الكاشير النسائي


أقترح وبقوة واستخدم حق الفيتو ليصبح في كل سوبرماركت كاشير نسائي مخصص للحريم
لعلكم تتساءلون لماذا؟

ذهبت في الأسبوع الماضي إلى أحد فروع بندة ، وتبضعت مقاضي الأسبوع وعندما وصلت إلى الكاشير كان هناك كاشيران
الأول يوجد عنده 4 رجال في السرا (الدور) والثاني لا يوجد عنده إلا امرأة واحدة
وكتصرف بديهي مني توجهت لأقف عند الكاشير الأقل زحمة
وتدافع الناس نحو الكاشير قبل دخول وقت الصلاة ، وأصبح في السرا خلفي أمم من الناس وعند الكاشير الآخر أمم أكثر عددا
وبدأت المرأة تفرغ محتويات عربتها عند الكاشير ، وبدأت عندها مأساتي ومأساة كل الأمة التي خلفي عند الكاشير
فكانت المرأة تمسك بعلبة الزبادي من العربة وتضعها على السير الذي أمام المحاسب وتتنتظر حتى يمررها المحاسب على الجهاز الذي أمامه ثم تلتقط قطعة أخرى وتضعها على السير وبعدما تتأكد أن المحاسب أضافها إلى فاتورتها تلتقط القطعة التي تليها
هكذا ..قطعة.. قطعة
وبعد أن التقطت القطعة رقم عشرين ، بدأ ولدها بالعبث فتوقفت عن التقاط مشترواتها وراحت تؤنب ولدها وتعطيه درسا في الأخلاق والسلوك لمدة 4 ساعات على توقيت جرينتش
ثم قررت الأخت استكمال التقاط مشترواتها قطعة.. قطعة
وبعد أن استكملت التقاط مليون وأربع مئة ألف قطعة
سألت المحاسب كم الحساب .. فقال لها المحاسب : 850 ريالا
فأخرجت شنطتها وبدأت تخرج الفلوس من شنطتها وتضعها على السير
وبعد بحث مضني في الشنطة .. أخرجت 5 ريالات
ثم عاودت البحث مرة أخرى .. وبعد 10 دقائق أخرجت 3 ريالات مكرمشة على بعضها
وأدخلت يدها مرة ثالثة في شنطتها .. وبعد بحث وتفصي أخرجت 10 ريالات جديدة ..فقلبتها يمنة ويسرة لتتأكد منه
ثم أدخلت يدها في شنطتها وبدأت تبحث وتبحث، ثم أخرجت 20 ريال
واستمر الحال على ماهو عليه، كل 5 دقائق تخرج 10 ريال أو 20 ريال وتضعها على السير
كل هذا وأنا واقف كالأبله بانتظار دوري
وبعد أن نفدت فلوسها ، بدأت تعد الفلوس: 10 20 30 40
ثم تلخبطت وبدأت من جديد: 10 20 30 40 50 52
ثم تلخبطت ، بدأت العد مرة أخرى ، وبعد عشر محاولات من العد وصل المبلغ الذي معها إلى 480 ريالا وحسابها 850
فقالت: يو يا ربي أنا اش أسوي الحين
وقررت ارجاع نصف مشترواتها، فبدأت تعيد مشتراواتها قطعة .. قطعة
وأحيانا تكتشف أنها تحتاج القطعة التي أرجعتها فتعيدها إلى عربتها مرة أخرى
طبعا أنا لما رأيت الموقف هذا .. تركت عربتي وخرجت إلى خارج السوبرماركت وحلفت أن لن أقف عند كاشير تحاسب عنده امرأة
وتوقعاتي الخاصة تقول أن المراة ذاتها لم تنتهي من الحساب حتى هذه اللحظة





تعليقات 41

  1. والله لوني منك كان حاسبت عنهااااا عشان اخلص بسرعة خخخخخخخخخخخخخخخ

  2. اولا موضوع كويس وتشكر عليه هذي الحرمه غلطااااااانه من ساسه لراسها وانا اقرا ارتفع ضغطي منها ا الله هديها بس بس ملاحظه مو كل الحريم مثل بعضهم صح ولا لا ^_^ بس بغيت انبهك عشان ما تعمم هع وتسلم ايديك ويعطيك العافيه

  3. مع احترامي لك الا اني اشوف مبالغه بالسالفه في البدايه التمست لك العذر قلت المبالغه يمكن من باب الفكاهه لكن يوم فهمت الغايه صارت عندي علامات استفهام منها هل تقصد ان اي امرأه تكون تحاسب بهالشكل ؟؟ سؤال ثاني يطرح نفسه لو كان اللي قدامك رجل تتوقع بيكون ذرب وسريع بالمحاسبه ؟؟ سؤال اخير وهو الاهم وياليت تجاوبني عليه (( ماالذي تريد ايصاله لي كقارئة من قصتك التي رويتها ؟؟؟ ))

  4. السلام عليكم .. أنا امرأة و اضطر اني اصفط دور عند الكاشيرات بالسوبر ماركت أكثر من مرة بالشهر .. و قسمن اشوف دباشات و حماقات يقوم بها الرجال مراات اعصب و مراات اضحك من باب شر البلية ؟؟ يعني مالك حق تخصها بالحريم !! هي اساءة تصرف و عدم ذرابة سواء حريم أو رجال ..

  5. والله صادق هاذولا حريمنا وانت الصادق مايبغالهم كاشير نسائي هاذولا يبغالهم مبيد حشري عشان الوحده لما تطول بالسوق ولا السوبر ماركت بختين بالمبيد النسائي وتترتاح من وجع الراس 🙂

  6. ألا تعتقد ان هناك رجل في هذا العالم او حتى عالمنا لا يتصرف مثل تصرفاة هذه المرأة .. وان هناك امرأة قد استائت من تصرفاة هذا الرجل .. و(حلفت ) ألأ تصطف خلف رجل عند الكاشير ؟ ام ان الرجل خلق نقيا من الأخطاء ؟ أمرك عجيب يا أخي !!

  7. والله شي يقهر بصراحه .. بعض الحريم يفقعون القلب والمراره والبنكرياس بس طبعا اخوي مو موقف واحد حصلك مع وحده ثقيلة دم يخليك تعمم على كل الحريم عموما اقتراحك زين واحنا بعد نتمنى يسلموو اخوي

  8. هذا من حظك الشين بس ماني معك في فتح كاشير نسائي لهذا السبب واعتقد هذي سالفه عاديه واذا بغيت تتسوق رح الليل مره او رح لسوبر ما ركت صغير وريح عمرك

  9. الموضووووع مبالغ به الى اببببببببعد الحدووووود …. ورجاااااااااااً أخي لاتعمم الحالات الشاذه ((هذا اذا كنت صحيحه )) على كل المجتمع .. واذا انت احترمت نفسك ولم تتذمر فالكاشير (مارح يسكت لن هو كمان مهو فاضي له )) أخيرا نرجوووو عدم طرح مواضيع ((ماتدخول العقل ..))

  10. الله يعينك ياشيخ، بصراحة انا ماصارلي هذه الموقف بس اذا صار لي كان قريت في الجريدة أقدم المدعو على خنق سيدة في سوبر ماركت…الخ Lol 😉

  11. واذا كان الكاشير نسائي وش اللي بيتغير؟؟؟؟؟ اكيد راح تستعجل اللي بتشتري لانهل بتستحي من الكاشيييييييييييره.

  12. وحتى لو حطو كاشير نسائي بيجون الحريم لحق الرجال بالعكس بتنعكس الرجال عند الحريم والحريم عند الرجال ومو بس يصير سرا الا تجيب فراشك احسن

  13. صباح الخير .. بصراحه دايم توصلني مواضيعكم الاكثر من رائعه لكن هذه اول مره افكر ارد فيها .. اخوي احب اقولك ان اصابعك ماهي سوا يعني لو الاخت الله يهديها سوت كذا غيرها كثيييييييييييييير قمه بالترتيب تلاقيها حاطه فلوسها بالمحفظه ومرتبتهم ولو انا اقول لو ماعندها محفظه تكون حاطتهم بشكل مرتب بالشنطه وتشوف كم حسابها وتطلع اللي معها يعني لا تحكم على الكل بسبب وحده وبعدين في اختراع اسمه ترتب فلوسها وتعدها قبل ماتنزل المكان اللي تبيه والله انواع الفشيله والفضايح انك تشتري اشياء والمبلغ اللي معك مايكفي .. بس ما اقول الا الله يهديها فشلتنا 🙂 يعطيك العافيه اخوي على الموضوع وآآآآسفه على الاطاله ……

  14. والله أنا أتوقع إن فيه مبالغة كبيرة في الموضوع صح إنهم ثقيلات دم في هالموضوع ولكن الكاشير أيضا سبب في ثقل الدم هذا لأنه يقدر يمشي الوضع بسرعة << يا ليت تعيد النظر في طرح الموضوع أما إنها تطلع الفلوس عشرة عشرة وريال ريال هههههههههههه يبيلها تفكير واجد

  15. بصراحة انت معاك حق في كل الي قلته بس الله يهدي الحريم واحب ازيدك من الشعر بيت الي معاه السداد عن طريق بطاقة صراف كما هذه مشكله ثانية الجهاز بطيئ وبعض الاحيان يصير مافي الى جهاز واحد بس شغال يضطر الموظف انه يعطل حتى شغل زميله عشان الدفع ياشيخ خليها على الله

  16. اخي الكريم بالرغم من اني انا امراة لكن عندي بديهيات في قاموس حياتي ياريت لوتشاركني فيه حتى تكون حياتك مريحه –تابع وياي الكم نقطه هاي وياريت لو تجرب تنفذ وتخبرني بالنتيجه==اولا تجنب تقف ورا امراه عند اي كاشير سواء في الجمعيه او البنك او السوق==ثانيا تجنب انك تسوق ورا سياره تقودها امراه وابعد عن الشارع نفسه==ثالثا تجنب تنتظر امراه تسوق انها تطلع من البارك لانك بتنتظر ساعه كامله على ماالاخت تتاكد ان مافي حد وراها والسيارات على الجنبين طلعوا==رابعا لا تتامل انك توقف سيارتك في موقف وتجي تحصل سيارتك سليمه اذا كانت اللي في الموقف جنبك امراه==ياريت انك تنفذ الوصايا لمدة اسبوع وشوف النفسيه كيف بتكون واحمد ربك وش وقفا اذا كنت تعيش في بلد الحريم فيه ماتسوق سياره

  17. يا صبرك يا أخي وإنتظرت كل هذا الوقت أنا لو محلك من أول خمس دقائق تركت المكان

  18. موضوعك راائع خيو ومن وصف كلامك اكيد هاللي قدامك عمرها طاق الـ50 وهذا طول عمرهم مافيه اي اهتمام للغير بهالمسائل الله يصلحهم بس

  19. ههههههههههههههه يسلموو خيو بصرااحه انا حسيت بالمعاناه اللي مريت فيها بس مو كل الحريم كذا هذي تلقاها وحده سخيفه وما عندها سالفه

  20. موضوع غريب شوي ؟؟!! اذا افترضنا انه صار … ممكن يكون فيه نساء تتصرف بهذا الشكل بس الغلطة غلطة بنده لما يكون فيه زحمه المفترض يفتحون كل الكاشيرات مو بس 3 او 4 وهذي المشكلة دايما نعاني منها في بنده في كل فروعهم يعني الكاشير موجود والعاملين ياطالعين يدخنون برا والا جالسين في المكاتب لما يكووون فيه زحمممممه افتحوا كل الكاشيرات حتى ماتعطلون مصالح الناس وتاخرونهم او حتى ممكن تخسرونهم زي اخينا اللي ترك اغراضه ومااشترى ولا شي

  21. الحين بس لان السالفة صايرة على امرأة .. سويتوها قضية وانها متخلفة وفوضوية لا وبعض الردود تقول وخروا عنها في الشارع ومادري شنو .. وش دخل سالفة السواقة الحين .. غصب يعني تطلعونا متخلفات ..!! وشرايك اني اقولك مرت علينا حالات اكثر من هالنوع بس طبعا مو من نوعك لانها مبالغ فيها .. بس مرت والبطل فيها الرجل .. ما قلنا شي ياخي .. نطوفها واحنا نضحك.. حبكت على الحرمة يعني .. وثانيا .. ما يصير تعمم على الحريم كلهم.. ههههههههههه قال يبي يستخدم حق الفيتو قال… مشكور على اللفتة وحاول تشوف مواضيع اجتماعية اقوى من جذي .. 🙂

  22. عموما وجهة نظر جيدة وضع كاشير خاص للجنس اللطيف من باب تسهيل الأمر لهم حتى يكون حيله بينهم …. وبيني وبينك فيه نوعيات أفضل من الرجال في أدب وإتكيت التعامل أثناء قضاء احتياجاتهم اليومية

  23. ههههههههههههه وربي موضوعك تحفه صح انه مبالغه كله وكلام نصه من العقل بس عجبني وضحكني اسلووبك اما 10 بعدين 5 خخخخ وبعدين تهاووش ولدها وترجع تكلم بالجوال الشغاله وبعدين تجي تلعن اصلك عشان تحسبنك تغازلها خخخخخخخخخ ياحبيلنا بس نجنن ههههههههههههه شكرا على هالموضوع الشي 😀

  24. والله على بالي بتقول سوو كاشيرات للحريم عشان ما يصير اختلاط و يصير الرجال قريب مره من الحريم ,, أثره موضوع اقرب للفكاهه الي مالها فايدة مع احترامي لان مو كل الناس زي كذا !!

  25. أسلوبك الساخر هذا راااااااااااائع لا بل أكثر من رائع وشكراً بالتوفيق

  26. وحلفت أن لن أقف عند كاشير تحاسب عنده امرأة عقليه سقيمه!! اعانك الله على نفسك. تحياتي Men3fes

  27. ههااااااااااااههههههههههههههههههههههههههه ضحكة من قلبي تخيلت شكلك وانت واقف تنتظر خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ بس شكلك تبالغ مو لهالدرجة يسلمووووو

  28. السلام عليكم …. اولا : كل عام وانتم بخير ثانيا: اشكرك على الموضوع المهم و الملاحظه الجيدة واحب اني اعمل مداخله بسيطه … بنسبة للموقف بشكل عام المراه غالطانة المفروض الواحد ما يطلع يتسوق الا يعرف كم معه اولا ..ثم تقدر مشترياتها حسب المبلغ المتوفر بدل اخذ الزيادة وهذا دليل على عدم التصرف الجيد في عمل مزانية التسوق اما بالنسبه لاخراج المبلغ هذا يدل على انا الانسان الذي يتصرف بهذا انسان غير نظامي .. في حياة المنزليه او العملية .. بشكل عام .. وشكرا ..

  29. ترى انا اشتغلت كاشير قبل كده و اهون عندي انه يوقف في سرايا 20 حرمة من نفس النوع اللي انت قلته ولا يوقف واحد رجال يتفلسف على كل الناس اللي واقفة قدامه في السرى

  30. هاهاهاهاي من جد ترفع الضغط ويمكن اللي يقرون الموضوع يحسون بالمبالغة لكن أنا ما حسيت بكذا أبد لأني لو مريت بمواقف كذا أحس بنفس شعورك بالضبط أحس بالساعة تتحول عشر ساعات :@ لكني من جد مستغربة من التصنيفات اللي عليكم سواء كاتب الموضوع أو اللي يردون اذا موقف شين جانا من رجال عممناه على الكل وبالمثل الحريم غريب مجتمعنا مدري متى بتنتهي حرب الرجال والحريم فيه هذا خطأ ممكن يصدر من رجال أو حرمة عديمين الاحساس بالمسؤولية والوقت والناس وواجبنا ننبهم لكذا بغض النظر عن هالتصنيفات يعني مثلا أقولكم موقف وانا بنت عشان لا يزعلون البنات هاهاهاي بالجامعة وقت ماننزل عند البوابة تجي سيارة قدامنا ساعة البنت فيها على ما تشيل شنطتها وتنزل وصف سيارات وراها يجي باص كامل وينزلون مية بنت منه ((صيغة مبالغة كح)) وهي باقي مدري وش تصفف يختي بتلبسين انتي في السيارة لو ايش كلها شنطه بيدك وانزلي هي مسأله احسااااااااااااااااس سواء من بنت أو رجال عشان كذا للي استسخفوا الموضوع أقولهم ترا موضوع مهم بجد ومايعرف قيمة الوقت الا اللي انطعن منه < بس تراني مو عجوز كح وارجع بالاخير احط المسؤولية ع الكاشير > هاااع طلعت من راس الحريم لأن هو المسؤول بالأخير وهي غير مسؤولة < وصف ومعنى وبلاش تتضاربون ع اللي يسوى واللي ما يسوى لعبة حرب أولاد بنات لعبناها صغار ونسينا > واضح نسينا ههههههههههههه

  31. هههههه موضوع مميز وحلو وحقيقه تأخير واايد دام الحرمه تحسب بكل بطء ثانكسـ

  32. وياك الحق هاي الحرمة اطفر الواحد لو انا منك كنت بهزبها لكن مو كل الحريم جي وان شاء الله يسوون كاشيرات حق الحريم .

  33. أنا شخصيا كنت كاشير في بنده ويا كثر المواجع من هالأشكال بس أكثرهم العجايز خلاص سرت إذا شفتها جايه أقفل مكينتي وأطلع لدورة المياه ولا أصرف نفسي بأي شئ والطامة الكبرى تقول لي لا حسابك غلط وأرجع أحاسبها من جديد بس تعليقك على هذا الموقف إبـــــــــدااااااااااع الله يعطيك العافيه

  34. قرئت تقريبا كل التعليقات بس الموضوع مايستاهل كل هالزعل من البعض لانه الموضوع تقريبا من باب الفكاهه والمبالغه طبعا وشكرا على التعليقات الي من Miss saudi و mischocolat و مجنونته ونوف وGirl وشكرا للجميع

  35. فمي انشق من الضحك انت متاكد انه حصل معاك هذا الموقف في هيبر بندا لانه كان خلفي واحد طفشان ومستعجل لما كنت اعد فلوووووووووسي

  36. مو شرط ان حرمه سوت كذا معناها كل ااحريم كذا انالاجا وقت الحساب احط الاغراض مرة وحده واذا الحساب تحت مية اطلع مية ريال ويرجع للباقي واذااكثر اطلع مية ثانية او خمسين

  37. اول ما ادري وش قصدك من هالموضوع انا احيي هالمرأة اللي رايح تشتري اغرضها لانه شكل رجلها دبشة ولا هو قد المسؤولية وهذا اللي اضطرها تطلع هي بنفسها وتشتري واخرتها يجي واحد مثلك ويكتب عنها ولا بعداخرتها ما خذيت مقاضيك يعني ما استفدت من روحتك للسوق الا كسب اثم حشك بالحرمة المسكينة

  38. أشخص المشكلة في الحقيقة في الكاشير وطريقة التعامل وليس في الزبون فقط .. وإذا كان هناك مطالبات نوجهها لشركات بيع التجزئة ( بندة – كارفور – جيان – وغيرها ) فالمطلوب تأهيل العاملين في الكاشير للتعامل مع هذه المواقف وتوفير أجهزة إحصاء المشتريات مع العربة أو وسط المتجر ليتمكن الزبون من إحصاء المشتريات قبل التوجه إلى المحاسب .. كما أن وجود بطاقات مسبقة الدفع يتم شحنها تعد طريقة مثلى لسلاسة المبيعات وأعتقد أن فن التسويق قد درس هذه المشاكل ووفر لها طرقاً ناجعة في العلاج

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

الكاشير النسائي

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول