خفايف تعدل مزاجك 2


احلى شيء بالدنيا الحب .. قالوها من قبل السرابيت الحب عذاب .. قاعدن فوق السطح من صباح الله حتى وجهك ماغسلته متورمه خديداتك وفمك من النوم تقال منفجرفيه لغم وتروح تبي تفقد حمامك اللي بالصندقه .. وتنصدم بأن الحب حق الحمام مخلص .. من وين تجيب له حب !!( الحب عذاب ) .. توك اللي بلغت وصرت رجل يعتمدون عليك بالبيت بكل شيء الا(تركك مع الخدامه والبيت فاضي ).. وصوتك خشن وبدت تضاريس خشتك تغير وبدأ يطلع لك انواع من الفطر على جبهتك وخديداتك واكبرهم على خشمك .. وتكتشف بعد الخوف والوسوسه ومراجعة الدكتورة سلمى انه حب الشباب ( الحب عذاب ) …..
/ / /


الحياة كلها كرم .. تعشى مع خوياك بالمطعم كل يوم والحساب قطّيه بينكم وكلن يدفع الا انت ناسين المحفظة بالبيت .. خمس سنين وانت ناسي المحفظه بالبيت وتعشّى بالمجان ( الحياة كلها كرم بكرم ) .. ويجي يوم من الأيام وتسوي عمرك كريم عليهم وتقرر انك تعشيهم على كيسك ( اللي قاعدن تحوش فيه تحويشة العمر من سادس ابتدائي ب ) وعازمين على حسابك سبعة نفر ماتعرفهم ولا عمرك شفتهم حتى ..ويختارون اطلز مطعم آسيوي .. وفي النهاية تخرج من المطعم وانت موقع على اوراق وكمبيالات هذا كثرها كلهن مديونيات .. وعطوك مهلة شهر للسداد ولا سددت وسحبوك الشرطة وجلدوك وخلوك تشتغل بالمطعم تنظف البلاط عشان تسدد اللي عليك ..( نصيحة لاتسوي نفسك كريم ولامرة وحده ..خلك مثل اول ولاتهتم الحياة كلها كرم بكرم)
/ / /


اعلان






( شاي منعنش وكورسان جبن) .. قمة المتعه لاصرت غايبن عن دوامك الصبح ومقفلن جوالك وساحبن على مديرك وانت تدري انه بيجلدك بكرة بلفت نظر والا حسم ثلاث ايام ..قمة الرفاهية … وصاحي الساعة 9 ومروق على الأخير بعد منت متحلمن بفك وافك ماسكن يد نوال الزغبي .. قمة المتعة … وقاعدن على النت تصفح جرايد اليوم تدور فضايح جديدة زي الشباب.. قمة الرفاهية … والأبتسامة شاقتن وجهك بدون سبب يذكر .. وقدامك كاسة الشاهي مضبطتها وخيتك اللي ماتبي تعلم باسمها وحاطة لك السكر والنعناع برى عشان توزنه بمزاجك .. قمة الرفاهية … والكورسان المسخن بالمكوى ولاصقن القرطاس بالسندوشت .. قمة الرفاهية … ماسكن غرشة السكر وملعقته وقاعدن تفنن بتضبيط الكاس لك مزاجك الخاص وتمسك النعناع بلا رحمة وترفع يدك فوق تبي تحطه بالشاهي وهو يصايح ومتمسكن باصابعك وتغرقه بكاسة الشاهي ليييين تطلع ريحته .. قمة الرفاهية … وتقعد تستمتع بكاس من الشاهي اللي صايرن عصير قصب من كثر منت محليه بالسكر .. وكورسان الجبن المحرق نصه …… قمة الرفاهية
/ / /


انت نحيف واخوك دب .. يومنك صغير امك كانت تحط لك الرضعه بقطرة العين – واخوك الدب يحطون له الرضعه بترمس الشاهي قطع لحم .. يومنك بالمدرسة ويزهمون على اسامي الطلاب بالفصل كلهم الا اسمك محدن شايفك .. واخوك الدب اول مايزهم المدرس عليه بالفصل هو ؟؟ مهوب شايفن غيره بالفصل .. توقف عند جدار بيتكم يحسبونك الناس خط بجدار .. واخوك الدب اذا وقف عند الجدار يحسبه المار هو الجدار .. لابغى واحدن يعطيك كف مغير يتقنصك عشان يصيدك بالكف .. واخوك الدب اذا بغى حد يعطيك كف يضرب بأي مكان بالهواء تجي فيه صح .. لا بغيت تروش يغمسونك بكاسة ماء تقال شابوره بشاهي – واخوك الدب لابغى يتروش ودوه مغسلة سيارات .. انت لابغيت تحتسي يطلع حتسيك مسرع – واخوك الدب يطلع حتسيه بطيء .. لابغيت تاكل مغير بمصاص من صغر فمك – واخوك الدب لابغى ياكل وكلوه بكريك .. انت لاجاء واحدن يسلم عليك مد لك اصيبعه الصغير – واخوك الدب لاجاء واحدن يسلم عليه حضنه .. ويجي لكم يوم يالسرابيت وتجمعون وكل حاطن يده على ظهر اخوه تبون تأخذون صوره ذكرى .. ( تطلع الصورة كنكم (مسجل رافعن إريله
/ / /


رسالة لقد ربحت مليون ريال الرجاء الأنتصال على الرقم …. لأكمال البيانات .. اكملناها ..سوف تصل رسالة بعد يومين تحديد موعد الأستلام .. وش ذا الحمد لله لك يارب .. هذا بفضل الله ثم بفضل شامبو صانسيلك ضد الكلف .. (( اموت فيك ياصانسيلك شاركت بمسابقتك وفزت المليون )) مع اني منيب خابرهم كاتبين الجائزة الكبرى مليون اللي اذكره ان الجائزة براد شاهي مطلي ذهب .. لكن ماهيب مشكلة يمكنهم زادوا الجائزة .. الحمد لله لك يارب .. رحت وعلمت اصحابي وكلن صار يحبني اصحابي اللي اعرفهم مايمرون ولا يسألون غير مرتن كل سبع سنوات صار يمروني باليوم سبع مرات .. وناس ماكان بيني وبينهم الا رمي سلام من بعيد صار بيني وبينه تبويس وحضن بعد .. واصحاب اصحابي … وناس جيران اصحابي .. وآدم السوداني اللي ماعمره دين احد لو عسكريم ( طز والحس ) مايدينك لو بتموت عليه .. صار مضبط لي دفتر ابو اربعين لحالي مسطرة وملونه بالشتاكيل وانواع اللصق نجوم وفواكه وعقارب .. وانواع العزايم مفاطيح واشهى المأكولات في افخم المطاعم اللي كنت اخاف حتى اناظر فيها ويقولون لي ادفع فلوس عشانك ناظرت .. عطيت صديقي سيارتي الجي تي اللي مسجلها ب 1000 ريال اغلى منها عطيه ماوراها جزيه .. بعت البيت بالحريم اللي فيه .. رهنت اخوي الصغير بمحل جوالات وطقمت بداله اطلز جوال نوكيا يشتغل بالرقص وكله على الفواتير .. الرمله اللي عند البيت كتبتها بأسم واحدن مااعرفه سلم علي.. لبست اكشخ الكرفتات والشراشف الأفريقية بأحلى الألوان الحديثة اصفر واحمر اسود ابرتقالي مافيه غير الوان صارخه تجهر مع الشمس وكله على الفواتير .. حتى عطر اخوي الكبير اللي بغرفته وكاتبن عليه ممنوع اللمس .. اشتريته منه بـ100 الف وكله على الفواتير .. جاء يوم الرسالة الكل يدق علي وانا مصرفهم ومتخبي براس جبل تحت برج الأتصالات بعد عشان مايقطع الأرسال متربع احتري الرسالة ماسكن الجوال من الحماس بيديني الثنتين ومبقق عيوني بهالليل كني بومه .. في لحظه وصلت رسالة على نغمة سو ياسو حبيبي شوتوه .. من الحماس فتحت الرسالة بأصبعين .. جار فتح الرسالة نص الرسالة ( هههههههااااي تعيش وتأكل غيرها .. تذكر يومنك تخليني اغسل راسي بالببسي تقولي ينعم الشعر ) ….
/ / /


لو كل المسؤولون اصبحوا مسئولاً واحداً ..ولو كل الأصوات اصبحت صوتا واحده.. ولو كل اخبار الجرائد ركزت على خبراً واحداً ..ولو كل الأفكار اصبحت افكاراً عاقله …. ثم قام هذا المسئول الواحد.. بمسك الجريده الواحده .. وقرأ الخبر الواحد ..بالتفكيير العاقل ..ثمم رمى بالجريده على الأرض رمية مسئول عاقل ..وصرخ عالياً بالصووت الواحد ( آجلـــنـــا (الدراسة
/ / /


على قولت الفنان حسن زبادي: وانا شارب سجارة بني ( بني .. بني )** حاسس اني بطير كالجني ( جني جني ).. وقاعد بالحارة بفحط ( بفحط بفحط)** والكفرات سامعها تعطعط (بتعطعط بتعطعط).. والدورية اللي وراية قدامي ** والشرطي بيتكلم بلسانه ..سمعه بيتكلم وبيلخبط .. (بيييلخبط ): ياعمي وقف .. ياسيدي وقف …. وانا مسنن مكينة الددسن ( الددسن الددسن )** ومشغل فهد بن عبد المحسن ( محسن محسن ).. داعس وعمال بترقص ( بترقص بترقص ) ** والحلوة عمال بتبصبص ( بتبصبص بتبصبص ).. والحلوه ورايه مش قدامي ** والعمود مستني دماغي .. آجي افرمل بتلخبط .. (بتتتلخبط ) قالتلي : وققققف .. ياورع وقف
/ / /


كدش كديش كدشوني كداش.. ويوم تسأله قال عالموضه ..الشعر كنه حلاوه قطن والجسم مرطرط من الشحم لا مشىتحس الشحم مسوي جلسةشكشكه بجسمه.. ذابحه هارديز وكنتاكي والماكدونالدز يأكل البطاطس المقليه بزيت شلخالي منالكلسترولمع برجر بالتيس وبيبسي حجم فاملي .. يتمشى مغير الشوشه والعصافير تحوم حولها ؟؟ العصافير كلن بيلحق الشوشه عش له ..والغريب لا صاروا مجموعة شباب مكدشين تلاحظ انهم مايمشون جنب بعضهم كلن يبعد عن خويه مسافة متر ليه ؟ يخافون يتشابكون مثل قرون الوعول .. عاد حلها لا تشابكوا الله من البلشه مالك الا حل واحد تستخدمه وهذي نصيحة اذا واجهتوا لاسمح الله مشكلة تشابك كديش كيف تصرفون معهم ؟ مالك الا عود كبريت شبه واحذفه على الشوش واتصل على الدفاع المدني …
/ / /


قمة الأحراج يومنك مراهق وتروح لمسجد من المساجد الكبيرة عندكم بالبلد انت وصاحبك تبي تصلي الجمعة ومالقيت مكان تصلي به الا بالساحة الخارجية وآخر الناس انت وخويك ولا وراك احد ويصير ان خويك غلط بالصلاة وماقدرت وقعدتوا تضحكون انت وخويك وكلن يهمز الثاني وقالبينها لعب لأنه ماحولكم احد ويوم تخلص الصلاة ويسلم الأمام وانتم معه وتبون تقومون وماتدرون الا وراكم 20 صف .. قمة القهر لا صرت قاعدن مع الضيوف بعزيمة ومكشخ بمزاج ولازق بجنبك رجل تحترمه من قوة احترامك له تستحي حتى تناظر به ويجي واحدن من هالمبزر ماشي طبلونه بدون اي سبب مقنع والكل يناظر به ويتجه لك وكلن يناظر به ويلخك بذاك الكف بدون اي سبب مقنع ويهج على سرعته والكل يناظرخديداتك وانت مولع ومنحرق وتبي سبب مقنع
/ / /



تعليقات 28

  1. فك وافك الله يجزاك خير يــــــــــــاه كم لى ما ضحكت الله يوسع صدرك مثل ماوسعت صدورنا

  2. بصراحة هههههههههههههه انت رائع صرت من متابعينك اسلوب قمة في الوصف بإنتظار القادم

  3. ماشاء الله عليك اسلوب خطيرررر ان شاء الله دوم هيك رايق وتروقنا معاك الله يحفظك

  4. ياخوي اسمح لي اقولك انت منسسسسسسسسسسسسسم وعههههههههههههههههههههع اوما حقت زقارة بني هههه والا الدب والنحيف الله يونسك مثل ماونستني مع انه كان صدري ضايق من المدير تبعي اليوم

  5. 8) ياثقل دمك ولا نكته ابتسمت فيها ولا تمسحون التعليق لانها ذي الحقيقه ان نكته تلوع ا ل كبد

  6. هههههههههههههههههههه بغيت أطرش من الضحك هذا صاحي والا وش وجهه متورم كنه متفجر فيه لغم – برجر بالتيس هههههاااي والا يتشابكون مل قرون الوعول مايفكهم غير الدفاع المدني .. وااااصل تكفى بروح اقرأ الجزء الأول اول موضوع اقراه لك

  7. يا فك وافك الله لا يجيب لك مكرووة والله اني قريت الخايف واحد قبل 4 شهور ومن وقتها استني الثانية ولا تقطعنى تكغى تعدل المزاح بالغصب والله:D

  8. والله يامامادو ردك هو اللي يلوع التسبد او شكلك حاقدن عشانه ذب على الحضر في خفايف 1 فك وافك مواضيع والله هي المواضيع الوحيده الي اضحك عليها ببهاللقروب كله اكثر سالفة اعجبتني الأخيره

  9. بسم اللـه الرحمــن الرحيـــمـٍ .. قسسسمـٍ تهبــــــــــل … هههههههههههههههههههه لآتحـررمنـآإ تكفــى مـن جديـــدك .. 😀 لآهنــــــت ~

  10. جميل ما كان هنا, يخفف عن الإنسان من حدّة ما يشعر به كل يوم من مواقف وأشياء, لعله يسترح قليلاً ويبتسم 😀 بارك الله فيك وشرح صدرك للخير

  11. والله اني بتخبط بتخبط والكيبورد عايز يعلق يعلق والبطاريه قامت توطوط لأنك منسسسسسم منسسسسسم :$ دووووووس والقلب داعي لك 8) آهــــم حآقه حب آلوطن وفك وآفك :$

  12. هههههههههههههههههههااااااااااااااااااااااااااااي .. وقسم انك فللللله ياشييييييييخ 😀 بطني بينفجر من الضحك 😀 الله يوسع صدرك بالعافيه ويتحقق لك اللي ببالك يااااارب 🙂 ……….. والله انك مووب صااحي …. موووب طبيعي …. ههههههههههههههههههههههههههههههههههههههه …. ……….. رسمت الابتسامه على قلوبنا 😀 …….. مشكووووور والله يعطيك العافيه .. لاتحرمنا من مواضيعك الزينه 😀

  13. مع احترامي لكم ولكاتب الموضوع لما شفت الموضوع طويل قلت اشوف الردود اول اذا يمدحونه قريته وصراحة ماعجبني اي شي فيه ضيعت وقتي بس

  14. مبدع ودمك خفيف سوالف تفقع البطن بالضحك واكثر شيء اعجبني اسلوبك الرائع في التصوير والربط بين أمور ليس لها اي صلة ببعض لامن قريب ولا من بعيد مثل ربطك بين الحب بضم الحاء والحب بفتح الحاء ( الحب عذاب ) و(حب الحمام وحب الشباب ):D في السالفة الأولى وهي اكثر السوالف الي اعجبتني واصل في الخفايف

  15. والله اني اقراء وانا اخلاقي كانت قافله … لكن جعل حياتك ونااااااااسه مثل ماونستني

  16. ودي أعرف بس..يوم إنك خلصت كاتب الموضوع ما فكرت تعدل العنوان..!!؟ معقولة في ناس لهدرجة تبي تقنع نفسها بخفة الدم..!!:( أنا أقترح لو تكتب بطريقة أدبية أتوقع تكون أفضل من كذا ولا تنسى تغير العنوان

  17. هههههههههههههههههــ ما عجبني الا مسجل رافعين اريله هع هع هع ختيير هالخفااايف يسلموووووووووووووووووووو

  18. ماجد .. ابو رشيد يا شين الغيره بس ولا وايش قال ماجد قال ضيعت وقتي لا يالمهم وما عليك منهم فك وافك مبدع وربي وخفايف من جد تعدل المزاج قرب يا ولد ابي ابوسك بس قبلها اغسل وجهك هههه ابدعت بـ خفيف تعدل مزجك 1 واللحين 2 وفي انتظار 3 يالله خلاص وخر ما عمري رفعت بـ احد مثلك

  19. ههههههههههه :$:$:$:$:$:$:$:$:$:$:$:$:$:$:$:$ والله كل وحده احلى من الثانية وموضوع رائع اهنيك عليه وكنًي قريت كم رد مو عاجبهم الموضوع انا توقع انه واحدن حاقد عليك وقاعد يكرر نفسه انت مزعل احد ؟ اذا كان زعل على ذبتن منك مثل الأطفال نشتري له حلاوه مصاص عشان يرضى ماعليك وانا اخوك والله مبدع

  20. الله يجزاك خير فعلا اضحكتنى و انا ضايق خلقى و اللى ما ضحك بس لانه مو مستوعب شىء اسلوبك اكثر من رائع و انصحك تحاول الكتابه فى كل المواضيع عندك حبكة الكتاب ولا تستكثر بكره يقولون الكاتب فلان الفلانى بدا كتاباته بنكت و الله يوفق الجميع

  21. اسلوب نادر في الوصف والتعليق الى الآن اسلوب جديد عدة ابداعات وصف رائع زايد فكاهة زايد خفايف سهلة الهضم ولك تؤبرني شو مهضوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

خفايف تعدل مزاجك 2

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول