تغطية – رالي ارامكو الأول للدراجات الناريه


الله يمسيكم/يصبحكم بالخير جميع اخواني بالقروووب


حقيقة هذه ثاني مره ارسل للقروب وترددت كثير بارسالها خوفا اني ما اوصل للجوده اللي يوصلون لها الزملاء
مالكم بالطويله طالت اعماركم
الموضوع اليوم بيتكلم عن تغطية لرالي ارامكو الاول للدرجات النارية اللي صار داخل ارامكو السعودية بالظهران يوم الخميس 24 ابريل 2008 وكان يوم كامل من 9 صباحا الى 7 مساءا ( تروه ياجماعه انطبخ داخل جاكيت السلامه لين قال امين )

بصفة عامة كان الرالي منظم جدا جدا جدا ( يكفيكم انها ارامكو بجميع ادوات ووسائل السلامه فيها )




لكن قبل ابداء ببرنامج الرالي . ودي اشكر اخوي المهندس/فيصل بادغيش (مسئول الانشطة بنادي الهارلي ) واللي كان حلقة وصل بين ارمكو السعوديه وبين قائدي الدرجات النارية

البرنامج

حقيقة كان موجة لجميع الاعمار من ترفية وتعليم خصوصا ادوات السلامه

بدأ البرنامج الساعه 10 تقريبا برحلة قصير بالدراجات النارية وكان عددها فوق 150 دراجة ( متنوعه مابين هارلي-بي ام -هوندا -صحراوي -سي بي ار – رياضية ….. الخ ) ونقطة البداية من امام مكتب التوظيف عند بوابة 40 و اخذ جوله داخل مجمع ارمكو برفقة دوريات الامن الصناعي والاسعاف

عند الوصول لموقع الحفل تم توزيع التيشيرتات والقبعات والدبابيس اللي عليها شعار الحفل

و اللي راح لمنصة الفرق الموسيقية واللي راح يتقهوى بجفريز واللي مر على مبيعات الهارلي واللي راح للالعاب التحدي مثل الثور الميكانيكي (حاطين ثور اتحداك تجلس فوقه اكثر من 20 ثانيه وماتطيح )
و حاطين العاب فديو ( ادور نص العيال . ماحد جالس عند دبابه ….. راحوا يلعبون خخخخخخخخ )
طبعا كان في حفل مشاوي و ايس كريم وعصيرات ( اااااااااااااخ بس فاتتني هالفقره – من القهر رحت تغديت تميس وعدس برا ورجعت )
من 11:30 الى 1 ظهرا بدا فقرات الدراجات الناريه من سباق اجمل دراجة ناريه ( من ناحية النظافه والاكسسورات و الترهيم )
والشباب من فتره لفتره يطلعون مجموعات ( 5-15 دراجة ناريه ) رحلة قصيره داخل الكمباوند Ride
من ضمن البرنامج كان هناك سباق الدرجات الصغيره جدا (حق الصغار) وهاتك ياضحك عالشباب اللي يخشون ببعض واللي تحك ركبهم بالارض بس كان شكلها كيوووووت فعلا
طبعا اللي كان حلو بالموضوع ، اي شخص يبي يطلع رحلة يوفرون له خوذه وجاكيت سلامه
الساعه 2:30 بدت فقرات الطفل من تعليم وترفيه ( فورملا الطفل ) يعلمونهم فيها اساليب القياده و كيفية اتخاذ قرار في اللحظات الحرجة . ترووه ابد ما كان جالس معهم
ومن ثمن ( شكلوها زي ماتبغوا ) قام مجموعه من الزملاء بشرح عن ادوات السلامه سواء بالدراجة او الخوذه او الجاكيت او الملحقات الاخرى واللي تعرف بـ P.P.E. (Personal Protective Equipmen او معدات الحماية الشخصيه
واخر سباق كان بين كل اثنين من الدراجات لافضلهم توازن ( بدون ما يحط رجله عالارض ) في اقل مده يوصلها للاخير …….. كانت من جد صعبه بس قويييييه وتبين مهارة التوازن والتحمل والتركيز
بالنهاية تم التقاط صور تذكاريه وبعدها تم تكريم الفائزين و المنظمين ومن ثم تم التجمع للمغادرة عند الساعه السادسة تقريباومرافقة دوريات و اسعاف التابعه لارمكو ، وبعدها اتجهوا الشباب عالهافمووون يكملون مسيرتهم الى هناك ومادري وش سووا بعدها ، لاني كنت معزوووم ———- >> صريح الولد ياحليله
الموووهم
ادرررررررري غثيتكم بالكلالام ، لكن هذه الصور

لحظة التجمع عند بوابة 40 التابعة لارمكو السعوديه الساعه 10 ص ,,,,,,,,,, ماشاءالله 150 دراجة نارية

لحظة دخول ارمكو السعودية ويظهر انواع الدراجات المشاركة

كانوا الشباب يطلعون بين كل فتره رحلة صغيره داخل ارمكو ,, بالصورة هذه لحظه رجوعهم من احد الرحلات

الزميل -راشد الدوسري – لحظه رجوعه وكان رديفه اخوه الصغير الله يحفظهم

الاخ – رياض الشعوان –

لحظه صف الدراجات النارية

احد الفرق الموسيقية سكول روك باند او فرقة الروك المدرسية

الجمهور ومتابعة لاحد فقرات الحفل

الشباب فاهمين الهارلي غلط خخخخخخخخخخخ

المهندس فيصل بادغيش ( ارمكوا السعوديه ) و حلقة الوصل بين المنظمين والمساهمين

كبير(عميد) قائدي الهارلي واحد المنظمين للسباق والمعروف بـ (( العود )) عادل الانصاري

محدثكم ( فديت يدك ياشيخ وماتشوووف بااس ) —–>> تراه تقطع على صورته

رجال الامن الصناعي بارمكو السعوديه بكل مكان لتوفير السلامه والتنظيم – فلهم كل الشكر والتقدير -وفي الصورة خالد الجود مسؤول الامن بالموقع

افراغ الطاقة قبل الدخول لسباق التوازن الاخ هاني الحوطي من اقدم ملاك هارلي السعودية

سباق التوازن

لحظه استعداد لسباق التوازن عامر الدليجان-هاني الحوطي ,,,, تحدي الكبار

احد فقرات سباق العربات الخفيفه قو كارت

ياحليله هالغربي وعياله ( شوفوا ياجماعه شلون ملبسهم الخوذه حتى الرضيع له خووذه . مو حنا منطلين عيالنا باحواض الهايلووكس !!!! )

تصدقون هالدراجة الناريه باقي لوحة ولاية انديانا عليها مافكها ——->> جلست اقردن فيه اشتريها منه وعي هههههههههههههههه

لقطة جماعية قبيل المغادرة

– ياجماعه في امريكي صغير انبطح قدامي ياهو قهرني ، عطيته خوذتي قلت له البسها عشان تطلع صورتك حلوه . لبسها ما عاد بان وجهه خخخخخخخخخ بداية رحلة المغادرة عند المغرب
لحظه الخروج من احد بوابات ارمكو السعوديه برفقة الامن الصناعي
كذلك برفقة اسعاف ارمكو
عند احد اشارات مدينة الخبر

Ride at night

بداية رحلة المغادرة عند المغرب

لحظه الخروج من احد بوابات ارمكو السعوديه برفقة الامن الصناعي

كذلك برفقة اسعاف ارمكو

عند احد اشارات مدينة الخبر

الزملاء لحظه توجههم للهافمون ,,,,,,,,,,,, رعاكم الله

بالحقيقه وقبل انسى . في شيً يقرقع بخاطري ودي اقووله من زماااان وهي نصيحتين ، وحده لاخواني الزملاء قائدي الدرجات النارية والثانيه للمواطنين والمقيمين المستخدمي للطرق العامه داخل المملكة، وهي :
1- يا قائدي الدرجات الناريه : لا اوصيكم بادوات السلالالامه ، خصوصا الخوذه و جاكيت السلامه و جزمة السلامة – وانتم بالكرامه – لان وبصراحه انا واحد من شهرين واغلب الشباب بهارلي الظهران عارفين حادث الانقلاب اللي تعرضت له بكورنيش الخبر وكيف ربي لطف ، لولا الله ثم الخوذه والا ما كنت جالس بينكم اللحين ( الخوذه انكسرت من ورا بسبب الرصيف ——>> متحسف عالخوذه القعيطي ) فما قلت هالكلام الا يوم اشوف بعض التهاون بلبس جاكييت السلامه اما الخوذه فما اشوف قصور من الجميع
2- مستخدمي الطرق داخل المملكة : مثل ماهناك قوانين للمركبات فلدرجات نفس القوانين باستخدام الطريق ، لكن القيادة والتحكم بالدراجه مهي مثل المركبات ذات 4 محاور ، يعني نبغى اللطف منكم بالتعامل ( لا احد يشطف احد او يحده ) لان وبصراحه اقولها لكم . سبب حادثي المذكور اعلاه هو شباب حادين موكبنا وبصراحه كنت المضحي بهالشي والله المستعان …. طيب وبعدين يوم تقلب وش الفايده ——–>> والله ياشباب حطيت علم السعوديه على جاكيتي عشان اقول لهم (( ياجماعه والله اني عربي مسلم سعودي لا حد يحدني وينشبني بالرصيف ))

ووعد مني احط لكم بموضوع مستقل سواء انا او المهندس فيصل بادغيش عن وسائل السلامه وطرق التشكيل الخاص برحلات الهارلي وكيفية التعامل معهم بالطرق و الشوارع العامه ومدلول كل حركة من قائد التشكيل

بالاخير لا يسعنا كقائدي وهواه ومحبي الدرجات النارية الا ان نشكر كل من ساهم على هذا الرالي بانجاحه وتوفير وسائل السلامه وعلى رأسهم

* هيئة المنظمين
– سمير رسلان – مدير عام الامن الصناعي بارمكوا السعوديه – رئيس هيئة التنظيم
-فيصل بادغيش – كبير المنسقين
– مارك ماكفارلن – منسق فقرات المسرح
– شاكر عسيري – منسق رحلات الدراجات النارية
-ديفيد تشرتش – منسث رحلات الدراجات النارية
– سامي العتيبي – منسق العرض
-عيسى الدوسري – منسق الالعاب
-عبدالله الزهراني – منسق تجهيز الموقع
– باميلا سنيكنبيرج – منسق العرض
– جون كيموكس – منسق دورة السلامة
– ستيفن – منسق تجهيز الموقع
– حسن عضاض- منسق متطوع
*ادارة الخدمات الاجتماعية
* الامن الصناعي ( منطقة الظهران )
* الفرق الموسيقية
– توفلونز
-سور ثينق
-بيشتولد
-اي ار & اي بلوز
-سكول روك باند
-ساندستوند
* المتطوعين
-طلاب ITC و CPC
– الكشافه
-جماعة الايدي المساعده
* المساهمون
-وكيل هارلي ديفدسون
-مجموعه ملاك الهارلي ( هوق ) يمثلها كل من : مجموعه الظهران ، مجموعه الرياض ، مجموعه جده ، مجموعه الكويت
( ونشكر الاخوان اعضاء هارلي اللي حضروا من الكويت و جده والرياض )
-بنك الرياض
-اوتومول
فريق ريد بول
* التموين
– مجموعة تميمي
-باسكن روبنز
-جوفريز

وتقبلوا فائق تقدير واحترام -الظهران هارلي هوق- ، عنهم :
م / ظافر بن محمد الشهري
م / فيصل بن عبدالله بادغيش


تعليقات 29

  1. المتني جدا المظاهر التي بدا عليها المشاركون في السباق من الاخوة السعوديين ،، حقيقة انا اعشق السعودية لانها منبع الاسلام ولان اهلها هم اكثر الناس محافظة على دينهم وعلى مظهر المسلم السوي المني منظر الشباب والرجال وهم بهذه الملابس الدخيلة ، انا لا انكر وجودها في بلدي فنحن نعتبر مقارنة بالسعودية دولة متحررة ، واعلم ان هؤلاء لا يمثلون الشعب السعودي الكريم وانهم قلة قليلة ، ولكن حبذا لو كان للحكومة سلطة على محميات ارامكو التي تقام فيها بعض الاحتفالات المخالفة للدين واتمنى من الله ان يديم الامن والامان على المملكة السعودية وان يحفظ اهلها وحكامها ويجعلهم ذخر للدين الاسلامي اخوكم راشد من الكويت

  2. لا أفخر أبداً أن تكون هذه الأشكال هي أشكال أبناء بلدي .. للأسف نحن قوم سذّج لا نجني من الشعوب الأخرى سوى المساوئ .. اللهم إن كان فيهم خيراً فاهدهم

  3. قبل كل شي اشكرك على هالتقرير الرائع لكن ياعزيزي نحن شعب السعودية شعب محافظ ولا هي من عاداتنا وتقالدينا هالامور يعني لو انه مافيه اختلاط كان شوي تنهظم لكن الاختلاط مانرضى عليه وانت شهري مشالله عليك وتنتمي لقبيلة ولك عادات وتقاليد مو هذي عاداتك وتقاليدك ياخوك هالتقرير يقهر مهوب يوسع الصدر ياحلالات بقذيفة ار بي جي تظف هاسلق لديارهم

  4. هل أنت متأكد أن هذه الصور في السعودية ؟!!!!!! عفواً على السؤال ولكن تعجبت حقيقة ولم أكن أتخيل أن يوجد مثل هذا خاصة في أناس أعمارهم كبيرة وليسوا شباب أو مراهقين ؟!!! منظر مؤسف حقيقة ويكذر الخاطر !! فرقة روك وتقليد عجيب لثلة هي رتبة متدنية في مجتمعها !!! أسأل الله الهداية للجميع

  5. مشكوووور على الموضوووع وعلى الجهد المبذول من ارامكو في العرض الي قدموووه ويا اخواني انا اول ما شفت الموضوع عرفت انه في ناس راح تقول مخالف للديين ومخالف للشريعه يعني انا ماشفت شي فيه غلط ناس وعلى دببات واللبس ربناا ما قال لا تلبسو جينز وتيشيرت الرجال كفى ووفى بدال ما تذموه اشكروه

  6. اشكر الاخوان الثلاث اللي علقوا عالموضوع الى الان لكن يبدوا لي اني ساقوم بالرد عليكم كلكم من منظور واحد اولا انا ما ادري . تشرهون عاللبس والا عالهوايه اللي نمارسها نفرض انكم تقصدوا الاثنين … اللبس مو مكتوب ومقدّر على الغرب بس …. يعني انا كمهندس ما اقدر اداوم بثوب وغتره في مواقع انشائية … بعدين اي ستايل تقصده … اذا على العصبه اللي بالراس . فهي تلبس مع الخوذه عشان الشعر … غير ذالك بنطلوون الجنز … يعتبر اكثر البناطيل امتصاص للصدمات والاحتكاك بالازفلت لا سمح الله …. السفتي شوز ( جزمة السلامه وانتم بكرامه ) من اكثر ادوات السلامه فائده في حال الوقوع عالارض او اصطدام جسم غريب بالقدم…… طيب والان وين التشبه كما اسلفتم وللاسف الان سيضع تصنيف جديد لدول العالم الرابع وهي للشعوب اللي متمسكه بحذافير العادات والتقاليد ياجماعه . ارجوكم …. الله الله بالوسطيه …….. لا يروح تشددكم الى مالا يحمد عقباه …. كل اللي تشوفونهم فوق السعوديين يوم يصلون بوسط الساحه والكل يوقف احترام لهم …… نفترض اننا سمعنا توجهكم …….. بلا هواية ركوب الدراجه وبلا دبابات وخلوكم بثوب وغتره ( المستحدثه واللي كل يوم نشوف شكل لها) ترا الثوب والغتره مو مكتوب انها للخليجيين بس …. والجنز للغرب بس وليست من ايام الصحابه والسلف دام ان اللبس ساتر ولا فيه حرج فليه الاحكام والاجتهادات الشخصيه منكم ياجماعه اتركوا عنكم التحجر والتشدد ….. انا ابغى واحد يكتب لي الان ايش ضرينا السعوديه وسمعتها بحركاتنا هذه ؟؟؟؟ محافظين على ديننا وعلى مملكتنا و صححنا النظره السيئه عن المجتمع السعودي وفوق هذا كله ….. كل اللي تشوفهم امامك مسئولين ودكاتره واطباء ومهندسين ومحامين وطيارين و و و الخ يبدوا لي اني اعطيت الموضوع اكبر من حجمه …. لكن انا طالبكم انكم تتركوا عنكم الفكر المتشدد والمملكة والاسلام بخير مع المذهب والفكر الوسطي اخوكم ظافر

  7. صباح الخير على الجميع الله يعطيكم العافيه إخواني معدين التقرير ومن جد كفيتو ووفيتو وماشاء الله عليكم اتمنى من كل الشباب اللي للاسف لاشغل ولا مشغله انهم يقضون وقت فراغهم ويتعلمون هذا النوع من الرياضه !! واحب اعلق على الاخوه اللبي علقوا على الموضوع اقولهم الله يهديكم تراكم ياجماعة الخير شايفين غلط هذولي شباب مو بنـــات علشان تقولون ذا الكلام وعلى فكرة يمكن بعد ماتدرون ذولي مهندسين ودكاترة ومدراء يعني تفخر الدوله بهم ,,, الله يهديكم بس ,,,

  8. في البداية كنت اناظر الصور وماني مصدق بأنة وصل فينا الانحطاط الى هذا المستوى يأخي مافية مشكلة تنظمون أحتفالات للدرجات النارية او للهارلي لاكن المشكلة العظمى هي الاختلاط بين الرجال والنساء يأخي راح اضرب لك مثال جيد الا وهو رالي ( حائل) كان فية تنظيم جيد ومسابقات ثقافية ونشاطات رياضية للجمهور وللمشاركين في الرالي بس ماجابوا ((( فرقة مؤسيقية سكول روك باند ))) هالحيوانات الغربية عليهم لعنة الله جميعن…. وحسبي الله ونعم الوكيل

  9. يا اخوان وش فيكم اكلتوا الرجال. الرجال جزاه الله خير عطاكم تقرير عن هواية يستمتع فيها هو وغيره من بعض الشباب السعوديين. وانتم جايين تقولون ليش تقلد الغرب بلبسك ولا هذا جاي من الغرب. ياخوان والله عيب على الاقل كلمة شكر له. المهندس ظافر مشكور على هالتقرير ومستنين تقاريرك الجايه.

  10. هلا فيك اخي الكريم موضوع اكثر من رائع وتنسيق جميل جداً على فكره وش رايك بعزف كمال النعيمي بالحفل خربها قام يعزف ميتل وهم ما كان بودهم هالنوع من العزف 🙂 وبالتوفيق اخوي

  11. يا اخي انا والله مستغرب من هالعقليات اللي يحملونها بعض شبابنا.. يا اخي قلدوا الغرب في العلم في الجد والاجتهاد في الابتكار… ما شفتوا الا ربع هارلي اللي كل ابوهم مخدرات وهوم ليس في انحاء امريكا… يا اخي انا عشت 13 سنة في الغرب ….ما ابدا فكرت اني اقلد هالجحلط الللي انتم تعتبرونهم مثل اعلى.. والله غريب جدا انك تجد من شبابنا المسلم من يعتبر هؤلاء مثله الاعلى…

  12. مشكور ياخوي عالموضوع المتعووووب عليه .. ولا يهمونك اصحاب اكلام الفاضي .. ياجماهة الخير هذه هواية زي اي هوايه ثانية ..واذا كان عالاختلاط فالاختلاط موجود في كل مكان مو بس هناك .. حرام عليكم الرجال كان بيجيب تقارير عن السلامة واشياء ثانية … والله اتوقع انه مابيرجع .. لكن دعوتي لك يا اخي ان تستمر في تميزك والى الامام انشالله … تحياتي

  13. تركب دباب هارلي – شي رااااائع ,, تستمتع بالقيادة – يا سلاااااااام ,, تنبسط – مافي مشكلة وهذا كله من حق أي شخص ,, لكن تكون مسخ للعلوج لااااااااااا,, تقلد تقليد اعمى لاااااااااااا ,, تشرب من مجاري تفاهات الغرب لاااااااا ,, مشكلتنا أننا لانعرف الوسط والعقل كما أمرنا ديننا ,, أما أن نكون ارهابيين ونفجر !! أو نكون مسخ ومقلدين لتفاهاتهم فقط !! والغريب أن الكاتب يتباهى بأصاحبه وكأنهم اخترعوا طائرة تعمل بالوقود الحيوي!! أو رشحوا لنيل جائزة نوبل في الفيزياء النوويه !! ومع احترامي .. اشكالهم لاتوحي بذلك .. واحد قاص شعره كأنه عضو فرقه راب أو هيب هوب والثاني – كبيرهم – لابس قبعة الكاوبوي شكله مايدري أن قبعة الكاوبوي يلبسها رعاة البقر عندهم!! يا اخي التقليد يكون بالأشياء التي تنفع البشر ,, وليس بالتفاهات على الأقل الدبابات اللي يركبونها هي من صناعتهم بينما نحن لانعرف حتى نصلح الإطارات المثقوبه ,, لأننا نطلب من العامل الأجنبي اصلاحة في البنشر ,, عجبي منكم ,, على فكرة – أنا انسان عادي يعني مو مطوع – بس بصراحة لما شفت الصور ماقدرت اهضمها – لأنها ضد الفطره ,,

  14. ربي يعطيك العافيه على هالتقرير وياليت نلاقي شويه اهتمام ماقصرت تقبل تعليقي

  15. أول شي السلام عليكم… ثانياً أخي العزيز بصراحة هذا مايصير سكول روك باند وخربطة لا أعتقد أي حر سيرضى بوجود هذة الأشياء وغيرها على أرضه … وأنت إن شاء الله حر …

  16. تقرير روووووووعه من مهندس رائع ماقصرت واستمتعت جدا بالموضوع 🙂 ياليت فيه للبنات كل شي لكم يالشباب لنا الله حقيقة لأول ثلاث تعليقات ابسألكم انا وين الغلط فيه ؟؟!!! الرجال مصور لنا هوايه يحبها ومصور هالحفل الجميل مادري حقيقه عقلياتكم ذي كيف تفكر مع احترامي الشديد لكم قواك الله ومنتظرينك بمواضيع اخرى =)

  17. والله وأقسم بالله إني اول مره أدخل للردود كله بسبب هالموضوع المخزي !! شيبان كبر جدي حاطين قصات وعلى دبابات ،، يلعن ام التطور والتقليد الاعمى ،،والله إنفقعت مرارتي لما شفت هالمناظر وهي عندنا بالسعوديه !! كنا نضحك على الدول المجاوره وغيرها وصارت البلوى بيننا !! لا وشووف الديوث هذاك اللي مركب بنته وراه (( ينقاله متفتح)) وأي تشدد ياأخ العرب اللي تتكلم عنه والوسطيه هذي !! صاير مفتي الديار النجديه !! لامرحبا في وسطيه انت وأمثالك تتبعونها .. ×× ونقول نبي خير وأمطار وربيع وعدم غلا أسعار ونصر للمسلمين بالعراق وفلسطين و .. و.. .. الخ وهذولا بيننا !! (( بيان للزوار من الدول الأخرى : ** إننا براء من هؤلاء **

  18. ياخي والله مو مصدق اللي اشوفه !! وصل الامر عندنا كذا !! يافرحة الغرب فيكم ياطقة الهارلي . معقوول هذا عندنا بالسعوديه !! كبار سن وشباب وبنات بالاشكال .. صاحب الموضوع يقول لاتشددون وخلوكم وسط !! أنا اقول ان كانت الدعوه كذا لاوالله تشددوا وطز بهذا الوسط

  19. الحين بانت ارامكو بالله شف البنات مع العيال لا وفيه صوره مغبش على كتوف وحده و سيقانها الى حتى الان وانفضحت ارامكو وسلام

  20. شف ياأخ الشهري أنت من قبيلة مشهورة ومعروفة وترفض حضارات الغرب الدسيسة ومنهم علماء وأطباء ودكاترة في الجامعات ومن منا لايعرف الدكتور أحمد بن ظافر القرني رئيس قسم هندسة الطيران والفضاء في جامعة الملك فهد للبترول والمعادن وعضو ناسا والحاصل مرتين متتاليتين على أكبر وسام في المملكة من يمين أبو متعب وهو وسام الملك عبدالعزيز فئة أ وهناك الكثير من هذه القبيلة التي نفخر بها ممن رفعوا رأس دينهم ووطنهم أمام العالم وعقبال الريادة بإذن الله أما هذه العادات الغربية المقيتة فنرفضها نحن سكان المنطقة الشرقية وننبذها بكل صورها يااخي ناخذ الشي المفيد نعم مهما كان أما دبابات وهارلي ديفينسون وأشياء كلنا نعرفها ومايحصل في كورنيش الخبر والدمام نعرفه جيدا أتحداك تروح أمريكا وتلبس شماغ وتصلي وسط ساحة هناك وتظهر ثقافتك مثل مايفعلونه للأسف قلة من شبابنا هنا في بلد الحرمين وللعلم شباب الدبابات عندنا من مناطق متفرقة أكثرها تركيزا ( سكن أرامكوا أمريكان ومتأمركين ,و القطفان من أصول إيرانية فارسية) هؤلاء هم أكثر اللي طايحين فيها وتشوف الازعاج والدعس وتشوف بعض ( أقول بعض) أشكال الانحراف الشاذ في بعض سائقي الدبابات وقد رأيتها بأم عيني بكورنيش الدمام وطبعا الحفلة روك أند رول مااشوف احد علق عليها ماشاء الله حفلة وتقول لاتكونون متعصبين ووسطيين ياحبيبي روك اند رول مره وحده ماشاء الله صارت شيكاغو ماهي الظهران على كل حال نناشد السلطات باحترام ديننا وتقاليدنا قبل كل شي وان يمنعون هذه المظاهر النشاز في مجتمعنا ولاضغينة بيننا ولكن هذه وجهة نظري وأعتقد أنها وجهة نظر المجتمع. سلام

  21. ليس العيب في هواية الدرجات وليس الحرام في الترويح عن النفس بالمباح ولكن العيب كل العيب والحرام كل الحرام التشبه بالكفار في الملبس والمظهر والاختلاط بين الجنسين بشكل فاضح وعلى أرض الحرمين الطاهرة

  22. ايش هذا اللي قاعد يصير مو معقول ابدا انا ما اتكلم عن هواية دبابات لكن عن التقليد الاعمى للحياة الامريكية بالذات والله طلبت من شخص جنبي يطالع الصور ولا يقرأ التعليق بعدين سالته من وين هذي الصور قال من امريكا بس غريبة فيه حريم متحجبه يا حبيبي البس جنز وسيفتي شوز زي ما انت عايز لكن اللي ظاهرين بالصور ماهم متسابقين هذولا ليه لابسين كذا لا والفرق الموسيقيه اشد وأنكى وانت يا ظافر فرحان انه انتم مقلدين الامريكان وجاي تنقل كل مظاهر الفسق

  23. والله ماقول الا بيض الله وجيهم وحماكم الله من الحوادث اما للاخوان اللي يدعون الوسطيه اعلالالاه الاسلوب التهجمي عالرجل واضح منكم وهذا ما يدل لا عالاسلام ولا طباع المسلم اصلحكم الله بس م.ظافر الله يوفقك و ابد مؤيدين لك وبشده على المواضيع القادمه بالتوفيق

  24. يعطيك الف عااافية عالتقرير المتعووووب عليه شكرا لك باعطاءنا نبذة عن ماا يدور بارامكو ابدعتوااا بالتقليد تقووول طبق الأصل وياليته يفيدنا ويرفعنا ونصير من دول العالم الأول !! لاحول ولا قوة الا بالله أفعل مااا يحلو لك ولكن لاتجعل المنحرفين والسافلين قدوتك .. بارك الله فيك..

  25. لا أصدق أن هذا يحدث في بلدي ولكن المسئولية على من يسمح لهؤلاء السفهاء بذلك. أيضاً يسيرون في مسيرات في جميع أنحاء المدينة كيف يحدث هذا وأين رجال الأمن من هذه المسيرات التي تسبب الزحام ومضايقة المواطنين. ترك مثل هذا قد يجر أكبر من هذا. ولا تؤتوا السفهاء أموالكم.

  26. صدق الرسول صلى الله عليه وسلم لودخلو جحر ضب لدخلتموه يا ليت الانصاري العود كان قدوته وتشبهه بانصار الرسول صلى الله عليه وسلم

  27. مره حلو الموضوع يا ناس كلن له هواياته اللي يحب جمال واللي يحب دبابات تخلف بجد

  28. هل تعلم ماهو قمة التخلف هي خجلك من عاداتك وتقاليدك وثقافتك والانسياق لعادات وشعوب مغايره عنك شوف اليابان اول مابدت ترسل طلابها الى الغرب اتت هذي الدفعه بعادات غربيه اضافه الى علمهم اعدموهم وقالوا احنا مانبغا احد يدخل علينا عادات الغرب احنا علمهم فقط وماشاء الله شايف الشباب في الصور خلاص تقول غربيين بس باقي الطخه ماغيروها حتى اغانيهم جبناها اكيد مايصير كيف بسوق هارلي واتسمع اغاني سامريه ولا انبعاويه مايصير ياخي ان كنتم ملزمين على المعاصي والاغاني شغلوا شي من وطنكم ولا في قانون يقول ممنوع تتسمع اغاني عربيه وانت تركب الدباب ولله في خلقه شؤون بالنسبه للعمل انا مهندس زيك وزميل في الشركه بس ما ارضى اني اشوف هذا في بلدي

  29. والله ما أدري هالناس تتكلم بجد ولا تتكلم من منطلق بس اني أبغي أنقد كلشي يعملونه الناس يا جماعة وهل تتوقعون الشباب يلي بالرالي يركبون الدراجات بالثوب والغترة والعقال ؟؟؟ وبعدين شو خص الشيبان أو الشباب بالموضوع … شو دخل العمر … طيب ليش ما تعتبون على الشيبان يلي يمارسون رياضات ثانية أو يروحون على مدرجات الكورة علشان يشوفو مباراة كرة قدم … ترى هذي رياضة وهذي رياضة بعدين للأخوة يلي قالو انهم ضد اللبس … طيب ليش ما اعترضو على لبس لاعبين الكرة (الشورت القصير) ترى هذا فيه تقليد كبير للغرب … لا وكمان ان لبس الشورت غير ساتر بينما لبس الشباب يلي بالرالي محترم جداً وماله علاقة بتقليد الغرب لان المهندس شرحلكم شو سبب لبس كل قطعة وأيضاٌ للأخوة يلي قالو روحو قلدو الغرب بالعلم والتطور وليس بأشياء تافهة … اعتقد ان المهندس ظافر قلد الغرب بالعلم وحصل على شهادة عالية بالهندسة قبل ما يقلدهم بركوب الدراجات (إذا أصريتو انكم تسمو ممارسة هالرياضة تقليد) بينما أتوقع ان أغلب يلي ينادو منكم بالعادات والتقاليد وعدم التقليد هم بالكثير من حملة الشهادات المتوسطة أو الثانوية يعطيك العافية مهندس ظافر على التقرير الرائع

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

تغطية – رالي ارامكو الأول للدراجات الناريه

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول