باريس، قصة عشق لاتنتهي ج4


عودة مع الجزء الرابع
وكل عام وانتم بـ خير بمناسبة العام الجديد
جعلها الله سنة خير وسعادة على الجميع

في هـ الجزء راح نكمل يومنا اللي قضيناه بـ متحف الشمع والجولة في نهر السين
بعد مانزلنا من الكروز ومشينا عند الرسامين والشحاذه الفرعونيه
طلعنا الدرج وكان قدامنا هـ المملوح


موب الشايب المملوح لالا اقصد البرج خخخخ
وهنا من تحت البرج مباشرة




طبعاً زي اي مكان سياحي لازم يكون موجود ناس ترقص وعالم مجتمعين حولهم ويصفقون
اصلن هناك لو تطيح تجمعوا حولك يحسبونك ترقص

هذا تمثال المهندس غوستاف إيفل اللي صمم البرج

شي طبيعي تكون زحمه هناك و انواع الطوابير
كلهم صافين بـ يشترون التذاكر ويطلعون فوق
يعني مالك حل الا تصف معهم وتقضي وقتك بالتفرج على خلق الله


جلسنا في الطابور يمكن ساعه
اول ماتدخل البرج تطلع بالدرج عشان اللفت اللي يوديك الدور الثاني
وهذا مدخل البرج واللي يشيكون على التذاكر

هذي تذاكرنا
الصعود لـ أعلى دور بـ 12 يورو للـ شخص

احم تراي صورتها عقب مارجعنا للفندق خخخ فضحتني ورقتهم اللي ورا
من داخل اللفت

وصلنا الدور الثاني
اول نظرة على باريس من فووووق

نهر السين والجو كان شييييي

قوس النصر من بعيييييد

هناك منطقة اللاديفانس واللي فيها كل المباني الحديثة و ناطحات السحاب

نهر السين من الجهه الثانيه
ترى ماقعدنا نتفرج على المباراة اللي تحت خخخخ من كبرهم اصلن

حدايق البرج

شوفوا الناس تحت وش صغرهم

باقي البرج
جايينك جايينك يالدور الثالث تولم

بعد ما ضربنا الهوا الين قلنا بس
رحنا عند لفت ثاني يطلعك الدور الثالث اللي هو أعلى شي في البرج

وهذي لقطه من داخل اللفت

وصلنا
عاد هذا مشبكينه كللله موب زي اللي تحت بس نصه

تشوفون الاثنين اللي هناااك .. ذولا تبع قروب عراقي وش كثرهم في البرج
يوم كنا باللفت كانوا يتطنزون في واحد اوروبي .. ذبوا عليه ذبه قوووويه
انا غصب قعدت اضحك .. قاموا يناظروني قالوا يؤؤؤ هذا شكله فهمنا
قلت ايه ايه فهمتكم قالوا من وين قلت سعودي قالوا احنا من العراق
ومن عقبها صجوني فوق كل شوي جايني واحد ممكن تصورنا
بغيت اقول خلاص امزح منب عربي فكوني بس

هنا اول اطلالة ع الحدائق من قمة البرج

قبل شوي في الدور الثاني كانوا الناس صغار وشلون الحين طلعوا أصغر من الصغار << يامصلك بعد

زوم زياده

نهر السين اقين

شوفوا منطقة اللاديفانس من هنا طلعت احلى بكثييييير

و قوس النصر طلع أوضح و أحلى

وهذا متحف اللوفر في الدور الثاني ماكان مبين

لقطه مقربه على الكروز والمباني حول النهر

وهنا زوووم على منطقة اللاديفانس وناطحات السحاب

داخل البرج كانوا حاطين كل دولة وكم تبعد عن باريس وبالتحديد عن برج ايفل
وووووهـ من شفت الاخضر فززز قلبي

ذبحنا البرد فوق ونزلنا نتسدح في الحدايق تحت

العالم اللي هنا كلن يصور مع البرج بـ شكل
اللي ماسكه واللي متركي عليه انواع الاختراعات

أحلى شي ان الشرطه كانوا يدورون على الجالسين
اذا شافوا شباب صغار ومعهم من المخزي على طووول ياخذونه منهم
مدري ليه حسيت بالانتماء يوم شفت هالشباب خايفين ويغبون اللي معهم << احم

جلسنا شوي ومددنا على هـ الثيّل ابد مانقصنا الا دلة القهوه والسكري
<< هذا لاصرت في كورنيش الخبر موب هنا

عاد صدز يوم جا طاري القهوه قلنا لازم نشوف لنا اقرب كوفي
قمنا وتمشينا وطلعنا ع الشارع اللي ورا الحدايق
بصراحه هـ المكان والشوارع والمباني خققآآآآآن تهيّض للتصوير بقوووووه

في هـ المكان أخذت لقطتي المفضلهالأماني .. كثـار !

سألت عن هالمبنى وشو .. قالي واحد انه مدرسة عسكرية
مدري عاد هو صرفني والا صدز

تمشينا و اخذنا كوفي و رجعنا نتقهوى في الثيّل

تشوفون المسرح اللي ورا
كانوا يضبطونه عشان الحفلات اللي بـ تكون في تاريخ 14 / 7
وهو العيد الوطني لـ فرنسا
نصيحه اللي بـ يسافر لـ فرنسا لاينسى هـ التاريخ
كل الاسبوع اللي قبله كان احتفالات ومناسبات .. من حظنا

بدت تغرب الشمس

هذا نفس المسرح يجربون الاضاءة والسماعات

البرج كل فتره يولع شوي بهـ الشكل والانوار تتحرك فيه بسرعه
يصير البرج كنه يلمع يالله يالله لقطت له هـ الصوره وطلعت تمام

وفي هالتوقيت اخذت لقطة البرج الليلية
سبق وارسلتها في القروب .. شوفوها هنا :
Eiffel Tower @ Night

جلسنا شوي الين ذبحنا البرد وقلنا خلاص بـ نرجع للشانز نتعشى
وهذا طريق العودة مروراً من تحت الجسر << يمديكم خخخ
حسيت اني سليمان العيدي بالحج








طبعاً تشوفون البرج طالع أزرق وفيه نجوم صفراء
هذا علم اييييييش يا شطار ؟!

ايووووووه
صح عليكم
علم الاتحاد الاوروبي << لايكثر تكفى
لان الفتره هذيك كانت فرنسا تترأس مجلس الاتحاد الاوروبي
فـ مخلين البرج بالليل يمثل العلم

هذا النفق ماغيره اللي توفت فيه ديانا بس بالليل ومن زاويه ثانيه

وصلنا الشانز و كالعاده لازم نتفرج على المهبل اللي يترزقون بالرقص والتنكس

بعد التمشي شوي .. تعشينا في مطعم وجبات سريعه على الشانز اسمه Quick
أكلهم عادي و اسعارهم رخيصه يعني كنك في ماك

بـ كذا نكون وصلنا لـ نهاية الجزء الرابع من رحلتي إلى باريس
و أتمنى يكون نال إعجابكم واستحسانكم

أشوفكم يوم الاربعاء القادم ان شاءالله في الجزء الخامس
مع عظمة الموناليزا في اللوفر !
كونوا بـ القرب دائماً

www.Rthaath.net/vb
D e s i n g
دعوة لـ كل المبدعين في شتى المجالات


تعليقات 8

  1. :$:$ السلام عليكم ورحمة الله وبركاته :$:$ يــــــــــــــا سلام الله يعطيك الف عافيه صور حركااااااااااات يـــــــــــــااااااااااااااااا حظك (اللهم صلي ع النبي )ابعد العين لا تقول حسدتك نفسي اطلع اسافر برا واتمشى الله يخلي اللي زيك يقربون البعي عن جد تسلم تــــــــــحـــــــــــــــــــــــsosoـــــــــيــــــــــاتي :$:$

  2. يعطيك الف عافيه وما الومك يوم شفت العلم السعودي و و احلى شي انك موجود فيها

  3. واوووووووو ماشاء الله من جد وربي خيااااااااااال امنيتي وربي ازور باريس 🙁 لا الجو ولا الحدائق وبرج ايفل بالليل يغني عن كل المناظر ياشيخ ربي يسعدك حققت لي نص امنيتي اني اشوف باريس وعقبال ماشوفها عن حق وحقيقه 🙁

  4. يعطيك الف عافية اخوي من جد خققان ولا برج ايفل هو لحاله يكفي تسلم يمناك يالغلا

  5. مشكور جدا على الصور الحلوووووووووه بالنسبة للصورة اللي تقول انها مدرسه عسكريه هذا الكلام صحيح وهي كلية الدفاع المشتركه وتمنح الماجستير وكلية الحرب العليا وتمنح الزماله حبيت اااكد لك كلام الفرنسيون

  6. اشـــكرك ع هذه الصـــؤر الجمـــيله فعــــلآ صؤر ولآ ارروع ارووع مكــآن يعيبنـــي الشــآنزليزييه رووعه هنـــآك كله عــــرب مشكووور عالصوور الرووعه

  7. ماشاء الله انا رحت وصورت نفس الاماكن بس ماكنت اعرف اسمائها وخصوصا المدرسه العسكريه اللي قلت بس من جد تصويرك روعه وش نوع كاميرتك

  8. مشكووور اخوي على الموووضوع الاكثر من رائع بصراحه يا اني خقيت خقتن قويه يوم شفت ايفل في الليل وااااو ماشاء الله عليك الله لا يضرك 😀

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

باريس، قصة عشق لاتنتهي ج4

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول