صور : القرية التراثية وجولة سياحية في بريده اصالة


السلام عليكم ورحمة الله وبركاته
حياكم الله جميعا ورمضان مبارك على الجميع مقدما والله يجعلنا وياكم من صوامه وقوامه والله يرحمنا ويصبرنا على هالحرر اللي جانا يقولون ان درجة الحرارة صاكتن الستين
والغريب ان بحياتي شفت الغامدي ولاسبأ باهبري طالعن بالأخبار يعلن عن وفاة سعودي
بسبب هالحرر من جد ان ربعنا ضبان ماهب مثل هالفرنسيين الطخمان اذا وصلت الحرارة عندهم عشرين فطس نصهم , ثاني شي مستغرب من راعيين الدداسن والله يالاحساس عندهم مفقود
اجل الساعة 2 الظهر داقها لطمه وفاتح الدريشه والهواء الحار يصك خشمه
ووجه منشوي من الشمس وطبيعي جد داخل جو و مشغل اذاعة الرياض وأنواع الأغاني الوطنية في هالاذاعه والنفاق والرجال مستمتع بالقيادة وتحديد الناس
ماعلينا ندخل في موضوعنا عن السياحة في منطقتنا الجميلة وفعاليتها الكويسه
والقطاع السياحي خصوصاً في القصيم نموذجاً لقطاع اقتصادي واعد وناجح،
طبعا هالكلام اللي فوق لايراه ولا ينطق به الا واحدن طفران مثلي ومنطق في بريده
فمن هذا المنطلق أكيد وغصب عن خشمي راح تعجبني هالمهرجانات
والغريب ان الرئيس التنفيذي للمهرجان واحدن لامحه يتسكع في مزارع مراكش
ماعلينا من هالكلام راح ناخذ فيكم جولة سريعة على الأماكن اللي استمتعت فيها وحبيت إنكم تشاركوني وتوسعون صدوركم

أول رحله كانت إلى قصر تراثي كويس جد بصراحة استمتعت فيه وانا من المحبين للأشياء هذي




يقولون انها بيضة دينصور اوما لو تفقس في هالحرر لووووووووول

وهذي اللي كنها حصى ترا جماجم اوادم

وهالشنطه من الحرب العالمية الثانية يحطون فيها الهندل حق الاتصال والفشق حقت البواريد

مجموعه من الازوردي والكهرمان والمرجان بس اموت واعرف وش هالاسهم العصر الحجري الي كنها مأشر ماوس

الكوايات قديما طبعا اذا جيت بتتسوي ثوبك لازم تشب ضوء لين تصير جمرر وهمن اذا جمرت تحط الجمر بوسطها يعني تقضي العزيمه وانت ماقضيت

عود وعنبر من الحرب العالمية الثانية وماشالله ريحتهن طالعه من ورا القزاز الى الحين <<< برا

فوانيس الخلفاء والحكام عام 1170 هـ

ثياب الاولين ولاحظت ان نظامهم نظام يحبون الألوان الفاقعة والي تبالص

الفصول قديم عام 1368هـ

شركة تايد قبل ماهنا غيرها للذلك الكرتون مخلينه كبر اصبع الرجل يدرون ان الشعب قبل ماسحين كلمة مقاطعه من قاموسهم شركة تايد قبل ماهنا غيرها للذلك الكرتون مخلينه كبر اصبع الرجل يدرون ان الشعب قبل ماسحين كلمة مقاطعه من قاموسهم

اللوحات قبل كل مدينه تكون اللوحة مسجله بأسمها حسيت ان السعودية قبل فيدراليه

هاذولي عاد اللعاب عيال الشيوخ ومستحيل يوصلونها عيال الطفارا

احلى صوره ضحكته علي بقووه مكتوب عليها صدر السماح لمحمد البراهيم الضبيعي باستعمال السيكل لضروفه << حشى وقسم لو انه تصريح هيلكوبتر .
ولامحددين له من بيته الى الدكان وماعدا ذلك فلا يكون له رخصه
يعني لو يشوفونه رايحن في طريق غير الدكان توطا في بطنه .

هذي رخصه ثانيه صادره من هيئه الامر بالمعروف مصرحين لعلي مد الله المرداسي ركوب السيكل فقط للمدرسه

نجي لدكان ابوعثمان والي يروح لهالدكان قديم كنه رايحن لهايبربنده

عصيرات ومعلبات قديمه بس والله ياقشطة التاج بعد كبيرررره تكفي ديره

ر

مشروبات غازيه اااه يالتيم وقسم فقدناه ليتهم يرجعونه

مصنوعات من الخشب

الخراز ( الي هو حق النعال )

النعال الله يكرمكم قديما وركزو على الي يسار بقووه لازم تقمط اصبعك على الي طالع وترفع النعله

وهاذي اول براده في بريده عام 1368 هـ

الصانع الي هو الي يسوي القدور والبرقان والزي منو

القدور القديمه وش كبرها مب مثل هالحين

خلصنا من جولة القريه التراثيه ورحنا بعدها الى مسرحيه في مسرح مدينه الملك عبد الله كان اسمها طبخ تجار

طبعا تتكلم المسرحيه عن اعضاء الشرف والنوادي وكانت حلووه وواقعيه نخليكم مع بعض الصور

بعدها طلعنا لاارامكو وكانو مسوين عرض لصور قديمه وحلوه وكان فيه شخص يشرح الصور ويفصلها الله يعطيه العافيه

وزير الماليه عام 1933 م عبدالله السليمان

صوره في الظهران عام 1938 يناير للتنقيب عن الزيت

صورة عبدالعزيز فوق ناقله خاصة في الظهران عام 1939 م

فصل من الفصول في مدرسة الجبل عام 1947 م

عمال في بريده لاستكشاف النفط عام 1934 م

فيلكس ولد دريفوس وصديقه هينري يشربون قهوه

طباخن قرم يذبح الذبايح لهينري وربعه عام 1935 م

مدرسه ابتدائية في بريده عام 1970 م

خلصنا من أرامكو واستمتعنا بالصور وبعدها دخلت على قاعة اسمها يوتيوب وكان فيها عرض سينمائي عن مخاطر التدخين استفدنا منها كثير

بعدها انطلقنا الى صالة حوار كوفي وكانت فكره ذكيه وحلوه لطريقة النقاش وكان فيه دكاتره وأخصائيين استفدنا منهم الكثير ومن تجاربهم

وتواجد في نفس اليوم الدكتور سلمان العوده ويعجبني روعه كلامه وأسلوبه وطريقته بالكلام والحوار وللأسف ماراح نستمتع هالسنه في رمضان في برامجه

بعدها توجهنا لحديقة الملك خالد الحضاري وأعجبني اهتمامهم في الأطفال وبرامجهم الجميلة تحس ان الأطفال مستمتعين من جد

نخيلكم مع الصور

انطلقنا للبرج وحصلنا زوار أجانب وجيههم صايره مثل ذا الفيس ويحلفون انه هالبرج أحسن من برج ايفيل
خصوصاً الإطلالة الكويسه اللي تطل على البحر
لكن للأسف خلصت البطارية ولا نفسي ندخلكم داخله

كان لفرقة بنات جيزان حضور حلو وأناشيد ورقصات حلوه استمتعنا بصراحة فيها ونعم والله في أهل جيزان اهل الكرم والإبداع

برضو كان لفرقة فور شباب الإنشادية تواجد في المهرجان صح اني مانيب من راعين الأناشيد لكن حضرة وأعجبني أدائهم

وبعد لفرقة كراميش البنوتات الحلوات كان لهم تواجد في مدينه الملك عبدالله والحضور كان كبير

أحلى صوره في المهرجان تحلفون انها حاضره أغنية لأأم كلثووم

إلى هنا نصل إلى نهاية جولتنا السياحية وان شالله أعجبتكم ورسمت البسمة عليكم
صح ان مهرجاناتنا في السعودية مخيسه لكن فيه تحسن واستفدنا بعض الشي
خصوصاً الطفرانين اللي من أمثالنا مجبورين على السياحة في ديرتهم
دعواتكم لنا ولوالدينا في الرحمة ولجميع المسلمين


تابعوا جديد شبكة أبونواف على فيس بوك وتويتر

   


تعليقات 10

  1. بصراحه يااخ بدر ,ماتوقعت في تحسن في السياحه السعوديه اعجبني كثير كلامك وتعليقك علا الصور ,,بس ياليت يكون هناك تصوير فيديو,,وياليت تجوووب ربوع بلادي وتسلم علا المجهود الرائع

  2. عرض مميز،،، جبت بريدة كلها عندنا >>>تنفع تصير مرشد سياحي ،،،يعطيك العافية على المجهود

  3. الله يعطيك الصحة و العافية يا أخي بدر على هذه المعلومات عن هذه الصور التاريخية من تراث و هياكل حجرية ثمينة تظهر الحقبة التي عاشوا فيها تلك الناس، شكرا لك على المعلومات يا أخي.

  4. شكرا لك أخوي بس سؤال: وين القرية التراثية ووش اسمها .. تكفى تراني طلبتك ودي نفرج الربع عليها..:$:$

  5. مشكور على هالصور والسياحة في القصيم بس بصراحة كنتم مظلومين القصمان زمان مايسوقون سياكل الا بترخيص هههههههههههههههههههههههههههه انني اتنكس من الضحك

  6. جوجو شوشو لطوف nejjara11 محمد خالد سليم عبدالله محمد bandar الله يعافيكم يارب ويخليكم لعينن ترجيكم اخوي محمد هذا يسمى قصر او قرية الدبيخي في حي القويع في بريده عند كوبري الحمر والدخول بعشره ريال لشخص ويفتح من بعد العصر حتى الساعه 11 على ماعتقد واتمنى لكم رحله سعيده

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

صور : القرية التراثية وجولة سياحية في بريده اصالة

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول