دعوة للحوار : مالك ألا حلين .. غصب 1 أوغصب 2


مع خضم التنافس في المحطات الفضائية التي تقدم المادة الممتازة للمشاهد وتتحفه ببرامج رائعة تجعل من يراها يضعها في مفضلة المحطات , خصوصاً أن من يقوم على تلك المحطات يعي جيداً أهمية السيطرة على عقول المتلقين وجعل هذه المحطة أفضل مما هي عليه يوماً بعد يوم , مع كل هذا نرى القناة السعودية الأولى والثانية لا تزال ( محلك سر ) من حيث ما تقدم وليس هناك ما نراه منهما من بداية بثهما سوا برامج ومسلسلات عفي عليها الزمان وشرب
حتى قناة الإخبارية التي وجدت قبول كبير في بدايتها لم تدم طويلاً وأصبحت مادتها عادية جداً ونادراً ما تجد فيها برامج تشد الانتباه , ولو انطلقنا قليلاً للقناة الرياضية فهي ربما تكون أفضل نوعاً ما في استهدافها فئة الشباب , عموماً القناة الأولى والثانية متى سنرى منهما تقدم وغربلة شاملة في نوعية البرامج وجذب المشاهدين لها أو حتى تتحف ويكتفي بهما من يمنع وجود المحطات الفضائية في بيته , ما هي الأساليب التي من الممكن استعمالها لتطوير تلك القناتين
إلى متى ونحن نسير خلف الركب , والى متى تكتفي تلك القناتين بتغيير شعارهما كل عام فقط
حتى أوجه المقدمين مللناها ! !
حوارات تضع بين أيديكم هذا الموضوع لنخرج بحلول تجعلنا أكثر تقدماً لعلها تجد من يستمع إليها في تلك القناتين

علما بأن التعليق متاح للزوار
كتب هذا الحوار وحرره : معاند





تعليقات 44

  1. تسلم اخوي ع الموضوع ..ومن جد الكل يتطور عدا قنوتنا وكان القائمين عليها زعلانين على مواكبة هذا العصر احنا مانبي اغاني واشرطة شات اسفل القانات نبي برامج هادفه وجديده..والله حتى المذعين اللي فيه يمكن قبل لا اجي ع هالدنيا الله يحفظهم بس

  2. هههههههههههههههههههههههههههههههههه اضحك اصلا ناسيها وما اعترف فيها لو يقفلوها احسن هههههههههههههههههههههههههههه اضحك

  3. المسوؤل عن التلفزيون السعودى يغط فى نوم عميق اشد من نوم اصحاب الكهف كلنا نذكر يوم 11/9 القنوات الفضائية كلها تنقل هذا الحدث الذى غير مجرى العالم وكان على القناة الاولى الصلاة المغرب ( واكيد ان الصلاة افضل) لكن القناة الثانية كانت تنقل مبارة كرة سلة بالدورى السعودى فاى عقلية تسيطر على التلفزيون و تتعامل مع الشعب السعودى واتمنى ان يتم نفض الغبار عن هذا الجهاز الحساس الذى يوجة الراى العام ويصنع المجتمع

  4. من جدكم تتفرجون علي القناه السعوديه اصلا انا ناسيتها ولااتفرج عليها لاان الصراحه مافيها شئ يخليني اتفرج عليها ومن جد اتمني انهم يغيرون شوي بالقناه ويطورونها للافضل ونشوفها مثل الام بي سي والقنوات الباقيه.

  5. مع اني لا اشاهدها ولا ادري ما فيها ولكن أخشى ان يأتي يوم نقول اين القناة السعودية في ضل تكالب كل القنواة على كل رذيلة يسوقون لها بين ابناءنا وبناتنا حمانا الله من هذه القنواة وحفظنا بحفظه

  6. غياب معد البرامج الناجحه والجريئه والحوارية الجيده مفقود في قنواتنا المحلية . نعم ليس هناك متخصص في مثل هذه المواضيع حتى مقدمي البرامج ينقصهم التخصص فليس هناك مقدم برامج او حتى نشرة اخبار متخصص . وفي هذا الزمن الصبح التخصص مطلب اساسى لنجاح اى عمل . فاغلب الموجودين في هذه القنوات دخلوها بالشفعه ( الواصطة ) فقط لاغير . او وراثه .

  7. بصراحه في زمن القنوات الفضائيه المشخلعه مسكينه القناه السعوديه غاصة في برامج قديمه المشكله حتى الخليجيه منها والعياذ بالله تفشل يا من ناحية طرحها للموضوع او ممثلتها يعني القناه للحين متمسكه بأصالتها مثل mbc اللي انصدمنا في انها حطت للمشاهدين فلم مايتقبله حتى دينهم لكن عيب القناه السعوديه انها ماتبتكر وتجدد وتجذب المشاهد يعني ممكن تجدبه من خلال البرامج مو شرط بس المسلسلات هذي المجد على انها مافيها عنصر نسائي الا انها سباقه في طرح الاحداث وسرد الوقائع فتحيه لك ياقناتنا ونتمنى الافضل وانا مع التطور وضد مع الخيل ياشقرا تحت مسمى مواكبة العصر

  8. تقولون المذيعين قديمين اجل لو لاحقين على عصر غالب كامل وماجد الشبل ماذا سوف تقولون ولي ملاحظه اخرى في صالح التلفزيون ان اوقات الصلاة تختلف من منطقة لاخرى ولو توقفت البرامج حسب توقيت كل منطقه لم تقدم اي برامج اما للتوقف للصلاة او لنقل الصلاة 0شكرا0

  9. السعوديه كلها تحتاج تطوير مو بس القنوات السعوديه هالديره دمار في دمار ومابها شي زين

  10. المشكلة ماهي في القناة المشكلة في الراحه النفسية اللي هم عايشين عليها لان يجيها دعم مادي من الدولة ولا يوجد لديها دخل اضافي الا في رمضان يدهرون ومن جد انا اتمنى اشوف القناة الاولى والثانيه يتحركون اقلها يمشون في شوارع المملكة ويناقشون الفساد الاداري سواء كان من شوارع او من رفع الاسعار ومناقشتها وطرح برامج جريئة لانها اهم شيء وهي الواجه الاعلامية للمواطن السعودي خلاف باقي القنوات التجارية اللي ما تهم المواطنين ولا تعيش الحقيقة اللي تمثلنا … بس ارجع واقول القناة الاولى والثانيه فيها حسنه واحده وهي ان القرارات التي تأخذها الدولة ممثلة بخادم الحرمين الشرفين حفظه الله تذاع فيها وليتها تكون حصريه جدا وعدم تدخل بعض القنوات المتسعودة فيها واسف على الاطاله وشكرا .

  11. يقولون ارفع راسك انت سعودي والله هالقناتين اهم اللي منزلين راس السعوديين لابرامج لامسلسلات مثل الناس لامسرحيات وإذا بيحطون لك مسلسل نص الحلقه مقطوع اتمنى والله من كل قلبي ان هذا الأمر يصلح ويتطور وتصير احسن وافضل

  12. يا اخواني انا قبل فترة سمعت ان السعودية بتتطلق قمر صناعي على غرار نايل سات واذا اطلقوه وظلت برامج القنوات مثل ما هوا موجود احسن للحكومة انها ما تتلطق قمر حتى ما تخسر على الفاضي

  13. السلام عليكم .. هذا شر لا بد مننه .. يوم طالبنا بالتغيير بدو يجيبون في دعاياتهم حريم بدون حجابات 😀 <<< قفزه :p فاهمين التطور غلط .. عالعموم ،، ماحولك احد تطالب ولا ما تطالب .. خلك على المجد وقنوات الامارات .. يالله من فضلكككككككك !

  14. المشكلة ان عندنا 4 قنوات الاخباريه،القناة الاولى،القناة الثانيه،والرياضية وآخرتها ما نشوف الا قناتين المشكله ان احنا بالسعوديه المفروض تطلع عندنا كل القنوات على الاقليه احتراماتي للجميع

  15. القنوات الحكومية ايها الاخوه حدث ولا حرج .. خصوصا عندنا في الخليج .. تجد ان القنوات تتكلم بوادي .. والاعلام العالمي بوادي آخر بعييد كل البعد عما يبث في قنواتنا .. عندما تشاهد قناة حكومية خليجية .. تحس أن الخليج معزول عن العالم .. والحقيقة ان الاعلام معزول عن الواقع .. باعتقادي .. أحسن حل للاعلام الرسمي هو الخصخصه ولو بشكل جزئي .. عشان الناس تشتغل وتنافس .. ولا مانع من وضع ضوابط للاعلام لكي لا يتعدى حدوده .. ويذهب إلى الانحدار !!

  16. أولاً السلام عليكم ورحمة الله وبركاته ثانياً انا لما احط على القناة السعودية التلفزيون يطلعلي غبره وهذا الشي سببلي مشاكل كتير منها الربو.. وانتو لسه تناقشوا موضوع تطور هذي القناتين !! أملنا في تطورها أمل إبليس في الجنة.. ياجماعة ماقلنا نبغا ستار أكاديمي ولا سوبر ستار بس حسسونا انه احنا في عام الفين وسبعه ! بصراااااحه الـ FM اصرف >> بدون زعل

  17. مثل ما قال اخوي Q8.Accountant القنوات الحكومية في الخليج عموماً سيئة جداً لا من محتوى اعلامي ولا من كيفية وقوة وجمال اخراج وبث هذا الاعلام اصبحت برامجها مثل الروتين اليومي .. ومملة لدرجة الغثيان الحل في نظري مثل ما تفضل به اخوي هو الخصخصه .. ولو جزئياً .. ليست خصخصة كليّة للقناة .. طبعاً مع المراقبة الشرعية والعلميه للمواد الاعلاميه .. ودام ابو مدني مسنتر على كرسي الوزارة .. فمشوا خششكم يتصلح وضع القناة .. مسكين هالانسان .. يحسب تطور القناة بتكثيف العنصر النسائي في البرامج الحوارية وغيرها الله يهديه ويفتح على قلبه

  18. أنا أقول إن القنوات السعودية أفضل من غيرها من القنوات ذات الفكر الهدام وأرىأن أكثر التعليقات متحاملة على قنواتنا أنا لا أعارض على تطور القناة بالعكس أتمنى كل الخير فيها ولو أننا معارضووووون للأفلام الأجنبية في القناة الأولى وياليت تنزل لمستوى الشباب وتجذبهم إليها بدل الذهاب إلى القنوات ……….. وياليت توجدون برامج جدييييدة وهادفة مثل الموجود في قنوات المجد والسلام عليكم للتواصل [email protected]

  19. السلام عليكم ورحمة الله وبركاته كل واحد له راي وطريقة تعجبه ونحن علينا……….قبول رايه………..

  20. انا من فتحت عيني على التلفزيون ما اشوف الا من حياة الباديه او الرقصات الشعبية

  21. ســلآم عليكم .. يا عزيزي المسؤولين اللي قآئمين على القنـآه ما عندهم افكـآر جديدهـ اللهم انهم يشوفون القنــوات الاخرى وش يسوون من برـآمج او ديكورات ويفعلون مثلهم اما افكـآر لتطوير البرامج وجلب مقدمين ذو خبرهـ وافكـآر عاليه لتطوير القناهـ ما فيه وثاني شي الالوان حقت القنوات تحس من خلالها انك تشوف برنامج قبل عشرين سنه الوان باهته وتضيق الصدر واما من ناحية البرامج لقناة الاخباريه فهي معادهـ وعاملينها كروتين يومي مثل برنامج سؤال اليوم (( احس الاسئله خلصت من عندهم وراحوا يسألون المواطنين سؤال الا وهو ما شعورك عندما تدخل دورة مياهـ عامه بالحدايق والمساجد وغيرها وتراها غير نظيفه )) ؟؟ !! بالله فيه احد صآحي يحط هالسؤال ؟؟ والله العظيم احس الاسئله خلصت بس اللهم يبون يستمرون بالبرنامج (( فيرقعون )) هالاسئله للمشاهد ما ادري هل هو استخفاف او استصغار عقل المشاهد او وش هو بالضبط ؟؟ اسف على الاطالــه لكن اقسم بالله لو اتكلم لبكرهـ عن هالموضوع ما راح اسكت لوجود كلام كبيــر في داخلي …. يعطيك العافيه يا معاند على الموضوع الاكثر من رائع ودمت بود لقروب بو نواف ..

  22. مع الأسف عندهم القدرة على قلب موازين الاعلام للأفضل ولكن قمة الجمود والعناد … وكما نعلم هذهـ القنواة تمثل الشعب السعودي وهي الواجهة أتمنى تكون الواجهة جميلة وياليت الحلم يتحقق …

  23. اخواني اخواتي خذوهامني اي شي تبع التلفزيون السعودي مو حلو يعرض اشياااء مال امها داعي الا قناة المجد(ما اظنها تبع السعودية) حلوه القناة وممتعه ومفيدة 🙂

  24. السلام عليكم مساء الخير والله القناتين لا بأس بهما والله تطورت السنوات الاخيرة , صار فيه تنويع في المواضيع والبرامج بس الصراحة حاجتين تستفزني اولا الاخبار الجديدة مستحيل تقدم في نفس اليوم يعني لا قدر الله لو تصير مصيبه في السعوديه ولا خارجها لا تفتح عل اخبار السعوديه ثانيا الدعيات التجاريه ما ادرين فيه استعباط للمشاهد المراة اللي تقدم الدعايه الوجه مكشوف بس مستحيل يطلع شعرها والدعايه دعاية شامبو فتجيك صورة الوجه وصورة الشعر كل واحده بمقطع وانت ركبها بعرفتك

  25. مرحبا والله من زود الن القناتين مافيهم شي .. ولا انا داريه عنهم ولا هم يحزنون .. اشياء بدائيه فيهم .. كأن الزمن تو في البدايه .. مادرو ان العالم تطور .. ع الاقل في برامج تنفع او اي شي من هذا القبيل لازم هم يطورون من حالهم ويواكبون العصر سوائا بالبرامج او الاشياء الباقي اللي تعرض يجيبون ع الاقل برامج عن القضايا العصريه .. بحيث انهم يتكلمون كلام منطقي .. مو مستحيل وممنوع ومدري أيش والله لو بتكلم وبعلق على كل شي ماراح اخلص يعين الله بست وشز

  26. بيني وبينكم من تولى بومدني الوزارة وإعلامنا مو بخير تلفزيون على صحف .. إلخ شفنا شيء مايبشر بخير ..

  27. صراحة أنا شخصيا تقريبا من ثلاث سنوات ما شفت القناة ولما قرأت الخبر قلت يمكن تغير شئ وتفاجأة ان القناة لا زالت على ما هي عليه. أنا أشوف انه الطابع الحكومي بحكم انه القنوات تابع لوزارة حكومية هو اللي يحد من امكانياتها ومن تطورها . مثل ما شفنا بقطاع الاتصالات اذكر اني والد كان مقدم على تلفون ثابت وكانو معطينه موعد كل ما اسال ابوي يقول باقي سنتين والبعض كان يشتري التلفون طبعا اذا عنده مبلغ والحين بس تتصل على خدمة العملاء هم يجون ويركبونه لك وانت ببيتك المهم انا اشوف لو ان قطاع التلفزيون يتم تخصيصه راح يكون افضل مثل ما هو الحال مع قناة ابو ظبي و دبي (أنا اتكلم عن القناة الاولى والا القناة الاخبارية ما شفتها الى يوم كانوا يجيبونها بعد المغرب على القناة الاولى اما الثانية فا ما عمري شفتها الى بعد ما جاء الدش لانها بصراحة ما تشتغل بالمنطة اللي حنا فيها وهي شمال الطائف ب 150 كلم على طريق الرياض >> قناة وطنية ولا يغطي ارسالها ارجاء الوطن))

  28. الاكثريه لديها الرغبه في الابداع لكن توجد حواجز تحد من هذه الاعمال والا يوجد مبدعون كثر لكن الكبت وعدم اعطاء الحريه الكافيه للابداع

  29. السلام عليكم ورحمة الله وبركاته القناه السعوديه …. بصراحه مسويه زحمه من بين الاقمااااار يعني وجودها والعدم واحد …. كل شي يتطور ويتقدم الا القناه السعوديه الاولى بالتحديد .. لابرامج جديده لاحوارات مفيده ….. انا من زمااااان ماشفتها ولا افكر اشوفها …

  30. الاخ الكريم معاند اهنئك على الطرح الرائع والفكره الجيده في البدايه (اذا فات الفوت ما ينفع الصوت) وهذا المثل ينطبق على قنوات مملكتنا ((الحبيبه)) لانوا العالم وصلوا القمر واحنا لسا تحت الصفر يا اخي سليمان العيسى من امي جابتني وانا اشوفه ماسك مايك ويناقز كن مافي بالبلد الا ذا الولد والا مذيعين الاخبار ما عاد تشوف ملامحهم من كثر التعافيط بوجييهم خلااااااص يا ناس احيلوهم تقاعد وما في احد يسمعك توهم قبل سنه او سنتين افتحو المجال للشباب وصاروا يحطون مذيعين جديدين يــــــــــــا خي خلنا ساكتين بس تدري ليش احنا ما نتطور لانوا لو بس المذيع بيقول كيف الحال لازم يطلع خطاب لاكبر راس عشان يعطينا اذن اننا نقول كيف الحال!!!!!! اكيد ماراح نتطور واحنا مواضيعنا مختاره ولا لنا اي حق اننا نفتح اي موضوع ؟؟ ولازم كل شي نطمطم عليه والحقائق مطموسه عندنا كيف نتطور على كذا ؟؟؟؟؟ واذا سمحولنا نفتح موضوع عليه قيمه وله مشاهدين شفرنااا نص الكلام وقطعنا ثلاث ارباع المكلمات !!! كيف بنطور ؟؟؟؟؟؟؟؟؟؟ يا ناس احنا خلاص ما عاد ينفع معنا الصوت شعارنا ((لا للتطور )) يا اخي الى الان نشوف شباب عند بيبان ذا المجمعات يبوسون السيكيرتي يدخلهم كانهم بيدخلون صالون نسائي موب موووووول ؟؟؟ هذا تسمونه تطور درت نص العالم حياتي ما شفت شباب يترجون سيكيورتي الا الحراميه اللي حاضرينهم من المول !!!!!!!!!!!!!!! هذا بداية التخلف وغييييييييييييره كثير آآآآآآه بس لا يطلع يا اخي تدري الاعلام للبنات ما عندنا ؟؟؟ وتخيل بالقناة السعوديه غير مرحب بالفتاه السعوديه مرحب بالسوريات واللبنانيات وانت طالع ؟؟؟ ليه القناه فرنسيه وانا مدري هع هع هع هع اكبر دوله للبترول بناتهم يطيحون يوميا بمجاري جامعاتهم !!!! اكبر دوله للبترول الشرطه تقطع الاشاره قدامك على ولا شي ؟؟؟؟ اكبر دوله للبترول ما فيها خطوط للمشاه عند الاشاره والشعب كله متقدم ومعطي الاشاره وراااااااااه !!!!!! والشرطه no comment!!!! اكبر دوله للبترول ما فيها تصريف للامطار ؟؟؟؟ يوه بس لا يطلع والله لو بحكي ما راح اخلص يا اخي شوف غير القنوات القنوات امر وقاضين منه وما في احد يطالعهم صلحو الاهم بعديييييين نفكر بالغصبين <<<<<< شوي وتصيح يسلمو والله اني اشفيت نص غليلي تقبل مروري وتعليقي الف شكر

  31. اولاً اشكر لك عزيزي معاند لطرحك الموضوع هذا.. ثانياً بالنسبة لغصب واحد واثنين التطور عندم في ادخال المرأة فقط وفقط وفقط برامج مع احترامي الشديد تجيب السلّال ولمن لا يعرف السلّال هو مرض يصيب البطن وهو اشبه بالسل>>>ان صحت الروايات نرجع لمحور حديثنا انا لفت انتباهي التطور الكبير جدا في تغيير شعار القناة الثانية قالهم الحين مسويين شي… وانا اقترح الصراحة لتحويل التلفزيون لجهة اهلية لا يخلونها تحت يدي ابو مدني اللي ماقصر اتحفنا بكل جديد ومفيد وليته يفسح المجال لغيره…

  32. الاخت بنت أبوها لا والله الدمار وجهك انت وخشتك نتكلم عن التلفزيون وتحولين الموضوع إلى نقد في الدولة كاملة وتوقلين السعوديه كلها دمار!!! لا والله الدمار عقليه أمثالك الحاقد والحاسدة من لديه فكر ولديه شيء يود أن يقدمه للمجتمع لا يقدمه بالكلام فالكلام لا يعدو أن يكون 29 حرف نحرك ونبدل فيها زي مانبي وعلى عدد الورق الي نبي أما الأفعال فهي التي تثبت وترى بالعين وينتفع بها وكذلك الاخت صحفيه قادمه ما أدري وش تفكير بعض الناس يا عالم يا ناس لا تأتي الأمور بالأماني بل الأفعال وتقولين هداك الله (اكبر دوله للبترول بناتهم يطيحون يوميا بمجاري جامعاتهم !!!! اكبر دوله للبترول الشرطه تقطع الاشاره قدامك على ولا شي ؟؟؟؟ اكبر دوله للبترول ما فيها خطوط للمشاه عند الاشاره والشعب كله متقدم ومعطي الاشاره وراااااااااه !!!!!! والشرطه no comment!!!! اكبر دوله للبترول ما فيها تصريف للامطار ؟؟؟؟ ) اقول لا تخلو دوله من الكمال والدنيا ككل ليست كاملة هذا أولا ثانيا رغم عدم رضسا على بعض الأخطاء التي تحصل إلا أن السبب فيها نحن المواطنون لا ننطق ببنت شفاة وإن نطقنا نطقنا خائفين أو تحدثنا في الهواء أو فيما بيينا وفي مجالسنا لكن أن نرفع برقيات أو نطالب المسؤولين بتعديل بعض الأخطاء فهذا ما لا نطيقه ونريد الأمور تتصلح لا أتكلم من فراغ بل من واقع تجربة بعض من حولي في كثير من الأشياء عندما حادثوا المسؤول وطالبوه تعدلت بعض الأمور، والبعض من المسؤولين من أصحاب (طقها وألحقني ) الذين لا يريدون أن يعدلوا إلا طريقة نهب الأموال تعدت المطالبه منهم إلى من هم أعلى منهم بل في بعض الأمور وصلت إلى برقيات إلى المقام السامي وحدث تغيير وتعديل نعم إذا كل حي وكل مدينة طالبت بتعديل بعض الأمور تتعدل الحال أما جالسين بالمجالس والنت ونهذي بما لا نعرف فهذا ما لا يقبله عاقل منصف.. ——– أما بعد موضوع التلفزيون هذه الإشكاليات تجدها في معظم التلفزيونات الحكومية ليست من عدم توفر الإمكانيات بل من التعقيدات البيروقراطية التي لا تساهم في تقدم عجلة جهاز حيوي وذو تجددات على مدار الساعه كالاعلام الموظف في التلفزيون الحكومي ولو كان مبدعًا لن ترى توهج إبداعه على الشاشه لانه في نهاية الشهر يأخذ راتبًا بخلا العمل في التلفزيونات الأهليه فمعظم العاملين يعملون بالإنتاج مما يجعل الموظف لا يقف عند مستوى معين في تطوير نفسه فتجده يسعى جاهدًا لان يكون أفظل من أمس وهكذا وآسف على الإطاله

  33. السلام عليكم ورحمة الله وبركاته شكرا اخوي معاند على هالموضوع كلامك فيه وجهة نظر وان شاءالله يكون فيه تطور بس لا تنسى ان الmbcاكبر قناه عربيه واكثر افبالا من الناس وهي سعوديه والكل عارف وكمان قناة روتانا اضخم قناه فنيه هي سعوديه والكل عارف …..اما عن قنوات الحكومه فكل قنوات الخليج مستواها واحد مو بس السعويه……… انا لما قريت تعليقات الاخوان معظمها تعليقات عن وجهة نظرهم عن القناه لان الموضوع عن القناه اصلا…..اما الاخوان بنت ابوها وصحفيه قادمه والساهر خرجت تعليقاتهم عن محور الحديث تماما اقول للساهر…..(ارفع راسك انت سعودي احنا منزلين روسنا من هالقناه؟؟؟!!)تعجبت من قولك هذا أنرفع روؤسنا بالقنوات يالساهر؟؟ الانرفع روؤسنا واحنا من دولة الاسلام والمسلمين؟؟الانرفع روؤسنا ومليكنا ابو متعب الذي نحسد عليه؟؟ اذا كانت رفعت روؤسنا من قنواتنا قل علينا السلام!!!! اما اختي بنت ابوها (السعوديه كلها تبي تطوير؟؟) نحن من احسن دول الشرق الاوسط ..كيف تريدين التطور؟؟ اما اختي صحفيه قادمه فأقول لها حتى الشوارع الاوربيه تحصل لها مشاكل اعظم من مشاكل شوارعنا عند حدوث الامطار وكل دول العالم تحصل لها مشاكل في الشوارع!!ليست السعوديه فقط… هذا ما اردت قوله حول الردود التي لفتت انتباهي وعذرا على الاطاله مع تحيات محبتكم

  34. بسم الله الرحمن الرحيم اولا اشكرك يا اخ معاند علىالطرح الجميل السعوديه الله يستر فيه اشياء خرباه فيها عن ايش نتكلم والا عن ايش عندك التلفزيون اولا : برامج تعبانه ومقدمين برضوا تعبانين (وحتى لو كان المقدم ناجح راح يفشل لما يطلع في القنوات السعوديه مثل :اسامة العشماوي كان رائع في قناة المجد ولما اخذته السعوديه حطته في برنامج وش اقول غير تعبان اعذروني ) ثاني شي عندك الاتصالات ثالثا الخطوط الجوية وغيره وغيرة كثير ليت التلفزيون السعودي يستفيد من قناة المجد مالهاالاكم سنة وماشاء الله ناجحةبمعنىالكلمة

  35. مشكور اخوي نقطة نظام انا ما شفت ردك الا بعد مانزل ردي انا وسبحان الله كان تفكيري زي تفكيرك عن الي ذهب عن محور حديث التلفزيون للدوله وبصراحه تعجبت منهم وخصوصا الفاهم الي اسمه الساهر الي منزل راسه عشان قناتنا تفشل (على فكره هو الوحيد الي منزل راسه) والي تطيح ببيارات جامعتها دخلت الدوله والنفط كلها عشان البياره(ههههه شر البلية ما يضحك) ياناس ياعالم وين عقلياتكم وتقولون يبيلها تطور بالاول طوروا عقولكم انتو السعوديه الحمدلله متطور من زمان ما اقول الا الله يكملكم بعقولكم اما عن الموضوع الاساسي سبق وتحدثت فيه وشكرا

  36. بسم الله الرحمن الرحيم اما بعد…. موضوعنا يطرح قضيه التلفزيون السعودي…..اللي هو يخصنا إحنا يا أهل هالوطن علشان ننقل الصورة السليمه للمشاهد اينما كان حول هذا العالم.. وغير كذا ان القنوات اللي نتكلم عنها حكومية وانا ماعندي مشكلة في التخلف اللي يتكلموا عنه الأخوان الأفاضل…انا أسأل ليه هالسوريات والفلسطينيات هم اللي جالسين يطرحون قضايانا كل يوم على الريق مع احترامي لجميع الجنسيات ومو تقليل من قدر احد…بس انقهر لمن اشوف هالدخيله تتكلم بلسان حال امي واختي ليييييييييييييييييييييه يالسعودية؟؟؟؟؟ مافي بنات ناس في الديرة تعرف تتكلم وتطرح قضايا مجتمعها بشكل أقرب وافهم لنفسي ولواقعي اللي حاصل !!!!! اتمنى منكم الإجابه على سؤالي همسه في اذن نقطة نظام : تقبل الأراء من جميع شرائح المجتمع وبدون تهجم … هؤلا عايشين معك اذا انت من أهل الديرة وتشكل فرد من أفرادها… وشكراً ..ودمتم بخير

  37. سوال هل لازالت تبث؟؟؟؟؟ ذكرتني ايام المسلسلات البدويه وبرنامج لربة المنزل يبث الصباح عن الطبخ والقناه الثانيه برامج الاطفال مغامرات الاطفال مع كلبهم لوسي !!!! الاحاله على التقاعد افضل لهذ القناتين والى الجنادريه ربما تجد من يذكرها

  38. أخواني لو ننظر الى تزايد أعداد الشباب المتابعين لأقوى الدواري العالمية و الاوروبيه أصبحوا من هواة الشيشه و المعسل …. *(( لا يمكنك مشاهدتها الا برسوم و.و.دش. _________________________________ اذا كان دورينا العريق لا يمكنك مشاهدة بعض مبارياتة لأنها مشفرة فما فائدة القناة _________________________________ قناة الرياضة و الشباب الكويتيه تنقل الدوري الايطالي . الانجليزي كاس ملك انجلترا . ابطال اوروبا ((الاسباني)) على القناة الأرضيه _———————————————– انتهى عقد الشركة السعودية المحتكرة لنقل الدوري فهل سنرى شعار القناة الرياضية في ركن الشاشة في مباراة بين تشيلسي و ارسنال ________________________________ ما يقدمه الهدف للرياضة(محل مستلزمات رياضيه)أفضل من ما تقدمه غصب للرياضة

  39. الحين التطور انه يطلعون بنات وشباب أويصيرون مثل mbc القناتين هذي موب لكم للي يدور عليها واللي يدور شي عاد لازم يكون عارف طريقه وشكرا

  40. احييى القناتين اقصد الاربع قنوات السعودية فمازالت برامجها في نطاق ثقافاتنا اجل قنوات للسحر وقنوات للاغاني وقنوات للزواج وانواع التلوث الفضائي ياخوان غزونا في عقر دارنا فيارب سترك انا اتفق معك من حيث التغيير في البرامج والتنويع ولكن كلمة الحق ان قنواتنا مستواها تجاوز 75 % شكر ا للجميع

  41. السلام عليكم عزيزي بالنسبة للقناة الأولى ملحوظ عليها التطور أما بالنسبة للقناة الثانية كان الهدف من إنشائها إيصال الأخبار للمقيمين الأجانب (قبل خروج القنوات الفضائية) لكن الآن ما أشوف لها أي فائدة -هذا رأيي- وأفضل تحويلها إلى قناة ثقافية مثلاً <-------مثلاً ومشكورين.........باسم

  42. بسم الله الرحمن الرحيم الرقي في القناة يكون اذا خليت البنت مفصخه والرجال يرثص ويغني وحبيبي وحبيبك هذي القنوات الزينه صح ؟ ولا تبون برنامج ما يطلبه العاصون لله ؟ غاية الناس شي لا يدرك ولا اللحين يجيني واحد يتفلسف نبي برامج هادفه الله واكبر يا اربعه وعشرين ساعه على القنوات العلمية اقول احمدو ربكم (الدنيا عجيبه والناس اعجب)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

دعوة للحوار : مالك ألا حلين .. غصب 1 أوغصب 2

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول