{ رحلتي البطوطيه لبرشلونة – الجزء الأول }


بسم الله الرحمن الرحيم

اليوم بتكلم عن رحلتي لمدينة برشلونـة الاسبانـيـة لكن بشكل مغايير شوي عن بقية مواضيع الرحلات بحيث بعتمد على ذاكرتي فقط وبشكل عشوائي .. لاني تعمدت ما اكتب عن الرحلة الي كانت في الصيف الماضي الا الآن وبدون اي مرجـع .. طبعـاً كانت الرحلة قرابة 15 يوم من نهاية اغسطس حتى تاريخ العاشر من سبتمبر .. وقت ممـتـع

! من الرياض لـبرشلونة حوالي 24 ساعـة

رحلتنا وبشكل مستغرب على الانسان العربي كننا مخططين لها من بدري تقريباً اول الصيف انجزنا كل شيء سواء الطيران في داخل اوروبا او الخارجي أو حتى السكن و وكمان التاكسي حجزناه من هنا وكل شي كان عن طريق النت بستثناء طبعاً الخطوط الي بنطلع فيها من هنا والي وقفنا محتارين معاها .. فـ وجهتنا تحددث ببـاريس لان مافيه خطوط تطلع من هنا على برشلونة دايركت , وحجزنا من باريس على برشلونه على خط البلده خخخخخخخ او  بالإيزي جت احد الخطوط الاقتصادية الي احتمال يخلونك واقف بس اهم شي توصل .
بالتالي كان لازم نحدد كيف بنطلع من الرياض لباريس وكان امامنا عدة خيارات منها الخطوط السعودية او الطيران الفرنسي او طيران الخليج .. وللأسف اقولها نادماً وباكياً وقع الاختيار من باب التميلح على طيران الخليج لاننا كنا (( قولوا ماشاء الله )) .. كنا 11 شخص كلنا عزاب فـقلنا الخليج بنحصل عليها اكيد وبنفس الوقت تحركنا بيكون خفيف لا اطفال ولا معدات عائليه ثقيله هههههههههههههههههه




وبما اننا على طيران الخليج كـان لزوم علينا نمر على البحرين اولاً ومن ثم نتوجه لباريس بعدها .. رحلتنا من الرياض للبحرين كانت العصر اذا ماخاب ظني ومن بعدها عندنا إنتظـار في البحرين لمدة ست او سبع ساعات .. وبعدها نطير لباريس لمطار الشارديغول او شارل دي غول علشان مايزعل علينا الرجال .. ومن ثم اول مانوصل الصباح قدامنا اقل من ساعتين حتى نبدل المطار لمطار اورلي الي فيه رحلتنا لبرشلونه على الايزي جت .. عموماً بتجيكم الاحداث لا تستعجلون .

طلعنا من الرياض للبحرين على طيران الخليح .. في باص له اجنحه ويطير !! يمكن لو رايحين على جمال كان اريح لنا عاد قبلها كنت شايف لوست خخخخخخخخخخخ يعني كل ماتحرك شي حولي قلت طحنا .. وصلنا البحرين والي اروح لها لاول مره في حياتي ووجلسنا نبارك لبعض ان الطيارة ماطاحت و اننا وصلنا سالمين ولله الحمد .. طبعاً الخطه كانت في هالست او سبع ساعات وبما اننا في دوله ماتحتاج لفيزا قـررنا نطلع فيها من المطار نتعشى ونشوف لنا موفي ونرجع .. لكن اصحاب السعادة رفضوا ! بحجة اننا قطعنا البوردنق من الرياض فـ مانقدر نطلع الا معانا الشنط و نرجع نقص برودنق ثاني .. يعني بالعربي الموظف شافنا واجدين خخخخخخخخخخ قال ماله خلقنا وصعب الموضوع علينا وقلنا امرنا لله نجلس نتسدح في ارجاء المطار لين تجي الرحله


مطار البحرين وخصوصاً الديوتي فري كان على صغرها الا انها جميله وتوزعنا فيها كل شخص وهواياته خخخخخخ .. الي راح ياكل والي راح يشتري اغراض والي راح ياخذ مجلات وكتب والي اخذوا ورقه وجلسوا يلعبون في احد اركان المطار بلوت وبما اني ما اعرف العب بلوت .. رحت جلست في كوستا كافيه انا ومن لم يجد سبيلاً للتسليه وقعدنا نتفرج ع الرايح و الراجع , وفي وقـت لاحق تغدعشنا <<– يعني غدا وعشا سوا .. لكن قبل ما نتغدعش قالنا واحد ان الخطوط تعطينا وجبه مجانيه في مطعم حاطينه فوق فـقلنا ومالو نروح نشوف هالوجبه .. لكن الله يكرم النعمه ماقدرنا حتى نجلس بالمطعم فـنزلنا للسوق الحره واكلنا فيها .. وطار الوقت خصوصاً اننا واجدين وهالشي صدقوني الي ماجربه يجربه الي هو السفر مع اكثر من ثمانية اشخاص .. لو تروحون للصومال أو بنغلادش ان تفلونها

جا وقت الرحله وبدا كل واحد يكلم اهله ويودعهم بالدموع بعد ماتذكرنا طيارة الرياض – بحرين الي كان يدفها المضيفين لين وصلنا .. فـماكان عندنا شك ان الطيارة بتكون باص اكبر فقـط .. لكن الحمدلله ركبنا الطياره وكانت اجمل من السابقه وهالشي كان سببه ان المطارات الأوروبية تفرض على كافة الخطوط مواصفات وشروط معينه في الطائرات علشان كذا طيران الخليج شكله باع له خمس باصات واشترى هالجمس هههههههههه .. والي كانت رحلتنا عليه سبع ساعات تقريباً بحيث نوصل في صباح اليوم التالي لباريس واااه يا باريس .. طارت الطياره وبعد ساعه او اقل خفت الاضائه وهدأ الجميع والي نام نام والي ماقدر ينام مانام <<– اموت انا على التشويق 

من الغلطات الي ارتكبناها في رحلتنا سالفة باريس هذي .. بحيث نوصل ومباشرة على المطار الثاني اورلي نقلع لبرشلونة .. حيث كان من الافضـل لو اخذنا على الاقل يوم فيها .. لكن الاغلبية اتفقوا على ان باريس نجلس فيها بالرجعه مو بالروحه , اول مانزلنا في الشارديغول كنا بين نارين الأولى خوفنا من تفويت رحلة برشلونة واننا مانحصل التاكسي الي ينتظرنا برا والثانـيـة كانت بخصوص الفيزا ماكانت فيزتنا فرنسا كانت اليونان الظاهر و واحد الله يهديه معنا جلس يخوفنا ويعطينا قصص خيال علمي عن ناس غابت شمسهم علشان فيزتهم كانت غير .. بعـد ماوصلنا واحد تلو الثاني تعدينا الجوازات وحمدنا ربنا وعطينا صاحبنا بتاع الأساطير نظرات تحسب خخخخخخخخ .. ومن ثم بدأنا نسابق الوقت و الناس بعد واخذنا الشنط الي ما تأخر فيها شي الحمدلله وطرنا مشياً لبوابة الخروج و الأعـيـن تبحث بين المستقبلين عن التاكسي

وجدنا التاكسي الخال الكاميروني واقف ومعه ورقه مكتوب فيها عشر سعوديين وسعودي انا سواقكم ههههههههه ومعاه واحد ثاني الظاهر انه كان لاعب بعد في منتخب ساحل العاج .. رحنا معاهم وكان بانتظارنا سيارتين كبار (فانات) وتوزعنها فيهم وانطلقنا لمطار اورلي في ساعات الصباح الباريسيه الرائعه .. وبدينا ندردش مع سواق التاكسي الي كان اكشخ من بعض الوزراء عندنا وكأي شخص آخر لازم يكون حديثنا حول الكوره ههههههههه وجلسنا نسأله تعرف السعودية ؟ تذكر يوم نباريكم في كاس العالم .. طيب مين تعرف من المنتخب ؟ وش تشجع ؟ من احسن لاعب فرنسي ؟ من تحب الهلال ولا النصر ؟ و اهم شي بالعالم لما سألته تعرف سامي و الهلال ؟ قالي ايه بغيت اججججججججججججغفه (ابوسه) ههههههههههههههههه بس قلت مالها داعي ينزلني ترا راس مالها كوره .. ومع السوالف و الضحك وصلنا لمطار اورلي وقالنا يالله تقلعوا وصلنا

من مطار اورلي كانت رحلتنا برشلونة على خطوط الإيزي جت مثل ماذكرت والي كنا قاصين التذكرة ان ماكنت ناسي بـسبعين يورو للشخص فقط ذهاب وعوده ! وطبعاً استفدنا من الحجز المبكر والي نشوفه الآن مطبق عندنا مع الخطوط الجديدة .. لكن من عيوب هالخطوط الاوروبية الصغيره انها تلزمك بوزن معين للشنط لا يقارن مع عفش الشعب العربي و الخليجي .. لكننا كنا ابطـال وحاسبين حسابها ومقللين الاغراض الا واحد الله يهديه جايب بيتهم كله هههههههههههههه وخلوه يدفع حوالي خمسمية ريال وزن زايد .. عطونا البوردنق والي كانت تجربتي الأولى مع مثل هالخطوط فـاستغربت وين المقعد ؟ وضحكت قالت مسوي ماعندكم خط البلده بالسعوديه ؟ هذا مثله اقرب كرسي فاضي اجلس فيه , وفعـلاً ركبنا الطياره وكأننا في رحلة مدرسيه توجهنا كلنا لآخر الطياره حتى نحصل مكان سوا ونحش في العالم .. الخطوط هذي ماتقدم لك اي شي حتى لو مناديل مافيه إنما يقدمون خرابيط الطيران كلها مقابل مبالغ معينه سواء الأكل او غيره , لكننا ما كنا نحتاج شي مع قصر الرحله الي كانت اقل من ساعتين تقريباً .. ذبحنا فيها التعب خصوصاً مع اقتراب الأربعة وعشرين ساعه على التمام من ساعة خروجنا من منازلنا بالرياض

وصلنا مطار برشلونه بالسلامـه واخذنا العفش كمان بالسلامـه لكن ذبحنا هالعالم الي ماتحكي انجليزي مايتكلمون غير اسباني وهذا ابرز عيوب المدينة يعني غباء في التعامل تقوله ما احكي اسباني ويقولك اوكي ويمسك فيك خط بالاسباني فهمت ولا مافهمت , طلعنا من المطار وكل واحد معه عنوان السكن بورقه ( من الدباشه ) وتوزعنا على ثلاث اشخاص في كل تاكسي تقريباً وتوجهنا للسكـن الي كنا متخوفين منه خصوصاً انه عن طريق النت والاختيار كان اعتماداً على الصـور في الموقع فقط .. وطبعاً بما اننا حدعش شخص اخترنا اكبر شقه في برشلونه الظاهر فيها سبعمية غرفة نوم خخخخخخخخخخخخخخخخخخ

انتهـى الجزء الأول

بالجزء الثانـي راح اقولكم عن صدمة الشقه الي اخذناها , وعن ايامنا في برشلونـة .. واجمل مافيها و اسوأ مافيها .. بالاضـافـة لصـور لاغلب الاماكن الي زرناها وسالفة كل مكان وكل رحله والمواصلات في المدينه .. و الهنود الي لاحقينا فيها والبيره !! وعن العرب فيها .. وكل شيء شاهدته في فترة الاسبوعين في برشلونـة راح اسدحه لكم في الموضوع القادم بإذن الله وما انسى الصـور طبعاً الي تجاهلتها هنا لان ماكان فيه معالم او اماكان .. إنما راح تظهر في القادم بحول الله وحسب رغبتكم اذا حبيتو الموضوع توسعت بالتفاصيل والقصص وخليتها اكثر من جزء .. أو بتخصر كل الرحلة حتى العوده في جزء ثانـي فقـط

Yazeed


تعليقات 9

  1. سردك لاحداث الرحله كان مشووق جد الرحله مع الزحمه وناااسه باي مكان اكمل احدااث رحلتكم بسرعه لاني تحمست ومن زود الحماس بنفجر ابيك تكتبها بسرعه احب احداث الرحلات لاتنسى ولامعلومه حتى لو كانت صغيره ياربيه علمني اياها وانا بكتبها عنك تحمست خخخخخخخ

  2. ههههههههههههههههااي اسلووبك مره حلوو في الكتابه وشيق ..هع هع جلست اقول لأهلي اتحداكم تقولون هالكلمه عشر مرات ورى بعض وبسرعه ((تغدعشنا)) محد عرف هع هع .. وياليت تعجل علينا في الباقي .. ولا تختصر شيء .. نبي بالتفصيل الممل ..

  3. والله عجبني اسلوبك في الكتابة …. وحقيقة انا جربت الطلعات اللي يكون فيها عدد الاشخاص اكثر من 8 (حقيقة كانوا 18 نفر ) وعلى قولك تكون الطلعة مرررررة فلة حتى لو كانت الطلعة للبقالة اللي جنب بيتنا

  4. 11 شخص >> واااو ذكرتني برحلات المراكز الصيفية ..!! عموما انا على أحر من الجمر لتكملة الرحله ( على بالي بريزون بريك )!! سرد حلو منك عزيزي لأحداث الرحله.. ورجاء نبي بالتفصيل الممل وركز لي على الصور !!وإذا كنا ما نثقل عليك لا تنسانا من المعلومات المادية!! هل الرحله مكلفة .. فنادق ؟ .. تنقل؟ .. تسوق؟ .. ؟؟ ودمت بخير .

  5. ياحظكم يالشباب احسدكم تسافرون قروبات مع اصدقائكم<<<<انا ودي بعد شمعنى انتو 🙁

  6. اما 11 واحد .. فرق كوره هذا ههههههههههه خلاة الرحله ماتزيد عن 4 << محد سألك خخخخ تسلم تاكسي ومنتظرين موضوعك الثاني بس ياليت تضيف صور بالموضوع .. حلاه التقارير هذي تكون بصور ^_^

  7. فللللله ماشاء الله وكتابتك للقصه مررررره مشوق وما حسيت بملل ابد بس لا تتأخر بالجزء الثاني تراني متحمسه احب اقرا زي كذا مواضيع ولاهنت وسلالالام

  8. يعطيك العافية اخوي يزيد والله هذي اول مرة اعلق على موضوع بس اسلوبك في الكتابة سحرني ويعطيك العافية واصل السالفة وبالتفصيل الممل تكفى.

  9. الصرااحه اسلوبك روه وطرحك للموضوع بس عجل علينااا بالتكميله لان تحمست معاكم لول تشاو

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

{ رحلتي البطوطيه لبرشلونة – الجزء الأول }

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول