ذكريات بزر أصبح رجلاً (3)


السلام عليكم ورحمة الله وبركاته
بالخير يا الربع ويا الربعات … ومجدداً وافر الشكر والتقدير لجميع الردود
وبالنسبة لملاحظات البعض في الجزء الثاني فهي محل تقدير وإهتمام ومالكم إلا الي يرضيكم
نكمل معكم ما ابتدأناه


أول ساعة نت !

طبعاً كان فيه بداية إستكشافية وفيه بداية حقيقية
البداية الإستكشافية والي ابتكلم عنها الحين كانت بس عشان أشوف وش هالنت !
كان قريب من بيت أهل أبوي فيه مقهى نت
وحنا بالعادة نروح لهم مرة بالأسبوع .. وفي مرة من المرات كان واحد من الأقارب زايرنا ومرينا بالقرب من هالمحل ..
قال محمد قد جربت هالإنترنت .. قلت لا والله وش رأيك نجزم بعض
دخلنا وصار لنا هالموقف
وقبل ما أقولكم هالموقف .. صرت كل خميس أجي وأدخل النت
طبعاً في هاك الوقت كنت في ثالث متوسط يعني على عام 1419 ولمدة سنة بس أدخل مرة وحدة بالأسبوع الي هي يوم الخميس .. ولانيب أطول ساعة وحدة بس
عقبها فتح مقهى حولنا وبديت بالشات في 1420 إلى ان تبت من هالخربطة والشاتنق
ولا استفدت من الشات إلا إني صرت أعرف أكتب بسرعة وبدون ما أناظر الكيبورد
بدايتي بالمنتديات تقريباً ب2002 وهي الي اعتبرها بدايتي الحقيقية يوم عقلت وقالوا لي تراك بثالث ثنوي صرت رجال

أول ساعة نت في حياتي تظل أحلى ساعة لأنها شي جديد علي !

رحت لمحل هالنت أنا والأخ ودخلنا
قلنا لراعي المحل نبي ندخل الإنترنت
جاب لنا دفتر كبير وسجلنا أسامينا وتواقيعنا وأوقات دخولنا
وقالنا لازم تطلبون شي تشربونه بالإضافة إلى 15 ريال قيمة ساعة الإنترنت
المهم قلنا له جب اثنين شاهي [ إذا بغيت تقهر حقين هالمقاهي قلهم عطونا شاهي خ خ خ ]
المهم راح يجيب الشاهي وحنا أنا وهالدلخ جالسين على الجهاز ما ندري وش السالفة
يوم جاب لنا الشاهي قلنا له وين الإنترنت <<<< أحسبه يجي مع الشاهي
قالي أفتح الحرف الإنقليزي [ E حق الإكسبلورر ] المهم فتحته وجلست فترة وناديته
قلت له هالحين فتحت الحرف الإنقليزي بس للحين ما جاء الإنترنت
سألني أول مره تدخل إنترنت ! قلت أيه
راح وجاب لي ورقة فيها مواقع عربية وقال شف أي موقع هنا وأكتبه هنا ويجيك الإنترنت
المهم وقعت عيني على أول موقع بالقائمة الي هو موقع الجميح للمشروبات [ يلعن أم المسكة خخخخخخخخخخ ]
قلت للشيخ دوك الورقة وملني إياها
المهم جلسنا نص ساعه نكتب أسم الموقع يوم كتبت وخلصت أحتري الموقع يفتح بس ما فتح
جانا عقبها السعودي وقالي يا حبيبي إذا كتبت رابط موقع لازم تظغط عقبها إنتر
قلت له طيب شكراً وأنا حاطن أصبعي في أثمي همين رعصت إنتر وجلس الموقع يحمل
ما أمدى الموقع يفتح إلا وجاينا السعودي يقول وقتكم خلص
حتى صورة ببسي ما شفت
بس أروع ساعة نت بحياتي خخخخخخخخ
عاد عقبها بيومين جينا لنفس المقهى وأول ما دخلنا له قلنا عطنا الدفتر نوقع[ على أساس صار عندنا خبرة ]
همين قلنا له هات المنيو خخخخخخخخ حشى صار مطعم
وجلسنا ننقي في هالمواقع
طحنا على موقع أفلام سينما وبدينا نناظر بوسترات الأفلام
ولأول مرة أشوف بوستر فلم فيه صورة حرمة لابسة مزلط
الحمار الي معي يوم رجعنا علم أهلي وقال الإنترنت فيه صورة حرمة لابسة مزلط
ومير يحلف أبوي ما نطب الإنترنت وإلا يحش رجولنا حش


الفطامة وكم تضمن ونجٌم !

الي أبكتبه موب موقف وإنما مجموعة ذكريات عن طفولتي
من رابع إبتدائي إلى ثاني متوسط
ويمكن ماتعني لكم شي نهائياً أما هي بالنسبة لي فهي كل شي …..

الفطامة هنا أعني بها الفطامة عن الحريم !
موب الفطامة المعروفة وهي تعويد الطفل على عدم الإعتماد على الحليب كمصدر أساسي للغذاء
فطامة الحريم أقصد بها
يجيك وقت تدخل العصر مثلاً صالة بيتكم وفيه حريم زايرات عند أمك وتسلم عليهم عااادي
تجي بعد صلاة المغرب تبي تدخل الصالة وتذهل أن كل الحريم متغطيات عنك
كذا فجأة بين ساعة وأختها
هالموقف هذا لازم يصير لكل شاااب
وبعضهم يتضايق منه وبعضهم ماتفرق معه كثير

أنا طبعاً من النوع الي تضايقت منها كثير لسبب
لما نروح لخوالي بالقصيم كنت أحب كثير ألعب ورقة [ شدة ]
ألعب كم تضمن وألعب وش حكمك وألعب نجٌم
بالإضافة إلى المونوبولي والشطرنج والأونو والكيرم

وكنت شااطر في بعض هالألعاب كثييير لذلك كانوا الحريم لما يجون يلعبون لازم أكون في المقدمة معهم
فمتعود ألعب معهم عاااادي لمين جاء وقت الفطامة

فطامتي بدايتها كانت في بوووريدة
كان فيه جماعة مسيرين على خوالي
ويوم جيت عقب العشاء … كنت جالس بالملحق عند الرجال نادوني أهلي من داخل
وأثر وحدة من خالاتي تقول تعال فوق نبي نلعب كم تضمن
طلعت معهم ولعبنا وكان فيه ثنتين من البنات الي مسيريين على أهلي وأعرفهم كويس من الأقارب
يوم لعبنا وخلصنا ونزلنا للملحق وجو يبي يطلعون الجماعة
رحت لسيب الحريم على اساس بودعهم
لقيت وحدة من الي كانن يلعبن معي أول ماشافتني تغطت
قلت لها خيير وراك
قالت محمد خلاص أنت الحين صرت رجال ولازم نتغطى عنك [ هي أكبر مني بثمان أو تسع سنين ]
قلت لها وش هالغطاء المفاجئ ! من شوي نلعب كم تضمن وإنتي كاشفة
قالت أيه هذا قبل شوي بس الحين صرت رجال [ سبحان الله هالرجولة تلصق بالواحد فجأة ]
أثناء حوارنا الشيق وحدة من خالاتي طلعت من باب مجلس الحريم
وفي حركة دهاء ومكر عشان تسحب البزارين لداخل البيت من شان مايبلشون ضيوفنا الي طالعين وعشان مانتعلق بسياراتهم
قالت بصوت مسموع هيييييييييه الي يبي عسكريم توووت يروح للمطبخ … بسرررررعة قبل مايخلص
طبعاً المطبخ بآخر البيت
فرفعت طرف ثوبي وفحطت على خويتي منول وقلت أحوووووووووووح وهذي فحطة وأركض للصالة وأنطل وأخمس <<< بالله يا فلانة إذا إنتي تقرين لي هذا تصرفات رجال

وكانت هذي أول لحظة يتغطون فيها عني الحريم
وصرت عقبها لازم أقول يا ولد يا هيش عقب ماكنت أدخل دايركت في أي محل أبيه

أبرجع للألعاب الي ذكرتها قبل شوي لأني كنت مغرم جداً فيها
وحالياً وعقب طلعة البلايستيشن للأسف مانيب ألعبها نهائياً ما عدا الكييييرم

بالنسبة لكم تضمن كنت فيها لاعب حذر جداً لكن حريف
يعني تقريباً أسلوبي في اللعب زي أسلوب كوزمين أولاريو مع الهلال
كنت متحفظ وخواف لكن بالنهاية لازم أكون الأول
يعني لما تطلع لي أربع أكك هذي أكييد أربع ضمنات
لكن أربع شيبان هذي لها حالات كثير اذا واحد من الشيبان معه أكته فيصير مضمون
واذا مافيه أكك كل شايبين بضمنة
لما تكون أوراق الحكم عندي كثير أضمنها بعددها ناقص اثنين
لكن اذا كانت متسلسلة وكبيرة يعني أكة وشايب وبنت وولد وعشرة هذي أكييد مضمونة
بس لو يكون عندي أكة وشايب وعشرة وسبعة وستة أضمن ثلاث بس

وبالنهاية لما أجمع كل الضمنات وأشوف أوراقي صح وأقول شكلي بجيب ست ضمنات
أنقص منها أثنين وتصير أربع
صح خوااااااااااف لكن نادر جداً أطيح بالسالب
وبعد 15 لعبة دايركت أطلع الأول

خلوني الحين أفرد مساحة كبيرة جداً للعبة عشقتها وأدمنتها أسمها نجٌم

اللعبة هذي تتكون من أربع لاعبين … كل اثنين متقابلين مع بعض
فيها 17 ورقة ….. 16 ورقة منهم متشابهة
يعني مثلاً أربع أكك وأربع شيبان وأربع بنات وأربع عيال والورقة السبعطش تكون مختلفة مثلاً عشرة
طريقة اللعبة
أخبصي الأوراق سيدتي جيداً ثم قدميها للأخوان الأربعة بحيث كلن ياخذ أربع أوراق
والي يبداء عنده اللعب ياخذ الورقة الخامسة
الهدف من اللعبة أن كل فريق يجمع أربع أوراق متشابهة
ولما يجمع الأربع المتشابهة هذي لازم يحط يده على الأرض وفوقها يد خويه وأوراق خويه ويقولون سوا نجٌم
لكن اذا واحد من الفريق الخصم قطع عليهم وحط يده على الأرض قبلهم أو حط يده بينهم معناها اللعبة خسروها

تبداء اللعبة من الأخ الي معه خمس أوراق يمشي ورقة وحدة للي على يساره
وطبعاً الورقة الي تاصل للي على يساره المفروض الي استلمها مايمشيها للي بعده إلا بعد مايمر دور كامل على اللعبة

كنت أنا وواحد من خوالي دائماً مسوين فريق مع بعض
واللعبة هذي زينتها أن الشفرات مسموحة فيها موب زي البلوت

يعني مثلاً أنا وخالي
أنا جتني الأوراق ولقيت عندي ثلاث أكك وشايب
يعني باقي لي الأكة الرابعة
فأقول لخالي … يمدحون التمر يا خال هالسنة [ يعني تراني أجمع أكك ]
فهو يرد علي ويقولي والله بعد البقدونس يقولون زين [ يقولي ترا أنا أجمع العيال ]
أرد عليه وكم شريت صرة بقدونس يقولي ثنتين
أقوله لا يا ابن الحلال أنا عندي ثلاث كراتين تمر خلك معي بس
يعني أرسلت شفرة لخالي وقلت خلني أنا أجمع وأنت خلك ممسك

فكرة الممسك هذي أن واحد من الفريق يكون دائماً محتفظ بورقة من كل شكل ماعدا الورقة الي يجمع فيها خويه
يعني بهالحالة خالي لازم يخلي عنده حبة شايب وحبة بنت وحبة ولد والأكك يصرفها

بس اللعبة يبي لها ذكاء وذكاااااء عالي

خالي يقولي خلاص يا أبو حميد أي كرتون تمر يجيني برسله لك
فلما يجي عنده الدور يروح يرسل للي على يساره ورقة الولد
الي على يسااره مباااشرة يقول في نفسه بسسسسس محمد جالس يجمع العيال
لكن اللعبة الثانية خالي يرسل لي الأكة وتعدي على الي بجنبي زي السلام عليكم وناكله أكل

طيب إلى أن أقدر أجمع أربع أكك
لازم يكون بيني وبين خالي شفرة عشان أعلمه متى التنجيم
لأنه لازم أنا وإياه نحلت الأوراق بنفس الوقت

فمثلاً تكون بيننا شفرة
كل لعبة أقول له يمدحون الشرقية يا خال مارحت له
وكل شوي نقول نفس العباراة
لمين الفريق المقابل يتعود على هالعباراة ومايخاف منها ولا يحس نهائياً أنها عباراة تنجيم
طيب متى يعرف خالي إني أبي أنجم !
بدل ما أقول له يمدحون الشرقية يا خال مارحت له
أقول له مير يمدحون الشرقية يا خال مارحت له

وطقها أحلى تنجمية والفريق الي ضدك مفهي

طبعاً الشفرات ممكن تكون حركية
يعني أحك عيني اليمين أو أحرك أصبعي الإبهام
بس أنا وخالي مانحب إلا الجمل ومهبلين في أي واحد يلعب معنا
ودائماً شرط الي نلعب معه يقول لا تلعب أنت وخالك سوا …. ونرفض هالشئ طبعاً رفضاً قاطعاً


أبك أنا آكل حِـليب وباض !

فترة من حياتي عشتها بالمنطقة الشرقية وبالأخص في الدمام وبالأخص في حي ابن خلدون
سقا الله هذيك الأيام بس

طبعاً كنا عايشين في عمارة مكونة من عدة شقق [ أجل مكونة من عدة قصور ؟ ]
هالشقق هذي أشكال وألوان
حنا من القصيم الي قبالنا من الحساء فوق فيه من سوريا الشقيق وكمان من فلسطين
فيه عائلة من أهل الدمام

وكانن الحريم بهاك العمارة فيه بينهم جمعة وناسي هل هي أسبوعية أو كل أسبوعين مرة

وكنت أروح مع إمي للجمعة بحكم إني لسا قاصر …
في أحد الجمعات حصل لي موقف أهدر كرامتي أمام الجنس الناعم
وقبل ما أتكلم عن تفاصيل الموقف خلوني أتكلم لكم عن السبب

جارنا الحساوي اسمه بو علي
وولده علي أكبر مني بفارق قليل ..

مرتن من المرات جاء خال أبوي مسير علينا من الجبيل
المهم صلينا المغرب أنا وعلي وولد خال أبوي سعود
يوم جينا بندخل المسجد وإليا هاك الزكرتي الي مستحي يدخل ببكت الدخان معه للمسجد
فحطه وأنتم بكرامة عند نعاله
حنا استانسنا لقينا بكت وولاعة ! ماناقصنا الا بلاطة حشيش خخخخخخخخخخ
اخذنا البكت والولاعة وللأسف سحبنا على الصلاة بس بزارين هاك اليوم يا الله أنك تغفر لنا

كان عن المسجد من شمال فيه برحة واسعة وعن البرحة من غرب وملاصق لها محطة بنزيم
رحنا لآخر البرحة وجلسنا عند الجدار الي بين البرحة والمحطة
حطينا البكت والولاعة بالأرض
وناظرنا بعض

سعود : خن تتن بس
محمد : لا وشو له نتتن الريحة تصبغ ثيابنا والله أن يعلقني أبوي من كراعيني
سعود : أجل وش رايكم نشب فيها بس ونخليها هنا
علي : شنو نشب فيها .. موقدر أنا موقدر .. خطر خطر تشب فيها يمك محطة بانزين
محمد : ماعليك منه يا سعود خن نشب فيهن بس ونخليهن هنا
سعود : الظاهر تسذا
علي : ترا الله بوووعلم عليكم أبوي .. الي جالسين تسوونه خطر خطر
سعود : انقلع بس الله يرحم والديك

علي خلانا ومشى .. على طول قلت لسعود تراه والله جحة ويبي يعلم علينا قالي ماعليك منه
شبينا البكت كله وتعطرنا يا الله من فضلك ههههههههههههههههههه
ما أمدانا نخلص لياهم مخلصين من الصلاة قلت لسعود خلنا نروح البقالة ونشري ببسي دام أبوي وأبوك يدخلون الشقة

ويا للأسف .. أثر علي مبلط عند المسجد ويحتريهم يطلعون
اخذنا الببسي ونلطه لط وراجعين للشقة أثر من بعيد نشوف رجلين يمشون بإتجاهنا وجنبهم واحد صغير
ما أخذنا ثواني عشان نبين أنه هذا أبوي وأبو سعود
جلدونا جللللللللللللللد
ضربونا ضرررررررررررررررررررب

ومن زود البراءة نقولهم وراكم علينا وش فيكم ليش تضربون ؟
قالوا تتنون يا مال اللي … مابقى الا هي تشربون تتن
قلنا قسم بالله ماشربنا تتن والله العظيم شفنا واحد حاطن دخانه برى المسجد قلنا نبي نعاقبه عشان التتن حرام ونحرقه
تلقف الحساوي وقال لا تكذبون مو سعود من ساع يقول نبي نشرب زقاير
قلت له كل تبن تكفى وبعدين تراك يا اللي مسوي راعي دين للحين ماصليت والا نسيت اننا اخذنا البكت سوى وتركنا الصلاة ؟
هنا خالي وأبوي ولعت عيونهم ! بعد بعد تاركين الصلاة
وكملوا علينا ..

من يومها وأنا حاقد على هالحساوي وأتحين لهم الفرصة يغلط علي بس عشان أكوفنه
وجت الفرصة
جت جت
جمعة الحريم كانت هالمرة عند أم نسرين
رحت مع أمي كالعادة وجلست أسمع سواليف هالحريم وأراقب علي الي جالسن عند أمه وأنا عيوني كلها شرر من زود الشر
احتريه يغلط .. ماغلط
مريت من جنبه إيقالي بروح أشرب ماء من المطبخ ومير أوطى أصبعه
قال ويعه ماتشوف يا الدب

قلت بس جابك الله
مرد الكلب لقصابه .. هلا هلا

وش تقوووووووووول أنا دب ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
قسم بالله لا أربيك يا حيووووووووان أنا دب ؟؟؟؟؟؟؟؟؟؟؟؟؟؟؟؟؟؟؟؟

ومير تجي امه وتلقفه عني وتخليه وراها
وأنا ماغير هواااااااش
أنا دب يا خوااااااااف تعال ولا تغبى ورى أمك
تحسبني ضعيف وإلا منيب قوي ؟؟؟؟ ماتدري إني كل يوم آكل حليب وبيض ؟
قسم بالله لا أخليك تصيح تعال تعاااااااااااااال

وأمي تقولي اعقل اعقل
وأم نسرين سما الله عليها تقول من شاني خليه .. دخيلك أنا خليه
وبعدين ياحمودي هوا ماغلط بنوب .. عن جد أنت دب ومليان اسم الله حولك وحواليك

ومير التفت عليها وأقول حتى أنتي يا أم نسرين
مير على الطاري والله يا أنا حمار هاك اليوم ؟
الحين أم نسرين ماسكتن مع يدي وتقول دخيلك ودخيل عيونك خليه
وأنا معطيها أشكل
على الأقل لو أنا حاذف عليها البيجر بس [ عز البيجر هاك الأيام ]
بعذري هاك اليوم ما أفهم بالحريم ولا أعرف لهن
المهم نرجع
الحريم حاولوا فيني عجزوا
متفلت هاك اليوم متفلت ولا أبي إلا الحساوي أتوطى في بطنه

أم علي الله يهديها لعلها غفلت عن ولدها وأثره جاء يهدر هدير لمي
والله يا توطاني توطي يا جماعة الخير
والله يا هو لعن طاهر مافيني يا جماعة الخير

وطى برجله على غاربي وهو يهوش إذا أنت تاكل بيض وحليب أنا آكل تمر حساوي
أنا آكل خلاص تعرف شنو خلاص
قلت خلاص خلاص خلني يا ابن الحلال قسم بالله أتوب
وأنا مغير أصرخ أم نسرين دخيل عينك أنا يا أم نسرين
تئبريني يا أم نسرين الفزعة الفزعة
والأخ ماغير يهابد فوقي
أستأثم فيني الله يهديه ذاك اليوم

يا الله فكوه عني وبالقوة
عقبها وقفت وعيني مكسورة مهيض الجناح مستسلم تكاد الدمعة تنحدر من وجنتاي
وقفت قدام أمي وبصوت مبحوح قلتها يمه بروح لم أبوي
قالت لي بحنان الأمومة المتدفق قالت لي برحمة الأم الي شافت ولدها يتكفخ وهو قبل شوي يهايط
قالت لي برأفة الأم بولدها … طس فارق

طبعاً كل موقف يمر فيني لازم استفيد منه
استفدت من هالموقف إني أحترم أي رجل حساوي

وعلى فكرة عقبها مارحت لأي جمعة حريم !
وأمي كل ماجت منهم قالت أم نسرين تسلم عليك وتقول ماعاد شفناه


عرعر وثروتي التي زادت ضعف وثلث الضعف !

البعض ماعنده فكرة أن عوائل كثير من أهل القصيم عاشوا في عرعر
وبعض العوائل الآن رجعت للرياض أو للقصيم وبعضهم لا زال يوجد في عرعر وفيه منهم منهو متقلد مناصب حكومية كبيرة هناك زي محافظ رفحاء مثلاً أو وكيل إمارة منطقة الحدود الشمالية

عرعر هذي رحت لها ثلاث مرات على وقت متفاوت
وبهالثلاث مرات أجلس فيها أسبوعين

مرة رحت لها يوم كانوا عماني هناك … بس ما أذكر منها شي لإني كنت في أول إبتدائي
وأذكر أننا رحنا نحضر عرس واحد من عماني

المرة الثانية رحت لها وأنا في خامس إبتدائي رحنا زياارة لأهلي وجلسنا عندهم عيد الضحية كامل

والمرة الثالثة رحت لها وأنا توني مخلص إختبارات ثالث ثانوي .. كنت رايح أحضر عرس واحد من عمومتي

من المواقف الي أتذكرها في روحتي الثانية

كان جدي هاك الوقت له علاقة بوكيل الإمارة المهم وحنا فيه ذاك اليوم وكيل الإمارة
عزم جدي والعائلة المصونة على العشاء
كان فيه واحد من عمومتي أكبر مني بثلاث سنين أو هن أربع سنين
هو الي كنت أمشي معه على طول
يوم رحنا لبيت الوكيل دخلنا مع الحريم طبعاً
كان بيته هالوكيل ماشاء الله كبير وواسع وحوشة يتسابق بها الخيل
المهم تمشينا فيه أنا وعمي ودخلنا صالتهم [ كانوا حاطين العشاء بخيمة بالحوش ]
دخلنا الصالة ومير نلقى فيه صحن قزاز ومليااااااااان حلاااااااااو

طبعاً هذا منظر غريب علينا
بإعتبار أن أمهاتنا الله يطول بعمرهن لهن طريقة في الحلاو تسمى الخزن الإستراتيجي
يعني لا تفكر ولا تحلم أنك في البيت تبي تلقى الحلاو قدامك عيني عينك
أنواع المخابي بالبيت وأنواع التلفيز وأنواع الجحادة

يمه يمه موب كأن أم الجيران توها مرسلتن مع الأغراض ككاو ! .. لا لا يا وليدي ماكزت إلا قمصان روز وقطعة قماش لجدتك

ومهما تدور بالمغابي والملافز .. كل ما اكتشفت ملفز جديد وحسيت أنك حطيت يدك على الكنز
ماتجي من باتسر إلا والمغبى مغيرته أمك
والمشكلة ماشاء الله عليهن يخترعن أماكن ما تتصور نهائياً أنها ممكن تفكر فيه !
وإلا قد شفتوا وحدة تغبي الحلاوو عن عياله .. ومن زود النجاسة تغبيه بدولاب عياله
يعني تلقاك تحوس البيت كله وتدور وتبحثر وآخرتها تكتشف أنها مغبيته عندك
يا شين التحدي شيناه

نرجع على الحلاو الي لقيناه بالصالة
طبعاً وبكل حضارية وأتيكيت بدينا نقحش بهالحلاو لمين خلينا الصحن يصفر مافيه شي
وهجينا لأحد الحوشة الفاضية وخذ يا تقضيم حلاو
وكل ماخلصنا من حلاو ناظرنا بعض وقلنا ماشاء الله عليهم أثرياء هذولا من زود الثراء حلاوهم بصالتهم

عاد عقب سنين أكتشفت أن هالحلاو كيسته بعشر تريل يعني مامن زود

نفس عمي الي أقولكم
يوم جينا بننكس للرياض راح معنا لمطار عرعر على أساس يودعنا
فقبل ماندخل الصالة الداخلية بالمطار أخذته على جنب وقلت له الله ماقصرت يا عم خليتن انبسط بهالإجازة
ويا ليت تتقبل مني هالهدية بس أخاف تردني .. قال لا وش دعوى
طبعاً في هذيك اللحظة حيلتي بالدنيا كلها ثلاث تريل
فكنت ناوي أعطيه ثلثي ثروتي سواء من السيولة النقدية أو من الأموال المنقولة أو الغير منقولة
كنت ناوي أعطيه ريالين يعني
يوم عطيتهن إياه ناظرني بنظرة باسمة ورجع لي الرياليين وطلع من جيبه خمس تريل وقالي عاد يا محمد السنة الجاية لا تنسون تجونا
أنا من الخبة حبيت يده وقلت الله يجزاك خير ياعم الله يجزاااااااااك خير

******************

الموقف الثاني بروحتي الثالثة
طبعاً روحتي الثالثة عقب ماخلصت إختبارات الثانوية وكنت منتظر النتيجة تنزل بهالجرايد
لكن جاء وقت عرس عمي وسافرنا بالطيارة
وسبحان الله الأقدار تجيك تجيك
بالطيارة قريت الجريدة وشفت نتيجتي واهتزت الطيارة من هول النتيجة الي ضيقت صدري
الي غابنن وللحين
أن كل المواد درجاتي فيها حلوة ولله الحمد إلا الكيمياء
ولا نكبني إلا الكيمياء
الله يهدي مدرسها بس !!! مايعرف شي أسمه شرح
وزود عن كذا يبي يفتك منها غرقنا بالدرجات لمين قلنا بس
<<< داخل الإختبار حق الوزارة وهو معه 70 من 70 بالكيماء باقي بس 30 الوزارة
وإيقالك المدرس متوصي فينا خير ومعطينا ملخص قبل الإختبار ويقول يا شباب أنا أعرف أسئلة الوزارة من سنين طويلة مستحيل تطلع هالأسئلة خارج هالملخص الي عطيتكم إياه

ولا بارك الله فيه من ملخص
الظاهر جبت 7 أو 9 من ثلاثين المشكلة درجتها عن أربع درجات

نرجع لموضوعنا
رايحين عشان عرس واحد من عمومتي الي سبقنا وراح لعرعر قبلنا بيوم عشان يجهز أموره
فرحت لجدتي ومريتها البيت عشان نطلع للمطار
دخلت السيارة داخل الحوش عشان تركب لأنها الله يمتعها بصحة وعافية ماتنطح المشي
فأثناء ما كانت بتركب الشغالات ركبوا العفش .. العفش كله شنطتين
ولما جيت بمشي قالت لي عمتي الي ما راحت معنا لأنها هاك الوقت ثقيلة
يا محمد ترا الشناط مشكلتهن طقم ونفس الشكل وحدتن منها ملابس لعمك ووحدتن منها شنطة الذهب
وترا شنطة الذهب أثقل من شنطة الملابس لأن شنطة الذهب مانبيها تدخل مع العفش خوذوها معكم بالطيارة
قالت لها جدتي خلاص خلاص أنا أعرف أيهن الذهب

مشينا للمطار ونزلت جدتي بإنتظار الحريم وجيت وقلت له يمه وش رايتس نفتح الشناط ونتأكد أيهن الذهب
قالت لا وين نفتحه قدام هالحريم قرب الشناط لي وأنا أعرفهن
ومير تتشاقلهن وتقولي هذي شنطة الذهب خلها معي ورح لمهم ودخل العفش

ركبنا الطيارة وجدتي الله يطول بعمرها خامتن شنط الذهب بأقوى مايكون هههههههههههههههههه

يوم وصلنا لمطار عرعر مدري شلون نسيت آخذ الشنطة الي مدخلها مع عفش الطيارة !
طلعنا لبيت نسيبنا [ برضوو رجل وحدتن من عماتي ساكن بعرعر ]
ويوم دخلنا ودخلت جدتي وجاء عمي يسلم عليها وياخذ شنطة الذهب ويفتحها
وأثرها شنطة ملابس
وين الشنطة الثانية وينها
طبعاً أنا وجهي على طول قلب ألوان ألوااااااااان من جد
وجدتي الله يجزاه خير تحاول تطلعني برا الموضوع وتقول أنا الغلطانة أنا الي قلت له هذي شنطة الذهب
وعمي يسأل طيب وراك ماجبت الشنطة الثانية وراك نسيتها بالمطار
قلت والله العظيم ماجت ببالي قسم بالله ماجت ببالي

والمشكلة رحلتنا كانت على حدود عشر بالليل وكانت آخر رحلة مجدولة في مطار عرعر
يعني عقبها المطار يبي يصك

نسيبنا يعرف مدير المطار
اتصل عليه وقاله الموضوع قاله المدير الحين مانقدر نسوي شي
بس ابتصل برجال الأمن يتأكدون هل فيه شنطة بنفس المواصفات منسية بالمطار
وشوي ويدق علينا ويقول أن شنطتكم موجودة وبكرا بإذن الله أول ما أروح للمطار استلمها عندي بالمكتب

وطبعاً والحمد لله وبتوفيق منه استلمناها من بكرا الصبح
وطلعنا من موقف كاد يودينا بداهية
خصوصاً محاتسيكم


إلى هنا أيها الزقرت والزقرتات تنتهي سلسلة ذكريات بزر أصبح رجلاً
والتي أصبحت السلسلة الأولى مبيعاً حول العالم
وش حيث مكتبة جرير يكذبون وأنا لا ؟ كل كتاب ينزلونه يكتبون عليه الأول في عدد المبيعات
أنا مدري إذا كل كتبهم الأولات بالمبيعات من المركز الثاني ؟

عموماً
أتمنى تكون هالمواضيع خفيفة عليكم
وبإذن الله ألتقي معكم قريباً في الموضوع الذي أصبح الأول مبيعاً في العالم
<< يا شين البزر إذا حفظ له نكتة ! يبتل يقولها

أشوفكم قريب جداً
شاكر ومقدر لكم هالتواصل وهالمتابعة

كتبه وحرر ورصده وأملاه وراجعه
الفقير إلى عفو ربه
بيالة بن شاهي المكنى بأبي عبدالله


تعليقات 34

  1. بصراحة أخ بو عبد الله ذكرياتك رائعـــة وممتعـــة للغايـــة والأروع أسلوبك وطرحك أتمنى لك التوفيق والنجااااااح وشكراااااااا

  2. :$ الحساوي لعن ابو مرسولك اجل :$ ابو عبدالله والله يامقلع فيرست ون انت هههههههههههههههـ مدري على اي سالفه اعلق لكن السكوت ابلغ من الحتسي :>B نشوفك إن شاء الله بذكريات بزر اصبح رجلاً (4) سي you

  3. شي والله شي — تعليق بسي :- اهل الحسا ما يتكلمون كذا علي : شنو نشب فيها .. موقدر أنا موقدر .. خطر خطر تشب فيها يمك محطة بانزين صح :- شنو نشب فيها .. ما أقدر ما أقدر .. خطر خطر تشب فيها علي : ترا الله بوووعلم عليكم أبوي .. الي جالسين تسوونه خطر خطر صح :- ترا والله بعلـم عليكم أبوي .. اللي جالسين تسونه خطر — والباقي شي زي ما قلت

  4. كل يوم على الساعه 12 وربع عندنا فـ الإمارات أفتح الإيميل و أقرى اليوميات هيهيهيهيهي ، و الله يآ إنهـآ لك وحشه يالسعودية الموهيم ، سالفة الحساوي أغرمت فيها آنـآ اظن شغل الهياط مآ ينفع معه و الأخ الكريم قافلتنْ معه وما عنده وقت ، تسلمْ على هيك يوميات و نحتري الجزء الرابع . . كانت هنيه . . –> لوول إماراتية عناديشين

  5. بصراحة روووعة وأنا أول مرة أكتب تعليق ومن النوع الللي موأي شي يضحكني لكن ماشاء الله عليك أسلوبك ولهجتك في سرد المواقف خلتني أضحك من قلبي …. وماأقول غير الله يوفقك ويابخت أهلك عموما أهل القصيم ما في مثلهم

  6. اخ بياله بن شاهي القهوجي: صراحه اسلوبك جنان انتظر مبزرتك (4) بشغف اختك : الحزن الناعم

  7. 🙁 انا كرهتن الحسا بكبره من بناتهم وعيالهم الشياطين والمشكله ان اهلهم يدافعون عنهم حتى اذا كانو غلطانين .. الله يوسع صدركـ بالعافية :$

  8. :$مرحبا الف شكرعلى الذكريات الجميله اسعدتنا والاسلوب الرائع المشوق تسلم ايدك وننتظرالجزاء 4بفارغ الصبر وانت احسن من كتب جريرههههههه تقبل تحياتي

  9. هاي بياله شاي قسم بالله انت صراحه شي غير طبيعي ابداااااااع اول مره اتابع بشغف واول مره تزغلل عيوني من كثر مادورت على مكان الردود عندي حماس ع الرد الله يسعدك وبانتظار اصدارك الجديد

  10. هههههههههههههههههههههههههههه وربي انت فلللللللللة ههههههههههه بانتظاااااااااااااااااار جديدك لاتتأخر علينا 😀

  11. أنا تابعت كل السلسلة الأكثر مبيعا في الأسواق والله دوب ما أفتح الأيميل وأشوف بيالة شاهي يركض أصبعي ويفتحها قدام كل الرسايل وعيوني بعد كل بزرنه تقطر دمعا إن شاء الله تزداد السلسلة طولا يوما بعد يوما يوفقك ربي …

  12. ههههههههه حلووه بس ترى اهل الحسا طيبين وحليوين لاتاخذ عنهم فكره انهم شيوون … ههههههه والالعااب اول مره بحياتي اسمع عنهم تضمن واكه ونجم ؟؟ بس شكلهم حلووين هههههههه ننتظر الجزء الرابع ..

  13. بعد ما لمست تجاوب من قرأ الذكريات وأعجب بها أتمنى أنك تفكر في طباعتها في كتيب يكون في متناول الجميع …أنا متأكدة إنه بينجح وبتحقق إن شاء الله ثروة لأن فعلا عندك أسلوب في الكتابة سلس ومضحك بشكل رهيب وطريقة وصف المشهد تحسسّنا إنا كنا معاك وشايفينك ماشاء الله عليك ولا تنسى التوزيع يكون في مكتبة جرير ووقتها بجد بيحقق أعلى مبيعات وبيكون رقم واحد …لأن الناس ترى تحب الوناسة البسيطة اللي تلامس حياتها بدون تكلف.. أتمنى تكتب رأيك في التعليق.

  14. الصراحه والله انك زاحف ايام الطفوله عاد تصدق فيه مواقف تقولها مهنا ذاك الزود بس اسلوووووووووووووووووبك الصرااااااااحه اهنيييييييك يشد وبقووووووه لا يووووووقف ويارب تتذكر لك كم موقف وتسوي الجزء الرابع يعني من جد انا ما اواطن القصمان ماحببني فيهم الا انت

  15. فللله بزر عاد هههههههههه … لعبة نجم= لعبة فواكه عندنا البنوتات الباقي ماعرفه بس ماقصرت عرفتنا عليه الله يعطيك الف عافيه اما الفطامه خخخخخخخ نكته ياسلاام على مذكراتك الاكثر مبيعا الله يوفقك ننتظر جديدك

  16. اوووما قصت النت فهى مشاابهه لقصتى يا ابو عبدالله ذكرتنى بالذى مضى:( تسلم على المذكرااات الحلوه ونحترى جديدك ولاتهون شبكة ابو نواااف تراكم احرجتونى بالارقام اللى فى الصوره دااايم ارقام مميزه

  17. والله مذكرآآت خطييييييييييرره ، أسلوب رآئع استمر وننتظر جديدك بشغف:):)

  18. المهم جلسنا نص ساعه نكتب أسم الموقع يوم كتبت وخلصت أحتري الموقع يفتح بس ما فتح جانا عقبها السعودي وقالي يا حبيبي إذا كتبت رابط موقع لازم تظغط عقبها إنتر هههههههههههههههههههههههههههههه هههههههههههههههههههههههههههههههههههههه هههههههههههههههههههههههههههه والله يابو عبدالله اني دمعت من الضحك تصورتكم تحترون الموقع يفتح 😀 موضوعك كله يحتاج اقتباس وتعليق وسعت صدري بهالعصريه الله يوسع صدرك وبالنسبه للسلسله نبيها تدوم والدوام لله ننتظررك وبشغف :D:D

  19. أبو عبدالله .. ياحبيلك الجزء الاول والثاني ((خيال)) لكن الحين هالجزء ماله طعم .. تلقى قطتين -سالفتين- حلوات والباقي حشو .. شف انت ذكرتن بمنتجين فيلم saw .. الجزء 1 روعه الجزء 2 اقل روعه الجزء الثالث بلا روعه الرابع ضعيف الخامس وهو بين يدي الأن فاشل … فأتمنى أن لاتصل إلى هذه المرحله .. ][ الجزء الاول نزلته على جوالي (ملاحظات) كل الشباب يدعون لك ومنهبلين عليه ][

  20. إذا أنت تاكل بيض وحليب أنا آكل تمر حساوي أنا آكل خلاص تعرف شنو خلاص قلت خلاص خلاص خلني يا ابن الحلال قسم بالله أتوب

  21. اخوي من وجهت نظري ان الجزء الثالث هو افضل جزء وانا اشيد بالكاتب بياله شاهي على الطرح السهل المضحك وانا اخالفك الراي بالنسبه لتقيمك للاجزاء .. انا اقول ان الكاتب كتب هذه السلسه بالتدرج يعني الجزء الاول حلو وبدايه رائعه بعدين الجزء الثاني افضل منه بتغيير اسلوب المواقف والم الكاتب في تفاصيلها .. اما الجزء الثالث فهو الافضل بكثافة المواقف الطريفه والممتعه انا عن نفسي اطلب من الاخ بياله المواصله على هذا الطرح الاكثر من رائع واطلب من الاداره دعم هذا الكاتب اللي تابعناه من عده مواقع ودمتم .. 😀

  22. :D:D:Dياسلام عليك والله يانت ذكرتني بالماضي الجميل ياشيخ روح الله يسعد ايامك

  23. آآآآآآآهـ ياتسبدي تسبدآآآه دموعي عينت من الضحتس خاصتن عسكريم التوووت عشان ماتعنقطوون بسيآراتهم ههههههههههههـــــــــ ذكرتني بأشيأء نسويها وحنا صغار والله ياهي تفشل هههههههههههههههه عليك اسلوووب بسم الله عليك مــمـتع تسنك جدي لابدى يحتسـي علينا 😀 على كثر مااشوف من الموضيع بشبكه ابو نوآآف وربي مارديت ولا رد الا مرتين الاول بجزئك الثاني … والرد الثاني هذا 8) وهذا يدل ع اسلوووبك الشيق والممتع 🙂 تكفىىىى وآآآآآآآآآآآآآآآآآآآصــــــــــل ^_^

  24. :Dهههههههههههههههههه:D ذكريات حلوه وكنت اتمنى تستمر في كتابتك لها والله توسع الصدر ومن دق الوصف اعيش جوها انتظر جديدك يااحلاااابياله شاهي

  25. خطر خطر .. ههههههههههه يا عليك قصة روووعة .. ضحكت إلين تقرفصت <<<<< ما لها دخل !

  26. الله يوسع صدرك مثل ماوسعت صدري كنت تعبان وحالتي حالة ويوم قريت ذكرياتك ياضحكت ضحك وانبسطت كثير

  27. ربي يوفقك ويسعدك ويوسع صدرك بالعفو والعافيه << أجل أم نسرينB دخيل الله حووط لنا متل هالمواضيع بالشبكه حموودي8) سلااامي لماما وكوووول تمر حسآوي خلاص خلاص ..!:$

  28. خفف شوي تسذب تقول ان مقاهي النت فاتحة من عام 1419 ما شاء الله التسذبة قوية شوي . وخاصة ان النت ما عرفوه اهل الرياض إلا بعد هالفترة بسنتين ..

  29. ههههههههههه لك من آجمل تحيه محمله بآلفسستق والحمصص .. وآآصل رعآك المولى << يقولون انه وطني بزيآدة ^_^ يصصصلمو

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

ذكريات بزر أصبح رجلاً (3)

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول