غرائب عجائب + صور من عدستي الرقميه Nikon D80 ج2


بسم الله الرحمن الرحيم

دائما نجد الكثـير يفتتحون مواضيعهم بذكر البسـمله ..
والبـعض منا يعتقد هذا الأمر روتيـن متكرر عادي .. وأقول له .. لا ياعزيزي ..
البسـمله تطهر لسانـك وتطمئن قلبك وأيضا تعينك وتيسر أي أمر من إمورك الدنويـه
فلذالك .. إجعل لسانكـ يكون رفيقـه تلك البسمـله في كل الإمور فاوالله نعم الرفيق

قبـل البدايـه
أود بكلمـه ..




أحمد الله وإبارك على مرور الإختبارات النهائيـه
وبإذن الله الجميـع حصـل الدرجات المرضيـه
وأتمنى من الجميـع أن يستغل العطلـه الصيفيـه بما هو مرضـي لله لا بسخطه ..

وإحب أن إعقـب عن المـوضـوع السابـق بخصـوص الكاميـرا ..
صور من عدستي الرقميه Nikon D80
فأشكـر كـل من أثنا على الصـور
وعلى من ساهـم بملاحظاتـه وأحب أن يجعلها فائدهـ لي وللجميـع
وعلى من شرح لـي بعض إستخدامات الكاميرا
وأتمنى هنا أن تجدوا الأفضل طبعا من بعد فضل الله ومن ثم توجيه بعض الإخوهـ ..
ومازلـت أنتظر المزيـد من التوجيهات ..

الإجابـه عن بعض الأسئله ..
بالنسـبه لسعـر الكاميـرا D80 تلاقونها بـ4200 لكن انا كاسرته لما وصل 4000
<< قصيمي P:
أما بالنسبه لمكان الكتاب أنا إشتريتـه من مكتبة جرير ..
والى طالبن أصور حباري وضبان
لقيت ضب صغير عند إخوي وعلى اني كنت بصـورهـ
لكن من بكره مالقيته وسألت إخوي قال أظن راح شوربه ><
الله يخلف علينا إن شاء الله إذا طلعت رحلة صيد ضبان اصورلك P:

بسم الله نبدأ ..

طبعا كالسابـق الإميل يمتلك قسميـن قسـم عن التصـويـر الرقمـي
والقسم الأخـر يقع تحت عنوان ( عجائب غرائب )

فنبدأ من عند القسم الأول
( صور من عدستي الرقمـيه Nikon D80 الجزء الثاني )

الموقع: السعوديه – القصيم – بريده – المضمار
التوقيت: من 12 إلى 6 الفجر أي 6 ساعات
العدسه : 18-135
المساعدين: نواف ووليد الى جاهم النوم وبغوا يهجون إلا شوي P:
عدد الصور : 12 صوره

طبعا أغلب الصور كانت من بعد بداية الشـروق ..
لأني واجهت صعـوبـه بالتصـوير الليلي ..
وعلى كثـر الصـور ماطلعت إلا بثلاث صـور فقط

نصائح من بعد هذه التجربه ..

1- حاول قد ماتقدر قبل ماتطلع لرحلة تصوير
حاول تكون عارف وفاهم كل ماتحتويه الكاميرا ..
لجل تستفيد بشكل أكبر
أنا عندي مشكله وحده ولا الباقي متيسر يالله لك الحمد
التصـوير الليلي فقط ..
وما أحب استخدم الفلاش مايعطيني صـوره تعتمد على ألوانها الطبيعيه

2- إبعد عن أي شي فيه صبات وحواجز لاتحاول تصورهـ ..
إسأل مجرب بغى يروح لبوغريب ><
داخلـن على الحرس الى بإمارة القصـيم أستفسر بس
أقوله عادي أصور الإماره شكلها حلو الصراحه
<< شكلها حلو عزالله غابت شمسك
تراهم ماكتبوا إسمي وإسم نواف ووليد ولا فتشوا سيارة نواف
وأشوني ماجبت الكاميرا ولا كان صادروهـ

3- إذا كنت تستخدم بطاريه وحده فانتبه ولاتصير مثلي صرت أقصد تقصيد
متوحش تفضى البطاريه
أما إذا كنت تستخدم بطاريتين وحجرات فخذ راحك ..

4- وانت تصور توقع يجيك واحد ويقولك من أي جريده أنت
لاتقوله مالك دخل بس قله هاوي تصوير

5- خذ معك شباب لاتاخذ شيبان << يقصد نواف ووليد
الساعه 3 بالليل يزعجونك جانا نوم جانا نوم P:
تذكرون الكتاب .. أسرار التصـوير الرقمـي ..
نـزل له الجزء الثاني الأن .. الحقـيقه أروع من الى قـبل
أنا ماخلصتـه لكن مازلت أستفيد تجارب حلـوه منه وهذي صورته

لنفس الكاتب: سكوت كيلبي
وذكرولـي أشخاص عن كتاب لـه عن طريقة تنقيـة الصـور وما إلى ذالك
وإن شاء الله ببحـث عنه ويكـون بالمـوضـوع القادم إذا لقيـته ..

في النهايه ..
أشكـر نواف ووليـد ياحبيلهم بعد على وقفتهم معي .. عزالله إنهم ماقصروا معي
بس لو مايزعجونك بسالفة النوم P:

وبالنسبه للصور أتمنى إني أحدثت تغير أجمل وأفضل من السابق


القسم الثاني
( عجائب غرائب )

في وقت سابق .. إذا أردنا أن نرى مايزيد فينا الإعجاب والإستغراب حول أمرا معين ..
كنا ندفع بعض المال لنشبع تلك الرغبـه .. لكن اليـوم أصبح ذالك بالمجان ..
نراهم في كل يوم وبشكل متكرر ..
أثناء ذهابك إلى دوامك المعتاد أو أثناء ذهابك مع عائلتك لمتنزه ما
فهل تعلم من هم ؟
هل تعلم من يزيد فضولك وتود أن تعرف بدايتهم ونهايتهم ..
بكل بساطـه ..

جيل اليـوم .. من الفتيان والفتيات ..
فذاك يضع وشما على كتفيه ليبهر من حوله بمدى قوته
والإخرى تجعل العباءه تتلاعب مع الهواء لتخرج لمعان ساقيها
وتقول لك وبكل غنج .. ( لو سمحت لاتزعجني ) ..
أليس ذالك يبهرك أيها القارئ ؟
أليس في بعض الأيام تود أن تعرف لماذا أدى بهم إلى هذا الحال ..
واليوم أقولها لك .. وبالمجان أيضا ..
الانفتاح الخاطئ طبعا ..
ذاك الانفتاح المزعج الذي نحن مستغنين عنه
كلمه تتردد في مسمعي وفي رؤيتي ..
أدخلوه علينا من بوابة ( نحن المنغلقين ) .. سهام تتوالى لتضرب الأهداف المعنيه
وكل يوم ننظر إلى شجاع يسقط ويقع تحت ذالك الانفتاح الخاطئ ..

هل تعلمون ماهوا الانفتاح الخاطئ ..
هو الانفتاح المعارض للشريعه الإسلاميـه ..
فقد جاء الغرب حامل معه سمومـه ليلقي قنبله أقوى من قنبلة هورشيما التي وقعت على اليابان
قنبله بدأت بالإنتشار بين المسلمين ..
قنبله تذهب حياء إسلامنا وحياء عاداتنا ..
جيل اليوم .. بدل مانجعلهم يقتدون بمحمد عليه أفضل التسليم وأصحابه ..
جعلناهم يقتدون ( بمهبل ) الغرب وأتباعهم
اذهب إلى المواقع التى تقدم ( سبيس ) خاص للمشترك ..
صفحه مجانيه لكل شخص يضع فيها مايشاء ..
إنظر إلى صورهم ماذا يعرضون ..
عرب مثلي ومثلك يتكلمون اللغه العربيه ويعيشون في نفس الموطن
هل يعرضون صورة ( لا إله إلا الله ) أو صورة ( إلا محمد رسول الله ) ؟

يعرضون أجسامهم العاريه وأشكالهم الخازيه وحركاتهم المهينه
فذاك يظهر صدرهـ العاري ليجد التميز فيما يفعل
وهذا يرسم وشم بظهرهـ ويقول ( تعبني هالوشم ) ليعجب به الناس
والأخر يضع ميداليات غريبـه عجيبه
سألت عنها بعض الإخوهـ
فقال لي هذه ميداليات ( عبدت الشياطين )
للأسف هو مايعرف المصيبه من خلف الميداليات
يظن فيها حركـه وفلـه الله يهديه
وهذهـ تستقل بمختلف الصور .. مرهـ مظهره الفخذ
ومره اليد ومره الفم ومايتبعه من الحواس
وأنا مادري الحقيقه وين المغزى بعرض أجزاء الجسم !!
والإخرى تظهر أصابعها الملونه منتظرهـ المعلقين
وإنظر من تعليقات الشباب ..
منهم المتميلح ومنهم الضايع ومنهم الدايخ خلف تلك الأصابع
فيا للعجب
لو تعرض جسمها بالكامل وش راح يفعلون ؟!
في تلك المواقع أثناء ماتندمج فيه تظن نفسك داخل كزنو وما شابه
فنندم حقا على تلك الحنكـه من جيلنا ..
وأتمنى من الجهات المختصـه أن تغلق مثل تلك المواقع
فوالله لم تأتي الإ بالفساد لأصحاب القلوب المريضه ..

للأسف العالم لا يعلم الانفتاح الصحيح والسبب قلة المعرفه ..
نعم لا أنكر .. يمكن في الماضي كنا نشد ونتعامل بالقـوهـ ..
ومن هنا أنتج بين الناس فكرة الانفتاح لكن أغلبها جاء بشكل خاطئ
المفترض ننفتح مقتديين بحبيبنا ونبينا محمد عليه الصلاة والسلام ..
في السابق يمكن البعض لايعرف كيف يلاطف أهله .. لأن من طبعه الشدهـ والغلاضـه
ومحمد لم يكن كذالك .. كان محب لأهلـه وكان يعيـنهم بكل أمر .. فلنقتدي به
في السابق كانت محاوراتنا تسقط بيد من هو أطول لسان وأعلى صوت ..
ومحمد لم يكن كذالك .. كان يسمع وينصت ويحاور بأدب حتى لو كان الذي أمامه مشرك .. فلنقتدي به
في السابق كان لايوجد تفاهم .. ونحكم على الأمر بسرعه ..
ومحمد لم يكن كذالك .. كان صبورا حتى يثبت الأمر والدليل حادثته مع زوجته عائشه .. فلنقتدي به
هذا هو الانفتاح الصحيح هذا مانقتدي به أعزائي
ليس مانراه الأن في البعض يقتدون بشخصيات ليس لها مكان بمعجمنا
فلا يغركم إخواني وأخواتي مايقال عنى
والله إن نحن لا معززين ومكرمين بإسلامنا وأخلاقنا
فقد قال الله تعالى : ( وَلِلَّهِ الْعِزَّةُ وَلِرَسُولِهِ وَلِلْمُؤْمِنِينَ وَلَكِنَّ الْمُنَافِقِينَ لا يَعْلَمُونَ )

أحبتي ..
أود أن أطرح لكم قصـه وكان سببها الانفتاح الخاطئ ..
كنت جالس مع شاب الله يهديـه مبتلى بالبنات ..
فمره ذكر لي قصه من قصصه إستغربت منها الحقيقه ..
قال أعرف فتاة تبلغ من العمـر 19
وجاء يوم اللقاء .. ورحت للمجمع إلى ساكنه فيه ..
بعد المكالمات والإستئذان من الحارس دخلت المجمع
توقفت عند الباب وأنتظرها تخرج ..
يقول فجاءه خرج رجل ..
فتنملت رجليني .. وقررت إني أتحرك
لكن كنت متردد لعله من سكان نفس العمارهـ
مادريت إلا بنت طالعه خلف الرجل .. ومشت لما وصلت لم سيارتي وركبت
بعدها مشيت على طول .. وكنت مرتبك ..
وقالت لي وش فيك ؟
قلت من الى عند الباب ..
قالت هذا ( إخوي ) الوضع ( عادي )
يقول بعدها صرت أدخل بيتهم يجي اخوها ويطلع كأن مافي احد
وسألته أنا قلت وين أبوها وإمها ؟!
قالي إن أبوها دكتور جراحه وتقولي إنه دايم يطلع مع إمي برا للخارج

طبعا أنا كنت أحسب إنهم يطلعون لجراحه معينه أو دراسه وغافلين عن البيت
لكن شوفوا الجواب ..

قالت يطلعون علشان يروٌحون عن أنفسهم
ومن ما فهمته من الشاب من طريقة حركاته إنهم يتناولون ( المسكرات ) ..
هذي القصه كانت مفرحـه له لأنه يبي ياخذ راحته متقلبا بين أوامر نفسه المريضه ..
لكن محزنـه لمن ينظر إلى ماوصل إليه الحال ..

هذا نهاية الانفتاح الخاطئ ..
فقلي أخي أو إختي ..
هل تود أو تودين في يوم أن تؤل إليه عائلتكم إلى هذا المستوى ؟
سؤال .. قد نعلم إجابته بالنفي والإستنكار .. لكن قد يتغير مع تغيـر الزمن ..

نقطه تنهي كلماتي ..

مانستفيد من الموضوع ..

1- كثيرا من الناس الذين يسقطون تحت ذاك الانفتاح أسبابه دائما الضغط المتتالي ..
وخاصه الفتيات ..
نجد أن من حولها يضغطون عليها من باب ( يالمعقدهـ )
وسمعت قصص كثيره بدايتها كذا ..
راح ضحاياها الكثير الكثير
فلنحذر إخواني وأخواتي ..
فمن يود أن ينتهي بـه المطاف إلى كهف مظلم لايعلم طريق الخروج منه

2- أنا متأكد ان بعضكم .. قد إلتحم ببعض من وصفتهم ..
إذا كان شخص قريب إليك .. فبادر بالإصلاح ..
فإذا كان مكتوب لـه الهدايـه من تلك الامور
فتكون على يديك من بعد الله ويكون لك أجرا بالأخره قد تكون سببا بدخولك الجنه ..

3- تلك العيـنه من الشخصيات .. تعلمون من سببها وتطورها إلى هذا الحال ؟!
نحن .. نعم نحن ..
لو من البدايـه نفهمهم إن الى مقدميـن عليه شيء خاطئ ماراح يصل فيهم الأمر إلى هذا الحد ..
تلك الشخصيات .. تتجرأ على أمر معين فإذا وجدت الموافقه تستمر وتتطور وتأثر على من حولها
شبهتها أنا بالفيروس المتنقل
يتطور ويؤثر على الخلايا المحيطه به ..
لكن لو عالجناه ممكن يتحول الفيروس إلى أمرين ..
يايكون علاج لسائر الجسم أو يموت وينتهي ..
فلنعالجهم ليكونوا مصلحين لا مضرين على مجتمعاتنا ..

4- قال الرسول اللهم صلي وسلم عليه ..
( كل أمتي معافى إلا المجاهرين،وإن من المجاهرة أن يعمل الرجل بالليل عملا،ثم يصبح وقد ستره الله،فيقول : يا فلان،عملت البارحة كذا وكذا،وقد بات يستره ربه،ويصبح يكشف ستر الله عنه )
القصه التي ذكرتها قصه من مئات القصص التي سمعتها
فكم منى مجاهر ومتفاخر بتلك المغامرات ..
مسكين ذاك الشخص يعتقد هو الفائز
بل هو الخاسر بدنياه وبأخرته
خسر أمانته مع الله وخسر العفو من رب العالمين ..

5- لم أعرف شخصا قط سواء شاب أم فتاة خاضوا الطريق الخاطئ
إلا عاشوا في رهبه وخوف ..
ورأيتم أنتم صاحبنا كيف دخل فيه الرعب فقط برؤيته شخص لم يعرف حقيقته
فسؤال يحيرني الحقيقه ..
أنا يكفيني أفكر إني أذنب ذنب عظيم ألا وهوا الزنا
فكيف ذنب عظيم ومعه خوف ورهبه ؟!
يعني يالعاقل مالك ومال هاللخبطه هذي كله ؟
كل هذي علشان تلبي رغبتك وترضي شهوك ؟
فكر فيها وإقنع نفسك
وصدقني لو تقتنع إنك مستغني عن كل ها الإمور
راح تعيش حياة مميزهـ وإسأل ناس مجربيـن هالشي ..

6- ماذكرته من شخصيات وقصص ليست سوى نقطه في بحر
فهؤلاء أعتبرهم بدائيين
فقد رأيت وسمعت شباب يتحولون إلى فتيات و فتيات يتشبهن بالرجال
ونعلم مصيبة هذا الأمر وخاصه أنها تحل عليهم اللعنه ..
ولا ينظر إليهم الله في يوم الحشر
وهذا غير الشذوذ الجنسي المنتشر في الوقت الحالي بين الإمم
لكن أنا حاولت أوضح البدايـه لهؤلاء
بدايه قبل نهايه مؤسفه
قبل مايسقط الفأس بالرأس

7- دائما ودائما وأرجع وأقول دائما
تلك المصائب سببها الرئيسي ( الابتعاد عن ذكر الله )
وذكرت في مواضيعي السابقه قلوبنا كالكأس .. فارغه من الداخل
إذ لم تعود النفس أن تملأه بأوامر الله وذكرهـ والتدبر بالقران
سوف تملأه بما تشتهيه من ملهيات الدنيا ..
فقد قال السلف الصالح الإمام الشافعي رحمه الله : اشغل نفسك بالخير فان لم تشغلها بالخير شغلتك بالباطل

هذا والله أعلم وصلى الله على نبينا محمد ..

ربي .. أعلم أن سبب تلك المعاصي
هي إتباع شهواتنا وتقليل من أوامـرك
فيارب إعف عن مامضى فوالله غير ذالك لنحن الخاسرون ..

للتعليق والنقد البناء على تلك التدوينه من هـنـا ..

توضيح

الى من يعتقد الحدهـ والخشونه من عاداتي ..
وخاصه من قالي
( يالمتخلف , يالهمجي , يابدوي , يالمتحجر )
بعمري كله ما اذكر إن تلك الأساليب جابت نتيجه إيجابيـه ..
بل من تقذف إليه الكلمات هو الكسبان .. يكفي الحسنات والأجر الذي أتى من وراهم
وإذا على طريقة سردي للموضوع ..
أنا اتكلم بالأسلوب هذا لأني قاعد أكلم عقول تستوعب وتعي ما حولها ..
ليست عقول تحتاج الى التمهيد ..
فمع تلك العقول نحتاج الى الرسالـه الواضحه السريعه ..
ليس بالرساله البطيئه المتقطعه ..
وأنا نبهت اكثر من مرهـ ..
الموضوع إقراه بهداوهـ وإفهم حلاوتـه ..
لجل مانقع تحت أخطاء نحن مستغنين عنها ..
أما بالنسـبه للشتم والى ذالك ..
هذا تصرف صبياني عرفته من أيام الصغر ..
حيلة الضعيـف المستضعف ..

شكر وعرفان

أود أن اتقدم بالشكر لدولة الإمارات إلى ما أصدرته من قرار ..
الا وهوا منع لعبة ( Grand Theft Auto IV ) ..
وأنا إطلعت على اللعبه عند احد الإخوان وكانت على جهاز .. PS3
خلاعه بمعنى الكلمه .. تعطيك دروس بالنصب والاحتيال والسرقه
وحتى تعطيك دروس بالمواعده والهروب من الشرطه بطرق ذكيه ..
أنا إعاتب وبشده إلى من يقتنيها إلى أبنائـه فوالله إنها مصيبه ..
إذا تبي تشتريها انت فلك الحريه انت عاقل وتفهم الصح من الخطأ ..
لكن لاتقتنيها إلى فلذة كبديك .. فسوف ترا فيهم عادات لم تعتد عليها ..
فقد رأيت مجموعه من الاطفال وكانوا يتبادلون كلمه ( أفعل بك ) كلمه تدل على الفاحشه وما الى ذالك ..
فسألتهم انا تعرفون معنى هذي الكلمه ؟!
قالوا إيه وكانوا واثقين من الإجابه .. معناها ( تبا لك )
يعني يتبادلون كلمات لايعرفون حتى معناها ..
هذا ماتجلبه مثل تلك الألعاب ..
تسليط وترويض ألسنة الصغار ليخرجوا لنا بلباس غير لبسهم المعتاد ..
فالله يستر علينا يارب ..

أعلم أني أطلت عليكم ..
فتقبلوا أسفي ..
إخوكـم
Mansour

( لاتنسونا من خالص الدعاء )


تعليقات 19

  1. اريد ان اوضح شي معين (وهو: على نياتكم ترزقون…)يعني الشاب او البنت اللي بيضيع وقته بالعب في اعراض الناس قبل زواجه او بعد زواجه راح يرزقه ربي على قدر عمله بالدنيا والاخره (وانتم افهموها…… اريد ان اذكر ان اسلوبك جدا رائع وحتى كلامك مقنع جدا وانا مستغربه من اللي ينعتك ب( يالمتخلف , يالهمجي , يابدوي , يالمتحجر) كلامك مافيه اي تحجر او تخلف او حتى شده..استمر كتاباتك جدا رااااائعه يعني يبونك تفتح لهم ميوزك رومانسي وانت تتكلم؟؟نو كومنت الله رقيب وحسيب مشكوووور والله

  2. موضوع ممتاز ومفيد , ليست لي خبرة في الصور , لذلك سأكتب عن نصائحك .. لو يقرأ المسلم والمسلمة ( سورة النور ) , لكره الزنا .. لقد كان السلف الصالح يحفظون بناتهم سورة النور . 2- فيها دليل على تحريم ( زواج الرجل من امرأة غير عفيفة , وعلى زواج امرأة من رجل غير عفيف إلا إذا تابوا .. كما استدل ذلك الأمام أحمد ) . 3- تحتاج أمتنا إلى الأمر بالمعروف والنهى عن المنكر . سبحانك اللهم وبحمدك أشهد ألا إله إلا أنت وأستغفرك وأتوب إليك

  3. حقيقة الكتاب الذي ذكرت رائع جداً، وقد اقتنيته قبل فترة بجزئيه، ومخليه عشان أول ما تبدأ العطلة أشتغل عليه 🙂

  4. جزاك الله خير اخوي منصور ياليت الاخوان و الاخوات اللي سقطوا في هذا الوحل يتنبهون و ياخذون بكلامك فأسوبك في غاية التعقل الواحد اذا سمع بهالمصائب يقول ما عاد في الدنيا خير لكن اذا نظرت للمحاضرات في المساجد و حلقات التحفيظ و رايت الجموع الغفيرة حمدت الله على ذلك و ايقنت ان الخير موجود في هذه الامة الى قيام الساعة الصور جميلة بس انا ما احب الكوادر الضيقة ياليت تتوسع و تطلع للبر تلقط لنا كم صورة

  5. نصحت فأبلغت . والله كأنك حطيت الماء البارد على النار وربنا يوفقك .آمين وبالنسبة للذين حيلتهم السب والشتم ما هم إلا كمن برفع رأسه يريد إطفاء نور الشمس ببصقة فيعود بصاقه عليه .

  6. السلام عليكم اول شي احب اشكر نواف ووليد على الصبر خخخ ثاني شي ماعليك يالغلا استمر وعلى فكره مواضيعك تعجبني حييل لدرجة اني اذا جيت اقراء الموضوع مااحس باي ملل كلامك متنوع وحلو وبعيد عن الفلسفه لكن اللي ينقدك او يقول متحجر وغيره ماهم الا من شلة طيحني وسامحني هذولا بالاصل ماتعودو ولاتربو على الاصول اللي عشناها يعني مهجن ومتعود على خواله ويخرب على اهل الديره واهل الاصل عاداتهم أستمر يالغلا يعطيك العافيه على هالذوق بالتصوير وعلى فكره التصوير روعه حيل ماتوقعت انه يكون بالقصيم بس المره الثانيه عطنا كم لقطه من العيون بتذكر ايام جدتي الله يرحمها موفق ..

  7. كلامك رائع ماشاء الله وأسلوبك ،ويارب تكون من الغرباء اللي يصلحون إذا فسد الناس .. ثبتك الله .

  8. بصراحه موضوع كله على بعضه حلوهـ والي عجبني اكثر التصوير ^_^ ماشاءالله تصوير ولا احلى منه ابداعـ،ـ ماشاءالله شكرا َ

  9. الصوور حلووه ماشالله تستحق عنااء الست سااعات ;p … اما نصحك فكان من أسلس مواضيع النصح التي قرأتها …. سلمت وجزاك الله كل الخييــــــــر والله يهدي شباب وبنات المسلمين :\

  10. والله انك مبدع ..صور رائعة ماشاء الله وبالنسبه لموضوعك مانقول إلا جزاك الله خير واسأل الله أن يهدي شباب وبنات المسلمين , ويبعد عنهم الشرور والفتن

  11. كنت ادور على احسن صورة علشان اقول اعجبتني هذي الصورة لكن ما اقول الا كل الصور روووعة

  12. مـــــــــــــــاشــــــــــــــاء اللــــــــــــــه والله انك مبدع اليوم بروح اشتري ذي الكمره لي اكثر من شهر محتار بس بكم قيمتها؟؟؟

  13. بصراحه كلك على بعضك حلو وش اقول وش اخلي تصوير وثقل وكلام عاقل ولو ما يجي من موضوعك الا اني بديت احب المضمار وكله من صورة الكرسي (الصوره العاشره) بصراحه روعه لك كل الشكر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

غرائب عجائب + صور من عدستي الرقميه Nikon D80 ج2

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول