فيتامين واو


بسم الله الرحمن الرحيم

نبدأ معكم ببسمله تعطر لكم أفهواهكم وتكسبكم الحسنات بإذن الله ..
لكن قبل ماندخل بمحتوى الرساله احب ان أجري تعديل بسيط للرساله السابقه ..
حديث الرسول اللهم صلي وسلم عليه حينما سابق زوجته عائشه رضي الله عنها
المقصود هنا أن عائشه قد زادت وزنا وليس أنها تحمل لحم أو ماشابه ..
فلذالك سبقها الرسول اللهم صلي وسلم عليه ..
فا أشكر من نبهني عن هذا الأمر ..

( فتامين واو )




(فتامين واو ) هي إختصار لكلمة واسطه ..
وقيل لها فتامين لأنها تزيد من معدل إمتيازك عن الأخرين ..
ماهي الواسطه ؟
الواسطه تساعدك على إجتياز إمور عده كانت إلزاميه ..
الواسطه تقدمك على بعض الأشخاص كان لابد أن تأتي بعدهم ..
الواسطه تسقط عنك إمور كانت تمشي عليك وعلى غيرك ..
بإختصار الواسطه هي وسيلة بعض الأشخاص العاجزين عقليا ..
وتفسيري للعاجز العقلي ليس صاحب التفكير المتأخر .. إنما لأصحاب الفكر المريض ..

فنبدا من عند طلابنا المتفائلون بعد المرحله الثانويه ..
يتقدمون على التخصصات المرغوبه ..
فهذا يريد الطب وهذا الهندسه وهذا الحاسب ومنها من تخصصات ..
تجد لديهم النسب المطلوبه لتلك التخصصات لكن منحصره على عدد معين من الطلاب ..
فنجد من كل جامعه عده من الطلاب لم يتم قبولهم وإقدام غيرهم هم أقل مستوى منهم لذالك التخصص فنستغرب ماذا يحدث !!
معي نسبه + معي همه = معي حق ..
لكن عفوا عزيزي هل لديك ( فتامين واو ) ؟؟
لن يحدث إحباط لن يحدث غضب لن يحدث تكدر للنفسيه لن يحدث ضياع ..
ونمضي بعدها تحت راية ( كل شي تمام ) .. ضاع مستقبل الولد وضاعت احلامه والأمر عادي ..

ومن ثم نأتي للسرقات ومخالفات المرور ..
ينسرق لك محل ينسرق لك بيت تنسرق سيارتك ..
تقدم بالبلاغ ويجي ( الأمن والأمان ) ويقولك (ترى مو أنت أول واحد ينسرق )
ولا يقولك ( أنت ملزم لأن الحين يبي يجي فلان ويقعد يعقب و و .. إلخ ) وماتدري الا تقول الله يستر عليكم ..
مايجيك إحباط أبد اذا هذا رد من الى راح ياخذون لك حق ..
وحتى لو إستمروا على هذا الحال وعقبوا على قضيتك .. كلها فتره والملف بالأرشيف ..
لكن عفوا عزيزي هل لديك ( فتيامين واو ) ؟؟
يعني لو تعرف العقيد الفلاني ولا فلان الفلاني تتوقع راح يغفلون عن قضيتك ؟
طبعا بعدها نمضي تحت راية ( كل شي تمام ) .. وضاع تعب عمري وضاعت دراهمي والأمر عادي ..
مخالفات المرور وطريقة التسيب فيها ..
يجيك يشوف نفس العائله .. ونفس الجماعه ..
خلاص رح وسلملي على فلان الفلاني ..
واذا سألته وراك مشيته .. ( هذا والله من الجماعه وعيب إني ما أخدمه ) ..
والى بعده ماتشوف الا ثلاث مخالفات أقل شي ..
تضليل .. عدم ربط الحزام .. عدم حمل الرخص .. ولو يقدر يزود زود ..
واذا قلت له تهاون معه قالك ( النظام نظام ) ..

وأيضا لانغفل عن الوظايف وطريقة التقديم ..
بعضهم يقعد من 5 الفجر إلى 12 الظهر علشان بس يعطا وجه بالتقديم ..
والثانين مجرد (ألو ) الساعه 5:30 علشان تحلا السواليف مع الشاهي (ترى بيجيك فلان مش إموره ) ..
وطبعا فلان ذا مامعه شهادات مثل الى قعد 7 ساعات علشان يعطا وجه ..
لكن عفوا عزيزي هل لديك ( فتامين واو ) ؟؟
ماضاع مستقبل الحريص أبد وما بدا يشتم ويدعي على من كان السبب أبد ..
ونمضي كالعاده تحت تلك الرايه ( كل شي تمام ) .. سببنا للرجال عجز بإدارة إموره الدنياويه والأمر عادي ..

جرائم الإغتصاب والتعدي على الأخرين ..
ما أكثر ماسمعنا من قضايا الإغتصابات سواء على شاب أم فتاة ..
بالعلن تنظر إلى الحده وعدم التسامح مع الفاعل ..
ويصدر الحكم ( السجن مؤبد ) ( السجن 15 سنه ) (السجن 10 سنوات )
ويختلف الأحكام .. لكن !!
بعد أربع سنوات تنظر إليه ( يتمخطر ) أمامك .. وش السالفه ؟!
والله الصراحه هالوقت وقت فتن ومعذور الحقيقه وبعدين ليه البنت تطلع بذاك الوقت ؟!
ولا الشاب ليه يمشي مع ناس أكبر منه ؟!
ومع تلك القناعات يحذفون خمس سنوات .. وتدخل بعض كبار الشخصيات .. وينحل الموضوع ..
وش نقول .. ( فيتامين واو ) تشتغل شغلها ..
لو المعتدى عليه يعرف فلان الفلاني مثل ماعشنا وشفنا سابقا ..
كان القصاص زي (السلام عليكم ) ..
ونمضي كالعاده تحت تلك الرايه ( كل شي تمام ) ..
المفعول به راح يشوف ذاك المعتدي وراح يتسبب له كم صدمه نفسيه هذا إذا ماكان ( يتلقف ) عليه مره ثانيه ..
لاحول ولا قوة بالا بالله ..
بعد ماكتبت .. سوف أترك لدي تعليق بسيط لأترك لكم المجال لتعليقاتكم ..
الواسطه في أمر ليس فيه مضره على الأخرين لا بأس بها ..
لكن محرمه اذا كان فيها أخذ حق من حقوق الاخرين مثل ماشفنا من مشاهد بالأعلى ..
لكن في النهايه ؟
ماتنفعنا تلك الواسطات ؟
ماتقدر تكدر لنفسك أعمالك وتنشئ نفسك بنفسك وتكون أنت واسطة نفسك ..
أنا ما أذكر بيوم إني بحثت عن واسطه ولا أمدح نفسي .. لكن يالله لك الحمد إموري ماشيه تدرون ليه ؟
لأني أبحث عنها عند العالي سبحانه وتعالى ..
لأني أنا بالأصل مسلم نفسي لما يكتبه علي ..
فما كان من خير فهوا دليل على مرضاته علي ..
وما كان من شر فهوا عقاب على ذنب إقترفته ..
بذكر لكم قصه حدثت معي .. وهي تدل على تسليم أمرك إلى الباري ..
أول ترم لي بالجامعه حملت ماده من أسهل المواد .. طبعا بالسنه التحضيريه ..
لا أنكر باد بي الحزن وخاصه نظرة بعض الناس لهذا الأمر ..
والترم الى بعده يالله لك الحمد ولا ماده لكن كان معدلي متدني شوي ..
وأنا كنت راغب بكلية الحاسب .. وتبغى معدل جيد ..
هل تعلمون من كان السبب بدخولي قسم الحاسب بعد الله سبحانه ؟
صادفت إن ماكانت عندي الإ تلك الماده وكانت فرصه إني أجيب فيها A+ ..
وخاصه إنها سهله ..
جبت يالله لك الحمد وقبلت بالحاسب ( طبعا كل واحد يباركلي عاد D: )
لكن هل إحتجت إلى واسطه ؟
الإمور سهله لو نشوفها من باب أخر غير باب الواسطه ..

قصه طريفه مع ال(فيتامين واو ) ..
قبل فتره كان عندي جهاز مكتبي الرام حقه ( 1GB ) وحبيت أزيد علشان يكون ( 2GB ) ..
العمليه مو صعبه فقط فك الكيس وتركيب الرام الثاني ..
ويمكن من عندهم خلفيه عن الحاسب يعرفون الشي هذا ..
طبعا وديته لمحل أعرف راعيه .. وكان مزحوم مع الفورمات الى بالأجهزه عنده ..
طبعا أنا جيته من باب إني أعرفه وإموري تبي تمشي على طول مع ديسكاوند يحبه قلبك D:
قلت له الى أبيه .. وقال خل الجهاز وتعال بكره وأبشر ..
طلعت أنا والمفروض إنه على طول يسويه لكن وقته ماكنت بحاجة الجهاز مره ..
دقيت من بكره .. قال ماعليش يامنصور والله زحمه لكن الليله ان شاء الله ..
جيت الليله .. وقالي بكره وجيته بكره .. طبعا جلست على هالحاله أربع أيام ..
بالأخير قعدت عنده من بعد الساعه 10 إلى 12 << إمحق واسطه ههههههههه
ويالله يالله سواها ..
قلت له المره الجايه برسل جهازي مع واحد علشان تسوي شغلك على طول هههههههه
نختم الموضوع من عند هنا ..
سبحانك لا إله الا أنت إني كنت من الظالمين فإن لم تغفرلي وترحمني لا أكون من الخاسرين ..

كان معكم إخوكم
Mansour

( لاتنسونا من خالص الدعاء )


تعليقات 16

  1. انا بس سؤالي.. ليش صرنا كذا! ليش امورنا صارت كذا!! بس كل اللي بقوله لو الواحد يتوكل على ربه ويعتمد عليه كل شي بيصير اوكي.. بلا وااو ولا راااء

  2. اول شي اهنيك على موضوع الروعه,,, انا احد المتضررين من الوااااو,,,ترم من حياتي راح بسبب الوااااو لكن الله حسيبهم,,, والظلم ظلمات يوم القيامه

  3. يسعد لي صباحك كلامك على العين والراس بس للاسف هنا عندنا ماينفعك بعد الله الا الواسطه انا شخصيا فرفرت في كل جامعات وكليات الرياض ولا احد قبلني على اني كنت راضيه باي قسم بس ادرس جبت واسطه ودخلت الجامعه اللي ابيها وبالتخصص اللي براسي

  4. لا هنـت على الموضوع ،، ماشاء الله كلام نابع من القلب بـس من لا حيـلت له فليـحـتال اذا كنت تســتحق الجامعة ولا تدخلـها في هاذي الحاله بعـد اعتـمادك على الله لازم تجيب لك واسـطه ولا أخرتها بـتروح جغـرافيـأ ولا تاريخ لعدم وجود الكراسي وتلقـى الي نسبـته ما تـأله الكليـه الي انت تسـتحـقها ما مسـك ملفـه ولا دخل النت عطـاه واسـطتـه واستـمتع بالصيـفيـه ،، اذا الحـال صار كـذا لازم تـخلي لك في كل مكـان واحـد يخـدمـك ولا بـتـتـعب ،، والـله الموفـق ،، وشكـرا ً

  5. أما الوظائف .. فهي حدث ولا حرج .. B قبل فترة كنت مقدم على كم وظيفة .. وسفر .. واختبارات .. وآخر شيء يأخذها (( واحد )) ماجاء للاختبار .. واللي ماله (( واو )) لا يتعب ولا يشقى .. الله ارزقني ..

  6. أنا وحده من اللي عندهم واسطه 8) بس والله على قلة فايده:( آآآه ياقلب لاتحزن..:( طبعا اللي ماعنده واسطه الباب يوسع (فيل) وبعد ديناصور من الحجم العائلي:D

  7. يااالالسف اصبح في كل شيء اماكن شاغره لاصحاب الواسطات واحيانا يفضلوا غيرك في اي مكان بدون علمك وكأننا لسنا بمسلمين الله يردنا لدينه ردا جميلا

  8. الواسطه بكل بساطه هي الهواء الذي يتنفسه الجميع للأسف ولك اجمل تحياتي اخوي منصور

  9. السلام عليكم… الواسطة أثرها كبير، ليس فقط في الظلم الحاصل ولا ننسى الظلم ظلمات يوم القيامة. بل يتعداه لشيء كبير أيضاً وهو: اغلب الناس يتكلون في الوقت الحالي اتكالاً فضيعاً، لا أحد يريد أن يذاكر أو يعمل أو يجتهد. لذا نجد الخدمات في أغلب الأماكن سيئة لأن: – من فيها لم يحصلوا على الوظيفة لكفاءتهم. – لم يدرسوا ولم يتعلموا ولم يتدربوا. فتخيلوا المجتهد الذكي يحرم من الدخول للكليات و الكسول المتكل هو من يحصل على هذه الفرص، كيف تتوقعون أن يكون المجتمع؟! فصرنا نتعذب بسبب الخدمات السئية، و جربت خدمة الأجنبي والشركات الأجنبية وخدمة الشركات العربية وكان الفرق شاسعاً. وهذا ما جنته أنفسنا علينا – على نفسها جنت براقش – نحن بالواسطة واستعمالنا لها نحرم انفسنا من متميزي مجتمعنا و من أذكيائنا. نحن بالواسطة نظلم بعضنا، و نأكل حقوق بعض. نحن بالواسطة نأخذ ما ليس لنا…… نحن بالواسطة نحرم أنفسنا من متعة النجاح. هل تعرفون ما هي سعادة أن يحصل الشخص على شيء بعرق جبينه وبكده وتعبه؟ مثلا في ألعاب الفيديو هل تقارن سعادة وبهجة الفوز لو كان بتعبك بسعادة وبهجة الفوز إن كنت قد استعملت الـ cheats (كلمات السر التي تعطي قدرات خارقة)؟! شاكرة لك أخي الكريم مشاركاتك الرائعة، قرأت هذه وقرأت البقية، أسلوبك رائع و يبدو لي أنك إنسان مثقف (تقرأ و تتعلم) و عاقل (تعرف الصواب من الخطأ) و لك قلب مرهف (يتألم قلبك على حال المسلمين) رغم استخدامك اللهجة العامية.

  10. الواسطة موجودة بعد بكثرة عندنا يالبنات تخيل بنت اعرفها متخرجه من الكليه صار لها 4 سنوات ما جاها شئ مع ان ما كان قدامها الا كم بنت بس لما راح اخوها للأدراه شاف انهم مقدمين عليها بنات نسبهم واطيه ومالهن حق بالوظيفه !!!! وهذا كله بسبت الواسطات

  11. كان ياما كان كان فيه بنت فاشلة جدا في الدراسة ما تحضر محاضرات اختباراتها زي الزفت لكنها كانت الاولى على زميلاتها تدرون ليش؟؟؟؟؟؟ لانها بنت مدير الجامعة ———— ثانيا::: انت مبالغ في مقالك،، تدري ليش لاني يمكن اصدق ان واحد انقبل في الجامعه بالواسطة،،او توظف بالواسطة ،،، او مشت امورة بالواسطة لكن مسجون يطلع من السجن بالواسطة فهذي قويه لسبب بسيط،،، و هو ان الشخص اللي يتوسط لك مستحيل يودي نفسة في داهية عشانك،، ———— و السلام

  12. انا اتوقع في الاخير سيكون هناك ردة فعل يعني راح تسمعون ان هذا قتل هذا وان المدير الفلاني هدد بالسلاح لأنك تجتهد وفي الاخير تصير الاخير واللي في الاخير يسبقك ويكون في الاول والسبب الواسطة

  13. أنا يوم جيت أسوي الجواز أكلتلي فتمين واو وفي نص ساعه جاني الجواز

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

فيتامين واو

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول