سحقا للرجال



/

انطلاقا ضد الحملة التي شنتها ( سامطه سماط ) في الفيس بوك على الرجل تحت عنوان ( سحقا للرجال ) .. والتي كان سببها زوجها الذي وصفته ( بالعجاز – الغبي – المتصعلك – المتخلي عن مسؤولياته – ما همة الا بطنه وبس )
كما أن هذه الحملة لاقت رواجاً بين النساء وأخذن يرددن الشعارات داخل أروقتها


اعلان





طيط طيط الرجال العاابيييط
* * *
بيب بيب الرجال مسوي ذيب
* * *
يا العومه شايف نفسك ليييييه
أنت خردة محد يبكي عليه

* * *
مرجل مرجل بكره تهرقل

وقد أوردت بعضا من المواقف على صفحتها من ضمنها أنها تدير المنزل بالفعل وهو بالقول فقط
وغير ذلك تضع له الغداء وعندما يأكل وينتهي يسقط بجانب السفرة وكأنه بقرة تلقت رصاصة في نصف جبهتها قبل ذبحها لتقوم بدورها وتضع يده المليئة بالزفر داخل كيسة لحم حتى لا يتسخ الموكيت ( عارفه أنه مافيه أمل يغسل ألين ياخذ غفوة وفي الحلم يشوف المغسلة وين مكانها بعدين يصحا )

كذلك أخذت تعبر عن مدى تشاؤمها عندما يقود عليها المراجل وينتقد طبخها وهو لا يجيد أي شيء في البيت غير الأكل والشخار أثناء النوم وكأنه يتغرغر بماء غريب

* * *
وحرصا مني وغيرة على بني جلدتي أقول لكم ( تلحلحوا ) وتعلموا الطبخ فشلتونا

اليوم يا ( سامطه سماط )
قد نزل السيل من مرازيم الملاحق
وتخبطت الأواني في بعضها حتى الملاعق
أقدح بشرارة الفرن كما تقدح الصواعق
مكر مفر لا تعيقني أعتا العوائق
حتى إن سقت أعطتني عزما أبين فيه الفوارق

* * *
اليوم لأول مرة في حياتي أطبخ أنا وصديقي اللي معي في السكن ووثقت كل شي سويته بالصور عشان بكره لو صار فيه تسمم والا شي نقول للشرطه الشغل كان نظيف
ما راح اطول عليكم

– _ – البداية – _ –

قبل ما نبدى في الموضوع لازم تعرفون أهمية غسل اليدين قبل لمس أي شي لان الواحد يتسمم وهو ياكل أكل نظيف كيف لو جاك واحد وصخ ( ما عاذ الله ما أقصد اللي معي ) /
المهم أول شي تغسل يدك بمويه ولو مافيه تعفرها بتراب أهم شي تغسلها ( كني أشوف يدينكم متشققه من المشق وحالتها حاله كنها أرض جدباء )

* * *
طبختنا اليوم هي ( الكبسة ) وتعريف الكبسة بشكل مبسط قبل نخش عشان أخوانا الأجانب الناطقين بغير اللهجة الخليجية
الكبسة :- هي عبارة عن مجموعة رزات كانوا مجتمعين في خيشه وضاقت عليهم الدنيا في كاس ثمن انفرجت عليهم شوي وتجمعوا في قدر

/

بداية صورة المطبخ قبل العمل وهذا أهم شي عشان تعرف تحصي كمية الخسائر اللي تسببها بعد ما تخلص
وأنصح أي شاب قبل يطبخ يصور المطبخ ويراجع القطع بعد ما يخلص من خلال الصورة اللي صورها عشان يعرف وش اللي انكسر واللي ما انكسر ويشتريه بسرعة قبل تدري زوجته وإلا امه وإلا وحده من خواته لا سمح الله

/

هذي عدة الشغل اتمنى محد من الشباب يفهم كلامي غلط وينط ويقول علي العود.. هذي قدور جمع قدر وبلهجة أهل الرياض تسدر

/

هنا أكيد بتقولون وشوله علبتين ملح ابقولكم وحده مليانه والثانيه فاضيه وحطيتهم مع بعض عشان تكثر المقادير .. حتى رز أبو كاس رفض أنه يرسل كاس والا كاسين من عنده أصر انه يجي بالخيشة كلها
طبعا الشطة هنا ناطله وجهها كنها للي يتجمهرون على الحادث

/

هذا البصل والطماط والشطة تقول انتم اللي جايين تصورون عندي .. حتى لو تشوفون ما طلعت الطماط من الكيسة كني مصورة داخل محمية

/

وهذا الشاهي الاخضر هو الوحيد اللي يتفاهم مع الكبسه ويقضي على حالة الخمول عند الشخص لأنه ببساطه بيخليك ترقد عقبها ( أذكر واحد من العيال من حبه للشاهي الأخضر صار يجيه شعور ينام في حوض زرع )
والشطه هنا صراحة كنها هذاك اللي يترزز قدام الكاميرا في الملعب ان جاء أي مقابله مع لاعب والا رئيس نادي

/

وهذي صورة جماعية للمقادير قبل ما ينزلون الملعب برعاية ابو كاس

طبعا خويي اللي يصلح معي مدري وش خلاني قوله ما فكرت وانت تطبخ تلبس دسوس( قاونتي ) مدري حامت كبدي من يديه والا اني صاير حساس من تالي جاوبني .. وين يا عمي ألبس دسوس داخل غرفة ضماد
حاولت أقنعه يجلس وأنا أصلح لكن حس الشهامة كان مرتفع عنده ثمن قلت له وش رايك نحط اشارب على روسنا عشان ما يطيح شعر في القدر والا شي .. ابتسم في وجهي وقالي .. الظاهر أنك كنت شغالة بعدها طنشني وراح يقطع السلطة وهو يصرخ كمل شغلك

/

هذي السمكة في الصينية شاريها الرجال اللي يطبخ معي يقول أنا خبرة في السمك مع العلم أني ما قد سمعت أن السمك ينوكل بالحراشف حقته
بس زين قابلنا واحد قبل ما نطلع من السوق وقال نظفوها قبل
بعدين حطها في موية وملح وسألته قلت انت بتصلح سمك أكيد والا بتقطع خمر .. قالي هذي حركة عشان تروح ريحة السمك اللي فيها .. تنهدت وقلت له على قولتك ( أهل السمك أدرى بالبحر ) << لعد تجيب امثلة

/

قطع البصل والطماط تقطيعا صغيرا كأنك تقطع صورة شخصية طالع فيها شيفه وما تبي أحد يشوفها ( واحد من اللي يعرفون يطبخون قال ياليتك متصل علي اجي اصلح بدالك ما عمرنا سمعنا ان البصل ينحط مع الطماط على طول .. نخبر البصل قبل والطماط بعده
لكن العومة عومه )

/

وفي هالصورة نعكس لكم يا معشر الرجال فن من فنون طريقة عزف التحريق وتقليب البصل والطماط عشان يصير لونه ذهبي ( خست وانا أقلب ما صار لونه ذهبي ذاب البصل وما صار شي ) بعدين عرفت انه ما ينحطون مع بعض .. ومن كثر ما قلبت أنصح أي واحد يلعب كمال أجسام أنه يقلب بصل وطماط خلال شهر يطلع له زند تايسن

/

نضع الخضار مع السمك بعد ان تركناها مغمسة في الماء والملح .. حاول ما تطلعها من المويه والملح إلا بعد نصف ساعه خلها تحس أنها ما زالت في البحر ما إنصادت
بعدين حطها في الخضار وصفف الخضار حوليها مثل المسيحيين ان صفوا الورد على الجنازة في التابوت

/

وهذي الحركة عشان نأكد لكم انها نفس السمكة اللي فوق وما غيرناها عشان ما تقولون جايبين سمكه مختلفة حتى تأكدوا نفس النظرات وفي نفس الوقت عشان تاخذ نفس لأنها ما تعودت على جو الخضار

/

بعد ما تصفف الخضار تخلي السمكة شوي عشان تتأقلم على الجو الجديد لأنها كانت لحالها في الموية والملح وهالحين معها خضار يبغالها وقت عشان تخش معهم
وفي هاللحظة نشف الرز بالمشخال عشان يطلع نثري لان الرز النثري يبغاله تصفيه من الموية ( بدى يتفلسف )

/

بعد ما تشوف ان السمكه اندمجت مع الخضار شلها وحطها في الفرن وخلها حسب التساهيل لاني بكل أمانه ما اعرف وش الوقت وعشان اكون أكثر صدق ما تذكرت كم الوقت الا بعد ما أمضت وقت وهي جوى الفرن

( تخيلوا هنا صورة القدر وفيه الرز لأني ما صورته )

نحط الرز ونحط المويه ترتفع عن الرز بمقدار سنتي واحد بس لو تضطر تغطس في وسط القدر مسطره بس أهم شي تضبط السنتي
وتخليه الين تتبخر الموية ثمن تقصر على النار قدر المستطاع إذا أردت أن تطاع << بدى يخور

/

وفي اثناء الطبخ تزبط الكشنه وهنا الكشنه جت عرضيه يوم شفت البصل والطماط كثير في القدر قمت شلت منه وقال خويي لا تكبه خله كشنه قلت كشنه كشنه وبراسك وحطيته في المقلات وقمت أحمس وجلست أنتظره يصير ذهبي ولكن اللي حصل أن الطماط من كثر ما حمسته حسيته أخذ موقف مني أني جالس أعذبه وقرب يعترف

/

وهذي صورة المطبخ اثناء المعركة مالك إلا تدور لك جدار تتكي عليه وتجلس تتفرج على الشغل الين يستوي ويخلص واذا حاب تعرف وش أنا سويت
مسكت الجوال حقي وجلست ألعب أونوا واسأل خويي اللي معي وهو يقطع السلطة أقوله أول مره اشوف وأحد يقطع مع السلطة بصل .. قالي وش اسوي لقيتها زايده حرام نرميها .. قلت له كويس أشوى أننا ما شرينا ثوم وإلا كان قطعته معها .. أخاف أصد عنك تحط فنايل وتقول زايدة
جلسنا نسولف في الموضوع وبعدها قلت له وش أمنيتك .. جاوبني والله يا أبو هديب أنا إنسان متواضع ( مدري وش دخلها بس نضيع وقت الين تستوي الطبخه )
قلت له .. الله يناولك مرادك يارب ويعطيك التواضع اللي تحلم فيه ..
وهو يقطع شفته يمسك كوسه قلت بتحطها مع السلطة قال ايه الخيار مهم .. قلت يا خي هذي كوسه .. مسك راسه وقال يا الله فيهم شبه غريب .. قلت المشكلة في عيونك قص لك نظاره أشوى أنك ما تصلح الرز والا كان حطيت صابون بدال الملح

أستوت الطبخة وجهزنا السفرة

/

أدري العالم بتقول وش هالطاولة ورى مهيب مرتبه وش جاب هالفوط وهالكيس
بنقولكم هذي اغراض حقت واحد من العيال قال لحد يجيها الين اجي وحنا جلسنا في هالمكان الفاضي من الطاولة ونحمد ربنا أنه ما حط اغراضه على الطاولة كلها

/

وهذي صورة مقربه للطاولة تضم كل شي بما فيهم الكاكولا وتوضيح بسيط ترى الكولا ما سويناها شارينها عشان الامانه بس

هذي فنيات خويي يقولك ادري انها أول مره نطبخ على الأقل خل لو صار الاكل شين تصير العين أكلت منظر حلو
قلت له أنسى يا حبيبي انا ما أحط يدي في شي إلا يضبط وجلسنا على الطاولة وأكل لقمة

/

أكل ملعقة وقام وهو قايم قلت له جب معك مناديل تكفى عشان نفرشها على فخوذنا وما تتوصخ ملابسنا .. ( اصلا لو طاحت اللقمة على ملابسنا توصخت هي مهوب الملابس من وصاخة اللبس اللي علينا .

/

قام خويي ونزل مع الدرج وقالي قم فارق عني بس قال إيش الرز نثري .. اللي أنت مسويه مافيه فرق بينه وبين أنك تاكله من الخيشه على طول ( حب )
سمعت كلامه وأخذت لي ملعقة حاولت أكذب عليه بس وقفتني نفسي وقالت أبو هديب معليش أنا نفسك اسمح لي أبوقف مع خويك لأني لو جاملتك بتاكل زيادة وابتعب عشان كذا نصيحة اعترف
ناديته وهو يصوت لي من تحت بسرعة قلي وش تبي أجيب لك من المطعم قبل ما يسكر ورزك هذا انتبه تحطه للعصافير لأنهم بيتكلمون على يدك والسبه رزك

أخذت ملعقة ثانية وحاولت وحاولت بس ما قدرت ابلع الشكوى الله قلت شكل اللوز ملتهبة ( اقناع نفسي )
قلت له جب معك أي شي وياليت وأنت جاي في طريقك تجيب دكتور أكلت السمك وأذكره يقول فيه عظم بس اللي أكلته مافيه عظم شكله ذاب مع الطبخ

الأشياء اللي استفدت منها

1- انتبه تطبخ عند ناس ما تتبنى الموهبة
2- حاول تخلي التجربة فردية لا تشطح وتحط صواني
3- عرفت ليش حريم اخواني يكرهوني في الصيف ان جلست معهم في الصالة بعد ما لبست الجلال وسويت دور ( سامطه سماط ) وكل وحده منهم تقولي أبو هديب الله لا يهينك تشوف ولدي ليكون طلع في الشارع وأنا أقولها ما عليه خلاف مهوب جايه شي وهي تبي تشم هوى وتضطر تلتفت نصف لفته وتجي ورى ظهر امي وترفع الجلال وتاخذ نفس كنها من حقين الغوص اللي يطلع ويرجع يغطس ثاني مره
4- الله يخلي الحريم وعط الخبز خبازه ولو أكل نصه


الموضوع لا يستنقص حق الرجال ولا يرفع من قدر النساء الكل سواسية وكلا في مجالة ملك وإنما هي تجربة خفيفه وددت طرحها في القروب
الموضوع القادم
مغامرة امرأة
مع تحيات / ابو هديب
الإيميل
[email protected]


تابع جديد رسائل المجموعة على تويتر

/
twitter.com/AbuNawafNet


تعليقات 20

  1. بصراحه الشكل النهااائي مرررره خطييييير .. لكن حوووستكم خخخخخ يبيلكم شوي ,, :$ لكن أبدعتوا ,, وأسلوبك روووعه في الطرح .. بجد هو أحلى شي في الموضوع كله .. وصدقت !! عط الخبز خبازه 😀

  2. صراحه شيء جمييييييييييييييل وفكاهي ضحكتونا وجوعتونا الله يسامحكم…… مغامرتكم مع الرز والسمك كانت رووووعه ووناسه وكلها كوم ووضع البصل مع الطماطم كوووووووووووووووووم ثاني !!!!!!!! وطرح مره حلو وجميل شغلكم مرتب ولو انكم افتيتو خطأ لكن المنظر في النهايه روووووووووعه……..ومشهي وأخيراً في مبادره من الأولاد ……

  3. أنـآ بصرآحه ضـآعت علومي عند الفريــآن قصدي الشطه ههههههههههههه لبى قلبهــآ وهي مرتزه ,, بس للأمــآنه بغض النظر عن الرز الحب اللي لو انكم ماكلينه من الخيشه أصرف لكم B لكن تنسيق الصحن خطييييييييييييييييييييييييييييير حتى حطيت الفكره براسي بكره لا ضبطت الكبسه لاهلي بسوي الرز كذآ مع انه ما يملي عينهم الا حوسة الرز والدجاج فوق الصحن خخخخخخخخخخخخخخ والله يرزق خويك التوآضع ويرزقك حسن الطبيخ والأهم انك حسيت بحرمة اخوك وهي تحاول تاخذلها نفس وانت ناشب لها حيــآتي عليهآ وربي اني رحمتها وقدرت موقفها ,, عشان كذآ وص نفسك ومعشرك ايهــآ الرجل لآمنكم شفتم حرمه تدور لكم تصريفه قوموووو بسرعه لأن الاكسجين يكون على وشك الأنتهــآء good for you

  4. خويك معليش ماعنده مجامله والله انه ضحكني ماعنده وقت جيعان حرام عليك… اهم شي انك راحم هل حريم وبذات اللي تاخذ نفس

  5. كله كوم والجلال كوم ثاني من جد جلست اضحك لين قلت بس لا والطماطم الباقي تحسفتوا عليه وخليتوه كشنة احس السمكة تكلمت وقالت الله يرحم والديك خلصنا والله موضوعك شهانا الاكل والسمك ممنوتك ننتظر الجديد

  6. والله انك ونستنا بتجربتك 😀 والطبخ بحد ذاتة شئ مسلي بس الكريه فيه غسل الصحون:~

  7. بعد الافياش وعلب الكولا الكبار والثلاجه المحشورة صرت افكر كيف دخلتوا الشيخ ابو كاس لهالدولة؟؟؟؟

  8. الا ابو هديب ..صبحك الله بالخير… الحين هالبيت ماشاء الله وينه فيه …دوررين بس الظاهر انه غرفتين مطبخ فوق وعرفه تحت خخخخ ياعليكم درج يكرفع … ماعلينا والله انكم مبدعين بس شغلكم يبيله محاوله مرتن ثانيه …ولا تطبخون من راسكم ..امسكوا كتاب الطبخ وحبه حبه لين تضبط عندك كتاب ام عبدالعزيز اسأل خواتك عنه تراه كل بيت فيه كتابين …شارحتن الطريقه شرح مفصفص <<يعني مفصل ماشاء الله عليها هالحرمه ماعلينا الى الامام ..والاعتراف بالحق فضيله ..

  9. هههههههههههه بصراحه دايم تمتعنا بقصصك وتعليقاتك واسلوبك حلو 😀 اما عاد قصة الرز والسمك يااخي كان مسوين دجاج عالاقل اسهل مررره وحددده سمكB يعطيك العافيه على الاقل فكرت تطبخ لكن على قولتهم العور على العميان باشا تحياتي 8)

  10. والله صراحة يابو هديب متألق جلست اضحك اضحك الله يوسع صدرك زي ماوسعت صدورنا والى الامام يامبدع

  11. حلاه العزوبيه لا تفننوا بالاكل ..8) وصفه جميله وتعليقات مسلية .. الله يعطيك العافيه .. ترا الطبخ واجب للنساء وفن وثروه للرجال , لاتنسون ان الشيف في العالم وفي المطاعم رجال .. في البيت عندنا مشروع تعليم طبخ لاخوي لانه ناوي يسافر للخارج يدرس .. فنبي نعلمه اساسيات الطبخ عشان مايسويها وياكل من المطاعم 24 ساعه .. شكلي بعلمه وصفتك 8) لا هنت ..

  12. :صراحه انا من يوم شوفت التجهيزات قلت الطبخه طيبه 😀 بس يوم شوفت الكشنه البصل وطماطم قلت ما عندك احد :~ الحمد لله إن صاحبك راح يشتري من برئ:$ بسسس الشكل النهائي رووووعه افضل شوي من المطاعم 😮

  13. اعترض اولا على العنوان دمتم يا رجال وانا متأكدة ان الطبخة لذيذة وليكون بعلم المعترضون ان الرجل افضل طبخا من النساء ولاحظوا ان افضل الشيف هم من الرجال وعلى العموم دمتم

  14. يعيك ألف عافيه على هالصور االحلوه بس ناقص شئ واحدقطه تأكل هالسمك لاكن يقولون نصف العما ولا العما كله الله لايحرمنا من رسائلك الحلوه

  15. والله اكثر شئ رحمته السمكه والبصل والطماط أهنيكم على الطبخه الفاشله >>> تكفين ياللي تعرفين تطبخين هههههه مشوته *_*

  16. السلام عليكم صراحه مغامره اليييييييييييمه بس صراحه ابدعتو …مع اني احس انه كل شي تمام في الطبخه وكمان ترتيب الطاوله فيه ابداع شكلكم كشخه معاها .. لو خليتوني اذوق السمك بس رحمت خويت لما اكل ملعقه وقام ههههههههههههه شكله كان حاس بالوضع يوم قال (خل لو صار الاكل شين تصير العين أكلت منظر حلو ) يالله حاولو ثانيه ولاتوقفون ..بس لاتكثرون طبخ ترا الموضوع سهل اسألني انا <<< لاتفكر تسأل هع الحال من بعضه 8) بالتوفيق يا ابطال 🙂

  17. الله يعطيك العافيه ما قصرت ليش ما عزمتنا معك على الغدا نشارك معك بالطبخه انا شاطر اقدر اسوي بيض عجه وعيون وسلق 🙂

  18. :$محاولة جيدة ممكن تنجح في المرة القادمة وشكر جزيل لإلك على مواضيعك الحلوة

  19. هههههههههههههههههه لا فيكم امل 😀 اقول احلف ان مامعكم حرمه تسوي لكم اوماا انتم يطلع منكم شي زين B

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

سحقا للرجال

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول