ذكريات بزر أصبح رجلاً (2)



السلام عليكم ورحمة الله وبركاته
وأرق تحية وأعطرها إلى جميع أعضاء القروب الكويس وعلى رأسهم الهرم الإداري
نكمل معكم سلسلة ذكريات بزر أصبح رجلاً << منتب عاقل يا بريزون بريك على هالسلسلة

الجزء الأول كان على هالرابط


اعلان





والي نجح الجزء الأول التواصل الكويس سواء بتعليقات الموقع أو التعليقات الي جتني على الإيميل
وأشكر الجميع على التواصل


أييييييييييه أثره البزر !

بالنسبة لخوالي فأنا أعتبر أول حفيد فعشان كذا طفوا بي طفة مالها أول ولا آخر
واللي زاد من هالطفة إني يوم جيت لهالدنيا كانت أصغر خالاتي عمرها 5 سنين .. فمن زمان ماجاهم بزر !
عكس عمومتي … كنت لهم ثالث حفيد

سالفتي هالمرة عن غيرة أصغر خالاتي مني !
وطبعاً كل هالتفاصيل لازال خوالي يتناقلونها كسوالف من الذاكرة والزمن الجميل

أول ماصارت أمي بالنفاس وراحت عند خوالي ببريدة اختبوا الخوال واخترشوا
وتغير الجو على الأميرة الصغيرة خالتي الي كانت إلي قبل ما أجي بشوي دلوعتهم
لكن جيت أنا وسحبت كل شي …….

من ضمن الطرف الي تسولفها لي أمي وخالاتي
أن جدي كان يجي ويجلس عند أمي العصرية وبهالوقت يتصل هو على أمه [ الي تصير جدة أمي ]
لأنها بمنطقة بعيدة عنهم ويومياً يتصل عليها شلونتس يمه عسا مامن خلاف
وهي تسأل شلون الحميدي ولدي عساه بخير
<< الحميدي

عاد جدي من باب الدلع وش يقولها !
أبشرتس يا أميمتي الحميدي بخير وتراه اليوم راح معي لمخابز السلمان وجاب هاك الخبز الي يهبل
مباشرة خالتي الصغيرة وش تقول !
تطلع لسانها بدافع الطنازة وتقول أيييييييييييه تساد يا ربي أقول الخبز اليوم يتفتت أثر البزر جايبه
إتصال ثاني ومرة ثانية شلون ولدنا الحميدي
أووووه أبشرتس يمه اليوم ماشاء الله حلب لنا من البقرة هاك الحليب الي ماودك إلا تشربينه
خالتي تطلع لسانها أييييييييييييه وأنا أقول وراه الحليب محمض اليوم ومامن طعم أثر البزر حالبه
إتصال ثالث شلون الحميدي
أبشرتس يمه بخير حال وترا اليوم خبرتس عقب العج الي جانا ببريدة مسك المشطفة محمد وبداء يغسل معنا
خالتي كلاكيت ثاني مرة تطلع لسانها أييييييييييييه الله لنا هالبزر جالسن يرضع بالمقلط ويزق على حفاظته وأنا يحووولي ماسكتن هالمشطفة وأكرف واسمي مايذكر أيييييه بس

هههههههههههههههههههههههههههههههههههههههههههه
هههههههههههههههههههههههههههههههههههههههههههههههههه ههه

وعلى هالحال
شنت الحرب علي من يومي رضيع
عاد هاك الوقت أبوي يوديينا بالصيف وبعيد الضحية لمهم
والبنت كل مالها وتزيد غيرة لمين قررت الإنتقام
[ موسيقى هادية ثم فجأة تأخذ بالإرتفاع كناية عن كمية الأكشن ]

في أحد ليالي الصيف وكان عمري أبو ثلاث أبو أربع
جتن خالتي الصغيرة وقالت محمد قوه ألعبك سيكل
أخذتني وطلعتني من المقلط على مجلس الرجال على الحوش الي يطل على مجلس الرجال
أول ماتطلع من مجلس الرجال بينك وبين الحوش سلم فيه خمس درجات
قالت لي أركب السيكل وأنا على نياتي
وبأقوى عزمه دفت السيكل ومع الدرج وهببببببببببببببببا على الحوش
طبعاً جيت على خشتي وطحت
وهي على طول أول ماشافت الدماء تسيل خافت وهجت
من حسن حظي هاك اليوم أكبر خوالي عقبها بشوي هو الي دخل من باب الشارع ولقطني وعلى طول لمستشفى التخصصي
والنتيجة فلقة في الجبهة لازالت آثارها إلى اليوم
وكسر بالأنف ولا زال أنفي حتى كتابة هذا الموضوع فيه ميلان بسيط جدا
يمكن مايلاحظه إلا اللي يدقق زين
وعشان أكون واضح خصوصاً للأخوان الي قابلوني ولا يمكن حسوا بالميلان

تشوف عيني اليمني ! وأنت نازل منها على خدودي والجبهة صايرة بظهرك
امش شوي عد ثلاث حبات خال بعد الثالثة ناظر يسارك تلقى خشمي كل شوي يقرب
هذا قصدي بالميلان
أو خلك من هالوصف خلك منه
تشوف عيني اليسرى وأنت نازل منها ورايح لخدودي وبرضو الجبهة صايرة بظهرك
اذا مشيت لك شوي عد لك خمس حبات خال بعد الخامسة [ لعنبوا إبليسك مزرعة حبات خال ؟ ]
بعد الخامسة تبي تشوف خشمي كل شوي يبعد عنك ويروح يمين

أو خلك من هالوصف خلك منه وخذ وصف أوضح وأزين

وأنت واقف على كرشتي ومخلي سري بظهرك وطالع فوق فووووووووق
تبي تقابل طعوس طبعاً يمينك ويسارك خلك منها
المفروض اذا دعست على طول فوق تصكك نخرتي على قولة أهل الجنوب
لكن المفأجأة أنك تبي تدخل في أحد فتحات التكييف .. وهذا الي أقصده بميلان بسيييط

أخاف عقب تحسبون خشمي مايل صدز مثل خشم بعض الناس
لا لا
فيه ناس خشمهم وأنت نازل من عيونه تبي الخدود تقابلك لوحة مكتوب عليها انتبه منعطف خطر

نرجع لسالفة السيكل
الحمد لله سوو لي كم غرزة وثبتوا الخشم ورجعت للبيت
إلى الآن محد يدري شلون طحت ! وأنا ذاك اليوم تعباااااااان والظاهر نمت ومالي خلق
فحسبوني إني أنا ألعب وطحت
بس بعد كذا ساعة فقدوا خالتي الصغيرة ! وينها وينها
وبتلوا يدورون
يقولون لقيناها متغبية بحمام السطح
وجالسة ورا المغسلة
وترتجف ترتجفففففففففففف

قالوا لها وش فيك !
قالت والله العظيم موب أنا الي دفيته
قالوا لها منهو ؟
قالت والله العظيم كنت واقفة ورجع هو بسيكله وضربني على ركبتي وطاح [ بالله يا شيخة ؟ خ خ خ خ ]
منهو يا بنت الحلال !!
محمد محمد والله مادفيته
أيييييييييييه تعالي تعالي بس ليتس مافضحتي روحك !
للفائدة انتبهوا تدلعون لكم صغير وحوله واحد تحسون أنه ينغر
وزعوا الدلع بينهم وإلا ترا خشمه يبي يميل


محمد العزيٌز والليل الذي لايراه سواه !

هالمرةالموقف لأحد الزملاء
هذا ولد حارتنا وزميل الدراسة ولا يزال حتى الآن بنفس الحارة
أسمه محمد عبدالعزيز الفلاني ومن باب الميانة ندلعه محمد العزيٌز << لا عمرك تدلع

يقول محمد العزيٌز أنه في أحد المرات وهو توه بادي يتعلم الصوم
جاه ولد عم له من القصيم وجلس عندهم كم يوم برمضان

محمد العزيٌز تعال تكفى دوك الكيبورد مانيب فاضي كل شوي أقول ويقول محمد العزيٌز
تعال قلها لهم أنت بنفسك

محمد العزيٌز يتحدث

يوم جاء ولد عمي وجلس عندنا أسبوع بيوم ثالث قلت له وش رأيك بكرا مانصوم
قال ميخالف بس أخاف أهلك يدرون
قلت لا ماعليك نبي نتغبى عنهم
وجلسنا نفكر بأماكن مستحيل أهلي يمسكوننا فيها
وصفى إختيارنا على الملحق
من حيث أن أهلي بنهار رمضان مايطلعون للحوشة أبد
وأيضاً الملحق ساترن لنا عن الجيران لأن قدامه شجرة عبرية وش كبره

رحنا بالليل للبقالة وأخذنا بباسي وسفن وككاوات
ووزيناهن بالثلاجة الفوقية
يوم صلينا الظهر وتأكدت أن أبوي دخل لغرفته ينام تسللنا وأخذنا غريضاتنا وطلعنا على سطح الملحق
وسمينا بالله وضربنا بهالأرزاق
لمين وصلنا لآخر حبتين ككاو
كانن باونتي ومارس

جيت أباخذ المارس آخذه ولد عمي وقالي خذ أنت الباونتي
قلت له طيب مانيب أحب الباونتي قال وحتى أنا بس دبر عمرك
قلت له خن نتقاسمه يا مال الصلاح وأعطيك شوي باونتي وتعطين قطعة مارس
قالي لاااااااااا أحد قالك تشتريه
يقول بدينا نتهاوش وصوتنا يزيد وشوي وإلا نتجالد بس ستر الله
أثناء الهواش فتح أبوي دريشة غرفته الي تطل على الملحق
وقالنا خييير وش عندكم

أنا على طول قلت له يبه بقى معنا واحد باونتي وواحد مارس
وهو يقولي خذ البانتي وأنا ما أحبه … وزيادة على كذا يبه معيين يقسم لي شوي مارس وأعطيه شوي باونتي
التفت أبوي على ولد عمي وقاله وراك ما تقاسم أنت وإياه
قاله ولد عمي يا عم أمس بالبقالة قايله لا يجيب باونتي مانحبه بس هو عيا

مير يقول لنا أبوي طيب أنزلوا عن سطح الملحق وتعالوا للحوش أحل الموضوع بينكم بدل ماتزعجون الجيران

أول ما نزلنا وشفناه بالحوش جيت أبمد له المارس والباونتي وأقوله الموضوع
مادريت إلا وهو تالنا مع ثيابنا ورافعنا فوق أنا وولد عمي [ عاد أبوه الله يرحمه عصبي ]

قالنا يا عيال الكللللللب مفطرين بنهاااار رمضان
ومفطرين عيني عينك لا تخافون من الناس ولا تخافون من ربكم
لا ويا السمرمد المشكلة أنك طالعين على سطح الملحق يعني كل مالكم تقربون من ربكم ولا خفتوه [ مشكلة الي مادرس جغرافيا صح ]

يقول محمد العزيٌز جيت أبصرف الموضوع وأبهدي الوضع
ناظرت أبوي وأنا عيوني تدمع وقلت يبه قسسسسسسسسسم بالله نحسب أننا بالليل <<< أبو عزيٌز لا عمرك تصرف تكفى

عاد يقول أبو عزيز ليتي ماقلتها مير أبوي من أول أرحم ماغير رافعنا فوق الأرض
يوم قلتها خمط بي الأرض وبدى تشويت

بالليل يا ثووووووووور بالليل
لعنبوا إبليسك الشمس صاكتك صك ومخليتن مقفى ثوبك كله عرق وتقولي بالليل

أندزلع لعنبوا الي أنت ولده
أندزللللللللللع


أكلم واحد بالصفراء قسم بالله !

مرة خوالي رايحين يسلمون على خالة أمي
طبعاً بيت خالة أمي ماشاء الله وسيع خصوصاً الحوشة
وفيه جزء كبير من الحوش فيه غنم ومعزى وبقرتين …
بالإضافة إلى الزحاليق
فلما أروح هناك بالعادة مانيب أمل أو يضيق صدري
يا تلقاني ألعب بهالزحاليق مع البزران
أو أطب في حوش البقر وأحارشهن وأركض وأطلع [ هوايتي المحببة على فكرة ]
أو ألعب في هالغنم والمعزى وأضحك عليهن

لكن في هالروحة بالذات مالي خلق لا بقر ولا غنم ولا زحاليق
دخلت مع أهلي للبيت وجلسنا عند خالتي همن بدى عندي طبع الشرافة وقلت خن أتمشى بالبيت
رحت لقسم الرجال وبديت أوايدز لمين شفت لي تلفون بمقلط الرجال
وقسم الرجال بالذات إذا كان أبوهم موب فيه هاك اليوم محدن يدخله [ أبوهم ماخذ ثنتين ]
فقلت فررررررصة
مسكت التلفون وبديت أدقدق على الرياض
كل شوي أدق لي على بيت ويقفلون بوجهي …
لمين رد علي هاك البزر والظاهر أخلاقه قافلة مثلي ولعلنا لقيناها لعبة

طبعاً بدت المكالمة بهواش بزران
من هو بيته ! يقولي أنت الي داق ! قلت من زينكم خايف على أسم عايلتكم من بيته هذا
قالي تبي تعقل والا عطيتك بقس ماصلى على النبي
قلت أتحداك
ثمن بصوته يعطيني بقس زي كذا >>>> دردووووووووووووووووووووووف
همن أرد عليه قدها يوم تسوي هالحركة ! أيه أيه قدها تخوفني أنت
طيب طيب أمسك هذا بقس ملعون والدين طرططططططططططططططوووودودودودف
همن يرد علي طيب أوريك أويك أمسك هذا بقس أخلاقه بطرف خشمه
.
.
.

وهكذا دواليك
كل شوي واحد يعطي الثاني بقس
وتحولت المسألة لعبة .. قانونها الوحيد أنك لما تعطي الثاني بقس لازم مايكون مكرر
يعني ماتعطيه بقس من نوعية بقس أخلاقه بطرف خشمه .. وهو من شوي قايلك إياها

فصارت اللعبة بمرور الوقت تزداد صعوبة
وأنواع البقسات تزداد تعقيداً
حتى وصلنا إلى نوع مثل
دوك دوك هذا بقس قاله مدرس القواعد حل سؤال 4 صفحة 25 ويوم راح للبيت شاف
أن هالسؤال صعب وقال خلني ألعب على المدرس وأحل السؤال 3 صفحة 25 وأقوله مادريت يا أستاذ عاد يوم راح للمدرسة وشافه المدرس قاله موب هذا السؤال الي عطيناك إياه قال أيه أيه
بس أنا يا أستاذ نسيت وسجلت بسجل الواجب سؤال 3 قاله المدرس طيب أفتح السجل يوم فتح السجلأثره كاتب في السجل سؤال 4 قاله المدرس وتكذب بعد ! وقام المدرس وضربه بقس .

عاد أنا على الطرف الثاني من المكالمة أسوي روحي منسدح ومغمي علي وهو يقولي وش فيك وش فيك
قلت يا أخي بقسك كله عنف
وش الإجرام هذا قسم بالله عنيييييييييييف ويرد علي توك ماشفت شي يله دورك دورك عطنا بقسك

طبعاً بقسه السابق حق المدرس وسؤال 4 لو تلاحظون أنه بقس معقد جداً لأنه أحتوى بقس داخلي الي هو بقس المدرس داخل البقس الأصلي
يعني بقس مايخرش الميه إن فكيت روحك من البقس الأول جاك البقس الثاني

بتلت أنا وإياه نتميصل !
ظني كملنا ساعة بالراحة على التلفون
فجأة وإذا ببنت خالة أمي دخلت المقلط عاد والله ياعليه لساااااااااان ويا عليه يد اذا ضربت
أنا على طول قفلت السماعة

محمممممممممممممد وش عندك هااااااااااااااااااااااااه وش تسوي بالتلفون قلللللللللي وش تسوي [ وهي تمعط آذاني ]
قلت والله يا هيول قسم بالله جالس أكلم على واحد بالصفراء [ طبعاً بيتهم بالرفيعة ]
قالت وجججججججججججججع يوجعك بالصفراء يا اللي مانيب قايلة ليته بالقاع البارد وإلا الهدية نقول أشوى شوين بالصفرااااااااااااااء يا تببببببببببببببببببببببببببن

أنزلع لأمك أنزززززززززززززززززلع [ وهي تعطيني واحد خقلة وصلحوووو ]

طسيت أركض ركيض أبي أمي وعيوني أربع أربع وأقول في نفسي شلون لو تدري إني جالس أكلم واحد بالرياض .. لا ولي ساعة أكلمه …

الفائدة : لامنك بغيت تكلم بتلفون موب لك .. لا تنسى تقفل المقلط


صقـيـقـتي قوه قوه بس !

كل مراحل التعليم قضيتها في الرياض باستثناء المرحلة الابتدائية قضيتها على ثلاث أقسام
قسم في الرياض وقسم في الدمام وقسم في بريدة

التمهيدي درست هنا في الرياض في مدرسة أهلية أسمها أنجال الرياض الي في حي الربوة
عن ملاهي الحكير جنوب شرق
بس أشوف لها كم سنة مبدلين المدرسة بمتوسطة بنات
من ضمن المواقف الي صارت لي فيها .. موقفين مستحيل أنساهم
أولهم
واحد من الطلاب أسمه يزيد .. ومن نفس ديرتي وبيني وبينه علاقة نسب من أحد العجز
في يوم من الأيام يزيد بدون مايدري سواها على نفسه
ولاهيب على ماقال شغل خفيف الرجال سوا على نفسه شغلن ثقيل
أدود فينا وخيس بالفصل
ومير المدرسة تنادي مسؤولة النظافة وتلقطه من بيننا وتغسله وتنظفه وترش عليه من معطرات المنزل ..
عقبها على طول طلعتنا المدرسة لغرفة فيها فيديو ونجلس نناظر
دخل علينا يزيد يلق وجلس حولنا
ببراءة الأطفال نسأله .. يزيد غريبة الحين مسويها على نفسك وريحتك تهبل !
يقول أيه وش تحسبون إني مثلكم أنت وإياه ..

الموقف الثاني
تخبرون التمهيدي خليطي
وكان الصف هاك الوقت طريقة ترتيب الطلاب تحث على العربدة والفسق
كل واحد جنبه وحدة
يعني يا حمااار يا طالب جبنا البنت لحد عندك .. أنت وشطارتك عاد
كان فيه وحدة عن يميني ووحدة عن يساري اخترت الي عن يميني وصرت لها صديق
وياويل أحد يقرب لها وياويلها تلعب بالمراجيح مع غيري
صارت صقيقتي الروح بالروح
مرتن من المرات قالت لي بروح اشري لي فسحة وبعدين ارجع لك عشان نلعب تبي شي يا بعدهم
قلت مايامر عليك عدو حبة ريكو الله يسلمك
رجعت لي وهي دموعها أربع أربع خير خييييير وش فيه
قالت إدارية المقصف شريت منها سندويش وعصير وفيشار
ونسيت أجيب لك ريكو وانا مامعي إلا ثلاث ريال قلت لها برجع الفيشار وآخذ ريكو عيت علي
طبعاً بهالموقف أنا البوي فريند ولازم أكون حمش وأدافع عنها
قلت قوه قوه أهوشها لك
دخلت المقصف لا أحم ولا دستور وأنواع الصراخ وش فيتس وراه ماترجعين لها الفيشار
قد شعرتوا بإحساس لما يجيك بزر بزقه طوله ربع ذراع ينفخ عليك .. موب صح ودك تشوته بووز !
هذا الي سوته الإدارية
فحبيت ألطف الموقف مسكت يدي صديقتي وقلتها قوه قوه بس للمراجيح قبل ماتصير زحمة

الفائدة : إذا ماودك تتفشل قدام صديقتك لا عمرك تقولها اشري لي ريكو


وإلى هنا ينتهى الجزء الثاني تسمحون لي أمطط الدعوى شوي ونقول جزء ثالث !
بس بإذن الله الثالث يبي يكون آخر جزء ويمكن أمدد جزء رابع يمكن موب أكيد << يحط له خط رجعة


تعليقات 40

  1. اجل مزرعة حبات خال وش ذا الوجه الله ياخذ عقل ابليسك ضحكت ضحك ههههههه وربي فله موضوعك وبغيت اقولك شي لاعاد تدلع احد:D الله يسعد ايامك اسعدتني وخصوصا الريكو تراني احبه حيل:$ وبرضو راح انتظر الجزء الثالث ومشكور وطريقتك جدا روعه

  2. الله يوسع صدرك بالعافية والله أن سواليفك توسع الصدر لاتوقف تكفى وفي أنتظار الجزء الأربعين أن شاء الله

  3. قسسسسسسسسسم بالله نحسب أننا بالليل يلعن ام التصريفه قسم أني فطست ضحك ههههههههههه تكفى نبي الجزء الرابع ماهو بكيفك الا غصبا عنكـ :$

  4. ههههههههههههههههههه:D بصراحه موضوع رووعـه من جد لا توقف عجبتني طريقة اسلوبك في الكلام مره رجهـ خخخخ واحلى موقف عجبني صقيقتي قوه قوه بس ! هههههههه بنتظار الجزء الجاي تحياتي لك اخوي8)

  5. هههههههههههه يسلمووووو ع الموزوع الروعهـ 😀 اسلوبك مرره حلووو والمواقف تضحك خاصهـ اخر موقف 😀

  6. هههههههههههههههههههههههههههههههههههههههه تحفففففة وربي ونبي جزء ثالث ورابع وخامس بانتظاااااارك

  7. يشيخ روح الله يسعد ايامك كلللها ضحكتني من قلب قلبي كل موقف يموووت ضحك اكثر من الثاني اهم شي أبو عزيز حرم يصرف هههههههههههههههههههههه نستنا الجزء الثالث

  8. بصراحة ومن دون مجاملة انت عندك أسلوب كوميدي أضحكتني من كل قلبي ربي يسعدك قوووووووووول أمين وأنتظر الجزء القادم

  9. ممواقف حلوه ومضحكه ههههه والاحلى طريقتك بالكتابه واحلا شي الريكو بانتظار الجزء 3-4-5

  10. اسلوبك جداً ممتاز وتملك قلم مميز بس اسمح لي بنقد هادف ياخي يقرأون لك ناس عقال كبار وياليت تقدرهم عن بعض الافاض السيئة وماله داعي تقول كلام وسخ عافاك الله ورعاك

  11. فائدة القصة الثانية: لا جيت تفطر في نهار رمضان.. خلك في الدور الأرضي ولا تروح فوق السطح!!

  12. 8)شكلكـ عربجي يومكـ صغيير B :>أنا في انتظار الجزء الثالث والرابع

  13. ههههههههههههه موضوع جميل مثل راعيه وننتظر جزءك الثالث ويا ليت تطلع بطل وتزل الرابع والخامس والعاشر

  14. مشكووور و الله ضحكتني في قصه صقـيـقـتي قوه قوه بس ! في واحد يقول لصديقته أشتريلي ريكو ؟! هههههههه مشكور ننتظر منك المزيد

  15. بصرآآآآآآآآآآآآحه اسلووب شىىىىىىىئ جد مت ضحكـ خاصتن توصيف خشمكـ ههههههههههههه الله يسعدكـ وتكفى تكفى نبي ثالث ورابع وخامس :$

  16. ههههوووووووههههااااااي رحححح يآ بعدهم ووآصل تكفة < هز كتوفك ايه كفو 🙂 بدون مبآلغه يا صآحبي على كثر ماقرا لرسايل القروب لكن وربي أن أول مشآركة هي هذي ويدل على .. إبدآآآآعك يآ صآحبي رح .. وفآآآلك الجزء الـ 100 8)

  17. تجنب اللعان اخي الفاضل…في قول(لعنبو) .. (((فيه ناس خشمهم وأنت نازل من عيونه تبي الخدود تقابلك لوحة مكتوب عليها انتبه منعطف خطر ))) ,,الحمد لله لاتهزأ أخي بخلقة الله واحمد الله على العافية..

  18. (( قسسسسسسسسسم بالله نحسب أننا بالليل )) هههههههههههههه .. احلى تصريفه حط ثالث ورابع وخامس وسادس .. قوه قوه

  19. :$يعطييييك العافيه مووضوعك مررره حلوو وعجبني اكثر شي وصفك لطريق انفك والمزرعه الموجوده بوجهك ننتظر الجزء الجاي

  20. :D:D مواقف ررهيبه واسلووب احلى .. وخوييك العزيز يقوول نحسبه ليل هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه << فاااطس ضحك والله ياانى ضحكت لحد ما دمعت عيوونى اضحك الله سنك ,, ويليت تكمل لنا من سوالفيك الحلوةة

  21. ماشاءالله عليك مررره فنان بالسرد واصل ارجوك:( ابي اوسع صدري على سوالفكـ:$

  22. قريت الجزأين وكل واحد أحسن من الثاني وبالنسبة للجزء الثاني اللي ضحكني من جد توصيف ميلان الخشم وبعد لما محمد عزيز وولد عمه أفطروا زين سوا فيهم أبوهم والله العظيم دموعي نزلت من الضحك استمر الله يوفقك عندك أسلوب مميز في سرد الموافق

  23. هذاشكلة مالحق على بسكوت السعادة ومينو على كل حال اضحكني اسلوبك يابيالة الكيف

  24. احــــــب وبــــشــده ذكــــــــــريــــات الطفوله بسلبياتها:( وايجابياتها:o.. لا عدمناك اكتب وكمل نبي نقرأ ونضحك.. ونستنا الله يونسك بالعافيه:$ تحياتي لك….

  25. بصراحه اول مرة يعجبني شي من هذا القبيل لما اقرا على طول اتذكر ايام طفولتي جد انا اطالبك بالجديد دائما واتمنى لك التوفيق على فكرة انت يليق بك ان تصير كاتب سيناريو

  26. هلا قسما بالله ضحك هههههههههههههههههههههههه خصوصا ابوك الله يرحمه شي يوم قال:بالليل يا ثووووووووور بالليل لعنبوا إبليسك الشمس صاكتك صك ومخليتن مقفى ثوبك كله عرق وتقولي بالليل أندزلع لعنبوا الي أنت ولده أندزللللللللللع لعنبو ذي لحال هههههههههههههههههه بس صراحه فيه اسباب كثيره تجذبنا وتمتعنا بقصصك من ابرزهن 1-تكلم بلهجتك وتعيشنا جو معه 2-تقول الالفاظ العاميه تخلين نفطس صراحه 3-تقص القصه بالتفصيل ماشاءالله ولاتغير شي خلك على اسلوبك تسذا والله روعه .. ووجهك ذا وصفه خطير صراحه يصلح بالمافيا هههههههههه شكرا ضحكتن والله وعطن اكثر من4 اجزاء انتظرك

  27. أسجل اعجابي بك والله سواليفك فله ياني كركرت لين جاني انزلاق غضروفي على التوصيف حق خشمك انفدى ذي النخرة

  28. هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه و ربي جناااان ابداااااااااااااااااااااااااااااااااااااااااااااااااااااااااااااااااااااااااااع شي مو طبيعي ههههههههههههههههه اسلووووووووووووب ولا اروع الله يجززززززيييك خير عقد ما ضحكتنا يا بطل ههههه 😀

  29. يؤيؤيؤ ، مـآ أغرمت انا الا فـ سالفة صغيغتي , أبو الرومـآنتيكْ يا شيخْ ، بس الإدآريه يـآ جعلهـآ اللي ما نيبْ قـآيلة أبد ما عليها اسلوبْ . . طيحت البرستيج هـآه . . ؟ يسلمونيشينْ و لآ تطول بالأجزآء هع

  30. انا قاعدن احتري اللي دقيت عليه من المقلط يجي يرد بذا :$ انت مقلع ياخلفهم مد لنا بس 3 و 4 و 5 ولو يحصل تدبلهن بعد ماهنا مشكله و عادي ترا تنزل موضوع لاقضن ذكريات البزر > ذكريات رجل كان بزراُ 😀 سلاااام يالصفرا ههههههههههههههههههههههههههههـ:$

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

ذكريات بزر أصبح رجلاً (2)

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول