صرخة جامعي عاطل


لا تستعجب من العنوان …… احب ان احكي وضع ما ساوي في المملكة العربية السعودية ..
طلاب جامعيين (( يتقدموا للوظائف بالشهادة الثانوية )) !!!!

لا تستعجب … اذاكنت مهتم للموضوع … انتظر لا كشف لك عن الوضع …
كالتالي … اصبح الشباب السعودي المتخرج من الجامعات السعودية يتقدموا للوظائف بشهادتهم الثانوية وذلك لعدم وجود فرص وظيفية للشهادة الجامعية …!!!
يا اخواني الاعزاء والاعضاء الافاضل … اصبحت الشركات المتواجدة داخل المملكة … لا تلقي أي بال لنفس البشرية .. واصبحت تعاملها مثل البهائم ( اكرمك الله ) …
اين العدل في ان يتقدم شاب قد ضحى بثلث عمره مغترب عن اهله  وعن مدينته واصدقاءه  وعن كامل محيطه
الاسري  ومتحمل اعباء الغربة ومشاقها .. للحصول على وظيفة بشهادة الثانوية
الشركات اصبح لديها دستور قومي ومرجع موثق بين الشركات  .. انهم لايوظفوا الجامعيين لماذا ؟؟؟؟
في اعتقادهم .. انا الجامعي .. يريد المناصب العليا من اول وظيفة !!!!!!!!!!

اكون صريح  معكم ممكن ان الكلام صحيح …… سابقاً  … وليس الان … الان اصبح الجامعيين يريد فقط الحصول على وظيفة باي وسيلة  ومع هذا لم يجد ..
والسبب في ذلك ان كل شركة او مدير التوظيف  ( يقول ) والله بصراحة ما عندي وظيفة لمؤهلك  والوظائف الموجودة اقل من مستواك …. معقول .. كلامه  .. بس يا اخوان فكروا شوي بس شوي  … اذا كل واحد  في شركة قال الكلام هذا وين يروح الجامعي !!!!! واذا الجامعي يقول انا موافق  .. بس وظفني  … يقوله طيب بس بدون شهاده جامعية …. يعني اقعد 20 سنة علشان راتبك يزيد ريال واحد  …. (( تعجيز ))  لا والمشكلة في بعض الشركات  ما تقبل جامعي بالمرة ( تقول انه الجامعي ادربه واصرف عليه وبعدين يشوف وظيفة احسن ويروح  .. انا ما ابغى اخسر عليه ) … طيب سؤال؟ اذا كل واحد قال الكلام هذا وبعد فترة تجي يقولك خبرة من فين انا اجيب خبرة اذا كل شركة تعتمد على الثانية وكل شركة ترمي على الثانية …. !!!
اخواني انا ما كتب للمجموعة ابونواف الا انا عارف انه اعضائها ناس على ذوق وفهم لمشكلات ومخاطر المجتمع ….
المشكلة السابقة … بكل حرف صارت معاي ( انا جامعي ومتخرج من الجامعة بتقديد جيد جد  متخصص MIS يعني نظم معلومات ادارية  )  من سنتين وما حصلت وظيفة … انا عارف انه تقولوا هذا كذاب … بس اوضح لكم شي ويمكن يكون سبب في اقناعكم  ( انا مٌملك ( يعني مسوي ملكة _ خطوبة ) على بنت عمي وانا في الجامعة قبل ما اتخرج بثلاثة اشهر …. قلت في عقلي بكرة تتخرج وتمسك وظيفة على طول روح  كمل نصف دينك بالحلال … وزي ما انتوا عارفين … المفاتن كثرة في الزمان هذا … ولا حول ولا قوة الا بالله ..

المهم خطبت وتخرجت وصبرت وصبرت وصبرت … بس عمي ضاق به ومن جلستي … صارت مشاكل بيني وبينه … ادور على الوظائف بشمعة … وماني محصل … فكرت اسافر بره المملكة بس انا اكبر اخواني وابوي باع الي قدامه والي وراه علشان يدرسني الجامعة طبعا هي في مدينة واهلي في مدينة ثانية ابوي رجال كبير ما اقدر اتركه لحاله كيييف الحل !!!!!! ؟؟؟؟؟ فكرت في سواق محد راضي الشركات تقول مو قد مستواك …… ابغى افتح مشروع بس وين راس المال  واذا في شركات زي عبداللطيف جميل  تقولك اعطيني ضمان وربح … انا عارف قدري ايش علشان اعطيك ربح!!!!  وايش تبغى ضمان مني اكتب روحي باسمها لانها هي الوحيدة الي املكها ….. هذا كله علشان ذنبي انا الي ابغى استر على اهلي واحمي نفسي من الحراااام …

تلوموا الشباب اذا سرق ولا اغتصب …. صح صح ضعف وازع ايماني … بس حقه انهظم … ؟؟؟ ليه ماهو بشر يحس ويحب ويتالم …..
انا ما كتبت الرسالة هذي الا صدقوني والله العظيم والله العظيم والله العظيم فضفضه مافي قلبي … ما ابغى مسؤول يقرا ولا وزير يشوف …. هذي بس علشان اذا انتحرت تكون مجموعة ابو نواف تعرف السبب … لاتخافوا الحمدلله انا اصلي واعرف ربي  وعارف هذا حراااااام  بس ياخوفي يجي وقت واصير زي الي يغتصب ولا يسرق ….

وعلى قكرة حااااااااااااااااااااالي كما هو من سنتين الى الحين ( ملفات اترمت تحت الدرج او في الزباله ) وكلمة بكرة اتصل عليك اسمعها من سنتين ( وبعدين ويقولي – معلش الافضلية لحديثي التخرج ) .
حتى ديوان الخدمة المدنية الترشيح الاسامي منتظره من سنة ونص ولما نزل طلع الاسامي كلها متقدمين عليها من اكثر من 10 سنوات … طيب الحكومة ما توظفنا ايش نسوي !!!!!!!
واحتمال بفسخ الخطوبة او شبه مؤكد … انا مني زعلان على الوظيفة … انا زعلان حياتي الي راح تنتهي وقلبي الي راح ينزف الى يوم الموت على فراق خطيبتي الي انا احبها بجنون وهي اول حب …

واسف جدا جدا جدا جدا جدا على الاطالة
بس والله ما عندي احد اعز من قروب ابو نواف
وشاكر لكم سعت صدركم …


اعلان






تعليقات 16

  1. اخوي فادي احسن الله عزاك اولا وثانيا شكرا لك لانك بتلك الكلمات واسيت العديد من اخوانك الجامعيين وعزفت على اوتار حساسه وواقع مؤلم فانا طالب جامعي متخرج من كلية العلوم قسم الكيمياء الحيوية من قبل ثلاث سنوات والى الان وانا احاول ان اجد وظيفه كما قلت بالثانوية التي ختمت بكلمة تخرج من الجامعه !! والتي اصبحت وصمة عار في جبين الخريجين للاسف .. الحقيقه يراودني اكثر من تساؤل بعد ان اقفل ديوان الخدمة بابه في وجوهنا نحن خريجي الكيمياء الحيويه بحجه ان لايوجد لنا تصنيف !!وكاننا من كوكب آخر.. اذا لم يعترف بنا ديوان الخدمه من يعترف بنا؟؟ ليس هذا تساؤلي فقط ولكن ان كانت المؤسسات الحكومية ترى ان الشباب السعودي غير مؤهل مع حمله لشهادات الجامعه فمالداعي لاضاعة وقته وجهده وماله ؟؟ الكلام يطول لكن حقيقه نحن نعيش في المملكة وضع سئ بالنسبه للوظائف وبعض المسؤولين لايزال يكذب احصائيات البطاله في البلد وتزايد اعداد العاطلين والله العظيم انه مؤشر سئ وله مردود سلبي على البلد ولا اريد ان اطيل مع اني فعلت فالكلام كثير ولكن اقول ان كانت وزاراتنا لاتدري عن حالنا ومعاناتنا فهذه مصيبه وان كانت تدري فو الله المصيبه اعظم.. وعظم الله اجرنا واجركم في سنين ضاعت ولن تعود من اعمارنا.. والسلام عليكم ورحمة الله وبركاته..

  2. انت تهووون ولد تتغرب تقدر تشد حيلك بس القهر لي تغربت بنت واخر شي لما تجي تبي تتوظف يقولون ما عندك اكسبيرينس (خبرات) بكل مكان اسمع هالكلمه يعني من وين اشتغل اذا الكل قفلها بوجهي انا لي سنتين من تخرجت ولا حصلت وظيفه كل اللي اقدر اقول حسبي الله عليهم موظفين الاجانب واحنا ياعيال وبنات البلد مو موظفينا ما ادري شنو السبب يعني احنا بكره بنفشح على روسهم وناخذ الشركه منهم من جد ناس جااااااااااهل

  3. الله يفرج همك … ((ومن يتقي الله يجعل له مخرجا)) وبأذن الواحد الاحد … ان شاءالله تحصل على مايسرك ويرضيك طبعا مابي اقولك كلام يقلل من عزيمتك لان واجبنا ان نذكرك بأن الله معك وتذكر دائما تفائلوا بالخير تجدوه ودعواتي لك وانت وغييرك من الجامعيين والله يصبركم على هالبلوه واختي ريمي … فيه فرق بين الشاب والفتاه الفتاه عادي اذا مااشتغلت صحيح مشكله ولكن..بيكون فيه احد يصرف عليها ولكن الشاب هو المشكله الاعظم … كم يعاني من المشاكل بسبب البطاله!! وشكل حالي حالكم … اعيش برا واخاف المصير نفس المصير….الله يعين الجميع

  4. اخي فادي تحية طيبة وبعد.. حقيقة لا أملك لك إلا الدعاء .. ونصيحة .. يا أخي الأرزاق بيد الله عز وجل .. فلا تغفل جانب الدعاء .. فالدعاء جالب للرزق، مانع للكرب .. وأوصِ والديك بالدعاء لك في صلاتهم .. ولعل هذا من الابتلاء في هذه الدنيا .. فاصبر وادع .. والأرزاق بيد الله لا بيد هذه القطاعات الخاصة والعامة لك خالص الود..

  5. السلام عليكم …. انا اخوي نفس قصتك ….. كنت بالكلية وكنت خاطب بنت عمي قبل لاتخرج …….. وظليت سنتين بدون وظيفه ووقت السنتين صارت ظروف بسبب عدم الحصول على وظيفه اني انفصلت عن خطيبتي اللي كنت احبهااا فوق الخيال … وصار لي الم بصراحه تعبني هالشي والله حاله وبعد الانفصال بسبع شهور حصلت على وظيفه بالبنك … سبحان الله لكن كرهت الدنيا والله …. انا مؤمن بالقدر …. وان كل شي له سبب … لكن بصراحه البنت كنت احبهااااااااااااا وراحت من يدي …. الحين انا عازف عن شي اسمه زواج متعقد بصررررررررررررررررررررررررراحه خلاص البنت اللي كنت ابيهااا وماخذتهاااا شنو ابي من الدنيا ماااااااااااااااابي شي خلاص …

  6. والله حنا معك قلب وقالب يا اخوي فادي والله على اللي ضيعوا هالبلد بالمحسوبية .. أذا انت جامعي وما لقيت شغل أو الاخت اللي ردها موجود .. فما بالك باللي جامعي ولاقي شغل وبالمحسوبية وقدام عينه ناس ما معهم الا المتوسط أو الثانوي على أعلى المراتب والرواتب وليش لأن عندهم ناس تسند ظهورهم والا الضعيف الجامعي منطول ورا مكتبة حتى فنجال القهوة هو اللي يخدم نفسه ويجيبه .. وما نقول الا حسبي الله على المحسوبية وظلم الناس واخذ حقوقهم بقصد اعطائها ناس ما يستحقوون والله يفرج همك ويحل كربتك وان شاء الله ان ربي ييسر امرك شيييييييييييييييكرا ,,,

  7. اخوي فااادي في كل مصيبه تأتيك انظر الجانب الايجابي منها ولا تفكر بالجانب السلبي تبي تقول لي هو فيها شي ايجابي نعم انه الله ابتلاك لكي يختبرك فلو رجعت لكل سير الانبياء لوجدت الله ابتلاااهم ثم بعد الابتلاء فرج سبحان الله ..انا هنا لااملك الا ان اقول لك.. عليك بالدعاء في جميع الاوقات والله ثم والله انه من واقع تجربه انه الدعاء هو كل شي بالحياة ..بدون الدعاء الحياة لا تساوي شيء الحمد لله لم ارفع يدي الى السماء بدعاء الا وحققه الله لي الا ماندر فلله الحمد والشكر.. يمكن تشوف ردي هذا وتقول يارجال ادعي ليل نهار صدقني لاتيأس وواصل فلا املك ان اقول لك الا هذه الكلمات..

  8. الأجانب هم السبب في كل مشكلة في بلدنا ماخذين الوظائف في اغلب الشركات في السكن مظيقين علينا في الشوارع في البيوت في المدارس في البنوك في كل مكان ياناس ارزاق السعودية للأجانب …الله يقلعهم ويقلع غازي القصيبي لابارك الله فية

  9. اخي الكريم انت اهم شي انك بين اهلك ووطنك فاصبر ان الصبر كفاح ولاتيأس ولاتقنط من رحمة ربك انها وسعة كل شيئ وبأذن واحد احد تلاقي ان شالله

  10. يا شباب عليكم الدعاء فإنه مفتاح كل خير..((ومن يتق الله يجعل له مخرجا*ويرزقه من حيث لا يحتسب*إن الله بالغ أمره)) ومثل ما قال الأخ..الواسطه والمحسوبية هي سبب كل بلاء..اما بانها ترقي ناس غير كفؤه او توظفهم…وأن لعنة الله على القوم الظالمين.. نسخه مع دمعة … لوزير العمل الأخ غازي القصيبي …

  11. السلام عليكم اولا أنا بصراحه كنت أعاني مثل ماتعاني تخرجت من قسم علوم الحاسب الالي وكل ماقدمت على وظيفه عجزووني بس يطلبون لغه انجليزيه وكنت ادعي ربي بأخر الليل واقول يارب ارزقني والحمد لله ربي رزقني لبعثه وطلعت ادرس براء والله يستر ارجع وما احصل وظيفه عموما اخوي بنك الرياض طالب موظفين قدم عليهم وكمان بنك البريطاني طالب في نفس تخصصك ادخل موقع البنك البريطاني وقدم عليهم وكمان اذا لغتك قويه فيه عندك مستشفى الملك فهد محتاج سعوديين وفيه مستشفى العسكري قدم عليهم اسبوعين الا داقين عليك يقولون لك امتحان وامتحانهم قواعد انجليزيه وسماعي امتحان مره سهل لاني دخلت عدهم الامتحان وعديته واول ماسافرت اتصلو على اهلي وطلبوني وكمان بتخصصك تحصل بالبنك الفرنسي قدم على هالاماكن ولا تيأس حاول وحاول وصل أخر الليل وادع ربي وبين لربي ضعفك والل يوفقك ويوفق الجميع

  12. عزيزي فادي أنا أدري إن الكلام سهل لكن شوف ياعزيزي تخصصك مرغوووب بس يمكن يبيلك شوية مثابره الله لايهينك رح لشركات نشاطها توفير الكوادر البشريه زي الحقيط والفحطاني وارسال وسجل عندهم هذي الشركات تاخذك وتوديك في أحد المشاريع القائمه وغالبا ماتكون مع شركة أرامكو او الشركات الصناعيه غالبا لاتنتظر ديوان الخدمه على فكره كل ماتتأخر زياده ترى راح تقل فرصتك في التوظيف ترى الخريج الفرش راح يفضلونه عليك الله ييسر أمرك عزيزي ولا تحرمنا من دعواتك أخوك عبدالعزيز

  13. بسم الله الرحمن الرحيم حقيقه أول ما قرأت ما كتبه أخونا حسيت أنه يوصف معاناتي مع الشركات فأن تخرجت من الجامعة تخصص إدارة عامة وكنت متحمس جدا و أول ما تخرجت من الجامعة رحت ودرست حاسب آلي ولغة أنجليزية قبل ما أفكر في الوظيفه وحضرت دورات كثيرة عن تطوير الذات و التنمية الإدارية وإدارة الجودة الشاملة وحضرت ندوات كثيرة من زود الحماس قلت عشان الشركة تقول أنت كوفئ للوظيفة وفعلا رحت وقدمت وما خليت شركة ما جيته وفي الواقع وعشان ما أضلمهم حصلت وظائف كثيرة وحطيت عيني على شركة كانت هي أكثر راتب وأقوى شركة ( أقول أقوى شركة في المملكة والخليج العربي وباقي الدول العربية في مجالها ) وقالولي راتبك حيكون ثلاثة آلاف ريال قلت لعيون مدينة تكرم مدائن أنتم شركة كبيرة جدا ولكم سمعتكم وأنا واثق من نفسي وراح أطور نفسي وأحصل راتب زي الناس ( أقول زي الناس ما أبغى راتب كرواتب سابك وأرامكو لكن راتب يمشي الحال ) وفعلا جلست عندهم ثلاث سنوات دون حرااااك رغم أن سمعتي ولله الحمد أنتشرت عن المدراء بجهدي فلما طلبت زيادة في الراتب قالوا لي رح لعرعر ونزيدك 500 ريال وإذا مو عاجبك أمسك الباب وبعد هالكلمة بستة شهور نزل أسمي بالديوان ولله الحمد لكن حقيقة كنت أرغب العمل بالشركات لأنه هي الأفضل من ناحية التطوير لكن فكرت وقلت يا رجال ماعندك أحد روح لسابك أو أرامكو ( أم الواسطات ) وإلى ترى الوظيفة الحكومية طيبة خاصة إنك تحس بالأمان الوظيفي وعلى قولتهم الأم الحنون. والله يوفق الجميع.

  14. أصبر ياخوووك وانا مثلك لي سنتين متخرجة PA إدارة عامة بجامعة الملك سعود ومليت من كلمة بكرا وبعد أسبوع وما عندنا حتى المارس الأهليه اللي تكرف الواحد كرررف رحت لها ورضيت بالنصيب بس قالو بنتصل فيك<<<حسبي الله ونعم الوكيل توكل على الله فهو حسبك وأكثر من الإستغفار

  15. الله المستعان.. قصتك جداً مؤثرة .. ومعاناة لدى الكثير من الشباب السعودي… لاحول ولاقوة إلا بالله العلي العظيم.. الله يرزقك ويريح بالك ويحقق كل أمانيك يارب.. حسبي الله ونعم الوكيل على اللي كان السبب في انتشار ظاهرة البطالة بين فئة الشباب.. كان الله في عونك ويفرج همك ويرزقك بأحسن الوظايف..

  16. انا بس اسألكم واسأل نفسي وكعادة السؤال بيروح وما يرجع الا صداه (هذا اذا ما اخذوا الصدى بعد) وين غاازي القصيبي!!! وين الحكومات!! وين الوزارات اللي ما عندهم الا التسدح والتبطح وملي الكروش مع الاسف احنا نتساوى مع الصومال وجيبوتي مع اناا (دول ناميه) في طريقها الاكيد نحو التقدم والازدهار حاجه تنشف الريق وتعور البطن الشكوى بس لله

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

صرخة جامعي عاطل

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول