الورد .. طلبناه وهو ذابل !


سلام ياحلوين

شلونكم ياأصدقاني   .. بصراحة مجموعة رايقه بقيادة أبو نواف والبشكه اللي معه .. وفي الحقيقه أثبتت المجموعة أنها متميّزه بأعضائها اللي شرّفونا الأسبوع الماضي بمنتديات كواليس ووصل – الحمد لله – عدد الأعضاء قُرابة الألف عضو في خلال أسبوع – وهذي من نعمة الله عزّ وجلّ – علينا والشكر بعد الله لابو نواف اللي أثبت نفسه بوقوفه معي في كُل خطوه أخطوها وعسى الله يطوّل بعمره ويارب أصير نسيبه واقابله كل يوم


اعلان





 

خلونا من الكواليس ونبي ندحدر في الماااضوع المنشطح أدناه

دايم يقول لي جدّي الله يرحمه / لاوجع إلا وجع الضــرس ولا هم إلا همّ العــرس ..


انا عاد جامعن الثنتين مع مرتبة الشـرف ..

 

نصف أسناني محلحله والعـرس هاذاني أحلم فيه ليل ونهار .. أمي تقول بنزوّجك فلانه .. قلت ( لا .. فلانه مابيها .. فلانه ماتعرف من العرس إلا اسمه وجايني عنها خبر بعد أنها تطوّل في التلفون مع خويّتها بين عشاوين .. مابلا بربره جعل لسانها يطوى ) .. تقول الوالده ياحبني لها ( خلاص لاتعرس خلّك عانس طول عمرك ) .. قلت أبركـ !

 

وسُبحان الله وتمرّ الايام .. ومير اشوفها هالبنت اللي ذكرتها لي امي ظاهرتن من ملحمة قريبة من البيت وشاقلتن بيدها أربعة كيلو حاشي ومير من قزّنتي ماعاد فيها عرق .. قامت تنافض كنّ فيها سكني .. يادواتس السكني صدز والا وش اللي حادتس على أنتس تطلعين من البيت بليّا محرم وتدخلين في المحل مع العامل وتحاشرينه تقولين أنتس رجّال .. تزليلة الحيا ياجماعه .. عاد هي دواها العرس .. بس تفكّر في ( مستقبلها الزهري ) عشان تصير زي فلانه السمرا اللي باطراف السكّه ..

 

يقول مدمن الله يطوّل بعمره – وهو فاغرن فاه ومادّن ساقه وقلبه منغرف وواصلن وداي الدواسر – :
علام البنت تسفهني
==
وانا طول العصر محتار
تقول ابي المستقبل الــوردي
==
وانا اقول : على شحم ولايكثر يامره 

بيت الشعر ماقدرت أكمّله واطلّع قريحتي الشعريه إللي ماتفوح إلا قبل العشا بشوي .. والسبب ( مستقبل البنت المليح 

في بيت أبو ناصر جارنا ( خمس بنات ) .. طبعن كلّهم صبايا ومابعد دخلو عش الزوجيه الخاثر .. وحده تدرّس خياطه ومن خبرتها وهي تروح للمشاغل وتسولف مع الهنود وكل من مرّ مع الشارع درى انها بنت فلان وانها جايّتن ( تصلّح زرارن طايح والا كفتتن تبي تعدّلها ) .. واختها الثانيه تدرّس رياضيات ودخلت في سوق الاسهم وخسرت ماوراها ودونها وماعاد صرت تشحن جوّالها بمية ريال وكل مابغت تكلم رفيقاتها ارسلت كول مي ياشين الفقر ياجماعه .. اختهم الثالثه تدرس بالجامعه وعلى باب التخرّج من كلية الطب .. والضعيّفه كل يومن اشوفها عند المستشفى تراجع .. تحاليل وغربله ومرّتن لقيتها عند الصيدلية تقول ( بدّل علاجي جعلك الناجبه ابيك تعطيني غيره وقاعده تشّر على كرتون أحمر فيه ثلاث خطوط ) .. واختها الرابعه توّه متخرّجتن من الثانوية وتقول أبي ادخل كُليّة الحاسب ومن خبرتها وهي تلعب حبشه مع بنات عمّي ! .. مالك ومال الحاسب ياصفيه ! .. اختهم الخامسة الاخيره كل سنه ترسب وتعيد وتفحّط بمكانها وخوياتها تعدوها وهي شكلها مصممه تاخذ الدكتوراه بفصلها وتقعد عظم للمديره وراعية المقصف .. طبعاً مما يُستفاد من الكلام المذكور والمبطوح آنفــاً أن البنات كلّهم تجمعهم كلمتين يخططون عليها من سنّة جدّي – الله يرحمه – ( نبي نبني مُستقبلنا ) … مافيش أي حاقه .. مستقبلكم في الجيب بس لايكثر

 

البنات الخمس اللي ذكرت عنهم ( ذِكر تفصيلي كامل إلا ربع ) كل ماجاهم واحدن يخطبهم قالوا والحلق يتنافض ( نبي نبني مستقبلنا ) .. بس تقول كل وحده ( أخاف أعرس ثم يدمّر رجلي مستقبلي ) .. وهُنا ( المشكلة ) .. وهُناك ( الحل ) << حركة .. كنّي بدعاية تايد لتنظيف الخلاقين !

خلوكم معي طيّب ..

وحده وحده -الله يخليكم –

المشكلة طبعاً تقع على رأس الأخت ( المتنيّل بستين نيله ) .. أي مُستقبل وأنتي إلى الآن مارسمتي خُطّة حياتك الزوجيه مع زوجك اللي راح يكون لك عون على مسيرة حياتك معه .
أي مستقبل تعيشينه من دون ( أجمل مافي الكون ) .. [ البنون ] اللي هم زينة الحياة الدُنيا كما قال الله عنهم .
أي مستقبل راح تؤمّنينه بين
( مقلى بيض )
وخبزة توســت تصلّحينها قبل تروحين للجامعه 


أي مستقبل .. وخويّتك فاطمة طقّت لها بزرين كل واحدن أطلق من الثاني
صحيح أن الزوج يمكن يكون طفران و مقطّع ارباع ويمكن مايكدّ عليك ومايوديك لـ سوق حجاب لكن هذا مايخليك تفرّطين بزهرتك اللي كل يوم تذبل ومع مرور الوقت راح تموت

تأمين مستقبلك ضروري .. لكن ماهو في تأخير زواجـك عشان مقولة ( أركبي المستقبل قبل يشغلك بزرك )

طبعاً أنا طرحت المشكلة .. وبِحُكم أني ماخذ الماجستير من شارع منفوحة وتخصصي المهايط وقول الصدز .. فخذوا الحكمه مني ياحريم اليوم وياصبايا النوم .. خذوها واكتبوها على جباهكم بالخط العريض ( الحرمه زينتها وهي ورده وكل ماكبرت ذبلت وكل ماذبلت قلّوا الخطّاب وبتصير طول عمرها متوسده شهادتها من دون ماتشوف بزر يدعي لها باتسر إذا وسدوها القبر ! ) ..

قُلت وقوليَ الحق وصلى الله وسلم على نبينا محمد وأقِمْ الصلاة

 

:: مُدمن شاهي ::

 


تعليقات 42

  1. كلامك راااااااااااائع اخوي مدمن ,و واسلوبك جذاب جدا وهذا الشي مو غريب عليك ,, لكن فيه سالفه يمكن اكون جاهله فيها فا علموني ,, ويمكن تكون انت جاهل فيها فا انبهك ,, كلمتك اخر السالفه (( قلت وقولي الحق )) هل هالشي صحيح , ,, مو فامهمه , والله ,,, ياليت توضحولي اللبس الي حاصل ,, هالمقوله اتوقع لاتقال الا على كلام الرسول لانه كلامه حق ولاينطق عن الهوى ,,, لكن احنا بشر ,, وكلامنا يحتمل الخطأ والصواب ,,, ياليت تفيدنا اخوي ,, او انتبه لكلامك ,,, اختك ,,

  2. وه بس يازين اللي ينصح ويقوول حكم مير بنعنس ببيت أهلنا .ومحدن معطـينا وجه .. جامعه اربع سنين ونهايتها متزوجه والشهاده ابلها واشرب موويتها .. يعطيك العافيه مدمن ..واصل واصل .. وماعليك من العذال .. لبه عصااقيلك وي وي ..

  3. افااا يا مدمن يعني متمسك بكلامك .. ومصمم تنزله حتى هنا بالقروب!! خلك حبيب ولاتشـيًـش القصمان ترى والله مايصدقون خبر .. وتعليقي على الموضوع اتوقع وصلك عالايميل قبل لاتنزل موضوعك فالقروب … وتكفى ابتعد عن هالنوعيه من المواضيع والا بتفقد شعبيتك 🙂

  4. الكلام هذا لو تجي قبل 10 سنين بس راح تلقى ناس كتير يوافقوك عليه.. بس دحين الوضع تغير.. سار ت البنت مو اكبر همها في الحياة انها تتزوج او تكون اسرة واطفال . ابغى اعرف يعني البنت مالها حق تثبت نفسها وتثبت امكانياتها مو شرط لأي أحد بالدنيا ,لنفسها وبس.! ولا لازم يحكم على البنت انها تنحبس بالبيت واطفال وزوج!! وحضرة الزوج ولا همه يروح ويعمل الي يبغاه ولا على باله! الحديث ذو شجون.. وموضوع مثل هذا متشعب ومايحتمل طرح واحد فقط.. تحياتي.. عندي ملاحظة صغنوونة: بصراحة اسلوبك اكثر من رااائع الفكاهي الساخر ولكن لو تقلل شوية من العامية لان القروب هذا منتشر بكل مكان ومانبغى نحرم الناس روعة الاستمتاع بمواضيعك:)

  5. خطير ياخطير ، كلامك سليم وعين العقل ، تسلم حبيبنا مدمن وكواليس سجّلنا فيه ياغالي

  6. ههههههههههههههههههههههههههههه والله يا زينها زيناه مواضيعك ههههههههه

  7. كلامك هذا كله منتاز منتاز منتاز وعين العقل وضرس العقل وكل شي.. بس وش رايك باللي يجي يخطب وهو اصلا ماهيأ نفسه للعرس..!! هاللحين امهات الرجاجيل طايحين بطبع اقشر اطلب بنتس لولدي وولدي انشاء الله ربي بيرزقه بوظيفه قريب.. وبنتكم مهنا خوف عليه وابونا الشايب مهب مقصر معهم وبنعلفهم الين يرزقه الله خير ان شاءالله والله مانيب مجدوعتن بالشارع واهلي مايقدرون يصرفون علي وراه مايتوظف وظيفه سنعه ويضف بنت الناس ويحسسه ان له بيت ويصرف عليه من عرقه وااه اروح ملح مع عرقه بس وينه خله يجي < دخلت جو مع الماضوع وقلبت علي المواجع لاتخلين باتسر اوافق على اي احد لو انه نص عقل عاد دايمن اقول لأبوي اخطب لبنتك يايبه ولا تخطب لولدك وتطير عيونه قلت اسمع علمن ياصلك ويتعداك مليت من اللي توهم ماطلعوا من البيض ابي واحدن كبرك على الاقل عارفن حياته وطريقه وبالتالي اعرف وش لي ووش علي < الله يرضى عليتس انخمدي ماضوعك حرك بي مشاعر العنوسه ومشاعر الفراغ يقول الشاعر. الا ليت الشباب يعود يوما واخبره ماذا فعل بي ماضوع مدمنوا دوك روطه

  8. السلام عليكم المبدع / مدمن شاهي أنا اشهد قلت وقولك الحق ، مبدع لآخر رشفة وكلماتك تُلامس الحقيقة بِكُل حق ، كتاباتك الساخرة سأحتفظ بها إلى حينٍ آخر فلعل موقعك يُشغلك عنّا !!!

  9. وعليكم السلام مدمن شاهي حياك الله موضوعك المنشطح أعلاه ظريف جدا وانا مثلك جامعتن العلتين معا ولله الحمد أما علة الضرس خليها لربها مارح أناقشك فيها وأما علة العرس اسأل مجرب ولا تسأل خبير وبما انك ما جربت وخر شوي مو بالسهولة في هالزمن تجي تسحب البنت من أحلامها وتحطها بالمطبخ ومو اعتراضي الطبخ < لاتفهمون غلط لو انا رجال بدور لي على زوجة طباخة مافيها كلام كح والعنوسة ما هي حل برضو الحل هو ان البنت تعرف تختار الزوج اللي يساندها ويبني لها مستقبلها معها بدل ما يحطمها معي بالجامعة بنات متزوجات وأشطر مني والله < وانا بعد شي لا تحسبون اني خيبة هااع وزي مو البنت واجب تختار اللي يناسبها الرجال برضو لازم يختار وحدة تناسبه مو يروح يخطب وحده تدرس جامعة وبعدين يقعد لها لا تكملين وش حادك جاي تخطبني وانت عارف اني ادرس من اول اعرف كثير بنات قاعدات ببيوتهم وينتظرون العريس سالفة الخطبة العشوائية هذي انسوها بنت فلان وبنت فلانه اعرف مين البنت اللي رح تتقدم لها واذا كانت تناسبك أو لا مو همكم بس الشكل تالي تتورطون وتورطونا الشكل بعد كم سنة مارح يفرق معك لكن التوافق هو اللي رح يدوم ويعمر بيوت والله يوفق كل بنت باللي يسعدها وكل رجال باللي تسعده لولولولولوووووووووي

  10. كلامك عين الصواب يا مدمن والله جبتها الله أكبر عاد هالمستقبل < وٍِدهـ يمسك جلودهم بس مستحي ههههههههه كل كلمة قلتها حق والله ياجرك على اللي كتبته مشكور وما قصرت وتســـلم يمينك يا مدمن

  11. لكل منا وجهة نظر …أنت أصبت بكثير من كلامك لكن يحق لأي فتاة تأمين مستقبله بشكل مبدأي ..وأذا جا شريك الحياة تكون قد وضعت الأسس ليكملا البناء مع بعضهم..وأكثر الشباب بهذه الظروف يرغب بذلك ..أسفه على الأطاله…الف تحيه معطره

  12. صراحتن اقنعتني وانا خيتك ..بالعرس .. ابييييييي اعرس خلاااااص زوجوووووووووووووووووووووني ..

  13. الكلام اللي قلته صحيح تخيل انه البنت ترفض الزواج بحجة المستقبل شنو المستقبل عندها شهادة شغل وبعدين شنو النهاية …. نهاية البنت بيت زوجها واولادها طيب درست خلصت ودرست طب بعد وتخصصت والأولاد وين كل واحد بمكان… لازم كل واحد له طموح بس يحاول انه يوفق بين حياته وطموحة وانا وحدة من الناس طموحي له حدود وأكيد أولادي وزوجي أهم اهمتاماتي بالمستقبل لايمكن أني ابدي طموحي عليهم لو شنو مايصير …. هذا رأيي الشخصي ومااتخيل يوم انه راح تتغير نظرتي في هذا الموضوع …. يعطيك العافية أخوي مدمن لك الشكر لرسائلك الرائعة …..

  14. السلام عليكم ورحمة الله وبركاته .. مساء ملؤه طاعة أتمناه لكم .. أخي الكريم مدمن شاهي .. لا تعليق عندي على ما كتبت ( صلب الموضوع ) .. لكن تعليقي على ما ختمت به كلامك .. ( قلت وقولي الحق ) .. أتعتقد أن هذا يجوز ؟ لم أسمع أحدًا يقولها !! فما من أحد قوله الحق سوى ربنا – جل وعلا – .. أرجو أن تراجع نفسك ، وأن تصحح ما كتبت .. غفر الله لك ، وهداك ..( الله لا يؤاخذك بما قلت ) تقبل كلامي برحابة صدر .. والسلام عليكم ورحمة الله وبركاته ..

  15. كلامك صحيح كله لكن شتسوي اللي ماتقدملها احد >>>> وجه يحزن 🙁 الله يرزقنا وياكم

  16. انا اشوف يامدمن الواحد قبل لايخطب يعرف وش يختار بالضبط يعني ماياخذ وحده تبي تكمل دراستها وعقب الزواج يقعد لها لاتكملي ومدري وش مهما كان البنت لازم تتعلم حتى لوتزوجة واحد عنده ملايين والدنيا ماتدوم لاحد وانا وحده من البنات الي تزوجت على اساس اكمل وعقب الزواج سنه ادرس واسحب واقعد بالبيت والسبب مافي تشجيع ومافي احد يعون ويعاون سنه حمل وسنه البزر صغير ويبيله عناية وسنة ورى سنه وراحت السنين تركض وبدال ماتصير الجامعه اربع سنوات تصير الضعف ويمكن اكبر بزرانها يدخل المدرسه وهي بعدها ماخلصت ……… على العموم هذي وجة نظري وححبيت اطرحها وبعد مشكوووووووووور يامدمن على هالماضوع ومبروووووووووك المنتدى عساك على القوه ونفع بك المسلمين يارب ……

  17. كلمات رائعه بقلمك الرائع اخي مدمن شاهي الله يفج علتك وتلقى لك النصيب اللي يريحك ويسعدك ما قصرت

  18. مساااك خير .. مدمن شاهي .. ماشاء الله اسلوبك حيل عجبني .. بس برايي الشخصي .. الدراسه ثم الزواج ومو فارقه 4 سنوات من عمر اي بنت .. انها تدرس .. وبيني وبينك .. الوحده منا ماتضمن الرجال .. بس تضمن الشهاده .. وابشرك مدمن كثير الحين بطلوا يتبعون نظام الدراسه ثم الزواج .. يدرسون وهن متزوجات .. يسلمو مدمن .. اتمنى تقبل رايي .. وكلها وجهة نظر .. تحيتي ..

  19. السلام عليكم أشكر كُل من حضر أو علّق والشكر موصول لاخوي الكريم / أبو نواف لعلّي في طرحي هذا تكلمت عن جُزء من أجزاء وجانب من جوانب وسبب من أسباب .. أي – وبشكل أوضح – تطرقت لمشكلة الفتاة والتي هي بفعلها قد تكون جُزء من مُشكلة تأخر زواجها أو الركوب في باخرة الأزواج ، ولو تكلمت بشكل أوسع لتحدثت عن أسباب أخرى مُهمّه لها القاع في ذلكــ .. هذا ما أحبب أن أُبيّنه وأنبه عليه الجميع كي لايتصوّر البعض أن ( مدمن شاهي ) أوقع اللوم فقط على الفتاة ! شكراً لكم واليوم أربعاء ومعروف أنه يوم ( العزايم ) ولذلك أجّلت الرد على الجميع فرداً فردا لوقت لاحق ,,, تمسّوا على خير وتلحفوا زين عن البرد 🙂

  20. عجبني جداا ملاحظاتك وكلامك الورده تذبل فعلاااااااا بقولك قصة حياتي جوني وانا ادرس كثر النمل وانا اقول لا مستقبلي لا دراستي لاااااااااء مسؤولية ماقدرش مادريت انه نسبتي بالتخرج ماتعدي السبعين وداخله علمي يمال البوهه على وشو بعدها كملت دبلوم<= جزاء كل وحده نسبتها تحت السبعين ووهلموووو الخطاب وقت الدراسه وانا اقول لاااااااء ماقدرش بعد الدراسه بكمل البكلوريوس بالقاهره<= ماتدري انها حدها عتبة بيت ام عبدالله الي قدام بيتنا تخرجت انثبرت انثبار شديد في البيت استنى الطارق عشان اقول من الطارق( اانا الخطاب جئتوو لأخطب صرئوعة ومرة الايام وانا اكبر وشعري يطيح وضروسي الي ورى مابقى منها الا اثنين وطلع العقل وشكله يتقلقل مرت الايام وانا استنى عريس الغفله عريس الخنبقه استناه وينه اطل من الباب يمين شمال فيه احد بدا جسمي يزداد بالوزن الوجهه غدى مقلاة بيض من كبرهـ صارو صديقاتي ام ابراهيم ام نواف ام سارهـ وضليت انا ....... حاف قلنا نتوظف عسى يجي توظفنااااااااااااا هممم ماجا الا زوير وعووير والمنكسر الي مابوه خير همن قلنا نترزز بالعروسسسسسسس نرقص ونلوفح ونخسر كيلو فكسسسسس على الرقبه ونجي ندقها عند عجيز وياكثر ماسألو بنت مين يسألون عن العمر يهونون يبون ام الطعششششششششششششش ليش راحت علينا ؟؟؟ مواليد 1403 <= بنات النحسسسسسس عام القرادهـ قلنا معليش انتظرنا في بيوتنا ولازال الانتظار الين ماقلبت المبياض اومليت خلاص راحت والايام تمضي يافتاة يافتى اعرسو بدري والا بتبيرون في بيوت اهاليكم لا الجمال لاالوظيفه لا السمعه لاشي راااااااااح يرجع العمر لورى مذكرات عانس صكت الخمسه وعشرين وتتهاوش مع اهلها كثثير الأخت صرئوعة اووي<= كسرت خاطر نفسي الرجاء النشر يمكن النصيب في هالرساله خخخخخخ

  21. اولا هلا بك خيو مدمن شاهي ترى مستشفى الامل يمدحونه << بتتكفخ خخخ شوف انا اوافقك بكل كلمة تقولها وانا مستعدة انزل من عرش مملكتي في بيت اهلي واروح لمملكة الزوجية , بس احصل اللي يقدر ويقدس الحياة الزوجية , احصل واحد اذا صار عندي امتحان يواسيني ويسوي لي ساندويتشات وعصيرات ومايقعد ينق فوق راسي والا يقلقني , واذا صعب علي شيء يذاكر لي ويحل لي واجباتي اذا حصلت واحد بها المواصفات راح اوافق انو اغير حياتي ... ............................................. خيو مدمن شاهي اقدر مواضيعك وكل ماتطرحه دمت مبدعا ويعطيك العافية

  22. اللة يحييتس ويحفظ ويارب تعرس قول آآآآآآآآآآآمين يامدمن(من يومك مدمن )بتعين خير.هههههههههه

  23. والله انتم شايفين بأرواحكم شوفه كل همهم في الدنيا البنت و وش تسوي والاخ فاتح لنا موضوع خضروات ورد وذبل تراهي ادميه يا هوه ماهيب كراث ما اقول الا الله يشفيك وامحـــــــق موضوع

  24. يحليلك يولد عمي هههههههههه ولي الدور العرس بس ماهي بلقيتن معرس وش تسوي

  25. أستاذي العزيز كلام لذيذ وفيه دغدغة لأحلام الكثير. بس ياريته صحيح. الشاب دحين يبغى يتعان بس يعين لا. بمعني ماشي ان زوجته تتنازل عن كثير من أحلامها ويمكن كل أحلامها مقابل انة يكبر أو يتثبت بعملة. بس هل هو مستعد يعمل ربع دا الشي؟؟؟؟ أبدا واقرأ قضايا الطلاق بالمحاكم. يمكن يفوتها حلمها بالأمومة وكونها ست وراعية بيت, وما أنكر أنه حلم غريزي لأي بنت طبيعية . بس عنوستها أفضل وأبرك من رجعتها لبيت أهلها مع طفل أو طفلين ونظرة الأسى والشفقة لها وهموم عبئها وعبء أطفالها. نصيحة قبل ما تكتبوا عن الزواج, اكتبوا عن المسؤلية اللي تلازمة. لأن الكل صار عاشق للرومانسية فقط, دون مسؤليات

  26. السلام عليكم والله ثم والله أني ماعمري قريت مثل هالكلام ، كلام نابع من قلب صادق واحس وانا اقراه ان الكلام موجّه لي وان النصيحة مكتوبه بقرطاس ومسلّمه لي على عجل ، أخوي مدمن أنا وحده من البنات اللي تشبثت بكلمة مستقبل والحين أنا جالسه في البيت لازوج والا حتى طارق للباب ، لكن أملي في الله كبير وكبير ، اخوي مدمن انت مثال للشباب الصادق الناصح وكثر الله من امثالك وتسلم يدينك الكريمة

  27. لا فض فوك وانا اختك <<< قوووويه طيب واذا صار حول هالوردة شبك <<< غنمه مهيب ورده لا صز انا اؤلكم قصتي وانتم احكمي .. والله وانا اختكم من وانا بالثانوي وانا هالخطاب نمل عند الباب بس ما ادري الا من الناس ان فلان وعلتان خطبني اثاري الوالد يزحلقهم من عند الباب حتى مايمديهم يضغطون الجرس ... الله يهدي الجميع .. ختاما اقول ( متعوب عليها ختاما ) يا وخياتي الوحده مننا في هالدنيا ما تأخذ الا نصيبها ولو تأخر ماجا اليوم ( وربك كاتب انه يجي ) راح يجي يمكن بكره ولا بعده ماتدرين وش ظروفه .. اصبرن اوخياتي ان الله مع الصابرين ..ونصيحه دورن على شي تلهن به تراه مهوب زين لتسن تقعدن يلعب بليس بعقولتسن .. يالله فتكو بعافيه .. ايه ذكرت مشكور مدمن على الماضوعع الوايد حلووو كتير .. << تحشيش اصلي عمايل الفراغ ..

  28. مساء البردقان اللي يقوطر حلى .. ردّاً على الإخوه الكِرام اللي شرّفوني بتعليقهم .. ( سيلاكو ) كلنا نناظر السقف عسى الله يجيب الخير . ( عمشا بنت عماش ) الرسول عليه الصلاة والسلام كلامه لاينطق عن الهوى ، إن هوى إلا وحي يوحى ، كلامه حق – عليه أفضل الصلاة والسلام – وأما كلامنا فكلام وحديث يحتمل الصواب أو الخطأ ، وأنا برأيي وطرحي أرى أن وجهة نظري صحيحة وواقعية ولذلك ذكرت أنه حق ، طبعاً هذا لايُصادر حق من يُخالفني الرأي ولِكُلٍ وجهه هو موليها ، وبالنسبه لحرمتها الشرعية فلم يرد نص شرعي بحرمة ذكرها في ثنايا الذكر ، شكراً لك ولحضورك . ( أصفر Xأصفر ) حيالله الاصفر ، بيجيك رزقك من رب السما بس اعقلي وانضبطي واطلبي ربك 🙂 ( CRAZY ) وجهة نظري أطرحها بأي مكان ولي الحق في ذلك ، ومن يخالفني يطرح وجهة نظره بأدب ولي وله الحق في النقاش 🙂 .. يسلم بؤك حبيبي . ( زبدة لورباك ) البنت لها الحق في الزواج أو الرفض ، لكن أنا أنصح وهذا حقهم علي 🙂 .. وبالنسبه للهجه فأنا أحاول أني أوصّل الفكرة بأٍسهل الطُرُق وأوضحها ، والجود فالماجود . ( نصيب الخير ) حيّاك … وتسلم ياغالي . ( ابن العرب ) يازينك أنت بعد . ( ودي اصير قويه ) كلامك عين العقل وضرّس البطن ، ومسألة الزوج هل هو كفؤ أو لا .. هذي يحكم فيها الأب وولي الأمر .. يايقبلونه يايقضبونه الباب ! ( محمد بن راشد ) اجل ساحر .. شكلك والله بتدخلني السجن بآخر عمري ومنتب نافعني 🙂 .. شكراً لك حبيبي ( قلب حب احمر يخرخر خلّ ) ( Miss Saudi ) ماعلتيس .. بيجيك رزقك لوّ انك بالصمّان .. ومن توكل على الله كفاه 🙂 ( عبدالله ) مافيه مشكلة أن البنت توفّق بين الزوج والمستقبل ، لكن يكون المستقبل مُقدّم على الزواج هُنا الخلل .. شكراً لك قلبي . ( مياسه ) أمني مستقبلك بس من جاك وشفتيه رجل ويستاهل فلا تردينه 🙂

  29. عدنا من جديد بعد الدبغ في النعمه 🙂 = = = ( N!CE ) وانا ابي اعرس << تحمّس ! ( برمجيات ) أنا اشهد .. قُلتي وقولك الحق 🙂 ( ناصح ) هلا بقلبي .. وضّحت وجهة نظري في هالنُقطّه بالرد على الأخت الكريمة / عمشا بنت عماش دُمت أخ عزيز وغاليـ . ( وليه في بيت ابوها ) أطلبي ربك .. وراح تتسهل الامور 🙂 ( aldloo3ah ) وجهة نظرك صحيحة وانا معك فيها قلباً ومضمونا .. وأتمنى أنك تعرفين أني في ثنايا حديثي تكلمت عن مُشكلة أن الفتاة تؤخر زواجها وتُعطله عشان المستقبل اللي ماتعرف نهايته ، هذا هو الفرق بين حديثي وحديثك 🙂 .. شكراً لك ، ولمُداخلتك موضوع راح أطرحه بعد فتره بإذن الله . ( الوردة ) شكراً لك أختي الكريمة ( الجـــ وردة ـــوري ) حيّاك عزيزتي ، والدراسة أعتقد أنها ماهي سبب لتأخير زواجها ، مافيه مُشكله أنها تكون حريصة على دراستها بس ماهو على سبيل أنها ( تردّ كُل الخُطّاب ) لأجل ذلك . ( صرئوعة اووي ) كلامك مُحزن .. لكن ماعلى الله مردّ .. شدّي حيلك واطلبي ربك ياست صرئوعة وبتزين أمورك 🙂 . ( بنت بابا ) أوووما عاد يحل عنك الواجب 🙂 .. ! .. بالنسبه للزوج اللي يُناسب ذوقك .. فانتي مفتاحه وتقدرين تغيرين أشياء كثيره فيه بطريقة تعاملك معه ، ربي يوفقك ويوفقني بعد انا واعرس ( hanan ) آآآآمين 🙂 ( unknown ) ماأدري من انت .. بنت أو ولد .. لكن راح أقدر أقول ( إذا تأدبتي وصرتي مره وعقلتي ردّيت عليك زي غيرك 🙂 ) .. وللأخلاق مثال ! ( raqi ) الأروع حضورك يابعد تشااااابدي 🙂

  30. قريت ايميلك الاسبوع الماضي ، وقلت ياحسافه بيروح ويخلينا ، لكن اشوا انك رجعت لنا ورجوعك كان قوي كالعاده موضوعك يتكلم عنا أحنا يالبنات ، لكنه حقيقه وواقعي إلى أبعد درجة وجيت على الجرح ياكاتبنا المميز أقولك شي والكل يسمع : أنت مميز ولك نكهه فحافظ عليها الله يعافيك

  31. بكلامك هذا ذكرتن بكلام ماي قراند ماذر وفاذر كلما شافونا حنا يالبنات مجتمعات ونضحك ونسولف الا يطغسون علينا عيشتنا بهالكلام..تقل قاعدين على روسهم ….بس انا مدري ليش ..!! انت وهم والي زيكم ما تشجعون تعليم الفتاة ولا وش السالفه ..طيب وش يمنع انك تحتري البنيه لمن تخلص دراستها على بال ما تسنع امورك وتتجهز تمام التمام ….عشان اذا جا قبل العرس بسنه قعدت تشري من هالدداسن وتورطت بمديونه تقعد انت وياها الى اخر يوم من حياتكم الزوجيه الي احتمال انها ما تدوم بهذه الحاله تدفعون ثمنها غاليا جدن ابدن… فانت اخطب البنت قبل سنتين من نهاية دراستها والسنه الثالثه ملك عليها ما تجي الرابعه الا وانت وياها اموركم تمام التمام وانت خلال هالسنتين رتب امورك وجمع دراهمك وزين لك بيت وارسم مخطط لفليتكم الكبيره مستقبلا والحياة حلوه … وشرايكم بكلامي عيب ولا عداه العيب ؟؟؟!! بس موضوعك جا بوقته عشان نشوف الاراء والاراء الخرى… تحياتي

  32. ياأخي مدمن شاهي … أنت مفروض تقول هذا الكلام للبنات اللي يجؤا لهم خطاب وعرسان .. بس الواحد مايقول الا الحمد الله .. نفسي مرة يجي خاطب عدل ((عدل ))موسكران موحق مخدرات ودخل السجن 16 مرة وبعدين تاب مورجال عمره 40 سنة وراتبة الف ريال وحاصل على متوسط ((بلاها واشرب مويتها )) مو واحد عقيم موواحد مايشتغل وأمه هي اللي تصرف عليه وأبوة ميت وطول عمرة كان يلعب في الشارع ……………………..الخ والله العظيم أن مواصفات الحلا فيني و مافي زي في الادب والاحترام..و ماخليت فرح الا مارحتوا …ما خليت سابع ولا عزيمة الا وأنا اول وحدة…. أقول ياريت احد يشوفني ويخطبني ..**وكأني ماحضرت .. غير موجودة ** قلت ياربي يمكن من بيتنا ..بيتنا مايشرف أحد… والله أني أعرف ناس في رؤوس الجبال بيوتهم وجاهم أمراء…وغيرنا بيتنا وصار اسطورةمن الجما والروعة …وكأني مازودت الا عدد العناكب على جرس الباب قلت ياربي أكيد علشان أنا في بلد مافي اختلاط …أبغى أروح لبلد أدرس ((أقصد أدور ))وأنا متحجبة علشان لما يشوفوا أني مؤدبة ومتحجبة يخطبوني .. وكأنك يازيد ماغزيت لي اللحين سبع شهور وكل يوم أعد عد الطلاب السعودين العزاب اللي سجلوا في الكلية لقيتها اكثر من عدد شعر رأسي …ولا في واحد فيهم فكر مجرد فكرة انو يقول ابغى أخطبك .. اللحين انا ابغى أسال الغلط منى أني ابغى اتزوج ولا الغلط أنو (((((((((((((مافي رجال عدلين ))))))))))))))

  33. كلام صحيح لو كانت الاساسيات صحيحه وموجوده او الوقع هو نفسه اللي فالخيال يعني انو لو الوقع يقول انو انا بتزوج وادرس واكمل طموحي وابني مستقبلي وزوجي مبسوط ويساعدني لكن الحقيقه وللاسف العكس تمامن وهذا ما يعم على الكل ولا تقول ان البنت مالها الابيتها وزوجها وعيالها لانو وللاسف صاير الطلاق اسهل وسيله للتخلص من الهم بين الزوجين هالايام وقلي وش الحل اذا هي طلقت وما كان معها الاشهادت الثنوي وش بتسوي بنفسها تشحذ تسرق ولا تقولي تشتغل لانو ما فيه احد بيوضف بشهادت الثنوي مجرد رايي معرض للخطا والنسيان واو الصحه ارجو الرد من اجل النقاش عند الاختلاف على نقطه لتوضيح وجهات النظر ولاختلاف لايفسد للود قضيه

  34. خخخخخخ بصراحه موضوعك مزعني يا مدمن وجرحتني جرحن غائر كنت اقول من يوم ما اتخرج من الثانويه بأذن الله اعرس 🙁 !! لكن أنصدمت بواقع شبابنا إنهم يبحثون عن الورد الأبيض إللي أوراقه متشربه بحمره وعوده طويل ونحيييف 🙁 خخخخخخخخخ وصفقت وانا اختك 23 ربيعاً وما احد طق بابنا علشان اتدلع عليه واقول أبني مستقبلي ابوه من مستقبل آخر شيء حسيت إني أوشكت على النهاية شكلي بروح اتبنى لي طفل واربيه لأبوهم من شباب ورجال على الأقل أكسب فيه اجر وألقى ورعن يدعي لي لا مت بس ليته من جوفي 🙁 ! مدمن قلبت المواجع

  35. قُلت وقوليَ الحق !!! ما كان لها لزوم صراااحه……… هذا لا ينبغي الا لرب العالمين

  36. والله مشكله العنوسه مشكلتنن تسبيره 🙁 وخاصه انو لايخلو بيت من عانـس … بس انا مبدئ اكمل دراستي و اقر عيني برؤيه شهادتي المصون وبعدها افكر بالعرس والعوال باختصار لان الحياه الحين صعببببه ومو مثل اول فالبنت مثلا اللي ابوها متوفي وامها مابقى مرض الا وفيها باللهي عليكم تبونها تسلم رقبتها لرجال ؟؟؟ وان حصل انوااع الاهانه والذل لييش لانو ضامن انو مالها احد غيره فحتى لو وراها نجوم القاااايله بتصبر ياعمري عمرها لا تقولون ما تصير وربي تصير وعندي نماذج يمكن عشان هكاا انا مصره اني اضمن مستقبلي بشهاده ومستقبها حلو … لكن مسأله اني اعرس ومامعي الا ثانوي معصيييييي وافرض يعني مثلا اني تطلقت بعد زواجي بسنتين مثلا ولاهو فااتني قطار التسجيل بالجامعه بعدها من بيصرف علي 🙁 المستقبل ثم المستقبل ثمممممم المستقب ثم الزواج والهم والقرررف 🙁 وشااكره لك خيووو اسلوبك الاكثر من راااااائع

  37. صباح الورد ياحلوين .. إكمالاً للرد على حبايبنا اللي فوق : ( ريمية ) حيّاتس يابنت الخال .. ماعليتس .. بتلاقين وبيجيك الخير بس اطلبي ربك ( Berdees ) الحب من دون عواطف والزاوج من دون علم فشل للمُجتمع يُحاربه الجميع ! لكن أن تبقى الفتاة من دون زواج لأجل أنها (( تتوقع )) أن يكون مآلُها إلى سواد فهذا خطأ جسيم ! شكراً لك حبيبي ( فتاة الأحلام ) ربنا يرزأك 🙂 لكِ كُل التحايا … ( ما حولنا عرس ) نصايحك من ذهب تُشكرين ياستْ .. ( reem999 ) وربي يسعدكــ .. آمين ( شمعة أملها ) ولكم نكهه بمواضيعي عسى الله لايخليني منكم بس ( عصير بالزير ) أنا أوّل مُشجّع للفتاة لرؤية مُستقبلها بشكل جميل وواضح ، بس أنه يطغى على حُبها لذاتها مُقابل ردّ كُل الخُطّاب فأنا أعترض .. وأعترض بِقوّه ! ( فدوى من ) لا .. الغلط ماهو منّك البتّه .. أنتي أعملي المطلوب من رُقي فِكر وعمل صالح والباقي خليه على ربّك الخُطّاب ماهم زي بعض .. وأصابعك مختلفه .. ولذلك : إنتظري فلعل الفرج يكون قريب ( مريام ) من حقها تُكمل دراستها .. والمكتوب بعد الزواج مكتوب عند الرحمن ! أجل نترك الزواج لأجل شي مانعلمه ! اللي في يدها تسويه وتعمله من مُعاملة حسنه وراح تلاقي الخير بإذن الله . ( راجيتن ربي إني اعرس قريب ) كلنا قلبنا المواجع .. لكن الشكوى لله .. الحال ميسوره والرازق في السمــا . المُشكلة مُشتركة والحل بأيدينا وعقولنا .. ويارب أن تفكها وتحلّها من عندك شًُكراً لحضوركـ ( علي ) كلمتي ( قُلت وقولي الحق ) ليست مستنطبه من كلام الله أو رسوله – عليه الصلاة والسلام – كي أتوقّف عن ذكرها .. كتبتها وأنا موقِن بأن حديثي هو قول الحق ولغيري المناقشة في ردّ حقي الذي أتشبث به ! سَعِدت لمرورك . ( دودي ) لك الحق تكملين أو تعدين أو تتفنجلين القهوه كل صبحية مع طويلة العمر .. لكن لزوم التفكير بمُستقبل الحياة الحقيقة بالزواج السعيد ! شُكراً لك ياعزيزتي . أُكرر شُكري للجميع ولي عوده بإذن الله في موضوع قادم يهتمّ بتعليمنا اللي ( رايح فيها وطي ) ! أخوكم : مدمنوه ..

  38. يعطيك العافية .. مدمن شاهي .. كلامك حكمة .. ونا أهدي كل أب مسؤل وكل بنوتة و ردة نصيحة تؤيد كلامك.. يعطيك العافية..

  39. يا مدمن الشاهي المرأة جميلة وإن كبرت إلست ترى الورود جميلة وهى ذابلة ومتكسرة ولكن لا يراها إلا عيون الإذكياء0

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

الورد .. طلبناه وهو ذابل !

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول