على بلاطـة : ماراح أسافر لابها .. بانهج عمري للخارج وافتكّ


قبل ماتقرا الموضوع ، قل والله ان اردّ<< يجمّع ردود على وزن يجمّع بالخشاش

( )


اعلان





دُعاء :

اللهم انك تعلم اني اكره ولد خالتي راشد ومحمد ولد عمتي يومهم يقولون دخّن معنا واعيي اللهم اني اسألُك انك تقلعهم عني وتخلي شقتهم اللي بحي السلي تشب ويسلمون منها ويستادبون ، آمين


مثل ماأنتم قارين بالعنوان ، السالفة أكيد تحربش بعلوم السفر والتسافر ، وقبل ارطن عليكم شوي واعطيكم من غدقتي أحب أثني على الوزير القصيبي يومه يقدّم الطلب للزباين واقوله : كل عام وانت بخير وان شالله انك تبي تقدّم الطلب بفوّال ومطبق السبيعي اللي بحي السويدي بالرياض عشان تعرف قدر اللي يشتغل بالمطعم واحب بعد اوجّه لك رسالة بحكم اني مواطن صالح وانام بدري واصحى بدري واعبي بنزين بـ 91 وماقد شلت ولاعة بجيبي أنك ياطويل العمر لازم تشوف لنا حل مع شبابنا اللييشحنون رصيد للي يعزّ عليهم وتوضّفهم قبل مايجيبون العيد فين تراهم مستوين واسألني أنا لأني دايم اشوفهم بمقهى ابو هيثم وكل من سألته منهم : ليش ماتروح لوزير العمل وتقول له عن عطالتك اللي مالها داعي خاصّه انك خريّج ثانوية والاقي الجواب واضح : ان سكرتيرك رادّه ويقول انك مشغول بامورن أهم !


وش رايكم ندحدر شوي واقولكم وش عندي من علم عن قصّة الماخوذ اللي نصحني اسافر لابها !


في كُل بلدان العالم تجد سيــاحة داخليه .. وهذا فضل عضيم تقدمه الدولة لشعبها ..


في كُل بلدان العالم تجد وزارات ( راقية ) تُقدم كل أصناف الراحة الداخلية للمواطن !


في كُل بلدان العالم تجد ( سلتوح ) يؤدب .. وتجد ( داشر ) يوقّف عند حدّه .. وتجد ( مُراهق ) يؤخذ على يده !
في كل بلدان العالم .. تجد ( عايض ومعيض ) يستقبل المواطن ليطرح له كُل سبل الراحة كي ينعم بفضل وطنه عليه ,,


سافرت لأكثر من دولة .. ولاحظت الفرق الداخلي عن الدولي ,,,
لقيت الفــرق الكبير .. وحسيت بطعم النشوه .. وتلمّست نقوة الرخـص والدلال !


تصدقون ياجماعة اني مرّة سافرت لديرة ويوم جلست احسب التكلفة للسفر للدولة الخارجية لقيتها أرخص بكثير من السفر لديرتن بالداخل .. بل يوم دققت بالهلل بحكم أني ماحب أحد ياكل حقّي عياناً بياناً لاحظت أني يمكن ادفع بالخارج ربع ماأدفعه للداخل !
عندنا هنا الفـــرق يحبه قلبك .. قصدي يحبه قلب كل حرامي وهامور .. ويكرهه قلب الضعيّف والطفران واللي ماعنده إلا ثلاثة أسهم بشركة المعجل !


بحسبه سريعه .. ومُقارنة بين ماتدفعه هنا في رحلة خفّافية في وحده من ربوع بلادي .. بتلاحظ الفرق شاســع !
مرّتن قال ابوي للوالدة : نبي نصيّف هالسنة بالباحة .. قالت : مالقيت إلا الباحة ! شفّ لنا ديرتن ثانية غدينا نشخّص بها قدّام خلق الله ونقول اننا سافرنا للخارج .. قال ابوي : انطمّي بس والله انتس ماتدرين .. آلحين عندنا صالونن وش زينه .. وذف وتوني منجّدن مراتبه وفيه شاحن جوّال بعد وتبين تروحين برّا وتخلين جندي الجوازات يشوف صورتك بالجواز !


خويي يعترف بكل بجاحه أن أطلق واسحن شي بالدنيا أنك تسحب الجواز وتسافر برّا !
وانا اقول بس بدون بجاحه أنت احسبها واجلدها زين على آلتك الحاسبه ثم عوّد علي وشرط ان تدعي لي .


فنادق تمصع محفضتك من جيبك ولو تسأله عن الزين بالغرفة بيقول لك : فيها غلاية ومكيف بارد .


اكيد فيها مكيّف بارد .. اجل بتخلوننا نخيس بالحرّ .. امحق من حال


العام سافرت لديرتـن ( ما ) .. وقلت احجز لي اطرف غرفة .. دوّرت ودوّرت وآخر شي رسيت لي على شقق اسمها ذرب وعليها مدخلن ودك بس تفرّج عليه

.. الوان وزبرقه وعاملن لابسن كرفتّه حمرا جعله يخنق بها .. قلت بروحي وانا داخل .. شكلي ماعادني راجعن للريــاض .. ياهي وذفه وتشرح الخاطر !


ويوم حاسبته وعطيته إثباتي وسيرتي الذاتيه وجلس يطالع بخشتي نص ساعه يحسبني مطلوب والا شي .. قال : تفضّل !
نعنبوا داره ماعنده من حسن المبسـم شي .. حتى اني بغيت اقترح عليه يركب ذاك التقويم اللي يجي معه مغاط غدي خشته تنفتح بالغلط شوي للزبون ويحبه ..


جا البنقالي وقال لي الموظف اطلع معه ,, زقلبت عمري معه ودخلت انا واياه للمصعـد اللي كلّه مرايات ومافيه إلا دورين ومروحة شفط .. سألته بما أني مختلي معه وماحدن حولنا ( صديق : هذا شقق كويّس ؟ ) .. رد : ايوه .. كويّس كويّس .. إنتا إبقا شاي ؟ .. شيل نمبر موبايل انا !!!


دخلت الغرفة ودخلتني السكنيّه !


وينها عن مدخل الشقق ! مايدخل هالغرفة والا واحدن مقطوعن من شجره !


قلت بنفسي : الدعوه عبْر .. وخلنا هالليلة نمشّيها !


بتوالي الليل هنّق علي المكيف البارد وصار حاااار كنّه اديتر كابرس !


ويوم اتصلت في الرسبشن ماردّ إلا بعد عشر دقايق وقال : حرّك المكيف بايدك الشمال .. شلون بايدي الشمال !


تلفزيونهم مافيه إلا سبع قنوات .. ست موشوشه ووحده نظامها ابيض واسود وعلى الدقّه القديمة


المشكلة أن الشقق ماخذين علي عربون يخافون اني اخرّب عليهم شي .. مدري من اللي قايلهم ان كل اللي عندك جديد وجايّن بقراطيسه !


طبعاً طلعت من عندهم وبنفس ذاك اليوم قابلت لي أكثر من شخص من نفس الديرة ومشّوني بديرتهم ..
أخيراً رجعت للريــاض وانا أدوّر جوازي واقول : ياااازين الجُمرك ومساييره وياحبني لزحمة المنفذ وغرابيله .. وياملحك يالموظّف اللي بالجُمرك وانت مادّن لي جوازي وتقول : تفضّل الله يسهّل امرك ؟


الوالدة هالسنة تقول : لازم نسافر ونشمّ هوا ..
وانا اقول : هاتي فلوسك وانا اودّيك لاطلق ديرتن برّا وشرط ان تحطّين الباقي بطقم مواعين صيني تشخصّين فيه قدّام جيرانك .


أبو نواف . ماتلاحظ أني قاعدن أخرّب الشعب ؟


طيب تخاويني ونروح لماليزيا وناخذ معنا فايز يدلّنا الطريق ؟


عالعموم ..
انا ماجا هالموضوع براسي إلا لأني شفتكم طارفين على أبواب إجازة .. وكلّن يبي يهجّ ويخلّي ديرته ويحسّ بالوناسة ويشمّ الهوا بعيد عن غثا البيت وسواته ..
ومن خلال هالمكتوب أخاطب كل من في يده حلّ وربط وسمكره وله علم وتعلوم في السياحة والسفر والتبطّح بالديار الونيسه واقول : ياأنكم تشوفون لنا حل مع هالخساير اللي ندفعها بالداخل أكثر من الخارج والا بلاش وفكونا . !
فكّونا من شرّ الفنادق وطمعها .. أمس الليلة بـ 120 واليوم بـ 430 ريال .. ماعليش أرفع السعر بس لاتنهب !
فكّونا من شرّ المنتزهات ولحطهم لنا باسعار خيالية ..
فكّونا من كل شي يستغل مُسمّى السياحة عشان ينهب ويكبّر كرشته جعلها للفتق !
بعدين .. سؤالي اليتيم العقيم : وش عندنا من زين إلا هالمنتزهات ؟


ليش مانشوف غيرنا ونشوف كيف تطوروار وسووا أشياء ماهي عندنا وتكلفتها جدّاً بسيطة ؟
قولوا آمين . الله يوخذكم !

قبل يومين ..
كنت بوزارة وجلست أسولف مع الموظف … مهوب حبّـ(ن) له .. بس عشان تمشي معاملتي عنده ومايدقق فيه .. وقعدت اقوله اننا ودنا نسافر وننحاش من هالحرّ ونفتكّ .. واني محتار وين نروح .. هو اننا نسافر للصلالة والا ننهج عمارنا لاندنوسيا .. عاد ردّ هو وقال : إلا ورى ماتسافرون لابها عشانها ارخص وابرد وازين وفيها دعم للسياحة الداخلية !


مارديت عليه إلا يوم وقّع لي وريقتي اللي بين يديه .. ثم قلت له : ياخوي انت صاحي ؟ .. ياخوي والله لو تحسب حسبتك ودراهمك ان توفّرها برّا .. بس ماش واضح انك شارب لبن معتّق !


مايستفاد من الهرج اللي فوق :

1

ان وزير العمل شكله شيّ وهو طاقّن الطربوش حق المطبخ فوق راسه ، صايرن وش ملحه الله يجزاه خير


2

لاتغرّك الوان الشقق اللي برّا إلا لين تشوف وش نوع مكيفهم وتتأكد أن مروشهم مهوب خربان وان المخده حقت السرير مهيب صفرا .


3

إذا شفت العامل حق الشقق لابس كرفتّه حمرا وفيها لمعه فاعرف انها مقلب وتمويه !


4

إذا صارت عندك دراهمن واجد ، فوفرها بجيبك ولاتسافر أو شف لك ديرتن برّا طارفة وحطّ المقسوم فيها .


5

إذا طلّعت لامك والا لاختك جواز سفر فلا تحط على صورتها لزّاق اسود لأنهم شايفينها شايفينها الله لايعوق بشرّ ، وترى الرجاجيل يحبون الشي المخفي ويصير له طعم مهوب طبيعي ، بس احسن حلّ قل للي تبي تطلّع لها جواز أنها تصوّر بأقبح وجه غدي الرقيب اللي بالمطار ماينفتن فيها وتاخذ اثمه !


6

الكلام اللي تحته خطّ أحمر اعتبروني ماقلته عشان ماتضيق صدوركم !

نشوفكم على خير ،، ورحلة سعيدة في أرجاء الوطن ، وافرح ياعم الحقّ ، هُمّا الزباين قووووك


منتديات كواليس


تعليقات 27

  1. اي والله صادق مب بس الاسعار الي تسد نفس الواحد عن السياحه الداخليه الا النصب لو على شي يستاهل فدوتهم ..

  2. هلا اخوي مدمن شاهي بصراحه انت خطيييييييير ومعاك حق السياحه في الخارج ارحم من الداخل بكثير تحيااااااتي

  3. تصدق انك أكشخ واطخم واحد مر علي في حياتي الكونيه والكيانيه.. احس انك تعبر اللي في داخلي وبصراحه صادق لو تحسب حساب الفلوس ان تمسك راسك وتعيش على عدس وتميس… مثل قبل اسبوعين يقالك حنا الكشخه بين الناس وقلنا بنغير الهمبرجر والشاورما ونروح مطعم حركتاتي طلعنا والنفر الواحد سادح فوق 70 ريال<--ذا حتسي بالله يعطيك العااااافيه * وخذوني معكم لماليزيا ترى عادي :$ * وفي الختام وباختصار متى أركب طياره قسم بالله ودي اشوف وشلون شكلها داخل 🙁

  4. ااااااها والله انك قلتها قبل كم يوم متصل على فنادق في ابها قلت نبرد شوي من الحر الا رافعين السعر زياده فندق ما يسوي بالكثير 200 هذا ااذ مصخوها وصل 429 واقوله ليش 29 يقول هذ سعر محدته وزاره الي مدري وشو اسمها حسبنا الله ونعم والوكيل في كل طماع ننثبر ونجلس بالحر احسن لنا اشغل المكيف و ويكفي

  5. ماقولن الا كلامن في عين الصواب شكلك متعذب من السياحة الداخلية هههههههههههههههههههههههه

  6. للاسف السفر المحلي صار اغلى من الخارج يعني اسافر برى احسن لي وافضل مشكور مدمن بس مافيه ليمون الاسبوع هذا؟

  7. ههههههههههههآآآي شتبي بكثرة القنوات ماوراها الا الدجة يا مدمنوه سلم لي على راشد حبيبك وقل له يجيب ليمون للاستراحة ترى خلص اللي عندنا ههههه

  8. صـبـحـك الله بالخيـر يا مدمـن ،، السـياحة عندنا من أفضـل مايكون ،، السياحة برا بترجـع وانت موفّر فلوسك لكـن محمـل ذنوب تهد جبــال ،،،، صح ولا انـا غـلطآن يا مدمن شاهـي على طاري الـشاهي ترى وش زيـنـه مع لـيمون أبو زهـيره

  9. عادي يا اخي عيني تبي تقول ان السكن في ابها اغلى من جده او الخبر …. يا خي رح… ولا تنسى ترسل لأهل ابها مع البريد السريع كراتين كلينكس من النوع الجيد عشان يمسحون الدموع عليكم …. يا حبيبي تبي تسكن ببلاش في شقق وفنادق ما تشتغل الا شهرين في السنه… خلك واقعي والله لو انك مستثمر ماراح تسكن العالم الا بلسعر اللي يغطي معك التكاليف السنويه… الفنادق والمنتجعات السياحية في الخارج تشتغل 12 شهر في السنه لا وبعضهم يعطي في الصيف عروض مغرية عشان موسمهم الحقيقي في غير الصيف…. المقارنة ضالمة.. بعدين لازم تسكن في فندق الانتر والا في قصر ابها… ياخي ياكثر الشقق المفروشة الرخيصة والفنادق المعقولة… مد لحفك على قد رجليك… والا ديار الشرق الغرب ترحب بكم…. همسة ( مدري العلم بتصوم رمضان في تركيا والا سويسرا …. والا في ابها ازين فكروا … )

  10. واللة انا معاك يامعدل المزاج وكلامك 100 100المشكلة انة الواحد بإستغلوة برا عشان انه سايح اجنبي المصيبة انك تحس بنفس الشعور وانت في حبيبتك بلدك وكلامك في الصميم وانا معاك وبانسبه للذنوب اعتقد انه الحرام بين والحلال بين وسلملم

  11. شكرا مدمن السياحه الداخليه صارت نااااار ولا فيه خدمات مثل الناس تحياتي لك بسكوته الحتحوته الاصليه على فكره نويصر المنتهي وسمير افندي يسلمون عليك ( وجه يغمز )

  12. والله ياخوي إنك صادق …ماغير كسروا ظهرونا بالمئات والألوفات …حتى حدائق بأسعار رمزية ماعاد عندنا … كلها الدخول بعشره وعشرين وانت طالع …يعني العوائل اللي عدد عيالهم خمس واكثر مايقدرون يطلعون .. طيب شوف ذا الخبر 🙂 تصدق إن في برج قلب الطائف دخول الحمام( دورة المياه ) – الله يكرمك – بخمس ريال …وين إحنا ؟؟!! في باريز أو لوندن …لا وحاطين موظفات قدام دورات المياه وليتك تشوف البرج ..امحق برج .. شكراً لك على هالمقال الجميل … وإلى الأمام يامدمن

  13. والله اكثر شيء يضحكني اذا خلوا سعر شيء 999 طيب ياشااطر قل 1000 وفكنا !! ولا 99 او 199 خخخخخخخ

  14. بصراحه انا ماعلي من بربرتك اللي قلتها لأني انا اصلا ما اسافر الا برا وابها والباحه وغيرها اسمع بها وماشوفها الا استغفر الله عن الحلف أروح لجده أحيانا أزور خويي.. بس ذبتك هذي موتتني ضحك >>> حتى اني بغيت اقترح عليه يركب ذاك التقويم اللي يجي معه مغاط غدي خشته تنفتح بالغلط شوي للزبون ويحبه .. ههههههههههههه قسم انك منسم

  15. انت فنــــآن يـامدمـن < <اول مره احد يمدح واحد مدمن هع>> من جـد أكلونــا بحجـة سياحه وارتفاع اسعار ومدري وشو والمشكله مايوظفون ابد << معاناه 🙁 انا اعتقد انه مو بس بالصيف ينهبونا لا بكل وقت اللحين صايره الدرعه ترعى الله يكفينا الشر ويعيننا ,,, ازين شي صيفوا تحت المكيف بالبيت ع الاقل تضمنون انه بارد ^-^ يعطيك العافيه مدمن ماتقصر دايما ايميلاتك تجي بوقتها ليتك وزير شكلك تحس بالشعب هع وقل والله اني ارد عليكم اذا شفت ردودكم << وحده بوحده هع دمت بخير

  16. اخي الكريم مدمن شاهي كلامك على عيني وراسي وكل ماااااااقلت شي شفناه ولمسناة شكرا لك مليووووووووون مره على الموضوع الرائع ونتمنى ترسل نسخة لوزير السياحة ..

  17. كلااام حلووو ومنطقي … سياحتنا هنا ماااش الله يخلف عليها بالجنه بس ..

  18. أقسم بالله موضوعك جاء في وقته وصاااادق بكل اللي تقوله السياحه الداخليه ينهبووونك نهب بكل مكااان بالاسواق..الفنادق..الشقق..المطاعم حتى العالميه واللي تحصلها بكل بلد عندنا تكون اغلى>>ليه!!مدررري!!… المنتزهات كلوو بفلوس وياليت تدفع عالدخول وخلاص تلعب على راحتك لااااا ,,, يبون حق التذاكر,, وغير التحكم :لاتدخل معك سجاده لاتدخل شاهي وقهوه لاتدخل اكل يبون يستغلونك بكل شي ..حتى البحر عندنا اذا تبي بحر نظيف وتسبح فيه لازم تدفع فلوووس الظاهر بعد كم سنه كل شواطئنا بتصير منتجعات وعشان تشوف البحر ادفع ولا اقضب ارضك وانثبر ببيتك وموب لازم تشوف بحر..بالله فيه دوله بالعالم شواطئها بفلوس؟؟ وربي لو بتسافر برا ماتصرف ربع اللي تصرفه بداخل المملكه واللي يقول حرام وما حرام ليه لايكون اللي يسافر برا يكفر!!! الواحد بيسافر عشان ينبسط ويحاول يوفر بنفس الوقت موب رايحين ندور على الحرام وكل واحد عقله براسه وسلامتكم اخوووي مدمن شاهي يعطيك الف عافيه على هالموضوع الررررررهيب

  19. موضوعك من اروع الروعات وانت صادق بكل كلمة قلتها يعطيك العافيه يالذيب

  20. كل مستثمر يولد ويكتب على جبهته نصاب لا تروح بعيد بمقارناتك ياخي شوف الفرق بين محطاتنا ومحطات الامارات والله شي يفشل قال ايش قال سياحه داخليه جعلهم الدجه ان شاءالله

  21. يسلم بوأق <ع قولة المصريين< والله تستاهل حبة راس وخشم يابعدي انت والله جبيته غلا ع الفاضي والمشكله ان بعض الشقق الصراصير اكثر من الاوادم هبو مايعرفون باختراع اسمه ريد او ع الاقل يحطون زنويه حنا نقوم بالواجب حسبي الله على بعضهم مو الكل اوكيه غلا بس بشي معقول واللي مطفر وحالته حاله وش يسوي وين يرووووووووووووووح طيب لو قلنا مايبي يروح سياحه المسكين يبي يتعالج وش يسوي بالغلا اللي هم حاطينه والله شي يقهر ماقول الا ياحالات البر بس دق الخيمه عند اقرب طلحه ويجيك براد طبيعي بلا شقق او فنادق و بلا نصب لووووووووووووووووووووووووووووووووول تسلم يمينك

  22. ياخي ماكلها الا ذا العزاب المساكين كل مارحنا محل قالوا عوائل السنة قبل اللي راحت رحت انا وزملائي للطائف وصلنا الصباح الساعة 3 مالقينا مكان نسكن فيه الا الساعة 11 الصبح لا وبعد مكان الله يكرمك رمه ولا ان جينا نسكن في فندق لزخونا بسعر خيالي لكن شكلها هذي المرة خارجية…تشكر اخوي مدمن شاهي على طرحك الجميل.

  23. اهلاً صديقي .. 🙂 <-- ذب المونه هههههههه عينك كلام العقل اممم صدقي كلاامك عين العقل اهنيك من كل قلبي وادع كلامك بكل ما اؤتيتوه من قوة <-- مدري صح علي كتابتها كذا والا لا هع هع واقول لك ليش وبالتفصيل كمان 1- فيه عيال حرام ما يملاء عيونهم الا التراب .. تخيل انو في منتزه مااااا في جده يوصل كاس العصير الا 30 ريال !!! وان العشا يكلف في مطعم ماا في منتزه ماا في جده الا ما يقارب 300 ريال لنفرين ويطلعوون ما شبعو بعد !! هذا غير الشقق اللي اسعارها لا رقيب عليها ولا محاسب .. بضرب لك مثل بسيط جداً .. انا كنت بالدمام يوم الاجازه حقت العشر ايام كنت رايح اغير جو .. المهم اخذت شقه الله وكيلكم لو يدشها اربعه ما قوو يتحركوون فيها وكم طلعت لي باليوم ....! تخيل بـ 390 طيب ماعليه بس على ايش هالسعر .. كل اللي بالشقه اشياء ضروريه ولا فيها اي خدمات اضافيه او نظافه جيده .. يعني النظافه فيها شبه نظافه هذا بالنسبه للأسعار .. اما بالنسبه للمنتزهات ونظافتها فحدث ولا حرج .. يعني انا بنفس الرحله كنت بكرنيش راس تنوره تخيل معي اعزكم الله ادور دورات مياة نظيفه ابي اقضي حاجتي مو محصل ..!! والله يا جماعه انها دورات مياه حتى .. ان اسمح الناس ما يقدر يخش يقضي حاجته فيها من القرف اللي فيها ..!! مشيت عليها وحده وحده مو محصل حتى ولو شي يمشي الحال ..!!! يعني مدري يستخدم هالدورات غير البشر .! طيب وين الصيانه .!؟ وين المسؤلين ..؟! والله ما يصير من جد مهزله هذي ..! هذا اللي حبية اضيفه ... واحب اضيف كمان .. انو الصيف برا احلى مليون مره وامتع وارخص ويفتح النفس ويشرح الصدر ويمتعك ويسعدك وكل شي .. الخ 🙂 <-- متحمس يعني وش لي بالسياحه الداخليه مدام مافيها اي مرغبات لي كسائح لا اسعار حلوه ولا خدمه زي الناس بالفنادق والشقق ولا مرافق سياحيه ترفع الراس ارووح لماليزيا والا لأفريقيا الجنوبيه والا صلاله والا اسبانيا صح اني يمكن اتلحط بسبانيا وارجع مطفر بس انبسط احس اني غيرت جو واني دفعت على شي يستاهل .. تحيااتي لكم .. وشوووووكراً للزكوورت مدمن اللي فتح الموضوع وخلاني اطلع اللي بتسبدي .. فتكوو بعافيه

  24. لانقول هنا غلاء بل غلاء فاحش في كل شيء ، الله يستر ما يبيعون لنا الهواء الذي نتنفس حتى يزيدوا ثرواتهم ، وتبقى بلادي وإن جارت علي عزيزة ، وأهلي وإن بخلوا علي كرام .

  25. ياخي مدري ايش اسمي كلامك دا..هوا فضفضة ولا نقد ولا انتقاااد؟ دا عيييبنا اللي مودينا ورا ياخي بدل ما تنقد سوي شي فعال لبلدك واذا كنت تعتبر دا نقد ايجابي فما اعتقد انو رح يقدم بل يأخر وتنفر الناس من بلدك عشان خيرنا كلو يروح لغيرنا.. عشان برضو لا يكون كلامي ليك مجرد نقد أنصحك وأقلك أتمنى اللي زيك بدل ما يكتب للمنتديات ولا القروبات أقلها أقلها يقدم المقترحات دي للمسِولين .. ولا تقول محد داري.. على الأقل ساعتها تكون سويت اللي عليك وأعتقد لو كل واحد سوى زيك في النهاية رح تشوف النتيجة ورح تدعيلي.. أختك القرفانة من بلاد الخارج

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

على بلاطـة : ماراح أسافر لابها .. بانهج عمري للخارج وافتكّ

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول