض بعمق متر ونص وبعرض نص متر همن يذبونه فيها ويروحون ، وهذا الامر يجعل الحكومة
تضطر اضطراراً إلى سحبي على وجهي إلى (الصفاة) ثم تضطر اضطراراً لقطع راسي .

******

(2)

أنا أدري إن كل واحد مننا في باله واحد حاقد عليه ووده يفرشه و يتوطى في بطنه ، وأنا بيني وبينكم
ودي أفرش (بيرلو ) لاعب ايطاليا ، بالله فيه أحد منكم شافه وهو مسجل هدف ؟, والله ياهو سبيكة
مايعرف يفرح هو ووجه



بالله ذي فرحة أوادم يالشين ؟

على طاري ايطاليا ، تعرفون (جاتوسو) لاعب الوسط بإسي ميلان ؟ ، يقولون والعهدة على الراوي
إن اسمه الحقيقي (مناحي الجاتوسو)



رجاءً لا أحد يحاول يقنعني إن هالشبهه ماله دخل بانتشار المخدرات في ايطاليا

******

(3)

أشين شي بالحياة إنك تكون زين ومشهور , يبهذلون فيك الناس ، تصدقون هالحين أنا ما اقدر أطلع
بالشارع من الناس ، إذا صرت أمشي بالشارع كل الناس يأشرون علي ويقولون لبعض شوفوا جنط
السفينة شوفوا جنط السفينة
بعدين كل شوي يجي واحد يصور معي وبنات يجن أوقع لهن أوتوجرافات ، والحالة حالة ، لا وبعد
بالليل ما أقدر أطلع عشان ما أنخطف ، بعدين الخاطفين يطالبون بفدية ويجي يعيي أبوي والصحفيين
يحاصرون بيتنا بعدين أبوي يطلع من تحت العمارة على جاكور تفاحية << شايفها بفلم لميل قيبسون
يوم ينخطف ولده
والله الحظيظين الشيون يلبسون الي يبون ويطلعون متى مابغوا ، شوفوا على سبيل المثال خوينا
(ورقة بلوت) يلبس الي يبي ويطلع توالي الليل ولا يخاف من الخطف ، ماعمره تعرض لمحاولة إختطاف
الا مرة وحدة كان قاعد على الرصيف بعد صلاة الفجر جاك شايب طلع من المسجد وهو ماشي بالشارع
على الددسن شاف (ورقة بلوت) متكي على الرصيف جاك الشايب رجع وركب (ورقة بلوت) بالقوووة
بس أشوى بنفس الوقت مرت دورية ومسكوا الشايب عاد وهم يحققون مع الشايب قالوا له ماتستحي
على وجهك هالكبر رجلن بالدنيا ورجلن بالقبر وتخطف ولد الناس
قال الشايب : أي ولد
قالوا : هالي أنت ركبت
قال الشايب : أما عاد ذا انسان ، والله اني أحسبه جذع أرطى قلت آخذه انتدفى عليه الليلة
عاد (ورقة بلوت) كان مبسوط انه انخطف والى هالحين يسولف به

******

(4)

انا مافقع مرارتي ودبل تسبدي مثل ( الصين ) ، تصدقون ياجماعة الخير ذا الدولة عدد سكانها مليار
وميتين مليون ومع تسذا (كذا) ماقدروا يطلعون إحدعش لاعب يلعبون كورة مثل الآوادم ، تصدقون
إن منتخبنا الكسرة الي كل سنة ينصك ثمانية أقوى من منتخبهم ، الغريب إن منتخب الهند فاز بكاس
العالم الأخيرة مع إن عدد السكان أقل من سكان الصين



منتخب الهند أثناء المبارة النهائية لكاس العالم 2005

******

(5)

ذاك اليوم قاعدينن بالاستراحه نلعب بلوت والبلوت لازم يصير عدد الي يلعبونها اربعه والا
مايقدرون يلعبون ، وحنا هاك اليوم مجموعتين الي يلعبون قلت ابحسب عددنا كم نطلع، واجي اسوي
هالعمليه الحسابيه

4 رجال + 4 رجال = 6 رجال

انا ما اقتنعت واجي اعيد العمليه لأني اذكر استاد اسماعيل طحينيه (مدرسنا بثاني ابتدائي )قال غير
ذا الجواب واجي اعيد المسأله مير يطلع نفس الناتج واقعد العن استاد اسماعيل واقول كل هالسنين
ضاحكن علينا واخر شي يطلع الناتج غير الي يقول المهم واعيد المسأله عشرين مرة ويطلع
نفس الناتج واقعد افكر شوي قلت يمكن المشكله بعلامة الزايد قلت ابغير شكل المسأله واجي اعيده
بس بشكل جديد

4 × 10 × 100 – 3800 ÷ 5 ÷ 2 – 12 = 6

يوم طلع الناتج تسذا مير تقفل معي واشقق الورقه واقعد العن على استاد اسماعيل
السؤال
ليه يطلع الناتج تسذا ؟

******

(6)

أحيانا يمر الانسان بمواقف محرجة خصوصا اذا صرت سبيكة وماتعرف أجوبة لكلمات دارجة مثل لاقال
لك واحد انطح فالك وش ترد عليه والا اذا قال لك لاهنت فيه ناس واجد مايعرفون يردون خصوصا
من الجيل التالي جيل النيدو<< سوالي شايب
بس مثل ذا الموقف ما اظن بيمر على انسان يقول لك واحد اسمه محمد له صديق اسمه خالد المهم مات
اخو خالد ، ومحمد ذا ماعمره عزى أحد ولا يدري وش يقول ، وقعد يسأل الناس والناس علموه ويالله
بالموت أقنعوه يروح يعزي خويه ، الزبدة حفظ له كلمتين وراح لبيت خالد وهو مستعد انه اذا دخل
المجلس بيلقى خالد وبيقول له الكلمتين بعدين يهج
اثره أول مادخل بيت خالد لقى خالد بوجهه على طول بالحوش ، المسكين محمد ارتبك وضاع الكلام
الي هو حافظه سلم على خالد
وقال : ماعليش أخوك مات
قال خالد : لا عادي << والله لوي بمكانه لأنسدح بالارض ضحك

******

(7)



نفسي ومنى عيني وحلم من احلام حياتي اني اعرف وش تنتهي عليه قصه ذا الذيب الاشهب
الي يلاحق العصفور المعصقل ( بيب بيب ) ، هالذيب يخطط ويضبط الوضع همن تفشل الخطه لأسباب
خارجه عن السيطرة انا والله متحيرن ليه تفشل خططه ؟ …
لكن سمعت الناس يقولون وانا ادخل على الله مااحط شي بذمتي يقولون انه كان عاقن بأمه
يومنه صغير وان امه دعت عليه وسلط الله عليه ذا العصفور
لكن تسان تبون الصدز (الصدق)هو حمار بعد ، يعني مافيه غير ذا العصفور , تسان بدل هالمعدات الي
ينفذ بهن الخطط (زرق) لشوايه الخليج واخذ له نص دجاجه مع الرز بتسع تريل واخذ له حمضيات يدفع
به وريح عمره وريحنا معه اقلقنا كل شوي جايبن العيد .

******

(8)

اشوى اني ماني (بس) , اي والله الحمد لله إني إنسان ، قبل كم يوم راجعن من صلاة الفجر الا ذاك (
البس) الي يركض وينطنط ويناقز بدائره قطرها متر ونص فاذا ضربنا الطول بالارتفاع كم يطلع طول
متوازي الاضلاع اذا كان طريق الرياض القصيم طوله (333) كيلو <<<< اقول ما انت بعاقل يا
فيثاغورس
المهم هالبس يناقز ويركض قلت انا ابشوف وش عنده . اثره الحقير القذر يلاحق له صرصور يبي ياكله
يوم شفت الدعوه تسذا طاحوا كل البساس من عيني .
تخيل يجي (البس) للبيت بعد صلاة العشاء ويلقى اهله ماسووا عشاء عاد هو تعبان ولا يمديه يصيد له
فارة والا حمامة وش بسوي ظنكم ؟
أكيد بيروح يدور له صرصور سمين لونه بني لماع , بعدين يفغصه لين يطلع الابيض الي ببطن
الصرصور بعدين بيقلط عليه واذا خلص يقعد يحلي بالابيض الي طلع من بطن الصرصور
^
^
نصيحة لا أحد يقرأ آخر سطرين الي مكتوبات باللون الأحمر

******

(9)

ياكثر الأسئلة الغبية الي نواجهها بحياتنا ، بس صد ق وش شعورك لو جاء واحد وسألك ذا السؤال :
وش الأحسن الوندوز والا الهاردسك ؟
ذا السؤال وجهه شخص لواحد من العيال ، أنا عن نفسي لو سألني ذا السؤال كان خليت يدي تلعب
حبشة بوجهه

******

(تابع 5)

تدرون لييه يطلع الناتج ستة رجال ؟

لأن المسأله تقول
4 رجال + 4 رجال = 6 رجال
الجواب
طلع معنا بالمجلس اثنين رخوم يعني ماهم رجال

طيب فيه مسأله تشبه هالمسألة اتحدى الي يحلها
4 اشخاص + 4 اشخاص = 10 اشخاص

وشلون ؟
اتحدى الي يعرف الجواب
على فكرة له جائزة


الموضوع الثاني
( قحشة صور مقلعة)

أجعلي أموت هالدقيقة إن هالصور الي بتشوفونهن بعد شوي كلهن من تصويري ، قبل كم يوم
قعدت افتش ملفاتي القديمة ولقيتها قلت يالجنط ورى ماترفعها للشباب ، يالله تمسكوا خلونا نبدا :

(1)



ذا حادث ما أدري وش يبي بس الظاهر إن أخوياه متحدينه يصدم الماصورة

******
(2)




مرة كنت معزوم على عرس بحدى مناطق القصيم ، يوم جيت للصالة وألقى لكم هالصورة الي يا أما
إن الخطاط محشش يوم يكتبها والا ساقطن بالتعبير ودايم ينجح بالدف والتشويت ، لا والي يقهرك إنه
قاعد يكتب بالحركات وكلها خطأ ، والإملاء من جنبها

أما لو يدري عنه أمير القصيم تسان سوى له غسيل بستم

******

(3)



خخخخخخخخخ
لا وكاتبها بالإنقليزي ، يستهبل راعي المطعم والا وش قصته
خاشوقة = ملعقة

*****

(4)



يقولون إن الكامري ألفين وثمانية بيتغير شكلها

******

(5)



الآي ميت الجديد

******

(6)



ذا واحد محترم بقوووة ، بس المسكين انسرقت نعاله (الله يكرمكم) ، عاد هو مسوي فيه أسلوب يقول :
(على من أخذ الحذاء بالخطأ مراجعة قسم الوسائل) << ياشيخ اقطع يدي اذا راجعكم

******

(7)





هالحين أهل الكويت يسمون الدباب سيكل (دباب = سيكل) ، ويسمون السيكل قاري (سيكل = قاري)،
بس أنا ما أدري ليه أهل المدينة يسمون الفرشات سيارات (فرشات=سيارات) ، يمكن عشان كلهن
ينمشي عليهن ، أو يمكن عشان كلهن بهن حرف الطاء << أقول اسكت الله يرحم والديك

******

(8)





بالله ذا لفت ؟
ودك يضيع المفتاح

******

(9)









والله يا أخوان إني ملتقط هالصورة بدائرة حكومية ، وذا البرادة بيحطونها للناس يشربون منها ، أنا
الي قهرني من جد إن البس زعل يوم صحيته من النوم

******

(10)



الكرسي ذا من ذوي الاحتياجات الخاصة ، ويقولن إنه هو السبب الي خلى جامعة الملك سعود ماتدخل
التصنيف العالمي ، وبعض المحللين يقول إنه هو السبب بالثمانيات الي ياكلها المنتخب كل فترة

******

(11)





عيال النيدو << ما انت بعاقل يالشايب
بس والله صدق أنا ماتوقعت إن سنتوب يصير دنمركي

******

(12)







وحدة من الثنتين
يا إما المواصير يستهبلن والا المقاول محشش

******

(13)





بعض طلاب جامعة الملك سعود ودك تحرق فيهم

******

(14)





يقولون إن البيتزا ذي كانت دايم تطنز على السمبوسة
والله يالتركي حق المطعم مايستحي والا انه يستهبل والا كان شاربن من المخزي

******
خلاص انتهى الموضوع
دمتم بأحلى ابتسامة
جنط السفينة

مقالات ذات صلة

‫7 تعليقات

  1. السلام عليكم ،، صبحك الله بالرضى والعافيه ،، ابدااااااع بلا حدود بس ما فهمت وش تقصد بصور البيتزا ؟!!! وبعدين عليك اسم مستعار !!! حشيش اتمنى لك المزيد من التوفيق مبدع فلا تحرمناااا تحياتي

  2. لو اني داخل الجوية وقروب ابو نواف في ليلتن وحدة كان الحين معلق نجمة مع اسبقية سنة .. اعنبوك لي ثلاث سنوات ونيف في هالقروب ماعمري رديت ولا شاركت ما جرني الا موضوعك لان بوه لبس في مخي كبر قريح .. جاي على شان شغلتين .. اول شي يا ابو نواف لا خلا ولا عدم رسايلكم ما توصلني كاملة توصلني رسالة وحدة بس وادخل موقعكم القا درزن اليوم مثلا ما جاني الا رسالة هالمشبوه .. اريد حلا والا باوصل الموضوع لحقوق الانسان <<فاهم شغلهم غلط 🙂 ...... نقطتن اخرى لصاحب الموضوع لان شكلي اعرفه .. الي سال صديقك وش الافضل الهاردسك والا الويندوز ثلاثيني اشقر في وجهه علامة فارقة الا وهي محطة عقال ملكي عجلان واخوانه مقاس 4 و شعرة بردئاني على بقسماطي مشبوبن فيه بشرخ ماركة فحم ملامحة اغريقية على سوفيتييه وفيه من بوهة البيزنطيين وشارك في الحرب العالمية الثانية ويهوى جمع الطوابع والمصاقيل والجري عبثاً خلف الثروة واسمه بسطويسي ويعايرونة وجه البلنتي ؟؟ لاني سالن ناس واجد عن الويندوز والهاردسك وشكلي اعرفك والا تقرب لي والا شي ترا اسم امي يبدا بحرف ة .. واسم ابوي يبدا بتنوين .. هاه عرفتني

  3. حبتين يا ابو سفينه كل موضوع يدوس للي قبله انشهد ان مابراسك ولا فيوز صاحي بس بغيت اسئلك يابيي لوحه الخاشوقه ونهوبه مصوره ثانك يو فور ذس موضوع

  4. أنا وبس هلابك ومسهلا نورت الحته ياضنايا أما البيتزا هذي سلمك الله ماتشوف وش صغرها غطا البيبسي كبر الشريحة حتى شف بعد هس اصغر من اصبعي الي بجنب اصبعي الدوبي محييك ياخلفهم ــــــــــــــ بسويطسي والله يا اسمك صعب تلخبط الكيبور وانا اكتبه وبالنسبة للرسايل ماتوصلك لأنك ماسددت الرسوم حولهن على حسابي وانا اوصلهن لابونواف << بيزرفه بس قهر ماطلع الرجال الي سأل هو رفيدزي لأن العلامة الفارقة الفرق محطة عقال بس ماهوب عجلان شفت الحظ عاااد ياليتي والله اعرفك لأنه باين عليك انك مهوي بس وش اسمك امك ذا اول مرة يمر علي اسم يبدا بحرف التاء غير حصة (وجه فاتحن اثمه) حياك ربي يالمنلحس ــــــــــــــ قحشة بردقان يالله حيه ياهلا بك ومسهلا لوي داري تسان قاحشك مع قحشة الصور لوحة الخاشوقة مطعم بحي المروج في الرياض ثانكس فور ريد ذس سابجكت

  5. والله ماقصرت يا …جنط السفيه شي خرافي بس هذا القطو لايش يناظر كذا

  6. ناوي اعقل والله ما اظن انك ناوي تعقل نعنبوا ابليسك شاربن فلاش وانت تكتب الحل حلك من جنبها مثل وجه ورقة بلوت والله يا انا ضحكت عل حلك ياحبي لك يا اوخيي وتسلم على المرور العاطر << توه داخل موقع أدبي

  7. يالله امسكوا حل اللغز مع انه كان سهل بس استغرب ليه ما احد حله عموما انا بحله لكم وانت الله يخلف عليكم فاتتكم الجائزة انا كنت حاطن BMW 2007 للي يحل اللغز بس شكلي باخذها انا << وجه ميت من الضحك عموما اللغز يقول فيه مسأله تشبه هالمسألة اتحدى الي يحلها 4 اشخاص + 4 اشخاص = 10 اشخاص وشلون ؟ اتحدى الي يعرف الجواب على فكرة له جائزة -------------------------------------------------------------------------------- الحل سهل ياجماعة كان معهم واحد اسمه حسنين ومعهم حرمة حامل وبكذا صاروا عشرة ( وجه معه زقارة حشيش ) يالله نشوفكم بالغاز ثانية

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى