رسائل المجموعة

شايفني بنقالي !

السلام عليكم ورحمة الله وبركاته

ياكثر مانسمع هالكلمة..في الدوام..المدرسة..الجامعة..البيت
ضحك ولعب وجد … تسمعها …
يعني احنا سبحان الله اهل الخليج عامة وشعب السعودية خاصة .. بالنسبة لنا شرق اسيا
مجرد خدم و سواقين وعمال
نادراً جدا تسمع او تشوف احد يفكر انه هل من المعقول انه انا العب كورة مبارة رسمية ويكون معاي بالفريق لاعب هندي ؟؟ والا بنقالي ؟؟
هل من المعقول مثلا انه اكون مثلا في عرسي او عرس احد يقرب لي اروح ارفع السماعة على زميل لي فلبيني بالعمل او جار لي بالشقة واعزمه
ياكبرهااا عند الله
هذا اتوقع الجواب بداخل الاغلب…
الموضوع ماهو مستغرب بالعكس الموضوع قديم ومنذُ طفولتنا واحنا نضرب بدول شرق اسيا والهند وباكستان مضرب الغباء و التخلف
بكل امانه وصراحه كنت ناوي احط بموضوعي
مقارنه بيننا وبينهم من انجازات و مميزات ولكن للاسف تراجعت
لانه اتضح لي اننا من الصعب المقارنه فيهم
في يوم من الايام وانا كنت مع زملاء لي في ملعب كرة قدم .. مر علينا بنقالي راكب سيكل .. ولما شافنا نلعب كورة وقف ..
وجلس يشوفنا ..
احنا كشباب دائماً لما نشوف احد برا الملعب واقف مانحب نخليه واقف فنعزمه ونقلطه بالملعب معانا ..
فقمت انادي الحكم انه يدخله الملعب ولو حارس
تعرفون وش قالي ؟؟؟

قال صاحي انت ياعمي وش يلعبه معنا خله يولي !!!
طالعت في وجه البنقالي المسكين و اشوفه واقول مسكين مايدري انه خله يولي ماراح يلعب وكلي حزن على انه ليش مايلعب؟؟
وش فيه الرجال عيب ؟؟
وش ناقصه ؟؟
قلت في نفسي الله كريم
تكرر نفس الموقف ولكن هذي المرة مع شخص مصري وكان الترحيب فيه سابقني ودخل الملعب واصبح جزء لايتجزأ من الفريق ..
فعرفت وقتها انه فيه عنصرية ولكن مدفونه .. هل هي مرتبطة بعادة او لغة ؟؟؟ انا مادري
الشي الوحيد الي يجتمع عليه الجميع
من جميع الديانات و الجنسيات واللغات هي
(( كرة القدم ))
وعندنا لقت حد .. طبعاً حد معقول
يعني بكل امانه وصراحه لو نظرنا الى جميع البشر والجنسيات انهم واحد والتعامل معهم باحترام وبنفس الاسلوب

لي زميل راح اندونيسيا سياحة .. فلما رجع سألته كيف البلد ..
قالي والله بلد حلوة ومتطورة .. والخ
قلت اجل ماحسيت بفرق عندهم من ناحية النظافة و ماعنيت من الاكل …
طالع فيني بنظرة رومنسية

وقالي والله احنا المساكين ياخي مفكرين بلدهم وسخه ومفكرين انهم خدم وسواقين وبلدهم افضل وانظف مننا وعمايرهم وشوارعهم
قلت في نفسي كل شي جائز وخاصة اني ماسبق لي السفر الى اي بلد في شرق اسيا ..
اتوقع لو واحد من الشباب بسيارته شاف ليموزين قدامه على طول يعطي نفسه الحق بكل شي
وهذا موقف حصل لي مع صديق لي
كنا رايحين مشوار وكنت راكب جنب السواق وهو اللي يسوق ..
الرجال كان بيلف يمين وقدامه سيارة حط يده على الهرن – البوري

ولاهو راضي يشيله
اقوله يابن الناس لحظة طيب ازعجت الناس قال مين قاله يوقف يمين
سكت !! وكلي نجدم واسى على اللي ورانا وش ذنبهم …
شائت الاقدار وخلال شهرين الى ثلاث شهور
انه الرجال يوقف على اليمين لازم السيارات كانت زحمه
جاه واحد ودق هرن وماطول لا
مجرد نفخه
الا خويي يطلع يده ويقوله

شفيك ازعجتنا ..
على طول قلت له سبحان الله كما تدين تدان
يعني انت نفس الموقف حصل لك بالحالتين
وش بترر موةقفك الحين … قالي انت مالك شغل انت اخر واحد يتكلم عن السواقة هه !!! انا الغلطان تصدقون …
مايستفاد من موقفي وسالفتي انه الرجال ماحترم غيره وهنا مشكلتنا
الاحترام ياخواني يولد الاحترام
صعبه تمشي ومعك ابو هنود …
غابت عننا امور كثيرة جدا لدرجة صرنا مع العامية ونسينا نفسنا
لو الواحد مقتنع بشي وعارف انه صح مستعد انه يغير فكرته علشان الناس لاتلومه
مثل المقاطعه .. لو انت ماقاطعت منتج معين وانا قاطعته ماراح يتقاطع
ولكن لو كل واحد قال انا وش دخلني والناس هذي ليش ماتقاطع جات علي انا ماراح نطلع بنتيجه
عاملوا الناس اخواني بدينكم .. باخلاق الاسلام السامية ..
قولوا في نفسكم .. انا اعامل الشخص اللي امامي على اساس اني مسلم .. ولو كان الشخص كافر ماتدري لعلى الله سبحانه يجعل الشخص اللي قدامك يقتدي فيك و يعجبه طريقتك ويكون سبب في دخوله الاسلام ..

والسلام عليكم ورحمة الله وبركاته …
أخوكم / فهد العنزي
حسابي في تويتر : @Enezifa

 

 

 


تابعوا جديد شبكة أبونواف على فيس بوك وتويتر

   

 

 

مقالات ذات صلة

‫16 تعليقات

  1. الله يسعد قلبك ويكثر من امثالك اخوي فهد أعجبني كلامك مرررره عين العقل وربي , الله يجزاك خير .

  2. تسلم يمناك ياشيخ والله موضوعك يبرد القلب للأسف الى الآن لانعرف انهم تقدمو علينا علميا وحضاريا وثقافيا ونحن مازلنا نجمع قطة الاستراحة ونروح الدوام متأخر

  3. من اجمل ماقرأت مضمونا .. لنرتقي قليلا بأفعالنا ونعامل البشر بأنهم بشر وليس تعاملنا القائم على اشكالهم والوانهم وجنسياتهم شكرا بصدق

  4. والله كلامك عين العقل ولو مجموعة بسيطة من الناس تفكر نفس تفكيرك وتتصرف نفس تصرفاتك لكان الخير في كل مكان والحب والسلام يعم الاوطان… من القلب شكرا على الموضوع الاكثر من هادف وربي يجزاك الف خي

  5. كلام رائع رائع . وتاج هذا الكلام : إن أكرمكم عند الله أتقاكم . وبلال أكرم من أبي جهل ، ولا مقارنة !

  6. أماني … وقلبك اختي والله يعطيكي العافيه افرحني كثير ردك لانه اول رد فتحمست كثير .. اكرر شكري …

  7. مجرد قارئه .. لي الشرف والله العظيم ان يعجبك الموضوع.. الشكر لله ثم لك اختي على ردك واضافتك … عبدالله .. وجهك ابيض اخوي عبدالله سلمت يمناك على ردك .. خالد … نورت الموضوع بردك وبمشاركتك اخوي خالد .. الا وانت الصداق لو كل الناس فهموا مثلك احنا بخير… مرة ثانية …الشكر لك خالد على ردك… سهل… انت الرائع اخوي Easy …صدقت وان شاءالله يجي اليوم اللي الواحد يعامل غيره بدينه مو بجنسيته وقبيلته …

  8. مؤيد … ههههههههههههه حلوة الامثلة .. نقول ان شاءالله… والله يعطيك العافيه وفرحني ردك والله .. تسلم ..

  9. مشكور يااخوي على الموضوع اكثر من مهم افضل شي ان نستدل بالقران الكريم إن القرآن الحكيم يشجّع المسلمين على البرّ والإحسان للكفار غير المعادين المحاربين يقول تعالى: (لاَ يَنهَاكُم اللَّهُ عَن الَّذِينَ لَم يُقَاتِلُوكُم فِي الدِّينِ وَلَم يُخرِجُوكُم مِن دِيَارِكُم أَن تَبَرُّوهُم وَتُقسِطُوا إِلَيهِم إِنَّ اللَّهَ يُحِبُّ المُقسِطِينَ). اللة يجعله في موزين حسناتك

  10. أنا مدرس سوري مقيم بالسعودية سبحان الله أحاول أنزع هالمفهوم من الطلاب لكني أشعره أنه متمكن فيهم ومايتخيل الطالب انه يصافح هندي أو بنغلادشي …………………… والله مقهور نحنا مسلمين وديننا بأخلاقنا والإنسان المسلم له مكانة أخ ما لازم ننظر له نظرة دون أبدا

  11. محمد العنزي… ويكثر منك اخوي جزاك الله خير … وخير مثال استدليت فيه ..مشكور وماقصرت .. ابراهيم الفؤاد … حياك الله ياخوي ونتشرف بوجود ناس امثالك يعلمون عيالنا هالتربية .. وانت معلم وهي امانة ان شاءالله انك قدها وتحاول باللي تقدر عليه بالفكر اللي قلته .. تسلم اخوي ..

  12. الهند اللي احنا بنضرب بيها المثل في الغباء بتسوي مشروع ان الدراسه تبقي من خلال جهاز شبيه بالايباد صناعة هنديه تبيعه عليهم بما يساوي 30 دولار

  13. عمر باظروس…. انت الحلو اخوي عمر 🙂 تسلم … منوو … صحيح مو انا حاولت احط مقارنه لقيت امور واجد متقدمين علينا فيها من السكك الحديدية و الجامعات والمصانع و و و و … فحكم اني غيور ماحبيت اطلعها بصورة غير لائقه ورفضت المقارنه .. يعطيك العافيه على الاضافة تسلم اخوي ..

  14. السلام عليكم ورحمة الله وبركاته أشكرك أخي الكريم على طرحك لهذا الموضوع فعلا هذه الاشياء والتصرفات كثيره جدا في الشباب هنا وتصدر من الصغار والطامة أنه يصدر من الكبار أيضا كم من شخص أعرفهم كانوا هنا ثم ذهبوا الي بريطانيا والله أنهم يقولون فرق كبير بين التعامل الذي واجهناه في بلد الحرمين وبين التعامل الذي تعامل به في هذا البلد الكافر . وسأقول لكم قصة حدثت معي قبل يومين جائت الي بيتنا زوجة صديق لوالدي لتقابل الوالده جائت مع ابنائها . وعندما اذن العشاء جاء الابن الاكبر لها وقومي من النوم وقمت وقلت له اذهب الي المسجد وانا سأتوضا ثم سألحق بك .فقال لي : سيضربني الاولاد السعوديون !!!! لكني قلت له اذهب لن يفعلوا لك شيئا . ثم ذهبت لأتوضا وانا أفكر في الكلام اللي قاله .لماذا قال هذا الكلام ؟! أكيد له سبب .. وما رايت وسمعت كثير وانتم أيضا أظنكم سمعتم ورايتم أتنمى أبن الجميع يرتقى بتقكيره مثلك وينظر ويتعامل الناس بمثل ما يحب أن ينظر ويعامل وشكرا لك

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى