رسائل المجموعة

رحلتي إلي جنوب أفريقيا – كيب تاون وصن ستي – ج2

رحلتي إلي جنوب أفريقيا كيب تاون ، صن ستي

معلومات ونصائح عامه :

# السوق : تسكر أغلب المحلات والأسواق والمطاعم بعد الساعه الخامسه أو السادسه ليلاً إلا الأسواق الرئيسيه وولتر فرونت وووغيرهم من
الأسواق الكبيره والناس من صباح الله خير تجدهم بالشوارع تقريباً بعد صلاة الفجر مباشره تمتلأ بهم الشوارع.
# البنوك : تجدها في كل مكان والـفيزا والماستر كارت تمشي في كل المحلات حتي البسطات والأكشاك الصغيره تقبل منك هذي البطاقات فلاتخاف.
# الأكل : هناك مطاعم كثيره متوفر لديهم الأكل علي الطريقه الإسلاميه حتي تجد بعضهم يكتبون حلال علي واجهه المطعم أو علي
قائمه الطلبات ، وأكلهم بصراحه لذيذ جداً والذي يريد مطاعم الوجبات السريعه المعروفه فهي متوفره بكثره.
# السيارات : عندهم السكان أو الدركسون كما يسمونه الإخوان في السعوديه يكون علي اليمين ، فإنتبه إذا أردت أن تخطر أحد الشوارع أو
إشاره لاتشوف يمينك شوف يسارك ، حنا أكثر من مره بغينا نولي بسبت إختلاط الأمر علينا .
# الصلاة : هناك مساجد ولكن تحتاج منك وقت حتي تذهب إليها ولكن إذا كنت في السوق أو الأماكن السياحيه فأغلب هذي الأماكن توفر لك
مكان للصلاة حتي مره في أحد الأسواق حضر وقت صلاة المغرب فقدموني لكي أصلي بهم.
# الأسواق : هناك أسواق رخيصه وهناك أسواق غاليه فستجد أن هناك أسواق كالسوق الأخضر وغيرهم من الأسواق تباع فيه الأشياء
الرخيصه وتكاسرهم ويرخصولك ماعندهم مشكله ، وهناك الأسواق الكبيره والتي تغطي علي أسواق الكويت كـسـوق شرق والمارينا مول ، من
ناحيه الفخامه والرقي والماركات العالميه.
# البحر : مش لازم الشخص يذهب للبحر نحن لما ذهبنا لم نذهب للبحر لعلمنا المسبق بما يوجد هناك ، يعني بصراحه إذابعض الدول الخليجية تجد فيها المايوهات واللبس إلي ماودك تشوفه فما بالك بدوله الأصل فيها أن أهلها غير مسلمين والله أبدلنا بأماكن كثيره أجمل وأحلي .
# الألماس: حاولنا وسألنا أكثر من مره علي مسألة شراء الألماس ومن ثم بيعه بالكويت ، حتي يقول لنا مطلب أن أكثر الخليجيين لما يأتون إلي هنا وبعد إنتهاء رحلتهم يشترون ألماسه ويبيعونها في دولهم فتطلع عليهم الرحله ببلاش أو يسددون تكاليف سفرتهم من هذي الألماسه ، بس مثل ماأنتو عارفين يبيلها واحد عنده سيوله ويعرف كيف يصرف هذي الألماسه.
# الحمامات : يجب أخذ الحيطه أن الحمامات هناك بدون ماء فقد مناديل لاتسمن ولاتغني من جوع فيجب أن يكون معاك بطل ماء أين ماتذهب لكي تتطهر عدل ، كذلك الحمامات هناك كلها حمامات إفرنجيه.

مواقف حصلت لنا في جنوب أفريقيا:

# لما نزلنا إترانزيت في دبي ذهبنا إلي قاعة الإنتظار لأنه لم يبقي علي رحلتنا شيء وإذا القاعة ممتلأ علي الآخر كلهم إنجليز أو من أوربا إلا أنا وصاحبي فلما حان موعد ركوب الطائره صفينا بالطابور الطويل ، الطائره كانت بوينغ الكبيرة وإذا خلفنا مباشره بنت ورجل شكلهم معبين الطاسه يغنون ويرقصون والكل يلتفت عليهم والمشكله إنهم خلفنا علي طول المهم قلت خلني أشوف شنو إلي صاير إلتفت عليهم أبيهم
ينقدون على نفسهم وإذا بالبنت الله يأخذ عمرها تمسك لحيتي وتقول أنا أحب هذي اللحيه طبعاً اللحيه موكبيره بس حاشني إحراج موطبيعي:o
ومن يومها قلت خلاص راح أستمر بتربيه اللحيه خخخخخخخخ:p.

# لما وصلنا مطار جوهانسبيرغ ذهبنا صوب الحقائب لكي نستلم حقائبنا وجلسنا ننتظر وننتظر وخلصت الحقائب ولم تظهر حقائبنا
وموعد رحلتنا يمكن بعد ساعه ونصف تقريباً …. قمنا بسؤال الموظف المسؤول فلم يلقي لنا بال أو بالأصح يمكن مافهم علينا < تعرفون
عندنا اللغه مش ولابد > وجراح ماقصر حاول يطلع كل ماتعلمه من المدرسه والمعهد في الأخير فهم علينا وشاف عنده في الكمبيوتر طلعت
حقائبنا في دبي شلون ماشلون قالنا إنتوا روحوا لــ كيب تاون لحقوا علي الطياره لاتطير عليكم بعدين راح نجيب لكم حقائبكم تقريباً
بعد كم يوم في مطار كيب تاون رحنا للطياره وتأخرنا والموظفه إلي علي الكاونتر موراضيه تمشينا إلا إذا عطيناها بقشيش بس حنا سوينا
روحنا مانفهم إنجليزي ….. بالأخير مشتنا وهي معصبه علينا جداً بعدها جلسنا في كيب تاون أربع أيام علي نفس ملابسنا حتي
خسنا والله وكل مانقول نبي نشتري ملابس جديده يقول المطارالشنط ستوصل اليوم أو بكره فنقول ماتسوي نشتري ملابس لأن شناطنا معبينا ملابس لما قالت بس …!!!
# لما أردنا الذهاب إلي السفاري إتصلنا علي أحد الأرقام التي وجدناها في أحد العروض في البروشتات فقال لنا أنا ألحين جايكم لما عرف أننا
عرب ، بعد ساعه جانا وإذا به شخص مسلم إسمهمطلب كونا معه علاقه طيبه بعدين ، المهم لما شافنا قال لنا عندكم خرابيط يعني تحبون
سوالف شرب الخمر ولا الزنى وهالسوالف فقلنا نعوذ بالله لايبا حنا ماعندنا ولانحب هالسوالف فقال : أن بعض المسلمين والخليجيين لما
يأتون إلى هنا جل وكل همهم كأس وغانيه ويشوهون صوره الإسلام عند أهل هذي البلاد فقلنا له كلامك سليم ووالله كلامه أحزننا بصراحه أن بعض المسلمين يشوهون صوره الإسلام من حيث لايشعرون .
# لما رجعنا من رحله السفاري كان الجو بارد جداً ، كان صاحبي جراح مومتحصن من البرد عدل فحاشته زنزلة برد فجلس اليوم الثاني
مسخن وتعبان حده بس جالس بالفراش ويشرب فيتامين سي ويشرب السفن آب فلما صار الليل قلته شرايك ننزل تحت ونشرب لنا
قهوه ولاشيء حار قال فوقه ، نزلنا تحت وطلبت قهوه أسبانيه وجراح طلب قهوه فرنسيه قلنا خلنا نجرب ، شوي ولا يجيب لنا القهوه بكأس
زجاجي نلمس الكأس ولا القهوه بارده إستغربنا طبعاً أنا رشفت منها رشفه صغيره حسيت أن طعمها غريب جراح شم الكأس حس أنه موطبيعي
نادينا الطباخ ماأدري الجرسون وسألناه شحاط فيها ولايقول الملعون شويه ويسكي شويه بس ، فقلناله حنا مسلمين ومانشرب لاوسكي ولانأكل
لحم الخنزير فبدت الدهشه علي وجهه.
# رحنا لمنطقه كلها مسلمين في كيب تاون تشوف فيها المساجد في كل مكان المهم إلي جايبنا للمنطقه قال عازمكم علي مطعم في
المنطقه إسم المطعم بسم الله شكراًُ علي إطعامك مكتوب إسمه باللغه العربيه قسم بالله

صاحب المطعم ماليزي مسلم قلنا فوقه رحنا للمطعم
قالنا طلبوا حنا كنا مستحين منه يعني هو راعي تكسي ويعزمنا موحلوه نكثر عليه طلبنا علي قدنا مطلب إسم إلي جايبنا للمطعم قام يطلب
ويطلب وأبي عصير وربيان ووو….إلخ المهم كلينا ولما صار وقت دفع الإحساب قلنا موحلوه نخليه يدفع فرحنا نبي ندفع عنه وبعد مناوشات
والله ماتدفع ومن هالكلام رضخ أخيراً وقمت أنا بإستلام الفاتوره وإذا بالحساب يفوق يمكن الــ20دينار كويتي .

الكرم ومايسوي
مع انا نحن في هذا اليوم قلنا راح نوفر فلوس حق بكره ولكن تجري الرياح بمالا تشتهي السفن …!!!
نكمل الآن صور كــيب تـــاون :
ذهبنا إلي شاطىء البطاريق


الغريب أن أجسامهم كانت صغيره جد

والله الواحد مره يقول ياليت أكون بطريق بس أعيش هني
أضحك معاكم مابعد نعمه الإسلام نعمه


يعيشون تحت هذي الشجر والله أعلم

في بعد صور بس أكتفي بهذا عن البطارق
منتجع إسباير الجميل
يبعد عن مدينه كيب تاون حوالي الساعتين
أسعاره موغاليه غاليه بس مقدور عليها يعني كأنك ساكن
في دار التوحيد في مكه


هذي البوابه التي تدخل منها إلي المنتجع


كراسي للي وده يجلس بين الشجر


بحيره طبيعيه وسط هذا المكان الرائع


كل ماأشوف هذي الصوره أقول ياليتي مارجعت

ثوره إثبات أني موجود :p:p:p


طبعاً المكان فيه غرف أوشاليهات تقدر تقول للنوم
يعني العريس أو المتزوج ستكون ليلته من ألف ليله وليله


غرفه النوم بس للمتزوجين فقط
العزابيه يبيلهم فراش سنغل:حزن::حزن:


طبعاً هذي الصوره غارج الغرفه أو الشاليه الي ستأخذه


طبعاً هذا نهر جاري
ومسوين فوقه جسر للإنتقال للجهه الأخري لرأيه الخيول

ثم رحنا إلي كاليدن وماأدراك ما كالدين
تخيل ماء حار في وسط هذا المكان البارد ينزل عليك الماء من أعلي الجبل
ويقولون أن هذا الماء للشفاء أو للإسترخاء


ونحن متجهين إلي كاليدين
طبعاً الطريق بأكمله كما ترون يفتح النفس والخضره بكل مكان


صوره من الطريق
الواحد مال يكون معاه بسطه وشاي وقهوه :نظارات:


وصلنا لــ كاليدن
طبعاً هو عباره فندق ، والنبع الحار ، وكازينوا
بس ماتشوفه نهائياً إلي إذا بغيته:قهر:


هذا هو الفندق
قسم بالله يسوي صن ستي


طبعاً هذا هو النبع
وهو عباره عن ثلاث أحواض كل واحد درجه حرارته أقول من الثاني


شوفو الدخان إلي يطلع من الماء

حديقه الفهود والصقور


جراح باعها وقال لازم أجرب أصور مع فهد
طبعاً أنا قلت مستحيل أدخل خصوصاً لما قالت لنا المدربه نحن نخلي مسؤليتنا عن أي شيء يصيبك لاسمح الله

لما تدخل الحديقه يخلونك تمسك الصقر وتصور معاه
وفي مجموعه كبيره من الصقور وحصلنا صقر عربي إسمه شاهين

صـــن ســــتي
لما خلصت الأيام الجميله في كيب تاون
ذهبنا للمطار وتوجهنا إلي جوهانسبيرغ ومن ثم ذهبنا بالسياره إلي صن ستي المسافه بالسياره حوالي الثلاث ساعات
بأختصر صن ستي بكلام موجز هي عبارة عن منتجع كبير يضم أربع فنادق جميعها خمس نجوم
هذا المنتجع الكبير يحتوي علي أكثر من شلال وبحيره كبيره وبحيره صغيره ويحتوي علي كازينو كبير في وسطه وكذلك علي مكان للعب الغولف وبحيره الأمواج المتلاطمه
لكن العيب هو أنك لما تنظر للجبال حولك تري جبال تشعر وكأن هالمنتجع من صنع الإنسان فكأنها طبيعه مفتعله
لاأنكر أنني إستمتعت بالمكان ولكن الفرق بين كيب تاون ، صن ستي فرق بين السماء والأرض

أترككم مع الصور الجميله

هذا الفندق الي ساكن فيه
شوفو الغرف التي في الأسفل نحن أخذنا إحدي تلك الغرف

شاذي يمر بجانب غرفتنا بالفندق
طبعاً الفندق حذرنا أن ننام ونترك الغرفه مفتوحه لكي لاتدخل الشواذي والطيور إلي داخل الغرفه


صوره للكازينو الكبير في وسط صن ستي
تصدقون خسرت كل أموالي :p:p

بحيره الأمواج المتلاطمه
يخرج الموج من عند الطوفه ويضرب بالصخر الي مسوينه فتتلاطم الأمواج
طبعاً يسمحون لك بالسباحه فيه بس كان الجو بارد

طبعاً هذا أفضم فندق في المنتجع أو مدينه صن ستي
لاحظوا معاي أن حوالين الفندق المكان كأنه صحراء وليس طبيعه
نفس كيب تاون


توجهنا بالسيارة السياحيه إلي أعلي جبل في المنطقه
للقفز بالحبل إلي أسفل الجبل


قفزنا من أعلي هذا الجبل
يكلمنا المدرب يقول أنكم تنزلون بسرعه 120كيلو بالساعه

وترقبوا الجزء الثالث والأخير إن شاء الله
للإطلاع على الجزء الأول
كل الود للغالين

مقالات ذات صلة

‫13 تعليقات

  1. والله روعه المنظقه لكن ابي اسالك يا غالي في اي شهر طلعتوا لها لان يان شاء الله ناوي اطلع لها بس ابي الوقت اللي يكون صيف عندهم؟؟

  2. تسسسسسسسسلم بصراحه تقرير مفصل واعتبره مرجع لي للسفر لكن اول شيء ارجع للموضوع السابق وبتلاقيني سئلتك سؤال الرجاء الاجابه عليه ثانياً من قام بترتيب الرحله والبرنامج انتوا ولا هل فيه مكتب الزبده لو ابي اروحها وش اسوي من البداااايه شككككككراااا

  3. السلام عليكم ورحمة الله وبركاته الصراحه ما أعرف شو أقول..أماكن روعه ومناظر تريح النفس(سبحان الله) من كان عمري 15 سنة وأنا أتمنى أسير أفريقيا للدعوه والتدريس…وللسياحه،الحين تحمست أكثر،أسأل الله أن يرزقني زوج صالح يحب الدعوه والترحال،وأسأله تعالى أن يسخر لي أهلي للذهاب إلى جنوب أفريقيا جزاك الله خيراً أخيه..بدعيلك ننتظر المزيد وفق الله الجميع

  4. صراحة أكثر من رائعة الرحلة … خليتني ارجع بذكرياتي اربع خمس سنوات لأني قضيت ولوفيت تقريباً جنوب افريقيا لمدة اجازتين في خلال سنتين … الله يهنيك وان شاء الله لما تزورها سدني .

  5. وش ها الطبيعه الخلابه وش ها المناظر اللي تفتح النفس الله يارب اسالك الجنه

  6. الله يهداك اخوي دار التوحيد بمكة أسعاره نار × نار وتظرب به مثل في موضوعك على كذا بطلنا (( نفكر )) في السفر <<< خلاص الغينا حتى التفكير

  7. مشكور على التقرير الحلو واسلوبك ماشاء الله عليه بسيط وممتع حلوة جنوب افريقيا ماتوقعتها كذا بس موقفك في المطار مع المحششه رهيب وش ردة فعلك لما تمسكت بلحيتك سامحني والله تقطع بطني من الضحك عليك سؤال :انت تلعب قمار ولا تمزح من كلامك مبين ماتلعب بس لما تقول خسرت كل اموالك ؟؟؟!! اتوقع عارف حكم القمار وان شاء الله اكون فاهمه غلط :)

  8. بصراحه جنوب افريقيا بلد روعه وانا سبق زرته قبل سنه تقريبا واللي كانت بدعوه من دكتور لي بالجامعه اسمه د.كولن ديفي بريطاني الاصل (اصبح اسمه بعد اسلامه سالم بن داوود) انا رحت مدينه اسمها بريتوريا تقريبا تبعد عن جوهانسبيرغ 60 كيلو متر . وزرت كيب تاون وجوهانسبيرغ وصن سيتي وسوينا رحلة سفاري بصراحه كنت افضل سفره لي بحياتي لانك في جنوب افريقيا ما تضيع وش تسوي او وين تروح . الناس اذا سمعوا بجنوب افريقيا يخافون ويحسبون مجرد ادغال وقبائل افريقيهع وهي بالعكس من اجمل بلدان العالم ومن اوربا بعد الشي الغريب اذا عندنا صيف عندهم شتاء والعكس اذا عندنا شتاء عندهم صيف لانها تقع جنوب خط الاستواء وكذلك الوضع في استراليا

  9. يعطيك العافيه والله ماقصرت اتحفتنا بالصور وهالزياره الرائعه ونعم الاختيار . اخوي بسالك تنفع اذا واحد توه متزوج يعني شهر عسل يروح لها ؟؟ وثاني شي حق اسبوعين مع زوجتك كم تكفيك تكاليف هالسفره ؟؟ وثالث شي عندي مشكله باللغه الانجليزية وهو اني مااعرف افك حرفين على بعض وش الحل يوجد مترجمين ولا مااروح ؟؟؟ اتمنى القى لاسئلتي اجابه وتسعفني لاني هالفترة جالس افكر بدوله بحكم زواجي يعطيك الف عافيه

  10. اخوي معاذ عصفور …< كذا اسمك اولا يعطيك العافية على التقرير الرائع الصور اللي مهب تفتح النفس الا تشرح الصدر خــــــــــــــــــــــــاصة وقت الامتحانات ثانيا الموقف اللي صار لك في المطار مضحك مبكي صراحة يعني لوها رجااااااااااال كان يمديك تفرشه على الارض و تسوي تمارين قفز على بطنه ثالثا اعجبنــــــــــــــي تمسكك بدينك الله يثبتنا و اياك رابعا و اخيرا زي ما قالت االاخت وجدان من كلامك فهمت انك تلعب قمار و العياذ بالله ....... اتمنى توضح لنا هاللبس اللي صار ايضا تحسرك على اغلاق الكازينو ...... وش تقصد بارك الله فيك جزاك الله خير لو لاتقااااااطعنا

  11. ما شاء الله تبارك الله روعة يا الغالي ,, بس حبيت أسألك كم سؤال ,, كم المدة اللي قضيتوها فيها .. ؟ و كم تقريبًا خسرت .. و كم معدل اسعارها يعني غالي ولا رخيص ولا عادي ,, و الحمد لله ع سلامتكم ,,

  12. لو سمحت ألي منك خدمه أبي تعطيني الشركة السفريات الى طلعت معها ولا أسم سواق يتكلم عربي لو سمحت أنا ودي أروحلها يس مو عارف الطريقه الله يرضا عليك

  13. الحقيقة ماتصورت ان جنوب افريقيال بهذاالجمال برغم أن الفقر ذابح الشعب لكن غني بالطبيعة والصور إلى شفناها في غاية الجمال الله يوفقكم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى