السلام عليكم ورحمة الله وبركاته …
مرحباً بوم … إن شاء الله يكون الجميع بخير
أثناء استعراض مجلد الصور عندي لقيت مجموعة صور أثناء زيارتي لجدة القديمة والي تعتبر حالياً معلم تراثي
جدة القديمة أو المنطقة التاريخية كما تسمى تقع في وسط جدة
<<< بالله يا شيخ ! أجل في وسط جدة والعالم يحوول يحسبونها تقع في أبحر وإلا ثول 
طبعاً وين تقع بالضبط مدري بس أقرب شارع لها … شارع قابل
… لأني رحت لها يوم نشدت هالذيب
يا شيخ عز الله أن العلم بحر
وإلا جهاز كبر يديك يقول لك رح يمين رح يسار .. يبي يجيك دوار خذ ثالث مدخل ثم ما تدري إلا وأنت طاب على المحل الي أنت تبيه
تحلف بالله كأنك مركب على باب يمين باكستاني يشتغل ليموزين في المملكة له 40 سنة وعارفن كل الشوارع
المهم ترا الجهاز للبيع [ عزيزي القارئ الموضوع كما تلاحظ نازل بعد منتصف الشهر وواضحة آثار الطفرة خصوصاً أن كاتب الموضوع بزع بعمره وسوا تاجر وطب في سوق الأسهم وأول طبة له توهق وتعلق ههههههههه ]
المهم وصلت لجدة القديمة
المنطقة عبارة عن عدة بنايات يمتلك بعضها تاريخ يصل إلى أكثر من 90 سنة
ولا زال الإهتمام فيها ضعيف … وإلى الآن لم يتم تهيأتها كمنطقة سياحية تاريخية
ولا زال بعض البنايات يسكن فيها بعض الوافدين خصوصاً من اليمن ومن أثيوبيا [ أو ما نسميه التكرن ]
المدخل الشمالي للبلدة القديمة
سميت بالله ودخلت … اخترت وقت كنت أعتبره مناسب
الجمعة الساعة ثمانية الصبح
عشان افتك من الزحمة
الجو كان مناسب شوي لولا بعض الرطوبة
وأنا الرطوبة أعتبرها ألد أعدائي ولا نيب أواطنها نهائياً لأنها تسبب مشاكل متأزمة للدببة
شي متعارف عليه أن الناس يجيهم حرقان بفخوذهم بس الدببة غير
بالشرقية مرة وبعز أغس طس حاضر عرس بالمريديان الي على كورنيش الدمام
خلصت من العشاء وقلت دام الحريم يخلصن آصل الكورنيش رجلية وأتمشى
لكن الرطوبة عملت عمايلها بأبو شاهي … وبدل مايمشي مفوحج عشان حرقان فخوذه
صرت أمشي وأنا مفوحج يديني … قد خبرتوا واحد يجيه حرقان بآباطه !
<< يا لحومة التسبد يا رجل
بعد ما دخلت واجهني هالمبنى والي تحته مقهى معسل وقهوة وشاهي [ أو ما يسمونه مركاز ]
وقفت اتأمل وحسيت فعلا ًإني في زمن ثاني
حسيت إني في زمن مشقاص والمترو وعبدالله فوال
موب زمن عبدالمجيد عبدالله ومناف أبو شقير وخالد الفيصل <<< بداء يكع … أعذروا أبو شاهي يا الربع تراه ما أفطر
حسيت فعلاً بإني راجع سنين ورا
حسيت بعلي عبدالكريم جاي قدامي وجالس يرتب الكورال ويوجه العازفين ثم صدح بأغنيته الشهيرة
فرحا فرحا … يا فرحنا الليلة بالعيد … وجانا العيد بالعودا .. يا ليل الأنس والأفراح
الله يحوم تسبد الكورال هههههههههههههههههه والله يا هم جاحدين التاء المربوطة ومسقطينه من دفتر عائلة الحروف الهجائية
أجل فرحة فرحة صارت فرحا فرحا خخخخخخخخخخخ
علي عبدالكريم ضف فرقته وكوراله .. عفوا كورالا 
فجأة وقفت فرقة الإتي قدامي
الكبتنية مع مروان بصاص
عبدالله فوال موجود
نزار عباس متأهب
أحمد جميل واقف زي الأسد ويحتري يوسف الثنيان يجي يهبل به
أحمد خريش … يخرش الخصم خرشة
يا هوه
نسينا جاري القرني … هههههههههههههههه والله زمن أغبر يا إتي
طبعاً أبو بصاص مايخلي عاداته مر بجنبي وعطاني كوع يحبه قلبك بس رجع يعتذر وقال معليش يا ولد ألعب معاك يله أمش
دقيقة دقيقة … أنا في جدة القديمة صح ! لازم أعيد صياغة الجملة
رجع أعتذر مني وقالي معليش يا واد أمزح معاك هيا أندر [ لا يدرون عني فريق ترجمة قوقل ]
نفضت غبار الذكريات [ تكفى يا الي مقطوع سرك في أمانة محافظة جدة ]
واصلت المسير
أنا لاحظت عندهم اثنين مسمى للشوارع <<< رايح لنيودلهي القديمة
فيه شي أسمه طلعة الدخاخني مثلاً
هذي تكون رفيعة شوي ويطلع لها الواحد
وفيه المسمى الثاني الي هو الزقاق
إذا الطلعة يطلعون معه
يا عيني يا عيني على البساطا <<< جته عدوى كورال علي عبدالكريم
البساطا البساطا … عشيني جبنة وزيتون … وبدك تغديني بطاطا
ودي أدري وش هالمسكة والجو عند هالي يبيع ! أجل صبح الجمعة وتبيع بطاطس !
يفطرون مقلوبة أهل جدة القدماء ؟
بين الماضي وبين الحاضر ! وين كنا ووين صرنا
في الخلف مبنى إدارة البنك الأهلي
صورة بانورامية
بيت آل عطية [ الظاهر زهارين ] بناءه في 1339 هـ
الله المستعان
ولاحظ آل عطية ساكنين في عمارة وحدة
يعني الجد والجدة وعيالهم وعيال عيالهم
ويمكن عيال العيال متزوج بعضهم
برضو مسكن ثاني قديم لكن لم يوثق بلوحة تحفظ أسم العائلة
أعتقد رباط الولاية نوع من أنواع البيوت المجهزة لتدارس العلم الشرعي
أنا قطعت البلدة القديمة من شمالها لجنوبها … الجهة الجنوبية منها تقع على شارع عام وتجاري
فصايرة الديرة القديمة من أقصاه الجنوبي فيها بعض المحلات
وصلت إلى بيت باعشن …
وقبل ما أتكلم عنه
البلدة القديمة فيها عدة مقاهي شعبية من داخل
أنا قابلت ثلاث مقاهي
والمقاهي هذي فيها تجمع كبير
لكن باقي البلدة خاوية على عروشها
بأثناء تجولي دخلت إلى متاهات صرت ما أعرف إتجاهي وين
قلت يا رجل صور بس ولنتب ضايع ولا عندي أساساً شغل مهم … يعني الدعوة تمشي
وأنا أصور … ما سمعت إلا خطوات شخص ما جاية من خلفي
وأنا في مكان مافيه إلا أنا والكاميره وهالخطوات الي جاية وراي
ألتفت بطريقة وأنا عيني في العدسة بطريقة توحي إني جالس أصور ويعنني ما اهتميت لك يا جاي من ورا
العدسة وقعت على شخص … عجزت تلقط طوله كامل مما اظطرني ارفع العدسة شوي لفوق
وأثر هذاك الطعر الي جاي
شباب .. وطول وعرض .. ولابس ثوب أبيض وحاط سجادة على كتفه اليمين
من الأخوة التكرن طبعاً
أنا قلت يا رب سترك
لأنه بتصفيرة وحدة يقدر يجمع كل هالي يتندحون بالمقاهي ويلعنون طاهر مافيني
فلفيت الكاميره وقلت كمل تصوير وكأنك مادريت به
مباشرة تذكرت موقف لواحد من عمومتي طلع ابتعاث لأمريكا قبل 20 سنة [ لحد ينقز لي من جيل برنامج الإبتعاث الجديد ويقول أصلاً هاك الوقت مافيه أمريكا ]
وكان العم مسير على ربع له في شقتهم وسهر عندهم وطلع آخر الليل ورجع لشقته
يقول وأنا أمشي وأثر الي يمشي وراي بخطوات بطيئة
ومافيه إلا أنا وهو بهالشارع
التفت وأثره عبد … والعبيد هناك مشاكلهم واجد
فخاف الرجال وقال بس … يبي ياخذ دراهمي ثمن يدخلني بأحد هاللفات ويدور مكب زبالة ويذبحني ويادار مادخلك شر
استعجل عمي بالمشي لعل وعسى تفرج … العبد الي وراه برضو استعجل بالخطوات
يقول مادريت إلا هو ينغزني من كتفي … بهاللحظة عمي يقول وش هالأدب … يستأذن عشان يسرق
ليته ذبحني فجأة ولا يلعب بأعصابي
يقول التفت عليه وأنا يا الله تشيلني رجليني وقلت نعم وش تبي
قال أعطني مالاً بحق المسيح [ يشحذ هههههههههههههههههههههههههه ]
يقول قلت الله يلعنك خذ البوك كله … ما تسوى علي الخرعة
نرجع لخوينا
مر من جنبي وسلم … أنا سلمت عليه وكملت تصوير إيقالني يعني ما اهتميت له
قال وش عندك جاي تصور ….
قلت بس نظامه هذا مضاربات وهواش الله يعين عليه
قلت أبد طال عمرك أنا أحب هالأشياء التراثية وجاي أصورها
قال أشياء تراثية !
قلت في نفسي الله يستر لايكون زعل وإلا جرحته مير ماقلت شي غلط بس هو مشتهي هواش
قلت أيه أشياء تراثية
ومير يطلق تنهيدة من صماصيم صماصيم قلبه … بغيت أخمه وأحضنه
قال آه يا زمن
كل دولا تركوها أهلها وراحوا بعد خط المدينة
مير يرتاح بالي وعرفت أن الرجل يحول وده يشكي وجلس ربع ساعة يبربر على راسي ولا أدري وش يقول وأنا نظامي معه تسليك
نرجع لبيت باعشن
باعشن هذولا ناااس راعين كييف .. ناس راعين مزاج
يكفي أنهم هم من ولفوا شاهي أبو جبل الي نشريه الحين
هذا عميد العائلة هذاك الوقت …
البيت متأسس عام 1342 هـ
تكية العائلة … ونلاحظ وسيلة الترفيه الوحيدة راديو … أو كما يسميه حسين عبد الرضا راديون
شكلهم يجتمعون بهالتكية ومافيه إلا قوة ضرب شاهي … وجراك
بذلك الوقت جدة ومكة والطائف كلها تحت الحكم العثماني
وباعشن عشان يضبطهم كان راز صورهم بالتكية
باب البيت … ومنقوش عليه تاريخ بناء البيت
وماشاء الله الباب للحين …. شغل أول ما يتحول
جزء من البيت … وضع فيه مسجد
>>>
خلصنا الآن من جدة القديمة
استغرقت اللفة تقريباً ثلاث ساعات ونص
بنفس السفرة هذي طلعت للطائف على أساس أروح لسوق عكاظ
وقبل ما أروح للطائف مريت أبحر وشفت هاليخت حق واحد من الربع
سبحان الله … الي يقارن بين كورنيش أبحر وكورنيش جدة .. فرق السماء عن الأرض
هذا لو أعتبرنا أن في جدة كورنيش
محاولة للتميلح على كورنيش النورس في جدة
لعل وعسى أحد هالبنيات تخق وترقم [ ملاحظة يمنع ترقيم الشريطية هههههههههه ]
وأنا طالع للطائف كان فيه استعراض من فريق للدبابات
وصلت للطائف ودقيت القارمن وقلت له ودن لسوق عكاظ
السوق يقع على طريق الرياض الطائف … تقريباً 30 كم برا الطائف
ويا حسافة المشوار بس
السوق مكان مغلق بسور … وله بوابتين وحدة منهم مغلقة
والثانية عليها حراسات أمنية …
وقفت الموتر وضربت ونزلت بوري طلع لي العسكري سلمت عليه وقلت وش الوضع ودي أدخل وأشوف هالمكان التراثي وأصوره
قالي والله المكان مغلق بأمر من خالد الفيصل ومايفتح إلا شهر في السنة
قلت يا ابن الحلال تراني ضارب مشوار من الرياض بس عشان أشوف هالسوق [ وهو الي يكزه ]
قال إذا كان خلاص لك 5 دقائق بس ممنوع التصوير …
قلت جزاك الله خير … وأبشر مانيب مصور
فتح لي البوابة وأنا ركض على موتري من الوناسة خوفي يهون
طبعاً أنا كنت ناوي أدخل وأصور ولا علي منه
وتفاجئت أن المكان من داخل لا يمت للتراث بصلة
حتى حامت تسبدي ولا قدرت أرفع الكاميره وأصور [ على أساس أنه موب خايف من الشرطة
المكان حديث إلى أبعد مدى
بيوت شعر
مكيفات
كأنه معرض …
مدري هل السوق التراثي أنقاض وتمت إزالته
أو أن المكان أسم على أسم … وفيه مكان آخر هو فعلاً سوق عكاظ التاريخي
الي عنده جواب يعطينا …
وأجيك أرجع للطائف مرة ثانية وأنا مار من المطار قلت حسافة هالمشوار بدون صور
وأطق لك صورتين عن قولة مارحت وصورت
وختاماً أتمنى الموضوع يجوز لكم
واغفروا لأخيكم أي زلل أو إن أصابكم بملل
تحياتي
تابع جديد رسائل المجموعة على تويتر
